Read 1 Samuel 4 side by side with translations · The Final Bible
1 ⲁⲥϣⲱⲡⲉ ⲇⲉ ϩⲛⲛⲉϩⲟⲟⲩ ⲉⲧⲙⲙⲁⲩ ⲛⲁⲗⲗⲟⲫⲩⲗⲟⲥ ⲁⲩⲥⲱⲟⲩϩ ⲉϩⲟⲩⲛ ⲉⲣⲡⲟⲗⲉⲙⲟⲥ ⲙⲛⲡⲓⲥⲣⲁⲏⲗ ⲁⲩⲱ ⲡⲓⲥⲣⲁⲏⲗ ⲁϥⲉⲓ ⲉⲃⲟⲗ ⲉⲧⲱⲙⲛⲧ ⲉⲣⲟⲟⲩ ⲉⲡⲟⲗⲉⲙⲉⲓ ⲛⲙⲙⲁⲩ ⲁⲩⲧⲁⲁⲩ ⲉϩⲣⲁⲓ ⲉⲁⲃⲉⲛⲉⲍⲉⲣ ⲛⲁⲗⲗⲟⲫⲩⲗⲟⲥ ϩⲱⲟⲩ ⲁⲩⲧⲁⲁⲩ ⲉϩⲣⲁⲓ ⲉⲁⲫⲉⲕ
2 ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩⲥⲉⲣⲉⲙⲡⲗⲁϩ ⲉⲃⲟⲗ ⲉⲡⲟⲗⲉⲙⲉⲓ ⲙⲛⲡⲓⲥⲣⲁⲏⲗ ⲡⲡⲟⲗⲉⲙⲟⲥ ⲇⲉ ⲁϥϩⲣⲟϣ ⲉϫⲙⲡⲓⲥⲣⲁⲏⲗ ⲁⲩⲱ ⲛⲣⲱⲙⲉ ⲙⲡⲓⲥⲣⲁⲏⲗ ⲁⲩϭⲱⲧⲡ ⲙⲡⲉⲙⲧⲟ ⲉⲃⲟⲗ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲁⲩⲡⲗⲏⲅⲏ ⲉⲃⲟⲗ ϩⲙⲡⲉⲙⲗⲁϩ ⲛⲧⲁϥϣⲱⲡⲉ ϩⲛⲧⲥⲱϣⲉ ⲛϭⲓϩⲙⲉ ⲛϣⲉ ⲛⲣⲱⲙⲉ
3 ⲡⲗⲁⲟⲥ ⲇⲉ ⲁϥⲉⲓ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ ⲁⲩⲱ ⲛⲉⲡⲣⲉⲥⲃⲩⲧⲉⲣⲟⲥ ⲙⲡⲓⲥⲣⲁⲏⲗ ⲡⲉϫⲁⲩ ⲛⲛⲉⲩⲉⲣⲏⲩ ϫⲉⲉⲧⲃⲉⲟⲩ ⲡϫⲟⲉⲓⲥ ⲁϥⲑⲃⲃⲓⲟⲛ ⲙⲡϩⲟⲟⲩ ⲛⲁϩⲣⲁⲩ ⲛⲛⲁⲗⲗⲟⲫⲩⲗⲟⲥ ⲙⲁⲣⲉⲛϫⲓ ⲛⲧⲕⲓⲃⲱⲧⲟⲥ ⲙⲡⲉⲛⲛⲟⲩⲧⲉ ⲉⲃⲟⲗ ϩⲛⲥⲏⲗⲱ ⲛⲥⲉⲓ ⲛⲥϭⲱ ϩⲛⲧⲉⲛⲙⲏⲧⲉ ⲛⲥⲛⲁϩⲙⲉⲛ ⲛⲧⲟⲟⲧⲟⲩ ⲛⲛⲉⲛϫⲁϫⲉ
4 ⲡⲗⲁⲟⲥ ⲇⲉ ⲁϥϫⲟⲟⲩ ⲉϩⲣⲁⲓ ⲉⲥⲏⲗⲱ ⲁⲩϥⲓ ⲉⲃⲟⲗ ϩⲙⲡⲙⲁ ⲉⲧⲙⲙⲁⲩ ⲛⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲉⲣⲉⲡⲉⲭⲁⲓⲣⲟⲩⲃⲓⲛ ϩⲓϫⲱⲥ ⲁⲩⲱ ⲡϣⲏⲣⲉ ⲥⲛⲁⲩ ⲛϩⲏⲗⲓ ⲟⲫⲛⲓ ⲙⲛⲫⲓⲛⲉⲉⲥ ⲁⲩⲉⲓ ⲙⲛⲧⲕⲓⲃⲱⲧⲟⲥ ⲙⲡϫⲟⲉⲓⲥ
5 ⲁⲥϣⲱⲡⲉ ⲇⲉ ⲛⲧⲉⲣⲉⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲉⲓ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ ⲡⲓⲥⲣⲁⲏⲗ ⲧⲏⲣϥ ⲁⲩⲉⲓ ⲉϩⲣⲁⲓ ⲉⲩⲱϣ ⲉⲃⲟⲗ ϩⲛⲟⲩⲛⲟϭ ⲛϩⲣⲟⲟⲩ ⲁⲩⲱ ⲡⲕⲁϩ ⲧⲏⲣϥ ⲁϥⲕⲉⲙⲧϥ
6 ⲛⲁⲗⲗⲟⲫⲩⲗⲟⲥ ⲇⲉ ⲁⲩⲥⲱⲧⲙ ⲉⲡⲉⲩϩⲣⲟⲟⲩ ⲁⲩⲱ ⲡⲉϫⲁⲩ ϫⲉⲟⲩ ⲡⲉ ⲡⲉⲓϩⲣⲟⲟⲩ ⲛⲧⲁϥϣⲱⲡⲉ ϩⲛⲧⲡⲁⲣⲉⲙⲃⲟⲗⲏ ⲛⲛⲉϩⲉⲃⲣⲁⲓⲟⲥ ⲁⲩⲱ ⲁⲩⲉⲓⲙⲉ ϫⲉⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲧⲉ ⲛⲧⲁⲥⲉⲓ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ
7 ⲛⲁⲗⲗⲟⲫⲩⲗⲟⲥ ⲇⲉ ⲁⲩⲣϩⲟⲧⲉ ⲉⲙⲁⲧⲉ ⲡⲉϫⲁⲩ ϫⲉⲛⲁⲓ ⲛⲉ ⲛⲉⲛⲟⲩⲧⲉ ⲛⲧⲁⲩⲉⲓ ϣⲁⲣⲟⲟⲩ ⲉⲧⲉⲩⲡⲁⲣⲉⲙⲃⲟⲗⲏ ⲟⲩⲟⲓ ⲛⲁⲛ ⲡⲉⲛϫⲟⲉⲓⲥ ⲛⲁϩⲙⲉⲛ ⲙⲡϩⲟⲟⲩ ϫⲉⲙⲡⲉⲧⲱϣ ⲛⲧⲉⲓϩⲉ ϣⲱⲡⲉ ⲛⲥⲁϥ ⲙⲛϣⲟⲙⲛⲧ ⲙⲡϩⲟⲟⲩ ⲛϩⲟⲟⲩ
8 ⲟⲩⲟⲓ ⲛⲁⲛ ⲛⲓⲙ ⲡⲉⲧⲛⲁⲛⲁϩⲙⲉⲛ ⲛⲧⲟⲟⲧⲟⲩ ⲛⲛⲉⲓⲛⲟⲩⲧⲉ ⲉⲧϫⲟⲟⲣ ⲛⲁⲓ ⲛⲉ ⲛⲉⲛⲟⲩⲧⲉ ⲛⲧⲁⲩϣⲁⲁⲣⲉ ⲉⲕⲏⲙⲉ ϩⲙⲡⲗⲏⲅⲏ ⲛⲓⲙ ⲁⲩⲱ ϩⲙⲡϫⲁⲓⲉ ⲧⲏⲣϥ
9 ⲧⲱⲕ ⲙⲙⲱⲧⲛ ⲛⲧⲉⲧⲛⲣϫⲱⲱⲣⲉ ⲛⲁⲗⲗⲟⲫⲩⲗⲟⲥ ϫⲉⲛⲛⲉⲧⲛⲣⲙϩⲁⲗ ⲛⲛⲉϩⲉⲃⲣⲁⲓⲟⲥ ⲕⲁⲧⲁⲧϩⲉ ⲛⲧⲁⲩⲣϩⲙϩⲁⲗ ⲛⲁⲛ ⲛⲧⲉⲧⲛϣⲱⲡⲉ ⲛϩⲉⲛⲣⲱⲙⲉ ⲛϫⲱⲱⲣⲉ ⲛⲧⲉⲧⲛⲙⲓϣⲉ ⲛⲙⲙⲁⲩ
10 ⲁⲩⲱ ⲁⲩⲁϩⲉⲣⲁⲧⲟⲩ ⲁⲩⲙⲓϣⲉ ⲛⲙⲙⲁⲩ ⲛⲣⲱⲙⲉ ⲇⲉ ⲙⲡⲓⲥⲣⲁⲏⲗ ⲁⲩϭⲱⲧⲡ ⲁⲡⲟⲩⲁ ⲡⲟⲩⲁ ⲃⲱⲕ ⲉⲧⲉϥⲥⲕⲏⲛⲏ ⲁⲩⲛⲟϭ ⲉⲙⲁⲧⲉ ⲙⲡⲗⲏⲅⲏ ϣⲱⲡⲉ ⲛϩⲏⲧⲟⲩ ⲁⲩϩⲉ ⲉⲃⲟⲗ ϩⲙⲡⲓⲥⲣⲁⲏⲗ ⲛϭⲓϣⲟⲙⲛⲧ ⲛⲧⲃⲁ ⲙⲙⲏⲏϣⲉ
11 ⲁⲩⲱ ⲧⲕⲓⲃⲱⲧⲟⲥ ⲙⲡⲛⲟⲩⲧⲉ ⲁⲩϥⲓⲧⲥ ⲁⲩⲱ ⲡϣⲏⲣⲉ ⲥⲛⲁⲩ ⲛϩⲏⲗⲓ ⲁⲩⲙⲟⲟⲩⲧⲟⲩ ⲟⲫⲛⲓ ⲙⲛⲫⲓⲛⲉⲉⲥ
12 ⲟⲩⲣⲱⲙⲉ ⲇⲉ ⲛⲓⲉⲙⲓⲛⲁⲓⲟⲥ ⲁϥⲡⲱⲧ ⲉⲃⲟⲗ ϩⲙⲡⲉⲙⲗⲁϩ ⲁϥⲉⲓ ⲉϩⲣⲁⲓ ⲉⲥⲏⲗⲱ ϩⲙⲡⲉϩⲟⲟⲩ ⲉⲧⲙⲙⲁⲩ ⲉⲣⲉⲛⲉϥϩⲟⲓⲧⲉ ⲡⲏϩ ϩⲓⲱⲱϥ ⲁⲩⲱ ⲉⲣⲉϫⲱϥ ⲙⲉϩ ⲛⲉⲓⲧⲛ
13 ϩⲏⲗⲓ ⲇⲉ ⲛⲉϥϩⲙⲟⲟⲥ ⲡⲉ ϩⲓϫⲛⲡⲉϥⲧⲁϭⲥ ϩⲓⲣⲛ ⲧⲡⲩⲗⲏ ⲉϥϭⲱϣⲧ ⲉⲃⲟⲗ ⲉⲧⲉϩⲓⲏ ϫⲉⲛⲉⲣⲉⲛⲉϥϩⲏⲧ ⲡⲟϣⲥ ⲉⲃⲟⲗ ⲉⲣⲟϥ ⲉⲧⲃⲉⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲁⲩⲱ ⲡⲣⲱⲙⲉ ⲁϥⲉⲓ ⲉϩⲟⲩⲛ ⲉⲧⲡⲟⲗⲓⲥ ⲉⲧⲁⲙⲟⲟⲩ ⲧⲡⲟⲗⲓⲥ ⲇⲉ ⲛⲧⲉⲣⲉⲥⲥⲱⲧⲙ ⲁⲥⲱϣ ⲉⲃⲟⲗ
14 ⲁⲩⲱ ϩⲏⲗⲓ ⲁϥⲥⲱⲧⲙ ⲉⲡⲉϩⲣⲟⲟⲩ ⲙⲡⲱϣ ⲉⲃⲟⲗ ⲡⲉϫⲁϥ ϫⲉⲟⲩ ⲡⲉ ⲡⲉⲓϩⲣⲟⲟⲩ ⲙⲛⲡⲓⲱϣ ⲉⲃⲟⲗ ⲡⲣⲱⲙⲉ ⲇⲉ ⲁϥⲡⲱⲧ ⲁϥⲉⲓ ⲉⲧⲁⲙⲉϩⲏⲗⲓ
15 ϩⲏⲗⲓ ⲇⲉ ⲛⲉⲟⲩⲣⲱⲙⲉ ⲡⲉ ⲉϥϩⲛⲡⲥⲧⲁⲉⲓⲟ ⲛⲣⲟⲙⲡⲉ ⲛⲉϥⲃⲁⲗ ⲁⲩϩⲣⲟϣ ⲉⲣⲟϥ ⲁⲩⲱ ⲛⲉϥⲉⲓⲱⲣϩ ⲁⲛ ⲡⲉ ⲡⲉϫⲉϩⲏⲗⲉⲓ ⲇⲉ ⲛⲛⲣⲱⲙⲉ ⲉⲧⲁϩⲉⲣⲁⲧⲟⲩ ⲙⲡⲉϥⲙⲧⲟ ⲉⲃⲟⲗ ϫⲉⲟⲩ ⲡⲉ ⲡⲉϩⲣⲟⲟⲩ ⲙⲡⲓⲱϣ ⲉⲃⲟⲗ
16 ⲁⲩⲱ ⲡⲣⲱⲙⲉ ⲁϥⲡⲱⲧ ⲁϥϯ ⲙⲡⲉϥⲟⲩⲟⲓ ⲉϩⲏⲗⲓ ⲡⲉϫⲁϥ ⲛⲁϥ ϫⲉⲁⲛⲟⲕ ⲡⲉ ⲡⲣⲱⲙⲉ ⲛⲧⲁⲓⲉⲓ ⲉⲃⲟⲗ ϩⲛⲧⲡⲁⲣⲉⲙⲃⲟⲗⲏ ⲁⲛⲟⲕ ⲡⲉ ⲛⲧⲁⲓⲡⲱⲧ ⲙⲡϩⲟⲟⲩ ⲉⲃⲟⲗ ϩⲙⲡⲉⲙⲗⲁϩ ⲡⲉϫⲉϩⲏⲗⲉⲓ ⲛⲁϥ ϫⲉⲟⲩ ⲧⲉ ⲧϩⲉ ⲛⲧⲁⲥϣⲱⲡⲉ ⲡⲁϣⲏⲣⲉ
17 ⲁⲩⲱ ⲡϩⲣϣⲓⲣⲉ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲁϥ ϫⲉⲛⲣⲱⲙⲉ ⲙⲡⲓⲥⲣⲁⲏⲗ ⲁⲩϭⲱⲧⲡ ϩⲏⲧⲟⲩ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲁⲩⲛⲟϭ ⲛⲣⲁϩⲧⲥ ϣⲱⲡⲉ ⲙⲡⲗⲁⲟⲥ ⲁⲩⲱ ⲛⲉⲕϣⲏⲣⲉ ⲥⲛⲁⲩ ⲁⲩⲙⲟⲟⲩⲧⲟⲩ ⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲁⲩϥⲓⲧⲥ
18 ⲁⲥϣⲱⲡⲉ ⲇⲉ ⲛⲧⲉⲣⲉϥⲣⲡⲙⲉⲉⲩⲉ ⲛⲧⲕⲓⲃⲱⲧⲟⲥ ⲙⲡϫⲟⲉⲓⲥ ⲁϥϩⲉ ϩⲓϫⲙⲡⲉϥⲧⲁϭⲥ ⲛⲥⲁⲡⲁϩⲟⲩⲟ ⲉϥϩⲓⲧⲟⲩⲉ ⲛⲧⲡⲩⲗⲏ ⲁⲡⲕⲁⲥ ⲛⲧⲉϥϫⲓⲥⲉ ⲟⲩⲱϫⲡ ⲁϥⲙⲟⲩ ϫⲉⲡⲣⲱⲙⲉ ⲟⲩϩⲗⲗⲟ ⲡⲉ ⲉⲁϥⲁⲓⲁⲓ ⲁⲩⲱ ⲛⲧⲟϥ ⲁϥⲕⲣⲓⲛⲉ ⲙⲡⲓⲥⲣⲁⲏⲗ ⲛϫⲟⲩⲱⲧⲉ ⲛⲣⲟⲙⲡⲉ
19 ⲧⲉϥϣⲉⲗⲉⲉⲧ ⲇⲉ ⲉⲧⲉⲧⲉⲥϩⲓⲙⲉ ⲧⲉ ⲙⲫⲓⲛⲉⲉⲥ ⲡⲉϥϣⲏⲣⲉ ⲛⲉⲥϩⲟⲣϣ ⲛⲱ ⲉⲙⲓⲥⲉ ⲁⲩⲱ ⲛⲧⲉⲣⲉⲥⲥⲱⲧⲙ ⲉⲡⲟⲩⲱ ϫⲉⲁⲩϥⲓ ⲛⲧⲕⲓⲃⲱⲧⲟⲥ ⲙⲡⲛⲟⲩⲧⲉ ⲁⲩⲱ ϫⲉⲁⲡⲉⲥϣⲟⲙ ⲙⲟⲩ ⲙⲛⲡⲉⲥⲕⲉϩⲁⲓ ⲁⲥⲟⲩⲉⲛⲣⲁ ⲁⲥⲣⲓⲙⲉ ⲁⲩⲱ ⲁⲥϯ ⲉⲙⲓⲥⲉ ϫⲉⲁⲛⲛⲁⲁⲕⲉ ϩⲙⲟⲙ ⲉϫⲱⲥ
20 ⲛⲉⲥⲛⲁⲙⲟⲩ ⲇⲉ ⲡⲉ ϩⲙⲡϫⲱⲕ ⲙⲡⲉⲥⲁϩⲉ ⲛⲉϩⲓⲟⲙⲉ ⲇⲉ ⲉⲧⲉⲙⲡⲉⲥⲃⲟⲗ ⲡⲉϫⲁⲩ ⲛⲁⲥ ϫⲉⲙⲡⲉⲣⲣϩⲟⲧⲉ ϫⲉⲟⲩϣⲏⲣⲉ ⲡⲉⲧⲉⲣⲛⲁⲙⲁⲥⲧϥ ⲁⲩⲱ ⲙⲡⲉⲥⲉⲣⲟⲩⲱ ⲛⲁⲩ ⲙⲡⲉⲡⲉⲥϩⲏⲧ ⲣⲱ ⲛⲏⲫⲉ
21 ⲛⲉϩⲓⲟⲙⲉ ⲇⲉ ⲁⲩⲙⲟⲩⲧⲉ ⲉⲡⲣⲁⲛ ⲙⲡϣⲏⲣⲉ ⲕⲟⲩⲓ ϫⲉⲟⲩⲁⲓ ⲃⲁⲣⲕⲏⲃⲱⲇ ⲉⲧⲉⲡⲉϥⲟⲩⲱϩⲙ ⲡⲉ ϫⲉⲉⲧⲃⲉⲧⲕⲓⲃⲱⲧⲟⲥ ⲙⲡⲛⲟⲩⲧⲉ ⲁⲩⲱ ⲉⲧⲃⲉⲡⲉⲥϣⲟⲙ ⲁⲩⲱ ⲉⲧⲃⲉⲡⲉⲥⲕⲉϩⲁⲓ
22 ⲉⲩϫⲱ ⲙⲙⲟⲥ ϫⲉⲡⲉⲟⲟⲩ ⲙⲡⲓⲥⲣⲁⲏⲗ ⲁⲩⲡⲟⲟⲛⲉϥ ⲉⲃⲟⲗ ϩⲙⲡⲧⲣⲉⲩϫⲓ ⲛⲧⲕⲓⲃⲱⲧⲟⲥ ⲙⲡϫⲟⲉⲓⲥ
1 Samuel 3 · 1 Samuel 5 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)