1 Samuel 21 — Coptic (Sahidic)

1 ⲁⲩⲱ ⲇⲁⲩⲉⲓⲇ ⲁϥⲧⲱⲟⲩⲛ ⲁϥⲙⲟⲟϣⲉ ⲓⲱⲛⲁⲑⲁⲛ ϩⲱⲱϥ ⲁϥⲃⲱⲕ ⲉϩⲟⲩⲛ ⲉⲧⲡⲟⲗⲓⲥ

2 ⲇⲁⲩⲉⲓⲇ ⲇⲉ ⲁϥⲉⲓ ⲉϩⲣⲁⲓ ⲉⲛⲟⲙⲃⲁ ⲉⲣⲁⲧϥ ⲛⲁⲭⲓⲙⲉⲗⲉⲭ ⲡⲟⲩⲏⲏⲃ ⲁⲭⲓⲙⲉⲗⲉⲭ ⲇⲉ ⲁϥⲉⲓⲱⲣⲙ ⲛⲧⲉⲣⲉϥⲉⲓ ⲉϩⲟⲩⲛ ⲉϩⲣⲁϥ ⲡⲉϫⲁϥ ⲛⲁϥ ϫⲉⲉⲧⲃⲉⲟⲩ ⲉⲕⲙⲟⲟϣⲉ ⲙⲁⲩⲁⲁⲕ ⲉⲙⲛϭⲉ ⲗⲁⲁⲩ ⲙⲟⲟϣⲉ ⲛⲙⲙⲁⲕ

3 ⲡⲉϫⲉⲇⲁⲩⲉⲓⲇ ⲉϩⲟⲩⲛ ϩⲙⲡⲟⲩⲏⲏⲃ ϫⲉⲡⲣⲣⲟ ⲡⲉ ⲛⲧⲁϥⲟⲩⲉϩⲥⲁϩⲛⲉ ⲛⲁⲓ ⲛⲟⲩϣⲁϫⲉ ⲙⲡϩⲟⲟⲩ ⲁϥϫⲟⲟⲥ ⲉϩⲟⲩⲛ ⲉϩⲣⲁⲓ ϫⲉⲙⲡⲉⲣⲧⲣⲉⲗⲁⲁⲩ ⲉⲓⲙⲉ ⲉⲡϣⲁϫⲉ ⲡⲉⲧⲓⲛⲁϫⲟⲟⲩⲕ ⲁⲛⲟⲕ ⲉⲧⲃⲏⲏⲧϥ ⲁⲩⲱ ⲡⲉⲛⲧⲁⲓϩⲱⲛ ⲉⲧⲟⲟⲧⲕ ⲉⲧⲃⲏⲏⲧϥ ⲁⲩⲱ ⲛϣⲏⲣⲉ ϣⲏⲙ ⲁⲓⲣⲙⲛⲧⲣⲉ ⲛⲁⲩ ϩⲙⲡⲙⲁ ⲉϣⲁⲩⲙⲟⲩⲧⲉ ⲉⲣⲟϥ ϫⲉⲡⲡⲓⲥⲧⲟⲥ ⲙⲡⲛⲟⲩⲧⲉ ⲫⲉⲗⲗⲁⲛⲓⲛ ⲛⲉⲙⲱⲛⲓⲙ

4 ⲧⲉⲛⲟⲩ ϭⲉ ⲉϣⲱⲡⲉ ⲟⲩⲉⲛϯⲟⲩ ⲛⲟⲉⲓⲕ ⲉⲣⲉⲧⲟⲟⲧⲕ ϯ ⲙⲡⲉⲧⲉⲕⲛⲁϩⲉ ⲉⲣⲟϥ ⲉϩⲣⲁⲓ ⲉⲧⲟⲟⲧ

5 ⲡⲟⲩⲏⲏⲃ ⲇⲉ ⲁϥⲟⲩⲱϣⲃ ⲉϥϫⲱ ⲙⲙⲟⲥ ϫⲉⲙⲛⲟⲉⲓⲕ ⲉϥϫⲁϩⲙ ⲉⲣⲉⲧⲟⲟⲧⲛ ⲛⲥⲁⲛⲉⲟⲉⲓⲕ ⲉⲧⲟⲩⲁⲁⲃ ⲛⲧⲉⲡⲣⲟⲑⲏⲥⲓⲥ ⲉϣⲱⲡⲉ ϭⲉ ⲛϣⲏⲣⲉ ϣⲏⲙ ⲥⲉⲧⲃⲃⲏⲩ ⲉⲥϩⲓⲙⲉ ⲉⲩⲉϣⲟⲩⲱⲙ ⲛϩⲏⲧⲟⲩ

6 ⲇⲁⲩⲉⲓⲇ ⲇⲉ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲙⲡⲟⲩⲏⲏⲃ ϫⲉⲁϩⲉ ⲁⲛⲥⲁϩⲱⲱⲛ ⲉⲃⲟⲗ ⲛⲥϩⲓⲙⲉ ⲛϫⲓⲛ ⲥⲁϥ ⲁⲩⲱ ⲛϫⲓⲛ ϣⲟⲙⲛⲧ ⲙⲡϩⲟⲟⲩ ϩⲙⲡⲧⲣⲉⲛⲧⲁⲁⲛ ⲉⲃⲟⲗ ⲉⲧⲉϩⲓⲏ ⲁⲛϣⲏⲣⲉ ϣⲏⲙ ⲧⲏⲣⲟⲩ ⲧⲃⲃⲟⲟⲩ ⲁⲩⲱ ⲧⲉϩⲓⲏ ⲉⲧⲉⲕϣⲁϫⲉ ⲉⲣⲟⲥ ⲥϫⲁϩⲙ ⲙⲡϩⲟⲟⲩ ⲇⲉ ⲉⲥⲛⲁⲧⲃⲃⲟ ⲉⲧⲃⲉⲛⲁⲥⲕⲉⲩⲏ

7 ⲁⲩⲱ ⲁⲭⲓⲙⲉⲗⲉⲭ ⲡⲁⲣⲭⲓⲉⲣⲉⲩⲥ ⲁϥϯ ⲛⲁϥ ⲛⲛⲉⲟⲉⲓⲕ ⲛⲧⲉⲡⲣⲟⲑⲉⲥⲓⲥ ⲉⲙⲛϭⲉ ⲟⲉⲓⲕ ⲙⲙⲁⲩ ⲛⲥⲁⲛⲉⲧⲕⲏ ⲉϩⲣⲁⲓ ϩⲓⲧϩⲏ ⲙⲡϫⲟⲉⲓⲥ ⲉⲧⲉⲡⲟⲉⲓⲕ ⲡⲉ ⲛⲧⲁⲩϥⲓⲧϥ ϩⲓⲧϩⲏ ⲙⲙⲟϥ ⲉⲕⲁ ⲕⲉⲟⲩⲁ ⲉϩⲣⲁⲓ ⲉϥϩⲏⲙ ⲏ ⲉϥⲣⲟⲟⲩⲧ ⲙⲡⲉϩⲟⲟⲩ ⲛⲧⲁϥϫⲓⲧⲟⲩ

8 ⲛⲉⲣⲉⲟⲩⲁ ⲇⲉ ⲛⲛⲉϩⲙϩⲁⲗ ⲛⲥⲁⲟⲩⲗ ⲙⲙⲁⲩ ⲙⲡⲉϩⲟⲟⲩ ⲉⲧⲙⲙⲁⲩ ⲉϥϭⲏⲡ ⲉⲙⲛⲧⲏϥⲡⲁⲣⲣⲏⲥⲓⲁ ⲙⲙⲁⲩ ⲛⲁϩⲣⲁϥ ⲙⲡⲉϥϫⲟⲉⲓⲥ ⲉⲡⲉϥⲣⲁⲛ ⲡⲉ ⲇⲱⲏⲕ ⲡⲓⲇⲟⲩⲙⲁⲓⲟⲥ ⲉϥⲙⲟⲟⲛⲉ ⲛⲛⲉⲙⲁⲥⲡⲟⲣⲕ ⲛⲥⲁⲟⲩⲗ

9 ⲁⲩⲱ ⲇⲁⲩⲉⲓⲇ ⲡⲉϫⲁϥ ⲛⲁⲭⲓⲙⲉⲗⲉⲭ ϫⲉⲁⲛⲁⲩ ϫⲉⲟⲩⲛⲟⲩⲗⲟⲅⲭⲏ ϣⲟⲟⲡ ϩⲁⲧⲟⲟⲧⲕ ϩⲙⲡⲉⲓⲙⲁ ⲏ ⲟⲩⲥⲏϥⲉ ϫⲉⲧⲁⲥⲏϥⲉ ⲁⲩⲱ ⲛⲁⲥⲕⲉⲩⲏ ⲙⲡⲓⲉϣⲉⲛⲧⲟⲩ ⲉⲃⲟⲗ ⲛⲙⲙⲁⲓ ⲉⲃⲟⲗ ϫⲉⲡϣⲁϫⲉ ⲛⲧⲁⲡⲣⲣⲟ ϩⲱⲛ ⲙⲙⲟϥ ⲉⲧⲟⲟⲧϥϣⲟⲟⲡ ϩⲛⲟⲩⲛⲟϭ ⲛⲟⲩⲉϩⲥⲁϩⲛⲉ

10 ⲡⲟⲩⲏⲏⲃ ⲇⲉ ⲡⲉϫⲁϥ ⲛⲁϥ ϫⲉⲉⲓⲥⲧⲥⲏϥⲉ ⲛⲅⲟⲗⲓⲁⲑ ⲡⲁⲗⲗⲟⲫⲩⲗⲟⲥ ⲡⲁⲓ ⲛⲧⲁⲕϩⲟⲧⲃⲉϥ ϩⲙⲡⲉⲓⲙⲁ ⲛⲉⲙⲁⲑⲥⲕⲏ ⲉϩⲣⲁⲓ ⲙⲡⲉⲓⲙⲁ ⲁⲩⲱ ⲥϭⲗⲉⲙⲗⲱⲙ ⲛⲟⲩϩⲟⲉⲓⲧⲉ ⲉϣⲱⲡⲉ ϭⲉ ⲕⲟⲩⲁϣⲥ ϫⲓⲧⲥ ϫⲉⲙⲛⲕⲏⲧⲉ ⲙⲡⲉⲓⲙⲁ ⲛⲥⲁⲧⲁⲓ ⲡⲉϫⲉⲇⲁⲩⲉⲓⲇ ⲛⲁϥ ϫⲉⲉϣϫⲉ ⲙⲛⲕⲏⲧⲉ ⲛⲥⲁⲧⲁⲓ ⲙⲁ ⲛⲁⲓⲥ

11 ⲁϥⲧⲁⲁⲥ ⲛⲁϥ ⲇⲁⲩⲉⲓⲇ ⲇⲉ ⲁϥⲧⲱⲟⲩⲛ ⲙⲡⲉϩⲟⲟⲩ ⲉⲧⲙⲙⲁⲩ ϩⲁⲡϩⲟ ⲛⲥⲁⲟⲩⲗ ⲁⲩⲱ ⲇⲁⲩⲉⲓⲇ ⲁϥⲉⲓ ⲉⲣⲁⲧϥ ⲛⲁⲭⲟⲩⲥ ⲡⲣⲣⲟ ⲛⲅⲉⲑ

12 ⲛϩⲙϩⲁⲗ ⲇⲉ ⲛⲁⲭⲟⲩⲥ ⲡⲉϫⲁⲩ ⲛⲁϥ ϫⲉⲙⲡⲁⲓ ⲁⲛ ⲡⲉ ⲇⲁⲩⲉⲓⲇ ⲡⲣⲣⲟ ⲙⲡⲕⲁϩ ⲙⲏ ⲙⲡⲁⲓ ⲁⲛ ⲡⲉ ⲇⲁⲩⲉⲓⲇ ⲡⲉⲛⲧⲁⲩⲉⲓ ⲉⲃⲟⲗ ϩⲁⲧⲉϥϩⲏ ⲛϭⲓⲛⲉϩⲓⲟⲙⲉ ⲉⲧⲭⲟⲣⲉⲩⲉ ⲉⲩϫⲱ ⲙⲙⲟⲥ ϫⲉⲥⲁⲟⲩⲗ ⲁϥⲡⲁⲧⲁⲥⲥⲉⲓ ϩⲛⲛⲉϥϣⲟ ⲇⲁⲩⲉⲓⲇ ϩⲱⲱϥ ϩⲛⲛⲉϥⲧⲃⲁ

13 ⲇⲁⲩⲉⲓⲇ ⲁϥⲕⲁⲛⲉⲓϣⲁϫⲉ ϩⲙⲡⲉϥϩⲏⲧ ⲁⲩⲱ ⲁϥⲣϩⲟⲧⲉ ⲉⲙⲁⲧⲉ ϩⲁⲧϩⲏ ⲛⲁⲭⲟⲩⲥ ⲡⲣⲣⲟ ⲛⲅⲉⲑ

14 ⲁⲩⲱ ⲁϥϣⲓⲃⲉ ⲙⲡⲉϥⲥⲙⲟⲧ ⲙⲡⲉϥⲙⲧⲟ ⲉⲃⲟⲗ ⲁϥϭⲱ ⲉϥⲉϣϭⲁ ϭⲓϫ ϩⲓⲣⲛ ⲛⲣⲟ ⲛⲧⲡⲩⲗⲏ ⲛⲧⲡⲟⲗⲓⲥ ⲉⲁϥⲣⲧϩⲉ ⲛⲛⲉⲧⲡⲟϣⲥ ⲛϩⲏⲧ ⲙⲡⲉϩⲟⲟⲩ ⲉⲧⲙⲙⲁⲩ ⲁⲩⲱ ⲛⲉϥϯϭⲗⲁ ⲉⲡⲓⲥⲁ ⲙⲛⲡⲁⲓ ⲙⲡⲉⲩⲙⲧⲟ ⲉⲃⲟⲗ ⲉϥϩⲏⲩ ⲉϩⲣⲁⲓ ϩⲓⲣⲛ ⲛⲣⲟ ⲛⲧⲡⲩⲗⲏ ⲉⲣⲉⲛⲉϥϫⲓϩ ϣⲟⲩⲟ ⲉϫⲛⲧⲉϥⲙⲟⲣⲧ

15 ⲡⲉϫⲉⲁⲭⲟⲩⲥ ⲛⲛⲉϥϩⲙϩⲁⲗ ϫⲉϭⲱϣⲧ ⲛⲧⲉⲧⲛⲛⲁⲩ ⲉⲡⲉⲓⲣⲱⲙⲉ ⲉϥⲡⲟϣⲥ ⲛϩⲏⲧ ⲉⲧⲃⲉϫⲉⲁⲧⲉⲧⲛⲛⲧϥ ⲛⲁⲓ ⲉϩⲟⲩⲛ

16 ⲏ ⲉⲓϣⲁⲁⲧ ⲁⲛⲟⲕ ⲛⲣⲱⲙⲉ ⲉϥⲡⲟϣⲥ ⲛϩⲏⲧ ⲉⲃⲟⲗ ϫⲉⲁⲧⲉⲧⲛⲉⲓⲛⲉ ⲙⲡⲁⲓ ⲉϩⲟⲩⲛ ⲛⲁⲓ ⲉⲧⲣⲉϥⲣⲛⲉⲓⲥⲙⲟⲧ ⲛⲁϩⲣⲁⲓ ⲡⲁⲓ ⲉϥⲛⲁⲣⲡϩⲟⲩⲛ ⲁⲛ ⲛⲏⲓ