Read 1 Samuel 24 side by side with translations · The Final Bible
1 ⲁⲩⲱ ⲇⲁⲩⲉⲓⲇ ⲁϥⲉⲓ ⲉϩⲣⲁⲓ ϩⲙⲡⲙⲁ ⲉⲧⲙⲙⲁⲩ ⲁϥϩⲙⲟⲟⲥ ϩⲛⲛⲙⲁ ⲉⲧϩⲉϫϩⲱϫ ϩⲛⲅⲁⲇⲇⲓ
2 ⲁⲥϣⲱⲡⲉ ⲇⲉ ⲛⲧⲉⲣⲉⲥⲁⲟⲩⲗ ⲕⲟⲧϥ ⲉⲃⲟⲗ ϩⲛⲛⲁⲗⲗⲟⲫⲩⲗⲟⲥ ⲁⲩϫⲓ ⲡⲟⲩⲱ ⲛⲁϥ ⲉⲩϫⲱ ⲙⲙⲟⲥ ϫⲉⲉⲓⲥⲇⲁⲩⲉⲓⲇ ϩⲛⲧⲉⲣⲏⲙⲟⲥ ⲛⲅⲁⲇⲇⲓ
3 ⲁⲩⲱ ⲁϥϫⲓ ⲛⲙⲙⲁϥ ⲛϣⲟⲙⲛⲧ ⲛϣⲟ ⲛⲣⲱⲙⲉ ⲛⲥⲱⲧⲡ ⲉⲃⲟⲗ ϩⲙⲡⲓⲥⲣⲁⲏⲗ ⲧⲏⲣϥ ⲁϥⲃⲱⲕ ⲉⲕⲱⲧⲉ ⲛⲥⲁⲇⲁⲩⲉⲓⲇ ⲙⲛⲛⲉϥⲣⲱⲙⲉ ⲉⲧⲛⲙⲙⲁϥ ϩⲣⲁⲓ ϩⲙⲡⲕⲁϩ ⲛⲥⲁⲧⲉⲙ ⲉⲧⲉⲡⲙⲁ ⲡⲉ ⲛⲧϭⲟⲣϭⲥ ⲛⲛⲉⲓⲟⲩⲗ
4 ⲁϥⲉⲓ ⲉϩⲣⲁⲓ ⲉϫⲛⲛⲁⲅⲉⲗⲏ ⲛⲛⲉϣⲟⲟⲥ ⲉⲧϩⲛⲧⲉϩⲓⲏ ⲛⲉⲣⲉⲟⲩⲙϩⲁⲁⲩ ⲇⲉ ϩⲙⲡⲙⲁ ⲉⲧⲙⲙⲁⲩ ⲁⲩⲱ ⲥⲁⲟⲩⲗ ⲁϥⲃⲱⲕ ⲉϩⲟⲩⲛ ⲉⲣⲟϥ ⲉⲥⲉⲛⲣⲁⲧϥ ⲇⲁⲩⲉⲓⲇ ⲇⲉ ⲙⲛⲛⲉϥⲣⲱⲙⲉ ⲛⲉⲩϩⲙⲟⲟⲥ ⲛⲥⲁⲟⲩⲛⲁⲙ ⲙⲡⲉⲙϩⲁⲁⲩ
5 ⲛⲣⲱⲙⲉ ⲇⲉ ⲛⲇⲁⲩⲉⲓⲇ ⲡⲉϫⲁⲩ ⲛⲁϥ ϫⲉⲉⲓⲥⲡⲁⲓ ⲡⲉ ⲡⲉϩⲟⲟⲩ ⲛⲧⲁⲡϫⲟⲉⲓⲥ ϫⲟⲟⲥ ⲛⲁⲕ ⲉⲧⲃⲏⲏⲧϥ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲛⲁϯ ⲙⲡⲉⲕϫⲁϫⲉ ⲉϩⲣⲁⲓ ⲉⲛⲉⲕϭⲓϫ ⲛⲅⲉⲓⲣⲉ ⲛⲁϥ ⲕⲁⲧⲁⲡⲁⲅⲁⲑⲟⲛ ⲉⲧⲛⲁϣⲱⲡⲉ ⲛⲁϩⲣⲟⲕ ⲇⲁⲩⲉⲓⲇ ⲇⲉ ⲁϥⲧⲱⲟⲩⲛ ⲁϥϣⲱϥ ⲙⲡⲧⲁⲡ ⲛⲧⲉϥⲇⲓⲡⲗⲱⲉⲓⲥ ⲙⲡⲉⲥⲁⲟⲩⲗ ⲉⲓⲙⲉ
6 ⲁⲥϣⲱⲡⲉ ⲇⲉ ⲙⲛⲛⲥⲁⲛⲁⲓ ⲡϩⲏⲧ ⲛⲇⲁⲩⲉⲓⲇ ⲁϥⲙⲕⲁϩ ⲉⲣⲟϥ ⲉⲧⲃⲉϫⲉⲁϥϣⲱϥ ⲙⲡⲧⲁⲡ ⲛⲧⲉⲭⲗⲁⲙⲩⲥ ⲛⲥⲁⲟⲩⲗ
7 ⲡⲉϫⲉⲇⲁⲩⲉⲓⲇ ⲛⲛⲉϥⲣⲱⲙⲉ ϫⲉⲛⲛⲉⲡⲉⲓϩⲱⲃ ϣⲱⲡⲉ ⲙⲙⲟⲓ ⲛⲧⲟⲟⲧϥ ⲙⲡϫⲟⲉⲓⲥ ⲉⲧⲣⲁⲓⲣⲉ ⲙⲡⲉⲓϣⲁϫⲉ ⲙⲡϫⲟⲉⲓⲥ ⲙⲡⲉⲭⲣⲓⲥⲧⲟⲥ ⲙⲡϫⲟⲉⲓⲥ
8 ⲁⲩⲱ ⲇⲁⲩⲉⲓⲇ ⲁϥⲡⲉⲓⲑⲉ ⲛⲛⲉϥⲣⲱⲙⲉ ϩⲙⲡⲉⲓϣⲁϫⲉ ⲙⲡⲉϥϯⲧϩⲉ ⲛⲁⲩ ⲉⲧⲱⲟⲩⲛ ⲉⲙⲉⲟⲩⲧⲥⲁⲟⲩⲗ ⲥⲁⲟⲩⲗ ⲇⲉ ⲁϥⲧⲱⲟⲩⲛ ⲁϥⲉⲓ ⲉⲃⲟⲗ ⲉⲧⲉϥϩⲓⲏ
9 ⲁⲩⲱ ⲇⲁⲩⲉⲓⲇ ⲁϥⲉⲓ ⲉⲃⲟⲗ ⲙⲛⲛⲥⲱϥ ϩⲙⲡⲉⲙϩⲁⲁⲩ ⲁⲇⲁⲩⲉⲓⲇ ⲱϣ ⲉⲃⲟⲗ ϩⲓⲡⲁϩⲟⲩ ⲛⲥⲁⲟⲩⲗ ⲉϥϫⲱ ⲙⲙⲟⲥ ϫⲉⲡⲁϫⲟⲉⲓⲥ ⲡⲣⲣⲟ ⲥⲁⲟⲩⲗ ⲇⲉ ⲁϥⲕⲟⲧϥ ⲉⲡⲁϩⲟⲩ ⲁⲩⲱ ⲇⲁⲩⲉⲓⲇ ⲁϥⲡⲁϩⲧϥ ⲉϫⲙⲡⲉϥϩⲟ ⲉϫⲙⲡⲕⲁϩ ⲁϥⲟⲩⲱϣⲧ ⲛⲁϥ
10 ⲁⲩⲱ ⲡⲉϫⲉⲇⲁⲩⲉⲓⲇ ⲛⲥⲁⲟⲩⲗ ϫⲉⲉⲧⲃⲉⲟⲩ ⲕⲥⲱⲧⲙ ⲛⲥⲁⲛⲉϣⲁϫⲉ ⲙⲡⲗⲁⲟⲥ ⲉⲩϫⲱ ⲙⲙⲟⲥ ⲛⲁⲕ ϫⲉⲉⲓⲥⲇⲁⲩⲉⲓⲇ ⲕⲱⲧⲉ ⲛⲥⲁⲧⲉⲕⲯⲩⲭⲏ ⲉϥⲓⲧⲥ
11 ⲉⲓⲥ ϩⲏⲏⲧⲉ ϭⲉ ϩⲙⲡϩⲟⲟⲩ ⲛϩⲟⲟⲩ ⲁⲛⲉⲕⲃⲁⲗ ⲛⲁⲩ ⲉⲧϩⲉ ⲛⲧⲁⲡϫⲟⲉⲓⲥ ⲧⲁⲁⲕ ⲉⲧⲟⲟⲧⲙⲡϩⲟⲟⲩ ϩⲙⲡⲉⲙϩⲁⲁⲩ ⲁⲩⲱ ⲙⲡⲓⲟⲩⲱϣ ⲉⲙⲟⲟⲩⲧⲕ ⲁⲗⲗⲁ ⲁⲓϯⲥⲟ ⲉⲣⲟⲕ ⲉⲁⲓϫⲟⲟⲥ ϫⲉⲛϯⲛⲁⲉⲛⲧⲟⲟⲧ ⲁⲛ ⲉϫⲙⲡⲁϫⲟⲉⲓⲥ ϫⲉⲡⲁⲓ ⲡϫⲟⲉⲓⲥ ⲁϥⲧⲁϩⲥϥ
12 ⲁⲩⲱ ⲉⲓⲥ ⲡⲧⲁⲡ ⲛⲧⲉⲕⲭⲗⲁⲙⲩⲥ ϩⲛⲛⲁϭⲓϫ ⲁⲛⲟⲕ ⲁⲓϥⲓⲧϥ ⲁⲩⲱ ⲙⲡⲓⲙⲟⲟⲩⲧⲕ ⲉⲓⲙⲉ ϭⲉ ⲛⲅⲛⲁⲩ ⲙⲡϩⲟⲟⲩ ϫⲉⲙⲛⲕⲁⲕⲓⲁ ⲗⲁⲁⲩ ⲛⲧⲟⲟⲧⲉϩⲟⲩⲛ ⲉⲣⲟⲕ ⲟⲩⲇⲉ ⲙⲛⲧϣⲁⲛⲧⲉ ⲟⲩⲇⲉ ⲛⲉⲓⲁϩⲉ ⲁⲛ ⲉⲃⲟⲗ ⲉⲣⲟⲕ ⲙⲡⲓⲣⲛⲟⲃⲉ ⲉⲣⲟⲕ ⲛⲧⲟⲕ ⲇⲉ ⲉⲕⲑⲉⲙⲕⲟ ⲛⲧⲁⲯⲩⲭⲏ ⲉϥⲓⲧⲥ
13 ⲉⲣⲉⲡϫⲟⲉⲓⲥ ϯϩⲁⲡ ⲟⲩⲧⲱⲕ ⲟⲩⲧⲱⲓ ⲛⲧⲉⲡϫⲟⲉⲓⲥ ⲣⲡⲁⲕⲃⲁ ⲛⲙⲙⲁⲕ ⲁⲩⲱ ⲧⲁϭⲓϫ ⲛⲁⲉⲓ ⲁⲛ ⲉϫⲱⲕ
14 ⲕⲁⲧⲁⲧϩⲉ ⲉϣⲁⲩⲧⲁⲩⲉⲧⲉⲓⲡⲁⲣⲁⲃⲟⲗⲏ ⲛⲁⲣⲭⲁⲓⲟⲛ ϫⲉⲉⲣⲉⲡⲛⲟⲃⲉ ⲛⲁⲉⲓ ⲉⲃⲟⲗ ϩⲛⲛⲁⲛⲟⲙⲟⲥ ⲁⲩⲱ ⲧⲁϭⲓϫ ⲛⲁⲉⲓ ⲁⲛ ⲉϫⲱⲕ
15 ⲧⲉⲛⲟⲩ ϭⲉ ⲛⲧⲟⲕ ⲡⲣⲣⲟ ⲙⲡⲓⲥⲣⲁⲏⲗ ⲉⲕⲕⲱⲧⲉ ⲛⲥⲁⲛⲓⲙ ⲁⲩⲱ ⲉⲕⲡⲏⲧ ⲛⲧⲟⲕ ⲛⲥⲁⲟⲩⲁϣ ⲙⲙⲓⲛⲉ ⲉⲕⲡⲏⲧ ⲛⲧⲟⲕ ⲛⲥⲁⲟⲩϩⲟⲣ ⲉϥⲙⲟⲟⲩⲧ ⲁⲩⲱ ⲉⲕⲡⲏⲧ ⲛⲥⲁⲟⲩⲡⲏⲓ ⲛⲟⲩⲱⲧ
16 ⲡϫⲟⲉⲓⲥ ⲉϥⲉϣⲱⲡⲉ ⲛⲕⲣⲓⲧⲏⲥ ⲁⲩⲱ ⲛⲇⲓⲕⲁⲥⲧⲏⲥ ⲟⲩⲧⲱⲓ ⲟⲩⲧⲱⲕ ⲡϫⲟⲉⲓⲥ ⲉϥⲉϭⲱϣⲧ ⲛϥⲕⲣⲓⲛⲉ ⲙⲡⲁϩⲁⲡ ⲁⲩⲱ ⲛϥϩⲙⲟⲟⲥ ⲉϩⲣⲁⲓ ⲛⲙⲙⲁⲕ
17 ⲛⲧⲉⲣⲉⲇⲁⲩⲉⲓⲇ ⲇⲉ ⲟⲩⲱ ⲉϥⲧⲁⲩⲟ ⲛⲛⲉⲓϣⲁϫⲉ ⲉϩⲟⲩⲛ ϩⲛⲥⲁⲟⲩⲗ ⲡⲉϫⲉⲥⲁⲟⲩⲗ ⲛⲁϥ ϫⲉⲧⲉⲕⲥⲙⲏ ⲧⲉ ⲧⲁⲓ ⲡⲁϣⲏⲣⲉ ⲇⲁⲩⲉⲓⲇ ⲁⲩⲱ ⲥⲁⲟⲩⲗ ⲁϥϥⲓ ϩⲣⲁϥ ⲉⲃⲟⲗ ⲁϥⲣⲓⲙⲉ
18 ⲡⲉϫⲁϥ ⲛⲇⲁⲩⲉⲓⲇ ϫⲉⲕⲙⲁⲓⲏⲩ ⲛⲧⲟⲕ ⲡⲁϣⲏⲣⲉ ⲉϩⲟⲩⲉ ⲉⲣⲟⲓ ϫⲉⲛⲧⲟⲕ ⲙⲉⲛ ⲁⲕⲧⲱⲱⲃⲉ ⲛⲁⲓ ⲛϩⲉⲛⲡⲉⲧⲛⲁⲛⲟⲩⲟⲩ ⲁⲛⲟⲕ ⲇⲉ ⲁⲓⲧⲱⲱⲃⲉ ⲛⲁⲕ ⲛϩⲉⲛⲡⲉⲧϩⲟⲟⲩ
19 ⲙⲡϩⲟⲟⲩ ⲟⲛ ⲁⲕⲧⲁⲙⲟⲓ ⲉⲡⲁⲅⲁⲑⲟⲛ ⲛⲧⲁⲕⲁⲁϥ ⲛⲁⲓ ⲛⲧϩⲉ ⲛⲧⲁⲡϫⲟⲉⲓⲥ ⲧⲁⲁⲧ ⲉϩⲣⲁⲓ ⲉⲛⲉⲕϭⲓϫ ⲁⲩⲱ ⲙⲡⲉⲕⲧⲱⲟⲩⲛ ⲉⲙⲟⲟⲩⲧ
20 ⲁⲩⲱ ⲉⲣϣⲁⲛⲟⲩⲁ ϩⲉ ⲉⲡⲉϥϫⲁϫⲉ ϩⲛⲟⲩⲑⲗⲓⲯⲓⲥ ⲛϥⲟⲩⲟⲟⲧϥ ⲉⲃⲟⲗ ϩⲛⲟⲩϩⲓⲏ ⲉⲛⲁⲛⲟⲩⲥ ⲡϫⲟⲉⲓⲥ ⲛⲁⲧⲱⲱⲃⲉ ⲛⲁϥ ⲛϩⲉⲛⲡⲉⲧⲛⲁⲛⲟⲩⲟⲩ ⲕⲁⲧⲁⲧϩⲉ ⲛⲧⲟⲕ ⲛⲧⲁⲕⲣⲡⲡⲉⲧⲛⲁⲛⲟⲩϥ ⲙⲡϩⲟⲟⲩ
21 ⲧⲉⲛⲟⲩ ϭⲉ ⲉⲓⲥ ϩⲏⲏⲧⲉ ϯⲥⲟⲟⲩⲛ ϫⲉϩⲛⲟⲩⲙⲛⲧⲣⲣⲟ ⲕⲛⲁⲣⲣⲣⲟ ⲁⲩⲱ ⲧⲙⲛⲧⲣⲣⲟ ⲙⲡⲓⲥⲣⲁⲏⲗ ⲛⲁⲁϩⲉⲣⲁⲧⲥ ϩⲛⲛⲉⲕϭⲓϫ
22 ⲧⲉⲛⲟⲩ ϭⲉ ⲱⲣⲕ ⲛⲁⲓ ⲙⲡϫⲟⲉⲓⲥ ϫⲉⲛⲅⲛⲁⲃⲱⲧⲉ ⲉⲃⲟⲗ ⲁⲛ ⲙⲡⲁⲥⲡⲉⲣⲙⲁ ⲙⲛⲛⲥⲱⲓ ⲁⲩⲱ ϫⲉⲛⲅⲛⲁⲧⲁⲕⲟ ⲁⲛ ⲙⲡⲁⲣⲁⲛ ⲉⲃⲟⲗ ϩⲙⲡⲏⲓ ⲙⲡⲁⲉⲓⲱⲧ
23 ⲁⲩⲱ ⲇⲁⲩⲉⲓⲇ ⲁϥⲱⲣⲕ ⲛⲥⲁⲟⲩⲗ ⲥⲁⲟⲩⲗ ⲇⲉ ⲁϥⲃⲱⲕ ⲉϩⲣⲁⲓ ⲉⲡⲉϥⲙⲁ ⲁⲩⲱ ⲇⲁⲩⲉⲓⲇ ⲙⲛⲛⲉϥⲣⲱⲙⲉ ⲁⲩⲃⲱⲕ ⲉϩⲣⲁⲓ ⲉⲙⲉⲥⲥⲁⲣⲁ ⲧⲉⲧϭⲏⲩ
1 Samuel 23 · 1 Samuel 25 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)