1 ܘܗ̣ܘܐ ܡܢ ܒܬܪ ܗܠܝܢ ܐܢܐ ܒܪܘܟ ܩܐ̇ܡ ܗ̇ܘܝܬ ܥܠ ܛܘ̣ܪܐ ܕܨܗܝܘܢ ܘܗܐ ܩܠܐ ܐܬ̣ܐ ܡܢ ܡܪ̈ܘܡܐ ܘܐܡ̣ܪ ܠܝ
2 ܩܘܡ ܥܠ ܪ̈ܓܠܝܟ ܒܪܘܟ ܘܫܡ̣ܥ ܡܠܬܗ ܕܐܠܗܐ ܚܝܠܬܢܐ
3 ܡܛܠ ܕܐܬܕܡܪܬ ܥܠ ܡܕܡ ܕܓܕܫܗ̇ ܠܨܗܝܘܢ ܡܛܠ ܗܢܐ ܡܬܢܛܪܘ ܬܬܢܛܪ ܠܫܘܠܡܗܘܢ ܕܙܒ̈ܢܐ ܕܬܗܘܐ ܠܣ̇ܗܕܘܬܐ
4 ܕܐܢ ܢܐܡܪ̈ܢ ܡܡܬܘܡ ܡܕܝ̈ܢܬܐ ܐܝܠܝܢ ܕܡܨ̈ܠܚܢ ܕܠܡܢܐ ܐܝܬܝ ܥܠܝܢ ܐܠܗܐ ܚܝܠܬܢܐ ܦܘܪܥܢܐ ܗܢܐ
5 ܐܡ̣ܪ ܠܗܝܢ ܐܢܬ ܘܐܝܠܝܢ ܕܕܡ̈ܝܢ ܠܟ ܐܝܠܝܢ ܕܚ̣ܙܝܬܘܢ ܒܝ̣ܫܬܐ ܗܕܐ ܘܦܘܪ̈ܥܢܐ ܕܐ̇ܬܝܢ ܥܠܝܟܝܢ ܘܥܠ ܥܡܟܝܢ ܒܙܒܢܗ ܕܓܡܝܪܐܝܬ ܢܬܪܕܘܢ ܥܡ̈ܡܐ̣
6 ܘܗ̇ܝܕܝܢ ܢܩܘܘܢ
7 ܘܐܢ ܢܐܡܪ̈ܢ ܒܗ̇ܘ ܙܒܢܐ ܕܐܡܬܝ
8 ܬܐܡ̣ܪ ܠܗܝܢ ܐܢ̇ܬܝܢ ܕܐܫܬܝܬܝܢ ܚܡ̣ܪܐ ܡܨܠܠܐ̣ ܐܫܬܝܝܢ ܐܦ ܡܢ ܬܛܪܗ ܕܝ̣ܢܗ ܓܝܪ ܕܪܡܐ ܕܠܐ ܡܣܒ ܒܐ̈ܦܐ ܗܘ
9 ܡܛܠ ܗܢܐ ܥܠ ܒܢܘ̈ܗܝ ܠܘܩܕܡ ܠܐ ܚܣ ܐܠܐ ܐܫܬܢܕ ܒܗܘܢ̣ ܐܝܟ ܕܒܣܢܐ̈ܘܗܝ ܡܛܠ ܕܚܛܘ
10 ܗܝ̇ܕܝܢ ܗܟܝܠ ܐܬܪܕܝܘ ܡܛܠ ܕܢܬܚܣܘܢ
11 ܗܫܐ ܕܝܢ ܐܢܬܘܢ ܥܡ̈ܡܐ ܘܐܡ̈ܘܬܐ ܚܝ̇ܒܝܢ ܐܢܬܘܢ ܕܗܢܐ ܟܠܗ ܙܒܢܐ ܕܫܬܘܢܗ̇ ܠܐܪܥܐ ܘܐܬܚܫܚܬܘܢ ܒܒ̣ܪܝܬܐ ܕܠܐ ܒܙܕܩܐ
12 ܒܟܠܙܒܢ ܓܝܪ ܗ̣ܘܝܬ ܡܛܐܒ ܠܟܘܢ ܘܐܢ̣ܬܘܢ ܗ̣ܘܝܬܘܢ ܟ̇ܦܪܝܢ ܒܛܝܒܘܬܐ ܒܟܠܙܒܢ ܀