Read 1 Samuel 3 side by side with translations · The Final Bible
1 ⲁⲩⲱ ⲡϣⲏⲣⲉ ϣⲏⲙ ⲥⲁⲙⲟⲩⲏⲗ ⲛⲉϥϣⲙϣⲉ ⲙⲡϫⲟⲉⲓⲥ ⲙⲡⲉⲙⲧⲟ ⲉⲃⲟⲗ ⲛϩⲏⲗⲓ ⲡⲟⲩⲏⲏⲃ ⲁⲩⲱ ⲡϣⲁϫⲉ ⲙⲡϫⲟⲉⲓⲥ ⲛⲉϥⲧⲁⲓⲏⲩ ϩⲛⲛⲉϩⲟⲟⲩ ⲉⲧⲙⲙⲁⲩ ⲉⲙⲛϩⲟⲣⲁⲥⲓⲥ ⲡⲟⲣϫ ⲉⲃⲟⲗ
2 ⲁⲥϣⲱⲡⲉ ⲇⲉ ⲛⲛⲉϩⲟⲟⲩ ⲉⲧⲙⲙⲁⲩ ϩⲏⲗⲓ ⲛⲉϥⲛⲕⲟⲧⲕ ϩⲙⲡⲉϥⲙⲁ ⲁⲩⲱ ⲛⲉϥⲃⲁⲗ ⲁⲩϫⲱⲛⲧ ⲉϩⲣⲟϣ ⲉⲣⲟϥ ⲉⲙⲉϥⲉϣⲉⲓⲱⲣϩ
3 ⲁⲩⲱ ⲡϩⲏⲃⲥ ⲙⲡⲛⲟⲩⲧⲉ ⲙⲡⲁⲧⲟⲩϭⲟⲣϭϥ ⲥⲁⲙⲟⲩⲏⲗ ⲛⲉϥⲛⲕⲟⲧⲕ ϩⲙⲡⲉⲣⲡⲉ ϩⲙⲡⲙⲁ ⲉⲧⲉⲣⲉⲧⲕⲓⲃⲱⲧⲟⲥ ⲙⲡⲛⲟⲩⲧⲉ ⲛϩⲏⲧϥ
4 ⲁⲩⲱ ⲡϫⲟⲉⲓⲥ ⲁϥⲙⲟⲩⲧⲉ ⲉⲥⲁⲙⲟⲩⲏⲗ ⲉϥϫⲱ ⲙⲙⲟⲥ ϫⲉⲥⲁⲙⲟⲩⲏⲗ ⲥⲁⲙⲟⲩⲏⲗ ⲡⲉϫⲁϥ ϫⲉⲉⲓⲥϩⲏⲏⲧⲉ ⲁⲛⲟⲕ ⲁⲓⲉⲓ
5 ⲁⲩⲱ ⲁϥⲡⲱⲧ ⲉⲣⲁⲧϥ ⲛϩⲏⲗⲓ ⲉϥϫⲱ ⲙⲙⲟⲥ ⲛⲁϥ ϫⲉⲉⲓⲥϩⲏⲏⲧⲉ ⲁⲛⲟⲕ ⲁⲓⲉⲓ ϫⲉⲁⲕⲙⲟⲩⲧⲉ ⲉⲣⲟⲓ ⲡⲉϫⲉϩⲏⲗⲓ ⲛⲁϥ ϫⲉⲙⲡⲓⲙⲟⲩⲧⲉ ⲉⲣⲟⲕ ⲃⲱⲕ ⲛⲅⲛⲕⲟⲧⲕ ⲁϥⲕⲧⲟϥ ⲁϥⲃⲱⲕ ⲁϥⲛⲕⲟⲧⲕ
6 ⲡϫⲟⲉⲓⲥ ⲇⲉ ⲁϥⲟⲩⲱϩ ⲉⲧⲟⲟⲧϥ ⲛⲕⲉⲥⲟⲡ ⲉⲙⲟⲩⲧⲉ ϫⲉⲥⲁⲙⲟⲩⲏⲗ ⲥⲁⲙⲟⲩⲏⲗ ⲁϥⲡⲱⲧ ⲟⲛ ⲉⲣⲁⲧϥ ⲛϩⲏⲗⲓ ⲙⲡⲙⲉϩⲥⲉⲡⲥⲛⲁⲩ ⲉϥϫⲱ ⲙⲙⲟⲥ ⲛⲁϥ ϫⲉⲉⲓⲥϩⲏⲏⲧⲉ ⲁⲛⲟⲕ ⲁⲓⲉⲓ ϫⲉⲁⲕⲙⲟⲩⲧⲉ ⲉⲣⲟⲓ ⲡⲉϫⲉϩⲏⲗⲓ ⲛⲁϥ ϫⲉⲙⲡⲓⲙⲟⲩⲧⲉ ⲉⲣⲟⲕ ⲃⲱⲕ ⲛⲅⲛⲕⲟⲧⲕ
7 ⲁⲩⲱ ⲥⲁⲙⲟⲩⲏⲗ ⲙⲡⲁⲧϥⲥⲟⲩⲛⲡⲛⲟⲩⲧⲉ ⲁⲩⲱ ⲙⲡⲉⲡϣⲁϫⲉ ⲙⲡϫⲟⲉⲓⲥ ϭⲱⲗⲡ ⲉⲣⲟϥ
8 ⲁⲡϫⲟⲉⲓⲥ ⲟⲩⲱϩ ⲉⲧⲟⲟⲧϥ ⲉⲙⲟⲩⲧⲉ ⲙⲡⲙⲉϩϣⲟⲙⲛⲧ ⲛⲥⲟⲡ ⲉⲥⲁⲙⲟⲩⲏⲗ ⲉϥϫⲱ ⲙⲙⲟⲥ ϫⲉⲥⲁⲙⲟⲩⲏⲗ ⲁϥⲧⲱⲟⲩⲛ ⲟⲛ ⲁϥⲡⲱⲧ ⲉⲣⲁⲧϥ ⲛϩⲏⲗⲓ ⲉϥϫⲱ ⲙⲙⲟⲥ ⲛⲁϥ ϫⲉⲉⲓⲥϩⲏⲏⲧⲉ ⲁⲓⲉⲓ ϫⲉⲕⲙⲟⲩⲧⲉ ⲉⲣⲟⲓ ⲁⲩⲱ ϩⲏⲗⲓ ⲁϥⲉⲓⲙⲉ ϫⲉⲡϫⲟⲉⲓⲥ ⲡⲉⲛⲧⲁϥⲙⲟⲩⲧⲉ ⲉⲡϣⲏⲣⲉ ϣⲏⲙ
9 ⲁⲩⲱ ⲡⲉϫⲉϩⲏⲗⲓ ⲛⲁϥ ϫⲉⲕⲟⲧⲕ ⲛⲅⲛⲕⲟⲧⲕ ⲡⲁϣⲏⲣⲉ ⲁⲩⲱ ⲉϥϣⲁⲛⲙⲟⲩⲧⲉ ⲉⲣⲟⲕ ⲉⲕⲉϫⲟⲟⲥ ϫⲉⲡϫⲟⲉⲓⲥ ϣⲁϫⲉ ⲡⲉⲕϩⲙϩⲁⲗ ⲥⲱⲧⲙ ⲥⲁⲙⲟⲩⲏⲗ ⲇⲉ ⲁϥⲃⲱⲕ ⲁϥⲛⲕⲟⲧⲕ ϩⲙⲡⲉϥⲙⲁ
10 ⲁⲩⲱ ⲡϫⲟⲉⲓⲥ ⲁϥⲉⲓ ϩⲁϫⲱϥ ⲁϥⲙⲟⲩⲧⲉ ⲉⲣⲟϥ ⲛⲧϩⲉ ⲛⲧⲉϩⲟⲩⲉⲓⲧⲉ ⲡⲉϫⲉⲥⲁⲙⲟⲩⲏⲗ ϫⲉϣⲁϫⲉ ⲡⲉⲕϩⲙϩⲁⲗ ⲥⲱⲧⲙ ⲉⲣⲟⲕ
11 ⲡⲉϫⲉⲡϫⲟⲉⲓⲥ ⲛⲥⲁⲙⲟⲩⲏⲗ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲛⲁⲉⲓⲣⲉ ⲛⲛⲁϣⲁϫⲉ ϩⲙⲡⲓⲥⲣⲁⲏⲗ ϫⲉⲕⲁⲥ ⲟⲩⲟⲛ ⲛⲓⲙ ⲉⲧⲛⲁⲥⲱⲧⲙ ⲉⲣⲟⲟⲩ ⲛⲧⲉⲛⲉϥⲙⲁⲁϫⲉ ⲙⲟⲩⲧⲉ ⲉⲃⲟⲗ
12 ϩⲙⲡⲉϩⲟⲟⲩ ⲉⲧⲙⲙⲁⲩ ϯⲛⲁⲉⲓⲛⲉ ⲉϫⲛϩⲏⲗⲓ ⲛϣⲁϫⲉ ⲛⲓⲙ ⲛⲧⲁⲓⲧⲁⲩⲟⲟⲩ ⲉϫⲙⲡⲉϥⲏⲓ ϯⲛⲁϩⲓⲧⲟⲟⲧ ⲉⲁⲁⲩ ⲛⲧⲁϫⲱⲕⲟⲩ ⲉⲃⲟⲗ
13 ⲁⲩⲱ ⲁⲓⲧⲁⲙⲟϥ ϫⲉϯⲛⲁϫⲓⲕⲃⲁ ⲁⲛⲟⲕ ϩⲙⲡⲉϥⲏⲓ ⲛϣⲁ ⲉⲛⲉϩ ϩⲛⲛⲉϫⲓⲛϭⲟⲛⲥ ⲛⲛⲉϥϣⲏⲣⲉ ϫⲉⲛⲉϥϣⲏⲣⲉ ⲛⲉⲩϫⲉⲡⲉⲧϩⲟⲟⲩ ⲛⲥⲁⲡⲛⲟⲩⲧⲉ ⲁⲩⲱ ⲛⲉϥϯⲥⲃⲱ ⲛⲁⲩ ⲁⲛ ⲡⲉ
14 ⲁⲩⲱ ⲛⲛⲉⲧⲉⲓϩⲉ ϣⲱⲡⲉ ⲁⲓⲱⲣⲕ ⲉϫⲙⲡⲏⲓ ⲛϩⲏⲗⲓ ϫⲉⲉϣⲱⲡⲉ ⲉⲓⲛⲁⲕⲱ ⲉⲃⲟⲗ ⲙⲡϫⲓⲛϭⲟⲛⲥ ⲙⲡⲏⲓ ⲛϩⲏⲗⲓ ϩⲛⲟⲩϣⲟⲩϩⲏⲛⲉ ⲁⲩⲱ ϩⲛϩⲉⲛⲑⲩⲥⲓⲁ ⲛϣⲁ ⲉⲛⲉϩ
15 ⲥⲁⲙⲟⲩⲏⲗ ⲇⲉ ⲁϥⲛⲕⲟⲧⲕ ϣⲁϩⲧⲟⲟⲩⲉ ⲁⲩⲱ ⲁϥϣⲟⲣⲡϥ ⲙⲡⲉϥϩⲧⲟⲟⲩⲉ ⲁϥⲟⲩⲱⲛ ⲛⲛⲣⲣⲟ ⲙⲡⲏⲓ ⲙⲡϫⲟⲉⲓⲥ ⲥⲁⲙⲟⲩⲏⲗ ⲇⲉ ⲁϥⲣϩⲟⲧⲉ ⲉⲧⲁⲩⲉⲑⲟⲣⲁⲥⲓⲥ ⲉϩⲏⲗⲓ
16 ⲡⲉϫⲉϩⲏⲗⲓ ⲉϩⲟⲩⲛ ϩⲛⲥⲁⲙⲟⲩⲏⲗ ϫⲉⲥⲁⲙⲟⲩⲏⲗ ⲡⲁϣⲏⲣⲉ ⲡⲉϫⲁϥ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲥⲱⲧⲙ
17 ⲡⲉϫⲉϩⲏⲗⲓ ⲛⲁϥ ϫⲉⲟⲩ ⲡⲉ ⲡϣⲁϫⲉ ⲉⲛⲧⲁⲩϫⲟⲟϥ ⲉⲣⲟⲕ ⲙⲡⲣϩⲟⲡϥ ⲉⲣⲟⲓ ⲉⲣⲉⲡⲛⲟⲩⲧⲉ ⲉⲓⲣⲉ ⲛⲁⲕ ⲉⲕϣⲁⲛϩⲉⲡⲟⲩϣⲁϫⲉ ⲉⲣⲟⲓ ⲉⲃⲟⲗ ϩⲛⲛⲉϣⲁϫⲉ ⲧⲏⲣⲟⲩ ⲛⲧⲁⲩϫⲟⲟⲩ ⲉⲛⲉⲕⲙⲁⲁϫⲉ
18 ⲁⲩⲱ ⲥⲁⲙⲟⲩⲏⲗ ⲁϥⲧⲁⲩⲟ ⲉϩⲏⲗⲓ ⲛⲛⲉϣⲁϫⲉ ⲧⲏⲣⲟⲩ ⲙⲡⲉϥϩⲉⲡⲗⲁⲁⲩ ⲉⲣⲟϥ ⲡⲉϫⲉϩⲏⲗⲓ ϫⲉⲡϫⲟⲉⲓⲥ ⲉϥⲉⲉⲓⲣⲉ ⲛⲧⲟϥ ⲙⲡⲁⲅⲁⲑⲟⲛ ⲙⲡⲉϥⲙⲧⲟ ⲉⲃⲟⲗ
19 ⲥⲁⲙⲟⲩⲏⲗ ⲇⲉ ⲁϥϫⲓⲥⲉ ⲁⲩⲱ ⲡϫⲟⲉⲓⲥ ⲛⲉϥϣⲟⲟⲡ ⲛⲙⲙⲁϥ ⲉⲙⲡⲉⲗⲁⲁⲩ ϩⲛⲛⲉϥϣⲁϫⲉ ⲧⲏⲣⲟⲩ ϩⲉ ⲉⲃⲟⲗ ϩⲓϫⲙⲡⲕⲁϩ
20 ⲁⲩⲱ ⲡⲓⲥⲣⲁⲏⲗ ⲧⲏⲣϥ ⲁⲩⲉⲓⲙⲉ ϫⲓⲛⲇⲁⲛ ϣⲁⲃⲉⲣⲥⲁⲃⲉ ϫⲉⲥⲁⲙⲟⲩⲏⲗ ⲟⲩⲡⲓⲥⲧⲟⲥ ⲡⲉ ⲙⲡⲣⲟⲫⲏⲧⲏⲥ ⲙⲡⲛⲟⲩⲧⲉ
21 ⲁⲩⲱ ⲡϫⲟⲉⲓⲥ ⲁϥⲟⲩⲱϩ ⲉⲧⲟⲟⲧϥ ⲉⲧⲁⲙⲟⲟⲩ ϩⲛⲥⲏⲗⲱ ϫⲉⲡϫⲟⲉⲓⲥ ⲁϥⲟⲩⲟⲛϩϥ ⲉⲃⲟⲗ ⲉⲥⲁⲙⲟⲩⲏⲗ ⲁⲩⲱ ⲥⲁⲙⲟⲩⲏⲗ ⲁⲩⲧⲁⲛϩⲟⲩⲧϥ ⲉⲧⲣⲉϥⲣⲡⲣⲟⲫⲏⲧⲏⲥ ⲙⲡϫⲟⲉⲓⲥ ⲉⲡⲓⲥⲣⲁⲏⲗ ⲧⲏⲣϥ ⲛϫⲓⲛ ϫⲱϥ ⲙⲡⲕⲁϩ ϣⲁϫⲱϥ ⲁⲩⲱ ϩⲏⲗⲓ ⲛⲉⲩϩⲗⲗⲟ ⲉⲙⲁⲧⲉ ⲡⲉ ⲁⲩⲱ ⲛⲉϥϣⲏⲣⲉ ⲛⲉⲩⲙⲟⲟϣⲉ ϩⲓⲛⲁⲓ ⲡⲉ ⲉⲣⲉⲧⲉⲩϩⲓⲏ ϩⲟⲟⲩ
1 Samuel 2 · 1 Samuel 4 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)