1 Samuel 10 — Coptic (Sahidic)

1 ⲁⲩⲱ ⲥⲁⲙⲟⲩⲏⲗ ⲁϥϫⲓ ⲙⲡⲉⲫⲁⲅⲟⲥ ⲏ ⲡⲉϩⲛⲁⲁⲩ ⲛⲛⲉϩ ⲁϥⲡⲁϩⲧϥ ⲉϫⲛⲧⲁⲡⲉ ⲛⲥⲁⲟⲩⲗ ⲁⲩⲱ ⲁϥϯⲡⲓ ⲉⲣⲱϥ ⲡⲉϫⲁϥ ⲛⲁϥ ϫⲉⲡϫⲟⲉⲓⲥ ⲁϥⲧⲁϩⲥⲕ ⲉⲧⲣⲉⲕⲣⲁⲣⲭⲱⲛ ⲉϫⲙⲡⲉϥⲗⲁⲟⲥ ⲡⲓⲥⲣⲁⲏⲗ ⲁⲩⲱ ⲛⲧⲟⲕ ⲡⲉⲧⲛⲁⲣⲛⲟϭ ⲉϫⲙⲡⲗⲁⲟⲥ ⲙⲡⲓⲥⲣⲁⲏⲗ ⲛⲅⲛⲁϩⲙⲉϥ ⲉⲧⲟⲟⲧⲟⲩ ⲛⲛⲉϥϫⲁϫⲉ ⲉⲧⲕⲱⲧⲉ ⲉⲣⲟϥ ⲁⲩⲱ ⲡⲁⲓ ⲡⲉ ⲡⲙⲁⲉⲓⲛ ⲉⲧⲛⲁϣⲱⲡⲉ ⲛⲁⲕ ϫⲉⲁⲡϫⲟⲉⲓⲥ ⲧⲁϩⲥⲕ ⲉⲧⲣⲉⲕⲣⲁⲣⲭⲱⲛ ⲉϫⲛⲧⲉϥⲕⲗⲏⲣⲟⲛⲟⲙⲓⲁ

2 ⲉⲕϣⲁⲛⲙⲟⲟϣⲉ ⲉⲃⲟⲗ ϩⲓⲧⲟⲟⲧⲙⲡϩⲟⲟⲩ ⲕⲛⲁϭⲓⲛⲉ ⲛⲣⲱⲙⲉ ⲥⲛⲁⲩ ϩⲁⲧⲛⲛⲧⲁⲫⲟⲥ ⲛϩⲣⲁⲭⲏⲗ ϩⲙⲡⲧⲟⲟⲩ ⲛⲃⲉⲛⲓⲁⲙⲓⲛ ⲉⲩⲉⲓⲣⲉ ⲛϩⲉⲛⲛⲟϭ ⲛⲃⲟϭⲥ ϩⲁⲡⲣⲁϣⲉ ⲁⲩⲱ ⲛⲧⲟⲟⲩ ⲥⲉⲛⲁϫⲟⲟⲥ ⲛⲁⲕ ϫⲉⲁⲩϩⲉ ⲉⲛⲉⲟⲟⲩ ⲛⲁⲓ ⲛⲧⲁⲧⲉⲧⲛⲃⲱⲕ ⲉϣⲓⲛⲉ ⲛⲥⲱⲟⲩ ⲡⲉⲕⲉⲓⲱⲧ ⲁϥⲛⲉϩ ⲡⲣⲟⲟⲩϣ ⲉⲃⲟⲗ ⲛⲛⲉⲧⲃⲛⲟⲟⲩⲉ ⲁⲩⲱ ϥϥⲓⲣⲟⲟⲩϣ ⲉⲙⲁⲧⲉ ⲉⲧⲃⲉⲧⲏⲩⲧⲛ ⲉϥϫⲱ ⲙⲙⲟⲥ ϫⲉⲟⲩ ⲡⲉϯⲛⲁⲁⲁϥ ⲉⲧⲃⲉⲡⲁϣⲏⲣⲉ

3 ⲕⲛⲁⲙⲟⲟϣⲉ ⲇⲉ ⲉⲃⲟⲗ ϩⲙⲡⲙⲁ ⲉⲧⲙⲙⲁⲩ ⲛⲅⲉⲓ ⲉϩⲣⲁⲓ ⲉⲡϣⲏⲛ ⲛⲑⲁⲃⲱⲣ ⲁⲩⲱ ⲕⲛⲁϩⲉ ⲉϣⲟⲙⲛⲧ ⲛⲣⲱⲙⲉ ⲙⲡⲙⲁ ⲉⲧⲙⲙⲁⲩ ⲉⲩⲛⲁⲉⲣⲁⲧϥ ⲙⲡⲛⲟⲩⲧⲉ ⲉⲃⲉⲑⲏⲗ ⲉⲣⲉϣⲟⲙⲛⲧ ⲙⲙⲁⲥ ⲛⲃⲁⲁⲙⲡⲉ ϩⲓϫⲱϥ ⲛⲟⲩⲁ ⲁⲩⲱ ⲕⲉⲟⲩⲁ ⲉⲣⲉϣⲟⲙⲛⲧ ⲛϩⲛⲁⲁⲩ ⲛⲟⲉⲓⲕ ϩⲓϫⲱϥ ⲁⲩⲱ ⲡⲕⲉⲟⲩⲁ ⲉⲣⲉⲟⲩϩⲱⲧ ⲛⲏⲣⲡ ϩⲓϫⲱϥ

4 ⲥⲉⲛⲁϣⲁϫⲉ ⲛⲙⲙⲁⲕ ⲉⲧⲃⲉⲧⲉⲓⲣⲏⲛⲏ ⲁⲩⲱ ⲥⲉⲛⲁϯ ⲛⲁⲕ ⲛⲁⲣⲭⲏ ⲥⲛⲧⲉ ⲛⲟⲉⲓⲕ ⲉⲕⲉϫⲓⲧⲟⲩ ⲛⲧⲟⲟⲧⲟⲩ

5 ⲙⲛⲛⲥⲁⲛⲁⲓ ⲉⲕⲉⲃⲱⲕ ⲉϩⲟⲩⲛ ⲉⲡⲃⲟⲩⲛⲟⲥ ⲙⲡⲛⲟⲩⲧⲉ ⲡⲙⲁ ⲉⲧⲉⲣⲉⲡⲉⲣⲏⲧ ⲛⲛⲁⲗⲗⲟⲫⲩⲗⲟⲥ ⲛϩⲏⲧϥ ⲉⲣⲉⲛⲁⲥⲓⲃ ⲡⲁⲗⲗⲟⲫⲩⲗⲟⲥ ⲙⲡⲙⲁ ⲉⲧⲙⲙⲁⲩ ⲁⲩⲱ ⲉⲧⲉⲧⲛϣⲁⲛⲃⲱⲕ ⲉϩⲟⲩⲛ ⲉⲧⲡⲟⲗⲓⲥ ⲉⲃⲟⲗ ϩⲙⲡⲙⲁ ⲉⲧⲙⲙⲁⲩ ⲕⲛⲁⲧⲱⲙⲛⲧ ⲉⲩⲭⲟⲣⲟⲥ ⲙⲡⲣⲟⲫⲏⲧⲏⲥ ⲉⲩⲛⲏⲩ ⲉⲃⲟⲗ ϩⲛⲃⲁⲙⲁ ⲉⲣⲉϩⲉⲛⲕⲓⲑⲁⲣⲁ ϩⲓϩⲏ ⲙⲙⲟⲟⲩ ⲙⲛϩⲉⲛⲕⲟⲩⲕⲙ ⲙⲛϩⲉⲛⲥⲏϥⲉ ⲛϫⲱ ⲙⲛⲟⲩⲯⲁⲗⲧⲏⲣⲓⲟⲛ ⲁⲩⲱ ⲛⲧⲟⲟⲩ ⲉⲩⲡⲣⲟⲫⲏⲧⲉⲩⲉ

6 ⲛⲧⲉⲡⲉⲡⲛⲉⲩⲙⲁ ⲙⲡϫⲟⲉⲓⲥ ⲉⲓ ⲉϩⲣⲁⲓ ⲉϫⲱⲕ ⲛⲅⲡⲣⲟⲫⲏⲧⲉⲩⲉ ⲛⲙⲙⲁⲩ ⲛⲅⲡⲱⲱⲛⲉ ⲛⲅⲣⲕⲉⲣⲱⲙⲉ

7 ⲁⲩⲱ ⲛⲉⲓⲙⲁⲉⲓⲛ ⲉⲩϣⲁⲛⲧⲁϩⲟⲕ ⲁⲣⲓϩⲱⲃ ⲛⲓⲙ ⲉⲧⲛⲁⲛⲟⲩⲟⲩ ⲉⲧⲉⲣⲉⲧⲟⲟⲧⲕ ⲛⲁⲧⲁϩⲟⲟⲩ ⲉⲁⲁⲩ ϫⲉⲡⲛⲟⲩⲧⲉ ⲛⲁϣⲱⲡⲉ ⲛⲙⲙⲁⲕ

8 ⲁⲩⲱ ⲉⲕⲉⲣϣⲟⲣⲡ ⲉⲣⲟⲓ ⲉϩⲣⲁⲓ ⲉⲅⲁⲗⲅⲁⲗⲁ ⲉⲓⲥ ϩⲏⲏⲧⲉ ϯⲛⲁⲉⲓ ⲛⲁⲕ ⲙⲙⲁⲩ ⲉⲧⲁⲗⲟ ⲉϩⲣⲁⲓ ⲛⲟⲩϭⲗⲓⲗ ⲙⲛϩⲉⲛⲑⲩⲥⲓⲁ ⲛⲉⲓⲣⲏⲛⲓⲕⲟⲛ ⲟⲩⲛ ⲥⲁϣϥ ⲛϩⲟⲟⲩ ⲛⲁⲟⲩⲉⲓⲛⲉ ⲉⲣⲟⲕ ϣⲁⲛⲧⲓⲉⲓ ⲛⲁⲕ ⲁⲩⲱ ϯⲛⲁⲧⲁⲙⲟⲕ ⲉⲛⲉⲧⲉⲕⲛⲁⲁⲁⲩ

9 ⲁⲥϣⲱⲡⲉ ⲇⲉ ⲛⲧⲉⲣⲉϥⲕⲧⲟ ⲛⲧⲉϥⲛⲁϩⲃⲉ ⲉⲙⲟⲟϣⲉ ⲉⲃⲟⲗ ϩⲓⲧⲟⲟⲧϥ ⲥⲁⲟⲩⲗ ⲁⲡⲛⲟⲩⲧⲉ ϯ ⲉⲣⲟϥ ⲛⲕⲉϩⲏⲧ ⲁⲛⲉⲓⲙⲁⲉⲓⲛ ⲧⲏⲣⲟⲩ ⲧⲁϩⲟϥ ⲙⲡⲉϩⲟⲟⲩ ⲉⲧⲙⲙⲁⲩ

10 ⲁϥⲉⲓ ⲉⲃⲟⲗ ϩⲙⲡⲙⲁ ⲉⲧⲙⲙⲁⲩ ⲉϩⲣⲁⲓ ⲉⲡⲃⲟⲩⲛⲟⲥ ⲁⲩⲱ ⲉⲓⲥ ⲟⲩⲭⲟⲣⲟⲥ ⲙⲡⲣⲟⲫⲏⲧⲏⲥ ⲛⲉϥϩⲓϩⲏ ⲙⲙⲟϥ ⲁⲩⲱ ⲡⲉⲡⲛⲉⲩⲙⲁ ⲙⲡⲛⲟⲩⲧⲉ ⲁϥⲃⲱϭⲉ ⲉϩⲣⲁⲓ ⲉϫⲱϥ ⲁϥⲡⲣⲟⲫⲏⲧⲉⲩⲉ ϩⲛⲧⲉⲩⲙⲏⲧⲉ

11 ⲁⲩⲱ ⲟⲩⲟⲛ ⲛⲓⲙ ⲉⲧⲥⲟⲟⲩⲛ ⲙⲙⲟϥ ⲛⲥⲁϥ ⲙⲛϣⲟⲙⲛⲧ ⲙⲡϩⲟⲟⲩ ⲁⲩⲛⲁⲩ ⲉⲣⲟϥ ⲁⲩⲱ ⲉⲓⲥ ϩⲏⲏⲧⲉ ⲛⲧⲟϥ ⲛⲉϥϩⲛⲧⲙⲏⲧⲉ ⲛⲛⲉⲡⲣⲟⲫⲏⲧⲏⲥ ⲡⲉϫⲉⲡⲗⲁⲟⲥ ⲙⲡⲟⲩⲁ ⲡⲟⲩⲁ ⲙⲡⲉⲑⲓⲧⲟⲩⲱϥ ϫⲉⲟⲩ ⲡⲉ ⲡⲉⲓϩⲱⲃ ⲛⲧⲁϥϣⲱⲡⲉ ⲙⲡϣⲏⲣⲉ ⲛϭⲓⲥ ⲉⲛⲉⲥⲁⲟⲩⲗ ϩⲱⲱϥ ⲁϥⲱⲡ ϩⲛⲛⲉⲡⲣⲟⲫⲏⲧⲏⲥ

12 ⲁⲩⲱ ⲟⲩⲁ ⲛϩⲏⲧⲟⲩ ⲁϥⲟⲩⲱϣⲃ ϫⲉⲛⲓⲙ ϩⲱⲱϥ ⲡⲉ ⲡⲉϥⲉⲓⲱⲧ ⲉⲧⲃⲉⲡⲁⲓ ⲁⲡϣⲁϫⲉ ϣⲱⲡⲉ ⲉⲩⲡⲁⲣⲁⲃⲟⲗⲏ ϫⲉⲉⲛⲉⲥⲁⲟⲩⲗ ⲁϥⲱⲡ ϩⲛⲛⲉⲡⲣⲟⲫⲏⲧⲏⲥ

13 ⲁϥⲟⲩⲱ ⲇⲉ ⲉϥⲡⲣⲟⲫⲏⲧⲉⲩⲉ ⲁϥⲉⲓ ⲉϩⲣⲁⲓ ⲉⲡⲃⲟⲩⲛⲟⲥ

14 ⲡⲉϫⲉϭⲓⲥ ⲡⲉϥⲉⲓⲱⲧ ⲛⲁϥ ⲙⲛⲡⲕⲉⲟⲩⲁ ⲉⲧⲛⲙⲙⲁϥ ϫⲉⲛⲧⲁⲧⲉⲧⲛⲃⲱⲕ ⲉⲧⲱⲛ ⲡⲉϫⲁϥ ⲛⲁϥ ϫⲉⲛⲧⲁⲛⲃⲱⲕ ⲉⲕⲱⲧⲉ ⲛⲥⲁⲛⲉⲟⲟⲩ ⲁⲩⲱ ⲛⲧⲉⲣⲉⲛⲛⲁⲩ ϫⲉⲙⲡⲉⲛϩⲉ ⲉⲣⲟⲟⲩ ⲁⲛⲃⲱⲕ ⲉⲣⲁⲧϥ ⲛⲥⲁⲙⲟⲩⲏⲗ

15 ⲁⲩⲱ ϭⲓⲥ ⲡⲉϫⲁϥ ⲛⲥⲁⲟⲩⲗ ϫⲉⲙⲁⲧⲁⲙⲟⲓ ϫⲉⲛⲧⲁⲥⲁⲙⲟⲩⲏⲗ ϫⲟⲟⲥ ⲛⲁⲕ ϫⲉⲟⲩ

16 ⲡⲉϫⲉⲥⲁⲟⲩⲗ ⲙⲡⲉϥⲉⲓⲱⲧ ϫⲉϩⲛⲟⲩⲧⲁⲙⲟ ⲁϥⲧⲁⲙⲟⲓ ϫⲉⲁⲩϩⲉ ⲉⲛⲉⲟⲟⲩ ⲡϣⲁϫⲉ ⲇⲉ ⲛⲧⲙⲛⲧⲣⲣⲟ ⲙⲡⲉϥⲟⲩⲟⲛϩϥ ⲉⲣⲟϥ

17 ⲁⲩⲱ ⲥⲁⲙⲟⲩⲏⲗ ⲁϥⲡⲁⲣⲁⲅⲅⲉⲓⲗⲉ ⲙⲡⲗⲁⲟⲥ ⲧⲏⲣϥ ⲉⲧⲣⲉⲩⲉⲓ ⲉⲣⲁⲧϥ ⲙⲡϫⲟⲉⲓⲥ ⲉϩⲣⲁⲓ ⲉⲙⲁⲥⲏⲫⲁⲑ

18 ⲥⲁⲙⲟⲩⲏⲗ ⲇⲉ ⲡⲉϫⲁϥ ⲛⲛϣⲏⲣⲉ ⲙⲡⲓⲥⲣⲁⲏⲗ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ϫⲱ ⲙⲙⲟⲟⲩ ϫⲉⲁⲛⲟⲕ ⲁⲓⲉⲓⲛⲉ ⲛⲛⲉϣⲏⲣⲉ ⲙⲡⲓⲥⲣⲁⲏⲗ ⲉⲃⲟⲗ ϩⲛⲕⲏⲙⲉ ⲁⲩⲱ ⲁⲓⲛⲉϩⲙⲧⲏⲩⲧⲛ ⲛⲧⲟⲟⲧϥ ⲙⲫⲁⲣⲁⲱ ⲡⲣⲣⲟ ⲛⲕⲏⲙⲉ ⲁⲩⲱ ⲛⲧⲟⲟⲧⲟⲩ ⲛⲛⲣⲱⲙⲉ ⲧⲏⲣⲟⲩ ⲉⲧϩⲟϫϩⲉⲭ ⲙⲙⲱⲧⲛ

19 ⲛⲧⲱⲧⲛ ⲇⲉ ⲙⲡϩⲟⲟⲩ ⲁⲧⲉⲧⲛⲥⲉϣϥⲡⲛⲟⲩⲧⲉ ⲛⲧⲟϥ ⲡⲉ ⲡⲧⲉⲧⲛⲥⲱⲣ ⲉⲃⲟⲗ ϩⲛⲛⲉⲧⲛϩⲓⲥⲉ ⲧⲏⲣⲟⲩ ⲙⲛⲛⲉⲧⲛⲑⲗⲓⲯⲓⲥ ⲁⲩⲱ ⲡⲉϫⲏⲧⲛ ϫⲉⲛⲧⲛⲛⲁϭⲱ ⲁⲛ ϩⲓⲛⲁⲓ ⲁⲗⲗⲁ ⲕⲱ ⲛⲟⲩⲣⲣⲟ ϩⲓϫⲱⲛ ⲧⲉⲛⲟⲩ ϭⲉ ⲁϩⲉⲣⲁⲧⲧⲏⲩⲧⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲕⲁⲧⲁⲛⲉⲧⲛⲧⲱϣ ⲕⲁⲧⲁⲛϣⲟ ⲛⲛⲉⲧⲛⲫⲩⲗⲏ

20 ⲥⲁⲙⲟⲩⲏⲗ ⲇⲉ ⲁϥⲧⲁϩⲟ ⲉⲣⲁⲧϥ ⲙⲡⲙⲏⲏϣⲉ ⲧⲏⲣϥ ⲙⲡⲓⲥⲣⲁⲏⲗ ⲁⲩⲱ ⲁⲡⲉⲕⲗⲏⲣⲟⲥ ⲧⲁϩⲉ ⲡⲙⲏⲏϣⲉ ⲛⲃⲉⲛⲓⲁⲙⲓⲛ

21 ⲁϥⲧⲁϩⲟ ⲉⲣⲁⲧϥ ⲙⲡⲙⲏⲏϣⲉ ⲛⲃⲉⲛⲓⲁⲙⲓⲛ ⲕⲁⲧⲁⲛⲉϥⲫⲩⲗⲏ ⲁⲡⲉⲕⲗⲏⲣⲟⲥ ⲉⲓ ⲉϫⲛⲧⲉⲫⲩⲗⲏ ⲙⲙⲁⲧⲧⲁⲣⲓⲛ ⲁⲩⲱ ⲁϥⲧⲁϩⲟ ⲉⲣⲁⲧⲥ ⲛⲧⲉⲡϩⲩⲗⲏ ⲙⲙⲁⲧⲧⲁⲣⲓⲛ ⲕⲁⲧⲁⲣⲱⲙⲉ ⲁⲡⲉⲕⲗⲏⲣⲟⲥ ⲉⲓ ⲉϫⲛⲥⲁⲟⲩⲗ ⲡϣⲏⲣⲉ ⲛϭⲓⲥ ⲁⲩⲱ ⲁⲩⲕⲱⲧⲉ ⲛⲥⲱϥ ⲙⲡⲟⲩϩⲉ ⲉⲣⲟϥ

22 ⲥⲁⲙⲟⲩⲏⲗ ⲇⲉ ⲁϥⲕⲟⲧϥ ⲁϥϫⲛⲉⲡϫⲟⲉⲓⲥ ϫⲉⲉⲛⲉⲣⲉⲡⲣⲱⲙⲉ ⲛⲁⲉⲓ ⲉⲡⲉⲓⲙⲁ ⲡⲉϫⲉⲡϫⲟⲉⲓⲥ ⲛⲁϥ ϫⲉⲉⲓⲥϩⲏⲏⲧⲉ ϥⲗⲏϭ ϩⲛⲛⲉⲥⲕⲉⲩⲏ

23 ⲥⲁⲙⲟⲩⲏⲗ ⲇⲉ ⲁϥⲡⲱⲧ ⲁϥⲉⲛⲧϥ ⲉⲃⲟⲗ ϩⲙⲡⲙⲁ ⲉⲧⲙⲙⲁⲩ ⲁϥⲧⲁϩⲟϥ ⲉⲣⲁⲧϥ ϩⲛⲧⲙⲏⲧⲉ ⲙⲡⲗⲁⲟⲥ ⲁⲩⲱ ⲁϥϫⲓⲥⲉ ⲉⲡⲗⲁⲟⲥ ⲧⲏⲣϥ ⲛⲟⲩϩⲟⲩⲉ ϣⲓⲏ ⲛⲛⲁϩⲃⲉ

24 ⲡⲉϫⲉⲥⲁⲙⲟⲩⲏⲗ ⲉϩⲟⲩⲛ ϩⲙⲡⲗⲁⲟⲥ ⲧⲏⲣϥ ϫⲉⲉⲛⲉⲁⲧⲉⲧⲛⲛⲁⲩ ⲉⲡⲉⲛⲧⲁⲡϫⲟⲉⲓⲥ ⲥⲟⲧⲡϥ ⲛⲁϥ ϫⲉⲙⲛⲡⲉⲧⲧⲛⲧⲱⲛ ⲉⲣⲟϥ ⲛϩⲏⲧⲧⲏⲩⲧⲛ ⲧⲏⲣⲧⲛ ⲁⲩⲱ ⲡⲗⲁⲟⲥ ⲧⲏⲣϥ ⲁⲩⲉⲓⲙⲉ ⲁⲩⲱ ⲁⲩⲱϣ ⲉⲃⲟⲗ ⲉⲩϫⲱ ⲙⲙⲟⲥ ϫⲉⲙⲁⲣⲉⲡⲣⲣⲟ ⲱⲛϩ

25 ⲁⲩⲱ ⲥⲁⲙⲟⲩⲏⲗ ⲁϥⲧⲁⲩⲟ ⲉⲡⲗⲁⲟⲥ ⲧⲏⲣϥ ⲙⲡⲇⲓⲕⲁⲓⲱⲙⲁ ⲛⲧⲙⲛⲧⲣⲣⲟ ⲁⲩⲱ ⲁϥⲥⲁϩϥ ⲉⲩϫⲱⲱⲙⲉ ⲁϥⲕⲁⲁϥ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲥⲁⲙⲟⲩⲏⲗ ⲇⲉ ⲁϥⲕⲱ ⲉⲃⲟⲗ ⲙⲡⲗⲁⲟⲥ ⲧⲏⲣϥ ⲁⲡⲟⲩⲁ ⲡⲟⲩⲁ ⲃⲱⲕ ⲉϩⲣⲁⲓ ⲉⲡⲉϥⲙⲁ

26 ⲥⲁⲟⲩⲗ ϩⲱⲱϥ ⲁϥⲃⲱⲕ ⲉϩⲣⲁⲓ ⲉⲡⲉϥⲏⲓ ⲉⲕⲁⲃⲁⲁ ⲁⲩⲱ ϩⲉⲛⲣⲱⲙⲉ ⲛϫⲱⲱⲣⲉ ⲛⲁⲓ ⲛⲧⲁⲡⲛⲟⲩⲧⲉ ⲧⲁⲁⲥ ⲉϩⲣⲁⲓ ⲉⲡⲉⲩϩⲏⲧ ⲁⲩⲃⲱⲕ ⲁⲩⲟⲩⲁϩⲟⲩ ⲛⲥⲁⲥⲁⲟⲩⲗ

27 ϩⲉⲛⲣⲱⲙⲉ ⲇⲉ ⲛⲗⲟⲓⲙⲟⲥ ⲁⲩⲟⲩⲱⲛ ⲉⲣⲱⲟⲩ ⲉⲩϫⲱ ⲙⲙⲟⲥ ϫⲉⲛⲓⲙ ⲡⲉⲧⲛⲁⲛⲁϩⲙⲉⲛ ⲡⲁⲓ ⲡⲉ ⲁⲩϯⲥⲱϣ ⲛⲁϥ ⲁⲩⲱ ⲙⲡⲟⲩⲉⲛⲇⲱⲣⲟⲛ ⲛⲁϥ