1 Samuel 27 — Coptic (Sahidic)

1 ⲇⲁⲩⲉⲓⲇ ⲇⲉ ⲁϥϣⲁϫⲉ ϩⲙⲡⲉϥϩⲏⲧ ⲉϥϫⲱ ⲙⲙⲟⲥ ϫⲉⲧⲉⲛⲟⲩ ⲁⲣⲏⲩ ϩⲛⲟⲩϩⲟⲟⲩ ⲉⲓⲉⲉⲓ ⲉϩⲣⲁⲓ ⲉⲧⲟⲟⲧϥ ⲛⲥⲁⲟⲩⲗ ⲛⲧⲉⲧⲙⲡⲉⲧⲛⲁⲛⲟⲩϥ ϣⲱⲡⲉ ⲙⲙⲟⲓ ⲉⲓϣⲁⲛⲧⲙⲧⲱⲟⲩⲛ ⲛⲧⲁⲃⲱⲕ ⲉϩⲣⲁⲓ ⲉⲡⲕⲁϩ ⲛⲛⲁⲗⲗⲟⲫⲩⲗⲟⲥ ⲛⲧⲉⲥⲁⲟⲩⲗ ⲥⲁϩⲱⲱϥ ⲉⲃⲟⲗ ⲙⲙⲟⲓ ⲛϥⲗⲟ ⲉϥⲕⲱⲧⲉ ⲛⲥⲱⲓ ϩⲛⲛⲧⲟϣ ⲧⲏⲣⲟⲩ ⲙⲡⲓⲥⲣⲁⲏⲗ ⲛⲧⲁⲣⲃⲟⲗ ⲉⲛⲉϥϭⲓϫ

2 ⲁⲩⲱ ⲇⲁⲩⲉⲓⲇ ⲁϥⲧⲱⲟⲩⲛ ⲙⲛⲡⲉϥⲧⲟⲟⲩ ⲛϣⲉ ⲛⲣⲱⲙⲉ ⲉⲧⲛⲙⲙⲁϥ ⲁϥⲃⲱⲕ ⲉⲣⲁⲧϥ ⲛⲁⲭⲟⲩⲥ ⲡϣⲏⲣⲉ ⲙⲙⲁⲁⲭ ⲡⲣⲣⲟ ⲛⲅⲉⲑ

3 ⲁϥⲟⲩⲱϩ ϩⲁⲧⲛⲁⲭⲟⲩⲥ ϩⲛⲅⲉⲑ ⲛⲧⲟϥ ⲙⲛⲛⲉϥⲣⲱⲙⲉ ⲡⲟⲩⲁ ⲡⲟⲩⲁ ⲙⲛⲡⲉϥⲏⲓ ⲇⲁⲩⲉⲓⲇ ⲙⲛⲧⲉϥⲥϩⲓⲙⲉ ⲥⲛⲧⲉ ⲁⲭⲓⲛⲁⲁⲃ ⲧⲓⲥⲣⲁⲏⲗⲓⲧⲏⲥ ⲁⲩⲱ ⲁⲃⲓⲕⲓⲁ ⲧⲉⲥϩⲓⲙⲉ ⲛⲁⲃⲁⲗ ⲡⲕⲁⲣⲙⲏⲗⲟⲥ

4 ⲁⲩϫⲓ ⲙⲡⲟⲩⲱ ⲇⲉ ⲛⲥⲁⲟⲩⲗ ϫⲉⲁⲇⲁⲩⲉⲓⲇ ⲡⲱⲧ ⲉϩⲣⲁⲓ ⲉⲅⲉⲑ ⲙⲡⲉϥⲟⲩⲱϩ ϭⲉ ⲉⲧⲟⲟⲧϥ ⲉⲃⲱⲕ ⲉϯⲟⲩⲟⲓ ⲛⲥⲱϥ

5 ⲡⲉϫⲉⲇⲁⲩⲉⲓⲇ ⲇⲉ ⲉϩⲟⲩⲛ ϩⲛⲁⲭⲟⲩⲥ ϫⲉⲉϣⲱⲡⲉ ⲁⲛⲟⲕ ⲡⲉⲕϩⲙϩⲁⲗ ⲁⲓϭⲉⲛⲭⲁⲣⲓⲥ ⲛⲁϩⲣⲁⲕ ⲙⲁⲣⲟⲩϯⲟⲩⲙⲁ ⲛⲟⲩⲱϩ ⲛⲁⲓ ϩⲛⲙⲡⲟⲗⲓⲥ ⲉⲧϩⲏⲛ ⲉⲧⲥⲱϣⲉ ϫⲉⲉⲓⲉϭⲱ ⲙⲙⲁⲩ ⲛⲧⲉⲡⲉⲕϩⲙϩⲁⲗ ⲗⲟ ϩⲛⲟⲩⲡⲟⲗⲓⲥ ⲉⲕⲟ ⲛⲣⲣⲟ ⲛϩⲏⲧⲥ

6 ⲁⲩⲱ ⲁϥϯ ⲛⲁϥ ⲙⲡⲉϩⲟⲟⲩ ⲉⲧⲙⲙⲁⲩ ⲛⲥⲉⲕⲉⲗⲁⲕ ⲉⲧⲃⲉⲡⲁⲓ ⲁⲥⲉⲕⲉⲗⲗⲁⲕ ⲱⲡ ⲉⲡⲣⲣⲟ ⲛⲧⲓⲟⲩⲇⲁⲓⲁ ϣⲁⲉϩⲣⲁⲓ ⲉⲡϩⲟⲟⲩ ⲛϩⲟⲟⲩ

7 ⲁⲩⲱ ⲧⲏⲡⲉ ⲛⲛⲉϩⲟⲟⲩ ⲛⲧⲁⲇⲁⲩⲉⲓⲇ ⲁⲁⲩ ϩⲛⲧⲥⲱϣⲉ ⲛⲛⲁⲗⲗⲟⲫⲩⲗⲟⲥ ⲁϥⲣϥⲧⲟⲟⲩ ⲛⲉⲃⲟⲧ

8 ⲁⲩⲱ ⲇⲁⲩⲉⲓⲇ ⲉⲛⲉϣⲁϥⲃⲱⲕ ⲉϩⲣⲁⲓ ⲙⲛⲛⲉϥⲣⲱⲙⲉ ⲛⲥⲉϯ ⲙⲛⲡⲕⲉⲥⲓⲣⲓ ⲧⲏⲣϥ ⲙⲛⲡⲁⲙⲁⲗⲏⲕ ⲁⲩⲱ ⲉⲓⲥ ⲡⲕⲁϩ ⲛⲉϥϭⲟⲣϭ ϫⲓⲛⲗⲁⲙⲯⲟⲩⲣ ⲉⲧⲉⲙⲙⲁ ⲛⲉ ⲉⲧⲏⲡ ⲉⲣⲟⲟⲩ ⲉⲩⲟⲣϫ ϣⲁⲉϩⲣⲁⲓ ⲉⲕⲏⲙⲉ

9 ⲁⲩⲱ ⲛⲉϥⲑⲙⲕⲟ ⲙⲡⲕⲁϩ ⲉⲛϥⲛⲟⲩϩⲙ ⲛⲟⲩϩⲟⲟⲩⲧ ⲁⲛ ⲟⲩⲇⲉ ⲟⲩⲥϩⲓⲙⲉ ⲁⲩⲱ ⲛⲉϥϫⲓ ⲛϩⲉⲛⲟϩⲉ ⲛⲉⲥⲟⲟⲩ ⲙⲛϩⲉⲛⲁϩⲟⲟⲩ ⲁⲩⲱ ϩⲉⲛⲉⲥⲟⲟⲩ ⲙⲛϩⲉⲛϭⲁⲙⲟⲩⲗ ⲁⲩⲱ ϩⲉⲛϩⲟⲉⲓⲧⲉ ⲁⲩⲱ ⲛⲉⲩⲕⲧⲟ ⲙⲙⲟⲟⲩ ⲉⲩⲛⲏⲩ ⲉⲣⲁⲧϥ ⲛⲁⲭⲟⲩⲥ

10 ⲡⲉϫⲉⲁⲅⲭⲟⲩⲥ ⲉϩⲟⲩⲛ ϩⲛⲇⲁⲩⲉⲓⲇ ⲉϥϫⲱ ⲙⲙⲟⲥ ⲛⲁϥ ϫⲉⲛⲧⲁⲧⲉⲧⲛⲃⲱⲕ ⲉⲣⲛ ⲛⲓⲙ ⲙⲡϩⲟⲟⲩ ⲡⲉϫⲉⲇⲁⲩⲉⲓⲇ ⲛⲁϥ ϫⲉⲛⲧⲁⲛⲃⲱⲕ ⲉⲣⲛ ⲡⲥⲁ ⲙⲡⲣⲏⲥ ⲛⲧⲓⲟⲩⲇⲁⲓⲁ ⲁⲩⲱ ⲉⲣⲙ ⲡⲥⲁ ⲙⲡⲣⲏⲥ ⲛⲓⲉⲃⲉⲙⲉⲅⲁ ⲁⲩⲱ ⲉⲣⲙ ⲡⲥⲁ ⲙⲡⲣⲏⲥ ⲙⲡⲅⲉⲛⲓⲍⲉⲓ

11 ⲁⲩⲱ ϩⲟⲟⲩⲧ ⲛⲓⲙ ⲙⲛⲥϩⲓⲙⲉ ⲛⲓⲙ ⲙⲡⲉⲛϩⲁⲣⲉϩ ⲉⲣⲟⲟⲩ ⲉⲛⲧⲟⲩ ⲉϩⲟⲩⲛ ⲉⲅⲉⲑ ⲉⲓϫⲱ ⲙⲙⲟⲥ ϫⲉⲕⲁⲥ ⲛⲛⲉⲩϫⲉⲟⲩϣⲁϫⲉ ⲉⲧⲃⲏⲏⲧϩⲛⲅⲉⲑ ⲉⲩϫⲱ ⲙⲙⲟⲥ ϫⲉⲛⲁⲓ ⲛⲉ ϣⲁⲣⲉⲇⲁⲩⲉⲓⲇ ⲁⲁⲩ ⲁⲩⲱ ⲡⲁⲓ ⲡⲉ ⲡⲉϥⲇⲓⲕⲁⲓⲱⲙⲁ ⲛⲛⲉϩⲟⲟⲩ ⲧⲏⲣⲟⲩ ⲛⲧⲁⲇⲁⲩⲉⲓⲇ ⲁⲁⲩ ϩⲛⲧⲥⲱϣⲉ ⲛⲛⲁⲗⲗⲟⲫⲩⲗⲟⲥ

12 ⲁⲩⲱ ⲁⲭⲟⲩⲥ ⲁⲡⲉϥϩⲏⲧ ⲧⲱⲧ ⲉⲙⲁⲧⲉ ⲉϫⲛⲇⲁⲩⲉⲓⲇ ⲉϥϫⲱ ⲙⲙⲟⲥ ϫⲉϩⲛⲟⲩϣⲓⲡⲉ ⲁϥϫⲓϣⲓⲡⲉ ϩⲙⲡⲉϥⲗⲁⲟⲥ ⲡⲓⲥⲣⲁⲏⲗ ⲁⲩⲱ ϥⲛⲁϣⲱⲡⲉ ⲛⲁⲓ ⲛⲟⲩϩⲙϩⲁⲗ ⲛϣⲁ ⲉⲛⲉϩ