1 ܘܐܙ̇ܠܬ ܡܢ ܬܡܢ ܘܝܬ̇ܒܬ ܒܢܚܠܐ ܕܩܕܪܘܢ ܒܡܥܪܬܐ ܕܐܪܥܐ ܘܩܕ̇ܫܬ ܢܦܫܝ ܬܡܢ ܘܠܚܡܐ̣ ܠܐ ܐܟ̇ܠܬ ܘܠܐ ܟܦܢ̇ܬ ܘܡ̈ܝܐ ܠܐ ܐܫ̇ܬܝܬ ܘܠܐ ܨܗ̇ܝܬ ܘܗ̇ܘܝܬ ܬܡܢ ܥܕܡܐ ܠܝܘܡܐ ܫܒܝܥܝܐ ܐܝܟ ܕܦܩܕܢܝ
2 ܘܡܢ ܒܬܪܟ̣ܢ ܐܬܝ̇ܬ ܠܐܬܪܐ ܗ̇ܘ ܕܡܠܠ ܥܡܝ ܬܡܢ
3 ܘܗ̣ܘܐ ܒܡܥܪ̈ܒܘܗܝ ܕܫܡܫܐ ܢܣܒܬ ܢܦܫܝ ܚܘܫܒܐ ܣܓܝܐܐ ܘܫ̇ܪܝܬ ܕܐܡܠܠ ܩܕܡ ܚܝܠܬܢܐ ܘܐܡ̇ܪܬ
4 ܐܘ ܗ̇ܘ ܕܥܒ̣ܕ ܐܪܥܐ ܫܡܥܝܢܝ ܗ̇ܘ ܕܩܒܥ ܪܩܝܥܐ ܒܡܠܬܗ ܘܪܘܡܗܘܢ ܕܫܡܝܐ ܫܪܪ ܒܪܘܚܐ ܗ̇ܘ ܕܩ̣ܪܐ ܡܢ ܪܝܫ ܥܠܡܐ̣ ܠܡܕܡ ܕܥܕܟܝܠ ܠܐ ܗܘ̣ܐ ܘܡܫܬܡܥܝܢ ܠܟ
5 ܐܢܬ ܕܠܐܐܪ ܦܩ̣ܕܬ ܒܪܡܙܟ ܘܠܐܝܠܝܢ ܕܥܬܝ̈ܕܢ ܚܙ̣ܝܬ̣ ܐܝܟ ܐܝܠܝܢ ܕܥܒ̇ܪܢ
6 ܐܢܬ ܕܠܚܝ̈ܠܘܬܐ ܕܩܝܡ̇ܝܢ ܩܕܡܝܟ ܒܚܘܫܒܐ ܪܒܐ ܡܕܒ̣ܪܬ ܐܦ ܠܚܝ̈ܬܐ ܩܕܝ̈ܫܬܐ ܕܡܢܝܢ ܠܝܬ ܠܗܝܢ ܕܥ̣ܒܕܬ ܡܢ ܥܠܡ ܕܫܠܗܒܝܬܐ ܘܕܢܘܪܐ ܗܠܝܢ ܕܩܝ̈ܡܢ ܚܕܪ̈ܝ ܬܪܘܢܘܣ ܕܝܠܟ ܒܙܥܝܦܘܬܐ ܡܕܒ̣ܪܬ
7 ܠܟ ܒܠܚܘܕܝܟ ܐܝܬ ܗܕܐ ܕܬܥܒܕ ܒܪܫܥܬܗ ܟܘܠ ܕܨܒ̣ܝܬ
8 ܗ̇ܘ ܕܒܡܢܝܢܐ ܛܘ̈ܦܝ ܡܛܪܐ ܥܠ ܐܪܥܐ ܡܡܛܪ ܘܫܘܠܡܗܘܢ ܕܙܒ̈ܢܐ ܥܕ ܠܐ ܢܐܬܘܢ ܐܢܬ ܒܠܚܘܕܝܟ ܝܕ̇ܥܬ ܚܘܪ ܒܒܥܘܬܝ
9 ܐܢܬ ܓܝܪ ܒܠܚܘܕܝܟ ܡܫܟܚ ܐܢܬ ܕܬܣܝܒܪ ܠܟܠܗܘܢ ܐܝܠܝܢ ܕܩܝܡ̇ܝܢ ܘܠܐܝܠܝܢ ܕܥܒ̇ܪܝܢ ܘܠܐܝܠܝܢ ܕܥܬܝܕܝܢ ܠܐܝܠܝܢ ܕܚ̇ܛܝܢ ܘܠܐܝܠܝܢ ܕܡܙܕܕܩܝܢ ܐܝܟ ܚ̇ܝܐ ܕܠܐ ܡܬܥܩܒ
10 ܐܢܬ ܗܘ ܓܝܪ ܒܠܚܘܕܝܟ ܚ̇ܝܐ ܕܠܐ ܡܐ̇ܬ ܘܠܐ ܡܬܥܩܒ ܘܡܢܝܢܐ ܕܒܢܝ̈ܢܫܐ ܝܕܥܬ
11 ܘܐܢ ܒܙܒܢܐ ܣܓ̈ܝܐܐ ܚܛܘ ܘܐܚܪ̈ܢܐ ܠܐ ܗܘܐ ܩܠܝܠ ܐܙܕܕܩܘ
12 ܐܢܬ ܝܕ̇ܥܬ ܕܐܝ̇ܟܐ ܡܢܛܪܬ ܚܪܬܐ ܕܐܝܠܝܢ ܕܚܛܘ ܐܘ ܫܘܠܡܐ ܕܐܝܠܝܢ ܕܐܙܕܕܩܘ
13 ܐܠܘ ܓܝܪ ܗܠܝܢ ܗܘܘ ܚ̈ܝܐ ܒܠܚܘܕ ܕܗܪܟܐ ܠܟܠܢܫ ܠܝܬ ܗܘܐ ܡܕܡ ܕܡܪܝܪ ܡܢ ܗܕܐ
14 ܡܢܐ ܓܝܪ ܡܗܢܐ ܚܝܠܐ ܕܗ̇ܦܟ ܠܟܪܝܗܘܬܐ ܐܘ ܡܙܘܢܐ ܕܣܒܥܐ ܕܗ̇ܦܟ ܠܟܦܢܐ ܐܘ ܫܘܦܪܐ ܕܗ̇ܦܟ ܡܣܬܢܐ
15 ܒܟܠܥܕܢ ܓܝܪ ܟܝܢܗܘܢ ܕܒܢܝܢ̈ܫܐ ܡܬܚܠܦ
16 ܐܘ ܠܐ ܡܕܡ ܐܝܟ ܡܐ ܕܐܝ̇ܬܝܢ ܗ̇ܘܐ ܓܝܪ ܡܢ ܩܕܝܡ ܗܫܐ ܠܐ ܐܝ̇ܬܝܢ ܘܐܝܟ ܡܐ ܕܐܝܬ̣ܝܢ ܗܫܐ ܒܬܪ ܟܢ ܠܐ ܡܩ̇ܘܝܢܢ
17 ܐܠܘ ܠܐ ܓܝܪ ܕܥܬܝܕ ܗܘܐ ܕܢܗܘܐ ܫܘܠܡܐ ܠܟܠ̣ ܠܣܪܝܩܘܬܐ ܗ̇ܘܐ ܗܘܐ ܫܘܪܝܢ
18 ܐܠܐ ܟܠ ܕܐ̇ܬܐ ܡܢ ܠܘܬܟ ܐܘܕܥܝܢܝ ܘܥܠ ܡܕܡ ܕܒ̇ܥܐ ܐܢܐ ܡܢܟ ܢܗ̇ܪܝܢܝ
19 ܥܕܡܐ ܠܐܡܬܝ ܡܕܡ ܕܡܬܚܒܠ ܡܩܘܐ ܘܥܕܡܐ ܠܐܡܬܝ ܙܒܢܗܘܢ ܕܡܝܘ̈ܬܐ ܡܨܠܚ ܘܥܕ ܐ̇ܝܢܐ ܙܒܢܐ ܐܝܠܝܢ ܕܥ̇ܒܪܝܢ ܒܥܠܡܐ ܡܬܦܠܦܠܝܢ ܒܪܘܫܥܐ ܣܓܝܐܐ
20 ܦܩܘܕ ܗܟܝܠ ܒܪ̈ܚ̣ܡܐ ܘܐܩܝܡ ܟܠ ܕܐܡܪܬ ܕܬܝܬܐ ܕܢܬܝܕܥ ܚܝܠܟ ܠܐܝܠܝܢ ܕܣܒ̇ܪܝܢ ܕܢܓܝܪܘܬ ܪܘܚܟ ܟܪܝܗܘܬܐ ܗܝ
21 ܘܚܘܐ ܠܐܝܠܝܢ ܕܠܐ ܝܕ̇ܥܝܢ ܘܚ̣ܙܘ ܡܕܡ ܕܓܕܫܢ ܘܠܡܕܝܢܬܢ ܥܕ ܗܫܐ ܐܝܟ ܢܓܝܪܘܬ ܪܘܚܐ ܕܐܘܚܕܢܟ ܡܛܠ ܕܐܢܬ ܩܪܝܬܢ ܥܠ ܫܡܟ ܥܡܐ ܚܒܝܒܐ
22 ܟܘܠ ܗܟܝܠ ܡܢ ܗܫܐ ܟܝܢܐ ܡܝܘܬܐ
23 ܘܓܥܘܪ ܡܟܝܠ ܒܡܠܐܟܗ ܕܡܘܬܐ ܘܬܬܚܙܐ ܬܫܒܘܚܬܟ ܘܬܬܝܕܥ ܪܒܘ̇ܬ ܝܐܝܘܬܟ ܘܬܬܚܬܡ ܫܝܘܠ ܕܡܢ ܗܫܐ ܠܐ ܬܣܒ ܡܝ̈ܬܐ ܘܢܦܢܘܢ ܐܘܨܪ̈ܐ ܕܢܦܫ̈ܬܐ ܕܚܒ̈ܝܫܢ ܒܗܘܢ
24 ܣܓܝܐ̈ܢ ܐ̈ܢܝܢ ܓܝܪ ܫܢ̈ܝܐ ܐܝܟ ܕܨ̈ܕܝܢ ܕܡܢ ܝܘ̈ܡܝ ܐܒܪܗܡ ܘܐܝܣܚܩ ܘܝܥܩܘܒ ܘܕܟܠܗܘܢ ܐܝܠܝܢ ܕܕ̇ܡܝܢ ܠܗܘܢ ܕܒܐܪܥܐ ܕܡ̇ܟܝܢ ܗܠܝܢ ܕܡܛܠܬܗܘܢ ܐܡ̣ܪܬ ܕܒ̇ܪܝܬ ܥܠܡܐ
25 ܘܗܫܐ ܚܘܐ ܒܥܓܠ ܬܫܒܘܚܬܟ ܘܠܐ ܬܫܘܚܪ ܡܕܡ ܕܡܢܟ ܐܬܡܠܟ
26 ܘܗ̣ܘܐ ܕܟܕ ܫܠܡܬ ܡ̈ܠܝܗ̇ ܕܨܠܘܬܐ ܗܕܐ ܐܬܪܫܠܬ ܣ̇ܓܝ ܀ ܀ ܀