1 Samuel 29 — Coptic (Sahidic)

1 ⲛⲁⲗⲗⲟⲫⲩⲗⲟⲥ ⲇⲉ ⲁⲩⲥⲱⲟⲩϩ ⲉϩⲟⲩⲛ ⲛⲛⲉⲩⲡⲁⲣⲉⲙⲃⲟⲗⲏ ⲉϩⲣⲁⲓ ⲉⲁⲫⲉⲕ ⲡⲓⲥⲣⲁⲏⲗ ⲇⲉ ⲁϥⲧⲁⲁϥ ⲉϩⲣⲁⲓ ⲉⲁⲉⲧⲇⲱⲙ ⲧⲉⲧϩⲙⲡⲕⲁϩ ⲙⲡⲓⲥⲣⲁⲏⲗ

2 ⲁⲩⲱ ⲛⲥⲁⲧⲣⲁⲡⲏⲥ ⲛⲛⲁⲗⲗⲟⲫⲩⲗⲟⲥ ⲛⲉⲩⲙⲟⲟϣⲉ ⲡⲉ ϣⲉ ϣⲉ ⲁⲩⲱ ⲛⲉⲩⲛⲁⲣϣⲟ ϣⲟ ⲇⲁⲩⲉⲓⲇ ⲇⲉ ⲙⲛⲛⲉϥⲣⲱⲙⲉ ⲛⲉⲩⲙⲟⲟϣⲉ ⲡⲉ ⲛϩⲁⲉ ⲙⲛⲁⲭⲟⲩⲥ

3 ⲁⲩⲱ ⲛⲥⲁⲧⲣⲁⲡⲏⲥ ⲛⲛⲁⲗⲗⲟⲫⲩⲗⲟⲥ ⲡⲉϫⲁⲩ ϫⲉⲛⲓⲙ ⲛⲉ ⲛⲁⲓ ⲉⲧⲙⲟⲟϣⲉ ⲉⲧⲛⲏⲩ ⲛⲙⲙⲁⲛ ⲡⲉϫⲉⲁⲭⲟⲩⲥ ⲛⲛⲉⲛⲟϭ ⲛⲛⲁⲗⲗⲟⲫⲩⲗⲟⲥ ϫⲉⲡⲁⲓ ⲡⲉ ⲇⲁⲩⲉⲓⲇ ⲡϩⲙϩⲁⲗ ⲛⲥⲁⲟⲩⲗ ⲡⲣⲣⲟ ⲙⲡⲓⲥⲣⲁⲏⲗ ⲉⲁϥϭⲱ ⲛⲙⲙⲁⲛ ϩⲛϩⲉⲛϩⲟⲟⲩ ⲧⲏⲣⲟⲩ ⲧⲙⲉϩⲣⲟⲙⲡⲉ ⲥⲛⲧⲉ ⲧⲉ ⲧⲁⲓ ⲁⲩⲱ ⲙⲡⲓϩⲉ ⲉϩⲱⲃ ⲉϩⲟⲩⲛ ⲉⲣⲟϥ ⲛϫⲓⲛ ⲉⲡⲉϩⲟⲟⲩ ⲛⲧⲁϥⲉⲓ ⲉⲃⲟⲗ ⲛⲁⲓ ϣⲁⲉϩⲟⲩⲛ ⲉⲡϩⲟⲟⲩ ⲛϩⲟⲟⲩ

4 ⲁⲩⲱ ⲁⲩⲉⲙⲕⲁϩ ⲉⲧⲃⲏⲏⲧϥ ⲛϭⲓⲛⲛⲟϭ ⲛⲛⲁⲗⲗⲟⲫⲩⲗⲟⲥ ⲡⲉϫⲁⲩ ⲛⲁϥ ϫⲉⲕⲧⲟ ⲙⲡⲉⲓⲣⲱⲙⲉ ⲉⲡⲁϩⲟⲩ ⲁⲩⲱ ⲙⲁⲣⲉϥⲕⲧⲟϥ ⲛϥⲃⲱⲕ ⲉϩⲣⲁⲓ ⲉⲡⲉϥⲙⲁ ⲡⲙⲁ ⲛⲧⲁⲕⲕⲁⲁϥ ⲛϩⲏⲧϥ ⲛϥⲧⲙⲉⲓ ⲉⲃⲟⲗ ⲛⲙⲙⲁⲛ ⲉⲡⲡⲟⲗⲉⲙⲟⲥ ⲛϥⲧⲙϣⲱⲡⲉ ⲛⲉⲡⲓⲃⲟⲩⲗⲟⲥ ⲏ ⲛⲕⲣⲟϥ ⲛⲧⲉⲙⲡⲁⲣⲉⲙⲃⲟⲗⲏ ⲉⲣⲉⲡⲁⲓ ⲅⲁⲣ ⲛⲁϣϩⲱⲧⲡ ⲉⲡⲉϥϫⲟⲉⲓⲥ ϩⲛⲟⲩⲉⲓⲙⲏⲧⲉ ϩⲛⲛⲁⲡⲏⲩⲉ ⲛⲛⲣⲱⲙⲉ ⲉⲧⲙⲙⲁⲩ

5 ⲙⲏ ⲙⲡⲁⲓ ⲁⲛ ⲡⲉ ⲇⲁⲩⲉⲓⲇ ⲛⲧⲁⲩⲙⲟⲟϣⲉ ϩⲓϩⲏ ⲙⲙⲟϥ ⲛϭⲓⲛⲉⲧⲭⲟⲣⲉⲩⲉ ⲉⲩϫⲱ ⲙⲙⲟⲥ ϫⲉⲥⲁⲟⲩⲗ ⲁϥⲡⲁⲧⲁⲥⲥⲉⲓ ϩⲛⲛⲉϥϣⲟ ⲇⲁⲩⲉⲓⲇ ϩⲱⲱϥ ϩⲛⲛⲉϥⲧⲃⲁ

6 ⲁⲭⲟⲩⲥ ⲇⲉ ⲁϥⲙⲟⲩⲧⲉ ⲉⲇⲁⲩⲉⲓⲇ ⲡⲉϫⲁϥ ⲛⲁϥ ϫⲉⲡϫⲟⲉⲓⲥ ⲟⲛϩ ϫⲉⲕⲥⲟⲩⲧⲱⲛ ⲛⲧⲟⲕ ⲁⲩⲱ ⲛⲧⲕ ⲟⲩⲁⲅⲁⲑⲟⲥ ⲛⲁϩⲣⲁⲓ ⲁⲩⲱ ⲧⲉⲕϩⲓⲏ ⲛⲃⲱⲕ ⲉⲃⲟⲗ ⲁⲩⲱ ⲧⲉⲕϩⲓⲏ ⲛⲉⲓⲉϩⲟⲩⲛ ⲛⲉⲥⲛⲙⲙⲁⲓ ϩⲛⲧⲡⲁⲣⲉⲙⲃⲟⲗⲏ ⲁⲩⲱ ϭⲉ ⲙⲡⲓϩⲉ ⲉϩⲱⲃ ⲉϥϩⲟⲟⲩ ⲉϩⲟⲩⲛ ⲉⲣⲟⲕ ⲛϫⲓⲛ ⲡⲉϩⲟⲟⲩ ⲛⲧⲁⲕⲉⲓ ⲉϩⲟⲩⲛ ⲛⲁⲓ ϣⲁⲉϩⲣⲁⲓ ⲉⲡϩⲟⲟⲩ ⲛϩⲟⲟⲩ ⲛⲥⲁⲧⲣⲁⲡⲏⲥ ⲇⲉ ⲛⲥⲉⲧⲏⲧ ⲛϩⲏⲧ ⲛⲙⲙⲁⲕ ⲁⲛ

7 ⲧⲉⲛⲟⲩ ϭⲉ ⲛⲧⲟⲕ ⲛⲅⲃⲱⲕ ϩⲛⲟⲩⲉⲓⲣⲏⲛⲏ ⲛⲅⲧⲙⲉⲓⲣⲉ ⲛⲟⲩⲕⲁⲕⲓⲁ ⲛⲁϩⲣⲁⲩ ⲛⲛⲉⲥⲁⲧⲣⲁⲡⲏⲥ ⲛⲛⲁⲗⲗⲟⲫⲩⲗⲟⲥ

8 ⲡⲉϫⲉⲇⲁⲩⲉⲓⲇ ⲛⲁⲭⲟⲩⲥ ϫⲉⲟⲩ ⲡⲉ ⲡⲛⲟⲃⲉ ⲛⲧⲁⲓⲁⲁϥ ⲛⲁⲕ ⲁⲩⲱ ⲟⲩ ⲡⲉ ⲡϩⲱⲃ ⲛⲧⲁⲕϩⲉ ⲉⲣⲟϥ ⲉϩⲟⲩⲛ ⲉⲡⲉⲕϩⲙϩⲁⲗ ⲛϫⲓⲛ ⲡⲉϩⲟⲟⲩ ⲛⲧⲁⲓⲉⲓ ⲛⲁϩⲣⲁⲕ ϣⲁⲉϩⲣⲁⲓ ⲉⲡϩⲟⲟⲩ ⲛϩⲟⲟⲩ ϫⲉⲛⲛⲁⲉⲓ ⲉⲃⲟⲗ ⲁⲛⲟⲕ ⲉⲙⲓϣⲉ ⲙⲛⲛⲉϫⲁϫⲉ ⲙⲡⲁϫⲟⲉⲓⲥ ⲡⲣⲣⲟ

9 ⲁⲩⲱ ⲁⲅⲭⲟⲩⲥ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲇⲁⲩⲉⲓⲇ ϫⲉϯⲥⲟⲟⲩⲛ ϫⲉⲛⲧⲕ ⲟⲩⲁⲅⲁⲑⲟⲥ ⲛⲧⲟⲕ ⲛⲁϩⲣⲁⲓ ⲁⲗⲗⲁ ⲛⲛⲟϭ ⲛⲛⲁⲗⲗⲟⲫⲩⲗⲟⲥ ⲥⲉϫⲱ ⲙⲙⲟⲥ ϫⲉⲛⲛⲉϥⲉϣⲉⲓ ⲉⲃⲟⲗ ⲛⲙⲙⲁⲛ ⲉⲡⲡⲟⲗⲉⲙⲟⲥ

10 ⲧⲉⲛⲟⲩ ϭⲉ ϣⲟⲣⲡⲕ ⲉϩⲧⲟⲟⲩⲉ ⲛⲧⲟⲕ ⲁⲩⲱ ⲛϩⲙϩⲁⲗ ⲙⲡⲉⲕϫⲟⲉⲓⲥ ⲛⲁⲓ ⲛⲧⲁⲩⲉⲓ ⲛⲙⲙⲁⲕ ⲛⲧⲉⲧⲛϣⲣⲡⲧⲏⲩⲧⲛ ⲛⲧⲉⲧⲛⲃⲱⲕ ⲉϩⲣⲁⲓ ⲉⲡⲉⲧⲛⲙⲁ ⲛⲧⲁⲓⲕⲁⲧⲏⲩⲧⲛ ⲛϩⲏⲧϥ ⲁⲩⲱ ⲙⲡⲉⲣⲧⲣⲉⲡⲉⲕϩⲏⲧ ⲙⲉⲉⲩⲉ ⲉⲩϣⲁϫⲉ ⲉϥϩⲟⲟⲩ ϫⲉⲛⲧⲕ ⲟⲩⲁⲅⲁⲑⲟⲥ ⲛⲧⲟⲕ ⲛⲁϩⲣⲁⲓ ϣⲣⲡⲧⲏⲩⲧⲛ ϭⲉ ⲉⲧⲉϩⲓⲏ ⲛⲥⲟⲟⲩⲧⲛ ⲛⲁϩⲣⲏⲧⲛ ⲛⲧⲉⲧⲛⲃⲱⲕ

11 ⲁⲩⲱ ⲇⲁⲩⲉⲓⲇ ⲁϥϣⲟⲣⲡϥ ⲙⲛⲛⲉϥⲣⲱⲙⲉ ⲉⲃⲱⲕ ⲁⲩⲱ ⲉϩⲁⲣⲉϩ ⲉⲡⲕⲁϩ ⲛⲛⲁⲗⲗⲟⲫⲩⲗⲟⲥ ⲛⲁⲗⲗⲟⲫⲩⲗⲟⲥ ⲇⲉ ⲁⲩⲃⲱⲕ ⲉϩⲣⲁⲓ ⲉⲡⲟⲗⲉⲙⲉⲓ ⲙⲛⲡⲓⲥⲣⲁⲏⲗ