1 Samuel 31 — Coptic (Sahidic)

1 ⲛⲁⲗⲗⲟⲫⲩⲗⲟⲥ ⲇⲉ ⲁⲩⲡⲟⲗⲉⲙⲉⲓ ⲙⲛⲡⲓⲥⲣⲁⲏⲗ ⲁⲩⲱ ⲛⲣⲱⲙⲉ ⲙⲡⲓⲥⲣⲁⲏⲗ ⲁⲩϭⲱⲧⲡ ϩⲁⲡϩⲟ ⲛⲛⲁⲗⲗⲟⲫⲩⲗⲟⲥ ⲁⲩϩⲉ ⲉⲩϣⲟⲟϭⲉ ϩⲙⲡⲧⲟⲟⲩ ⲛⲕⲉⲗⲃⲟⲩⲉ

2 ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩⲕⲱⲧⲉ ⲉⲥⲁⲟⲩⲗ ⲁⲩⲱ ⲉⲛⲉϥϣⲏⲣⲉ ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩⲣⲱϩⲧ ⲛⲓⲱⲛⲁⲑⲁⲛ ⲙⲛⲁⲙⲓⲛⲁⲇⲁⲃ ⲙⲛⲙⲉⲗⲭⲓⲥⲁ ⲛϣⲏⲣⲉ ⲛⲥⲁⲟⲩⲗ

3 ⲁⲩⲱ ⲡⲡⲟⲗⲉⲙⲟⲥ ⲁϥⲛϣⲟⲧ ⲉϫⲛⲥⲁⲟⲩⲗ ⲁⲩϩⲉ ⲉⲣⲟϥ ⲛϭⲓⲛⲉⲧⲛⲉϫⲥⲟⲧⲉ ⲁⲩⲛⲉϫⲥⲟⲧⲉ ⲉⲣⲟϥ ⲁⲩⲣⲁϩⲧϥ ⲉⲡⲥⲉⲗⲉⲡⲓⲛ ⲛϩⲏⲧϥ

4 ⲡⲉϫⲉⲥⲁⲟⲩⲗ ⲙⲡⲉⲧϥⲓ ⲛⲛⲉϥⲥⲕⲉⲩⲏ ϫⲉⲧⲱⲕⲙ ⲛⲧⲉⲕⲥⲏϥⲉ ⲛⲅⲕⲟⲟⲛⲥⲧ ⲛϩⲏⲧⲥ ⲙⲏⲡⲱⲥ ⲛⲥⲉⲉⲓ ⲛϭⲓⲛⲉⲓⲁⲧⲥⲃⲃⲉ ⲛⲥⲉⲙⲟⲟⲩⲧ ⲁⲩⲱ ⲛⲥⲉⲥⲱⲃⲉ ⲛⲥⲱⲓ ⲡⲉⲧϥⲓ ⲇⲉ ⲛⲛⲉϥⲥⲕⲉⲩⲏ ⲙⲡⲉϥⲟⲩⲱϣ ⲉⲙⲟⲟⲩⲧϥ ϫⲉⲁϥⲣϩⲟⲧⲉ ⲉⲙⲁⲧⲉ ⲁⲩⲱ ⲥⲁⲟⲩⲗ ⲁϥϫⲓ ⲛⲧⲉϥⲥⲏϥⲉ ⲁϥⲃⲟϭϥ ⲉϫⲱⲥ

5 ⲛⲧⲉⲣⲉϥⲛⲁⲩ ⲇⲉ ⲛϭⲓⲡⲉⲧϥⲓ ⲛⲛⲉϥⲥⲕⲉⲩⲏ ϫⲉⲁⲥⲁⲟⲩⲗ ⲙⲟⲩ ⲛⲧⲟϥ ϩⲱⲱϥ ⲁϥⲃⲟϫϥ ⲉϫⲛⲧⲉϥⲥⲏϥⲉ ⲁϥⲙⲟⲩ ⲛⲙⲙⲁϥ

6 ⲁⲩⲱ ⲥⲁⲟⲩⲗ ⲁϥⲙⲟⲩ ⲙⲛⲡⲉϥϣⲟⲙⲛⲧ ⲛϣⲏⲣⲉ ⲁⲩⲱ ⲡⲉⲧϥⲓ ⲛⲛⲉϥⲥⲕⲉⲩⲏ ⲁⲩⲱ ⲛⲕⲉⲣⲱⲙⲉ ⲧⲏⲣⲟⲩ ⲉⲧⲛⲙⲙⲁϥ ⲁⲩⲙⲟⲩ ⲙⲡⲉϩⲟⲟⲩ ⲉⲧⲙⲙⲁⲩ

7 ⲁⲩⲛⲁⲩ ⲇⲉ ⲛϭⲓⲛⲉⲣⲱⲙⲉ ⲙⲡⲓⲥⲣⲁⲏⲗ ⲛⲉⲧϩⲓⲡⲉⲕⲣⲟ ⲙⲡⲉⲓⲁ ⲁⲩⲱ ⲛⲉⲧϩⲓⲡⲉⲕⲣⲟ ⲙⲡⲓⲟⲣⲇⲁⲛⲏⲥ ϫⲉⲛⲣⲱⲙⲉ ⲙⲡⲓⲥⲣⲁⲏⲗ ⲁⲩϭⲱⲧⲡ ⲁⲩⲱ ϫⲉⲁϥⲙⲟⲩ ⲛϭⲓⲥⲁⲟⲩⲗ ⲙⲛⲛⲉϥϣⲏⲣⲉ ⲁⲩⲕⲁⲛⲉⲩⲡⲟⲗⲓⲥ ⲉⲃⲟⲗ ⲁⲩⲡⲱⲧ ϩⲱⲟⲩ ⲁⲩⲉⲓ ⲛϭⲓⲛⲁⲗⲗⲟⲫⲩⲗⲟⲥ ⲁⲩⲟⲩⲱⲙ ⲛϩⲏⲧⲟⲩ

8 ⲁⲥϣⲱⲡⲉ ⲇⲉ ⲙⲡⲉϥⲣⲁⲥⲧⲉ ⲁⲩⲉⲓ ⲛϭⲓⲛⲁⲗⲗⲟⲫⲩⲗⲟⲥ ⲁⲩⲃⲱϣ ⲛⲛⲉⲧⲙⲟⲟⲩⲧ ⲁⲩϩⲉ ⲇⲉ ⲉⲥⲁⲟⲩⲗ ⲙⲛⲡⲉϥϣⲟⲙⲛⲧ ⲛϣⲏⲣⲉ ⲉⲩⲣⲁϩⲧ ϩⲙⲡⲧⲟⲟⲩ ⲛⲅⲉⲗⲃⲟⲩⲉ

9 ⲁⲩⲡⲟⲟⲛⲉϥ ⲁⲩⲃⲟϣϥ ⲛⲛⲉϥⲥⲕⲉⲩⲏ ⲁⲩϫⲟⲟⲩ ⲇⲉ ⲉⲃⲟⲗ ⲙⲡⲉⲩⲕⲱⲧⲉ ⲧⲏⲣϥ ⲙⲛⲡⲕⲁϩ ⲛⲛⲁⲗⲗⲟⲫⲩⲗⲟⲥ ⲉⲩⲧⲁϣⲉⲟⲉⲓϣ ⲛⲛⲉⲩⲉⲓⲇⲱⲗⲟⲛ ⲙⲛⲡⲉⲩⲙⲏⲏϣⲉ

10 ⲛⲉϥⲥⲕⲉⲩⲏ ⲇⲉ ⲁⲩⲕⲁⲁⲩ ϩⲙⲡⲉⲩⲙⲁ ⲛⲉⲓⲇⲱⲗⲟⲛ ⲁⲩⲱ ⲡⲉϥⲥⲱⲙⲁ ⲁⲩⲟⲃⲧϥ ⲉⲡⲥⲟⲃⲧ ⲛⲃⲉⲑⲥⲁⲙ

11 ⲛⲉⲧⲟⲩⲏϩ ⲇⲉ ϩⲛⲁⲃⲓⲥ ⲛⲧⲉⲅⲁⲗⲁⲁⲇ ⲁⲩⲥⲱⲧⲙ ⲉⲛⲉⲛⲧⲁⲛⲁⲗⲗⲟⲫⲩⲗⲟⲥ ⲁⲁⲩ ⲛⲥⲁⲟⲩⲗ

12 ⲁⲩⲧⲱⲟⲩⲛ ⲛϭⲓⲛⲣⲱⲙⲉ ⲧⲏⲣⲟⲩ ⲛϫⲱⲱⲣⲉ ⲁⲩⲙⲟⲟϣⲉ ⲛⲧⲉⲩϣⲏ ⲧⲏⲣⲥ ⲁⲩⲱ ⲁⲩϫⲓ ⲙⲡⲥⲱⲙⲁ ⲛⲥⲁⲟⲩⲗ ⲁⲩⲱ ⲡⲥⲱⲙⲁ ⲛⲓⲱⲛⲁⲑⲁⲛ ⲡⲉϥϣⲏⲣⲉ ⲉⲃⲟⲗ ϩⲙⲡⲥⲟⲃⲧ ⲛⲃⲉⲑⲥⲁⲙ ⲁⲩⲉⲛⲧⲟⲩ ⲉϩⲣⲁⲓ ⲉⲁⲃⲓⲥ ⲁⲩⲱ ⲁⲩⲣⲟⲕϩⲟⲩ ϩⲙⲡⲙⲁ ⲉⲧⲙⲙⲁⲩ

13 ⲁⲩⲧⲟⲙⲥⲟⲩ ϩⲁⲧⲥⲓϯⲱϩⲉ ⲉⲧϩⲛⲁⲃⲓⲥ ⲁⲩⲱ ⲁⲩⲛⲏⲥⲧⲉⲩⲉ ⲛⲥⲁϣϥ ⲛϩⲟⲟⲩ