Read 1 Samuel 19 side by side with translations · The Final Bible
1 ⲁⲩⲱ ⲥⲁⲟⲩⲗ ⲁϥϣⲁϫⲉ ⲙⲛⲓⲱⲛⲁⲑⲁⲛ ⲡⲉϥϣⲏⲣⲉ ⲁⲩⲱ ⲛⲉϥϩⲙϩⲁⲗ ⲧⲏⲣⲟⲩ ⲉⲙⲟⲩⲟⲩⲧ ⲛⲇⲁⲩⲉⲓⲇ
2 ⲓⲱⲛⲁⲑⲁⲛ ⲇⲉ ⲡϣⲏⲣⲉ ⲛⲥⲁⲟⲩⲗ ⲛⲉϥⲙⲉ ⲛⲇⲁⲩⲉⲓⲇ ⲉⲙⲁⲧⲉ ⲁⲩⲱ ⲓⲱⲛⲁⲑⲁⲛ ⲁϥⲧⲁⲙⲉⲇⲁⲇ ⲉϥϫⲱ ⲙⲙⲟⲥ ϫⲉⲥⲁⲟⲩⲗ ⲕⲱⲧⲉ ⲛⲥⲁⲙⲟⲟⲩⲧⲕ ⲧⲉⲛⲟⲩ ϭⲉ ϩⲁⲣⲕ ⲙⲡⲛⲁⲩ ⲛϩⲧⲟⲟⲩⲉ ⲛⲣⲁⲥⲧⲉ ⲛⲅⲟⲗⲕ ⲛⲅϩⲙⲟⲟⲥ ⲛⲧⲟⲕ ϩⲛⲟⲩⲙⲁ ⲛϩⲱⲡ
3 ⲁⲩⲱ ⲁⲛⲟⲕ ϯⲛⲁⲧⲱⲟⲩⲛ ϩⲁⲧⲙ ⲡⲁⲉⲓⲱⲧ ⲛⲧⲁⲉⲓ ⲛⲁⲕ ⲉⲧⲥⲱϣⲉ ⲉⲡⲙⲁ ⲉⲧⲉⲕⲛⲁϣⲱⲡⲉ ⲛϩⲏⲧϥ ⲁⲛⲟⲕ ⲟⲛ ϯⲛⲁϣⲁϫⲉ ⲙⲛⲡⲁⲉⲓⲱⲧ ⲉⲧⲃⲏⲏⲧⲕ ⲛⲧⲁⲛⲁⲩ ⲉⲡⲉⲧⲉϥⲛⲁϫⲟⲟϥ ⲁⲩⲱ ⲡϣⲁϫⲉ ⲉⲧⲛⲏⲩ ⲉⲃⲟⲗ ϯⲛⲁⲧⲁⲩⲟϥ ⲉⲣⲟⲕ
4 ⲓⲱⲛⲁⲑⲁⲛ ⲇⲉ ⲁϥϣⲁϫⲉ ⲙⲛⲥⲁⲟⲩⲗ ⲡⲉϥⲉⲓⲱⲧ ⲉⲧⲃⲉⲇⲁⲩⲉⲓⲇ ⲕⲁⲗⲱⲥ ⲉϥϫⲱ ⲙⲙⲟⲥ ⲛⲁϥ ϫⲉⲙⲡⲉⲣⲧⲣⲉⲡⲣⲣⲟ ⲣⲛⲟⲃⲉ ⲉⲇⲁⲩⲉⲓⲇ ⲡⲉϥϩⲙϩⲁⲗ ϫⲉⲙⲡⲉϥⲣⲛⲟⲃⲉ ⲉⲣⲟⲕ ⲁⲩⲱ ⲛⲉϥϩⲃⲏⲩⲉ ⲛⲁⲛⲟⲩⲟⲩ ⲉⲙⲁⲧⲉ
5 ⲁⲩⲱ ⲕⲥⲟⲟⲩⲛ ϫⲉⲁϥⲕⲁⲧⲉϥⲯⲩⲭⲏ ϩⲛⲛⲉϥϭⲓϫ ⲁϥⲃⲱⲕ ⲉⲃⲟⲗ ⲁϥⲡⲁⲧⲁⲥⲥⲉⲓ ⲙⲡⲁⲗⲗⲟⲫⲩⲗⲟⲥ ⲁⲩⲱ ⲡϫⲟⲉⲓⲥ ⲁϥⲉⲓⲣⲉ ⲛⲟⲩⲛⲟϭ ⲛⲟⲩϫⲁⲓ ⲙⲡⲓⲥⲣⲁⲏⲗ ⲁⲩⲛⲁⲩ ⲉⲡⲟⲩϫⲁⲓ ⲁⲩⲣⲁϣⲉ ⲉⲧⲃⲉⲟⲩ ϭⲉ ⲉⲕⲛⲁⲣⲛⲟⲃⲉ ⲉⲩⲥⲛⲟϥ ⲛⲁⲧⲛⲟⲃⲉ ⲉⲙⲟⲩⲟⲩⲧ ϩⲓⲛⲁⲓ ⲛⲇⲁⲩⲉⲓⲇ ⲉⲡϫⲓⲛϫⲏ
6 ⲥⲁⲟⲩⲗ ⲇⲉ ⲁϥⲥⲱⲧⲙ ⲛⲥⲁⲡⲉϩⲣⲟⲟⲩ ⲛⲓⲱⲛⲁⲑⲁⲛ ⲡⲉϥϣⲏⲣⲉ ⲁⲩⲱ ⲥⲁⲟⲩⲗ ⲁϥⲱⲣⲕ ⲉϥϫⲱ ⲙⲙⲟⲥ ϫⲉⲡϫⲟⲉⲓⲥ ⲟⲛϩ ⲉϣⲱⲡⲉ ⲇⲁⲩⲉⲓⲇ ⲛⲁⲙⲟⲩ
7 ⲁⲩⲱ ⲓⲱⲛⲁⲑⲁⲛ ⲁϥⲙⲟⲩⲧⲉ ⲉⲇⲁⲩⲉⲓⲇ ⲁϥⲧⲁⲩⲟ ⲉⲣⲟϥ ⲛⲛⲉⲓϣⲁϫⲉ ⲧⲏⲣⲟⲩ ⲁⲩⲱ ⲓⲱⲛⲁⲑⲁⲛ ⲁϥϫⲓ ⲛⲇⲁⲩⲉⲓⲇ ⲉⲣⲁⲧϥ ⲛⲥⲁⲟⲩⲗ ⲁⲩⲱ ⲛⲉϥϩⲁ ⲡⲉϥϩⲟ ⲡⲉ ⲛⲧϩⲉ ⲛⲥⲁϥ ⲙⲛϣⲉⲙⲛⲧ ⲙⲡϩⲟⲟⲩ ⲛϩⲟⲟⲩ
8 ⲡⲡⲟⲗⲉⲙⲟⲥ ⲇⲉ ⲁϥⲟⲩⲱϩ ⲉⲧⲟⲟⲧϥ ⲉⲧⲣⲉϥϣⲱⲡⲉ ⲁⲩⲱ ⲇⲁⲩⲉⲓⲇ ⲁϥϭⲙϭⲟⲙ ⲁϥⲡⲟⲗⲉⲙⲉⲓ ⲙⲛⲛⲁⲗⲗⲟⲫⲩⲗⲟⲥ ⲁϥⲡⲁⲧⲁⲥⲥⲉⲓ ⲙⲙⲟⲟⲩ ⲛⲟⲩⲛⲟϭ ⲉⲙⲁⲧⲉ ⲙⲡⲗⲏⲅⲏ ⲁⲩⲱ ⲁⲩⲡⲱⲧ ϩⲁⲡⲉϥϩⲟ
9 ⲟⲩⲡⲛⲉⲩⲙⲁ ⲙⲡⲟⲛⲏⲣⲟⲛ ⲛⲧⲉⲡⲛⲟⲩⲧⲉ ⲁϥⲉⲓ ⲉϩⲣⲁⲓ ⲉϫⲛⲥⲁⲟⲩⲗ ⲁⲩⲱ ⲛⲧⲟϥ ⲛⲉϥⲛⲕⲟⲧⲕ ϩⲙⲡⲉϥⲏⲓ ⲛⲉϥⲛⲏϫ ⲉⲣⲉⲧⲉϥⲗⲟⲅⲭⲏ ϩⲛⲧⲉϥϭⲓϫ ⲇⲁⲩⲉⲓⲇ ⲇⲉ ⲛⲉϥⲯⲁⲗⲗⲉⲓ ϩⲙⲡⲟⲣⲅⲁⲛⲟⲛ ⲉⲧϩⲛⲛⲉϥϭⲓϫ
10 ⲁⲩⲱ ⲥⲁⲟⲩⲗ ⲉϥⲕⲱⲧⲉ ⲛⲥⲁⲧϩⲏ ⲛⲣⲱϩⲧ ⲛⲇⲁⲩⲉⲓⲇ ϩⲛⲧⲗⲟⲅⲭⲏ ⲉⲧϩⲛⲧⲉϥϭⲓϫ ⲇⲁⲩⲉⲓⲇ ⲇⲉ ⲁϥⲡⲟϣⲥϥ ϩⲁⲡϩⲟ ⲛⲥⲁⲟⲩⲗ ⲁⲩⲱ ⲥⲁⲟⲩⲗ ⲁⲧⲉϥⲗⲟⲅⲭⲏ ⲧⲱⲝ ⲉϩⲟⲩⲛ ⲉⲧϫⲟ ⲇⲁⲩⲉⲓⲇ ⲁϥⲟⲗϥ ⲁϥⲟⲩϫⲁⲓ ⲁⲩⲱ ⲧⲗⲟⲅⲭⲏ ⲁⲩⲧⲟⲕⲙⲉⲥ ⲉⲃⲟⲗ ϩⲛⲧϫⲟ
11 ⲁⲥϣⲱⲡⲉ ⲇⲉ ϩⲛⲧⲉⲟⲩϣⲏ ⲉⲧⲙⲙⲁⲩ ⲥⲁⲟⲩⲗ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲉⲡⲏⲓ ⲛⲇⲁⲩⲉⲓⲇ ⲉⲣⲟⲉⲓⲥ ⲉⲣⲟϥ ⲉⲧⲣⲉϥⲙⲟⲟⲩⲧϥ ⲉϩⲧⲟⲟⲩⲉ ⲙⲉⲗⲭⲱⲗ ⲇⲉ ⲧⲉϥⲥϩⲓⲙⲉ ⲁⲥⲧⲁⲙⲉⲇⲁⲇ ⲉⲥϫⲱ ⲙⲙⲟⲥ ⲛⲁϥ ϫⲉⲛⲧⲟⲕ ⲉⲕⲧⲙⲛⲉϩⲙⲧⲉⲕⲯⲩⲭⲏ ⲛϯⲟⲩϣⲏ ⲥⲉⲛⲁⲙⲟⲟⲩⲧⲕ ⲛⲣⲁⲥⲧⲉ
12 ⲁⲩⲱ ⲙⲉⲗⲭⲱⲗ ⲁⲥⲟⲩⲱⲧⲃ ⲛⲇⲁⲩⲉⲓⲇ ⲉⲃⲟⲗ ϩⲙⲡϣⲟⲩϣⲧ ⲁϥⲧⲱⲟⲩⲛ ⲁϥⲡⲱⲧ ⲁϥⲛⲁϩⲙⲉϥ
13 ⲙⲉⲗⲭⲱⲗ ⲇⲉ ⲁⲥϫⲓ ⲛⲛⲉⲥⲙⲟⲧ ⲛⲧⲕⲁⲓⲥⲉ ⲁⲥⲕⲁⲁⲩ ϩⲓϫⲙⲡⲙⲁ ⲛⲛⲕⲟⲧⲕ ⲁⲩⲱ ⲟⲩϩⲏⲡⲁⲣ ⲛⲃⲁⲁⲙⲡⲉ ⲁⲥⲕⲁⲁϥ ϩⲓϫⲱϥ ⲁⲥϩⲟⲃⲥϥ ⲛⲟⲩϩⲟⲉⲓⲧⲉ
14 ⲥⲁⲟⲩⲗ ⲇⲉ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲉϫⲓ ⲛⲇⲁⲩⲉⲓⲇ ⲛⲁϥ ⲡⲉϫⲁⲩ ϫⲉϥⲙⲟⲕϩ ⲛϣⲱⲛⲉ
15 ⲥⲁⲟⲩⲗ ⲇⲉ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲛⲥⲁⲇⲁⲩⲉⲓⲇ ⲉϥϫⲱ ⲙⲙⲟⲥ ⲛⲁⲩ ϫⲉⲧⲁⲗⲟϥ ⲉϫⲙⲡⲉⲓϭⲗⲟϭ ⲛⲧⲉⲧⲛⲛⲧϥ ⲛⲁⲓ ϫⲉⲉⲓⲉⲙⲟⲟⲩⲧϥ
16 ⲛⲃⲁⲓϣⲓⲛⲉ ⲇⲉ ⲁⲩⲉⲓ ⲁⲩⲱ ⲉⲓⲥ ⲛⲉⲥⲙⲟⲧ ⲛⲧⲕⲁⲓⲥⲉ ⲛⲉⲩϩⲓϫⲙⲡⲉϭⲗⲟϭ ⲁⲩⲱ ⲟⲩϩⲩⲡⲁⲣ ⲛⲃⲁⲁⲙⲡⲉ ⲛⲉϥⲕⲏ ϩⲁϫⲱϥ
17 ⲡⲉϫⲉⲥⲁⲟⲩⲗ ⲙⲙⲉⲗⲭⲱⲗ ϫⲉⲉⲧⲃⲉⲟⲩ ⲁⲣⲉⲣϩⲁⲗ ⲙⲙⲟⲓ ϩⲓⲛⲁⲓ ⲁⲩⲱ ⲁⲣⲕⲱ ⲉⲃⲟⲗ ⲙⲡⲁϫⲁϫⲉ ⲁϥⲛⲟⲩϩⲙ ⲡⲉϫⲉⲙⲉⲗⲭⲱⲗ ⲛⲥⲁⲟⲩⲗ ϫⲉⲛⲧⲟϥ ⲡⲉ ⲛⲧⲁϥϫⲟⲟⲥ ⲛⲁⲓ ϫⲉⲕⲁⲁⲧ ⲉⲃⲟⲗ ⲛⲧⲁⲃⲱⲕ ⲉϣⲱⲡⲉ ⲙⲙⲟⲛ ϯⲛⲁⲙⲟⲟⲩⲧⲉ
18 ⲇⲁⲩⲉⲓⲇ ⲇⲉ ⲁϥⲡⲱⲧ ⲁϥⲛⲟⲩϩⲙ ⲁϥⲉⲓ ⲉⲣⲁⲧϥ ⲛⲥⲁⲙⲟⲩⲏⲗ ⲉⲁⲣⲙⲁⲑⲁⲓⲙ ⲁϥⲧⲁⲩⲉⲑⲉ ⲉⲣⲟϥ ⲛϩⲱⲃ ⲛⲓⲙ ⲛⲧⲁⲥⲁⲟⲩⲗ ⲁⲁⲩ ⲛⲁϥ ⲁⲩⲃⲱⲕ ⲇⲉ ⲛϭⲓⲇⲁⲩⲉⲓⲇ ⲙⲛⲥⲁⲙⲟⲩⲏⲗ ⲁⲩϩⲙⲟⲟⲥ ϩⲛⲁⲩⲁⲑ ⲛⲧⲉϩⲣⲁⲙⲙⲁ
19 ⲁⲩⲧⲁⲙⲉⲥⲁⲟⲩⲗ ⲉⲩϫⲱ ⲙⲙⲟⲥ ⲛⲁϥ ϫⲉⲉⲓⲥⲇⲁⲩⲉⲓⲇ ϩⲛⲁⲩⲁⲑ ⲛⲧⲉϩⲣⲁⲙⲙⲁ
20 ⲁⲩⲱ ⲥⲁⲟⲩⲗ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲉϭⲱⲡⲉ ⲛⲇⲁⲩⲉⲓⲇ ⲁⲩⲱ ⲁⲩⲛⲁⲩ ⲉⲧⲉⲕⲕⲗⲏⲥⲓⲁ ⲛⲛⲉⲡⲣⲟⲫⲏⲧⲏⲥ ⲁⲩⲱ ⲥⲁⲙⲟⲩⲏⲗ ⲛⲉϥⲁϩⲉⲣⲁⲧϥ ϩⲓϫⲱⲟⲩ ⲡⲉⲡⲛⲉⲩⲙⲁ ⲇⲉ ⲙⲡⲛⲟⲩⲧⲉ ⲁϥⲉⲓ ⲉϫⲛⲛⲉⲃⲁⲓϣⲓⲛⲉ ⲛⲥⲁⲟⲩⲗ ⲁⲩⲡⲣⲟⲫⲏⲧⲉⲩⲉ ϩⲱⲟⲩ
21 ⲁⲩⲧⲁⲙⲉⲥⲁⲟⲩⲗ ⲇⲉ ⲉⲡⲉⲛⲧⲁϥϣⲱⲡⲉ ⲁϥϫⲟⲟⲩ ⲛϩⲉⲛⲕⲉⲃⲁⲓϣⲓⲛⲉ ⲛⲧⲟⲟⲩ ϩⲱⲟⲩ ⲁⲩⲡⲣⲟⲫⲏⲧⲉⲩⲉ ⲁϥⲟⲩⲱϩ ⲉⲧⲟⲟⲧϥ ⲉϫⲟⲟⲩ ⲛϭⲓⲥⲁⲟⲩⲗ ⲙⲡⲙⲉϩϣⲟⲙⲛⲧ ⲛⲥⲟⲡ ⲛϩⲉⲛⲕⲉⲃⲁⲓϣⲓⲛⲉ ⲛⲧⲟⲟⲩ ϩⲱⲟⲩ ⲟⲛ ⲁⲩⲡⲣⲟⲫⲏⲧⲉⲩⲉ
22 ⲥⲁⲟⲩⲗ ⲇⲉ ⲁϥⲛⲟⲩϭⲥ ϩⲛⲟⲩϭⲱⲛⲧ ⲁϥⲃⲱⲕ ϩⲱⲱϥ ⲉϩⲟⲩⲛ ⲉⲁⲣⲙⲁⲑⲁⲓⲙ ⲁϥⲉⲓ ϣⲁⲉϩⲣⲁⲓ ⲉⲧϣⲱⲧⲉ ⲛⲧⲉⲣϫⲛⲟⲟⲩ ⲉⲧϩⲛⲥⲉⲫⲓ ⲥⲁⲟⲩⲗ ⲇⲉ ⲁϥϣⲓⲛⲉ ⲉϥϫⲱ ⲙⲙⲟⲥ ϫⲉⲉⲣⲉⲥⲁⲙⲟⲩⲏⲗ ⲛⲧⲱⲛ ⲡⲉϫⲁⲩ ⲛⲁϥ ϫⲉⲉⲓⲥϩⲏⲏⲧⲉ ϥϩⲛⲁⲩⲁⲑ ⲛⲧⲉϩⲣⲁⲙⲙⲁ
23 ⲥⲁⲟⲩⲗ ⲇⲉ ⲁϥⲃⲱⲕ ⲉϩⲣⲁⲓ ⲉⲁⲩⲁⲑ ⲛⲧⲉϩⲣⲁⲙⲙⲁ ⲁⲩⲱ ⲡⲉⲡⲛⲉⲩⲙⲁ ⲙⲡⲛⲟⲩⲧⲉ ⲁϥⲉⲓ ⲉϫⲱϥ ϩⲱⲱϥ ⲁⲩⲱ ⲛⲉϥⲙⲟⲟϣⲉ ⲉϥⲡⲣⲟⲫⲏⲧⲉⲩⲉ ϣⲁⲛⲧⲉϥⲉⲓ ⲉϩⲣⲁⲓ ⲉⲁⲩⲁⲑ ⲛⲧⲉϩⲣⲁⲙⲙⲁ
24 ⲁⲩⲱ ⲁϥⲕⲁⲁϥ ⲕⲁϩⲏⲩ ⲛⲛⲉϥϩⲟⲉⲓⲧⲉ ⲁϥϭⲱ ⲉϥⲡⲣⲟⲫⲏⲧⲉⲩⲉ ⲙⲡⲉⲙⲧⲟ ⲉⲃⲟⲗ ⲛⲥⲁⲙⲟⲩⲏⲗ ⲁⲩⲱ ⲁϥϩⲉ ⲉϩⲣⲁⲓ ⲉϥⲕⲏ ⲕⲁϩⲏⲩ ⲙⲡⲉϩⲟⲟⲩ ⲧⲏⲣϥ ⲉⲧⲙⲙⲁⲩ ⲁⲩⲱ ⲧⲉⲩϣⲏ ⲧⲏⲣⲥ ⲉⲧⲃⲉⲡⲁⲓ ⲛⲉⲩϫⲱ ⲙⲙⲟⲥ ϫⲉⲉⲛⲉⲥⲁⲟⲩⲗ ϩⲱⲱϥ ϩⲛⲛⲉⲡⲣⲟⲫⲏⲧⲏⲥ
1 Samuel 18 · 1 Samuel 20 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)