Read 1 Samuel 6 side by side with translations · The Final Bible
1 ⲧⲕⲓⲃⲱⲧⲟⲥ ⲇⲉ ⲛⲉⲥϩⲛⲧⲥⲱϣⲉ ⲛⲛⲁⲗⲗⲟⲫⲩⲗⲟⲥ ⲛⲥⲁϣϥ ⲛⲉⲃⲟⲧ ⲁⲩⲱ ⲡⲉⲩⲕⲁϩ ⲁϥⲙⲓⲥⲉ ⲉϩⲣⲁⲓ ⲛϩⲉⲛⲡⲓⲛ
2 ⲛⲁⲗⲗⲟⲫⲩⲗⲟⲥ ⲇⲉ ⲁⲩⲙⲟⲩⲧⲉ ⲉⲛⲉⲩⲟⲩⲏⲏⲃ ⲙⲛⲛⲉⲩⲣⲉϥϣⲓⲛⲉ ⲁⲩⲱ ⲛⲉⲩⲣⲉϥⲙⲟⲩⲧⲉ ⲉⲩϫⲱ ⲙⲙⲟⲥ ϫⲉⲟⲩ ⲡⲉⲧⲉⲛⲛⲁⲁⲁϥ ⲛⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲧⲟⲩⲛⲉⲓⲁⲧⲛ ⲉⲃⲟⲗ ϫⲉⲉⲛⲛⲁϫⲟⲟⲩⲥ ⲉϩⲣⲁⲓ ⲉⲡⲉⲥⲙⲁ ϩⲛⲟⲩ
3 ⲡⲉϫⲁⲩ ⲛⲁⲩ ϫⲉⲉϣϫⲉ ⲧⲉⲧⲛⲛⲁϫⲟⲟⲩ ⲛⲧⲱⲧⲛ ⲛⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲙⲡⲉⲣϫⲟⲟⲩⲥ ⲉⲃⲟⲗ ⲉⲥϣⲟⲩⲉⲓⲧ ⲁⲗⲗⲁ ϩⲛⲟⲩϯ ϯ ⲛⲁⲥ ⲙⲡⲧⲱϣ ⲛⲧⲃⲁⲥⲁⲛⲟⲥ ⲁⲩⲱ ⲧⲉⲧⲛⲛⲁⲙⲧⲟⲛ ⲛⲧⲉⲡϫⲟⲉⲓⲥ ⲕⲱ ⲛⲏⲧⲛ ⲉⲃⲟⲗ ⲉϣⲱⲡⲉ ⲙⲙⲟⲛ ⲛⲧϭⲓϫ ⲙⲡϫⲟⲉⲓⲥ ⲛⲁⲗⲟ ⲁⲛ ϩⲓϫⲱⲧⲛ
4 ⲡⲉϫⲁⲩ ⲛⲁⲩ ϫⲉⲟⲩ ⲡⲉ ⲡⲧⲱϣ ⲛⲧⲃⲁⲥⲁⲛⲟⲥ ⲉⲧⲉⲛⲛⲁⲧⲁⲁϥ ⲛⲁⲥ ⲡⲉϫⲉⲛⲣⲉϥϣⲓⲛⲉ ⲛⲁⲩ ϫⲉⲕⲁⲧⲁⲧⲏⲡⲉ ⲛⲛⲉⲥⲁⲧⲣⲁⲡⲏⲥ ⲛⲛⲁⲗⲗⲟⲫⲩⲗⲟⲥ ϯ ⲛⲁⲥ ⲛϯⲟⲩ ⲙⲙⲁ ⲛⲉϩⲙⲟⲟⲥ ⲛⲛⲟⲩⲃ ϫⲉⲁⲩⲛⲟⲃⲉ ϣⲱⲡⲉ ⲛϩⲏⲧⲧⲏⲩⲧⲛ ⲙⲛⲛⲉⲧⲛⲁⲣⲭⲱⲛ ⲙⲛⲡⲕⲉⲗⲁⲟⲥ
5 ⲁⲩⲱ ϩⲉⲛⲕⲉⲡⲓⲛ ⲛⲛⲟⲩⲃ ⲛⲧⲉⲧⲛⲧⲁⲙⲓⲟⲟⲩ ⲕⲁⲧⲁⲡⲓⲛⲉ ⲛⲛⲉⲡⲓⲛ ⲛⲁⲓ ⲉⲧⲧⲁⲕⲟ ⲙⲡⲉⲧⲛⲕⲁϩ ⲛⲧⲉⲧⲛϯⲉⲟⲟⲩ ⲙⲡϫⲟⲉⲓⲥ ϫⲉⲕⲁⲥ ⲉϥⲉϥⲓ ⲛⲧⲉϥϭⲓϫ ⲉⲃⲟⲗ ϩⲓϫⲱⲧⲛ ⲁⲩⲱ ⲉⲃⲟⲗ ϩⲓϫⲛⲡⲉⲧⲛⲛⲟⲩⲧⲉ ⲁⲩⲱ ⲉⲃⲟⲗ ϩⲓϫⲛⲡⲉⲧⲛⲕⲁϩ
6 ⲁⲩⲱ ⲉⲧⲃⲉⲟⲩ ⲁⲧⲉⲧⲛϯⲉⲛϣⲟⲧ ⲛⲛⲉⲧⲛϩⲏⲧ ⲛⲧϩⲉ ⲛⲧⲁⲫⲁⲣⲁⲱ ⲙⲛⲛⲉⲣⲙⲛⲕⲏⲙⲉ ϯⲉⲛϣⲟⲧ ⲛⲛⲉⲩϩⲏⲧ ⲙⲏ ⲛⲧⲉⲣⲉϥⲑⲙⲕⲟⲟⲩ ⲙⲡⲟⲩⲕⲱ ⲉⲃⲟⲗ ⲛⲛϣⲏⲣⲉ ⲙⲡⲓⲥⲣⲁⲏⲗ ⲁⲩⲃⲱⲕ
7 ⲧⲉⲛⲟⲩ ϭⲉ ⲛⲧⲱⲧⲛ ϫⲓ ⲛⲧⲉⲧⲛⲧⲁⲙⲓⲟ ⲛⲟⲩⲁϭⲟⲗⲧⲉ ⲛⲃⲣⲣⲉ ⲁⲩⲱ ⲉϩⲉ ⲥⲛⲧⲉ ⲛϣⲁⲙⲓⲥⲉ ⲁϫⲛⲛⲉⲩϣⲏⲣⲉ ⲛⲧⲉⲧⲛⲛⲟⲩϩϥ ⲛⲛⲁϩⲟⲟⲩ ⲉⲧⲁϭⲟⲗⲧⲉ ⲛⲉⲩϣⲏⲣⲉ ⲇⲉ ⲛⲧⲉⲧⲛⲟⲩⲁⲁⲧⲟⲩ ⲉϩⲣⲁⲓ ⲉⲛⲉⲩⲙⲁ
8 ⲁⲩⲱ ⲛⲧⲉⲧⲛϫⲓ ⲛⲧⲕⲓⲃⲱⲧⲟⲥ ⲛⲧⲉⲧⲛⲧⲁⲗⲟⲥ ⲉϩⲣⲁⲓ ⲉϫⲛⲧⲁϭⲟⲗⲧⲉ ⲁⲩⲱ ⲛⲉⲥⲕⲉⲩⲏ ⲛⲛⲟⲩⲃ ⲉⲧⲉⲧⲛⲛⲁⲧⲁⲁⲩ ⲛⲁⲥ ϩⲁⲧⲃⲁⲥⲁⲛⲟⲥ ⲉⲧⲉⲧⲛⲛⲉⲕⲁⲁⲩ ⲛⲥⲁⲟⲩⲥⲁ ⲛⲧϩⲏⲕⲉ ⲛⲧⲁϭⲟⲗⲧⲉ ⲛⲧⲉⲧⲛϫⲟⲟⲩⲥ ⲉⲃⲟⲗ ⲉⲧⲉⲧⲛϫⲱⲣⲙ ⲙⲙⲟⲥ ⲛⲧⲉⲧⲛⲟⲩⲉϩⲧⲏⲩⲧⲛ ⲛⲥⲱⲥ
9 ⲛⲧⲉⲧⲛϯϩⲧⲏⲧⲛ ⲉⲡⲉⲥⲙⲟⲉⲓⲧ ⲉⲥⲛⲁⲧⲁⲁⲥ ⲉϩⲣⲁⲓ ⲉⲧⲉⲥϩⲓⲏ ⲕⲁⲧⲁⲧⲉϩⲓⲏ ⲛⲃⲏⲑⲥⲁⲙⲏⲥ ⲉϣⲱⲡⲉ ⲥⲉⲛⲧⲟϥ ⲡⲉ ⲛⲧⲁϥⲉⲓⲛⲉ ⲛⲁⲛ ⲛⲧⲉⲓⲛⲟϭ ⲛⲕⲁⲕⲓⲁ ⲉⲥⲧⲙⲧⲁⲁⲥ ⲇⲉ ⲉⲡⲥⲁ ⲉⲧⲙⲙⲁⲩ ⲧⲉⲛⲛⲁⲉⲓⲙⲉ ϫⲉⲛⲧⲉϥϭⲓϫ ⲧⲉ ⲁⲛ ⲛⲧⲁⲥⲉⲓ ⲉϫⲱⲛ ⲁⲗⲗⲁ ⲟⲩⲁⲡⲁⲛⲧⲏⲙⲁ ⲡⲉ ⲡⲁⲓ ⲛⲧⲁϥⲧⲁϩⲟⲛ
10 ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩⲉⲓⲣⲉ ϩⲓⲛⲁⲓ ⲁⲩϫⲓ ⲛⲧⲉϩⲉ ⲥⲛⲧⲉ ⲛϣⲁⲙⲓⲥⲉ ⲁⲩⲛⲁϩⲃⲟⲩ ⲉϩⲟⲩⲛ ⲉⲧⲁϭⲟⲗⲧⲉ ⲛⲉⲩϣⲏⲣⲉ ⲇⲉ ⲁⲩϫⲟⲟⲩⲥⲟⲩ ⲉϩⲣⲁⲓ ⲉⲡⲉⲩⲙⲁ
11 ⲁⲩⲱ ⲁⲩⲕⲱ ⲛⲧⲁⲩ ⲛⲧⲕⲓⲃⲱⲧⲟⲥ ⲉϫⲛⲧⲁϭⲟⲗⲧⲉ ⲁⲩⲱ ⲡⲉⲣⲏⲧ ⲛⲧⲁⲩⲉⲣⲏⲧ ⲙⲙⲟϥ ⲙⲙⲁ ⲛⲉϩⲙⲟⲟⲥ ⲛⲛⲟⲩⲃ ⲙⲛⲛⲉⲕⲉⲡⲓⲛ ⲛⲛⲟⲩⲃ ⲁⲩⲕⲁⲁⲩ ϩⲛⲧⲉⲥⲑⲏⲕⲏ
12 ⲛⲉϩⲟⲟⲩ ⲇⲉ ⲁⲩⲙⲟⲟϣⲉ ϩⲛⲧⲉϩⲓⲏ ⲁⲩⲧⲁⲁⲩ ⲉⲧⲉϩⲓⲏ ⲛⲃⲏⲑⲥⲁⲙⲏⲥ ⲛⲧⲁⲩⲕⲁⲣⲁⲧⲟⲩ ⲙⲙⲁⲧⲉ ϩⲛⲟⲩⲙⲟⲉⲓⲧ ⲛⲟⲩⲱⲧ ⲁⲩⲱ ⲛⲉⲩϩⲟ ⲙⲡⲟⲩⲡⲱϣⲥ ⲉⲟⲩⲛⲁⲙ ⲟⲩⲇⲉ ⲉϩⲃⲟⲩⲣ ⲁⲩⲱ ⲛⲥⲁⲧⲣⲁⲡⲏⲥ ⲛⲛⲁⲗⲗⲟⲫⲩⲗⲟⲥ ⲛⲉⲩⲙⲟⲟϣⲉ ⲉⲩⲟⲩⲏϩ ⲛⲥⲱⲥ ϣⲁⲉϩⲣⲁⲓ ⲉⲛⲧⲟϣ ⲛⲃⲏⲑⲥⲁⲙⲏⲥ
13 ⲛⲣⲱⲙⲉ ⲇⲉ ⲛⲃⲏⲑⲥⲁⲙⲏⲥ ⲛⲉⲩⲱϩⲥ ⲡⲉ ϩⲛⲟⲩⲱϩⲥ ⲛⲥⲟⲩⲟ ϩⲣⲁⲓ ϩⲙⲡⲉⲓⲁ ⲁⲩⲱ ⲁⲩϥⲓⲧⲟⲩ ⲉϩⲣⲁⲓ ⲁⲩⲛⲁⲩ ⲉⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲁⲩⲣⲁϣⲉ ⲁⲩⲧⲱⲟⲩⲛ ⲁⲩⲉⲓ ⲉⲃⲟⲗ ϩⲏⲧⲥ
14 ⲁⲩⲱ ⲧⲁϭⲟⲗⲧⲉ ⲁⲥⲃⲱⲕ ⲉϩⲟⲩⲛ ⲉⲧⲥⲱϣⲉ ⲛⲱⲥⲉⲏ ⲡⲉⲧϩⲛⲃⲏⲑⲥⲁⲙⲏⲥ ⲁⲩⲱ ⲁⲩⲧⲁϩⲟ ⲉⲣⲁⲧϥ ϩⲁϩⲧⲏⲥ ⲛⲟⲩⲛⲟϭ ⲛⲱⲛⲉ ⲁⲩⲡⲱϩ ⲛⲛⲉϣⲉ ⲛⲧⲁϭⲟⲗⲧⲉ ⲁⲩϩⲁⲣϭⲟⲩ ⲁⲩⲱ ⲛⲁϩⲟⲟⲩ ⲁⲩⲧⲁⲗⲁⲩ ⲉϩⲣⲁⲓ ⲉϫⲱⲟⲩ ⲛϭⲗⲓⲗ ⲙⲙⲁϩ ⲙⲡϫⲟⲉⲓⲥ
15 ⲛⲗⲉⲩⲓⲧⲏⲥ ⲇⲉ ⲁⲩϫⲓ ⲛⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲁⲩⲱ ⲡⲉⲣⲏⲧ ⲉⲧⲛⲙⲙⲁⲥ ⲙⲛⲛⲉⲥⲕⲉⲩⲏ ⲛⲛⲟⲩⲃ ⲉⲧϩⲓϫⲱⲥ ⲁⲩⲕⲁⲁⲩ ϩⲓϫⲛⲡⲛⲟϭ ⲛⲱⲛⲉ ⲛⲣⲱⲙⲉ ⲇⲉ ⲛⲃⲏⲑⲥⲁⲙⲏⲥ ⲁⲩⲉⲓⲛⲉ ⲛϩⲉⲛϭⲗⲓⲗ ⲙⲛϩⲉⲛⲑⲩⲥⲓⲁ ⲙⲡⲉϩⲟⲟⲩ ⲉⲧⲙⲙⲁⲩ ⲙⲙⲁϩ ⲙⲡϫⲟⲉⲓⲥ
16 ⲁⲩⲱ ⲡϯⲟⲩ ⲛⲥⲁⲧⲣⲁⲡⲏⲥ ⲛⲛⲁⲗⲗⲟⲫⲩⲗⲟⲥ ⲛⲉⲩⲛⲁⲩ ⲉⲣⲟⲟⲩ ⲡⲉ ⲁⲩⲱ ⲁⲩⲕⲟⲧⲟⲩ ⲉϩⲣⲁⲓ ⲉⲁⲥⲕⲁⲗⲱⲛ ⲙⲡⲉϩⲟⲟⲩ ⲉⲧⲙⲙⲁⲩ
17 ⲁⲩⲱ ⲛⲁⲓ ⲛⲉ ⲛⲉⲙⲟⲩⲛⲅ ⲛϭⲓϫ ⲙⲙⲁ ⲛϩⲙⲟⲟⲥ ⲛⲛⲟⲩⲃ ⲛⲁⲓ ⲛⲧⲁⲛⲁⲗⲗⲟⲫⲩⲗⲟⲥ ⲧⲁⲁⲩ ⲛⲉⲣⲏⲧ ⲙⲡϫⲟⲉⲓⲥ ϩⲁⲧⲉⲩⲃⲁⲥⲁⲛⲟⲥ ⲟⲩⲙⲁ ⲛⲉϩⲙⲟⲟⲥ ϩⲁⲧⲁⲍⲱⲧⲟⲥ ⲕⲉⲟⲩⲁ ϩⲁⲅⲁⲍⲁ ⲕⲉⲟⲩⲁ ϩⲁⲅⲉⲑ ⲕⲉⲟⲩⲁ ϩⲁⲁⲥⲕⲁⲗⲱⲛ ⲕⲉⲟⲩⲁ ϩⲁⲁⲕⲕⲁⲣⲱⲛ
18 ⲁⲩⲱ ϩⲛⲡⲓⲛ ⲛⲛⲟⲩⲃ ⲕⲁⲧⲁⲧⲏⲡⲉ ⲛⲛⲉⲡⲟⲗⲓⲥ ⲧⲏⲣⲟⲩ ⲛⲛⲁⲗⲗⲟⲫⲩⲗⲟⲥ ⲙⲡϯⲟⲩ ⲛⲥⲁⲧⲣⲁⲡⲏⲥ ϫⲓⲛⲟⲩⲛⲟϭ ⲙⲡⲟⲗⲓⲥ ⲉⲥⲟⲣϫ ϣⲁⲉϩⲣⲁⲓ ⲉⲛⲕⲱⲙⲏ ⲙⲫⲉⲣⲉⲥⲥⲁⲓⲟⲥ ⲁⲩⲱ ϣⲁⲉϩⲣⲁⲓ ⲉⲡⲛⲟϭ ⲛⲱⲛⲉ ⲡⲙⲁ ⲛⲧⲁⲩⲕⲱ ϩⲓϫⲱϥ ⲛⲧⲕⲓⲃⲱⲧⲟⲥ ⲛⲧⲇⲓⲁⲑⲏⲕⲏ ⲙⲡϫⲟⲉⲓⲥ ⲡⲉⲧϩⲛⲧⲥⲱϣⲉ ⲛⲱⲥⲉⲏ ⲡⲉ ⲉⲃⲟⲗ ϩⲛⲃⲏⲑⲥⲁⲙⲏⲥ
19 ⲛϣⲏⲣⲉ ⲇⲉ ⲛⲓⲉⲭⲟⲛⲓⲁⲥ ⲙⲡⲟⲩⲣⲁϣⲉ ⲉϫⲛⲛⲣⲱⲙⲉ ⲛⲃⲏⲑⲥⲁⲙⲏⲥ ϫⲉⲁⲩⲛⲁⲩ ⲉⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲁⲩⲱ ⲁϥⲡⲁⲧⲁⲥⲥⲉⲓ ⲛϩⲏⲧⲟⲩ ⲛϣϥⲉ ⲛⲣⲱⲙⲉ ⲁⲩⲱ ϯⲟⲩ ⲛⲧⲃⲁ ⲛⲣⲱⲙⲉ ⲡⲗⲁⲟⲥ ⲇⲉ ⲁϥⲣϩⲏⲃⲉ ϫⲉⲁⲡϫⲟⲉⲓⲥ ⲉⲓⲛⲉ ⲛⲟⲩⲛⲟϭ ⲙⲡⲗⲏⲅⲏ ⲉⲙⲁⲧⲉ ⲉϫⲙⲡⲗⲁⲟⲥ
20 ⲁⲩⲱ ⲛⲣⲱⲙⲉ ⲛⲃⲏⲑⲥⲁⲙⲏⲥ ⲡⲉϫⲁⲩ ⲛⲛⲉⲩⲉⲣⲏⲩ ϫⲉⲛⲓⲙ ⲡⲉⲧⲛⲁⲙⲟⲟϣⲉ ϩⲓⲧϩⲏ ⲙⲡϫⲟⲉⲓⲥ ⲡⲁⲓ ⲉⲧⲟⲩⲁⲁⲃ ⲁⲩⲱ ⲉⲣⲉⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲛⲁⲃⲱⲕ ⲉϩⲣⲁⲓ ⲛⲛⲓⲙ ⲛⲥⲗⲟ ϩⲁⲧⲏⲛ
21 ⲁⲩϫⲟⲟⲩ ⲛϩⲉⲛⲃⲁⲓϣⲓⲛⲉ ⲉⲣⲁⲧⲟⲩ ⲛⲛⲉⲧⲟⲩⲏϩ ϩⲛⲕⲁⲣⲓⲁⲑⲓⲁⲣⲓⲙ ⲉⲩϫⲱ ⲙⲙⲟⲥ ⲛⲁⲩ ϫⲉⲛⲁⲗⲗⲟⲫⲩⲗⲟⲥ ⲁⲩⲕⲧⲟ ⲛⲁⲛ ⲛⲧⲕⲓⲃⲱⲧⲟⲥ ⲛⲧⲇⲓⲁⲑⲏⲕⲏ ⲙⲡϫⲟⲉⲓⲥ ⲁⲙⲏⲉⲓⲧⲛ ⲛⲧⲉⲧⲛϫⲓⲧⲥ ⲉϩⲣⲁⲓ ⲛⲏⲧⲛ
1 Samuel 5 · 1 Samuel 7 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)