1 Samuel 30 — Coptic (Sahidic)

1 ⲁⲥϣⲱⲡⲉ ⲇⲉ ⲛⲧⲉⲣⲉⲇⲁⲩⲉⲓⲇ ⲙⲛⲛⲉϥⲣⲱⲙⲉ ⲃⲱⲕ ⲉϩⲟⲩⲛ ⲉⲥⲉⲕⲉⲗⲁⲕ ϩⲙⲡⲙⲉϩϣⲟⲙⲛⲧ ⲛϩⲟⲟⲩ ⲡⲁⲙⲁⲗⲏⲕ ⲉⲛⲉⲁϥⲧⲱⲟⲩⲛ ⲉϫⲙⲡⲉⲧϩⲙⲡⲥⲁ ⲙⲡⲣⲏⲥ ⲁⲩⲱ ⲉϫⲛⲥⲉⲕⲉⲗⲁⲕ ⲁϥⲡⲁⲧⲁⲥⲥⲉⲓ ⲛⲥⲉⲕⲉⲗⲁⲕ ⲁϥⲣⲟⲕϩⲥ ϩⲛⲟⲩⲥⲁⲧⲉ

2 ⲁⲩⲱ ⲛⲉϩⲓⲟⲙⲉ ⲙⲛⲛⲉⲧⲛϩⲏⲧⲥ ⲧⲏⲣⲟⲩ ⲛϫⲓⲛ ⲉⲡⲉⲩⲕⲟⲩⲓ ϣⲁⲡⲉⲩⲛⲟϭ ⲙⲡⲟⲩⲙⲉⲟⲩⲧ ⲟⲩϩⲟⲟⲩⲧ ⲟⲩⲇⲉ ⲟⲩⲥϩⲓⲙⲉ ⲁⲗⲗⲁ ⲁⲩⲁⲓⲭⲙⲁⲗⲱⲧⲓⲍⲉ ⲙⲙⲟⲟⲩ ⲁⲩⲃⲱⲕ ⲉϩⲣⲁⲓ ⲉⲧⲉⲩϩⲓⲏ

3 ⲇⲁⲩⲉⲓⲇ ⲇⲉ ⲙⲛⲛⲉϥⲣⲱⲙⲉ ⲁⲩⲉⲓ ⲉϩⲣⲁⲓ ⲉⲧⲡⲟⲗⲓⲥ ⲁⲩⲱ ⲉⲓⲥ ϩⲏⲏⲧⲉ ⲥⲣⲟⲕϩ ϩⲛⲟⲩⲥⲁⲧⲉ ⲁⲩⲱ ⲛⲉⲩϩⲓⲟⲙⲉ ⲙⲛⲛⲉⲩϣⲏⲣⲉ ⲙⲛⲛⲉⲩϣⲉⲉⲣⲉ ⲁⲩⲁⲓⲭⲙⲁⲗⲱⲧⲓⲍⲉ ⲙⲙⲟⲟⲩ

4 ⲇⲁⲩⲉⲓⲇ ⲇⲉ ⲙⲛⲛⲉϥⲣⲱⲙⲉ ⲁⲩϥⲓϩⲣⲟⲟⲩ ⲉⲃⲟⲗ ⲁⲩⲣⲓⲙⲉ ϣⲁⲛⲧⲟⲩⲗⲟ ⲉⲩϣϭⲙϭⲟⲙ ⲉⲣⲓⲙⲉ

5 ⲁⲩⲱ ⲧⲉⲥϩⲓⲙⲉ ⲥⲛⲧⲉ ⲛⲇⲁⲩⲉⲓⲇ ⲁⲩⲁⲓⲭⲙⲁⲗⲱⲧⲓⲍⲉ ⲙⲙⲟⲟⲩ ⲁⲭⲓⲛⲁⲁⲃ ⲧⲓⲥⲣⲁⲏⲗⲓⲧⲏⲥ ⲁⲩⲱ ⲁⲃⲓⲕⲓⲁ ⲧⲉⲥϩⲓⲙⲉ ⲛⲁⲃⲁⲗ ⲡⲕⲁⲣⲙⲏⲗⲟⲥ

6 ⲇⲁⲩⲉⲓⲇ ⲇⲉ ⲁϥϩⲟϫϩϫ ⲉⲃⲟⲗ ϫⲉⲡⲗⲁⲟⲥ ⲁϥϫⲟⲟⲥ ⲉϩⲓⲱⲛⲉ ⲉⲣⲟϥ ϫⲉⲛⲉⲣⲉⲡⲗⲁⲟⲥ ⲧⲏⲣϥ ⲟⲩⲟⲗⲥ ⲛϩⲏⲧ ⲉⲙⲁⲧⲉ ⲡⲟⲩⲁ ⲡⲟⲩⲁ ⲉϫⲛⲛⲉϥϣⲏⲣⲉ ⲁⲩⲱ ⲡⲟⲩⲁ ⲡⲟⲩⲁ ⲉϫⲛⲧⲉϥϣⲉⲉⲣⲉ ⲇⲁⲩⲉⲓⲇ ⲇⲉ ⲁϥⲧⲁϫⲣⲟ ϩⲙⲡϫⲟⲉⲓⲥ ⲡⲉϥⲛⲟⲩⲧⲉ

7 ⲡⲉϫⲉⲇⲁⲩⲉⲓⲇ ⲉϩⲟⲩⲛ ϩⲛⲁⲃⲓⲁⲑⲁⲣ ⲡⲟⲩⲏⲏⲃ ⲡϣⲏⲣⲉ ⲛⲁⲭⲓⲙⲉⲗⲉⲭ ϫⲉⲁⲩⲉⲡⲉⲫⲟⲩⲇ ⲉⲡⲉⲓⲙⲁ

8 ⲁⲩⲱ ⲇⲁⲩⲉⲓⲇ ⲁϥϣⲓⲛⲉ ϩⲙⲡϫⲟⲉⲓⲥ ⲉϥϫⲱ ⲙⲙⲟⲥ ϫⲉⲉⲛⲉⲕⲟⲩⲱϣ ⲛⲧⲁⲡⲱⲧ ⲛⲥⲁⲡⲉⲓⲕⲉⲧⲇⲟⲩⲣ ⲁⲩⲱ ⲉⲛⲉⲧⲓⲛⲁϫⲓⲧϥ ⲡⲉϫⲉⲡϫⲟⲉⲓⲥ ⲛⲁϥ ϫⲉⲡⲱⲧ ⲛⲥⲱϥ ϫⲉϩⲛⲟⲩⲧⲁϩⲟ ⲕⲛⲁⲧⲁϩⲟϥ ⲁⲩⲱ ϩⲛⲟⲩⲛⲟⲩϩⲙ ⲕⲛⲁⲛⲟⲩϩⲙ ⲛⲧⲟⲟⲧⲟⲩ ⲛⲛⲉⲛⲧⲁⲩϥⲓⲧⲟⲩ

9 ⲇⲁⲩⲉⲓⲇ ⲇⲉ ⲛⲧⲟϥ ⲙⲛⲡⲉϥⲧⲟⲟⲩ ⲛϣⲉ ⲛⲣⲱⲙⲉ ⲉⲧⲛⲙⲙⲁϥ ⲁⲩⲧⲱⲟⲩⲛ ⲁⲩⲉⲓ ⲁⲩⲙⲟⲟϣⲉ ϣⲁⲉϩⲣⲁⲓ ⲉⲡⲉⲭⲉⲓⲙⲁⲣⲣⲟⲥ ⲛⲃⲟⲥⲟⲣ ⲛⲕⲟⲟⲩⲉ ⲇⲉ ⲉⲧⲟ ⲛϩⲟⲩⲟ ⲁⲩⲁϩⲉⲣⲁⲧⲟⲩ ⲉⲡⲁϩⲟⲩ

10 ⲡⲉϥⲧⲟⲟⲩ ⲇⲉ ⲛϣⲉ ⲛⲣⲱⲙⲉ ⲁⲩⲙⲟⲟϣⲉ ⲙⲛⲇⲁⲩⲉⲓⲇ ⲡϣⲏⲧ ⲇⲉ ⲛⲣⲱⲙⲉ ⲁⲩϩⲙⲟⲟⲥ ϩⲙⲡⲉⲭⲉⲓⲙⲁⲣⲣⲟⲥ ⲛⲃⲟⲥⲟⲣ

11 ⲁⲩϩⲉ ⲇⲉ ⲉⲩⲣⲱⲙⲉ ⲛⲣⲙⲛⲕⲏⲙⲉ ϩⲛⲧⲥⲱϣⲉ ⲉⲁⲩⲁⲙⲁϩⲧⲉ ⲙⲙⲟϥ ⲁⲩϫⲓⲧϥ ⲉⲣⲁⲧϥ ⲛⲇⲁⲩⲉⲓⲇ ⲁⲩⲱ ⲁⲩϯⲟⲉⲓⲕ ⲛⲁϥ ⲁϥⲟⲩⲱⲙ ⲁⲩⲧⲥⲟϥ ⲙⲙⲟⲟⲩ

12 ⲁⲩⲱ ⲁⲩϯⲟⲩⲧⲁϭ ⲛⲁϥ ⲛⲉⲛⲕⲁ ⲛⲟⲩⲱⲙ ⲁϥⲟⲩⲟⲙϥ ⲁⲡⲉϥϩⲏⲧ ⲥⲙⲛⲧϥ ⲉⲣⲟϥ ⲉⲃⲟⲗ ϫⲉⲁϥⲣϣⲟⲙⲛⲧ ⲛϩⲟⲟⲩ ⲙⲛϣⲟⲙⲧⲉ ⲛⲟⲩϣⲏ ⲙⲡⲉϥⲟⲩⲉⲙⲟⲉⲓⲕ ⲟⲩⲇⲉ ⲙⲡⲉϥⲥⲉⲙⲟⲟⲩ

13 ⲡⲉϫⲉⲇⲁⲩⲉⲓⲇ ⲛⲁϥ ϫⲉⲛⲧⲕ ⲡⲣⲱⲙⲉ ⲛⲛⲓⲙ ⲁⲩⲱ ⲛⲧⲕ ⲟⲩ ⲉⲃⲟⲗ ⲧⲱⲛ ⲡⲉϫⲁϥ ϫⲉⲁⲛⲅ ⲟⲩϣⲏⲣⲉ ϣⲏⲙ ⲛⲣⲉⲙⲛⲕⲏⲙⲉ ⲉⲁⲛⲅ ⲡϩⲙϩⲁⲗ ⲛⲟⲩⲣⲱⲙⲉ ⲛⲁⲙⲁⲗⲏⲕⲓⲧⲏⲥ ⲡⲁϫⲟⲉⲓⲥ ⲇⲉ ⲁϥⲛⲟϫⲧ ⲛⲥⲱϥ ⲉⲃⲟⲗ ϫⲉⲁⲓϣⲱⲛⲉ ⲁⲛⲟⲕ ⲉⲡⲁϣⲟⲙⲛⲧ ⲡϩⲟⲟⲩ

14 ⲁⲩⲱ ⲁⲛⲟⲛ ⲁⲛⲃⲱⲕ ⲉⲡⲥⲁ ⲙⲡⲣⲏⲥ ⲙⲡⲉⲭⲉⲗⲑⲓ ⲁⲩⲱ ⲉⲣⲛ ⲛⲉⲙⲟⲉⲓⲧ ⲛⲧⲓⲟⲩⲇⲁⲓⲁ ⲁⲩⲱ ⲉⲣⲙ ⲡⲥⲁ ⲙⲡⲣⲏⲥ ⲛⲕⲉⲗⲃⲟⲩⲉ ⲁⲩⲱ ⲉⲥⲉⲕⲉⲗⲁⲕ ⲁⲛⲣⲟⲕϩⲥ ϩⲛⲟⲩⲥⲁⲧⲉ

15 ⲡⲉϫⲉⲇⲁⲩⲉⲓⲇ ⲛⲁϥ ϫⲉⲕⲛⲁϣϫⲓⲧ ⲉϫⲙⲡⲓⲕⲉⲇⲇⲟⲩⲣ ⲡⲉϫⲉⲡϩⲙϩⲁⲗ ⲛⲁϥ ϫⲉⲱⲣⲕ ⲙⲡⲛⲟⲩⲧⲉ ⲉⲧⲙⲙⲟⲟⲩⲧ ⲁⲩⲱ ⲉⲧⲙⲡⲁⲣⲁⲇⲓⲇⲟⲩ ⲙⲙⲟⲓ ⲉⲧⲟⲟⲧϥ ⲙⲡⲁϫⲟⲉⲓⲥ ⲁⲩⲱ ϯⲛⲁϫⲓⲧⲕ ⲉϩⲣⲁⲓ ⲉϫⲙⲡⲓⲕⲉⲇⲇⲟⲩⲣ

16 ⲁϥϫⲓⲧ ⲇⲉ ⲉⲡⲙⲁ ⲉⲧⲙⲙⲁⲩ ⲁⲩⲱ ⲉⲓⲥ ϩⲏⲏⲧⲉ ⲛⲧⲟⲟⲩ ⲉⲩⲛⲏϫ ⲉϫⲙⲡϩⲟ ⲙⲡⲕⲁϩ ⲧⲏⲣϥ ⲉⲩⲟⲩⲱⲙ ⲁⲩⲱ ⲉⲩⲥⲱ ⲉⲩⲣⲁϣⲉ ⲉⲃⲟⲗ ϩⲛⲛⲉϣⲟⲗⲥ ⲧⲏⲣⲟⲩ ⲛⲧⲁⲩϫⲓⲧⲟⲩ ⲉⲃⲟⲗ ϩⲙⲡⲕⲁϩ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲉⲃⲟⲗ ϩⲙⲡⲕⲁϩ ⲛⲓⲟⲩⲇⲁ

17 ⲇⲁⲩⲉⲓⲇ ⲇⲉ ⲁϥⲡⲱⲧ ⲉϩⲣⲁⲓ ⲉϫⲱⲟⲩ ⲁϥⲡⲁⲧⲁⲥⲥⲉⲓ ⲙⲙⲟⲟⲩ ⲛϫⲓⲛ ⲉⲡⲛⲁⲩ ⲛϣⲱⲣⲡ ϣⲁⲡⲛⲁⲩ ⲛⲣⲟⲩϩⲉ ⲁⲩⲱ ⲙⲡⲉϥⲣⲁⲥⲧⲉ ⲙⲡⲉⲟⲩⲣⲱⲙⲉ ⲛⲟⲩⲱⲧ ⲟⲩϫⲁⲓ ⲛϩⲏⲧⲟⲩ ⲛⲥⲁϥⲧⲟⲟⲩ ⲛϣⲉ ⲛⲣⲱⲙⲉ ⲛϣⲏⲣⲉ ϣⲏⲙ ⲛⲧⲁⲩⲁⲗⲏ ⲉⲛϭⲁⲙⲟⲩⲗ ⲁⲩⲡⲱⲧ

18 ⲇⲁⲩⲉⲓⲇ ⲇⲉ ⲁϥϥⲓ ⲛⲉⲛⲧⲁⲩϥⲓⲧⲟⲩ ⲧⲏⲣⲟⲩ ⲛϭⲓⲛⲁⲙⲁⲗⲏⲕⲓⲧⲏⲥ ⲁⲩⲱ ⲧⲉⲥϩⲓⲙⲉ ⲥⲛⲧⲉ ⲛⲇⲁⲩⲉⲓⲇ ⲁϥϫⲓⲧⲟⲩ

19 ⲙⲡⲉϥⲕⲁⲗⲁⲁⲩ ⲉⲡⲁϩⲟⲩ ⲛϩⲏⲧⲟⲩ ⲛϫⲓⲛ ⲡⲉⲩⲕⲟⲩⲓ ϣⲁⲡⲉⲩⲛⲟϭ ⲁⲩⲱ ⲉⲃⲟⲗ ϩⲛⲛⲉϣⲱⲗ ⲧⲏⲣⲟⲩ ⲙⲛⲛⲉⲩϣⲏⲣⲉ ⲙⲛⲛⲉⲩϣⲉⲉⲣⲉ ⲁⲩⲱ ⲛⲉⲛⲧⲁⲩϥⲓⲧⲟⲩ ⲧⲏⲣⲟⲩ ⲉⲛⲕⲁ ⲛⲓⲙ ⲇⲁⲩⲉⲓⲇ ⲁϥⲕⲧⲟⲟⲩ

20 ⲁⲩⲱ ⲇⲁⲩⲉⲓⲇ ⲁϥϫⲓ ⲛⲛⲉⲩⲉⲥⲟⲟⲩ ⲧⲏⲣⲟⲩ ⲙⲛⲛⲉⲩⲉϩⲟⲟⲩ ⲁⲩϩⲣⲁ ⲙⲙⲟⲟⲩ ϩⲓⲧϩⲏ ⲛⲛⲉϣⲱⲗ ⲁⲩⲱ ⲛϣⲱⲗ ⲉⲧⲙⲙⲁⲩ ⲛⲉϣⲁⲩϫⲟⲟⲥ ⲉⲧⲃⲏⲏⲧⲟⲩ ϫⲉⲛⲁⲓ ⲛⲉ ⲛⲉϣⲟⲗⲥ ⲛⲇⲁⲩⲉⲓⲇ

21 ⲁⲩⲱ ⲇⲁⲩⲉⲓⲇ ⲁϥⲉⲓ ⲉⲣⲁⲧⲟⲩ ⲙⲡϣⲏⲧ ⲛⲣⲱⲙⲉ ⲉⲧⲙⲡⲟⲩϭⲙϭⲟⲙ ⲉⲟⲩⲁϩⲟⲩ ⲛⲥⲁⲇⲁⲩⲉⲓⲇ ⲁⲗⲗⲁ ⲁϥⲑⲙⲥⲟⲟⲩ ϩⲙⲡⲉⲭⲉⲓⲙⲁⲣⲣⲟⲥ ⲛⲃⲉⲁⲛⲁ ⲁⲩⲉⲓ ⲇⲉ ⲉⲃⲟⲗ ϩⲏⲧϥ ⲛⲇⲁⲩⲉⲓⲇ ⲁⲩⲱ ⲉⲃⲟⲗ ϩⲏⲧϥ ⲙⲡⲗⲁⲟⲥ ⲉⲧⲛⲙⲙⲁϥ ⲇⲁⲩⲉⲓⲇ ⲇⲉ ⲁϥⲡⲱϩ ⲉⲡⲗⲁⲟⲥ ⲁⲩⲱ ⲁϥϣⲁϫⲉ ⲛⲙⲙⲁⲩ ϩⲛⲟⲩⲉⲓⲣⲏⲛⲏ

22 ⲁⲩⲟⲩⲱϣⲃ ⲇⲉ ⲛϭⲓⲣⲱⲙⲉ ⲛⲓⲙ ⲙⲡⲟⲛⲏⲣⲟⲥ ⲁⲩⲱ ⲗⲟⲓⲙⲟⲥ ⲛⲓⲙ ⲛⲣⲱⲙⲉ ⲉⲃⲟⲗ ϩⲛⲛⲣⲱⲙⲉ ⲛⲣⲉϥⲙⲓϣⲉ ⲛⲧⲁⲩⲃⲱⲕ ⲉⲃⲟⲗ ⲙⲛⲇⲁⲩⲉⲓⲇ ⲉⲩϫⲱ ⲙⲙⲟⲥ ϫⲉⲉⲃⲟⲗ ϫⲉⲙⲡⲟⲩⲉⲓ ⲉⲃⲟⲗ ⲛⲙⲙⲁⲛ ⲛⲧⲛⲛⲁϯ ⲛⲁⲩ ⲁⲛ ⲉⲃⲟⲗ ϩⲛⲛⲉϣⲱⲗ ⲛⲁⲓ ⲛⲧⲁⲛϫⲓⲧⲟⲩ ⲁⲗⲗⲁ ⲙⲁⲣⲉⲡⲟⲩⲁ ⲡⲟⲩⲁ ϫⲓ ⲛⲧⲉϥⲥϩⲓⲙⲉ ⲙⲛⲛⲉϥϣⲏⲣⲉ ⲛⲥⲉⲧⲱⲟⲩⲛ ⲛⲥⲉⲃⲱⲕ

23 ⲡⲉϫⲉⲇⲁⲩⲉⲓⲇ ⲛⲁⲩ ϫⲉⲛⲧⲉⲧⲛⲛⲁⲉⲓⲣⲉ ⲁⲛ ϩⲓⲛⲁⲓ ⲙⲡⲉⲓⲧⲱϣ ⲙⲛⲛⲥⲁⲉⲧⲣⲉⲡϫⲟⲉⲓⲥ ⲧⲁⲁⲩ ⲉϩⲣⲁⲓ ⲉⲧⲟⲟⲧⲛ ⲛϥϩⲁⲣⲉϩ ⲉⲣⲟⲛ ⲁⲩⲱ ⲡⲉⲓⲕⲉⲧⲇⲟⲩⲣ ⲏ ⲡⲉⲓⲙⲏⲏϣⲉ ⲛⲧⲁϥⲉⲓ ⲉϩⲣⲁⲓ ⲉϫⲱⲛ ⲉⲁϥⲧⲁⲁⲩ ⲉϩⲣⲁⲓ ⲉⲧⲟⲟⲧⲛ

24 ⲁⲩⲱ ⲛⲓⲙ ϭⲉ ⲡⲉⲧⲛⲁⲥⲱⲧⲙ ⲛⲥⲁⲛⲉⲧⲛϣⲁϫⲉ ⲉⲧⲉⲛⲁⲓ ⲛⲉ ϫⲉⲛⲉⲓⲣⲱⲙⲉ ⲛⲥⲉⲑⲃⲃⲓⲏⲩ ⲁⲛ ⲉⲣⲱⲧⲛ ϫⲉⲕⲁⲧⲁⲡϣⲓ ⲛⲧⲧⲟ ⲙⲡⲉⲛⲧⲁϥⲉⲓ ⲉⲃⲟⲗ ⲉⲡⲡⲟⲗⲉⲙⲟⲥ ⲉⲥⲛⲁϣⲱⲡⲉ ϩⲱⲱϥ ⲛⲛⲉⲧϩⲙⲟⲟⲥ ϩⲁⲧⲛⲛⲉⲥⲕⲉⲩⲏ ⲉⲛⲛⲁⲡⲱϣ ⲉϫⲱⲟⲩ ⲕⲁⲧⲁⲡⲉⲓⲧⲱϣ

25 ⲁⲩⲱ ⲁⲡⲉⲓⲧⲱϣ ϣⲱⲡⲉ ⲉⲩⲡⲣⲟⲥⲧⲁⲅⲙⲁ ⲙⲛⲟⲩⲇⲓⲕⲁⲓⲱⲙⲁ ϩⲙⲡⲓⲥⲣⲁⲏⲗ ϣⲁⲉϩⲣⲁⲓ ⲉⲡϩⲟⲟⲩ ⲛϩⲟⲟⲩ

26 ⲇⲁⲩⲉⲓⲇ ⲇⲉ ⲁϥⲉⲓ ⲉϩⲣⲁⲓ ⲉⲥⲉⲕⲉⲗⲁⲕ ⲁⲩⲱ ⲁϥϫⲟⲟⲩ ⲉⲃⲟⲗ ϩⲛⲛⲉϣⲟⲗⲥ ⲛⲛⲉⲡⲣⲉⲥⲃⲩⲧⲉⲣⲟⲥ ⲛⲓⲟⲩⲇⲁ ⲙⲛⲛⲉⲕⲟⲟⲩⲉ ⲧⲏⲣⲟⲩ ⲉⲧϩⲏⲛ ⲉⲣⲟϥ ⲉϥϫⲱ ⲙⲙⲟⲥ ⲛⲁⲩ ϫⲉⲉⲓⲥϩⲏⲏⲧⲉ ⲁⲓⲧⲛⲛⲟⲟⲩ ⲛⲏⲧⲛ ⲛⲟⲩⲥⲙⲟⲩ ⲉⲃⲟⲗ ϩⲛⲛⲉϣⲟⲗⲥ ⲛⲛϫⲁϫⲉ ⲙⲡϫⲟⲉⲓⲥ

27 ⲛⲉⲧϩⲛⲃⲉⲑⲥⲟⲩⲣ ⲙⲛⲛⲉⲧϩⲛϩⲣⲁⲙⲙⲁ ⲙⲡⲣⲏⲥ ⲙⲛⲛⲉⲧϩⲛⲅⲉⲑⲱⲣ

28 ⲙⲛⲛⲉⲧϩⲛⲁⲣⲟⲩⲏⲗ ⲙⲛⲛⲉⲧϩⲛⲁⲣⲟⲩⲕⲁⲉⲓⲛ ⲙⲛⲛⲉⲧϩⲛⲥⲁⲫⲓⲛ ⲙⲛⲛⲉⲧϩⲛⲟⲑⲟⲛ

29 ⲙⲛⲛⲉⲧϩⲛⲡⲕⲁⲣⲙⲏⲗⲟⲥ ⲙⲛⲛⲉⲧϩⲛⲙⲡⲟⲗⲓⲥ ⲙⲡⲓⲥⲣⲁⲏⲗ ⲙⲛⲛⲉⲧϩⲛⲙⲡⲟⲗⲓⲥ ⲛⲅⲉⲛⲉⲍⲓ

30 ⲙⲛⲛⲉⲧϩⲛϩⲓⲉⲣⲓⲙⲟⲩⲑ ⲙⲛⲛⲉⲧϩⲛⲃⲉⲣⲥⲁⲃⲉⲉ

31 ⲙⲛⲛⲉⲧϩⲛⲭⲉⲃⲣⲱⲛ ⲁⲩⲱ ⲙⲙⲁ ⲧⲏⲣⲟⲩ ⲛⲧⲁⲇⲁⲩⲉⲓⲇ ⲃⲱⲕ ⲉⲃⲟⲗ ⲛϩⲏⲧⲟⲩ ⲛⲧⲟϥ ⲙⲛⲛⲉϥⲣⲱⲙⲉ