1 Samuel 7 — Coptic (Sahidic)

1 ⲁⲩⲱ ⲁⲩⲉⲓ ⲛϭⲓⲛⲣⲱⲙⲉ ⲛⲕⲁⲣⲓⲑⲓⲁⲣⲓⲙ ⲁⲩϥⲓ ⲛⲧⲕⲓⲃⲱⲧⲟⲥ ⲛⲧⲇⲓⲁⲑⲏⲕⲏ ⲙⲡϫⲟⲉⲓⲥ ⲁⲩϫⲓⲧⲥ ⲉϩⲟⲩⲛ ⲉⲡⲏⲓ ⲛⲁⲙⲓⲛⲁⲇⲁⲃ ⲡⲉⲧϩⲙⲡⲃⲟⲩⲛⲟⲥ ⲁⲩⲱ ⲉⲗⲉⲁⲍⲁⲣ ⲡⲉϥϣⲏⲣⲉ ⲁϥⲧⲃⲃⲟϥ ⲉⲧⲣⲉϥϩⲁⲣⲉϩ ⲉⲧⲕⲓⲃⲱⲧⲟⲥ ⲛⲧⲇⲓⲁⲑⲏⲕⲏ ⲙⲡϫⲟⲉⲓⲥ

2 ⲁⲩⲱ ϫⲓⲛⲉⲡⲉϩⲟⲟⲩ ⲛⲧⲁⲧⲕⲓⲃⲱⲧⲟⲥ ϣⲱⲡⲉ ϩⲛⲕⲁⲣⲓⲁⲑⲓⲁⲣⲓⲙ ⲛⲉϩⲟⲟⲩ ⲁⲩⲁϣⲁⲓ ⲁⲩⲣϫⲟⲩⲱⲧⲉ ⲛⲣⲟⲙⲡⲉ ⲁⲩⲱ ⲡⲏⲓ ⲧⲏⲣϥ ⲙⲡⲓⲥⲣⲁⲏⲗ ⲁⲩⲕⲧⲟⲟⲩ ⲁⲩⲟⲩⲁϩⲟⲩ ⲛⲥⲁⲡϫⲟⲉⲓⲥ

3 ⲥⲁⲙⲟⲩⲏⲗ ⲇⲉ ⲡⲉϫⲁϥ ⲙⲡⲏⲓ ⲧⲏⲣϥ ⲙⲡⲓⲥⲣⲁⲏⲗ ϫⲉⲉϣⲱⲡⲉ ϩⲙⲡⲉⲧⲛϩⲏⲧ ⲧⲏⲣϥ ⲛⲧⲱⲧⲛ ⲧⲉⲧⲛⲛⲁⲕⲉⲧⲧⲏⲩⲧⲛ ⲉⲡϫⲟⲉⲓⲥ ϥⲓ ⲙⲙⲁⲩ ⲛⲛⲉⲧⲛⲛⲟⲩⲧⲉ ⲛϣⲙⲙⲟ ⲉⲃⲟⲗ ϩⲛⲧⲉⲧⲛⲙⲏⲧⲉ ⲙⲛⲛⲉⲕⲉⲙⲁ ⲛϣⲏⲛ ⲛⲧⲉⲧⲛⲥⲟⲩⲧⲛ ⲛⲉⲧⲛϩⲏⲧ ⲉϩⲟⲩⲛ ⲉⲡϫⲟⲉⲓⲥ ⲛⲧⲉⲧⲛⲣϩⲙϩⲁⲗ ⲛⲁϥ ⲟⲩⲁⲁⲃ ⲁⲩⲱ ϥⲛⲁⲛⲉϩⲙⲧⲏⲩⲧⲛ ⲛⲧⲟⲟⲧⲟⲩ ⲛⲛⲁⲗⲗⲟⲫⲩⲗⲟⲥ

4 ⲁⲩⲱ ⲛⲉϣⲏⲣⲉ ⲙⲡⲓⲥⲣⲁⲏⲗ ⲁⲩϥⲓ ⲙⲙⲁⲩ ⲛⲛⲉⲃⲁϩⲁⲗⲓⲙ ⲙⲛⲛⲉⲕⲉⲙⲁ ⲛϣⲏⲛ ⲛⲧⲁⲥⲧⲁⲣⲱⲑ ⲁⲩⲣϩⲙϩⲁⲗ ⲙⲡϫⲟⲉⲓⲥ ⲙⲁⲩⲁⲁϥ

5 ⲡⲉϫⲉⲥⲁⲙⲟⲩⲏⲗ ⲛⲁⲩ ϫⲉⲥⲱⲟⲩϩ ⲉϩⲟⲩⲛ ⲙⲡⲓⲥⲣⲁⲏⲗ ⲧⲏⲣϥ ⲉϩⲣⲁⲓ ⲉⲙⲁⲥⲏⲫⲁⲧ ⲛⲧⲁϣⲗⲏⲗ ⲉϩⲣⲁⲓ ⲉⲡϫⲟⲉⲓⲥ ⲉϫⲱⲧⲛ

6 ⲁⲩⲥⲱⲟⲩϩ ⲇⲉ ⲧⲏⲣⲟⲩ ⲉϩⲣⲁⲓ ⲉⲙⲁⲥⲏⲫⲁⲧ ⲁⲩⲙⲉϩⲙⲟⲟⲩ ⲁⲩⲡⲱϩⲧ ϩⲁⲧϩⲏ ⲙⲡϫⲟⲉⲓⲥ ⲉϫⲙⲡⲕⲁϩ ⲁⲩⲱ ⲁⲩⲛⲏⲥⲧⲉⲩⲉ ⲙⲡⲉϩⲟⲟⲩ ⲉⲧⲙⲙⲁⲩ ⲉⲩϫⲱ ⲙⲙⲟⲥ ϫⲉⲁⲛⲣⲛⲟⲃⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲥⲁⲙⲟⲩⲏⲗ ⲁϥϯϩⲁⲡ ⲉⲛⲉϣⲏⲣⲉ ⲙⲡⲓⲥⲣⲁⲏⲗ ϩⲙⲙⲁⲥⲏⲫⲁⲧ

7 ⲛⲁⲗⲗⲟⲫⲩⲗⲟⲥ ⲇⲉ ⲁⲩⲥⲱⲧⲙ ϫⲉⲛⲉϣⲏⲣⲉ ⲧⲏⲣⲟⲩ ⲙⲡⲓⲥⲣⲁⲏⲗ ⲁⲩⲥⲱⲟⲩϩ ⲉⲙⲁⲥⲏⲫⲁⲧ ⲁⲩⲉⲓ ⲉϩⲣⲁⲓ ⲛϭⲓⲛⲥⲁⲧⲣⲁⲡⲏⲥ ⲛⲛⲁⲗⲗⲟⲫⲩⲗⲟⲥ ⲉⲣⲱϥ ⲙⲡⲓⲥⲣⲁⲏⲗ ⲁⲩⲱ ⲛⲉϣⲏⲣⲉ ⲙⲡⲓⲥⲣⲁⲏⲗ ⲁⲩⲥⲱⲧⲙ ⲁⲩⲣϩⲟⲧⲉ ⲉⲙⲁⲧⲉ ϩⲓⲧϩⲏ ⲛⲛⲁⲗⲗⲟⲫⲩⲗⲟⲥ

8 ⲡⲉϫⲉⲛϣⲏⲣⲉ ⲙⲡⲓⲥⲣⲁⲏⲗ ⲉϩⲟⲩⲛ ϩⲛⲥⲁⲙⲟⲩⲏⲗ ϫⲉⲙⲡⲣⲕⲁⲣⲱⲕ ⲉϫⲱⲛ ⲛⲅϭⲱ ⲛⲟⲩⲉϣ ⲛⲱϣ ⲉϩⲣⲁⲓ ⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲅⲛⲁϩⲙⲉⲛ ⲛⲧⲟⲟⲧⲟⲩ ⲛⲛⲁⲗⲗⲟⲫⲩⲗⲟⲥ ⲡⲉϫⲉⲥⲁⲙⲟⲩⲏⲗ ⲛⲁⲩ ϫⲉⲛⲛⲉⲥϣⲱⲡⲉ ⲙⲙⲟⲓ ⲉⲧⲣⲁⲥⲁϩⲱⲱⲧ ⲉⲃⲟⲗ ⲙⲡϫⲟⲉⲓⲥ ⲡⲁⲛⲟⲩⲧⲉ ⲉⲧⲙⲧⲣⲁⲱϣ ⲉϩⲣⲁⲓ ⲉⲣⲟϥ ⲉϫⲱⲧⲛ

9 ⲁⲩⲱ ⲥⲁⲙⲟⲩⲏⲗ ⲁϥϫⲓ ⲛⲟⲩϩⲓⲉⲓⲃ ⲉϥϩⲁⲡⲉϥⲉⲣⲱⲧⲉ ⲁϥⲧⲁⲗⲟϥ ⲉϩⲣⲁⲓ ⲛⲟⲩϭⲗⲓⲗ ⲙⲛⲡⲗⲁⲟⲥ ⲧⲏⲣϥ ⲙⲙⲁϩ ⲙⲡϫⲟⲉⲓⲥ ⲁⲩⲱ ⲥⲁⲙⲟⲩⲏⲗ ⲁϥⲱϣ ⲉϩⲣⲁⲓ ⲉⲡϫⲟⲉⲓⲥ ⲉϫⲙⲡⲓⲥⲣⲁⲏⲗ ⲁⲡϫⲟⲉⲓⲥ ⲥⲱⲧⲙ ⲉⲣⲟϥ

10 ⲥⲁⲙⲟⲩⲏⲗ ⲇⲉ ⲛⲉϥⲧⲁⲗⲟ ⲉϩⲣⲁⲓ ⲙⲡⲉϭⲗⲓⲗ ⲛⲁⲗⲗⲟⲫⲩⲗⲟⲥ ϩⲱⲟⲩ ⲁⲩⲉⲓ ⲉϩⲣⲁⲓ ⲉⲣⲱϥ ⲙⲡⲓⲥⲣⲁⲏⲗ ⲉⲡⲟⲗⲉⲙⲉⲓ ⲛⲙⲙⲁⲩ ⲡϫⲟⲉⲓⲥ ⲇⲉ ⲁϥϯ ⲛⲟⲩϩⲣⲟⲩⲃⲁⲓ ⲙⲡⲉϩⲟⲟⲩ ⲉⲧⲙⲙⲁⲩ ϩⲛⲟⲩⲛⲟϭ ⲛϩⲣⲟⲟⲩ ⲉϫⲛⲛⲁⲗⲗⲟⲫⲩⲗⲟⲥ ⲁⲩⲱ ⲁⲩϣⲧⲟⲣⲧⲣ ⲁⲩϭⲱⲧⲡ ⲙⲡⲉⲙⲧⲟ ⲉⲃⲟⲗ ⲙⲡⲓⲥⲣⲁⲏⲗ

11 ⲛϣⲏⲣⲉ ⲇⲉ ⲙⲡⲓⲥⲣⲁⲏⲗ ⲁⲩⲉⲓ ⲉⲃⲟⲗ ϩⲙⲙⲁⲥⲏⲫⲁⲧ ⲁⲩⲡⲱⲧ ⲛⲥⲁⲛⲁⲗⲗⲟⲫⲩⲗⲟⲥ ⲁⲩϩⲓⲟⲩⲉ ⲛⲥⲱⲟⲩ ϣⲁⲛⲧⲟⲩⲉⲓ ⲉϩⲣⲁⲓ ⲉⲃⲁⲓⲭⲣⲟⲑ

12 ⲁⲩⲱ ⲥⲁⲙⲟⲩⲏⲗ ⲁϥϫⲓ ⲛⲟⲩⲱⲛⲉ ⲁϥⲧⲁϩⲟϥ ⲉⲣⲁⲧϥ ϩⲛⲧⲙⲏⲧⲉ ⲙⲙⲁⲥⲏⲫⲱⲛ ⲁⲩⲱ ϩⲛⲧⲙⲏⲧⲉ ⲛⲧⲉⲧⲟⲩⲙⲟⲩⲧⲉ ⲉⲣⲟⲥ ϫⲉⲧⲡⲁⲗⲁⲓⲁ ⲁϥⲙⲟⲩⲧⲉ ⲉⲡⲉϥⲣⲁⲛ ϫⲉⲁⲃⲉⲛⲉⲍⲉⲣ ⲉⲧⲉⲡⲁⲓ ⲡⲉ ⲡⲱⲛⲉ ⲙⲡⲃⲟⲏⲑⲟⲥ ⲉϥϫⲱ ⲙⲙⲟⲥ ϫⲉϣⲁⲉϩⲣⲁⲓ ⲉⲡⲉⲓⲙⲁ ⲁⲡϫⲟⲉⲓⲥ ⲃⲟⲏⲑⲉⲓ ⲉⲣⲟⲛ

13 ⲁⲩⲱ ⲡϫⲟⲉⲓⲥ ⲁϥⲑⲃⲃⲓⲟ ⲛⲛⲁⲗⲗⲟⲫⲩⲗⲟⲥ ⲙⲡⲟⲩⲱϩ ⲉⲧⲟⲟⲧⲟⲩ ⲉⲉⲓ ⲉϫⲛⲛⲉⲧⲟϣ ⲙⲡⲓⲥⲣⲁⲏⲗ ⲁⲩⲱ ⲧϭⲓϫ ⲙⲡϫⲟⲉⲓⲥ ⲁⲥϣⲱⲡⲉ ⲉϫⲛⲛⲁⲗⲗⲟⲫⲩⲗⲟⲥ ⲛⲛⲉϩⲟⲟⲩ ⲧⲏⲣⲟⲩ ⲛⲥⲁⲙⲟⲩⲏⲗ

14 ⲁⲩⲱ ⲙⲡⲟⲗⲓⲥ ⲛⲧⲁⲛⲁⲗⲗⲟⲫⲩⲗⲟⲥ ϥⲓⲧⲟⲩ ⲛⲧⲟⲟⲧⲟⲩ ⲛⲛϣⲏⲣⲉ ⲙⲡⲓⲥⲣⲁⲏⲗ ϫⲓⲛⲁⲥⲕⲁⲗⲱⲛ ϣⲁⲉϩⲣⲁⲓ ⲉⲅⲉⲑ ⲁⲩⲱ ⲡⲧⲟϣ ⲙⲡⲓⲥⲣⲁⲏⲗ ⲁⲩϥⲓⲧϥ ⲛⲧⲟⲟⲧⲟⲩ ⲛⲛⲁⲗⲗⲟⲫⲩⲗⲟⲥ ⲛⲉⲣⲉⲟⲩⲉⲓⲣⲏⲛⲏ ⲇⲉ ϣⲟⲟⲡ ϩⲛⲧⲙⲏⲧⲉ ⲛⲛϣⲏⲣⲉ ⲙⲡⲓⲥⲣⲁⲏⲗ ⲁⲩⲱ ϩⲛⲧⲙⲏⲧⲉ ⲙⲡⲁⲙⲟⲣⲣⲁⲓⲟⲥ

15 ⲁⲩⲱ ⲥⲁⲙⲟⲩⲏⲗ ⲁϥϯϩⲁⲡ ⲉⲡⲓⲥⲣⲁⲏⲗ ⲛⲛⲉϩⲟⲟⲩ ⲧⲏⲣⲟⲩ ⲙⲡⲉϥⲱⲛϩ ⲁⲩⲱ ⲥⲁⲙⲟⲩⲏⲗ ⲁϥϯϩⲁⲡ ⲉⲡⲓⲥⲣⲁⲏⲗ

16 ⲕⲱⲧⲉ ⲉⲃⲁⲓⲑⲏⲗ ⲙⲛⲅⲁⲗⲅⲁⲗⲁ ⲙⲛⲙⲁⲥⲥⲏⲫⲁⲧ ⲉϥϯϩⲁⲡ ⲉⲡⲓⲥⲣⲁⲏⲗ ϩⲛⲛⲙⲁ ⲧⲏⲣⲟⲩ ⲉⲧⲧⲃⲃⲏⲩ

17 ⲡⲉϥⲙⲁ ⲛⲉⲥⲑⲁ ⲇⲉ ⲡⲉ ⲁⲣⲙⲁⲑⲁⲉⲓⲙ ⲉⲃⲟⲗ ϫⲉⲛⲉⲣⲉⲡⲉϥⲏⲓ ⲙⲙⲁⲩ ⲁⲩⲱ ⲛⲉϥϯϩⲁⲡ ⲉⲡⲓⲥⲣⲁⲏⲗ ϩⲙⲡⲙⲁ ⲉⲧⲙⲙⲁⲩ ⲁⲩⲱ ⲁϥⲕⲱⲧ ϩⲙⲡⲙⲁ ⲉⲧⲙⲙⲁⲩ ⲛⲟⲩⲑⲩⲥⲓⲁⲥⲧⲏⲣⲓⲟⲛ ⲙⲡϫⲟⲉⲓⲥ