1 ܘܥܢ̇ܝܬ ܘܐܡ̇ܪܬ ܗܐ ܐܘܕܥܬܢܝ ܕܘܒܪܗܘܢ ܕܙܒ̈ܢܐ ܘܡܕܡ ܕܥܬܝܕ ܕܢܗܘܐ ܡܢ ܒܬܪ ܗܠܝܢ ܘܐܡ̣ܪܬ ܠܝ ܕܠܥܡ̈ܡܐ ܐ̇ܙܠ ܦܘܪܥܢܐ ܕܐܬܐܡܪ ܡܢܟ
2 ܘܗܫܐ ܝܕ̇ܥ ܐܢܐ ܕܣܓܝܐܝܢ ܐܢܘܢ ܐܝܠܝܢ ܕܚܛܘ ܘܒܡܨܠܚܢܘܬܐ ܚܝܘ ܘܐܙܠܘ ܡܢ ܥܠܡܐ ܘܩܠܝܠ ܗܘ ܕܝܢ ܥܡ̈ܡܐ ܡܫܬܚܪܝܢ ܒܗ̇ܢܘܢ ܙܒ̈ܢܐ ܗ̇ܢܘܢ ܕܠܗ̇ܢܘܢ ܡܬܐܡܪ̈ܢ ܡ̈ܠܐ ܐܝܠܝܢ ܕܐܡ̣ܪܬ
3 ܘܡܢܐ ܓܝܪ ܝܘܬܪܢܐ ܐܝܬ ܒܗܕܐ ܐܘ ܡܢܐ ܕܒܝܫ ܡܢ ܗܠܝܢ ܕܚ̈ܙܝܢ ܕܓ̇ܕ̈ܫܢ ܡܣ̇ܟܝܢܢ ܕܢܚܙܐ
4 ܬܘܒ ܕܝܢ ܐܡܠܠ ܩܕܡܝܟ
5 ܡܢܐ ܝܬܪܘ ܗ̇ܢܘܢ ܕܝܕܥܘ ܩܕܡܝܟ ܘܠܐ ܐܙ̣ܠܘ ܒܣܪܝܩܘܬܐ ܐܝܟ ܫܪܟܐ ܕܥܡ̈ܡܐ ܘܠܐ ܐܡܪܘ ܠܡܝ̈ܬܐ ܕܗܒ̣ܘ ܠܢ ܚ̇ܝ̈ܐ ܐܠܐ ܒܟܠܙܒܢ ܡܢܟ ܕܚ̇ܠܝܢ ܗܘܘ ܘܐܘܪ̈ܚܬܟ ܠܐ ܐܪܦܝܘ
6 ܘܗܐ ܐܬܚܦܛܘ ܘܐܦܠܐ ܡܛܘܠܬܗܘܢ ܪܚܡ̇ܬ ܥܠ ܨܗܝܘܢ
7 ܘܐܢ ܐܚܪ̈ܢܐ ܐܪܫܥܘ ܡܬܒܥܐ ܗܘܐ ܠܗ̇ ܠܨܗܝܘܢ ܕܒ̇ܥ̈ܒܕܝܗܘܢ ܕܐܝܠܝܢ ܕܦܠܚܘ ܛ̇ܒ̈ܬܐ ܢܫܬܒܩ ܠܗ̇ ܘܠܐ ܒܥ̇ܒ̈ܕܝܗܘܢ ܕܥ̇ܒ̈ܕܝ ܥܘ̣ܠܐ ܬܛܒܥ
8 ܐܠܐ ܡ̣ܢܘ ܡܪܝܐ ܡܪܝ ܡܕܪܟ ܠܗ ܠܕܝ̣ܢܟ ܐܘ ܡ̣ܢܘ ܡܥܩܒ ܥܘܡܩܗ̇ ܕܐܘܪܚܟ ܐܘ ܡ̣ܢܘ ܡܬܚܫܒ ܥܠ ܝܘܩܪܗ ܕܫܒܝܠܟ
9 ܐܘ ܡ̣ܢܘ ܡܫܟܚ ܡܬܚܫܒ ܥܠ ܬܪܥܝܬܟ ܕܠܐ ܡܬܕܪܟܐ ܐܘ ܡ̣ܢܘ ܡܡܬܘܡ ܡܢ ܐܝ̈ܠܝܕܐ ܐܫܟܚ ܪܝܫܐ ܐܘ ܫܘܠܡܐ ܕܚܟܡܬܟ
10 ܟܘܠܢ ܓܝܪ ܐܬܕܡܝܢ ܠܗܒܠܐ
11 ܐܝ̇ܟܢܐ ܓܝܪ ܕܗܒܠܐ ܣ̇ܠܩ ܕܠܐ ܡܢ ܠܒܐ ܘܗ̇ܦܟ ܕܥ̇ܟ̣ ܗܟܢܐ ܗܘ ܟܝܢܗܘܢ ܕܒܢ̈ܝ ܐܢܫܐ ܕܠܐ ܒܨܒܝܢܗܘܢ ܐ̇ܙܠܝܢ ܘܡܢܐ ܗ̇ܘܐ ܠܗܘܢ ܒܫܘܠܡܐ ܠܐ ܝܕ̇ܥܝܢ
12 ܙܕܝܩ̈ܐ ܓܝܪ ܫܦܝܪ ܡܣܟܝܢ ܠܫܘܠܡܐ ܘܕܠܐ ܕܚܠܬܐ ܡܢ ܗܢܐ ܥܘܡܪܐ ܐܙ̇ܠܝܢ ܡܛܘܠ ܕܐܝܬ ܠܗܘܢ ܠܘܬܟ ܚܝܠܐ ܕܥ̇ܒ̈ܕܐ ܕܢܛܝܪ ܒܐܘܨܪ̈ܐ
13 ܡܛܠ ܗܢܐ ܐܦ ܗ̣ܢܘܢ ܕܠܐ ܕܚܠܬܐ ܫܒ̇ܩܝܢ ܠܗ ܠܥܠܡܐ ܗܢܐ ܘܟܕ ܬܟܝܠܝܢ ܒܚܕܘܬܐ ܡܣܟܝܢ ܕܢܩܒܠܘܢ ܥܠܡܐ ܕܡ̇ܠܟܬ ܠܗܘܢ
14 ܠܢ ܕܝܢ ܘܝ ܠܐܝܠܝܢ ܕܐܦ ܗܫܐ ܡܨܛܥܪܝܢ̣ܢ ܘܒܗ̇ܘ ܙܒܢܐ ܡ̇ܣܟܝܢܢ ܠܒܝ̣ܫ̈ܬܐ
15 ܐܢܬ ܕܝܢ ܝܕ̇ܥ ܐܢܬ ܬܪܝܨܐܝܬ ܡܢܐ ܥܒ̣ܕܬ ܡܢ ܥܒ̣̈ܕܝܟ ܡܛܠ ܕܚܢܢ ܠܐ ܡܫܟ̇ܚܝܢܢ ܕܢܣܬܟܠ ܒܡܕܡ ܕܛܒ ܐܝ̇ܟܢܐ ܕܐܢܬ ܓܒܘܠܢ
16 ܬܘܒ ܕܝܢ ܐܡܠܠ ܩܕܡܝܟ ܡܪܝܐ ܡܪܝ
17 ܟܕ ܠܐ ܐܝܬܘܗܝ ܗܘܐ ܥܠܡܐ ܡܢ ܩܕܝܡ ܥܡ ܥܡܘܪ̈ܘܗܝ ܐܬܚ̇ܫܒܬ ܘܐܡ̇ܪܬ ܒܡܠܬܐ ܘܒܪ ܫܥܬܗ ܥܒ̈ܕܝܗܝܢ ܕܒ̣ܪ̈ܝܬܐ ܩܡܘ ܩܕܡܝܟ
18 ܘܐܡ̣ܪܬ ܕܬܥܒܕ ܠܥܠܡܟ̣ ܒܪܢܫܐ ܡܦܪܢܣܢܐ ܠܥ̇ܒ̈ܕܝܟ ܕܢܬܝܕܥ ܕܠܐ ܗܘܐ ܗ̣ܘ ܐܬܥܒܕ ܡܛܠ ܥܠܡܐ̣ ܐܠܐ ܥܠܡܐ ܡܛܠܬܗ
19 ܘܗܫܐ ܚ̇ܙܐ ܐܢܐ ܕܥܠܡܐ ܕܐܬܥܒܕ ܡܛܠܬܢ ܗܐ ܡܩܘܐ ܘܚܢܢ ܕܝܢ ܕܡܛܠܬܢ̇ ܗ̣ܘܐ ܐܙ̇ܠܝܢܢ ܀