1 ܘܥ̣ܢܐ ܡܪܝܐ ܘܐܡ̣ܪ ܠܝ ܫܦܝܪ ܐܬܕ̣ܡܪܬ ܥܠ ܡܐܙܠܗܘܢ ܕܒܢܝ̈ܢܫܐ ܐܠܐ ܠܐ ܛܒܐܝܬ ܕܢܬ ܥܠ ܒܝ̣ܫ̈ܬܐ ܐܝܠܝܢ ܕܓܕ̈ܫܢ ܠܐܝܠܝܢ ܕܚ̇ܛܝܢ
2 ܘܕܐܡ̣ܪܬ ܕܙܕܝܩ̈ܐ ܐܬܚܛܦܘ ܘܪ̈ܫܝܥܐ ܐܨܠܚܘ
3 ܘܕܐܡ̣ܪܬ ܕܐܢܫ ܠܐ ܝܕܥܗ ܠܕܝ̣ܢܟ
4 ܡܛܘܠ ܗܢܐ ܫܡ̣ܥ ܘܐܡ̇ܪ ܠܟ ܘܨܘܬܝܢ ܘܐܫܡܥܟ ܡ̈ܠܝ
5 ܫܦܝܪ ܠܐ ܝܕ̇ܥ ܗܘܐ ܒܪ ܐܢܫܐ ܕܝܢ̣ܝ ܐܠܘ ܠܐ ܩܒ̇ܠ ܢܡܘܣܐ ܘܐܠܘ ܠܐ ܐܪܬܝܬܗ ܒܣܟܘܠܬܢܘܬܐ
6 ܗܫܐ ܕܝܢ ܡܛܠ ܕܟܕ ܝܕ̇ܥ ܥܒܪ ܘܡܛܠ ܗܢܐ ܐܦ ܟܕ ܝܕ̇ܥ ܢܫܬܢܩ
7 ܘܥܠ ܙܕܝܩ̈ܐ ܕܐܡ̣ܪܬ ܥܠܝܗܘܢ ܕܡܛܠܬܗܘܢ ܐܬ̣ܐ ܗܢܐ ܥܠܡܐ ܐܠܐ ܐܦ ܗ̇ܘ ܬܘܒ ܕܥܬܝܕ ܡܛܠܬܗܘܢ
8 ܗܢܐ ܓܝܪ ܥܠܡܐ ܐܝܬܘܗܝ ܠܗܘܢ ܐܓܘܢܐ ܘܥܡܠܐ ܒܠܐܘܬܐ ܣܓܝܐܬܐ ܘܗ̇ܘ ܗܟܝܠ ܕܥܬܝܕ ܟܠܝܠܐ ܒܬܫܒܘܚܬܐ ܪܒܬܐ ܀