Read 1 Samuel 28 side by side with translations · The Final Bible
1 ⲁⲥϣⲱⲡⲉ ⲇⲉ ϩⲛⲛⲉϩⲟⲟⲩ ⲉⲧⲙⲙⲁⲩ ⲛⲁⲗⲗⲟⲫⲩⲗⲟⲥ ⲁⲩⲥⲱⲟⲩϩ ⲉϩⲟⲩⲛ ⲕⲁⲧⲁⲛⲧⲱϣ ⲛⲛⲉⲩⲡⲁⲣⲉⲙⲃⲟⲗⲏ ⲉⲧⲣⲉⲩⲡⲟⲗⲉⲙⲉⲓ ⲙⲛⲡⲓⲥⲣⲁⲏⲗ ⲁⲩⲱ ⲡⲉϫⲉⲁⲭⲟⲩⲥ ⲉϩⲟⲩⲛ ϩⲛⲇⲁⲩⲉⲓⲇ ϫⲉϩⲛⲟⲩⲉⲓⲙⲉ ⲉⲓⲙⲉ ϫⲉⲕⲛⲁⲉⲓ ⲉⲃⲟⲗ ⲛⲙⲙⲁⲓ ⲉⲡⲡⲟⲗⲉⲙⲟⲥ ⲛⲧⲟⲕ ⲙⲛⲛⲉⲕⲣⲱⲙⲉ
2 ⲡⲉϫⲉⲇⲁⲩⲉⲓⲇ ⲛⲁⲭⲟⲩⲥ ϫⲉⲧⲁⲓ ⲧⲉ ⲧϩⲉ ⲉⲧⲉⲕⲛⲁⲉⲓⲙⲉ ⲧⲉⲛⲟⲩ ⲉⲛⲉⲧⲉⲣⲉⲡⲉⲕϩⲙϩⲁⲗ ⲛⲁⲁⲁⲩ ⲡⲉϫⲉⲁⲭⲟⲩⲥ ⲛⲇⲁⲩⲉⲓⲇ ϫⲉⲧⲁⲓ ⲧⲉ ⲧϩⲉ ⲉϯⲛⲁⲁⲁⲕ ⲛⲁⲣⲭⲓⲥⲱⲙⲁⲧⲟⲫⲩⲗⲁⲝ ⲛⲁⲓ ⲛⲛⲉϩⲟⲟⲩ ⲧⲏⲣⲟⲩ
3 ⲥⲁⲙⲟⲩⲏⲗ ⲇⲉ ⲁϥⲙⲟⲩ ⲁⲩⲱ ⲡⲓⲥⲣⲁⲏⲗ ⲧⲏⲣϥ ⲁϥⲣⲓⲙⲉ ⲉⲣⲟϥ ⲁⲩⲱ ⲁⲩⲧⲟⲙⲥϥ ϩⲛⲁⲣⲙⲁⲑⲁⲉⲓⲙ ⲧⲉϥⲡⲟⲗⲓⲥ ⲥⲁⲟⲩⲗ ⲇⲉ ⲁϥⲙⲟⲩⲟⲩⲧ ⲛⲛⲉⲕⲁⲥⲧⲣⲓⲙⲓⲛⲑⲟⲥ ⲉⲧⲉⲛⲣⲉϥⲉⲛⲕⲱⲱⲥ ⲉϩⲟⲩⲛ ⲛⲉ ⲙⲛⲛⲉⲧϣⲓⲛⲉ ⲉⲃⲟⲗ ϩⲙⲡⲕⲁϩ
4 ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩⲥⲱⲟⲩϩ ⲉϩⲟⲩⲛ ⲁⲩⲉⲓ ⲁⲩⲧⲁⲁⲩ ⲉϩⲣⲁⲓ ⲉⲥⲱⲙⲁⲛ ⲥⲁⲟⲩⲗ ϩⲱⲱϥ ⲁϥⲥⲱⲟⲩϩ ⲉϩⲟⲩⲛ ⲙⲛⲡⲓⲥⲣⲁⲏⲗ ⲧⲏⲣϥ ⲉϩⲣⲁⲓ ⲉⲕⲉⲗⲃⲟⲩⲉ
5 ⲥⲁⲟⲩⲗ ⲁϥⲛⲁⲩ ⲉⲧⲡⲁⲣⲉⲙⲃⲟⲗⲏ ⲧⲏⲣⲥ ⲛⲛⲁⲗⲗⲟⲫⲩⲗⲟⲥ ⲁϥⲣϩⲟⲧⲉ ⲁⲡⲉϥϩⲏⲧ ϣⲧⲟⲣⲧⲣ ⲉⲙⲁⲧⲉ
6 ⲥⲁⲟⲩⲗ ⲇⲉ ⲁϥϣⲓⲛⲉ ⲙⲡϫⲟⲉⲓⲥ ⲁⲩⲱ ⲙⲡⲉϥⲣⲟⲩⲱ ⲛⲁϥ ϩⲛⲣⲁⲥⲟⲩ ⲁⲩⲱ ϩⲙⲙⲁⲉⲓⲛ ⲁⲩⲱ ϩⲛⲛⲉⲡⲣⲟⲫⲏⲧⲏⲥ
7 ⲡⲉϫⲉⲥⲁⲟⲩⲗ ⲛⲛⲉϥϩⲙϩⲁⲗ ϫⲉⲕⲱⲧⲉ ⲛⲁⲓ ⲛⲥⲁⲟⲩⲥϩⲓⲙⲉ ⲛⲕⲁⲥⲧⲣⲓⲙⲓⲛⲑⲟⲥ ⲛⲧⲁⲃⲱⲕ ⲉⲣⲁⲧⲥ ⲛⲧⲁϣⲓⲛⲉ ⲛⲧⲟⲟⲧⲥ ⲛⲉϥϩⲙϩⲁⲗ ⲇⲉ ⲡⲉϫⲁⲩ ⲛⲁϥ ϫⲉⲉⲓⲥⲟⲩⲥϩⲓⲙⲉ ⲛⲕⲁⲥⲧⲣⲓⲙⲓⲛⲑⲟⲥ ϩⲛⲁⲉⲧⲇⲱⲣ
8 ⲁⲩⲱ ⲥⲁⲟⲩⲗ ⲁϥϣⲉⲃⲧϥ ⲛⲥⲙⲟⲧ ⲁϥϯ ϩⲓⲱⲱϥ ⲛϩⲉⲛⲕⲉϩⲟⲉⲓⲧⲉ ⲁϥⲙⲟⲟϣⲉ ⲛⲧⲟϥ ⲙⲛⲕⲉⲣⲱⲙⲉ ⲥⲛⲁⲩ ⲉⲩⲛⲙⲙⲁϥ ⲁⲩⲉⲓ ⲉⲣⲁⲧⲥ ⲛⲧⲉⲥϩⲓⲙⲉ ⲛⲧⲉⲩϣⲏ ⲡⲉϫⲁϥ ⲛⲁⲥ ϫⲉϣⲓⲛⲉ ⲛⲁⲓ ϩⲙⲡⲉⲧⲉϣⲁⲣϣⲓⲛⲉ ⲛϩⲏⲧϥ ⲛⲧⲉⲉⲓⲛⲉ ⲛⲁⲓ ⲉϩⲣⲁⲓ ⲙⲡⲉϯⲛⲁϫⲟⲟϥ ⲛⲉ
9 ⲡⲉϫⲉⲧⲉⲥϩⲓⲙⲉ ⲛⲁϥ ϫⲉⲕⲥⲟⲟⲩⲛ ϩⲱⲱⲕ ⲛⲛⲉⲛⲧⲁⲥⲁⲟⲩⲗ ⲁⲁⲩ ⲛⲧϩⲉ ⲛⲧⲁϥⲃⲱⲧⲉ ⲉⲃⲟⲗ ⲛⲛⲉⲕⲁⲥⲧⲣⲓⲙⲓⲛⲑⲟⲥ ⲙⲛⲛⲉⲧⲉϣⲁⲩϣⲓⲛⲉ ⲉⲃⲟⲗ ϩⲙⲡⲕⲁϩ ⲁⲩⲱ ⲉⲧⲃⲉⲟⲩ ϭⲉ ⲛⲧⲟⲕ ⲕϭⲟⲣϭ ⲉⲧⲁⲯⲩⲭⲏ ⲉⲙⲟⲟⲩⲧⲥ
10 ⲁⲩⲱ ⲥⲁⲟⲩⲗ ⲁϥⲱⲣⲕ ⲛⲁⲥ ⲙⲡⲛⲟⲩⲧⲉ ⲉϥϫⲱ ⲙⲙⲟⲥ ϫⲉⲡϫⲟⲉⲓⲥ ⲟⲛϩ ⲉϣⲱⲡⲉ ⲟⲩⲛⲟⲩϩⲱⲃ ⲛϫⲓⲛϭⲟⲛⲥ ⲛⲁⲧⲁϩⲟ ϩⲙⲡⲉⲓϣⲁϫⲉ
11 ⲡⲉϫⲉⲧⲉⲥϩⲓⲙⲉ ⲛⲁϥ ϫⲉⲉⲕⲟⲩⲱϣ ⲉⲧⲣⲁⲉⲛⲛⲓⲙ ⲛⲁⲕ ⲉϩⲣⲁⲓ ⲡⲉϫⲁϥ ⲛⲁⲥ ϫⲉⲁⲛⲓⲥⲁⲙⲟⲩⲏⲗ ⲛⲁⲓ ⲉϩⲣⲁⲓ
12 ⲁⲩⲱ ⲧⲉⲥϩⲓⲙⲉ ⲁⲥⲛⲁⲩ ⲉⲥⲁⲙⲟⲩⲏⲗ ⲁⲥⲱϣ ⲉⲃⲟⲗ ⲛⲧⲉⲩⲛⲟⲩ ϩⲛⲟⲩⲛⲟϭ ⲛϩⲣⲟⲟⲩ ⲛϭⲓⲧⲉⲥϩⲓⲙⲉ ⲡⲉϫⲁⲥ ⲛⲥⲁⲟⲩⲗ ϫⲉⲉⲧⲃⲉⲟⲩ ⲁⲕϫⲓⲕⲣⲟϥ ⲙⲙⲟⲓ ⲛⲧⲟⲕ ⲡⲉ ⲥⲁⲟⲩⲗ
13 ⲡⲉϫⲉⲡⲣⲣⲟ ⲛⲁⲥ ϫⲉⲙⲡⲣⲣϩⲟⲧⲉ ⲁϫⲓⲥ ϫⲉⲛⲧⲁⲣⲛⲁⲩ ⲉⲛⲓⲙ ⲡⲉϫⲉⲧⲉⲥϩⲓⲙⲉ ⲛⲥⲁⲟⲩⲗ ϫⲉϩⲉⲛⲛⲟⲩⲧⲉ ⲁⲓⲛⲁⲩ ⲉⲣⲟⲟⲩ ⲉⲩⲛⲏⲩ ⲉϩⲣⲁⲓ ϩⲙⲡⲕⲁϩ
14 ⲡⲉϫⲉⲥⲁⲟⲩⲗ ⲛⲁⲥ ϫⲉⲛⲧⲁⲣⲓⲙⲉ ⲉⲟⲩⲡⲉϫⲁⲥ ϫⲉⲉⲓⲛⲁⲩ ⲉⲩⲣⲱⲙⲉ ⲛⲟⲩⲟⲉⲓⲛ ⲉϥⲛⲏⲩ ⲉϩⲣⲁⲓ ϩⲙⲡⲕⲁϩ ⲁⲩⲱ ⲡⲁⲓ ⲉϥϭⲟⲟⲗⲉ ⲛⲟⲩϣⲛⲧⲱ ⲛⲧⲉⲩⲛⲟⲩ ⲥⲁⲟⲩⲗ ⲁϥⲉⲓⲙⲉ ϫⲉⲥⲁⲙⲟⲩⲏⲗ ⲡⲉ ⲁϥⲡⲁϩⲧϥ ⲉϫⲙⲡⲉϥϩⲟ ⲉϫⲙⲡⲕⲁϩ ⲁϥⲟⲩⲱϣⲧ ⲛⲁϥ
15 ⲡⲉϫⲉⲥⲁⲙⲟⲩⲏⲗ ⲛⲁϥ ϫⲉⲉⲧⲃⲉⲟⲩ ⲁⲕⲉⲛⲱⲭⲗⲉⲓ ⲛⲁⲓ ⲉⲉⲓ ⲉϩⲣⲁⲓ ⲡⲉϫⲉⲥⲁⲟⲩⲗ ⲛⲁϥ ϫⲉⲉⲃⲟⲗ ϫⲉϯϩⲏϣ ⲉⲙⲁⲧⲉ ⲁⲩⲱ ⲛⲁⲗⲗⲟⲫⲩⲗⲟⲥ ⲥⲉϯ ⲛⲙⲙⲁⲓ ⲁⲩⲱ ⲡⲛⲟⲩⲧⲉ ⲁϥⲥⲁϩⲱⲱϥ ⲉⲃⲟⲗ ⲙⲙⲟⲓ ⲙⲡⲉϥⲕⲟⲧϥ ϭⲉ ⲉⲥⲱⲧⲙ ⲉⲣⲟⲓ ⲟⲩⲇⲉ ϩⲛⲧⲟⲟⲧⲟⲩ ⲛⲛⲉⲡⲣⲟⲫⲏⲧⲏⲥ ⲟⲩⲇⲉ ϩⲛⲣⲁⲥⲟⲩ ⲉⲧⲃⲉⲡⲁⲓ ⲧⲉⲛⲟⲩ ⲁⲓⲙⲟⲩⲧⲉ ⲉⲣⲟⲕ ⲉⲧⲣⲉⲕⲧⲟⲩⲛⲉⲓⲁⲧ ⲉⲃⲟⲗ ⲙⲡⲉⲧⲓⲛⲁⲁϥ
16 ⲡⲉϫⲉⲥⲁⲙⲟⲩⲏⲗ ⲛⲁϥ ϫⲉⲁϩⲣⲟⲕ ⲕϫⲛⲟⲩ ⲙⲙⲟⲓ ⲉⲁⲡϫⲟⲉⲓⲥ ⲥⲁϩⲱⲱϥ ⲉⲃⲟⲗ ⲙⲙⲟⲕ ⲁϥϣⲱⲡⲉ ⲙⲛⲡⲉⲑⲓⲧⲟⲩⲱⲕ
17 ⲉⲁⲡϫⲟⲉⲓⲥ ⲉⲓⲣⲉ ⲛⲁⲕ ⲕⲁⲧⲁⲧϩⲉ ⲛⲧⲁϥϣⲁϫⲉ ϩⲛⲧⲟⲟⲧⲁⲩⲱ ⲡϫⲟⲉⲓⲥ ϥⲛⲁⲡⲱϣ ⲛⲧⲉⲕⲙⲛⲧⲣⲣⲟ ⲉⲃⲟⲗ ⲙⲙⲟⲕ ⲛϥⲧⲁⲁⲥ ⲙⲡⲉⲑⲓⲧⲟⲩⲱⲕ ⲡⲉⲧⲛⲁⲁⲁϥ ⲉⲣⲟⲕ ⲇⲁⲩⲉⲓⲇ
18 ⲉⲃⲟⲗ ϫⲉⲙⲡⲉⲕⲥⲱⲧⲙ ⲛⲥⲁⲡⲉϩⲣⲟⲟⲩ ⲙⲡϫⲟⲉⲓⲥ ⲁⲩⲱ ⲙⲡⲉⲕⲉⲓⲣⲉ ⲙⲡϭⲱⲛⲧ ⲛⲧⲉϥⲟⲣⲅⲏ ϩⲙⲡⲁⲙⲁⲗⲏⲕ ⲉⲧⲃⲉⲡⲁⲓ ϭⲉ ⲁⲡϫⲟⲉⲓⲥ ⲉⲓⲣⲉ ⲛⲁⲕ ⲙⲡϩⲟⲟⲩ ⲛϩⲟⲟⲩ
19 ⲁⲩⲱ ⲡϫⲟⲉⲓⲥ ⲛⲁⲡⲁⲣⲁⲇⲓⲇⲟⲩ ⲙⲡⲓⲥⲣⲁⲏⲗ ⲛⲙⲙⲁⲕ ⲉϩⲣⲁⲓ ⲉⲧⲟⲟⲧⲟⲩ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲣⲁⲥⲧⲉ ⲛⲧⲟⲕ ⲙⲛⲛⲉⲕϣⲏⲣⲉ ⲛⲙⲙⲁⲕ ⲥⲉⲛⲁϩⲉ ϩⲙⲡⲡⲟⲗⲉⲙⲟⲥ ⲁⲩⲱ ⲧⲡⲁⲣⲉⲙⲃⲟⲗⲏ ⲙⲡⲓⲥⲣⲁⲏⲗ ⲡϫⲟⲉⲓⲥ ⲛⲁⲧⲁⲁⲥ ⲉϩⲣⲁⲓ ⲉⲧⲟⲟⲧⲟⲩ ⲛⲛⲁⲗⲗⲟⲫⲩⲗⲟⲥ
20 ⲛⲧⲉⲩⲛⲟⲩ ⲇⲉ ⲥⲁⲟⲩⲗ ⲁϥⲟⲩⲱⲗⲥ ⲛϩⲏⲧ ⲁϥϩⲉ ϩⲛⲧⲉϥϣⲓⲏ ⲉϩⲣⲁⲓ ⲉϫⲙⲡⲕⲁϩ ⲁϥⲣϩⲟⲧⲉ ⲉⲙⲁⲧⲉ ϩⲁⲧϩⲏ ⲛⲛⲉϣⲁϫⲉ ⲛⲥⲁⲙⲟⲩⲏⲗ ⲁϥⲗⲟ ⲉϥϭⲙϭⲟⲙ ⲙⲡⲉϥⲟⲩⲉⲙⲟⲉⲓⲕ ⲅⲁⲣ ⲙⲡⲉϩⲟⲟⲩ ⲙⲛⲧⲉⲩϣⲏ ⲉⲧⲙⲙⲁⲩ
21 ⲧⲉⲥϩⲓⲙⲉ ⲇⲉ ⲛⲣⲉϥϣⲓⲛⲉ ⲁⲥⲃⲱⲕ ⲉϩⲟⲩⲛ ϣⲁⲥⲁⲟⲩⲗ ⲁⲩⲱ ⲛⲧⲉⲣⲉⲥⲛⲁⲩ ⲉⲣⲟϥ ϫⲉⲁϥϣⲧⲟⲣⲧⲣ ⲉⲙⲁⲧⲉ ⲡⲉϫⲁⲥ ⲛⲁϥ ϫⲉⲉⲓⲥϩⲏⲏⲧⲉ ⲁⲛⲟⲕ ⲧⲉⲕϩⲙϩⲁⲗ ⲁⲓⲥⲱⲧⲙ ⲛⲥⲁⲡⲉⲕϩⲣⲟⲟⲩ ⲁⲩⲱ ⲁⲓⲕⲱ ⲛⲧⲁⲯⲩⲭⲏ ϩⲛⲛⲁϭⲓϫ ⲁⲩⲱ ⲁⲓⲥⲱⲧⲙ ⲛⲥⲁⲛⲉⲕϣⲁϫⲉ ⲛⲧⲁⲕϫⲟⲟⲩ ⲛⲁⲓ
22 ⲧⲉⲛⲟⲩ ϭⲉ ϩⲱⲱϥ ⲥⲱⲧⲙ ⲛⲥⲁⲡⲉϩⲣⲟⲟⲩ ⲛⲧⲉⲕϩⲙϩⲁⲗ ⲛⲧⲁⲕⲱ ⲉϩⲣⲁⲓ ϩⲁⲣⲱⲕ ⲛⲟⲩϩⲣⲉ ⲛⲟⲉⲓⲕ ⲛⲅⲟⲩⲱⲙ ϫⲉⲉⲣⲉⲟⲩϭⲟⲙ ϣⲱⲡⲉ ⲙⲙⲟⲕ ϫⲉⲉⲕⲛⲁⲧⲁⲁⲕ ⲉⲧⲉϩⲓⲏ ⲙⲙⲟⲟϣⲉ
23 ⲁⲩⲱ ⲙⲡϥⲟⲩⲉϣⲟⲩⲱⲙ ⲛⲉϥϩⲙϩⲁⲗ ⲇⲉ ⲙⲛⲧⲉⲥϩⲓⲙⲉ ⲁⲩⲁⲛⲁⲅⲕⲁⲍⲉ ⲙⲙⲟϥ ⲁϥⲥⲱⲧⲙ ⲛⲥⲁⲡⲉⲩϩⲣⲟⲟⲩ ⲁϥⲧⲱⲟⲩⲛ ϩⲓⲡⲉⲥⲏⲧ ⲁϥϩⲙⲟⲟⲥ ϩⲓϫⲙⲡⲧⲟϭⲥ
24 ⲧⲉⲥϩⲓⲙⲉ ⲇⲉ ⲛⲉⲟⲩⲛⲧⲥ ⲟⲩⲕⲧⲏⲣ ⲙⲙⲁⲩ ⲉϥϩⲁⲧⲉϥⲉⲣⲱⲧⲉ ϩⲙⲡⲉⲥⲏⲓ ⲁⲥϣⲁⲁⲧϥ ⲛⲧⲉⲩⲛⲟⲩ ⲁⲥϫⲓ ⲛⲟⲩⲛⲟⲉⲓⲧ ⲁⲥⲟⲩⲟϣⲙⲉϥ ⲁⲥⲧⲱϭ ⲛϩⲉⲛⲟⲉⲓⲕ ⲛⲁⲑⲁⲃ
25 ⲁⲥⲉⲛⲧⲟⲩ ⲁⲥⲕⲁⲁⲩ ϩⲁⲣⲱϥ ⲛⲥⲁⲟⲩⲗ ⲁⲩⲱ ϩⲁⲣⲱⲟⲩ ⲛⲛⲉϥϩⲙϩⲁⲗ ⲁⲩⲟⲩⲱⲙ ⲁⲩⲱ ⲁⲩⲧⲱⲟⲩⲛ ⲉⲙⲟⲟϣⲉ ϩⲛⲧⲉⲟⲩϣⲏ ⲉⲧⲙⲙⲁⲩ
1 Samuel 27 · 1 Samuel 29 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)