1 Samuel 25 — Coptic (Sahidic)

1 ⲥⲁⲙⲟⲩⲏⲗ ⲇⲉ ⲁϥⲙⲟⲩ ⲁⲩⲱ ⲁⲩⲥⲱⲟⲩϩ ⲉⲣⲟϥ ⲛϭⲓⲡⲓⲥⲣⲁⲏⲗ ⲧⲏⲣϥ ⲁⲩⲱ ⲁⲩⲧⲟⲉⲓⲧ ⲉⲣⲟϥ ⲁⲩⲱ ⲁⲩⲧⲟⲙⲥϥ ϩⲙⲡⲉϥⲏⲓ ϩⲛⲁⲣⲙⲁⲑⲁⲉⲓⲙ ⲇⲁⲩⲉⲓⲇ ⲇⲉ ⲁϥⲃⲱⲕ ⲉϩⲣⲁⲓ ⲉⲧⲉⲣⲏⲙⲟⲥ ⲙⲙⲁⲁⲛ

2 ⲛⲉⲩⲛⲟⲩⲣⲱⲙⲉ ⲇⲉ ϩⲙⲙⲁⲁⲛ ⲉⲣⲉⲛⲉϥⲟϩⲉ ⲛⲉⲥⲟⲟⲩ ϩⲙⲡⲕⲁⲣⲙⲏⲗⲟⲥ ⲁⲩⲱ ⲡⲣⲱⲙⲉ ⲉⲧⲙⲙⲁⲩ ⲛⲉⲩⲣⲙⲙⲁⲟ ⲉⲙⲁⲧⲉ ⲡⲉ ⲁⲩⲱ ⲡⲁⲓ ⲛⲉⲟⲩⲛⲧϥⲙⲁⲁⲃ ⲛϣⲉ ⲛⲉⲥⲟⲟⲩ ⲁⲩⲱ ⲙⲁⲁⲃ ⲛϣⲉ ⲛⲃⲁⲁⲙⲡⲉ ⲁⲩⲱ ⲉⲩⲛⲁϩⲱⲱⲕ ⲛⲛⲉϥⲉⲥⲟⲟⲩ ϩⲙⲡⲕⲁⲣⲙⲏⲗⲟⲥ

3 ⲛⲉⲡⲣⲁⲛ ⲇⲉ ⲙⲡⲣⲱⲙⲉ ⲉⲧⲙⲙⲁⲩ ⲡⲉ ⲛⲁⲃⲁⲗ ⲁⲩⲱ ⲡⲣⲁⲛ ⲛⲧⲉϥⲥϩⲓⲙⲉ ⲡⲉ ⲁⲃⲓⲕⲓⲁ ⲧⲉⲥϩⲓⲙⲉ ⲇⲉ ⲛⲉⲛⲁⲛⲟⲩⲥ ϩⲛⲧⲙⲛⲧⲣⲙⲛⲧϩⲏⲧ ⲁⲩⲱ ⲛⲉⲛⲉⲥⲉϩⲣⲁⲥ ⲉⲙⲁⲧⲉ ⲡⲉⲥϩⲁⲓ ⲇⲉ ⲛⲉⲟⲩⲣⲱⲙⲉ ⲡⲉ ⲉϥⲛⲁϣⲧ ⲁⲩⲱ ⲙⲡⲟⲛⲏⲣⲟⲥ ϩⲛⲛⲉϥϩⲃⲏⲩⲉ ⲡⲣⲱⲙⲉ ⲇⲉ ⲛⲉ ⲟⲩϣⲱⲥ ⲡⲉ ⲉϥϫⲁϫⲱ

4 ⲁⲩⲱ ⲇⲁⲩⲉⲓⲇ ⲁϥⲥⲱⲧⲙ ϩⲛⲧⲉⲣⲏⲙⲟⲥ ϫⲉⲛⲁⲃⲁⲗ ⲡⲕⲁⲣⲙⲏⲗⲟⲥ ⲥⲉϩⲱⲱⲕⲉ ⲛⲛⲉϥⲉⲥⲟⲟⲩ

5 ⲁⲇⲁⲩⲉⲓⲇ ϫⲟⲟⲩ ⲙⲙⲏⲧ ⲛϩⲙϩⲁⲗ ⲛⲧⲁϥ ⲉⲣⲉⲇⲁⲩⲉⲓⲇ ϫⲱ ⲙⲙⲟⲥ ⲛⲛⲉϥϣⲏⲣⲉ ϣⲏⲙ ϫⲉⲃⲱⲕ ⲉϩⲣⲁⲓ ⲉⲡⲕⲁⲣⲙⲏⲗⲟⲥ ⲛⲧⲉⲧⲛⲃⲱⲕ ⲉⲣⲁⲧϥ ⲛⲛⲁⲃⲁⲗ ⲛⲧⲉⲧⲛϣⲁϫⲉ ⲛⲙⲙⲁϥ ϩⲙⲡⲁⲣⲁⲛ ⲉⲩⲉⲓⲣⲏⲛⲏ

6 ⲉⲧⲉⲧⲛϫⲱ ⲙⲙⲟⲥ ⲛⲁϥ ϫⲉⲉⲕⲉⲕⲁⲟⲩ ⲁⲛ ⲉⲕⲉⲉⲓ ⲟⲛ ⲉⲡϩⲟⲟⲩ ⲛⲧⲕⲉⲣⲟⲙⲡⲉ ϩⲛⲛⲁⲓ ⲉⲕⲟⲩⲟϫ ⲛⲧⲟⲕ ⲁⲩⲱ ⲉⲣⲉⲡⲉⲕⲏⲓ ⲧⲏⲣϥ ⲟⲩⲟϫ ⲁⲩⲱ ⲛⲕⲁ ⲛⲓⲙ ⲉⲧⲉⲛⲧⲟⲕ ⲉⲩⲟⲩⲟϫ

7 ⲧⲉⲛⲟⲩ ϭⲉ ⲉⲓⲥ ϩⲏⲏⲧⲉ ⲁⲓⲥⲱⲧⲙ ϫⲉⲉⲓⲥⲛⲉⲕϣⲟⲟⲥ ⲥⲉϩⲱⲱⲕⲉ ⲛⲁⲕ ⲛⲁⲓ ⲉⲩⲛⲙⲙⲁⲛ ϩⲛⲧⲉⲣⲏⲙⲟⲥ ⲁⲩⲱ ⲙⲡⲉⲛⲛⲁϣⲡⲟⲩ ⲉⲃⲟⲗ ϩⲛⲗⲁⲁⲩ ⲛϣⲁϫⲉ ⲟⲩⲇⲉ ⲙⲡⲉⲛⲛⲟϫⲟⲩ ⲉⲃⲟⲗ ⲛⲛⲉϩⲟⲟⲩ ⲧⲏⲣⲟⲩ ⲉⲩϩⲁϩⲧⲏⲛ

8 ⲉϣⲱⲡⲉ ⲁϩⲉ ϫⲛⲉⲛⲉⲕϩⲙϩⲁⲗ ⲁⲩⲱ ⲥⲉⲛⲁⲧⲁⲙⲟⲕ ⲉⲛⲁⲓ ⲧⲉⲛⲟⲩ ϭⲉ ⲛⲉⲕϩⲙϩⲁⲗ ⲉⲧⲉⲁⲛⲟⲛ ⲡⲉ ⲙⲁⲣⲟⲩϭⲉⲛⲭⲁⲣⲓⲥ ⲛⲁϩⲣⲟⲕ ϫⲉⲛⲧⲁⲛⲉⲓ ⲛⲁⲕ ⲛⲟⲩϩⲟⲟⲩ ⲉⲛⲁⲛⲟⲩϥ ⲙⲁⲣⲉⲧⲉⲕϭⲓϫ ϯ ⲙⲡⲉⲕϣⲏⲣⲉ ⲇⲁⲩⲉⲓⲇ ⲙⲡⲉⲧⲉⲥⲛⲁϩⲉ ⲉⲣⲟϥ

9 ⲛϩⲙϩⲁⲗ ⲇⲉ ⲛⲇⲁⲩⲉⲓⲇ ⲁⲩⲧⲁⲩⲉⲛⲉⲓϣⲁϫⲉ ⲉⲛⲁⲃⲁⲗ ϩⲙⲡⲣⲁⲛ ⲛⲇⲁⲩⲉⲓⲇ ⲛⲁⲃⲁⲗ ⲇⲉ ⲁϥⲁⲛⲅϥ ⲉϩⲣⲁⲓ

10 ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲛⲉϩⲙϩⲁⲗ ⲛⲇⲁⲩⲉⲓⲇ ϫⲉⲛⲓⲙ ⲡⲉ ⲇⲁⲩⲉⲓⲇ ⲁⲩⲱ ⲛⲓⲙ ⲡⲉ ⲡϣⲏⲣⲉ ⲛⲓⲉⲥⲥⲁⲓ ⲙⲡϩⲟⲟⲩ ⲛⲧⲁⲛϩⲙϩⲁⲗ ⲁϣⲁⲓ ⲉⲡⲏⲧ ⲡⲟⲩⲁ ⲡⲟⲩⲁ ⲙⲙⲟⲟⲩ ϩⲁⲡϩⲟ ⲙⲡⲉⲩϫⲟⲉⲓⲥ

11 ⲉⲓⲛⲁϥⲓ ⲛⲛⲁⲟⲉⲓⲕ ⲙⲛⲛⲁⲏⲣⲡ ⲙⲛⲛⲁϭⲓⲛⲟⲩⲱⲙ ⲛⲧⲁⲓϣⲁⲁⲧⲟⲩ ⲛⲛⲉⲧϩⲱⲱⲕⲉ ⲛⲛⲁⲉⲥⲟⲟⲩ ⲛⲧⲁⲧⲁⲁⲩ ⲛϩⲉⲛⲣⲱⲙⲉ ⲉⲛϯⲥⲟⲟⲩⲛ ⲁⲛ ϫⲉϩⲉⲛⲉⲃⲟⲗ ⲧⲱⲛ ⲛⲉ ⲛϯⲛⲁϯ ⲁⲛ

12 ⲛϩⲙϩⲁⲗ ⲇⲉ ⲛⲇⲁⲩⲉⲓⲇ ⲁⲩⲕⲟⲧⲟⲩ ⲉⲣⲁⲧϥ ⲛⲇⲁⲩⲉⲓⲇ ⲛⲧⲉⲩϩⲓⲏ ⲁⲩⲧⲁⲟⲩⲟ ⲉⲣⲟϥ ⲛⲛⲉⲓϣⲁϫⲉ ⲧⲏⲣⲟⲩ

13 ⲁⲩⲱ ⲇⲁⲩⲉⲓⲇ ⲡⲉϫⲁϥ ⲛⲛⲉϥⲣⲱⲙⲉ ϫⲉⲙⲁⲣⲉⲡⲟⲩⲁ ⲡⲟⲩⲁ ⲙⲙⲱⲧⲛ ϩⲟⲕϥ ⲛⲧⲉϥⲥⲏϥⲉ ⲁⲩⲱ ⲁⲩⲧⲱⲟⲩⲛ ⲁⲩⲟⲩⲁϩⲟⲩ ⲛⲥⲁⲇⲁⲩⲉⲓⲇ ⲛϭⲓⲁϥⲧⲟⲩϣⲏ ⲛⲣⲱⲙⲉ ⲡⲕⲉϣⲏⲧ ⲇⲉ ⲛⲣⲱⲙⲉ ⲁⲩϩⲙⲟⲟⲥ ϩⲁⲧⲛⲛⲉⲥⲕⲉⲩⲏ

14 ⲁⲃⲓⲕⲓⲁ ⲇⲉ ⲧⲉⲥϩⲓⲙⲉ ⲛⲁⲃⲁⲗ ⲁⲟⲩⲁ ⲛⲛⲉⲥϩⲙϩⲁⲗ ⲧⲁⲙⲟⲥ ⲉⲥϫⲱ ⲙⲙⲟⲥ ⲛⲁⲥ ϫⲉⲉⲓⲥⲇⲁⲩⲉⲓⲇ ⲁϥϫⲟⲟⲩ ⲉⲃⲟⲗ ϩⲛⲧⲉⲣⲏⲙⲟⲥ ⲛϩⲉⲛⲃⲁⲓϣⲓⲛⲉ ⲉⲥⲙⲟⲩ ⲉⲡⲉⲛϫⲟⲉⲓⲥ ⲁⲩⲱ ⲙⲡⲉϥⲕⲟⲧϥ ⲣⲱ ⲉⲣⲟⲟⲩ

15 ⲛⲣⲱⲙⲉ ⲇⲉ ⲛⲁⲛⲟⲩⲟⲩ ⲛⲙⲙⲁⲛ ⲉⲙⲁⲧⲉ ⲙⲡⲟⲩⲛⲟϫⲛ ⲉⲃⲟⲗ ⲛⲗⲁⲁⲩ ⲁⲩⲱ ⲙⲡⲟⲩⲛⲟϣⲡⲉⲛ ϩⲛⲗⲁⲁⲩ ⲙⲙⲁ ⲛϫⲓⲛ ⲛⲉϩⲟⲟⲩ ⲧⲏⲣⲟⲩ ⲉⲛϩⲁⲧⲏⲩ ⲁⲩⲱ ⲉⲛϩⲛⲧⲥⲱϣⲉ

16 ⲛⲉⲩⲕⲱⲧⲉ ⲉⲣⲟⲛ ⲛⲧϩⲉ ⲛⲛⲓⲥⲟⲃⲧ ⲛⲧⲉⲩϣⲏ ⲙⲛⲡⲉϩⲟⲟⲩ ϩⲛⲧⲥⲱϣⲉ ⲉⲛⲙⲟⲟⲛⲉ ⲛⲛⲉⲥⲟⲟⲩ

17 ⲧⲉⲛⲟⲩ ϭⲉ ϯϩⲧⲏ ⲛⲧⲉⲛⲁⲩ ⲛⲧⲟ ϫⲉⲉⲣⲛⲁⲣⲟⲩ ϫⲉⲁⲧⲕⲁⲕⲓⲁ ϫⲱⲕ ⲉⲃⲟⲗ ⲉϫⲙⲡⲉⲛϫⲟⲉⲓⲥ ⲁⲩⲱ ⲉϫⲙⲡⲉϥⲏⲓ ⲡⲁⲓ ⲇⲉ ⲟⲩϣⲏⲣⲉ ⲡⲉ ⲛⲗⲟⲓⲙⲟⲥ ⲉⲙⲛⲧϩⲉ ⲛϣⲁϫⲉ ⲛⲙⲙⲁϥ

18 ⲁⲥⲃⲟϭⲥ ⲇⲉ ⲛϭⲓⲁⲃⲓⲕⲓⲁ ⲁⲥϫⲓ ⲛϣⲏⲧ ⲛⲟⲉⲓⲕ ⲁⲩⲱ ⲁⲛⲅⲓⲟⲛ ⲥⲛⲁⲩ ⲛⲏⲣⲡ ⲁⲩⲱ ϯⲟⲩ ⲛⲉⲥⲟⲟⲩ ⲉⲩⲡⲟⲥⲉ ⲁⲩⲱ ϯⲟⲩ ⲛϣⲓ ⲛⲛⲟⲉⲓⲧ ⲁⲩⲱ ϯⲟⲩ ⲛϣⲓ ⲛⲉⲗⲉⲗϣⲱⲟⲩⲉⲓ ⲁⲩⲱ ϣⲏⲧ ⲛⲧⲁϭ ⲛⲃⲏⲛⲛⲉ ⲉⲩⲧⲁⲓⲏⲩ ⲁⲥⲧⲁⲗⲟⲟⲩ ⲉϫⲛⲛⲉⲟⲟⲩ

19 ⲡⲉϫⲁⲥ ⲛⲛⲉⲥϩⲙϩⲁⲗ ϫⲉⲙⲟⲟϣⲉ ϩⲁⲧⲁϩⲏ ⲁⲩⲱ ⲉⲓⲥ ϩⲏⲏⲧⲉ ⲁⲛⲟⲕ ϯⲟⲩⲏϩ ⲛⲥⲁⲧⲏⲩⲧⲛ ⲡⲉⲥϩⲁⲓ ⲇⲉ ⲛⲁⲃⲁⲗ ⲙⲡⲉⲥⲧⲁⲙⲟϥ ⲉⲡⲉⲓⲧⲱϣ

20 ⲛⲧⲟⲥ ⲇⲉ ⲉⲥⲧⲁⲗⲏⲩ ⲉⲧⲉⲥⲉⲱ ⲁⲩⲱ ⲛⲉⲥⲛⲏⲩ ⲉϩⲣⲁⲓ ϩⲁⲧⲟⲗⲕⲥ ⲙⲡⲧⲟⲟⲩ ⲉⲓⲥ ⲇⲁⲩⲉⲓⲇ ⲙⲛⲛⲉϥⲣⲱⲙⲉ ⲛⲉⲩⲙⲟⲟϣⲉ ⲉⲩⲛⲏⲩ ⲉϩⲟⲩⲛ ⲉϩⲣⲁⲥ ⲁⲥⲉⲓⲟⲣϩϥ

21 ⲇⲁⲩⲉⲓⲇ ⲇⲉ ⲛⲉϥϣⲁϫⲉ ⲉϥϫⲱ ⲙⲙⲟⲥ ϫⲉⲙⲉϣⲁⲕ ⲟⲩⲛⲟⲃⲉ ⲡⲉⲛⲧⲁⲓⲁⲁϥ ⲉⲁⲓϩⲁⲣⲉϩ ⲉⲛⲉⲧϣⲟⲟⲡ ⲛⲁϥ ⲧⲏⲣⲟⲩ ϩⲛⲧⲉⲣⲏⲙⲟⲥ ⲉⲙⲡⲉⲛⲁⲓⲧⲉⲓ ⲙⲙⲟϥ ⲛⲗⲁⲁⲩ ⲉⲃⲟⲗ ϩⲛⲛⲉⲧⲛⲧⲁϥ ⲧⲏⲣⲟⲩ ⲁⲩⲱ ϩⲓⲛⲁⲓ ⲁϥⲧⲱⲱⲃⲉ ⲛⲁⲓ ⲛϩⲉⲛⲡⲉⲧϩⲟⲟⲩ ⲉⲡⲙⲁ ⲛϩⲉⲛⲡⲉⲧⲛⲁⲛⲟⲩⲟⲩ

22 ⲁⲩⲱ ⲛⲁⲓ ⲉⲣⲉⲡⲛⲟⲩⲧⲉ ⲁⲁⲩ ⲛⲛⲉϫⲁϫⲉ ⲛⲇⲁⲩⲉⲓⲇ ⲁⲩⲱ ⲛⲉⲓⲕⲟⲟⲩⲉ ⲉϥⲉⲟⲩⲁϩⲟⲩ ⲉⲣⲟⲟⲩ ϫⲉⲉϣⲱⲡⲉ ϯⲛⲁϣⲉϫⲡⲗⲁⲁⲩ ⲉⲡⲁϩⲟⲩ ⲛⲛⲉⲧϣⲟⲟⲡ ⲧⲏⲣⲟⲩ ⲛⲁⲃⲁⲗ ϣⲁⲡⲛⲁⲩ ⲛϩⲧⲟⲟⲩⲉ ⲉϥⲉⲣⲙⲏ ⲉϩⲟⲩⲛ ⲉⲧϫⲟ

23 ⲁⲃⲓⲕⲓⲁ ⲇⲉ ⲁⲥⲛⲁⲩ ⲉⲇⲁⲩⲉⲓⲇ ⲁⲩⲱ ⲛⲧⲉⲩⲛⲟⲩ ⲁⲥⲃⲟϭⲥ ⲉⲃⲟⲗ ϩⲛⲧⲉⲱ ⲁⲥⲡⲁϩⲧⲥ ϩⲓⲧϩⲏ ⲛⲇⲁⲩⲉⲓⲇ ⲉϫⲙⲡⲉⲥϩⲟ ⲁⲥⲟⲩⲱϣⲧ ⲛⲁϥ ⲉϫⲙⲡⲕⲁϩ

24 ϩⲁⲛⲉϥⲟⲩⲉⲣⲏⲧⲉ ⲡⲉϫⲁⲥ ⲛⲁϥ ϫⲉⲡⲁϫⲟⲉⲓⲥ ⲉⲣⲉⲡϫⲓⲛϭⲟⲛⲥ ϩⲓϫⲱⲓ ⲙⲁⲣⲉⲧⲉⲕϩⲙϩⲁⲗ ϣⲁϫⲉ ⲉⲛⲉⲕⲙⲁⲁϫⲉ ⲛⲅⲥⲱⲧⲙ ⲉⲛⲉϣⲁϫⲉ ⲛⲧⲉⲕϩⲙϩⲁⲗ

25 ⲙⲡⲉⲣⲧⲣⲉⲡⲁϫⲟⲉⲓⲥ ⲕⲁⲡⲉϥϩⲏⲧ ⲛϭⲓⲡϩⲏⲧ ⲙⲡⲉⲓⲣⲱⲙⲉ ⲛⲗⲟⲓⲙⲟⲥ ϫⲉⲕⲁⲧⲁⲡⲉϥⲣⲁⲛ ⲉⲣⲉⲧⲙⲛⲧⲁⲧϩⲏⲧ ⲙⲙⲟϥ ⲉⲧⲉⲛⲁⲃⲁⲗ ⲡⲉ ⲉⲡⲉϥⲣⲁⲛ ⲡⲉ ⲛⲁⲃⲁⲗ ⲕⲁⲧⲁⲧⲙⲛⲧⲁⲧϩⲏⲧ ⲉⲧⲛⲙⲙⲁϥ ⲡⲉ ⲁⲩⲱ ⲁⲛⲟⲕ ⲧⲉⲕϩⲙϩⲁⲗ ⲙⲡⲓⲛⲁⲩ ϩⲛⲟⲩⲙⲉ ⲉⲛⲉϩⲙϩⲁⲗ ⲙⲡⲁϫⲟⲉⲓⲥ ⲛⲁⲓ ⲛⲧⲁⲕⲧⲛⲛⲟⲟⲩⲥⲟⲩ

26 ⲧⲉⲛⲟⲩ ϭⲉ ⲡⲁϫⲟⲉⲓⲥ ⲡϫⲟⲉⲓⲥ ⲟⲛϩ ⲁⲩⲱ ⲧⲉⲕⲯⲩⲭⲏ ⲟⲛϩ ⲕⲁⲧⲁⲧϩⲉ ⲉⲧⲙⲡⲉⲡϫⲟⲉⲓⲥ ⲕⲁⲁⲕ ⲉⲧⲣⲉⲕⲡⲱϩⲧ ⲙⲡⲉⲥⲛⲟϥ ⲉⲃⲟⲗ ⲁⲗⲗⲁ ⲉⲧⲣⲉⲕϩⲁⲣⲉϩ ⲉⲧⲉⲕϭⲓϫ ⲉⲥⲟⲩⲁⲁⲃ ⲧⲉⲛⲟⲩ ϭⲉ ⲡⲁϫⲟⲉⲓⲥ ⲛⲉⲕϫⲓϫⲉⲉⲩⲉ ⲉⲩⲉⲣⲧϩⲉ ⲛⲛⲁⲃⲁⲗ ⲙⲛⲛⲉⲧⲕⲱⲧⲉ ⲛⲥⲁϩⲉⲛⲡⲉⲧϩⲟⲟⲩ ⲉⲡⲁϫⲟⲉⲓⲥ

27 ⲧⲉⲛⲟⲩ ϭⲉ ϫⲓ ⲙⲡⲓⲥⲙⲟⲩ ⲛⲧⲁⲧⲉⲕϩⲙϩⲁⲗ ⲉⲛⲧϥ ⲙⲡⲁϫⲟⲉⲓⲥ ⲛⲅⲧⲁⲁⲩ ⲛⲛⲉⲕϩⲙϩⲁⲗ ⲛⲉⲧⲁϩⲉⲣⲁⲧⲟⲩ ⲙⲡⲃⲟⲗ ⲙⲡⲁϫⲟⲉⲓⲥ

28 ϥⲓ ⲙⲙⲁⲩ ⲛⲧⲁⲛⲟⲙⲓⲁ ⲛⲧⲉⲕϩⲙϩⲁⲗ ϫⲉϩⲛⲟⲩⲉⲓⲣⲉ ⲡϫⲟⲉⲓⲥ ⲛⲁⲥⲙⲓⲛⲉ ⲛⲟⲩⲏⲓ ⲉϥⲉⲛϩⲟⲧ ⲙⲡⲁϫⲟⲉⲓⲥ ϫⲉⲡⲡⲟⲗⲉⲙⲟⲥ ⲙⲡⲁϫⲟⲉⲓⲥ ⲡϫⲟⲉⲓⲥ ⲛⲁⲁⲁϥ ⲁⲩⲱ ⲛⲥⲉⲛⲁϩⲉ ⲁⲛ ⲉⲕⲁⲕⲓⲁ ϩⲣⲁⲓ ⲛϩⲏⲧⲕ

29 ⲁⲩⲱ ⲉⲣϣⲁⲛⲣⲱⲙⲉ ⲧⲱⲟⲩⲛ ⲉϥⲡⲏⲧ ⲛⲥⲱⲕ ⲁⲩⲱ ⲉϥⲕⲱⲧⲉ ⲛⲥⲁⲧⲉⲕⲯⲩⲭⲏ ⲧⲉⲯⲩⲭⲏ ⲙⲡⲁϫⲟⲉⲓⲥ ⲛⲁϣⲱⲡⲉ ⲉⲥⲙⲏⲣ ϩⲛⲟⲩⲙⲣⲣⲉ ⲛⲱⲛϩ ϩⲁⲧⲙ ⲡϫⲟⲉⲓⲥ ⲡⲛⲟⲩⲧⲉ ⲧⲉⲯⲩⲭⲏ ⲇⲉ ⲛⲛⲉⲕϫⲁϫⲉ ϥⲛⲁⲙⲟⲣⲥ ⲉⲧⲙⲏⲧⲉ ⲛⲧⲉⲥⲫⲉⲛⲇⲟⲛⲏ ⲛϥϩⲟⲩⲱⲣⲥ ⲉⲃⲟⲗ

30 ⲁⲩⲱ ⲡϫⲟⲉⲓⲥ ϥⲛⲁⲉⲓⲣⲉ ⲙⲡⲁϫⲟⲉⲓⲥ ⲛⲛⲁⲅⲁⲑⲟⲛ ⲧⲏⲣⲟⲩ ⲛⲧⲁϥϫⲟⲟⲩ ⲉⲧⲣⲉⲩⲉⲓ ⲉϩⲣⲁⲓ ⲉϫⲱⲕ ⲁⲩⲱ ϥⲛⲁϩⲱⲛ ⲉⲧⲟⲟⲧⲕ ⲉⲧⲣⲉⲕϣⲱⲡⲉ ⲛⲁⲡⲉ ⲉϫⲙⲡⲓⲥⲣⲁⲏⲗ

31 ⲁⲩⲱ ⲡⲁⲓ ⲛⲟⲩⲃⲟⲧⲉ ⲛⲁⲕ ⲁⲛ ⲡⲉ ⲟⲩⲇⲉ ⲛⲟⲩⲥⲕⲁⲛⲇⲁⲗⲟⲛ ⲁⲛ ⲡⲉ ⲙⲡϩⲏⲧ ⲙⲡⲁϫⲟⲉⲓⲥ ⲉⲡⲱϩⲧ ⲉⲃⲟⲗ ⲛⲟⲩⲥⲛⲟϥ ⲛⲁⲧⲛⲟⲃⲉ ⲉⲡϫⲓⲛϫⲏ ⲁⲩⲱ ⲉⲣⲉⲧϭⲓϫ ⲙⲡⲁϫⲟⲉⲓⲥ ϣⲱⲡⲉ ⲉⲥⲧⲃⲃⲏⲩ ⲛⲁϥ ⲁⲩⲱ ⲡϫⲟⲉⲓⲥ ϥⲛⲁⲉⲓⲣⲉ ⲙⲡⲁⲅⲁⲑⲟⲛ ⲙⲡⲁϫⲟⲉⲓⲥ ⲛⲅⲉⲣⲡⲙⲉⲉⲩⲉ ⲛⲧⲉⲕϩⲙϩⲁⲗ ⲉⲉⲓⲣⲉ ⲛⲁⲥ ⲙⲡⲡⲉⲧⲛⲁⲛⲟⲩϥ

32 ⲡⲉϫⲉⲇⲁⲩⲉⲓⲇ ⲛⲁⲃⲓⲕⲓⲁ ϫⲉⲃⲁⲣⲟⲩⲭ ⲉⲧⲉⲡⲁⲓ ⲡⲉ ϫⲉϥⲥⲙⲁⲙⲁⲁⲧ ⲛϭⲓⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲡⲁⲓ ⲛⲧⲁϥⲧⲛⲛⲟⲟⲩⲧⲉ ⲙⲡϩⲟⲟⲩ ⲉⲧⲣⲉⲉⲓ ⲉϩⲟⲩⲛ ⲉϩⲣⲁⲓ

33 ⲁⲩⲱ ⲡⲟⲩⲥⲙⲟⲧ ⲥⲙⲁⲙⲁⲁⲧ ⲁⲩⲱ ⲛⲧⲟ ⲧⲉⲥⲙⲁⲙⲁⲁⲧ ⲉⲧⲉⲙⲡⲣⲕⲁⲁⲧ ⲙⲡϩⲟⲟⲩ ⲛϩⲟⲟⲩ ⲉⲡⲱϩⲧ ⲉⲃⲟⲗ ⲛⲟⲩⲥⲛⲟϥ ⲛⲁⲧⲛⲟⲃⲉ ⲁⲩⲱ ⲉⲧⲙϫⲱϩⲙ ⲛⲧⲁϭⲓϫ ⲛⲁⲓ

34 ⲁⲩⲱ ϥⲟⲛϩ ⲛϭⲓⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲡⲁⲓ ⲛⲧⲁϥⲕⲱⲗⲩⲉ ⲙⲙⲟⲓ ⲙⲡϩⲟⲟⲩ ⲉⲧⲙⲉⲓⲣⲉ ⲟⲩⲡⲉⲧϩⲟⲟⲩ ⲛⲉ ϫⲉⲉⲛⲉⲙⲡⲉⲧⲱⲟⲩⲛ ⲧⲁⲭⲏ ⲉⲉⲓ ⲉⲣⲁⲧⲉⲛⲉⲙⲛⲗⲁⲁⲩ ⲉⲛⲉⲧⲏⲡ ⲧⲏⲣⲟⲩ ⲉⲛⲁⲃⲁⲗ ⲛⲁⲥⲉⲉⲡⲉ ϣⲁⲡⲛⲁⲩ ⲛϩⲧⲟⲟⲩⲉ ⲉϥⲣⲙⲏ ⲉϩⲟⲩⲛ ⲉⲧϫⲟ

35 ⲁⲩⲱ ⲇⲁⲩⲉⲓⲇ ⲁϥϫⲓ ⲛⲧⲟⲟⲧⲥ ⲛⲉⲛⲕⲁ ⲛⲓⲙ ⲛⲧⲁⲥⲉⲛⲧⲟⲩ ⲛⲁϥ ⲁⲩⲱ ⲡⲉϫⲁϥ ⲛⲁⲥ ϫⲉⲃⲱⲕ ⲉϩⲣⲁⲓ ⲉⲡⲟⲩⲏⲓ ϩⲛⲟⲩⲉⲓⲣⲏⲛⲏ ϯϩⲧⲏ ⲁⲓⲥⲱⲧⲙ ⲅⲁⲣ ⲉⲡⲟⲩϩⲣⲟⲟⲩ ⲁⲩⲱ ⲁⲓϣⲉⲡϩⲣⲉ ⲉϩⲟⲩⲛ

36 ⲁⲃⲓⲕⲓⲁ ⲇⲉ ⲁⲥⲃⲱⲕ ⲉⲣⲁⲧϥ ⲛⲛⲁⲃⲁⲗ ⲁⲩⲱ ⲉⲓⲥ ϩⲏⲏⲧⲉ ⲛⲧⲟϥ ⲛⲉϥⲉⲓⲣⲉ ⲛⲟⲩϩⲟⲟⲡ ϩⲙⲡⲉϥⲏⲓ ⲛⲧϩⲉ ⲛⲟⲩϩⲟⲟⲡ ⲛⲣⲣⲟ ⲁⲩⲱ ⲡϩⲏⲧ ⲛⲛⲁⲃⲁⲗ ⲛⲉϥⲣⲟⲟⲩⲧ ⲉⲣⲟϥ ⲉϥⲧⲁϩⲉ ⲉⲡⲉϩⲟⲩⲟ ⲁⲃⲓⲕⲓⲁ ⲇⲉ ⲙⲡⲉⲥⲧⲁⲩⲉⲗⲁⲁⲩ ⲛϣⲁϫⲉ ⲉⲣⲟϥ ⲉⲡⲧⲏⲣϥ ϣⲁⲛⲧⲉⲡⲟⲩⲟⲉⲓⲛ ⲥⲱⲣ ⲙⲡⲉϥϩⲧⲟⲟⲩⲉ

37 ϩⲧⲟⲟⲩⲉ ⲇⲉ ⲛⲧⲉⲣⲉϥϣⲱⲡⲉ ⲁϥⲛⲏⲫⲉ ϩⲁⲡⲏⲣⲡ ⲁⲩⲱ ⲧⲉϥⲥϩⲓⲙⲉ ⲁⲥⲧⲁⲩⲟ ⲉⲣⲟϥ ⲛⲛⲉϣⲁϫⲉ ⲛⲧⲉⲣⲉϥⲥⲟⲧⲙⲟⲩ ⲇⲉ ⲁⲡⲉϥϩⲏⲧ ⲱⲙⲥ ⲉⲣⲟϥ ⲁⲩⲱ ⲛⲧⲟϥ ⲁϥⲧⲱⲥ ⲁϥⲣⲧϩⲉ ⲛⲛⲉⲓⲱⲛⲉ

38 ⲙⲛⲛⲥⲁⲙⲏⲧ ⲇⲉ ⲛϩⲟⲟⲩ ⲡϫⲟⲉⲓⲥ ⲁϥⲡⲁⲧⲁⲥⲥⲉⲓ ⲛⲁⲃⲁⲗ ⲁϥⲙⲟⲩ

39 ⲇⲁⲩⲉⲓⲇ ⲇⲉ ⲁϥⲥⲱⲧⲙ ⲡⲉϫⲁϥ ϫⲉⲡϫⲟⲉⲓⲥ ⲥⲙⲁⲙⲁⲁⲧ ⲡⲉⲛⲧⲁϥⲕⲣⲓⲛⲉ ⲙⲡⲁϩⲁⲡ ⲙⲛⲡⲁⲛⲟϭⲛⲉϭ ⲛⲧⲟⲟⲧϥ ⲛⲛⲁⲃⲁⲗ ⲁⲩⲱ ⲡⲉϥϩⲙϩⲁⲗ ⲁϥⲛⲁϩⲙⲉϥ ⲛⲧⲟⲟⲧⲟⲩ ⲛϩⲉⲛⲡⲉⲧϩⲟⲟⲩ ⲁⲩⲱ ⲧⲕⲁⲕⲓⲁ ⲛⲛⲁⲃⲁⲗ ⲡϫⲟⲉⲓⲥ ⲕⲧⲟⲥ ⲉϫⲛⲧⲉϥⲁⲡⲉ ⲁⲩⲱ ⲇⲁⲩⲉⲓⲇ ⲁϥϫⲟⲟⲩ ⲁϥϣⲁϫⲉ ⲉⲧⲃⲉⲁⲃⲓⲕⲓⲁ ⲉⲧⲣⲉⲥϣⲱⲡⲉ ⲛⲁϥ ⲛⲥϩⲓⲙⲉ

40 ⲁⲩⲱ ⲛⲉϩⲙϩⲁⲗ ⲛⲇⲁⲩⲉⲓⲇ ⲁⲩⲉⲓ ⲉⲣⲁⲧⲥ ⲛⲁⲃⲓⲕⲓⲁ ⲧⲕⲁⲣⲙⲏⲗⲟⲥ ⲁⲩϣⲁϫⲉ ⲛⲙⲙⲁⲥ ⲉⲩϫⲱ ⲙⲙⲟⲥ ϫⲉⲇⲁⲩⲉⲓⲇ ⲡⲉ ⲛⲧⲁϥⲧⲛⲛⲟⲟⲩⲛ ϣⲁⲣⲟⲉϫⲓⲧⲉ ⲛⲁϥ ⲛⲥϩⲓⲙⲉ

41 ⲁⲥⲧⲱⲟⲩⲛ ⲇⲉ ⲁⲥⲡⲁϩⲧⲥ ⲉϫⲙⲡⲕⲁϩ ⲁⲥⲟⲩⲱϣⲧ ⲉⲥϫⲱ ⲙⲙⲟⲥ ϫⲉⲉⲓⲥⲧⲉⲕϩⲙϩⲁⲗ ⲥⲃⲧⲱⲧ ⲉⲣϩⲙϩⲁⲗ ⲛⲁⲕ ⲉⲧⲣⲁⲉⲓⲁ ⲣⲁⲧⲟⲩ ⲉⲃⲟⲗ ⲛⲛⲉⲕϩⲙϩⲁⲗ

42 ⲛⲧⲉⲩⲛⲟⲩ ⲇⲉ ⲁⲃⲓⲕⲓⲁ ⲁⲥⲧⲁⲗⲉ ⲉⲧⲉⲥⲉⲱ ⲁⲩⲱ ϯ ⲛϩⲙϩⲁⲗ ⲛⲧⲁⲥ ⲁⲩⲟⲩⲁϩⲟⲩ ⲛⲥⲱⲥ ⲁⲩⲱ ⲛⲧⲟⲥ ⲁⲥⲟⲩⲁϩⲥ ⲛⲥⲁⲛⲉϩⲙϩⲁⲗ ⲛⲇⲁⲩⲉⲓⲇ ⲁⲥϣⲱⲡⲉ ⲛⲁϥ ⲛⲥϩⲓⲙⲉ

43 ⲁⲭⲓⲛⲁⲁⲃ ⲇⲉ ⲧⲉ ⲉⲃⲟⲗ ϩⲙⲡⲓⲥⲣⲁⲏⲗ ⲁⲇⲁⲩⲉⲓⲇ ϫⲓⲧⲥ ⲛⲁϥ ⲛⲥϩⲓⲙⲉ ⲁⲩⲱ ⲛⲧⲟⲟⲩ ⲛⲧⲥⲛⲧⲉ ⲛⲉⲩⲟ ⲛⲥϩⲓⲙⲉ ⲛⲁϥ

44 ⲥⲁⲟⲩⲗ ⲇⲉ ⲁϥϯ ⲙⲙⲉⲗⲭⲱⲗ ⲧⲉϥϣⲉⲉⲣⲉ ⲉⲧⲉⲧⲉⲥϩⲓⲙⲉ ⲛⲇⲁⲩⲉⲓⲇ ⲧⲉ ⲙⲫⲁⲗⲧⲓ ⲡϣⲏⲣⲉ ⲛⲁⲙⲓⲥ ⲡⲉ ⲉⲃⲟⲗ ϩⲛϩⲣⲁⲙⲙⲁ ⲉⲧⲣⲉⲥϣⲱⲡⲉ ⲛⲁϥ ⲛⲥϩⲓⲙⲉ