1 Samuel 2 — Coptic (Sahidic)

1 ⲁⲩⲱ ⲛⲧⲉⲩⲛⲟⲩ ⲡⲉϫⲁⲥ ϫⲉⲡⲁϩⲏⲧ ⲁϥⲧⲁϫⲣⲟ ϩⲙⲡϫⲟⲉⲓⲥ ⲡⲁⲧⲁⲡ ⲁϥϫⲓⲥⲉ ϩⲙⲡⲁⲛⲟⲩⲧⲉ ⲧⲁⲧⲁⲡⲣⲟ ⲁⲥⲟⲩⲱⲛ ⲉⲙⲁⲧⲉ ⲉϫⲛⲛⲁϫⲁϫⲉ ⲁⲓⲟⲩⲛⲟϥ ⲡϫⲟⲉⲓⲥ ⲉϫⲙⲡⲉⲕⲟⲩϫⲁⲓ

2 ϫⲉⲙⲛⲕⲉⲟⲩⲁ ⲉϥⲟⲩⲁⲁⲃ ⲛⲧϩⲉ ⲙⲡϫⲟⲉⲓⲥ ⲁⲩⲱ ⲙⲛⲕⲉⲇⲓⲕⲁⲓⲟⲥ ⲛⲧϩⲉ ⲙⲡⲉⲛⲛⲟⲩⲧⲉ ⲙⲛⲕⲉϩⲁⲅⲓⲟⲥ ⲛⲃⲉⲗⲗⲁⲕ

3 ⲙⲡⲉⲣϣⲟⲩϣⲟⲩ ⲙⲙⲱⲧⲛ ⲁⲩⲱ ⲙⲡⲉⲣⲧⲁⲩⲉⲛⲟϭ ⲛϣⲁϫⲉ ⲙⲡⲉⲣⲧⲣⲉⲙⲛⲧϩⲉⲣⲟⲩⲱ ⲉⲓ ⲉⲃⲟⲗ ϩⲛⲧⲉⲧⲛⲧⲁⲡⲣⲟ ϫⲉⲡⲛⲟⲩⲧⲉ ⲙⲡⲥⲟⲟⲩⲛ ⲡⲉ ⲡϫⲟⲉⲓⲥ ⲁⲩⲱ ⲛⲧⲟϥ ⲡⲉ ⲡⲛⲟⲩⲧⲉ ⲉⲧⲥⲟⲃⲧⲉ ⲛⲛⲉϥϩⲃⲏⲩⲉ

4 ⲧⲡⲓⲧⲉ ⲛⲛⲉϫⲱⲱⲣⲉ ⲁⲥϩⲱⲣⲃ ⲁⲩⲱ ⲛⲉⲧⲟ ⲛϭⲱⲃ ⲁⲩϯϩⲓⲱⲟⲩ ⲛⲟⲩϭⲟⲙ

5 ⲛⲉⲧⲥⲓⲏⲩ ⲛⲟⲉⲓⲕ ⲁⲩϣⲱⲱⲧ ⲛⲉⲧϣⲁⲁⲧ ϩⲱⲟⲩ ⲁⲩⲕⲁⲡϩⲓⲥⲉ ⲛⲥⲱⲟⲩ ⲛⲧⲉⲡⲕⲁϩ ϫⲉⲁⲧⲁϭⲣⲏⲛ ϫⲡⲉⲥⲁϣϥ ⲛϣⲏⲣⲉ ⲧⲉⲧⲟϣ ϩⲱⲱⲥ ⲛϣⲏⲣⲉ ⲁⲥⲣϭⲱⲃ

6 ⲡϫⲟⲉⲓⲥ ⲛⲉⲧⲙⲟⲩⲟⲩⲧ ⲛⲧⲟϥ ⲟⲛ ⲡⲉⲧⲧⲁⲛϩⲟ ϥϫⲓ ⲉⲡⲉⲥⲏⲧ ⲉⲁⲙⲛⲧⲉ ⲁⲩⲱ ϥⲉⲓⲛⲉ ⲉϩⲣⲁⲓ

7 ⲡϫⲟⲉⲓⲥ ⲡⲉⲧϯ ⲛⲧⲙⲛⲧϩⲏⲕⲉ ⲙⲛⲧⲙⲛⲧⲣⲙⲙⲁⲟ ⲉϥϯ ⲙⲡⲉⲑⲃⲃⲓⲟ ⲙⲛⲡϫⲓⲥⲉ

8 ⲉϥϯ ⲛⲧⲟⲟⲧϥ ⲙⲡⲉⲧⲙⲟⲕϩ ⲉⲃⲟⲗ ϩⲙⲡⲕⲁϩ ⲁⲩⲱ ⲉϥⲧⲟⲩⲛⲟⲩⲥ ⲙⲡϩⲏⲕⲉ ⲉⲃⲟⲗ ϩⲛⲧⲕⲟⲡⲣⲓⲁ ⲉϥⲑⲙⲥⲟ ⲙⲙⲟϥ ⲉϩⲣⲁⲓ ⲙⲛⲛⲉϫⲱⲱⲣⲉ ⲙⲡⲗⲁⲟⲥ ⲉϥϯ ⲛⲁⲩ ⲙⲡⲉⲑⲣⲟⲛⲟⲥ ⲙⲡⲉⲟⲟⲩ ⲉⲕⲗⲏⲣⲟⲛⲟⲙⲉⲓ ⲙⲙⲟϥ ⲉϥϯ ⲙⲡⲉⲣⲏⲧ ⲙⲡⲉⲧⲉⲣⲏⲧ ⲁⲩⲱ ⲉϥⲥⲙⲟⲩ ⲉⲛⲣⲟⲙⲡⲉ ⲛⲛⲉⲇⲓⲕⲁⲓⲟⲥ

9 ϫⲉⲧϭⲟⲙ ⲙⲡⲣⲱⲙⲉ ⲛϫⲱⲱⲣⲉ ⲛⲧⲱϥ ⲁⲛ ⲧⲉ

10 ⲡϫⲟⲉⲓⲥ ⲛⲁⲉⲓⲣⲉ ⲙⲡⲉϥϫⲁϫⲉ ⲛϭⲱⲃ ⲡϫⲟⲉⲓⲥ ⲟⲩϩⲁⲅⲓⲟⲥ ⲡⲉ ⲙⲡⲉⲣⲧⲣⲉⲡⲥⲁⲃⲉ ϣⲟⲩϣⲟⲩ ⲙⲙⲟϥ ϩⲛⲧⲉϥⲙⲛⲧⲥⲁⲃⲉ ⲁⲩⲱ ⲙⲡⲉⲣⲧⲣⲉⲡϫⲱⲱⲣⲉ ϣⲟⲩϣⲟⲩ ⲙⲙⲟϥ ϩⲛⲧⲉϥⲙⲛⲧϫⲱⲱⲣⲉ ⲁⲩⲱ ⲙⲡⲉⲣⲧⲣⲉⲡⲣⲙⲙⲁⲟ ϣⲟⲩϣⲟⲩ ⲙⲙⲟϥ ϩⲛⲧⲉϥⲙⲛⲧⲣⲙⲙⲁⲟ ⲁⲗⲗⲁ ⲡⲉⲧⲛⲁϣⲟⲩϣⲟⲩ ⲙⲙⲟϥ ⲙⲁⲣⲉϥϣⲟⲩϣⲟⲩ ⲙⲙⲟϥ ϩⲙⲡϫⲟⲉⲓⲥ ⲁⲩⲱ ⲉⲧⲣⲉϥⲉⲓⲙⲉ ⲉⲡϫⲟⲉⲓⲥ ⲁⲩⲱ ⲛϥⲥⲟⲩⲱⲛϥ ⲛϥⲉⲓⲣⲉ ⲛⲟⲩϩⲁⲡ ⲙⲛⲟⲩⲇⲓⲕⲁⲓⲟⲥⲩⲛⲏ ϩⲙⲧⲙⲏⲧⲉ ⲙⲡⲕⲁϩ ⲡϫⲟⲉⲓⲥ ⲁϥⲃⲱⲕ ⲉϩⲣⲁⲓ ⲉⲙⲡⲏⲩⲉ ⲁϥϯϩⲣⲟⲩⲃⲁⲓ ⲛⲧⲟϥ ⲡⲉⲧⲛⲁϯϩⲁⲡ ⲉⲡⲕⲁϩ ⲧⲏⲣϥ ⲁⲩⲱ ⲉϥⲛⲁϯϭⲟⲙ ⲛⲛⲉⲣⲣⲱⲟⲩ ⲛϥϫⲓⲥⲉ ⲙⲡⲧⲁⲡ ⲙⲡⲉϥⲭⲣⲓⲥⲧⲟⲥ

11 ⲁⲩⲱ ⲡϣⲏⲣⲉ ⲕⲟⲩⲓ ⲁⲩⲕⲁⲁϥ ϩⲙⲡⲙⲁ ⲉⲧⲙⲙⲁⲩ ϩⲓⲧϩⲏ ⲙⲡϫⲟⲉⲓⲥ ⲁⲩⲃⲱⲕ ⲉϩⲣⲁⲓ ⲉⲁⲣⲙⲁⲑⲁⲉⲓⲙ ⲡϣⲏⲣⲉ ϣⲏⲙ ⲛⲉϥϣⲙϣⲉ ϩⲓⲧϩⲏ ⲙⲡϫⲟⲉⲓⲥ ⲙⲡⲉⲙⲧⲟ ⲉⲃⲟⲗ ⲛϩⲏⲗⲉⲓ ⲡⲟⲩⲏⲏⲃ

12 ⲁⲩⲱ ⲛϣⲏⲣⲉ ⲛϩⲏⲗⲉⲓ ⲡⲟⲩⲏⲏⲃ ϩⲉⲛϣⲏⲣⲉ ⲛⲉ ⲛⲗⲟⲓⲙⲟⲥ ⲉⲛⲥⲉⲥⲟⲟⲩⲛ ⲁⲛ ⲙⲡϫⲟⲉⲓⲥ

13 ⲟⲩⲇⲉ ⲡⲇⲓⲕⲁⲓⲱⲙⲁ ⲙⲡⲟⲩⲏⲏⲃ ⲛⲧⲟⲟⲧϥ ⲙⲡⲗⲁⲟⲥ ⲧⲏⲣϥ ⲉⲩⲛⲏⲩ ⲉⲣⲑⲩⲥⲓⲁ ⲁⲩⲱ ϣⲁϥⲓ ⲛϭⲓⲡϣⲏⲣⲉ ⲙⲡⲟⲩⲏⲏⲃ ⲉⲣⲉⲡⲁϥ ⲛⲁⲡⲓⲥⲉ ⲉⲣⲉⲟⲩⲕⲣⲁⲩⲣⲁ ⲛϣⲟⲙⲛⲧ ⲛⲧⲁⲣ ϩⲛⲧⲉϥϭⲓϫ

14 ⲛϥⲧⲱⲕⲥ ⲙⲙⲟⲥ ⲉϩⲣⲁⲓ ⲉϫⲙⲡⲛⲟϭ ⲛⲭⲁⲗⲕⲓⲟⲛ ⲏ ⲡⲕⲟⲩⲓ ⲛⲭⲁⲗⲕⲓⲟⲛ ⲏ ⲧϭⲁⲗⲁϩⲧ ⲁⲩⲱ ⲡⲉϣⲁϥⲉⲓ ⲉϩⲣⲁⲓ ⲧⲏⲣϥ ϩⲛⲧⲉⲕⲣⲁⲩⲣⲁ ϣⲁⲣⲉⲡⲟⲩⲏⲏⲃ ϫⲓⲧϥ ⲛⲁϥ ⲧⲁⲓ ⲧⲉ ⲧϩⲉ ⲉⲛⲉⲩⲉⲓⲣⲉ ⲙⲙⲟⲥ ⲙⲡⲓⲥⲣⲁⲏⲗ ⲧⲏⲣϥ ⲉⲧⲛⲏⲩ ⲉⲣⲑⲩⲥⲓⲁ ⲙⲡϫⲟⲉⲓⲥ ϩⲛⲥⲏⲗⲱ

15 ⲁⲩⲱ ⲙⲡⲁⲧⲉⲧⲉⲑⲩⲥⲓⲁ ϣⲱⲡⲉ ϣⲁⲣⲉⲡϣⲏⲣⲉ ⲙⲡⲟⲩⲏⲏⲃ ⲉⲓ ⲉϥϫⲱ ⲙⲙⲟⲥ ⲙⲡⲣⲱⲙⲉ ⲡⲉⲧⲉⲓⲣⲉ ⲛⲧⲉⲑⲩⲥⲓⲁ ϫⲉⲁⲩⲉⲁϥⲡⲓⲥⲉ ⲙⲡⲟⲩⲏⲏⲃ ⲁⲩⲱ ⲛϯⲛⲁϫⲓ ⲁⲛ ⲛⲧⲟⲟⲧⲕ ⲉⲃⲟⲗ ϩⲙⲡⲉⲭⲁⲗⲕⲓⲟⲛ ⲉⲧⲟ ⲛⲡⲉϣⲗⲱϩⲙ

16 ⲁⲩⲱ ⲡⲣⲱⲙⲉ ⲉⲧⲉⲓⲣⲉ ⲛⲧⲉⲑⲩⲥⲓⲁ ⲡⲉϫⲁϥ ⲛⲁϥ ϫⲉⲙⲁⲣⲉⲧⲉⲑⲩⲥⲓⲁ ϣⲱⲡⲉ ⲕⲁⲗⲱⲥ ⲁⲩⲱ ⲛⲅϫⲓ ⲛⲁⲕ ⲉⲃⲟⲗ ⲛϩⲏⲧⲟⲩ ⲧⲏⲣⲟⲩ ⲛⲛⲉⲧⲉⲣⲉⲧⲉⲕⲯⲩⲭⲏ ⲟⲩⲁϣⲟⲩ ⲡⲉϫⲁϥ ⲛⲁϥ ϫⲉⲛϯⲛⲁϭⲱ ⲁⲛ ⲁⲗⲗⲁ ⲉⲕⲛⲁϯ ⲛⲁⲓ ⲧⲉⲛⲟⲩ ⲉⲕϣⲁⲛⲧⲉⲙϯ ⲇⲉ ϯⲛⲁϫⲓ ⲛⲧⲉⲕϭⲟⲙ ⲁⲛ ⲧⲉ

17 ⲁⲩⲱ ⲛⲉⲣⲉⲡⲉⲓϩⲱⲃ ⲟ ⲛⲛⲟⲃⲉ ϩⲓⲧϩⲏ ⲙⲡϫⲟⲉⲓⲥ ⲉⲙⲁⲧⲉ ⲉⲙⲁⲧⲉ ⲉⲣⲉⲛϣⲏⲣⲉ ⲙⲡⲟⲩⲏⲏⲃ ⲉⲓⲣⲉ ⲙⲙⲟϥ ⲉⲃⲟⲗ ϫⲉⲛⲉⲩⲥⲱϣϥ ⲛⲧⲉⲑⲩⲥⲓⲁ ⲙⲡϫⲟⲉⲓⲥ

18 ⲥⲁⲙⲟⲩⲏⲗ ⲇⲉ ⲛⲉϥϣⲙϣⲉ ϩⲓⲧϩⲏ ⲙⲡϫⲟⲉⲓⲥ ⲉⲩϣⲏⲣⲉ ϣⲏⲙ ⲡⲉ ⲉϥϭⲟⲟⲗⲉ ⲛⲟⲩⲉⲫⲟⲩⲇ

19 ⲁⲩⲱ ⲟⲩⲕⲟⲩⲓ ⲛϣⲉⲛⲧⲱ ⲉⲁⲧⲉϥⲙⲁⲁⲩ ⲧⲁⲙⲓⲟⲥ ⲛⲁϥ ⲁⲥϫⲓⲧⲥ ⲛⲁϥ ⲉϩⲣⲁⲓ ⲕⲁⲧⲁⲡⲧⲱϣ ⲛⲛⲉϩⲟⲟⲩ ⲉⲥⲛⲁⲃⲱⲕ ⲉϩⲣⲁⲓ ⲙⲛⲡⲉⲥϩⲁⲓ ⲉⲉⲓⲣⲉ ⲛⲧⲉⲑⲩⲥⲓⲁ ⲕⲁⲧⲁⲡⲧⲱϣ ⲛⲛⲉϩⲟⲟⲩ

20 ⲁⲩⲱ ϩⲏⲗⲓ ⲁϥⲥⲙⲟⲩ ⲉⲉⲗⲅⲁⲛⲁ ⲙⲛⲧⲉϥⲥϩⲓⲙⲉ ⲉϥϫⲱ ⲙⲙⲟⲥ ⲛⲁϥ ϫⲉⲉⲣⲉⲡϫⲟⲉⲓⲥ ⲧⲛⲛⲟⲟⲩ ⲛⲁⲕ ⲛⲟⲩⲥⲡⲉⲣⲙⲁ ⲉⲡⲙⲁ ⲙⲡⲉⲓⲧⲁⲉⲓⲟ ⲛⲧⲁⲕⲧⲁⲁϥ ⲙⲡϫⲟⲉⲓⲥ ⲁⲩⲱ ⲉⲗⲅⲁⲛⲁ ⲡⲣⲱⲙⲉ ⲁϥⲃⲱⲕ ⲉϩⲣⲁⲓ ⲉⲡⲉϥⲙⲁ

21 ⲡϫⲟⲉⲓⲥ ⲇⲉ ⲁϥϭⲉⲙⲡϣⲓⲛⲉ ⲛⲁⲛⲛⲁ ⲁⲥϫⲡⲟ ⲛⲕⲉϣⲟⲙⲛⲧ ⲛϣⲏⲣⲉ ⲙⲛⲕⲉϣⲉⲉⲣⲉ ⲥⲛⲧⲉ ⲡϣⲏⲣⲉ ⲇⲉ ϣⲏⲙ ⲥⲁⲙⲟⲩⲏⲗ ⲛⲉϥϣⲙϣⲉ ϩⲓⲧϩⲏ ⲙⲡϫⲟⲉⲓⲥ

22 ⲁⲩⲱ ϩⲏⲗⲓ ⲛⲉⲩϩⲗⲗⲟ ⲉⲙⲁⲧⲉ ⲡⲉ ⲁⲩⲱ ⲁϥⲥⲱⲧⲙ ⲉⲛⲉⲧⲉⲣⲉⲛⲉϥϣⲏⲣⲉ ⲉⲓⲣⲉ ⲙⲙⲟⲟⲩ ⲛⲛⲉϣⲏⲣⲉ ⲙⲡⲓⲥⲣⲁⲏⲗ ϫⲉⲛⲉϥϣⲏⲣⲉ ⲛⲉⲩⲉⲛⲧⲟⲧⲕ ⲙⲛⲛⲉϩⲓⲟⲙⲉ ⲛⲛⲉⲧⲁϩⲉⲣⲁⲧⲟⲩ ϩⲓⲣⲙⲡⲣⲟ ⲛⲧⲉⲥⲕⲏⲛⲏ ⲙⲡⲙⲁⲣⲧⲩⲣⲓⲟⲛ

23 ⲡⲉϫⲉϩⲏⲗⲓ ⲛⲁⲩ ϫⲉⲉⲧⲃⲉⲟⲩ ⲧⲉⲧⲛⲉⲓⲣⲉ ϩⲓⲛⲁⲓ ⲕⲁⲧⲁⲡⲉⲓϣⲁϫⲉ ⲡⲁⲓ ⲁⲛⲟⲕ ⲉϯⲥⲱⲧⲙ ⲉⲣⲟϥ ⲉⲃⲟⲗ ϩⲛⲧⲧⲁⲡⲣⲟ ⲙⲡⲗⲁⲟⲥ ⲧⲏⲣϥ ⲙⲡϫⲟⲉⲓⲥ

24 ⲙⲡⲱⲣ ⲛⲁϣⲏⲣⲉ ϫⲉⲛⲁⲛⲟⲩ ⲛⲉⲓϣⲁϫⲉ ⲁⲛ ⲉϯⲥⲱⲧⲙ ⲉⲣⲟⲟⲩ ⲁⲛⲟⲕ ⲙⲡⲉⲣⲉⲓⲣⲉ ϩⲓⲛⲁⲓ ϫⲉⲛⲁⲛⲟⲩ ⲛⲉⲓϩⲣⲟⲟⲩ ⲁⲛ ⲉϯⲥⲱⲧⲙ ⲉⲣⲟⲟⲩ ⲁⲛⲟⲕ ⲛⲧⲉⲧⲛⲕⲱ ⲁⲛ ⲙⲡⲗⲁⲟⲥ ⲉⲣⲑⲩⲥⲓⲁ ⲙⲡϫⲟⲉⲓⲥ

25 ⲉⲣϣⲁⲛⲟⲩⲣⲱⲙⲉ ⲣⲛⲟⲃⲉ ⲉⲩⲣⲱⲙⲉ ϣⲁⲩⲧⲉⲃⲉϩⲡϫⲟⲉⲓⲥ ⲉϫⲱϥ ⲉⲧⲣⲉϥⲕⲱ ⲛⲁϥ ⲉⲃⲟⲗ ⲉϥϣⲁⲛⲉⲓⲣⲉ ⲇⲉ ⲉⲡϫⲟⲉⲓⲥ ⲛⲓⲙ ⲡⲉⲧⲛⲁϣⲗⲏⲗ ⲉϫⲱϥ ⲁⲩⲱ ⲙⲡⲟⲩⲥⲱⲧⲙ ⲛⲥⲁⲡⲉϩⲣⲟⲟⲩ ⲙⲡⲉⲩⲉⲓⲱⲧ ⲉⲃⲟⲗ ϫⲉϩⲛⲟⲩⲱϣ ⲛⲉⲣⲉⲡⲛⲟⲩⲧⲉ ⲟⲩⲱϣ ⲉⲧⲁⲕⲟⲟⲩ

26 ⲁⲩⲱ ⲡϣⲏⲣⲉ ϣⲏⲙ ⲥⲁⲙⲟⲩⲏⲗ ⲛⲉϥϯ ⲉⲡⲁⲛⲁⲓ ⲉⲛⲁⲛⲟⲩϥ ⲛⲁϩⲣⲙ ⲡϫⲟⲉⲓⲥ ⲁⲩⲱ ⲛⲁϩⲣⲛ ⲛⲉⲣⲱⲙⲉ

27 ⲟⲩⲣⲱⲙⲉ ⲇⲉ ⲛⲧⲉⲡⲛⲟⲩⲧⲉ ⲁϥⲉⲓ ϣⲁϩⲏⲗⲓ ⲉϥϫⲱ ⲙⲙⲟⲥ ⲛⲁϥ ϫⲉⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉϩⲛⲟⲩϭⲱⲗⲡ ⲁⲓϭⲱⲗⲡ ⲉⲃⲟⲗ ⲙⲡⲏⲓ ⲙⲡⲉⲕⲉⲓⲱⲧ ⲉⲩϩⲙⲡⲕⲁϩ ⲛⲕⲏⲙⲉ ⲉⲩⲟ ⲛϩⲙϩⲁⲗ ⲙⲡⲏⲓ ⲙⲫⲁⲣⲁⲱ

28 ⲁⲩⲱ ⲁⲓⲥⲱⲧⲡ ⲙⲡⲏⲓ ⲙⲡⲉⲕⲉⲓⲱⲧ ϩⲛⲛⲫⲩⲗⲏ ⲧⲏⲣⲟⲩ ⲙⲡⲓⲥⲣⲁⲏⲗ ⲉⲧⲣⲉⲩϣⲱⲡⲉ ⲛⲁⲓ ⲛⲟⲩⲏⲏⲃ ⲉⲧⲣⲉⲩⲃⲱⲕ ⲉϫⲙⲡⲁⲑⲩⲥⲓⲁⲥⲧⲏⲣⲓⲟⲛ ⲉⲧⲣⲉⲩⲧⲁⲗⲉⲑⲩⲥⲓⲁ ⲛⲁⲓ ⲉϩⲣⲁⲓ ⲁⲩⲱ ⲛⲥⲉϭⲟⲟⲗⲟⲩ ⲙⲡⲉⲫⲟⲩⲇ ⲁⲩⲱ ⲁⲓϯ ⲙⲡⲏⲓ ⲙⲡⲉⲕⲉⲓⲱⲧ ⲛⲉⲛⲕⲁ ⲛⲓⲙ ⲉϣⲁⲣⲉⲛⲉϣⲏⲣⲉ ⲙⲡⲓⲥⲣⲁⲏⲗ ⲧⲁⲗⲟⲟⲩ ⲉϫⲙⲡⲁⲑⲩⲥⲓⲁⲥⲧⲏⲣⲓⲟⲛ ⲉⲧⲣⲉⲩⲟⲙⲟⲩ

29 ⲁⲩⲱ ⲉⲧⲃⲉⲟⲩ ⲁⲕϭⲱϣⲧ ⲉϫⲛⲧⲁⲑⲩⲥⲓⲁ ⲁⲩⲱ ⲉϫⲙⲡⲁϣⲟⲩϩⲏⲛⲉ ϩⲛⲟⲩⲃⲁⲗ ⲛⲁⲧϣⲓⲡⲉ ⲁⲩⲱ ⲁⲕϯⲉⲟⲟⲩ ⲛⲛⲉⲕϣⲏⲣⲉ ⲉϩⲟⲩⲉ ⲉⲣⲟⲓ ⲉⲧⲣⲉⲩϫⲓⲥⲙⲟⲩ ⲉⲃⲟⲗ ϩⲛⲧⲁⲡⲁⲣⲭⲏ ⲛⲧⲉⲑⲩⲥⲓⲁ ⲧⲏⲣⲥ ⲙⲡⲓⲥⲣⲁⲏⲗ ϩⲓⲧϩⲏ ⲙⲙⲟⲓ

30 ⲉⲧⲃⲉⲡⲁⲓ ⲛⲁⲓ ⲛⲉⲧⲉⲣⲉⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ϫⲱ ⲙⲙⲟⲟⲩ ϫⲉⲁⲓϫⲟⲟⲥ ϫⲉⲡⲉⲕⲏⲓ ⲁⲩⲱ ⲡⲏⲓ ⲙⲡⲉⲕⲉⲓⲱⲧ ⲥⲉⲛⲁⲙⲟⲟϣⲉ ⲉⲩϣⲙϣⲉ ⲙⲡⲁⲙⲧⲟ ⲉⲃⲟⲗ ⲛϣⲁ ⲉⲛⲉϩ ⲧⲉⲛⲟⲩ ϭⲉ ⲡⲉϫⲉⲡϫⲟⲉⲓⲥ ϫⲉⲛⲛⲉⲧⲉⲓϩⲉ ϣⲱⲡⲉ ϫⲉⲛⲉⲧⲛⲁϯⲉⲟⲟⲩ ⲛⲁⲓ ϯⲛⲁϯⲉⲟⲟⲩ ⲛⲁⲩ ⲡⲉⲧⲛⲁⲥⲟϣⲧ ⲇⲉ ϯⲛⲁϯⲥⲱϣ ⲛⲁϥ

31 ⲉⲓⲥ ϩⲉⲛϩⲟⲟⲩ ⲛⲏⲩ ⲁⲩⲱ ϯⲛⲁⲃⲱⲧⲉ ⲉⲃⲟⲗ ⲙⲡⲉⲕⲥⲡⲉⲣⲙⲁ ⲁⲩⲱ ⲡⲉⲥⲡⲉⲣⲙⲁ ⲙⲡⲏⲓ ⲙⲡⲉⲕⲉⲓⲱⲧ

32 ⲛⲧⲉⲧⲙϩⲗⲗⲟ ϣⲱⲡⲉ ϩⲙⲡⲁⲏⲓ ⲛϩⲏⲧⲟⲩ ⲛⲛⲉϩⲟⲟⲩ ⲧⲏⲣⲟⲩ

33 ⲁⲩⲱ ⲛϯⲛⲁⲃⲱⲧⲉ ⲁⲛ ⲛⲟⲩⲣⲱⲙⲉ ⲉⲃⲟⲗ ϩⲙⲡⲁⲑⲩⲥⲓⲁⲥⲧⲏⲣⲓⲟⲛ ⲉⲧⲣⲉⲛⲉϥⲃⲁⲗ ⲧⲁⲕⲟ ⲁⲩⲱ ⲛⲧⲉⲧⲉϥⲯⲩⲭⲏ ⲟⲩⲱⲗⲥ ⲁⲩⲱ ⲟⲩⲟⲛ ⲛⲓⲙ ⲉⲧⲟ ⲛϩⲟⲩⲟ ϩⲙⲡⲉⲕⲏⲓ ⲥⲉⲛⲁϩⲉ ϩⲛⲧⲥⲏϥⲉ ⲛⲛⲣⲱⲙⲉ

34 ⲁⲩⲱ ⲡⲁⲓ ⲡⲉ ⲡⲙⲁⲉⲓⲛ ⲉⲧⲛⲁϣⲱⲡⲉ ⲉϥⲛⲁⲉⲓ ⲉϫⲙⲡⲉⲕϣⲏⲣⲉ ⲥⲛⲁⲩ ⲟⲫⲛⲓ ⲙⲛⲫⲓⲛⲉⲉⲥ ⲛⲧⲟⲟⲩ ⲙⲡⲉⲥⲛⲁⲩ ⲥⲉⲛⲁⲙⲟⲩ ϩⲛⲟⲩϩⲟⲟⲩ ⲛⲟⲩⲱⲧ

35 ⲁⲩⲱ ϯⲛⲁⲧⲁϩⲟ ⲉⲣⲁⲧϥ ⲛⲁⲓ ⲛⲟⲩⲏⲏⲃ ⲉϥⲟ ⲛϩⲟⲧ ⲡⲁⲓ ⲉϥⲛⲁⲉⲓⲣⲉ ⲛⲛⲉⲧϩⲙⲡⲁϩⲏⲧ ⲧⲏⲣⲟⲩ ⲁⲩⲱ ⲛⲉⲧϩⲛⲧⲁⲯⲩⲭⲏ ⲁⲩⲱ ϯⲛⲁⲕⲱⲧ ⲛⲁϥ ⲛⲟⲩⲏⲓ ⲉϥⲟ ⲛϩⲟⲧ ⲛϥⲙⲟⲟϣⲉ ϩⲓⲧϩⲏ ⲙⲡⲁⲭⲣⲓⲥⲧⲟⲥ ⲛⲛⲉϥϩⲟⲟⲩ ⲧⲏⲣⲟⲩ

36 ⲁⲩⲱ ⲡⲉⲧⲟ ⲛϩⲟⲩⲟ ϩⲙⲡⲉⲕⲏⲓ ⲉϥⲉⲉⲓ ⲛϥⲟⲩⲱϣⲧ ⲛⲁϥ ϩⲁⲟⲩϩⲟⲃⲟⲗⲟⲥ ⲛϩⲁⲧ ⲁⲩⲱ ϩⲁⲟⲩⲟⲉⲓⲕ ⲉϥϫⲱ ⲙⲙⲟⲥ ϫⲉⲛⲟϫⲧ ⲉⲩⲙⲁ ⲛⲟⲩⲱϣⲧ ⲛⲛⲉⲕⲙⲛⲧⲟⲩⲏⲏⲃ ⲉⲧⲣⲁⲟⲩⲉⲙⲟⲉⲓⲕ