1 Samuel 20 — Coptic (Sahidic)

1 ⲇⲁⲩⲉⲓⲇ ⲇⲉ ⲁϥⲡⲱⲧ ⲉⲃⲟⲗ ϩⲛⲁⲩⲁⲑ ⲛⲧⲉϩⲣⲁⲙⲙⲁ ⲁⲩⲱ ⲁϥⲉⲓ ⲉϩⲟⲩⲛ ⲉϩⲣⲁϥ ⲛⲓⲱⲛⲁⲑⲁⲛ ⲡⲉϫⲁϥ ⲛⲁϥ ϫⲉⲟⲩ ⲡⲉ ⲛⲧⲁⲓⲁⲁϥ ⲁⲩⲱ ⲟⲩ ⲡⲉ ⲡⲁϫⲓⲛϭⲟⲛⲥ ⲛⲧⲁⲓⲁⲁϥ ⲏ ⲡⲁⲛⲟⲃⲉ ⲟⲩ ⲡⲉ ⲙⲡⲉⲙⲧⲟ ⲉⲃⲟⲗ ⲙⲡⲉⲕⲉⲓⲱⲧ ϫⲉϥⲕⲱⲧⲉ ⲛⲥⲁⲧⲁⲯⲩⲭⲏ ⲉϥⲓⲧⲥ

2 ⲡⲉϫⲉⲓⲱⲛⲁⲑⲁⲛ ϫⲉⲙⲡⲉⲕⲣⲗⲁⲁⲩ ⲛⲅⲛⲁⲙⲟⲩ ⲁⲛ ⲉⲓⲥ ϩⲏⲏⲧⲉ ⲡⲁⲉⲓⲱⲧ ⲛϥⲛⲁⲣⲗⲁⲁⲩ ⲁⲛ ⲛϣⲁϫⲉ ⲟⲩⲇⲉ ⲟⲩⲛⲟϭ ⲟⲩⲇⲉ ⲟⲩⲕⲟⲩⲓ ⲙⲡⲉϥϭⲟⲗⲡϥ ⲉⲛⲁⲙⲁⲁϫⲉ ⲁⲩⲱ ϭⲉ ⲉⲣⲉⲡⲁⲉⲓⲱⲧ ⲛⲁϩⲉⲡⲡⲉⲓϣⲁϫⲉ ⲉⲣⲟⲓ ⲉⲛϥϣⲟⲟⲡ ⲁⲛ ⲣⲱ

3 ⲇⲁⲩⲉⲓⲇ ⲇⲉ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲓⲱⲛⲁⲑⲁⲛ ϫⲉⲡⲉⲕⲉⲓⲱⲧ ⲥⲟⲟⲩⲛ ϫⲉⲁⲓϭⲉⲛⲭⲁⲣⲓⲥ ⲛⲁϩⲣⲁⲕ ⲁⲩⲱ ⲁⲡⲉⲕⲉⲓⲱⲧ ϫⲟⲟⲥ ϫⲉⲙⲡⲣⲧⲣⲉⲓⲱⲛⲁⲑⲁⲛ ⲉⲓⲙⲉ ⲉⲡⲉⲓϣⲁϫⲉ ϫⲉⲛⲛⲉϥⲧⲁⲙⲉⲇⲁⲩⲉⲓⲇ ⲉⲣⲟϥ ⲁⲗⲗⲁ ⲡϫⲟⲉⲓⲥ ⲟⲛϩ ⲁⲩⲱ ⲧⲉⲕⲯⲩⲭⲏ ⲟⲛϩ ϫⲉⲕⲁⲧⲁⲧϩⲉ ⲛⲧⲁⲓϫⲟⲟⲥ ⲁⲧⲉϥⲕⲁⲕⲓⲁ ϫⲱⲕ ⲉⲃⲟⲗ ϩⲛⲧⲁⲙⲏⲧⲉ ⲁⲩⲱ ϩⲛⲧⲙⲏⲧⲉ ⲙⲡⲙⲟⲩ

4 ⲡⲉϫⲉⲓⲱⲛⲁⲑⲁⲛ ⲛⲇⲁⲩⲉⲓⲇ ϫⲉⲟⲩ ⲡⲉⲧⲉⲣⲉⲧⲉⲕⲯⲩⲭⲏ ⲟⲩⲁϣϥ ⲛⲧⲁⲁⲁϥ ⲛⲙⲙⲁⲕ

5 ⲡⲉϫⲉⲇⲁⲩⲉⲓⲇ ⲛⲓⲱⲛⲁⲑⲁⲛ ϫⲉⲉⲓⲥⲥⲟⲩⲟⲩⲁ ⲣⲁⲥⲧⲉ ⲁⲩⲱ ⲁⲛⲟⲕ ⲛϯⲛⲁⲧⲱϣ ⲁⲛ ⲉϩⲙⲟⲟⲥ ⲉϩⲣⲁⲓ ⲉⲟⲩⲱⲙ ⲙⲛⲡⲣⲣⲟ ⲉⲕⲉϫⲟⲟⲩⲧ ⲉⲃⲟⲗ ⲛⲧⲁϩⲟⲡⲧ ϣⲁⲡⲛⲁⲩ ⲙⲡⲉⲕⲃⲁ ϩⲛⲧⲥⲱϣⲉ

6 ⲁⲩⲱ ϩⲛⲟⲩϣⲓⲛⲉ ⲉⲣϣⲁⲛⲡⲉⲕⲉⲓⲱⲧ ϣⲓⲛⲉ ⲛⲥⲱⲓ ⲉⲕⲉϫⲟⲟⲥ ⲛⲁϥ ϫⲉϩⲛⲟⲩⲟⲩⲱϣ ⲁϥⲁⲝⲓⲟⲩ ⲙⲙⲟⲓ ⲉⲕⲁⲁϥ ⲉⲃⲱⲕ ϣⲁⲃⲏⲑⲗⲉⲉⲙ ⲧⲉϥⲡⲟⲗⲓⲥ ϫⲉⲟⲩⲑⲩⲥⲓⲁ ⲕⲁⲧⲁⲡⲧⲱϣ ⲛⲛϩⲟⲟⲩ ⲧⲉⲧⲛⲁϣⲱⲡⲉ ⲙⲙⲁⲩ ⲛⲧⲉⲡϩⲩⲗⲏ ⲧⲏⲣⲥ

7 ⲉϥϣⲁⲛϫⲟⲟⲥ ⲇⲉ ϫⲉⲕⲁⲗⲱⲥ ⲙⲁⲣⲉϥⲃⲱⲕ ⲉⲓⲉ ⲟⲩⲛⲟⲩⲉⲓⲣⲏⲛⲏ ϣⲟⲟⲡ ⲙⲡⲉⲕϩⲙϩⲁⲗ ⲉϥⲛⲁϣⲁϫⲉ ⲇⲉ ⲉϥⲛⲁϣⲧ ⲉϩⲟⲩⲛ ⲉϩⲣⲁⲕ ⲉⲓⲉ ⲉⲓⲙⲉ ϫⲉⲁⲧⲕⲁⲕⲓⲁ ϫⲱⲕ ⲉⲃⲟⲗ ⲛⲧⲟⲟⲧϥ

8 ⲛⲅⲉⲓⲣⲉ ⲛⲧⲟⲕ ⲙⲛⲡⲉⲕϩⲙϩⲁⲗ ⲛⲟⲩⲛⲁ ϫⲉⲛⲧⲁⲕⲉⲓⲛⲉ ⲉϩⲟⲩⲛ ⲙⲡⲉⲕϩⲙϩⲁⲗ ⲛⲙⲙⲁⲕ ⲉⲩⲇⲓⲁⲑⲏⲕⲏ ⲛⲧⲉⲡϫⲟⲉⲓⲥ ⲁⲩⲱ ⲉϣϫⲉ ⲟⲩⲛϫⲓⲛϭⲟⲛⲥ ϫⲓ ⲉϩⲟⲩⲛ ⲉⲡⲉⲕϩⲙϩⲁⲗ ⲙⲟⲩⲟⲩⲧ ⲙⲙⲟⲓ ⲛⲧⲟⲕ ⲁⲩⲱ ⲉⲧⲃⲉⲟⲩ ⲕⲛⲁϫⲓⲧ ⲛⲧⲉⲓϩⲉ ⲉⲣⲁⲧϥ ⲙⲡⲉⲕⲉⲓⲱⲧ

9 ⲡⲉϫⲉⲓⲱⲛⲁⲑⲁⲛ ⲛⲁϥ ϫⲉⲛⲛⲉⲡⲁⲓ ϣⲱⲡⲉ ⲙⲙⲟⲓ ϫⲉϩⲛⲟⲩⲉⲓⲙⲉ ⲉⲓϣⲁⲛⲉⲓⲙⲉ ϫⲉⲁⲡϫⲓⲛϭⲟⲛⲥ ϫⲱⲕ ⲉⲃⲟⲗ ⲛⲧⲟⲟⲧϥ ⲙⲡⲁⲉⲓⲱⲧ ⲉⲧⲣⲉϥⲉⲓ ⲉϩⲣⲁⲓ ⲉϫⲱⲕ ⲉⲛϥϣⲟⲟⲡ ⲁⲛ ϩⲛⲛⲉⲕⲡⲟⲗⲓⲥ ⲁⲛⲟⲕ ϯⲛⲁⲧⲁⲙⲟⲕ ⲉⲡⲁⲓ

10 ⲡⲉϫⲉⲇⲁⲩⲉⲓⲇ ⲛⲓⲱⲛⲁⲑⲁⲛ ϫⲉⲛⲓⲙ ⲡⲉⲧⲛⲁⲧⲁⲙⲟⲓ ⲉⲡⲁⲓ ⲉⲣϣⲁⲛⲡⲉⲕⲉⲓⲱⲧ ⲧⲁⲩⲉϣⲁϫⲉ ⲛⲁⲕ ⲉϥⲛⲁϣⲧ

11 ⲡⲉϫⲉⲓⲱⲛⲁⲑⲁⲛ ⲛⲇⲁⲩⲉⲓⲇ ϫⲉⲙⲟⲟϣⲉ ⲙⲁⲣⲟⲛ ⲉⲃⲟⲗ ⲉⲧⲥⲱϣⲉ ⲁⲩⲱ ⲛⲧⲟⲟⲩ ⲙⲡⲉⲥⲛⲁⲩ ⲁⲩⲃⲱⲕ ⲉⲃⲟⲗ ⲉⲧⲥⲱϣⲉ

12 ⲡⲉϫⲉⲓⲱⲛⲁⲑⲁⲛ ⲛⲇⲁⲩⲉⲓⲇ ϫⲉⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲥⲟⲟⲩⲛ ϫⲉⲇⲓⲁⲛⲁⲕⲣⲓⲛⲉ ⲏ ϯⲛⲁⲧⲱⲕ ⲉϩⲟⲩⲛ ⲉⲡⲁⲉⲓⲱⲧ ⲉⲣϣⲁⲛⲡⲉⲟⲩⲟⲉⲓϣ ϣⲱⲡⲉ ⲛⲁⲁ ϣⲟⲙⲛⲧ ⲛⲥⲟⲡ ⲁⲩⲱ ⲉϣⲱⲡⲉ ⲁⲩϣⲁϫⲉ ⲛⲁⲅⲁⲑⲟⲛ ϣⲱⲡⲉ ⲉⲧⲃⲉⲇⲁⲩⲉⲓⲇ ϯⲛⲁⲧⲛⲛⲟⲟⲩ ⲙⲡⲟⲩⲱ ⲛⲁⲕ ⲉⲃⲟⲗ ⲉⲧⲥⲱϣⲉ

13 ⲛⲁⲓ ⲇⲉ ⲟⲛ ⲉⲣⲉⲡⲛⲟⲩⲧⲉ ⲁⲁⲩ ⲛⲓⲱⲛⲁⲑⲁⲛ ⲁⲩⲱ ⲛⲉⲓⲕⲟⲟⲩⲉ ⲉϥⲉⲟⲩⲁϩⲟⲩ ⲉⲣⲟⲓ ϫⲉⲙⲡⲉⲧϩⲟⲟⲩ ϯⲛⲁⲧⲁⲙⲟⲕ ⲉⲣⲟⲟⲩ ⲛⲧⲁϭⲟⲗⲡⲟⲩ ⲉⲡⲉⲕⲙⲁⲁϫⲉ ⲛⲧⲁϫⲟⲟⲩⲕ ⲉⲃⲟⲗ ⲛⲅⲃⲱⲕ ϩⲛⲟⲩⲉⲓⲣⲏⲛⲏ ⲛⲧⲉⲛϫⲟⲉⲓⲥ ϣⲱⲡⲉ ⲛⲙⲙⲁⲕ ⲕⲁⲧⲁⲧϩⲉ ⲉⲛϥϣⲟⲟⲡ ⲙⲛⲡⲁⲉⲓⲱⲧ

14 ⲁⲩⲱ ⲉⲧⲓ ⲁⲛⲟⲕ ⲉⲓⲟⲛϩ ⲉⲕⲉⲉⲓⲣⲉ ⲛⲙⲙⲁⲓ ⲛⲟⲩⲛⲁ ϩⲛⲟⲩⲙⲟⲩ ⲇⲉ ⲟⲛ ⲉⲓϣⲁⲛⲙⲟⲩ

15 ⲛⲛⲉⲕϥⲓ ⲙⲡⲉⲕⲛⲁ ⲉⲃⲟⲗ ϩⲙⲡⲁⲏⲓ ⲛϣⲁ ⲉⲛⲉϩ ⲁⲩⲱ ⲉⲣϣⲁⲛⲡϫⲟⲉⲓⲥ ϥⲓ ⲙⲙⲁⲩ ⲛⲛⲉϫⲁϫⲉ ⲛⲇⲁⲩⲉⲓⲇ ⲡⲟⲩⲁ ⲡⲟⲩⲁ ⲉⲃⲟⲗ ϩⲓϫⲙⲡϩⲟ ⲙⲡⲕⲁϩ

16 ⲛⲛⲉⲩϥⲓ ⲙⲙⲁⲩ ⲙⲡⲣⲁⲛ ⲛⲓⲱⲛⲁⲑⲁⲛ ⲉⲃⲟⲗ ϩⲙⲡⲏⲓ ⲛⲇⲁⲩⲉⲓⲇ ⲁⲩⲱ ⲉⲣⲉⲡϫⲟⲉⲓⲥ ⲕⲱⲧⲉ ⲛⲧⲟⲟⲧϥ ⲛⲇⲁⲩⲉⲓⲇ ⲛⲥⲁⲛⲉϥϫⲁϫⲉ

17 ⲓⲱⲛⲁⲑⲁⲛ ⲇⲉ ⲟⲛ ⲁϥⲟⲩⲱϩ ⲉⲧⲟⲟⲧϥ ⲉⲱⲣⲕ ⲛⲇⲁⲩⲉⲓⲇ ⲉⲃⲟⲗ ϫⲉϥⲙⲉ ⲙⲙⲟϥ ⲁⲩⲱ ⲁϥⲙⲉⲣⲉⲧⲉⲯⲩⲭⲏ ⲙⲡⲉⲧⲙⲉ ⲙⲙⲟϥ

18 ⲉⲣⲉⲓⲱⲛⲁⲑⲁⲛ ϫⲱ ⲙⲙⲟⲥ ⲛⲁϥ ϫⲉⲣⲁⲥⲧⲉ ⲡⲉ ⲥⲟⲩⲟⲩⲁ ⲙⲡⲉⲃⲟⲧ ⲁⲩⲱ ⲥⲉⲛⲁϣⲓⲛⲉ ϫⲉⲥⲉⲛⲁϯϩⲧⲏⲩ ⲉⲧⲉⲕⲕⲁⲑⲉⲇⲣⲁ

19 ⲉⲧⲣⲉⲕⲣⲙⲉϩϣⲟⲙⲛⲧ ⲉⲕϩⲙⲟⲟⲥ ⲉϩⲣⲁⲓ ⲉⲕⲉⲉⲓ ⲉϩⲣⲁⲓ ⲉⲡⲉⲕⲙⲁ ⲡⲉⲛⲧⲁⲕϩⲟⲡⲕ ⲛϩⲏⲧϥ ϩⲙⲡⲉϩⲟⲟⲩ ⲛⲧⲉⲣⲅⲁⲥⲓⲁ ⲛⲅϩⲙⲟⲟⲥ ⲉϩⲣⲁⲓ ϩⲁⲧⲙ ⲡⲉⲣⲅⲁⲃ ⲉⲧⲙⲙⲁⲩ

20 ⲁⲛⲟⲕ ϯⲛⲁⲟⲩⲁϩⲙⲉⲧ ⲛϣⲟⲙⲛⲧ ⲛⲥⲟⲡ ⲉⲓⲛⲟⲩϫⲉ ⲉⲃⲟⲗ ⲛⲛⲉⲥⲟⲧⲉ ⲉⲓⲛⲟⲩϫⲉ ⲙⲙⲟⲟⲩ ⲉⲁⲣⲙⲁⲇⲇⲁⲣⲓⲙ

21 ⲁⲩⲱ ⲉⲓⲥ ϩⲏⲏⲧⲉ ⲡⲁϩⲙϩⲁⲗ ϯⲛⲁⲟⲩⲁⲧⲃⲉϥ ⲉⲃⲟⲗ ⲉⲓϫⲱ ⲙⲙⲟⲥ ϫⲉⲁⲙⲟⲩ ⲛⲅⲛⲁⲩ ⲉⲛⲁⲓ ⲉⲛⲥⲟⲧⲉ ⲁⲩⲱ ⲉⲓϣⲁⲛϣⲁϫⲉ ⲙⲛⲡϣⲏⲣⲉ ϣⲏⲙ ⲉⲓϫⲱ ⲙⲙⲟⲥ ϫⲉⲉⲣⲉⲡⲥⲟⲧⲉ ϩⲓⲡⲓⲥⲁ ⲙⲙⲟⲕ ⲁⲩⲱ ⲡⲉⲓⲕⲉⲥⲁ ϫⲓⲧⲥ ⲛⲅⲉⲓ ⲉⲓⲉ ⲧⲱⲟⲩⲛ ⲛⲅⲉⲓ ϫⲉⲧⲉⲓⲣⲏⲛⲏ ϣⲟⲟⲡ ⲛⲁⲕ ⲁⲩⲱ ⲙⲛϣⲁϫⲉ ϣⲟⲟⲡ ⲉϥϩⲟⲟⲩ ⲉⲧⲃⲏⲏⲧⲕ ⲉⲓⲥ ⲡϫⲟⲉⲓⲥ ⲟⲛϩ

22 ⲛⲉⲓϣⲁϫⲉ ⲇⲉ ⲉⲓϣⲁⲛϫⲟⲟⲩ ⲙⲡϩⲙϩⲁⲗ ϫⲉⲉⲣⲉⲡⲥⲟⲧⲉ ϩⲓⲡⲓⲥⲁ ⲙⲙⲟⲕ ⲁⲩⲱ ⲥⲟⲩⲏⲩ ⲙⲙⲟⲕ ⲉⲓⲉ ⲧⲱⲟⲩⲛ ⲛⲅⲃⲱⲕ ϫⲉⲁⲡϫⲟⲉⲓⲥ ϫⲟⲟⲩⲕ ⲉⲃⲱⲕ

23 ⲁⲩⲱ ⲉⲧⲃⲉⲡϣⲁϫⲉ ⲛⲧⲁⲛϫⲟⲟϥ ⲁⲛⲟⲕ ⲛⲙⲙⲁⲕ ⲉⲓⲥ ⲡϫⲟⲉⲓⲥ ⲟ ⲙⲙⲛⲧⲣⲉ ϩⲛⲧⲁⲙⲏⲧⲉ ⲙⲛⲧⲉⲕⲙⲏⲧⲉ ⲛϣⲁ ⲉⲛⲉϩ

24 ⲇⲁⲩⲉⲓⲇ ⲇⲉ ⲁϥϩⲟⲡϥ ϩⲛⲧⲥⲱϣⲉ ϩⲏ ⲇⲉ ⲙⲡⲉⲃⲟⲧ ⲛⲧⲉⲣⲉϥϣⲱⲡⲉ ⲡⲣⲣⲟ ⲁϥⲃⲱⲕ ⲉϩⲟⲩⲛ ⲉϫⲛⲧⲉⲧⲣⲁⲡⲉⲍⲁ ⲉⲟⲩⲱⲙ

25 ⲁⲩⲱ ⲡⲣⲣⲟ ⲁϥϩⲙⲟⲟⲥ ϩⲓϫⲛⲧⲉϥⲕⲁⲑⲉⲇⲣⲁ ⲛⲧϩⲉ ⲛⲧϣⲁϥⲁⲁⲥ ⲇⲉ ⲙⲡⲥⲟⲡ ⲉϣⲁϥϩⲙⲟⲟⲥ ϩⲓϫⲛⲧⲕⲁⲑⲉⲇⲣⲁ ϩⲁⲧⲉ ⲧϫⲟ ⲁⲩⲱ ⲓⲱⲛⲁⲑⲁⲛ ⲁϥϩⲙⲟⲟⲥ ϩⲓϩⲏ ⲙⲙⲟϥ ⲛⲥⲁⲟⲩⲛⲁⲙ ⲁⲃⲉⲛⲛⲏⲣ ϩⲱⲱϥ ⲁϥϩⲙⲟⲟⲥ ⲛⲥⲁϩⲃⲟⲩⲣ ⲙⲡⲣⲣⲟ ⲡⲙⲁ ⲛⲉϩⲙⲟⲟⲥ ⲇⲉ ⲛⲇⲁⲩⲉⲓⲇ ⲁϥϯϩⲧⲏϥ ⲉⲣⲟϥ

26 ⲁⲩⲱ ⲙⲡⲉⲥⲁⲟⲩⲗ ϫⲉⲗⲁⲁⲩ ⲛϣⲁϫⲉ ϩⲙⲡⲉϩⲟⲟⲩ ⲉⲧⲙⲙⲁⲩ ϫⲉⲛⲧⲁϥϫⲟⲟⲥ ϫⲉⲙⲉϣⲁⲕ ⲟⲩⲧⲱϣ ⲛϫⲱϩⲙ ⲡⲉ ⲛⲧⲁϥϣⲱⲡⲉ ⲙⲙⲟϥ ⲉⲧⲓ ⲉϥϣⲟⲟⲡ ϩⲙⲡϫⲱϩⲙ ⲙⲡⲁⲧϥⲉⲓⲁⲁϥ ⲉⲃⲟⲗ

27 ⲁⲥϣⲱⲡⲉ ⲇⲉ ⲙⲡⲉϥⲣⲁⲥⲧⲉ ⲙⲡⲙⲉϩϩⲟⲟⲩ ⲥⲛⲁⲩ ⲙⲡⲉⲃⲟⲧ ⲁⲩϯϩⲧⲏⲩ ⲉⲡⲙⲁ ⲛⲇⲁⲩⲉⲓⲇ ⲡⲉϫⲉⲥⲁⲟⲩⲗ ⲛⲓⲱⲛⲁⲑⲁⲛ ⲡⲉϥϣⲏⲣⲉ ϫⲉⲉⲧⲃⲉⲟⲩ ⲣⲱ ⲙⲡⲉⲡϣⲏⲣⲉ ⲛⲓⲉⲥⲥⲁⲓ ⲉⲓ ⲛⲥⲁϥ ⲙⲛⲡⲟⲟⲩ ⲉϩⲙⲟⲟⲥ ⲉⲧⲉⲧⲣⲁⲡⲉⲍⲁ ⲉⲟⲩⲱⲙ

28 ⲓⲱⲛⲁⲑⲁⲛ ⲇⲉ ⲁϥⲣⲟⲩⲱ ⲛⲥⲁⲟⲩⲗ ⲉϥϫⲱ ⲙⲙⲟⲥ ϫⲉⲇⲁⲩⲉⲓⲇ ⲁϥⲁⲝⲓⲟⲩ ⲙⲙⲟⲓ ⲉⲧⲣⲉϥⲃⲱⲕ ⲉϩⲣⲁⲓ ϣⲁⲃⲏⲑⲗⲉⲉⲙ ⲧⲉϥⲡⲟⲗⲓⲥ

29 ⲉϥϫⲱ ⲙⲙⲟⲥ ⲛⲁⲓ ϫⲉⲕⲁⲁⲧ ⲛⲧⲁⲃⲱⲕ ⲙⲡϩⲟⲟⲩ ϫⲉⲟⲩⲑⲩⲥⲓⲁ ⲧⲉⲧⲛⲁϣⲱⲡⲉ ⲛⲧⲉⲡϩⲩⲗⲏ ϩⲛⲧⲡⲟⲗⲓⲥ ⲁⲩⲱ ⲛⲁⲥⲛⲏⲩ ⲁⲩϩⲱⲛ ⲉⲧⲟⲟⲧⲉⲧⲃⲉⲡⲁⲓ ⲧⲉⲛⲟⲩ ϭⲉ ⲉϣⲱⲡⲉ ⲁⲓϭⲉⲛⲭⲁⲣⲓⲥ ⲛⲁϩⲣⲁⲕ ⲉⲓⲉ ϯⲛⲁⲧⲱϣ ⲉⲃⲱⲕ ⲛⲧⲁⲛⲁⲩ ⲉⲛⲁⲥⲛⲏⲩ ⲉⲧⲃⲉⲡⲁⲓ ⲙⲡⲉϥϩⲙⲟⲟⲥ ⲉⲧⲉⲧⲣⲁⲡⲉⲍⲁ ⲙⲡⲣⲣⲟ

30 ⲁⲩⲱ ⲥⲁⲟⲩⲗ ⲁϥϭⲱⲛⲧ ⲉⲙⲁⲧⲉ ϩⲛⲟⲩⲟⲣⲅⲏ ⲉⲓⲱⲛⲁⲑⲁⲛ ⲡⲉϫⲁϥ ⲉϩⲟⲩⲛ ⲉϩⲣⲁϥ ϫⲉⲡϣⲏⲣⲉ ⲛⲛⲉϩⲓⲟⲙⲉ ⲉⲧⲛⲏϫ ⲉⲃⲟⲗ ⲙⲏ ⲛϯⲥⲟⲟⲩⲛ ⲅⲁⲣ ⲁⲛ ϫⲉⲛⲧⲟⲕ ⲕⲟ ⲛϣⲃⲏⲣ ⲉⲡϣⲏⲣⲉ ⲛⲓⲉⲥⲥⲁⲓ ⲉⲩϣⲓⲡⲉ ⲛⲁⲕ ⲁⲩⲱ ⲉⲩϣⲓⲡⲉ ⲙⲡϭⲱⲗⲡ ⲉⲃⲟⲗ ⲛⲧⲉⲕⲙⲁⲁⲩ

31 ϫⲉⲛⲉϩⲟⲟⲩ ⲧⲏⲣⲟⲩ ⲉⲣⲉⲡϣⲏⲣⲉ ⲛⲓⲉⲥⲥⲁⲓ ⲛⲁⲁⲁⲩ ⲉϥⲟⲛϩ ⲛϩⲏⲧⲟⲩ ϩⲓϫⲙⲡⲕⲁϩ ⲛⲅⲛⲁⲥⲁϩⲉ ⲁⲛ ⲛⲧⲟⲕ ⲙⲛⲧⲉⲕⲙⲛⲧⲣⲣⲟ ⲧⲉⲛⲟⲩ ϭⲉ ϫⲟⲟⲩ ⲉⲧⲣⲉⲩⲛⲡϣⲏⲣⲉ ϣⲏⲙ ϫⲉⲡⲁⲓ ⲟⲩϣⲏⲣⲉ ⲡⲉ ⲉϥⲙⲡϣⲁ ⲙⲡⲙⲟⲩ

32 ⲁⲩⲱ ⲓⲱⲛⲁⲑⲁⲛ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲙⲡⲉϥⲉⲓⲱⲧ ϫⲉⲉⲧⲃⲉⲟⲩ ⲉϥⲛⲁⲙⲟⲩ ⲟⲩ ⲡⲉ ⲡⲛⲟⲃⲉ ⲛⲧⲁϥⲁⲁϥ

33 ⲁⲩⲱ ⲥⲁⲟⲩⲗ ⲁϥϥⲓ ⲉϩⲣⲁⲓ ⲛⲧⲉϥⲗⲟⲅⲭⲏ ⲉⲛⲟϫⲥ ⲛⲥⲁⲓⲱⲛⲁⲑⲁⲛ ⲉⲙⲟⲟⲩⲧϥ ⲓⲱⲛⲁⲑⲁⲛ ⲇⲉ ⲁϥⲉⲓⲙⲉ ϫⲉⲁⲧⲕⲁⲕⲓⲁ ϫⲱⲕ ⲉⲃⲟⲗ ⲛⲧⲟⲟⲧϥ ⲙⲡⲉϥⲉⲓⲱⲧ ⲉⲧⲣⲉϥⲙⲟⲩⲟⲩⲧ ⲛⲇⲁⲩⲉⲓⲇ

34 ⲓⲱⲛⲁⲑⲁⲛ ⲇⲉ ⲁϥⲁⲛⲅϥ ⲉϩⲣⲁⲓ ϩⲓϫⲛⲧⲉⲧⲣⲁⲡⲉⲍⲁ ϩⲛⲧⲟⲣⲅⲏ ⲙⲡⲉϥϭⲱⲛⲧ ⲉⲙⲡⲉϥϩⲙⲟⲟⲥ ⲉϩⲣⲁⲓ ϩⲙⲡⲉϩⲟⲟⲩ ⲉⲧⲙⲙⲁⲩ ⲉⲧⲉⲡⲉⲥⲛⲁⲩ ⲡⲉ ⲙⲡⲉⲃⲟⲧ ⲉⲟⲩⲉⲙⲟⲉⲓⲕ ⲙⲛⲡⲉϥⲉⲓⲱⲧ ⲉⲃⲟⲗ ϫⲉⲁϥⲟⲩⲱⲗⲥ ⲛϩⲏⲧ ⲉϫⲛⲇⲁⲩⲉⲓⲇ ϫⲉⲁⲧⲕⲁⲕⲓⲁ ⲙⲡⲉϥⲉⲓⲱⲧ ϫⲱⲕ ⲉⲃⲟⲗ ⲉϫⲱϥ

35 ⲁⲥϣⲱⲡⲉ ⲇⲉ ⲉϩⲧⲟⲟⲩⲉ ⲙⲡⲉϥⲣⲁⲥⲧⲉ ⲓⲱⲛⲁⲑⲁⲛ ⲁϥⲃⲱⲕ ⲉⲃⲟⲗ ⲉⲧⲥⲱϣⲉ ⲕⲁⲧⲁⲡⲧⲁⲥⲥⲉ ⲛⲧⲁϥⲧⲁⲁϥ ⲛⲇⲁⲩⲉⲓⲇ ϩⲛⲟⲩⲙⲛⲧⲙⲛⲧⲣⲉ ⲉⲣⲉⲟⲩϩⲙϩⲁⲗ ⲕⲟⲩⲓ ⲛⲙⲙⲁϥ

36 ⲡⲉϫⲉⲓⲱⲛⲁⲑⲁⲛ ⲙⲡϩⲙϩⲁⲗ ϫⲉⲃⲟϭⲕ ⲛⲅⲛⲁⲩ ⲛⲁⲓ ⲉⲛⲥⲟⲧⲉ ⲛⲧⲁⲓⲛⲟⲩϫⲉ ⲉⲃⲟⲗ ⲛϩⲏⲧⲟⲩ ⲡϩⲙϩⲁⲗ ⲇⲉ ⲁϥⲡⲱⲧ ⲓⲱⲛⲁⲑⲁⲛ ⲇⲉ ⲛⲉϥⲛⲉϫⲥⲟⲧⲉ ⲉⲁϥⲡⲁⲣⲁⲗⲁⲥⲥⲉ ⲙⲙⲟⲥ

37 ⲁⲩⲱ ⲡϩⲙϩⲁⲗ ⲁϥⲉⲓ ⲉϩⲣⲁⲓ ⲉϫⲙⲡⲙⲁ ⲉⲧⲉⲣⲉⲡⲥⲟⲧⲉ ⲛϩⲏⲧϥ ⲡⲙⲁ ⲛⲧⲁⲓⲱⲛⲁⲑⲁⲛ ⲛⲟϫⲥ ⲉⲣⲟϥ ⲁⲩⲱ ⲓⲱⲛⲁⲑⲁⲛ ⲁϥⲱϣ ⲉⲃⲟⲗ ⲉϥϫⲱ ⲙⲙⲟⲥ ϫⲉⲉⲣⲉⲡⲥⲟⲧⲉ ϩⲓⲡⲓⲥⲁ ⲙⲙⲟⲕ ⲁⲩⲱ ⲥⲟⲩⲏⲩ ⲟⲛ ⲙⲙⲟⲕ

38 ⲓⲱⲛⲁⲑⲁⲛ ⲇⲉ ⲟⲛ ⲁϥⲱϣ ⲉⲃⲟⲗ ⲟⲩⲃⲉ ⲡⲉϥϩⲙϩⲁⲗ ⲉϥⲱϣ ⲉⲃⲟⲗ ⲉϥϫⲱ ⲙⲙⲟⲥ ⲛⲁϥ ϫⲉⲧⲁⲭⲏ ⲁⲛⲓⲥⲟⲩ ⲁⲩⲱ ⲛⲅⲧⲉⲙⲁϩⲉⲣⲁⲧⲕ ⲛⲗⲁⲁⲩ ⲁⲩⲱ ⲡϩⲙϩⲁⲗ ⲛⲓⲓⲱⲛⲁⲑⲁⲛ ⲁϥⲕⲉⲧϥ ⲛⲥⲟⲧⲉ ⲁϥⲉⲛⲧⲟⲩ ⲉⲣⲁⲧϥ ⲙⲡⲉϥϫⲟⲉⲓⲥ

39 ⲡϩⲙϩⲁⲗ ⲇⲉ ⲛⲉϥⲥⲟⲟⲩⲛ ⲁⲛ ⲛⲗⲁⲁⲩ ⲛϩⲱⲃ ⲛⲥⲁⲓⲱⲛⲁⲑⲁⲛ ⲙⲛⲇⲁⲩⲉⲓⲇ ⲛⲧⲟⲟⲩ ⲉⲧⲥⲟⲟⲩⲛ ⲙⲡⲉⲩϣⲁϫⲉ

40 ⲓⲱⲛⲁⲑⲁⲛ ⲇⲉ ⲁϥⲧⲁⲗⲉⲛⲉϥϩⲛⲁⲁⲩ ⲉϫⲙⲡⲉϥϩⲙϩⲁⲗ ⲡⲉϫⲁϥ ⲛⲁϥ ϫⲉⲙⲟⲟϣⲉ ⲛⲅⲃⲱⲕ ⲉϩⲟⲩⲛ ⲉⲧⲡⲟⲗⲓⲥ

41 ⲡϩⲙϩⲁⲗ ⲇⲉ ⲛⲧⲉⲣⲉϥⲣⲡϩⲟⲩⲛ ⲛⲧⲡⲟⲗⲓⲥ ⲇⲁⲩⲉⲓⲇ ⲁϥⲧⲱⲟⲩⲛ ⲁϥⲉⲓ ⲉⲃⲟⲗ ϩⲙⲡⲙⲁ ⲉⲛⲉϥⲛϩⲏⲧϥ ⲁϥⲡⲁϩⲧϥ ϩⲓϫⲙⲡⲉϥϩⲟ ⲁϥⲟⲩⲱϣⲧ ⲛⲁϥ ⲛϣⲟⲙⲛⲧ ⲛⲥⲟⲡ ⲁⲩⲱ ⲁⲩϯⲡⲓ ⲉⲣⲉⲛⲛⲉⲩⲉⲣⲏⲩ ⲁⲩⲣⲓⲙⲉ ⲟⲛ ⲉϩⲟⲩⲛ ⲉⲛⲉⲩⲉⲣⲏⲩ ϣⲁⲟⲩⲛⲟϭ ⲛⲕⲁⲩ

42 ⲡⲉϫⲉⲓⲱⲛⲁⲑⲁⲛ ⲛⲇⲁⲩⲉⲓⲇ ϫⲉⲃⲱⲕ ϩⲛⲟⲩⲉⲓⲣⲏⲛⲏ ⲁⲩⲱ ⲕⲁⲧⲁⲧϩⲉ ⲛⲧⲁⲛⲱⲣⲕ ⲛⲛⲉⲛⲉⲣⲏⲩ ϩⲙⲡⲣⲁⲛ ⲙⲡϫⲟⲉⲓⲥ ⲉⲛϫⲱ ⲙⲙⲟⲥ ϫⲉⲡϫⲟⲉⲓⲥ ⲉϥⲉϣⲱⲡⲉ ⲙⲙⲛⲧⲣⲉ ϩⲛⲧⲁⲙⲏⲧⲉ ⲛⲙⲙⲁⲕ ⲁⲩⲱ ϩⲛⲧⲙⲏⲧⲉ ⲙⲡⲉⲕⲥⲡⲉⲣⲙⲁ ⲁⲩⲱ ϩⲛⲧⲙⲏⲧⲉ ⲙⲡⲁⲥⲡⲉⲣⲙⲁ ⲛϣⲁ ⲉⲛⲉϩ ⲉϥⲉϣⲱⲡⲉ ⲟⲛ ⲉϥⲟ ⲙⲙⲛⲧⲣⲉ