2 Baruch 30 — Aramaic (Peshitta)

1 ܘܢܗܘܐ ܡܢ ܒܬܪ ܗܠܝܢ ܐܡܬܝ ܕܢܬܡܠܐ ܙܒܢܐ ܕܡܐܬܝܬܗ ܕܡܫܝܚܐ ܘܢܗܦܘܟ ܒܬܫܒܘܚܬܐ ܗ̇ܝܕܝܢ ܟܘܠܗܘܢ ܐܝܠܝܢ ܕܕܡܟ̣ܘ ܒܣܒܪܗ ܩܝܡ̇ܝܢ

2 ܘܢܗܘܐ ܒܗ̇ܘ ܙܒܢܐ̣ ܢܬܦܬܚܘܢ ܐܘܨܪ̈ܐ ܗ̇ܢܘ̇ܢ ܕܒܗܘܢ ܐܬܢܛܪ ܡܢܝܢܐ ܕܢܦܫ̈ܬܐ ܕܙܕܝ̈ܩܐ ܘܢܦܩ̈ܢ ܘܢܬܚܙܐ ܣܘܓܐ̈ܗܝܢ ܕܢܦܫ̈ܬܐ ܐܟܚܕܐ ܒܚܕ ܟܢܫܐ̇ ܕܚܕܐ ܬܪܥܝܬܐ ܘܢܚ̈ܕܝܢ ܩܕܡ̈ܝܬܐ̣ ܘܐܚܪ̈ܝܬܐ ܠܐ ܢܬܬܥ̈ܝܩܢ

3 ܝܕ̈ܥܢ ܓܝܪ ܕܡܛ̣ܐ ܙܒܢܐ ܕܐܡܝܪ ܥܠܘܗܝ̇ ܕܫܘܠܡܗܘܢ ܕܙܒ̈ܢܐ

4 ܢܦܫ̈ܬܗܘܢ ܕܝܢ ܕܪ̈ܫܝܥܐ ܟܕ ܢܚ̈ܙܝܢ ܟܠܗܝܢ ܗܠܝ̣ܢ ܗܝ̇ܕܝܢ ܝܬܝܪܐܝܬ ܢܫ̈ܘܚܢ

5 ܝܕ̈ܥܢ ܓܝܪ ܕܡ̣ܛܐ ܬܫܢܝܩܗܘܢ ܘܐܬ̣ܐ ܐܒܕܢܗܘܢ ܀ ܀ ܀ ܀