1 Samuel 23 — Coptic (Sahidic)

1 ⲁⲩϫⲓⲡⲟⲩⲱ ⲇⲉ ⲛⲇⲁⲩⲉⲓⲇ ⲉⲩϫⲱ ⲙⲙⲟⲥ ϫⲉⲉⲓⲥⲛⲁⲗⲗⲟⲫⲩⲗⲟⲥ ⲥⲉⲡⲟⲗⲉⲙⲉⲓ ⲙⲛⲕⲉⲉⲓⲗⲁ ⲁⲩⲱ ⲛⲧⲟⲟⲩ ⲥⲉⲧⲱⲣⲡ ⲛⲛⲉⲩϫⲛⲟⲟⲩ ⲥⲉϩⲱⲙ ⲙⲙⲟⲟⲩ ⲛⲁⲩ

2 ⲇⲁⲩⲉⲓⲇ ⲇⲉ ⲁϥϫⲛⲉⲡϫⲟⲉⲓⲥ ⲉϥϫⲱ ⲙⲙⲟⲥ ϫⲉⲉⲛⲉⲛⲧⲁⲛⲡⲱⲧ ⲉⲣⲁⲧⲟⲩ ⲛⲛⲁⲗⲗⲟⲫⲩⲗⲟⲥ ⲉⲧⲣⲁⲡⲁⲧⲁⲥⲥⲉⲓ ⲙⲙⲟⲟⲩ ⲡⲉϫⲉⲡϫⲟⲉⲓⲥ ⲛⲇⲁⲩⲉⲓⲇ ϫⲉⲃⲱⲕ ⲁⲩⲱ ⲕⲛⲁⲡⲁⲧⲁⲥⲥⲉⲓ ⲛⲛⲁⲗⲗⲟⲫⲩⲗⲟⲥ ⲛⲅⲧⲟⲩϫⲉⲧⲕⲉⲉⲓⲗⲁ

3 ⲛⲣⲱⲙⲉ ⲇⲉ ⲛⲇⲁⲩⲉⲓⲇ ⲡⲉϫⲁⲩ ⲉϩⲟⲩⲛ ⲉϩⲣⲁϥ ϫⲉⲉⲓⲥϩⲏⲏⲧⲉ ⲁⲛⲟⲛ ⲉⲛϩⲙⲡⲉⲓⲙⲁ ϩⲛϯⲟⲩⲇⲁⲓⲁ ⲧⲉⲛⲣϩⲟⲧⲉ ⲁⲩⲱ ⲁϣ ⲧⲉ ⲧϩⲉ ⲉⲧⲛⲁϣⲱⲡⲉ ⲙⲙⲟⲛ ⲉⲛϣⲁⲛⲃⲱⲕ ⲉϩⲣⲁⲓ ⲉⲧⲕⲉⲉⲓⲗⲁ ⲛⲧⲉⲛⲧⲁⲁⲛ ⲉϩⲟⲩⲛ ⲉⲛϣⲱⲗ ⲛⲧⲉⲛⲁⲗⲗⲟⲫⲩⲗⲟⲥ

4 ⲇⲁⲩⲉⲓⲇ ⲟⲛ ⲁϥⲟⲩⲱϩ ⲉⲧⲟⲟⲧϥ ⲉϫⲛⲉⲡϫⲟⲉⲓⲥ ⲁⲩⲱ ⲡϫⲟⲉⲓⲥ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲁϥ ϫⲉⲧⲱⲟⲩⲛ ⲛⲅⲃⲱⲕ ⲉϩⲣⲁⲓ ⲉⲧⲕⲉⲉⲓⲗⲁ ϫⲉⲁⲛⲟⲕ ⲡⲉⲧⲛⲁϯ ⲛⲛⲁⲗⲗⲟⲫⲩⲗⲟⲥ ⲉϩⲣⲁⲓ ⲉⲛⲉⲕϭⲓϫ

5 ⲇⲁⲩⲉⲓⲇ ⲇⲉ ⲁϥⲃⲱⲕ ⲙⲛⲛⲉϥⲣⲱⲙⲉ ⲉϩⲣⲁⲓ ⲉⲧⲕⲉⲉⲓⲗⲁ ⲁⲩⲡⲟⲗⲉⲙⲉⲓ ⲙⲛⲛⲁⲗⲗⲟⲫⲩⲗⲟⲥ ⲛⲁⲗⲗⲟⲫⲩⲗⲟⲥ ⲇⲉ ⲁⲩⲡⲱⲧ ϩⲁⲧⲉⲩϩⲏ ⲇⲁⲩⲉⲓⲇ ⲇⲉ ⲁϥϥⲓ ⲛⲛⲉⲩⲧⲃⲛⲟⲟⲩⲉ ⲁⲩⲱ ⲁϥⲡⲁⲧⲁⲥⲥⲉⲓ ⲙⲙⲟⲟⲩ ϩⲛⲟⲩⲛⲟϭ ⲙⲡⲗⲏⲅⲏ ⲇⲁⲩⲉⲓⲇ ⲇⲉ ⲁϥⲧⲟⲩϫⲟ ⲛⲛⲉⲧⲟⲩⲏϩ ϩⲛⲧⲕⲉⲉⲓⲗⲁ

6 ⲛⲧⲉⲣⲉϥⲃⲱⲕ ⲇⲉ ⲛϭⲓⲁⲃⲓⲁⲑⲁⲣ ⲡϣⲏⲣⲉ ⲛⲁⲭⲓⲙⲉⲗⲉⲭ ⲉⲣⲁⲧϥ ⲛⲇⲁⲩⲉⲓⲇ ⲛⲧⲟϥ ϩⲱⲱϥ ⲁϥⲃⲱⲕ ⲉϩⲣⲁⲓ ⲉⲧⲕⲉⲉⲓⲗⲁ ⲙⲛⲇⲁⲩⲉⲓⲇ ⲉⲣⲉⲡⲉⲫⲟⲩⲇ ϩⲛⲧⲉϥϭⲓϫ

7 ⲥⲁⲟⲩⲗ ⲇⲉ ⲁⲩⲧⲁⲙⲟϥ ϫⲉⲁⲇⲁⲩⲉⲓⲇ ⲉⲓ ⲉϩⲣⲁⲓ ⲉⲧⲕⲉⲉⲓⲗⲁ ⲡⲉϫⲉⲥⲁⲟⲩⲗ ϫⲉⲁⲡⲛⲟⲩⲧⲉ ⲧⲁⲁϥ ⲉϩⲣⲁⲓ ⲉⲛⲁϭⲓϫ ϫⲉⲁϥϩⲱⲛ ⲉϩⲟⲩⲛ ⲛⲧⲉⲣⲉϥⲃⲱⲕ ⲉϩⲟⲩⲛ ⲉⲩⲡⲟⲗⲓⲥ ⲉⲥⲟⲣϫ ⲛⲣⲟ ϩⲓⲙⲟⲭⲗⲟⲥ

8 ⲥⲁⲟⲩⲗ ⲇⲉ ⲁϥϩⲱⲛ ⲉⲧⲟⲟⲧϥ ⲙⲡⲉϥⲗⲁⲟⲥ ⲧⲏⲣϥ ⲉⲡⲡⲟⲗⲉⲙⲟⲥ ⲉⲧⲣⲉⲩⲃⲱⲕ ⲉϩⲣⲁⲓ ⲉⲧⲕⲉⲉⲓⲗⲁ ⲉϭⲱⲡⲉ ⲛⲇⲁⲩⲉⲓⲇ ⲙⲛⲛⲉϥⲣⲱⲙⲉ ⲉⲧⲛⲙⲙⲁϥ

9 ⲇⲁⲩⲉⲓⲇ ⲇⲉ ⲛⲧⲉⲣⲉϥⲉⲓⲙⲉ ϫⲉⲛⲥⲁⲟⲩⲗ ⲛⲁⲟⲃϣϥ ⲁⲛ ⲉⲧⲕⲁⲕⲓⲁ ⲉⲧⲉⲟⲩⲉⲛⲧⲁϥⲥⲉ ⲉϩⲟⲩⲛ ⲉⲣⲟϥ ⲡⲉϫⲉⲇⲁⲩⲉⲓⲇ ⲛⲁⲃⲓⲁⲑⲁⲣ ⲡⲟⲩⲏⲏⲃ ϫⲉⲁⲩⲉⲡⲉⲫⲟⲩⲇ ⲙⲡϫⲟⲉⲓⲥ ⲉⲡⲉⲓⲙⲁ

10 ⲁⲩⲱ ⲡⲉϫⲉⲇⲁⲩⲉⲓⲇ ϫⲉⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ϩⲛⲟⲩⲥⲱⲧⲙ ⲁⲡⲉⲕϩⲙϩⲁⲗ ⲥⲱⲧⲙ ϫⲉⲥⲁⲟⲩⲗ ⲕⲱⲧⲉ ⲛⲥⲁⲧϩⲉ ⲉⲉⲓ ⲉϩⲣⲁⲓ ⲉⲧⲕⲉⲉⲓⲗⲁ ⲉⲧⲁⲕⲉⲧⲡⲟⲗⲓⲥ ⲉⲧⲃⲏⲏⲧ

11 ⲉⲛⲉⲥⲉⲛⲁⲧⲁⲁⲥ ⲉϩⲣⲁⲓ ⲉⲧⲟⲟⲧϥ ⲁⲩⲱ ⲧⲉⲛⲟⲩ ⲉⲛⲉⲥⲁⲟⲩⲗ ⲛⲁⲉⲓ ⲉϩⲣⲁⲓ ⲉⲡⲉⲓⲙⲁ ⲕⲁⲧⲁⲧϩⲉ ⲛⲧⲁⲡⲉⲕϩⲙϩⲁⲗ ⲥⲱⲧⲙ ⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲁⲓⲟ ⲧⲁⲙⲉⲡⲉⲕϩⲙϩⲁⲗ

12 ⲡⲉϫⲉⲡϫⲟⲉⲓⲥ ϫⲉⲥⲉⲛⲁⲧⲁⲁⲥ

13 ⲇⲁⲩⲉⲓⲇ ⲇⲉ ⲁϥⲧⲱⲟⲩⲛ ⲙⲛⲛⲉϥⲣⲱⲙⲉ ⲉⲩⲛⲁⲣϥⲧⲟⲟⲩ ⲛϣⲉ ⲛⲣⲱⲙⲉ ⲁⲩⲉⲓ ⲉⲃⲟⲗ ϩⲛⲧⲕⲉⲉⲓⲗⲁ ⲁⲩⲙⲟⲟϣⲉ ⲉⲡⲙⲁ ⲉⲧⲟⲩⲛⲁⲃⲱⲕ ⲉⲣⲟϥ

14 ⲁⲩⲱ ⲇⲁⲩⲉⲓⲇ ⲁϥϩⲙⲟⲟⲥ ϩⲛⲧⲉⲣⲏⲙⲟⲥ ϩⲙⲡⲧⲟⲟⲩ ⲛⲥⲓⲫ ϩⲙⲡⲧⲟⲟⲩ ⲉⲧⲣⲟⲕϩ ϩⲙⲡⲧⲟⲟⲩ ⲉⲧⲛⲁϣⲧ ⲁⲩⲱ ⲥⲁⲟⲩⲗ ⲛⲉϥⲕⲱⲧⲉ ⲛⲥⲱϥ ϩⲛϩⲟⲟⲩ ⲛⲓⲙ ⲙⲡⲉⲡϫⲟⲉⲓⲥ ⲇⲉ ⲧⲁⲁϥ ⲉϩⲣⲁⲓ ⲉⲧⲟⲟⲧϥ

15 ⲇⲁⲩⲉⲓⲇ ⲇⲉ ⲁϥⲉⲓⲙⲉ ϫⲉⲥⲁⲟⲩⲗ ⲛⲁⲉⲓ ⲉⲃⲟⲗ ⲉⲕⲱⲧⲉ ⲛⲥⲱϥ ⲁⲩⲱ ⲇⲁⲩⲉⲓⲇ ⲛⲉϥϩⲛⲡⲧⲟⲟⲩ ⲉⲧⲛⲁϣⲧ ϩⲙⲡⲙⲁ ⲛⲃⲣⲣⲉ ⲛⲥⲓⲫ

16 ⲓⲱⲛⲁⲑⲁⲛ ⲇⲉ ⲡϣⲏⲣⲉ ⲛⲥⲁⲟⲩⲗ ⲁϥⲧⲱⲟⲩⲛ ⲁϥⲃⲱⲕ ⲉⲣⲁⲧϥ ⲛⲇⲁⲩⲉⲓⲇ ⲉϩⲣⲁⲓ ⲉⲧⲕⲁⲓⲛⲏ ⲁϥⲧⲁϫⲣⲉⲧⲟⲟⲧϥ ⲛⲙⲙⲁϥ ϩⲙⲡϫⲟⲉⲓⲥ

17 ⲉϥϫⲱ ⲙⲙⲟⲥ ⲛⲁϥ ϫⲉⲙⲡⲣⲣϩⲟⲧⲉ ⲛⲧϭⲓϫ ⲛⲥⲁⲟⲩⲗ ⲡⲁⲉⲓⲱⲧ ⲛⲁϩⲉ ⲉⲣⲟⲕ ⲁⲛ ⲁⲗⲗⲁ ⲛⲧⲟⲕ ⲡⲉⲧⲛⲁⲣⲣⲣⲟ ⲉϫⲙⲡⲓⲥⲣⲁⲏⲗ ⲁⲛⲟⲕ ϩⲱ ⲛⲧⲁϣⲱⲡⲉ ⲛⲁⲕ ⲙⲙⲉϩⲥⲛⲁⲩ ϩⲓⲧⲟⲩⲱⲕ ⲁⲩⲱ ⲥⲁⲟⲩⲗ ⲡⲁⲉⲓⲱⲧ ⲥⲟⲟⲩⲛ ⲙⲡⲉⲓⲧⲱϣ

18 ⲛⲧⲟⲟⲩ ⲇⲉ ϩⲓⲟⲩⲥⲟⲡ ⲁⲩⲥⲙⲛⲇⲓⲁⲑⲏⲕⲏ ⲙⲛⲛⲉⲩⲉⲣⲏⲩ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲇⲁⲩⲉⲓⲇ ⲛⲉϥϩⲙⲟⲟⲥ ϩⲛⲧⲕⲁⲓⲛⲏ ⲓⲱⲛⲁⲑⲁⲛ ⲇⲉ ⲁϥⲃⲱⲕ ⲉϩⲣⲁⲓ ⲉⲡⲉϥⲏⲓ

19 ⲛⲣⲱⲙⲉ ⲇⲉ ⲛⲥⲓⲫ ⲁⲩⲉⲓ ⲉϩⲣⲁⲓ ϩⲙⲡⲕⲁϩ ⲉⲧⲛⲁϣⲧ ⲉⲣⲁⲧϥ ⲛⲥⲁⲟⲩⲗ ⲉⲡⲃⲟⲩⲛⲟⲥ ⲉⲩϫⲱ ⲙⲙⲟⲥ ⲛⲁϥ ϫⲉⲉⲓⲥⲇⲁⲩⲉⲓⲇ ⲕⲏⲡ ϩⲁⲧⲛϩⲙⲙⲁⲥⲥⲁⲣⲁ ϩⲙⲡⲙⲁ ⲉⲧϩⲉϫϩⲱϫ ϩⲛⲧⲕⲁⲓⲛⲏ ϩⲙⲡⲃⲟⲩⲛⲟⲥ ⲛⲓⲉⲭⲉⲗⲗⲁⲇ ⲡⲉⲧⲥⲁⲟⲩⲛⲁⲙ ⲛⲓⲉⲥⲥⲉⲙⲟⲩ ⲉⲧⲉⲡⲧⲟⲟⲩ ⲡⲉ

20 ⲧⲉⲛⲟⲩ ϭⲉ ⲡⲟⲩⲱϣ ⲛⲧⲉⲯⲩⲭⲏ ⲙⲡⲣⲣⲟ ⲁⲣⲓϥ ⲁⲩⲱ ⲙⲁⲣⲉⲡⲣⲣⲟ ⲧⲱⲟⲩⲛ ⲛϥⲉⲓ ⲛⲙⲙⲁⲛ ⲁⲛⲟⲛ ⲅⲁⲣ ⲛⲉⲕϩⲙϩⲁⲗ ⲁⲛⲟⲣⲃⲉϥ ⲉϩⲟⲩⲛ ⲉⲧⲁⲁϥ ⲉϩⲣⲁⲓ ⲉⲧⲟⲟⲧϥ ⲙⲡⲣⲣⲟ

21 ⲡⲉϫⲉⲥⲁⲟⲩⲗ ⲛⲁⲩ ϫⲉⲧⲉⲧⲛⲥⲙⲁⲙⲁⲁⲧ ⲛⲧⲱⲧⲛ ⲛⲧⲟⲟⲧϥ ⲙⲡϫⲟⲉⲓⲥ ϫⲉⲁⲧⲉⲧⲛⲙⲕⲁϩ ⲛϩⲏⲧ ⲛⲧⲱⲧⲛ ϩⲁⲣⲟⲓ

22 ⲃⲱⲕ ϭⲉ ⲛⲧⲉⲧⲛϯϩⲧⲏⲧⲛ ⲛⲧⲉⲧⲛⲉⲓⲙⲉ ⲟⲛ ⲉⲡⲙⲁ ⲧⲁⲭⲏ ⲉⲣⲉⲣⲁⲧϥ ⲥⲙⲟⲛⲧ ⲛϩⲏⲧϥ ⲡⲙⲁ ⲛⲧⲁⲧⲉⲧⲛϫⲟⲟⲥ ⲉⲧⲃⲏⲏⲧϥ ⲙⲏⲡⲟⲧⲉ ⲟⲛ ⲛϥⲉⲓⲣⲉ ⲛⲟⲩⲙⲛⲧⲕⲣⲟϥ

23 ⲁⲛⲁⲩ ϭⲉ ⲛⲧⲉⲧⲛⲉⲓⲙⲉ ⲁⲩⲱ ϯⲛⲁⲉⲓ ⲛⲙⲙⲏⲧⲛ ⲉϣⲱⲡⲉ ϭⲉ ϥϩⲓϫⲙ ⲡⲕⲁϩ ϯⲛⲁϩⲟⲧϩⲉⲧ ⲛⲥⲱϥ ϩⲛⲛⲁⲛⲧⲁϣ ⲧⲏⲣⲟⲩ ⲛⲧⲉⲙⲙⲏⲏϣⲉ ⲛⲓⲟⲩⲇⲁ

24 ⲁⲩⲱ ⲛⲣⲱⲙⲉ ⲛⲥⲓⲫⲉⲩⲥ ⲁⲩⲧⲱⲟⲩⲛ ⲁⲩⲉⲓ ⲉⲃⲟⲗ ϩⲓⲧϩⲏ ⲛⲥⲁⲟⲩⲗ ⲇⲁⲩⲉⲓⲇ ⲇⲉ ⲙⲛⲛⲉϥⲣⲱⲙⲉ ⲛⲉⲩϩⲛⲧⲉⲣⲏⲙⲟⲥ ⲙⲙⲁⲁⲛ ϩⲙⲡⲙⲁ ⲛϩⲱⲧⲡ ⲛⲥⲁⲟⲩⲛⲁⲙ ⲛⲓⲉⲥⲥⲉⲙⲟⲩⲛ

25 ⲁⲩⲱ ⲥⲁⲟⲩⲗ ⲙⲛⲛⲉϥⲣⲱⲙⲉ ⲁⲩⲃⲱⲕ ⲉϯⲟⲩⲟⲓ ⲛⲥⲱϥ ⲁⲩⲧⲁⲙⲉⲇⲁⲇ ⲇⲉ ⲁϥⲧⲱⲟⲩⲛ ⲁϥⲃⲱⲕ ⲉϩⲣⲁⲓ ⲉⲧⲡⲉⲧⲣⲁ ⲉⲧϩⲛⲧⲉⲣⲏⲙⲟⲥ ⲙⲙⲁⲁⲛ ⲁⲩⲱ ⲥⲁⲟⲩⲗ ⲁϥⲥⲱⲧⲙ ⲁϥⲧⲱⲟⲩⲛ ⲁϥⲡⲱⲧ ⲛⲥⲁⲇⲁⲩⲉⲓⲇ ⲉϩⲣⲁⲓ ⲉⲧⲉⲣⲏⲙⲟⲥ ⲙⲙⲁⲁⲛ

26 ⲁⲩⲱ ⲥⲁⲟⲩⲗ ⲙⲛⲛⲉϥⲣⲱⲙⲉ ⲛⲉⲩϩⲙⲡⲓⲥⲁ ⲙⲡⲧⲟⲟⲩ ⲇⲁⲩⲉⲓⲇ ⲇⲉ ϩⲱⲱϥ ⲙⲛⲛⲉϥⲣⲱⲙⲉ ⲛⲉⲩϩⲙⲡⲓⲥⲁ ⲙⲡⲧⲟⲟⲩ ⲇⲁⲩⲉⲓⲇ ⲇⲉ ⲛⲉⲣⲉⲡⲛⲟⲩⲧⲉ ⲣⲟⲉⲓⲥ ⲉⲣⲟϥ ⲉⲧⲣⲉϥⲛⲟⲩϩⲙ ⲉⲡϩⲟ ⲛⲥⲁⲟⲩⲗ ⲥⲁⲟⲩⲗ ⲇⲉ ⲙⲛⲛⲉϥⲣⲱⲙⲉ ⲁⲩⲥⲱⲣ ⲉⲃⲟⲗ ⲉⲇⲁⲩⲉⲓⲇ ⲙⲛⲛⲉϥⲣⲱⲙⲉ ⲉϭⲟⲡⲟⲩ

27 ⲟⲩⲃⲁⲓϣⲓⲛⲉ ⲇⲉ ⲉⲁϥⲉⲓ ⲉⲣⲁⲧϥ ⲛⲥⲁⲟⲩⲗ ⲉϥϫⲱ ⲙⲙⲟⲥ ϫⲉⲧⲱⲟⲩⲛ ⲁⲙⲟⲩ ⲧⲁⲭⲏ ϫⲉⲛⲁⲗⲗⲟⲫⲩⲗⲟⲥ ⲁⲩⲧⲱⲟⲩⲛ ⲉϫⲛⲡⲉⲛⲕⲁϩ

28 ⲁⲩⲱ ⲥⲁⲟⲩⲗ ⲁϥⲕⲟⲧϥ ⲉⲡⲁϩⲟⲩ ⲉⲧⲙⲡⲱⲧ ⲛⲥⲁⲇⲁⲩⲉⲓⲇ ⲁⲩⲱ ⲥⲁⲟⲩⲗ ⲁϥⲃⲱⲕ ⲉⲣⲁⲧⲟⲩ ⲛⲛⲁⲗⲗⲟⲫⲩⲗⲟⲥ ⲉⲧⲃⲉⲡⲁⲓ ⲁⲩⲙⲟⲩⲧⲉ ⲉⲡⲣⲁⲛ ⲙⲡⲙⲁ ⲉⲧⲙⲙⲁⲩ ϫⲉⲧⲡⲉⲧⲣⲁ ⲛⲧⲁⲥⲡⲱⲣϫ