Read 1 Samuel 5 side by side with translations · The Final Bible
1 ⲛⲁⲗⲗⲟⲫⲩⲗⲟⲥ ⲇⲉ ⲁⲩϫⲓ ⲛⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲉⲃⲟⲗ ϩⲛⲁⲃⲉⲛⲉⲍⲉⲣ ⲁⲩϫⲓⲧⲥ ⲉϩⲟⲩⲛ ⲉⲧⲁⲍⲱⲧⲟⲥ
2 ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩϫⲓ ⲛⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲁⲩϫⲓⲧⲥ ⲉϩⲟⲩⲛ ⲉⲡⲏⲓ ⲛⲇⲁⲅⲱⲛ ⲡⲉⲩⲛⲟⲩⲧⲉ ⲁⲩⲧⲁϩⲟⲥ ⲉⲣⲁⲧⲥ ϩⲁⲧⲛⲇⲁⲅⲱⲛ
3 ⲁⲩⲱ ⲛⲣⲱⲙⲉ ⲛⲧⲁⲍⲱⲧⲟⲥ ⲁⲩϣⲟⲣⲡⲟⲩ ⲁⲩⲡⲱⲧ ⲉϩⲟⲩⲛ ⲉⲡⲏⲓ ⲛⲇⲁⲅⲱⲛ ⲁⲩⲛⲁⲩ ⲁⲩⲱ ⲉⲓⲥ ⲇⲁⲅⲱⲛ ⲛⲉϥⲛⲏϫ ϩⲓϫⲙⲡⲉϥϩⲟ ϩⲓⲧϩⲏ ⲛⲧⲕⲓⲃⲱⲧⲟⲥ ⲙⲡⲛⲟⲩⲧⲉ ⲁⲩⲧⲟⲩⲛⲉⲥⲇⲁⲅⲱⲛ ⲇⲉ ⲁⲩⲧⲁϩⲟϥ ⲉⲣⲁⲧϥ ϩⲙⲡⲉϥⲙⲁ ⲁⲩⲱ ⲧϭⲓϫ ⲙⲡϫⲟⲉⲓⲥ ⲁⲥⲉⲛϣⲟⲧ ⲉϫⲛⲛⲉⲣⲱⲙⲉ ⲛⲧⲁⲍⲱⲧⲟⲥ ⲁⲥⲃⲁⲥⲁⲛⲓⲍⲉ ⲙⲙⲟⲟⲩ ⲁⲩⲱ ⲁⲥⲑⲉⲙⲕⲟⲟⲩ ⲉⲛⲉⲩⲙⲁ ⲛⲉϩⲙⲟⲟⲥ ⲇⲁⲍⲱⲧⲟⲥ ⲙⲛⲛⲉⲥⲕⲉⲧⲟϣ
4 ⲁⲩⲱ ⲛⲧⲉⲣⲟⲩϣⲟⲣⲡⲟⲩ ⲟⲛ ⲉϩⲧⲟⲟⲩⲉ ⲉⲓⲥ ⲇⲁⲅⲱⲛ ⲛⲉϥⲛⲏϫ ϩⲓϫⲙⲡⲉϥϩⲟ ϩⲓⲧϩⲏ ⲛⲧⲕⲓⲃⲱⲧⲟⲥ ⲛⲧⲇⲓⲁⲑⲏⲕⲏ ⲙⲡϫⲟⲉⲓⲥ ⲁⲩⲱ ⲧⲁⲡⲉ ⲛⲧⲁⲅⲱⲛ ⲙⲛⲧⲉϩⲓⲱⲙⲉ ⲥⲛⲧⲉ ⲛⲛⲉϥϭⲓϫ ⲛⲉⲩⲛⲏϩ ⲉⲃⲟⲗ ⲡⲟⲩⲁ ⲡⲟⲩⲁ ϩⲓⲧϩⲏ ⲛⲧⲕⲉⲛϩⲏ ⲁⲩⲱ ⲡⲕⲉϭⲃⲟⲓ ⲥⲛⲁⲩ ⲛⲛⲉϥϭⲓϫ ⲛⲉⲩⲛⲏϫ ϩⲓϫⲛⲧⲉⲡⲛⲏ ⲛⲧⲕⲉⲛϩⲏ ⲡⲗⲏⲛ ⲡⲧⲕⲁⲥ ⲙⲡϫⲓⲥⲉ ⲛⲇⲁⲅⲱⲛ ⲙⲡⲉϥϩⲉ
5 ⲉⲧⲃⲉⲡⲁⲓ ⲛⲉⲟⲩⲏⲏⲃ ⲛⲇⲁⲅⲱⲛ ⲙⲛⲟⲩⲟⲛ ⲛⲓⲙ ⲉⲧⲛⲁⲉϩⲟⲩⲛ ⲉⲡⲏⲓ ⲛⲇⲁⲅⲱⲛ ⲙⲉϩⲟⲩⲉϩⲣⲁⲧⲟⲩ ⲉϫⲛⲡⲛⲛⲏ ϩⲛⲇⲁⲍⲱⲧⲟⲥ ϣⲁⲉϩⲣⲁⲓ ⲉⲡϩⲟⲟⲩ ⲛϩⲟⲟⲩ ⲁⲗⲗⲁ ϩⲛⲟⲩⲡⲱⲣϫ ⲉϣⲁⲩⲡⲉⲣⲉϣⲣⲁⲧⲟⲩ ⲉⲃⲟⲗ ϩⲛⲧⲡⲛⲛⲏ
6 ⲁⲩⲱ ⲧϭⲓϫ ⲙⲡϫⲟⲉⲓⲥ ⲁⲥⲉⲛϣⲟⲧ ⲉϫⲛⲇⲁⲍⲱⲧⲟⲥ ⲁϥⲑⲙⲕⲟⲟⲩ ⲁϥⲧⲁⲕⲟ ⲛⲛⲉⲩⲉϫⲏⲩ ⲁⲩⲱ ⲛⲧⲉⲩⲭⲱⲣⲁ ⲏ ⲧⲉⲩⲥⲱϣⲉ ⲁⲥⲧⲁⲩⲟ ⲉϩⲣⲁⲓ ⲛϩⲉⲛⲡⲓⲛ ⲁⲩⲛⲟϭ ⲛⲁⲛⲁⲅⲕⲏ ⲙⲙⲟⲩ ϣⲱⲡⲉ ϩⲛⲧⲉⲩⲡⲟⲗⲓⲥ
7 ⲁⲩⲱ ⲛⲉⲣⲱⲙⲉ ⲛⲧⲁⲍⲱⲧⲟⲥ ⲁⲩⲛⲁⲩ ϫⲉⲧⲁⲓ ⲧⲉ ⲧϩⲉ ⲛⲧⲁⲥϣⲱⲡⲉ ⲡⲉϫⲁⲩ ⲛⲛⲉⲩⲉⲣⲏⲩ ϫⲉⲧⲕⲓⲃⲱⲧⲟⲥ ⲙⲡⲛⲟⲩⲧⲉ ⲙⲡⲓⲥⲣⲁⲏⲗ ⲛⲥⲛⲁϣϭⲱ ⲁⲛ ϩⲁⲧⲏⲛ ϫⲉⲧⲉϥϭⲓϫ ⲛⲁϣⲧ ϩⲓϫⲱⲛ ⲁⲩⲱ ⲉϫⲛⲧⲁⲅⲱⲛ ⲡⲉⲛⲛⲟⲩⲧⲉ
8 ⲁⲩϫⲟⲟⲩ ⲇⲉ ⲁⲩⲥⲱⲟⲩϩ ⲉϩⲟⲩⲛ ϣⲁⲣⲟⲟⲩ ⲛⲛⲉⲥⲁⲧⲣⲁⲡⲏⲥ ⲛⲛⲁⲗⲗⲟⲫⲩⲗⲟⲥ ⲡⲉϫⲁⲩ ⲛⲁⲩ ϫⲉⲟⲩ ⲡⲉⲧⲉⲛⲛⲁⲁⲁϥ ⲛⲧⲕⲓⲃⲱⲧⲟⲥ ⲙⲡⲛⲟⲩⲧⲉ ⲙⲡⲓⲥⲣⲁⲏⲗ ⲛⲅⲉⲑⲉⲟⲥ ⲇⲉ ⲡⲉϫⲁⲩ ⲛⲁⲩ ϫⲉⲧⲕⲓⲃⲱⲧⲟⲥ ⲙⲡⲛⲟⲩⲧⲉ ⲙⲁⲣⲉⲥⲡⲱⲱⲛⲉ ⲛⲥⲉⲓ ϩⲁⲑⲏⲛ ⲁⲩⲱ ⲧⲕⲓⲃⲱⲧⲟⲥ ⲙⲡⲛⲟⲩⲧⲉ ⲁⲥⲡⲱⲱⲛⲉ ⲉϩⲣⲁⲓ ⲉⲅⲉⲑ
9 ⲁⲥϣⲱⲡⲉ ⲇⲉ ⲙⲛⲛⲥⲁⲉⲧⲣⲉⲥⲡⲱⲱⲛⲉ ⲧϭⲓϫ ⲙⲡϫⲟⲉⲓⲥ ⲁⲥϣⲱⲡⲉ ϩⲓϫⲱⲟⲩ ⲁⲩⲛⲟϭ ⲉⲙⲁⲧⲉ ⲛϣⲧⲟⲣⲧⲣ ϣⲱⲡⲉ ϩⲛⲧⲡⲟⲗⲓⲥ ⲁϥⲡⲁⲧⲁⲥⲥⲉⲓ ⲛⲛⲣⲱⲙⲉ ⲛⲧⲡⲟⲗⲓⲥ ⲛϫⲓⲛ ⲉⲡⲉⲩⲕⲟⲩⲓ ϣⲁⲡⲉⲩⲛⲟϭ ⲁϥⲑⲙⲕⲟⲟⲩ ⲉⲛⲉⲩⲙⲁ ⲛⲉϩⲙⲟⲟⲥ ⲛⲅⲉⲑⲑⲁⲓⲟⲥ ⲁⲩⲧⲁⲙⲓⲟ ⲛⲁⲩ ⲛϩⲉⲛⲙⲟⲩⲛⲅ ⲙⲙⲁ ⲛϩⲙⲟⲟⲥ
10 ⲁⲩⲱ ⲁⲩϫⲟⲟⲩ ⲛⲧⲕⲓⲃⲱⲧⲟⲥ ⲙⲡⲛⲟⲩⲧⲉ ⲉϩⲣⲁⲓ ⲉⲁⲥⲕⲁⲗⲱⲛ ⲛⲣⲱⲙⲉ ⲇⲉ ⲛⲁⲥⲕⲁⲗⲱⲛ ⲁⲩⲱϣ ⲉⲃⲟⲗ ⲉⲩϫⲱ ⲙⲙⲟⲥ ϫⲉⲉⲧⲃⲉⲟⲩ ⲁⲧⲉⲧⲛⲧⲛⲛⲟⲟⲩ ⲛⲁⲛ ⲛⲧⲕⲓⲃⲱⲧⲟⲥ ⲙⲡⲛⲟⲩⲧⲉ ⲙⲡⲓⲥⲣⲁⲏⲗ ⲉⲙⲟⲟⲩⲧⲛ ⲙⲛⲡⲉⲛⲕⲉⲙⲏⲏϣⲉ
11 ⲁⲩⲱ ⲁⲩϫⲟⲟⲩ ⲁⲩⲥⲱⲟⲩϩ ⲉϩⲟⲩⲛ ⲛⲛⲉⲥⲁⲧⲣⲁⲡⲏⲥ ⲧⲏⲣⲟⲩ ⲛⲛⲁⲗⲗⲟⲫⲩⲗⲟⲥ ⲡⲉϫⲁⲩ ⲛⲁⲩ ϫⲉϫⲟⲟⲩ ⲛⲧⲕⲓⲃⲱⲧⲟⲥ ⲙⲡⲛⲟⲩⲧⲉ ⲙⲡⲓⲥⲣⲁⲏⲗ ⲛⲥⲟⲩⲱϩ ϩⲙⲡⲉⲥⲙⲁ ⲛⲥⲧⲙⲙⲟⲟⲩⲧⲛ ⲙⲛⲡⲉⲛⲕⲉⲗⲁⲟⲥ ϫⲉⲁⲩⲛⲟϭ ⲛⲁⲛⲁⲅⲕⲏ ⲉⲥⲛⲁϣⲧ ⲉⲙⲁⲧⲉ ϣⲱⲡⲉ ϩⲛⲧⲡⲟⲗⲓⲥ ⲧⲏⲣⲥ ⲛⲧⲉⲣⲉⲧⲕⲓⲃⲱⲧⲟⲥ ⲙⲡⲛⲟⲩⲧⲉ ⲙⲡⲓⲥⲣⲁⲏⲗ ϣⲱⲡⲉ ϩⲙⲡⲙⲁ ⲉⲧⲙⲙⲁⲩ
12 ⲁⲩⲱ ⲛⲉⲧⲟⲛϩ ⲙⲡⲟⲩⲙⲟⲩ ⲁⲩⲱϭⲉ ⲉⲛⲉⲩⲙⲁ ⲛⲉⲣⲙⲏ ⲁⲩⲱ ⲡⲉϩⲣⲟⲟⲩ ⲛⲧⲃⲁⲥⲁⲛⲟⲥ ⲛⲧⲡⲟⲗⲓⲥ ⲁϥⲃⲱⲕ ⲉϩⲣⲁⲓ ⲉⲧⲡⲉ
1 Samuel 4 · 1 Samuel 6 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)