Read 1 Samuel 22 side by side with translations · The Final Bible
1 ⲇⲁⲩⲉⲓⲇ ⲇⲉ ⲁϥⲙⲟⲟϣⲉ ⲉⲃⲟⲗ ϩⲙⲡⲙⲁ ⲉⲧⲙⲙⲁⲩ ⲁϥⲛⲟⲩϩⲙ ⲁⲩⲱ ⲁϥⲉⲓ ⲉϩⲣⲁⲓ ⲉⲡⲉⲙϩⲁⲁⲩ ⲛⲟⲇⲟⲗⲗⲁⲙ ⲛⲉϥⲥⲛⲏⲩ ⲇⲉ ⲁⲩⲥⲱⲧⲙ ⲙⲛⲛⲁⲡⲏⲓ ⲙⲡⲉϥⲉⲓⲱⲧ ⲁⲩⲱ ⲁⲩⲉⲓ ⲉⲣⲁⲧϥ ⲙⲡⲙⲁ ⲉⲧⲙⲙⲁⲩ
2 ⲁⲩⲥⲱⲟⲩϩ ⲉϩⲟⲩⲛ ⲉⲣⲟϥ ϩⲙⲡⲙⲁ ⲉⲧⲙⲙⲁⲩ ⲛϭⲓⲟⲩⲟⲛ ⲛⲓⲙ ⲉⲧϣⲟⲟⲡ ϩⲛϩⲉⲛϩⲱϣ ⲁⲩⲱ ⲟⲩⲟⲛ ⲛⲓⲙ ⲉϥϫⲱⲟⲩⲉ ⲁⲩⲱ ⲟⲩⲟⲛ ⲛⲓⲙ ⲉⲛϥⲙⲧⲟⲛ ⲛϩⲏⲧ ⲁⲛ ⲁⲩⲱ ⲉϥⲟ ⲛⲁⲡⲉ ⲉϩⲣⲁⲓ ⲉϫⲱⲟⲩ ⲁⲩϣⲱⲡⲉ ⲛⲙⲙⲁϥ ⲛϭⲓⲁϥⲧⲟⲟⲩ ⲛϣⲉ ⲛⲣⲱⲙⲉ
3 ⲇⲁⲩⲉⲓⲇ ⲇⲉ ⲁϥⲡⲱⲱⲛⲉ ⲉⲃⲟⲗ ϩⲙⲡⲙⲁ ⲉⲧⲙⲙⲁⲩ ⲉϩⲣⲁⲓ ⲉⲙⲁⲥⲏⲫⲁ ϩⲙⲡⲕⲁϩ ⲙⲙⲱⲁⲃ ⲡⲉϫⲁϥ ⲙⲡⲣⲣⲟ ⲙⲙⲱⲁⲃ ϫⲉⲙⲁⲣⲉⲡⲁⲉⲓⲱⲧ ⲙⲛⲧⲁⲙⲁⲁⲩ ϭⲱ ϩⲁⲧⲏⲕ ϣⲁⲛⲧⲓⲛⲁⲩ ϫⲉⲉⲣⲉⲡⲛⲟⲩⲧⲉ ⲛⲁⲣⲟⲩ ⲛⲁⲓ
4 ⲁⲩⲱ ⲡϩⲟ ⲙⲡⲣⲣⲟ ⲙⲙⲱⲁⲃ ⲁϥⲥⲉⲡⲥⲱⲡϥ ⲁϥϭⲱ ϩⲁⲧⲏϥ ⲛⲛϩⲟⲟⲩ ⲧⲏⲣⲟⲩ ⲛⲧⲁⲇⲁⲩⲉⲓⲇ ⲁⲁⲩ ⲉϥⲡⲟϣⲥ
5 ⲁⲩⲱ ⲅⲁⲇ ⲡⲉⲡⲣⲟⲫⲏⲧⲏⲥ ⲡⲉϫⲁϥ ⲛⲇⲁⲩⲉⲓⲇ ϫⲉⲙⲡⲉⲣϩⲙⲟⲟⲥ ϩⲛⲧⲉⲓⲡⲉⲣⲓⲱⲭⲏ ⲧⲱⲟⲩⲛ ⲛⲅⲃⲱⲕ ⲉϩⲣⲁⲓ ⲉⲡⲕⲁϩ ⲛⲓⲟⲩⲇⲁ ⲇⲁⲩⲉⲓⲇ ⲇⲉ ⲁϥⲧⲱⲟⲩⲛ ⲁϥⲙⲟⲟϣⲉ ⲁϥⲉⲓ ⲁϥⲟⲩⲱϩ ϩⲛⲟⲩⲡⲟⲗⲓⲥ ϫⲉⲥⲁⲣⲓⲭ
6 ⲥⲁⲟⲩⲗ ⲇⲉ ⲁϥⲥⲱⲧⲙ ϫⲉⲁⲩⲉⲓⲙⲉ ⲉⲇⲁⲩⲉⲓⲇ ⲙⲛⲛⲉⲕⲉⲣⲱⲙⲉ ⲉⲧⲛⲙⲙⲁϥ ⲁⲩⲱ ⲥⲁⲟⲩⲗ ⲛⲉϥϩⲙⲟⲟⲥ ϩⲙⲡⲃⲟⲩⲛⲟⲥ ϩⲁⲧⲥⲉϯⲱϩⲉ ⲉⲧϩⲛⲣⲁⲙⲁ ⲉⲣⲉⲧⲉϥⲗⲟⲅⲭⲏ ϩⲛⲧⲉϥϭⲓϫ ⲁⲩⲱ ⲛⲉϥϩⲙϩⲁⲗ ⲧⲏⲣⲟⲩ ⲛⲉⲩⲁϩⲉⲣⲁⲧⲟⲩ ⲙⲡⲉϥⲉⲙⲧⲟ ⲉⲃⲟⲗ
7 ⲡⲉϫⲉⲥⲁⲟⲩⲗ ⲛⲛⲉϥϩⲙϩⲁⲗ ⲉⲧⲁϩⲉⲣⲁⲧⲟⲩ ⲙⲡⲉϥⲙⲧⲟ ⲉⲃⲟⲗ ϫⲉⲥⲱⲧⲙ ⲛϣⲏⲣⲉ ⲛⲃⲉⲛⲓⲁⲙⲓⲛ ⲉⲛⲉⲛⲁⲙⲉ ϥⲛⲁϯ ⲛⲏⲧⲛ ⲧⲏⲣⲧⲛ ⲛϭⲓⲡϣⲏⲣⲉ ⲛⲓⲉⲥⲥⲁⲓ ⲛϩⲉⲛⲥⲱϣⲉ ⲙⲛϩⲉⲛⲙⲁ ⲛⲉⲗⲟⲟⲗⲉ ⲁⲩⲱ ⲛⲧⲱⲧⲛ ⲧⲏⲣⲧⲛ ⲉⲛϥⲛⲁⲣⲧⲏⲩⲧⲛ ⲛⲭⲓⲗⲓⲁⲣⲭⲟⲥ ϩⲓϩⲉⲕⲁⲧⲟⲛⲧⲁⲣⲭⲟⲥ
8 ϫⲉⲛⲧⲱⲧⲛ ⲧⲏⲣⲧⲛ ⲧⲉⲧⲛⲟ ⲛⲕⲣⲟϥ ⲉⲣⲟⲓ ⲉⲙⲛⲗⲁⲁⲩ ⲙⲙⲱⲧⲛ ⲧⲁⲙⲟ ⲙⲙⲟⲓ ⲛⲧⲉⲣⲉⲡⲁϣⲏⲣⲉ ⲥⲙⲛⲇⲓⲁⲑⲏⲕⲏ ⲙⲛⲡϣⲏⲣⲉ ⲛⲓⲉⲥⲥⲁⲓ ⲙⲛⲗⲁⲁⲩ ⲛϩⲏⲧⲧⲏⲩⲧⲛ ϫⲏⲃ ⲛϩⲏⲧ ⲉϩⲣⲁⲓ ⲉϫⲱⲓ ⲉⲧⲣⲉϥⲧⲟⲩⲛⲉⲓⲁⲧ ⲉⲃⲟⲗ ϫⲉⲁⲡⲁϣⲏⲣⲉ ⲧⲟⲩⲛⲉⲥⲡⲁϩⲙϩⲁⲗ ⲉϩⲣⲁⲓ ⲉϫⲱⲓ ⲉⲩϫⲁϫⲉ ⲛⲧϩⲉ ⲙⲡϩⲟⲟⲩ ⲛϩⲟⲟⲩ
9 ⲁⲩⲱ ⲁϥⲟⲩⲱϣⲃ ⲛϭⲓⲇⲱⲏⲕ ⲡⲓⲇⲟⲩⲙⲁⲓⲟⲥ ⲡⲉⲧϩⲓϫⲛⲛⲉⲙⲁⲥⲡⲟⲣⲕ ⲛⲥⲁⲟⲩⲗ ⲉϥϫⲱ ⲙⲙⲟⲥ ϫⲉⲁⲓⲛⲁⲩ ⲉⲡϣⲏⲣⲉ ⲛⲓⲉⲥⲥⲁⲓ ⲉⲁϥⲉⲓ ⲉϩⲣⲁⲓ ⲉⲛⲟⲏⲙⲁ ⲉⲣⲁⲧϥ ⲛⲁⲭⲓⲙⲉⲗⲉⲭ ⲡϣⲏⲣⲉ ⲛⲁⲭⲓⲇⲱⲃ ⲡⲟⲩⲏⲏⲃ
10 ⲁⲩⲱ ⲁϥϣⲓⲛⲉ ⲙⲡⲛⲟⲩⲧⲉ ⲉⲃⲟⲗ ϩⲓⲧⲟⲟⲧϥ ⲁⲩⲱ ⲁϥϯⲟⲉⲓⲕ ⲛⲁϥ ⲁⲩⲱ ⲧⲥⲏϥⲉ ⲛⲅⲟⲗⲓⲁⲑ ⲡⲁⲗⲗⲟⲫⲩⲗⲟⲥ ⲁϥⲧⲁⲁⲥ ⲛⲁϥ
11 ⲡⲣⲣⲟ ⲇⲉ ⲁϥϫⲟⲟⲩ ⲁϥⲙⲟⲩⲧⲉ ⲉⲁⲭⲓⲙⲉⲗⲉⲭ ⲡϣⲏⲣⲉ ⲛⲁⲭⲓⲇⲱⲃ ⲁⲩⲱ ⲛϣⲏⲣⲉ ⲧⲏⲣⲟⲩ ⲙⲡⲉϥⲉⲓⲱⲧ ⲉⲧⲉⲛⲉⲟⲩⲏⲏⲃ ⲛⲉ ⲉⲧϩⲛⲛⲟⲏⲙⲁ ⲁⲩⲱ ⲁⲩⲉⲓ ⲧⲏⲣⲟⲩ ⲉⲣⲁⲧϥ ⲙⲡⲣⲣⲟ
12 ⲥⲁⲟⲩⲗ ⲇⲉ ⲡⲉϫⲁϥ ⲛⲁϥ ϫⲉⲥⲱⲧⲙ ⲉⲣⲟⲓ ⲡⲁϣⲏⲣⲉ ⲡϣⲏⲣⲉ ⲛⲁⲭⲓⲇⲱⲃ ⲡⲉϫⲁϥ ϫⲉⲉⲓⲥϩⲏⲏⲧⲉ ⲁⲛⲟⲕ ⲡϫⲟⲉⲓⲥ ϯⲥⲱⲧⲙ ⲉⲣⲟⲕ ϣⲁϫⲉ
13 ⲡⲉϫⲉⲥⲁⲟⲩⲗ ⲛⲁϥ ϫⲉⲉⲧⲃⲉⲟⲩ ⲛⲧⲟⲕ ⲁⲕϥⲓ ⲙⲛⲡϣⲏⲣⲉ ⲛⲓⲉⲥⲥⲁⲓ ⲉϯ ⲛⲙⲙⲁⲓ ⲉⲧⲣⲉⲕϯ ⲛⲁϥ ⲛⲟⲩⲟⲉⲓⲕ ⲙⲛⲟⲩⲥⲏϥⲉ ⲁⲩⲱ ⲉϣⲓⲛⲉ ⲙⲡⲛⲟⲩⲧⲉ ⲉⲃⲟⲗ ϩⲓⲧⲟⲟⲧⲕ ⲉⲧⲣⲉⲕⲧⲟⲩⲛⲟⲥϥ ⲛϫⲁϫⲉ ⲉϩⲣⲁⲓ ⲉϫⲱⲓ ⲛⲧϩⲉ ⲙⲡϩⲟⲟⲩ ⲛϩⲟⲟⲩ
14 ⲡⲟⲩⲏⲏⲃ ⲇⲉ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲙⲡⲣⲣⲟ ϫⲉⲛⲓⲙ ⲡⲉ ⲡⲕⲉⲟⲩⲁ ⲉⲧⲟ ⲛϩⲟⲧ ⲛⲧϩⲉ ⲛⲇⲁⲩⲉⲓⲇ ϩⲛⲛⲉⲕϩⲙϩⲁⲗ ⲧⲏⲣⲟⲩ ⲉⲁϥϫⲓ ⲛⲧϣⲉⲉⲣⲉ ⲙⲡⲣⲣⲟ ⲉϥⲟ ⲛⲁⲣⲭⲱⲛ ⲉϫⲙⲡⲉϥⲙⲏⲏϣⲉ ⲧⲏⲣϥ ⲁⲩⲱ ⲉϥⲱⲉⲓ ϩⲙⲡⲉⲕⲏⲓ ⲧⲏⲣϥ
15 ⲁⲩⲱ ⲉⲛⲉⲙⲡⲟⲟⲩ ⲙⲙⲁⲧⲉ ⲡⲉⲛⲧⲁⲓϫⲟⲛⲧ ⲉϣⲓⲛⲉ ⲛⲁϥ ⲙⲡⲛⲟⲩⲧⲉ ⲙⲡⲉⲣϭⲱⲛⲧ ⲡⲣⲣⲟ ⲁⲩⲱ ⲙⲡⲣⲧⲣⲉⲟⲩϣⲁϫⲉ ⲉⲓ ⲉⲃⲟⲗ ϩⲛⲣⲱϥ ⲙⲡⲣⲣⲟ ⲉϫⲙⲡⲉⲕϩⲙϩⲁⲗ ⲁⲩⲱ ⲉϫⲙⲡⲏⲓ ⲧⲏⲣϥ ⲙⲡⲁⲉⲓⲱⲧ ϫⲉⲡⲉⲕϩⲙϩⲁⲗ ⲉⲧⲉⲁⲛⲟⲕ ⲡⲉ ⲛϯⲥⲟⲟⲩⲛ ⲁⲛ ⲉϩⲱⲃ ⲛⲉⲓⲙⲓⲛⲉ ⲟⲩⲇⲉ ϫⲓⲛⲟⲩⲕⲟⲩⲓ ⲛϣⲁϫⲉ ϣⲁⲟⲩⲛⲟϭ
16 ⲡⲣⲣⲟ ⲇⲉ ⲥⲁⲟⲩⲗ ⲡⲉϫⲁϥ ϫⲉϩⲛⲟⲩⲙⲟⲩ ⲕⲛⲁⲙⲟⲩ ⲁⲭⲓⲙⲉⲗⲉⲭ ⲙⲛⲡⲏⲓ ⲙⲡⲉⲕⲉⲓⲱⲧ
17 ⲁⲩⲱ ⲡⲣⲣⲟ ⲡⲉϫⲁϥ ⲛⲛⲉⲧⲁϩⲉⲣⲁⲧⲟⲩ ⲙⲡⲉϥⲉⲃⲟⲗ ϫⲉϯⲙⲡⲉⲧⲉⲛⲟⲩⲟⲓ ⲉϩⲟⲩⲛ ⲉⲛⲉⲟⲩⲏⲏⲃ ⲙⲡϫⲟⲉⲓⲥ ⲛⲧⲉⲧⲛⲙⲟⲟⲩⲧⲟⲩ ϫⲉⲧⲟⲟⲧⲟⲩ ⲥⲙⲟⲛⲧ ⲙⲛⲇⲁⲩⲉⲓⲇ ⲁⲩⲱ ⲛⲧⲟⲟⲩ ⲁⲩⲉⲓⲙⲉ ϫⲉϥⲡⲏⲧ ⲛⲧⲟⲟⲧⲁⲩⲱ ⲙⲡⲟⲩⲧⲁⲙⲟⲓ ⲙⲡⲟⲩⲣϩⲛⲁⲩ ⲇⲉ ⲛϭⲓⲛϩⲙϩⲁⲗ ⲙⲡⲣⲣⲟ ⲉⲉⲛⲧⲟⲟⲧⲟⲩ ⲉϫⲛⲛⲉⲟⲩⲏⲏⲃ ⲙⲡϫⲟⲉⲓⲥ ⲉⲙⲟⲟⲧⲟⲩ
18 ⲁⲩⲱ ⲡⲣⲣⲟ ⲡⲉϫⲁϥ ⲛⲇⲱⲏⲕ ⲡⲓⲇⲟⲩⲙⲁⲓⲟⲥ ϫⲉⲃⲱⲕ ⲛⲧⲟⲕ ⲛⲅⲙⲟⲩⲟⲩⲧ ⲛⲛⲉⲟⲩⲏⲏⲃ ⲇⲱⲏⲕ ⲇⲉ ⲡⲥⲩⲣⲟⲥ ⲁϥⲃⲱⲕ ⲁϥⲙⲟⲟⲩⲧⲟⲩ ⲁⲩⲱ ⲁϥⲙⲟⲩⲟⲩⲧ ⲙⲡⲉϩⲟⲟⲩ ⲉⲧⲙⲙⲁⲩ ⲛϣⲟⲙⲧⲉ ⲛϣⲉ ϯⲟⲩ ⲛⲣⲱⲙⲉ ⲛⲧⲟⲟⲩ ⲇⲉ ⲧⲏⲣⲟⲩ ⲉⲩϥⲓ ⲉⲡϩⲟⲩⲇ
19 ⲁⲩⲱ ⲛⲱⲏⲙⲁ ⲧⲡⲟⲗⲓⲥ ⲛⲛⲉⲟⲩⲏⲏⲃ ⲁϥⲧⲁⲕⲟⲥ ϩⲛⲧⲧⲁⲡⲣⲟ ⲛⲧⲥⲏϥⲉ
20 ⲁϥⲟⲩϫⲁⲓ ⲛϭⲓⲟⲩϣⲏⲣⲉ ⲛⲟⲩⲱⲧ ⲛⲧⲉⲁⲭⲓⲙⲉⲗⲉⲭ ⲡϣⲏⲣⲉ ⲛⲁⲭⲓⲇⲱⲃ ⲉⲡⲉϥⲣⲁⲛ ⲡⲉ ⲁⲃⲓⲁⲑⲁⲣ ⲁϥⲡⲱⲧ ⲉⲣⲁⲧϥ ⲛⲇⲁⲩⲉⲓⲇ
21 ⲁⲩⲱ ⲁⲃⲓⲁⲑⲁⲣ ⲁϥⲧⲁⲙⲉⲇⲁⲩⲉⲓⲇ ϫⲉⲥⲁⲟⲩⲗ ⲁϥⲙⲟⲩⲟⲩⲧ ⲛⲛⲉⲟⲩⲏⲏⲃ ⲧⲏⲣⲟⲩ ⲙⲡϫⲟⲉⲓⲥ
22 ⲡⲉϫⲉⲇⲁⲩⲉⲓⲇ ⲛⲁⲃⲓⲁⲑⲁⲣ ϫⲉⲉⲛⲉⲓⲥⲟⲟⲩⲛ ⲙⲡⲉϩⲟⲟⲩ ⲉⲧⲙⲙⲁⲩ ϫⲉⲇⲱⲏⲕ ⲡⲓⲇⲟⲩⲙⲁⲓⲟⲥ ⲛⲉϥⲙⲙⲁⲩ ⲁⲩⲱ ϫⲉϥⲛⲁⲧⲁⲙⲉⲥⲁⲟⲩⲗ ⲉⲣⲟⲓ ⲁⲛⲟⲕ ⲡⲉ ⲡⲁⲓⲧⲓⲟⲥ ⲛⲛⲉⲯⲩⲭⲏ ⲙⲡⲏⲓ ⲧⲏⲣϥ ⲙⲡⲉⲕⲉⲓⲱⲧ
23 ϩⲙⲟⲟⲥ ⲙⲡⲉⲓⲙⲁ ϩⲁϩⲧⲏⲓ ⲛⲅⲧⲙⲣϩⲟⲧⲉ ϫⲉⲡⲙⲁ ⲉϯⲛⲁⲕⲱⲧⲉ ⲛⲥⲁⲙⲙⲁ ⲙⲡⲱⲧ ⲛⲧⲁⲯⲩⲭⲏ ⲉⲣⲟϥ ϯⲛⲁⲕⲱⲧⲉ ϩⲱⲱϥ ⲛⲥⲁⲟⲩⲙⲁ ⲛⲧⲉⲕⲯⲩⲭⲏ ϫⲉⲛⲧⲟⲕ ⲁⲕⲡⲱⲧ ⲉⲣⲁⲧ
1 Samuel 21 · 1 Samuel 23 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)