Read 1 Samuel 26 side by side with translations · The Final Bible
1 ⲛⲥⲓⲫⲁⲓⲟⲥ ⲇⲉ ⲁⲩⲉⲓ ⲉⲃⲟⲗ ϩⲙⲡⲕⲁϩ ⲉⲧⲣⲟⲕϩ ⲉⲣⲁⲧϥ ⲛⲥⲁⲟⲩⲗ ⲉⲡⲃⲟⲩⲛⲟⲥ ⲉⲩϫⲱ ⲙⲙⲟⲥ ⲛⲁϥ ϫⲉⲉⲓⲥⲇⲁⲩⲉⲓⲇ ⲗⲏϫ ϩⲙⲡⲃⲟⲩⲛⲟⲥ ϩⲛⲭⲉⲇⲙⲁⲑ ⲡⲉⲧⲙⲉⲡⲙⲧⲟ ⲉⲃⲟⲗ ⲛⲓⲉⲥⲥⲉⲙⲟⲩⲛ
2 ⲥⲁⲟⲩⲗ ⲇⲉ ⲁϥⲧⲱⲟⲩⲛ ⲁϥⲉⲓ ⲉϩⲣⲁⲓ ⲉⲧⲉⲣⲏⲙⲟⲥ ⲛⲥⲓⲫ ⲉⲣⲉϣⲟⲙⲛⲧ ⲛϣⲟ ⲛⲣⲱⲙⲉ ⲛⲙⲙⲁϥ ⲛⲥⲱⲧⲡ ⲉⲃⲟⲗ ϩⲙⲡⲓⲥⲣⲁⲏⲗ ⲉⲧⲣⲉϥⲕⲱⲧⲉ ⲛⲥⲁⲇⲁⲩⲉⲓⲇ ϩⲛⲧⲉⲣⲏⲙⲟⲥ ⲛⲥⲓⲫ
3 ⲁⲩⲱ ⲥⲁⲟⲩⲗ ⲁϥⲧⲁⲁϥ ⲉϩⲣⲁⲓ ⲉⲡⲃⲟⲩⲛⲟⲥ ⲛⲭⲉⲗⲗⲁ ⲡⲉⲧⲙⲡⲉⲙⲧⲟ ⲉⲃⲟⲗ ⲛⲓⲉⲥⲥⲉⲙⲟⲩⲛ ⲉϥϫⲓ ⲉϩⲣⲁⲓ ⲉⲧⲉϩⲓⲏ ⲇⲁⲩⲉⲓⲇ ⲇⲉ ⲛⲉϥϩⲙⲟⲟⲥ ⲉϩⲣⲁⲓ ϩⲛⲧⲉⲣⲏⲙⲟⲥ ⲁⲩⲱ ⲇⲁⲩⲉⲓⲇ ⲛⲧⲉⲣⲉϥⲛⲁⲩ ϫⲉⲥⲁⲟⲩⲗ ⲁϥⲉⲓ ⲉϩⲣⲁⲓ ⲉϫⲱϥ ϩⲛⲧⲉⲣⲏⲙⲟⲥ
4 ⲁⲇⲁⲩⲉⲓⲇ ϫⲟⲟⲩ ⲛϩⲉⲛⲕⲁⲧⲁⲥⲕⲟⲡⲟⲥ ⲁϥⲉⲓⲙⲉ ϫⲉⲥⲁⲟⲩⲗ ⲁϥⲉⲓ ⲉⲃⲟⲗ ϩⲛⲕⲉⲉⲓⲗⲁ ⲉϥⲥⲃⲧⲱⲧ
5 ⲇⲁⲩⲉⲓⲇ ⲁϥⲧⲱⲟⲩⲛ ⲙⲡⲁⲧⲉⲗⲁⲁⲩ ⲉⲓⲙⲉ ⲁϥⲟⲛϣϥ ⲉϩⲟⲩⲛ ⲉⲡⲙⲁ ⲉⲧⲉⲣⲉⲥⲁⲟⲩⲗ ⲛϩⲏⲧϥ ⲉϥⲛⲕⲟⲧⲕ ⲁⲩⲱ ⲛⲉϥⲙⲙⲁⲩ ⲛϭⲓⲁⲃⲉⲛⲛⲏⲣ ⲡϣⲏⲣⲉ ⲛⲛⲏⲣ ⲡⲉⲧϩⲓϫⲙⲡⲉϥⲙⲏⲏϣⲉ ⲥⲁⲟⲩⲗ ⲇⲉ ⲛⲉϥⲛⲕⲟⲧⲕ ϩⲛⲧⲁⲛⲡⲏⲛⲏ ⲁⲩⲱ ⲡⲗⲁⲟⲥ ⲛⲉϥⲡⲟⲣϣ ⲉⲃⲟⲗ ϩⲙⲡⲉϥⲕⲱⲧⲉ
6 ⲇⲁⲩⲉⲓⲇ ⲇⲉ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲁⲭⲓⲙⲉⲗⲉⲭ ⲡⲉⲭⲉⲇⲇⲁⲓⲟⲥ ⲁⲩⲱ ⲁⲃⲓⲥⲥⲁ ⲡϣⲏⲣⲉ ⲛⲥⲁⲣⲟⲩⲓⲁⲥ ⲡⲥⲟⲛ ⲛⲓⲱⲃ ⲉϥϫⲱ ⲙⲙⲟⲥ ⲛⲁⲩ ϫⲉⲛⲓⲙ ⲡⲉⲧⲛⲁⲉⲓ ⲛⲙⲙⲁⲓ ⲉϩⲟⲩⲛ ⲉⲧⲡⲁⲣⲉⲙⲃⲟⲗⲏ ⲉⲣⲁⲧϥ ⲛⲥⲁⲟⲩⲗ ⲡⲉϫⲉⲁⲃⲉⲥⲥⲁ ⲛⲁϥ ϫⲉⲁⲛⲟⲕ ϯⲛⲏⲩ ⲛⲙⲙⲁⲕ
7 ⲁⲩⲱ ⲇⲁⲩⲉⲓⲇ ⲙⲛⲁⲃⲉⲥⲥⲁ ⲁⲩϫⲱⲧⲉ ⲉϩⲟⲩⲛ ⲉⲡⲗⲁⲟⲥ ⲛⲧⲉⲩϣⲏ ⲁⲩⲱ ⲉⲓⲥ ⲥⲁⲟⲩⲗ ⲉϥⲛⲏϫ ⲉϥⲟⲃϣ ϩⲛⲗⲁⲙⲡⲏⲛⲏ ⲉⲣⲉⲧⲉϥⲗⲟⲅⲭⲏ ⲧⲣⲧⲱⲣ ϩⲙⲡⲕⲁϩ ϩⲁϫⲱϥ ⲁⲩⲱ ⲁⲃⲉⲛⲛⲏⲣ ⲙⲛⲡⲉϥⲗⲁⲟⲥ ⲉⲩⲛⲏϫ ⲉⲩⲟⲃϣ ϩⲙⲡⲉϥⲕⲱⲧⲉ
8 ⲡⲉϫⲉⲁⲃⲉⲥⲥⲁ ⲉϩⲟⲩⲛ ϩⲛⲇⲁⲩⲉⲓⲇ ϫⲉⲁⲡϫⲟⲉⲓⲥ ϯ ⲙⲡⲉⲕϫⲁϫⲉ ⲉϩⲣⲁⲓ ⲉⲧⲟⲟⲧⲕ ⲙⲡϩⲟⲟⲩ ⲧⲉⲛⲟⲩ ϭⲉ ϯⲛⲁⲃⲱⲕ ⲛⲧⲁⲣⲁϩⲧϥ ϩⲛⲧⲁⲗⲟⲅⲭⲏ ⲛⲧⲁϫⲟⲧϥ ⲉⲡⲕⲁϩ ⲛⲧⲁⲧⲣⲉ ⲟⲩⲥⲟⲡ ⲛⲟⲩⲱⲧ ⲣⲁϣⲧϥ
9 ⲡⲉϫⲉⲇⲁⲩⲉⲓⲇ ⲉϩⲟⲩⲛ ϩⲛⲁⲃⲉⲥⲥⲁ ϫⲉⲙⲡⲉⲣⲙⲟⲟⲩⲧϥ ϫⲉⲛⲓⲙ ⲡⲉⲧⲛⲁⲉⲛⲧⲟⲟⲧϥ ⲉϫⲙⲡⲉⲭⲣⲓⲥⲧⲟⲥ ⲙⲡϫⲟⲉⲓⲥ ⲛϥⲟⲩϫⲁⲓ
10 ⲡⲉϫⲉⲇⲁⲩⲉⲓⲇ ⲟⲛ ϫⲉⲡϫⲟⲉⲓⲥ ⲟⲛϩ ϫⲉⲉⲣⲉⲧⲙⲡϫⲟⲉⲓⲥ ϯⲥⲃⲱ ⲛⲁϥ ⲡⲉϥϩⲟⲟⲩ ⲛⲁⲉⲓ ⲛϥⲙⲟⲩ ⲏ ⲛϥⲃⲱⲕ ⲉⲃⲟⲗ ⲉⲡⲡⲟⲗⲉⲙⲟⲥ ⲛⲥⲉⲣⲁϩⲧϥ ⲙⲛⲛⲉⲛⲕⲟⲟⲩⲉ
11 ⲁⲛⲟⲕ ⲇⲉ ⲛⲛⲉⲡⲁⲓ ϣⲱⲡⲉ ⲙⲙⲟⲓ ⲛⲧⲟⲟⲧϥ ⲙⲡϫⲟⲉⲓⲥ ⲉⲧⲣⲁⲉⲛⲧⲟⲟⲧ ⲉϫⲙⲡⲉⲭⲣⲓⲥⲧⲟⲥ ⲙⲡϫⲟⲉⲓⲥ ⲧⲉⲛⲟⲩ ϭⲉ ϥⲓ ⲛⲧⲗⲟⲅⲭⲏ ⲉⲧϩⲁϫⲱϥ ⲁⲩⲱ ⲡⲉϩⲛⲁⲁⲁⲩ ⲙⲙⲟⲟⲩ ⲛⲧⲉⲛⲃⲱⲕ ⲉϩⲣⲁⲓ ⲉⲡⲉⲛⲙⲁ
12 ⲁⲩⲱ ⲇⲁⲩⲉⲓⲇ ⲛⲧⲉⲣⲉϥϥⲓ ⲛⲧⲉϥⲗⲟⲅⲭⲏ ⲙⲛⲡⲉϩⲛⲁⲁⲩ ⲙⲙⲟⲟⲩ ⲉⲧϩⲁϫⲱϥ ⲁⲩⲧⲱⲟⲩⲛ ⲁⲩⲙⲟⲟϣⲉ ⲛⲉⲙⲛⲗⲁⲁⲩ ⲇⲉ ⲉⲓⲱⲣϩ ⲙⲙⲟⲟⲩ ⲡⲉ ⲁⲩⲱ ⲛⲉⲙⲡⲉⲗⲁⲁⲩ ⲉⲓⲙⲉ ⲏ ⲁϥⲛⲉϩⲥⲉ ⲁⲗⲗⲁ ⲛⲉⲩⲟⲃϣ ⲧⲏⲣⲟⲩ ⲡⲉ ⲉⲃⲟⲗ ϫⲉⲟⲩϩⲟⲧⲉ ⲛⲧⲉⲡϫⲟⲉⲓⲥ ⲁⲥⲉⲓ ⲉϩⲣⲁⲓ ⲉϫⲱⲟⲩ
13 ⲇⲁⲩⲉⲓⲇ ⲇⲉ ⲁϥⲟⲩⲱⲧⲃ ⲉⲡⲓⲥⲁ ⲙⲙⲟⲟⲩ ⲁϥⲁϩⲉⲣⲁⲧϥ ⲉϫⲛⲧⲁⲡⲉ ⲙⲡⲧⲟⲟⲩ ⲉⲛⲁϣⲉ ⲧⲉϩⲓⲏ ⲉⲧⲟⲩⲧⲱⲟⲩ
14 ⲁⲩⲱ ⲇⲁⲩⲉⲓⲇ ⲁϥⲱϣ ⲉⲃⲟⲗ ⲉⲡⲗⲁⲟⲥ ⲁⲩⲱ ⲁϥϣⲁϫⲉ ⲙⲛⲁⲃⲉⲛⲛⲏⲣ ⲉϥϫⲱ ⲙⲙⲟⲥ ⲛⲁϥ ϫⲉⲛⲅⲛⲁⲣⲟⲩⲱ ⲁⲛ ϩⲁⲣⲱⲓ ⲁⲃⲉⲛⲛⲏⲣ ⲁⲩⲱ ⲁⲃⲉⲛⲛⲏⲣ ⲁϥⲣⲟⲩⲱ ⲉϥϫⲱ ⲙⲙⲟⲥ ϫⲉⲛⲧⲕ ⲛⲓⲙ ⲛⲧⲟⲕ ⲡⲉⲧⲙⲟⲩⲧⲉ ⲟⲩⲃⲏⲓ
15 ⲡⲉϫⲉⲇⲁⲩⲉⲓⲇ ⲛⲁⲃⲉⲛⲛⲏⲣ ϫⲉⲙⲏ ⲛⲧⲕ ⲟⲩⲣⲱⲙⲉ ⲁⲛ ⲛⲇⲩⲛⲁⲧⲟⲥ ⲛⲧⲟⲕ ⲏ ⲛⲓⲙ ⲡⲉ ⲡⲕⲉⲟⲩⲁ ⲛⲧⲉⲕϩⲉ ϩⲙⲡⲓⲥⲣⲁⲏⲗ ⲉⲧⲃⲉⲟⲩ ϭⲉ ⲛⲅⲣⲟⲉⲓⲥ ⲁⲛ ⲉⲡⲉⲕϫⲟⲉⲓⲥ ⲡⲣⲣⲟ ϫⲉⲁⲟⲩⲁ ⲉⲃⲟⲗ ϩⲙⲡⲁⲗⲁⲟⲥ ϫⲱⲧⲉ ⲉϩⲟⲩⲛ ⲉⲙⲟⲩⲟⲩⲧ ⲙⲡⲉⲕϫⲟⲉⲓⲥ ⲡⲣⲣⲟ
16 ⲁⲩⲱ ⲛⲛⲁⲛⲟⲩ ⲡⲉⲓϣⲁϫⲉ ⲁⲛ ⲛⲧⲁⲕⲁⲁϥ ⲡϫⲟⲉⲓⲥ ⲟⲛϩ ϫⲉⲛⲧⲉⲧⲛϩⲉⲛⲣⲱⲙⲉ ⲉⲩⲙⲡϣⲁ ⲙⲡⲙⲟⲩ ⲛⲧⲉⲧⲛⲣⲟⲉⲓⲥ ⲁⲛ ⲉⲡⲉⲧⲛϫⲟⲉⲓⲥ ⲡⲣⲣⲟ ⲉⲡⲉⲭⲣⲓⲥⲧⲟⲥ ⲡⲉ ⲙⲡϫⲟⲉⲓⲥ ⲧⲉⲛⲟⲩ ϭⲉ ϯϩⲧⲏⲕ ⲛⲅⲛⲁⲩ ϫⲉⲉⲣⲉⲧⲗⲟⲅⲭⲏ ⲙⲡⲣⲣⲟ ⲛⲧⲱⲛ ⲁⲩⲱ ⲡⲉϩⲛⲁⲁⲩ ⲙⲙⲟⲟⲩ ⲉⲧⲕⲏ ϩⲁϫⲱϥ
17 ⲥⲁⲟⲩⲗ ⲇⲉ ⲁϥⲥⲟⲩⲛⲧⲉⲥⲙⲏ ⲛⲇⲁⲩⲉⲓⲇ ⲡⲉϫⲁϥ ϫⲉⲧⲉⲕⲥⲙⲏ ⲧⲉ ⲧⲁⲓ ⲡⲁϣⲏⲣⲉ ⲇⲁⲩⲉⲓⲇ ⲡⲉϫⲉⲇⲁⲩⲉⲓⲇ ϫⲉⲁⲛⲟⲕ ⲡⲉⲕϩⲙϩⲁⲗ ⲁⲛⲟⲕ ⲡⲉ ⲡⲁϫⲟⲉⲓⲥ ⲡⲣⲣⲟ
18 ⲡⲉϫⲁϥ ⲟⲛ ϫⲉⲉⲧⲃⲉⲟⲩ ⲡⲁϫⲟⲉⲓⲥ ⲡⲏⲧ ϩⲓⲛⲁⲓ ⲛⲥⲁⲡⲉϥϩⲙϩⲁⲗ ⲉⲧⲃⲉⲟⲩ ϫⲉⲛⲧⲁⲓⲣⲛⲟⲃⲉ ⲁⲩⲱ ⲟⲩ ⲡⲉ ⲡⲁϫⲓⲛϭⲟⲛⲥ ⲛⲧⲁⲩϩⲉ ⲉⲣⲟϥ ⲉϩⲟⲩⲛ ⲉⲣⲟⲓ ⲏ ⲁϣ ⲧⲉ ⲧⲕⲁⲕⲓⲁ
19 ⲧⲉⲛⲟⲩ ϭⲉ ⲙⲁⲣⲉⲡⲁϫⲟⲉⲓⲥ ⲡⲣⲣⲟ ⲥⲱⲧⲙ ⲉⲛⲉϣⲁϫⲉ ⲙⲡⲉϥϩⲙϩⲁⲗ ϫⲉⲉϣⲱⲡⲉ ⲙⲉⲛ ⲡⲛⲟⲩⲧⲉ ⲡⲉⲧⲧⲟⲩⲛⲟⲥ ⲙⲙⲟⲕ ⲉϩⲣⲁⲓ ⲉϫⲱⲓ ⲉϥⲉϣⲱⲗⲙ ⲉⲧⲉⲕⲑⲩⲥⲓⲁ ⲉⲩⲥϯⲛⲟⲩϥⲉ ⲉϣⲱⲡⲉ ⲇⲉ ϩⲉⲛϣⲏⲣⲉ ⲛⲣⲱⲙⲉ ⲛⲉ ⲉⲧⲉⲓⲣⲉ ⲛⲛⲁⲓ ⲉⲣⲉⲛⲉⲓⲕⲟⲟⲩⲉ ϣⲱⲡⲉ ⲉⲩⲥϩⲟⲩⲟⲣⲧ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ϫⲉⲁⲩⲛⲟϫⲧ ⲉⲃⲟⲗ ⲙⲡϩⲟⲟⲩ ⲉⲧⲉⲙⲕⲁⲁⲧ ⲉⲥⲙⲛⲧ ϩⲛⲛⲉⲕⲗⲏⲣⲟⲛⲟⲙⲓⲁ ⲙⲡϫⲟⲉⲓⲥ ⲉⲩϫⲱ ⲙⲙⲟⲥ ⲛⲁⲓ ϫⲉⲃⲱⲕ ⲁⲣⲓϩⲙϩⲁⲗ ⲛϩⲉⲛⲕⲉⲛⲟⲩⲧⲉ
20 ⲧⲉⲛⲟⲩ ϭⲉ ⲛⲛⲉⲡⲁⲥⲛⲟϥ ⲡⲱⲛ ⲉⲃⲟⲗ ϩⲓϫⲙⲡⲕⲁϩ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ϫⲉⲁϥⲕⲁⲣⲁⲧϥ ⲉⲃⲟⲗ ⲛϭⲓⲡⲣⲣⲟ ⲙⲡⲓⲥⲣⲁⲏⲗ ⲉⲕⲱⲧⲉ ⲛⲥⲁⲧⲁⲯⲩⲭⲏ ⲉⲓⲟ ⲛⲧϩⲉ ⲛⲟⲩⲡⲏⲓ ⲛⲟⲩⲱⲧ ⲕⲁⲧⲁⲧϩⲉ ⲉⲧⲉⲣⲉⲡⲃⲁⲓ ϯⲟⲩⲟⲓ ϩⲛⲛⲉⲛⲧⲟⲩⲉⲓⲏ
21 ⲡⲉϫⲉⲥⲁⲟⲩⲗ ⲛⲁϥ ϫⲉⲁⲓⲣⲛⲟⲃⲉ ⲃⲱⲕ ⲡⲁϣⲏⲣⲉ ⲇⲁⲩⲉⲓⲇ ϫⲉⲛϯⲛⲁϣⲣⲡⲉⲧϩⲟⲟⲩ ⲛⲁⲕ ⲁⲛ ϫⲉⲧⲁⲯⲩⲭⲏ ⲧⲁⲓⲏⲩ ⲛⲁϩⲣⲁⲕ ϩⲙⲡϩⲟⲟⲩ ⲛϩⲟⲟⲩ ⲁⲓϣⲱⲡⲉ ⲉⲩⲗⲁⲁⲩ ⲁⲩⲱ ⲁⲓϣⲱⲡⲉ ⲉⲙⲁⲧⲉ ϩⲛϩⲉⲛⲛⲟϭ ⲙⲙⲛⲧⲁⲧⲥⲟⲟⲩⲛ
22 ⲇⲁⲩⲉⲓⲇ ⲇⲉ ⲁϥⲟⲩⲱϣⲃ ϫⲉⲉⲓⲥⲧⲗⲟⲅⲭⲏ ⲙⲡⲣⲣⲟ ϩⲙⲡⲉⲓⲙⲁ ⲙⲁⲣⲉⲟⲩⲁ ϩⲛⲛⲉⲕϩⲙϩⲁⲗ ⲉⲓ ⲛϥϫⲓⲧⲥ
23 ⲁⲩⲱ ⲡϫⲟⲉⲓⲥ ⲉϥⲉⲕⲧⲟ ⲉϫⲙⲡⲟⲩⲁ ⲡⲟⲩⲁ ⲛⲧⲉϥⲇⲓⲕⲁⲓⲟⲥⲩⲛⲏ ⲙⲛⲧⲉϥⲡⲓⲥⲧⲓⲥ ⲛⲧϩⲉ ⲛⲧⲁⲡϫⲟⲉⲓⲥ ⲧⲁⲁⲕ ⲙⲡϩⲟⲟⲩ ⲉϩⲣⲁⲓ ⲉⲧⲟⲟⲧⲁⲩⲱ ⲙⲡⲓⲣϩⲛⲁⲓ ⲉⲉⲛⲧⲟⲟⲧ ⲉϫⲙⲡⲉⲭⲣⲓⲥⲧⲟⲥ ⲙⲡϫⲟⲉⲓⲥ
24 ⲁⲩⲱ ⲕⲁⲧⲁⲧϩⲉ ⲛⲧⲁⲧⲉⲕⲯⲩⲭⲏ ⲁⲓⲁⲓ ⲙⲡϩⲟⲟⲩ ⲛⲁϩⲣⲁⲓ ϩⲓⲛⲁⲓ ϩⲱ ⲉⲣⲉⲧⲁⲯⲩⲭⲏ ⲁⲓⲁⲓ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ⲛϥⲥⲕⲉⲡⲁⲍⲉ ⲙⲙⲟⲓ ⲁⲩⲱ ⲛϥⲛⲁϩⲙⲉⲧ ⲉⲃⲟⲗ ϩⲛⲑⲗⲓⲯⲓⲥ ⲛⲓⲙ
25 ⲡⲉϫⲉⲥⲁⲟⲩⲗ ⲛⲇⲁⲩⲉⲓⲇ ϫⲉⲕⲥⲙⲁⲙⲁⲁⲧ ⲛⲧⲟⲕ ⲡⲁϣⲏⲣⲉ ⲁⲩⲱ ϩⲛⲟⲩⲉⲓⲣⲉ ⲉⲕⲉⲉⲓⲣⲉ ⲛϩⲉⲛϭⲟⲙ ⲉⲕⲉϭⲙϭⲟⲙ ⲁⲩⲱ ⲇⲁⲩⲉⲓⲇ ⲁϥⲃⲱⲕ ⲉϩⲣⲁⲓ ⲉⲧⲉϥϩⲓⲏ ⲥⲁⲟⲩⲗ ϩⲱⲱϥ ⲁϥⲕⲧⲟϥ ⲉϩⲣⲁⲓ ⲉⲡⲉϥⲙⲁ
1 Samuel 25 · 1 Samuel 27 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)