Read 1 Samuel 8 side by side with translations · The Final Bible
1 ⲁⲥϣⲱⲡⲉ ⲇⲉ ⲛⲧⲉⲣⲉⲥⲁⲙⲟⲩⲏⲗ ⲣϩⲗⲗⲟ ⲁϥⲕⲁⲑⲓⲥⲧⲁ ⲛⲛⲉϥϣⲏⲣⲉ ⲛⲇⲓⲕⲁⲥⲧⲏⲥ ⲉϫⲙⲡⲓⲥⲣⲁⲏⲗ
2 ⲁⲩⲱ ⲛⲁⲓ ⲛⲉ ⲛⲣⲁⲛ ⲛⲛⲉϥϣⲏⲣⲉ ⲡϣⲣⲡⲙⲓⲥⲉ ⲡⲉ ⲓⲱⲏⲗ ⲁⲩⲱ ⲡⲙⲉϩⲥⲛⲁⲩ ⲡⲉ ⲁⲃⲓⲁ ⲉⲩⲟ ⲛⲣⲉϥϯϩⲁⲡ ϩⲛⲃⲉⲣⲥⲁⲃⲉⲉ
3 ⲛⲉϥϣⲏⲣⲉ ⲇⲉ ⲙⲡⲟⲩⲙⲟⲟϣⲉ ⲕⲁⲧⲁⲧⲉϥⲟⲑⲉ ⲁⲗⲗⲁ ⲁⲩⲣⲟⲕⲧⲟⲩ ⲉⲃⲟⲗ ϩⲛⲧⲙⲉ ⲁⲩⲱ ⲛⲉⲩϫⲓⲇⲱⲣⲟⲛ ⲉⲙⲉⲩⲥⲟⲟⲩⲧⲛ ⲉⲃⲟⲗ ⲙⲡϩⲁⲡ
4 ⲁⲩⲱ ⲛϣⲏⲣⲉ ⲙⲡⲓⲥⲣⲁⲏⲗ ⲁⲩⲥⲱⲟⲩϩ ⲉϩⲟⲩⲛ ⲉⲛⲉⲩⲉⲣⲏⲩ ⲁⲩⲉⲓ ⲉϩⲣⲁⲓ ⲉⲁⲣⲙⲁⲑⲁⲉⲓⲙ ⲉⲣⲁⲧϥ ⲛⲥⲁⲙⲟⲩⲏⲗ
5 ⲡⲉϫⲁⲩ ⲛⲁϥ ϫⲉⲉⲓⲥϩⲏⲏⲧⲉ ⲛⲧⲟⲕ ⲁⲕⲣϩⲗⲗⲟ ⲛⲉⲕϣⲏⲣⲉ ⲇⲉ ⲙⲡⲟⲩⲙⲟⲟϣⲉ ⲕⲁⲧⲁⲧⲉⲕⲟⲑⲉ ⲧⲉⲛⲟⲩ ϭⲉ ⲧⲱⲟⲩⲛ ⲛⲅⲕⲁⲑⲓⲥⲧⲁ ⲉϫⲱⲛ ⲛⲟⲩⲣⲣⲟ ⲉⲧⲣⲉϥϯϩⲁⲡ ⲉⲣⲟⲛ ⲛⲧϩⲉ ⲛⲛⲉⲕⲉϩⲉⲑⲛⲟⲥ
6 ⲁⲩⲱ ⲡϣⲁϫⲉ ⲁϥϣⲱⲡⲉ ⲙⲡⲟⲛⲏⲣⲟⲛ ⲛⲁϩⲣⲉⲛ ⲥⲁⲙⲟⲩⲏⲗ ⲛⲧⲉⲣⲟⲩϫⲟⲟⲥ ϫⲉⲙⲁ ⲛⲁⲛ ⲛⲟⲩⲣⲣⲟ ⲉⲃⲟⲗ ϩⲓϫⲱⲛ ⲉⲧⲣⲉϥϯϩⲁⲡ ⲉⲣⲟⲛ ⲁⲩⲱ ⲥⲁⲙⲟⲩⲏⲗ ⲁϥϣⲗⲏⲗ ⲉϩⲣⲁⲓ ⲉⲡϫⲟⲉⲓⲥ
7 ⲡⲉϫⲉⲡϫⲟⲉⲓⲥ ⲇⲉ ⲛⲥⲁⲙⲟⲩⲏⲗ ϫⲉⲥⲱⲧⲙ ⲛⲥⲁⲡⲉϩⲣⲟⲟⲩ ⲙⲡⲗⲁⲟⲥ ⲕⲁⲧⲁⲧϩⲉ ⲉⲧⲟⲩϣⲁϫⲉ ⲛⲙⲙⲁⲕ ϫⲉⲛⲧⲟⲕ ⲁⲛ ⲡⲉ ⲛⲧⲁⲕⲥⲟϣϥⲕ ⲉⲧⲉⲙⲣⲣⲣⲟ ⲉϫⲱⲟⲩ
8 ⲕⲁⲧⲁϩⲱⲃ ⲛⲓⲙ ⲛⲧⲁⲩⲁⲁⲩ ⲛⲁⲓ ⲛϫⲓⲛ ⲉⲡⲉϩⲟⲟⲩ ⲛⲧⲁⲓⲉⲛⲧⲟⲩ ⲉⲃⲟⲗ ϩⲙⲡⲕⲁϩ ⲛⲕⲏⲙⲉ ϣⲁⲉϩⲣⲁⲓ ⲉⲡϩⲟⲟⲩ ⲛϩⲟⲟⲩ ⲁⲩⲱ ⲁⲩⲕⲁⲁⲧ ⲛⲥⲱⲟⲩ ⲁⲩⲣϩⲙϩⲁⲗ ⲛϩⲉⲛⲕⲉⲛⲟⲩⲧⲉ ⲧⲁⲓ ⲧⲉ ⲧϩⲉ ⲉⲧⲟⲩⲉⲓⲣⲉ ⲙⲙⲟⲥ ⲛⲁⲕ ϩⲱⲱⲕ
9 ⲧⲉⲛⲟⲩ ϭⲉ ⲥⲱⲧⲙ ⲛⲥⲁⲡⲉⲩϩⲣⲟⲟⲩ ϩⲛⲟⲩⲙⲛⲧⲙⲛⲧⲣⲉ ⲇⲉ ⲁⲣⲓⲙⲛⲧⲣⲉ ⲛⲁⲩ ⲁⲩⲱ ⲛⲅⲧⲁⲩⲟ ⲉⲣⲟⲟⲩ ⲙⲡⲇⲓⲕⲁⲓⲱⲙⲁ ⲙⲡⲣⲣⲟ ⲡⲁⲓ ⲉⲧⲛⲁⲣⲣⲣⲟ ⲉϩⲣⲁⲓ ⲉϫⲱⲟⲩ
10 ⲁⲩⲱ ⲥⲁⲙⲟⲩⲏⲗ ⲁϥⲧⲁⲩⲟ ⲙⲡϣⲁϫⲉ ⲧⲏⲣϥ ⲙⲡϫⲟⲉⲓⲥ ⲉⲡⲗⲁⲟⲥ ⲛⲉⲧⲁⲓⲧⲉⲓ ⲛⲧⲟⲟⲧϥ ⲛⲟⲩⲣⲣⲣⲟ ⲉϩⲣⲁⲓ ⲉϫⲱⲟⲩ
11 ⲉϥϫⲱ ⲙⲙⲟⲥ ϫⲉⲡⲁⲓ ⲡⲉ ⲡⲇⲓⲕⲁⲓⲱⲙⲁ ⲙⲡⲣⲣⲟ ⲡⲁⲓ ⲉⲧⲛⲁⲣⲣⲣⲟ ⲉϫⲛⲧⲏⲩⲧⲛ ⲛⲉⲧⲛϣⲏⲣⲉ ϥⲛⲁϥⲓⲧⲟⲩ ⲛⲧⲉⲧⲏⲩⲧⲛ ⲛϥⲕⲁⲁⲩ ϩⲁⲣⲁⲧⲟⲩ ⲛⲛⲉϥϩⲁⲣⲙⲁ ⲙⲛⲛⲉϥϩⲓⲡⲡⲉⲩⲥ ⲁⲩⲱ ⲉⲩⲡⲏⲧ ϩⲓⲧϩⲏ ⲛⲛⲉϥϩⲁⲣⲙⲁ
12 ⲉⲧⲣⲉϥϩⲟⲕⲟⲩ ⲟⲛ ⲛϥⲁⲁⲩ ⲛⲁϥ ⲛⲭⲓⲗⲓⲁⲣⲭⲟⲥ ϩⲓϩⲏⲕⲁⲧⲟⲛⲧⲁⲣⲭⲟⲥ ⲁⲩⲱ ⲉⲧⲣⲉⲩⲱϩⲥ ⲙⲡⲉϥⲱϩⲥ ⲁⲩⲱ ⲉⲧⲣⲉⲩϫⲱⲱⲗⲉ ⲙⲡⲉϥϫⲱⲱⲗⲉ ⲁⲩⲱ ⲉⲧⲣⲉⲩⲙⲟⲩⲛⲅ ⲛⲛⲉϥⲥⲟⲧⲃⲉϥ ⲙⲙⲓϣⲉ ⲁⲩⲱ ⲛⲥⲟⲧⲃⲉϥ ⲛⲛⲉϥϩⲁⲣⲙⲁ
13 ⲁⲩⲱ ⲛⲉⲧⲛⲕⲉϣⲉⲉⲣⲉ ϥⲛⲁϫⲓⲧⲟⲩ ⲉⲧⲣⲉⲩⲡⲉⲥⲧⲥⲟϭⲉⲛ ⲁⲩⲱ ⲉⲧⲣⲉⲩⲥⲁϩⲧⲉ ⲁⲩⲱ ⲉⲧⲣⲉⲩⲧⲱϭ
14 ⲛⲉⲧⲛⲕⲉⲓⲱϩⲉ ⲉⲧϫⲏⲩ ⲁⲩⲱ ⲛⲉⲧⲉⲙⲙⲁ ⲛⲉⲗⲟⲟⲗⲉ ⲙⲛⲛⲉⲧⲛϣⲛⲏ ⲛϫⲟⲉⲓⲧ ⲉⲧⲛⲁⲛⲟⲩⲟⲩ ϥⲛⲁϫⲓⲧⲟⲩ ⲛϥⲧⲁⲁⲩ ⲛⲛⲉϥϩⲙϩⲁⲗ
15 ⲁⲩⲱ ⲡⲉⲧⲛϭⲣⲟϭ ⲙⲛⲛⲉⲧⲉⲙⲙⲁ ⲛⲉⲗⲟⲟⲗⲉ ϥⲛⲁϫⲓⲣⲉⲙⲏⲧ ⲙⲙⲟⲟⲩ ⲛϥⲧⲁⲁⲩ ⲛⲛⲉϥϩⲙϩⲁⲗ ⲙⲛⲛⲉϥⲥⲓⲟⲩⲣ
16 ⲁⲩⲱ ⲛⲉⲧⲛϩⲙϩⲁⲗ ⲛϩⲟⲟⲩⲧ ⲙⲛⲛⲉⲧⲛϩⲙϩⲁⲗ ⲛⲥϩⲓⲙⲉ ⲁⲩⲱ ⲛⲉⲧⲛⲁϩⲟⲟⲩ ⲉⲧⲛⲁⲛⲟⲩⲟⲩ ⲙⲛⲛⲉⲧⲛⲉⲥⲟⲟⲩ ϥⲛⲁϫⲓⲧⲟⲩ ⲛϥϫⲓⲣⲉⲙⲏⲧ ⲙⲙⲟⲟⲩ ⲉⲛⲉϥϩⲃⲏⲩⲉ
17 ⲁⲩⲱ ⲛⲉⲧⲛⲟϩⲉ ⲛⲉⲥⲟⲟⲩ ϥⲛⲁϫⲓⲣⲉⲙⲏⲧ ⲙⲙⲟⲟⲩ ⲛⲧⲱⲧⲛ ϩⲱⲧⲧⲏⲩⲧⲛ ⲧⲉⲧⲛⲛⲁϣⲱⲡⲉ ⲛⲁϥ ⲛϩⲙϩⲁⲗ
18 ⲁⲩⲱ ⲛⲧⲉⲧⲛⲱϣ ⲉⲃⲟⲗ ⲙⲡⲉϩⲟⲟⲩ ⲉⲧⲙⲙⲁⲩ ϩⲓⲧϩⲏ ⲙⲡⲉⲧⲛⲣⲣⲟ ⲡⲁⲓ ⲛⲧⲁⲧⲉⲧⲛⲥⲟⲧⲡϥ ⲛⲏⲧⲛ ⲛⲧⲉⲧⲙⲡϫⲟⲉⲓⲥ ⲥⲱⲧⲙ ⲉⲣⲱⲧⲛ ⲙⲡⲉϩⲟⲟⲩ ⲉⲧⲙⲙⲁⲩ ϫⲉⲛⲧⲱⲧⲛ ⲁⲧⲉⲧⲛⲥⲱⲧⲡ ⲛⲏⲧⲛ ⲛⲟⲩⲣⲣⲟ
19 ⲁⲩⲱ ⲙⲡⲉⲡⲗⲁⲟⲥ ⲣϩⲛⲁϥ ⲉⲥⲱⲧⲙ ⲛⲥⲁⲥⲁⲙⲟⲩⲏⲗ ⲡⲉϫⲁⲩ ⲛⲁϥ ϫⲉⲛⲧⲉⲛⲛⲁϭⲱ ⲁⲛ ϩⲓⲛⲁⲓ ⲁⲗⲗⲁ ⲟⲩⲛⲟⲩⲣⲣⲟ ⲛⲁϫⲡⲉϣⲱⲡⲉ ϩⲓϫⲱⲛ
20 ⲛⲧⲉⲛⲣⲧϩⲉ ϩⲱⲱⲛ ⲛⲛⲉⲕⲉϩⲉⲑⲛⲟⲥ ⲧⲏⲣⲟⲩ ⲛⲧⲉⲡⲉⲛⲣⲣⲟ ϯϩⲁⲡ ⲉⲣⲟⲛ ⲁⲩⲱ ⲛϥⲙⲟⲟϣⲉ ϩⲓϩⲏ ⲙⲙⲟⲛ ⲛϥⲙⲓϣⲉ ⲙⲛⲡⲡⲟⲗⲉⲙⲟⲥ ⲉⲧⲛⲁⲧⲱⲟⲩⲛ ⲉϫⲱⲛ
21 ⲁⲩⲱ ⲥⲁⲙⲟⲩⲏⲗ ⲁϥⲥⲱⲧⲙ ⲉⲛⲉϣⲁϫⲉ ⲧⲏⲣⲟⲩ ⲙⲡⲗⲁⲟⲥ ⲁϥⲧⲁⲩⲟⲟⲩ ⲉⲛⲉⲙⲁⲁϫⲉ ⲙⲡϫⲟⲉⲓⲥ
22 ⲡⲉϫⲉⲡϫⲟⲉⲓⲥ ⲛⲥⲁⲙⲟⲩⲏⲗ ϫⲉⲥⲱⲧⲙ ⲛⲥⲁⲡⲉⲩϩⲣⲟⲟⲩ ⲛⲅⲧⲱϩⲥ ⲛⲟⲩⲣⲣⲟ ⲉϫⲱⲟⲩ ⲁⲩⲱ ⲥⲁⲙⲟⲩⲏⲗ ⲡⲉϫⲁϥ ⲛⲛⲣⲱⲙⲉ ⲧⲏⲣⲟⲩ ⲙⲡⲓⲥⲣⲁⲏⲗ ϫⲉⲙⲁⲣⲉⲡⲟⲩⲁ ⲡⲟⲩⲁ ⲙⲙⲱⲧⲛ ⲃⲱⲕ ⲉϩⲣⲁⲓ ⲉⲧⲉϥⲡⲟⲗⲓⲥ
1 Samuel 7 · 1 Samuel 9 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)