Read 1 Samuel 9 side by side with translations · The Final Bible
1 ⲛⲉⲩⲛⲟⲩⲣⲱⲙⲉ ⲇⲉ ⲉⲃⲟⲗ ϩⲛⲛⲉϣⲏⲣⲉ ⲛⲃⲉⲛⲓⲁⲙⲓⲛ ⲉⲡⲉϥⲣⲁⲛ ⲡⲉ ϭⲓⲥ ⲡϣⲏⲣⲉ ⲛⲁⲃⲓⲏⲗ ⲡϣⲏⲣⲉ ⲛⲁⲑⲉⲗ ⲡϣⲏⲣⲉ ⲛⲃⲁⲭⲓⲑ ⲡϣⲏⲣⲉ ⲛⲁⲫⲉⲕ ⲡϣⲏⲣⲉ ⲛⲟⲩⲣⲱⲙⲉ ⲛⲓⲉⲙⲓⲛⲁⲓⲟⲥ ⲟⲩⲣⲱⲙⲉ ⲛⲇⲩⲛⲁⲧⲟⲥ
2 ⲁⲩⲱ ⲡⲁⲓ ⲛⲉⲟⲩⲛⲧϥⲟⲩϣⲏⲣⲉ ⲙⲙⲁⲩ ⲉⲡⲉϥⲣⲁⲛ ⲡⲉ ⲥⲁⲟⲩⲗ ⲉⲩⲣⲱⲙⲉ ⲡⲉ ⲉϥϫⲟⲥⲉ ϩⲛⲧⲉϥϭⲟⲧ ⲛⲁⲅⲁⲑⲟⲥ ⲁⲩⲱ ⲛⲉⲙⲛⲗⲁⲁⲩ ϩⲛⲛⲉϣⲏⲣⲉ ⲙⲡⲓⲥⲣⲁⲏⲗ ⲉⲛⲁⲛⲟⲩϥ ⲉⲣⲟϥ ⲉϥϫⲟⲥⲉ ⲉⲣⲟⲟⲩ ⲧⲏⲣⲟⲩ ⲉϩⲟⲩⲉ ⲉⲟⲩⲛⲁϩⲉⲃ ⲡⲁⲣⲁⲡⲕⲁϩ ⲧⲏⲣϥ
3 ⲁⲩⲱ ⲛⲉⲟⲟⲩ ⲛϭⲓⲥ ⲡⲉⲓⲱⲧ ⲛⲥⲁⲟⲩⲗ ⲁⲩⲥⲱⲣⲙ ϭⲓⲥ ⲇⲉ ⲡⲉⲓⲱⲧ ⲛⲥⲁⲟⲩⲗ ⲡⲉϫⲁϥ ⲛⲥⲁⲟⲩⲗ ⲡⲉϥϣⲏⲣⲉ ϫⲉϫⲓ ⲛⲙⲙⲁⲕ ⲛⲟⲩⲁ ⲛⲛⲉϩⲙϩⲁⲗ ⲛⲧⲉⲧⲛⲧⲱⲟⲩⲛ ⲛⲧⲉⲧⲛⲃⲱⲕ ⲛⲧⲉⲧⲛϣⲓⲛⲉ ⲛⲥⲁⲛⲉⲟⲟⲩ
4 ⲁⲩⲱ ⲁϥⲃⲱⲕ ⲉⲃⲟⲗ ϩⲙⲡⲧⲟⲟⲩ ⲛⲉⲫⲣⲁⲓⲙ ⲁⲩⲱ ⲟⲛ ⲁⲩⲃⲱⲕ ⲉⲃⲟⲗ ϩⲙⲡⲕⲁϩ ⲛⲥⲉⲗⲭⲁ ⲙⲡⲟⲩϩⲉ ⲉⲣⲟⲟⲩ ⲁⲩⲱ ⲟⲛ ⲁⲩⲃⲱⲕ ⲉⲃⲟⲗ ϩⲙⲡⲕⲁϩ ⲛⲉⲥⲁⲕⲓⲙ ⲙⲡⲟⲩϩⲉ ⲉⲣⲟⲟⲩ
5 ⲛⲧⲟⲟⲩ ⲇⲉ ⲛⲧⲉⲣⲟⲩⲉⲓ ⲉⲡⲕⲁϩ ⲛⲥⲓⲫ ⲡⲉϫⲉⲥⲁⲟⲩⲗ ⲙⲡⲉϥϩⲙϩⲁⲗ ⲉⲧⲛⲙⲙⲁϥ ϫⲉⲁⲙⲟⲩ ⲛⲧⲉⲛⲕⲧⲟⲛ ⲛⲧⲉⲛⲃⲱⲕ ⲉϩⲣⲁⲓ ⲉⲡⲉⲛⲙⲁ ⲙⲏⲡⲱⲥ ⲛⲧⲉⲡⲁⲉⲓⲱⲧ ⲗⲟ ⲉϥϥⲓⲣⲟⲟⲩϣ ϩⲁⲛⲉⲟⲟⲩ ⲛϥϥⲓⲣⲟⲟⲩϣ ⲉⲧⲃⲏⲏⲧⲛ
6 ⲡϩⲙϩⲁⲗ ⲇⲉ ⲡⲉϫⲁϥ ⲛⲁϥ ϫⲉⲉⲓⲥⲡⲣⲱⲙⲉ ⲙⲡⲛⲟⲩⲧⲉ ϩⲛⲧⲉⲓⲡⲟⲗⲓⲥ ⲁⲩⲱ ⲡⲣⲱⲙⲉ ⲉⲧⲙⲙⲁⲩ ϥⲛⲟⲉⲓ ⲛϩⲱⲃ ⲛⲓⲙ ⲁⲩⲱ ϣⲁϫⲉ ⲛⲓⲙ ⲛϣⲁϥϫⲟⲟⲩ ϣⲁⲩϣⲱⲡⲉ ⲧⲉⲛⲟⲩ ϭⲉ ⲙⲁⲣⲟⲛ ⲛⲁϥ ϫⲉⲕⲁⲥ ⲉϥⲉⲧⲁⲙⲟⲛ ⲉⲡⲧⲱϣ ⲛⲧⲉⲛϩⲓⲏ ⲉⲧⲉⲛⲛⲁⲃⲱⲕ ⲉⲣⲟⲥ
7 ⲥⲁⲟⲩⲗ ⲇⲉ ⲡⲉϫⲁϥ ⲙⲡⲉϥϩⲙϩⲁⲗ ⲉⲧⲛⲙⲙⲁϥ ϫⲉⲉⲓⲥϩⲏⲏⲧⲉ ϩⲏ ⲁⲛⲃⲱⲕ ⲟⲩ ⲡⲉⲧⲉⲛⲛⲁⲧⲁⲁϥ ⲙⲡⲣⲱⲙⲉ ⲙⲡⲛⲟⲩⲧⲉ ϫⲉⲛⲉⲟⲉⲓⲕ ⲁⲩⲟⲩⲱ ⲉⲃⲟⲗ ϩⲛⲛⲉⲛⲥⲕⲉⲩⲏ ⲁⲩⲱ ⲙⲛϭⲉ ⲗⲁⲁⲩ ⲛϩⲟⲩⲟ ⲛⲧⲟⲟⲧⲛ ⲉⲧⲣⲉⲛϫⲓⲧϥ ⲉⲣⲁⲧϥ ⲙⲡⲣⲱⲙⲉ ⲙⲡⲛⲟⲩⲧⲉ
8 ⲡϩⲙϩⲁⲗ ⲇⲉ ⲁϥⲟⲩⲱϩ ⲉⲧⲟⲟⲧϥ ⲁϥⲣⲟⲩⲱ ϩⲁⲣⲱϥ ⲛⲥⲁⲟⲩⲗ ϫⲉⲉⲓⲥϩⲏⲏⲧⲉ ⲁⲓϭⲓⲛⲉ ⲛⲟⲩϭⲓⲥⲕⲓⲧⲉ ⲛⲥⲁⲧⲉⲉⲣⲉ ⲛϩⲁⲧ ϩⲛⲧⲁϭⲓϫ ⲉⲕⲉϫⲓⲧⲥ ⲛⲅⲧⲁⲁⲥ ⲙⲡⲣⲱⲙⲉ ⲙⲡⲛⲟⲩⲧⲉ ⲛϥⲧⲁⲙⲟⲛ ⲉⲡⲧⲱϣ ⲛⲧⲉⲛϩⲓⲏ
9 ϫⲓⲛⲉϣⲟⲣⲡ ⲇⲉ ϩⲙⲡⲓⲥⲣⲁⲏⲗ ⲛⲁⲓ ⲛⲉ ⲛϣⲁⲣⲉⲡⲟⲩⲁ ⲡⲟⲩⲁ ϫⲟⲟⲩ ⲙⲡⲉⲑⲓⲧⲟⲩⲱϥ ⲉⲩⲛⲁⲃⲱⲕ ⲉϣⲓⲛⲉ ⲙⲡⲛⲟⲩⲧⲉ ⲉⲩϫⲱ ⲙⲙⲟⲥ ϫⲉⲁⲙⲏⲉⲓⲧⲛ ⲙⲁⲣⲟⲛ ⲉⲣⲁⲧϥ ⲙⲡⲉⲧⲛⲁⲩ ⲉⲃⲟⲗ ϫⲉϫⲓⲛⲛϣⲟⲣⲡ ⲛⲉⲣⲉⲡⲗⲁⲟⲥ ⲙⲟⲩⲧⲉ ⲉⲡⲉⲡⲣⲟⲫⲏⲧⲏⲥ ϫⲉⲡⲉⲧⲛⲁⲩ ⲉⲃⲟⲗ
10 ⲁⲩⲱ ⲥⲁⲟⲩⲗ ⲡⲉϫⲁϥ ⲙⲡⲉϥϩⲙϩⲁⲗ ϫⲉⲛⲁⲛⲟⲩ ⲙϣⲁϫⲉ ⲛⲧⲁⲕϫⲟⲟϥ ⲁⲙⲟⲩ ⲙⲁⲣⲟⲛ ⲁⲩⲱ ⲁⲩⲃⲱⲕ ⲉϩⲣⲁⲓ ⲉⲧⲡⲟⲗⲓⲥ ⲉⲡⲏⲓ ⲉⲧⲉⲣⲉⲡⲣⲱⲙⲉ ⲙⲡⲛⲟⲩⲧⲉ ⲛϩⲏⲧϥ
11 ⲛⲧⲟⲟⲩ ⲉⲩⲙⲟⲟϣⲉ ⲉϩⲣⲁⲓ ⲉⲡⲥⲁ ⲛⲧⲡⲟⲗⲓⲥ ⲉⲓⲥ ϩⲏⲏⲧⲉ ⲁⲩϩⲉ ⲉϩⲉⲛϣⲏⲣⲉ ϣⲏⲙ ⲉⲩⲛⲏⲩ ⲉⲃⲟⲗ ⲉⲙⲉϩⲙⲟⲟⲩ ⲡⲉϫⲁⲩ ⲛⲁⲩ ϫⲉⲉⲛⲉⲡⲉⲧⲛⲁⲩ ⲉⲃⲟⲗ ⲙⲡⲉⲓⲙⲁ
12 ⲛϣⲉⲉⲣⲉ ϣⲏⲙ ⲁⲩⲟⲩⲱϣⲃ ϫⲉⲥⲉϥⲙⲡⲉⲓⲙⲁ ⲉⲓⲥ ϩⲏⲏⲧⲉ ϥϩⲓϩⲏ ⲙⲙⲱⲧⲛ ⲧⲉⲛⲟⲩ ⲉⲧⲃⲉⲡⲉϩⲟⲟⲩ ⲛⲣⲁⲛ ⲛⲧⲁϥⲉⲓ ⲉϩⲣⲁⲓ ⲉⲧⲡⲟⲗⲓⲥ ϫⲉⲉⲣⲉⲟⲩⲑⲩⲥⲓⲁ ϣⲟⲟⲡ ⲙⲡϩⲟⲟⲩ ⲙⲡⲗⲁⲟⲥ ϩⲛⲃⲁⲙⲁ
13 ⲉⲧⲉⲧⲛϣⲁⲛⲣⲡϩⲟⲩⲛ ⲛⲧⲡⲟⲗⲓⲥ ⲧⲁⲓ ⲧⲉ ⲧϩⲉ ⲉⲧⲉⲧⲛⲛⲁϩⲉ ⲉⲣⲟϥ ϩⲛⲧⲡⲟⲗⲓⲥ ⲉⲙⲡⲁⲧⲉϥⲃⲱⲕ ⲉϩⲣⲁⲓ ⲉⲃⲁⲙⲁ ⲉⲟⲩⲱⲙ ϫⲉⲙⲡⲗⲁⲟⲥ ⲛⲁⲟⲩⲱⲙ ⲁⲛ ϣⲁⲛⲧⲉϥⲉⲓ ϫⲉⲡⲁⲓ ⲡⲉⲧⲛⲁⲥⲙⲟⲩ ⲉⲧⲉⲑⲩⲥⲓⲁ ⲁⲩⲱ ⲙⲛⲛⲥⲁⲛⲁⲓ ⲛϣⲙⲙⲟ ⲥⲉⲛⲁⲟⲩⲱⲙ ⲧⲉⲛⲟⲩ ϭⲉ ⲃⲱⲕ ⲉϩⲣⲁⲓ ϫⲉⲉⲧⲃⲉⲡⲉⲓϩⲟⲟⲩ ⲧⲉⲧⲛⲛⲁϩⲉ ⲉⲣⲟϥ
14 ⲁⲩⲱ ⲁⲩⲧⲁⲁⲩ ⲉϩⲣⲁⲓ ⲉⲧⲡⲟⲗⲓⲥ ⲛⲧⲟⲟⲩ ⲇⲉ ⲛⲧⲉⲣⲟⲩⲣⲡϩⲟⲩⲛ ⲛⲧⲡⲩⲗⲏ ⲛⲧⲡⲟⲗⲓⲥ ⲉⲓⲥ ⲥⲁⲙⲟⲩⲏⲗ ⲁϥⲉⲓ ⲉⲃⲟⲗ ⲉϩⲣⲁⲩ ⲉϥⲛⲁϩⲉ ⲉϩⲣⲁⲓ ⲉⲃⲁⲙⲁ
15 ⲁⲩⲱ ⲡϫⲟⲉⲓⲥ ⲁϥϭⲉⲗⲉⲡⲡⲁⲓ ⲉⲡⲙⲁⲁϫⲉ ⲛⲥⲁⲙⲟⲩⲏⲗ ϩⲁⲧϩⲏ ⲛⲟⲩϩⲟⲟⲩ ⲙⲡⲁⲧⲥⲁⲟⲩⲗ ⲉⲓ ϣⲁⲣⲟϥ ⲉϥϫⲱ ⲙⲙⲟⲥ ⲛⲁϥ
16 ϫⲉⲉϩⲟⲩⲛ ϩⲙⲡⲉⲓⲛⲁⲩ ⲛⲣⲁⲥⲧⲉ ϯⲛⲁⲧⲛⲛⲟⲟⲩ ϣⲁⲣⲟⲕ ⲉⲃⲟⲗ ϩⲙⲡⲕⲁϩ ⲛⲃⲉⲛⲓⲁⲙⲓⲛ ⲛⲟⲩⲣⲱⲙⲉ ⲛⲅⲧⲱⲟⲩⲛ ⲛⲅⲧⲁϩⲥϥ ⲉⲩⲁⲣⲭⲱⲛ ⲙⲡⲗⲁⲟⲥ ⲙⲡⲓⲥⲣⲁⲏⲗ ⲁⲩⲱ ϥⲛⲁⲧⲟⲩϫⲉⲡⲗⲁⲟⲥ ⲉⲧⲟⲟⲧⲟⲩ ⲛⲛⲁⲗⲗⲟⲫⲩⲗⲟⲥ ϫⲉⲁⲓϭⲱϣⲧ ⲉϫⲙⲡⲉⲑⲃⲃⲓⲟ ⲙⲡⲁⲗⲁⲟⲥ ⲡⲉⲩϩⲣⲟⲟⲩ ⲅⲁⲣ ⲁϥⲉⲓ ⲛⲁⲓ ⲉϩⲣⲁⲓ
17 ⲁⲩⲱ ⲥⲁⲙⲟⲩⲏⲗ ⲁϥⲛⲁⲩ ⲉⲥⲁⲟⲩⲗ ⲡϫⲟⲉⲓⲥ ⲇⲉ ⲁϥϣⲁϫⲉ ⲛⲙⲙⲁϥ ⲉϥϫⲱ ⲙⲙⲟⲥ ϫⲉⲉⲓⲥⲡⲣⲱⲙⲉ ⲡⲉ ⲡⲁⲓ ⲛⲧⲁⲓϫⲟⲟⲥ ⲛⲁⲕ ⲉⲧⲃⲏⲏⲧϥ ⲡⲁⲓ ⲉⲧⲛⲁⲣⲁⲣⲭⲱⲛ ⲉϫⲙⲡⲁⲗⲁⲟⲥ
18 ⲁⲩⲱ ⲥⲁⲟⲩⲗ ⲁϥϯ ⲙⲡⲉϥⲟⲩⲟⲓ ⲉϩⲟⲩⲛ ⲉⲥⲁⲙⲟⲩⲏⲗ ϩⲛⲧⲙⲏⲧⲉ ⲛⲧⲡⲟⲗⲓⲥ ⲡⲉϫⲁϥ ⲛⲁϥ ϫⲉⲙⲁⲧⲁⲙⲟⲓ ϫⲉⲁϣ ⲡⲉ ⲡⲏⲓ ⲙⲡⲉⲧⲛⲁⲩ ⲉⲃⲟⲗ
19 ⲥⲁⲙⲟⲩⲏⲗ ⲇⲉ ⲁϥⲟⲩⲱϣⲃ ⲡⲉϫⲁϥ ⲛⲥⲁⲟⲩⲗ ϫⲉⲁⲛⲟⲕ ⲡⲉ ⲙⲟⲟϣⲉ ⲉϩⲣⲁⲓ ϩⲓϩⲏ ⲙⲙⲟⲓ ⲉⲃⲁⲙⲁ ⲛⲅⲟⲩⲱⲙ ⲛⲙⲙⲁⲓ ⲙⲡϩⲟⲟⲩ ⲁⲩⲱ ϩⲧⲟⲟⲩⲉ ϯⲛⲁϫⲟⲟⲩⲕ ⲉⲃⲟⲗ ⲛⲧⲁⲧⲁⲙⲟⲕ ⲉⲛⲉⲧϩⲛⲡⲉⲕϩⲏⲧ ⲧⲏⲣⲟⲩ
20 ⲁⲩⲱ ⲉⲧⲃⲉⲛⲉⲕⲉⲟⲟⲩ ⲛⲧⲁⲩⲥⲱⲣⲙ ⲉⲓⲥ ⲡⲙⲉϩϣⲟⲙⲛⲧ ⲛϩⲟⲟⲩ ⲡⲉ ⲡϩⲟⲟⲩ ⲙⲡⲉⲣⲕⲁⲡⲉⲕϩⲏⲧ ϩⲓⲱⲟⲩ ⲁⲩϩⲉ ⲅⲁⲣ ⲉⲣⲟⲟⲩ ⲁⲩⲱ ⲛϣⲟⲩϣⲟⲩ ⲙⲡⲓⲥⲣⲁⲏⲗ ⲉⲩⲛⲁⲧⲁⲁⲩ ⲛⲛⲓⲙ ⲛⲉⲩⲛⲁⲧⲁⲁⲩ ⲁⲛ ⲛⲁⲕ ⲙⲛⲡⲏⲓ ⲙⲡⲉⲕⲉⲓⲱⲧ
21 ⲥⲁⲟⲩⲗ ⲇⲉ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲥⲁⲙⲟⲩⲏⲗ ϫⲉⲙⲏ ⲁⲛⲅ ⲡϣⲏⲣⲉ ⲁⲛ ⲛⲟⲩⲣⲱⲙⲉ ⲛⲓⲉⲙⲓⲛⲁⲓⲟⲥ ⲉⲃⲟⲗ ϩⲙⲡⲕⲟⲩⲓ ⲛⲕⲗⲏⲣⲟⲥ ⲧⲉⲫⲩⲗⲏ ⲛⲃⲉⲛⲓⲁⲙⲓⲛ ⲧⲉⲫⲩⲗⲏ ⲉⲧⲥⲏϣ ⲉⲃⲟⲗ ϩⲙⲡⲉⲕⲗⲏⲣⲟⲥ ⲧⲏⲣϥ ⲙⲡⲓⲥⲣⲁⲏⲗ ⲁⲩⲱ ⲉⲧⲃⲉⲟⲩ ⲁⲕϣⲁϫⲉ ⲛⲙⲙⲁⲓ ⲕⲁⲧⲁⲛⲉⲓϣⲁϫⲉ
22 ⲁⲩⲱ ⲥⲁⲙⲟⲩⲏⲗ ⲁϥϫⲓ ⲛⲥⲁⲟⲩⲗ ⲙⲛⲡⲉϥϩⲙϩⲁⲗ ⲁϥϫⲓⲧⲟⲩ ⲉϩⲟⲩⲛ ⲉⲡⲙⲁ ⲛϣⲱⲡⲉ ⲁϥⲕⲱ ⲛⲁⲩ ⲉⲃⲟⲗ ⲛⲟⲩⲙⲁ ⲉϥϫⲟⲥⲉ ϩⲛⲛⲛⲟϭ ⲛⲧⲁⲩⲧⲁϩⲙⲟⲩ ⲉⲩⲛⲁⲣϣϥⲉ ⲛⲣⲱⲙⲉ
23 ⲁⲩⲱ ⲥⲁⲙⲟⲩⲏⲗ ⲡⲉϫⲁϥ ⲙⲡⲙⲁⲅⲉⲓⲣⲟⲥ ϫⲉⲙⲁ ⲛⲁⲓ ⲛⲧⲙⲉⲣⲓⲥ ⲛⲧⲁⲓϫⲟⲟⲥ ⲛⲁⲕ ⲉⲧⲃⲏⲏⲧⲥ ϫⲉⲕⲁⲁⲥ ϩⲁϩⲧⲏⲕ
24 ⲁⲩⲱ ⲡⲙⲁⲅⲉⲓⲣⲟⲥ ⲁϥⲡⲓⲥⲉ ⲛⲧⲕⲱⲗⲉⲁ ⲉⲧⲉⲡⲙⲉⲣⲟⲥ ⲡⲉ ⲁϥⲕⲁⲁϥ ϩⲁⲣⲱϥ ⲛⲥⲁⲟⲩⲗ ⲡⲉϫⲉⲥⲁⲙⲟⲩⲏⲗ ⲛⲥⲁⲟⲩⲗ ϫⲉⲉⲓⲥⲡⲉⲓⲥⲉⲉⲡⲉ ⲏ ⲡⲉⲓϣⲁⲩ ⲕⲁⲁϥ ϩⲁⲣⲱⲕ ⲛⲅⲟⲩⲱⲙ ϫⲉⲛⲧⲁⲩⲕⲁⲁϥ ⲛⲁⲕ ⲉⲩⲙⲛⲧⲙⲛⲧⲣⲉ ⲡⲙⲁⲣⲁ ⲛⲕⲟⲟⲩⲉ ⲡⲱϣ ⲛⲁⲕ ⲛⲅⲟⲩⲱⲙ ⲁⲩⲱ ⲥⲁⲟⲩⲗ ⲁϥⲟⲩⲱⲙ ⲙⲛⲥⲁⲙⲟⲩⲏⲗ ⲙⲡⲉϩⲟⲟⲩ ⲉⲧⲙⲙⲁⲩ
25 ⲁϥⲉⲓ ⲇⲉ ⲉⲃⲟⲗ ϩⲛⲃⲁⲙⲁ ⲉϩⲣⲁⲓ ⲉⲧⲡⲟⲗⲓⲥ ⲁⲩⲡⲱⲣϣ ϩⲁⲣⲟϥ ⲛⲥⲁⲟⲩⲗ ϩⲓϫⲉⲛⲉⲡⲱⲣ ⲛϩⲉⲛϩⲟⲉⲓⲧⲉ ⲉⲛⲁϣⲱⲟⲩ
26 ⲁϥⲉⲛⲕⲟⲧⲕ ⲡⲟⲩⲟⲉⲓⲛ ⲇⲉ ⲛⲧⲉⲣⲉϥⲥⲱⲣ ⲥⲁⲙⲟⲩⲏⲗ ⲇⲉ ⲁϥⲙⲟⲩⲧⲉ ⲉⲥⲁⲟⲩⲗ ϩⲓⲧϫⲉⲛⲉⲡⲱⲣ ⲉϥϫⲱ ⲙⲙⲟⲥ ⲛⲁϥ ϫⲉⲧⲱⲟⲩⲛ ⲛⲅⲉⲓ ⲛⲧⲁϫⲟⲟⲩⲕ ⲉⲃⲟⲗ ⲁⲩⲱ ⲥⲁⲟⲩⲗ ⲁϥⲧⲱⲟⲩⲛ ⲁϥⲉⲓ ⲉⲡⲉⲥⲏⲧ ⲉϥⲙⲟⲟϣⲉ ⲉⲃⲟⲗ ⲛⲧⲟϥ ⲙⲛⲥⲁⲙⲟⲩⲏⲗ
27 ⲛⲧⲉⲣⲟⲩⲉⲓ ⲇⲉ ⲉⲃⲟⲗ ⲉⲩⲥⲁ ⲛⲧⲡⲟⲗⲓⲥ ⲥⲁⲙⲟⲩⲏⲗ ⲡⲉϫⲁϥ ⲛⲥⲁⲟⲩⲗ ϫⲉⲁϫⲓⲥ ⲙⲡⲉⲕϩⲉⲣϣⲓⲣⲉ ⲛϥⲙⲟⲟϣⲉ ϩⲓϩⲏ ⲙⲙⲟⲛ ⲛⲧⲟⲕ ⲇⲉ ⲁϩⲉⲣⲁⲧⲕ ⲙⲡⲉⲓⲙⲁ ⲧⲉⲛⲟⲩ ⲛⲅⲥⲱⲧⲙ ⲉⲡϣⲁϫⲉ ⲙⲡⲛⲟⲩⲧⲉ
1 Samuel 8 · 1 Samuel 10 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)