Read 1 Samuel 1 side by side with translations · The Final Bible
1 ⲛⲉⲩⲛⲟⲩⲣⲱⲙⲉ ⲇⲉ ⲉⲃⲟⲗ ϩⲛⲁⲣⲓⲙⲁⲑⲁⲉⲓⲙ ⲉⲃⲟⲗ ϩⲛⲥⲓⲫⲁ ⲡⲧⲟⲟⲩ ⲛⲉⲫⲣⲁⲓⲙ ⲉⲡⲉϥⲣⲁⲛ ⲡⲉ ⲉⲗⲅⲁⲛⲁ ⲡϣⲏⲣⲉ ⲛⲓⲉⲣⲉⲙⲓⲏⲗ ⲡϣⲏⲣⲉ ⲛϩⲏⲗⲓⲁⲥ ⲡϣⲏⲣⲉ ⲛⲧϩⲟⲕⲉ ϩⲛⲁⲥⲓⲃ ⲡⲧⲟⲟⲩ ⲛⲉⲫⲣⲁⲓⲙ
2 ⲁⲩⲱ ⲡⲁⲓ ⲛⲉⲟⲩⲛⲛⲧⲁϥ ⲙⲙⲁⲩ ⲛⲥϩⲓⲙⲉ ⲥⲛⲧⲉ ⲡⲣⲁⲛ ⲛⲧⲟⲩⲉⲓ ⲙⲙⲟⲟⲩ ⲡⲉ ⲁⲛⲛⲁ ⲁⲩⲱ ⲡⲣⲁⲛ ⲛⲧⲙⲉϩⲥⲛⲧⲉ ⲡⲉ ⲫⲉⲛⲁⲛⲛⲁ ⲫⲉⲛⲁⲛⲛⲁ ⲇⲉ ⲛⲉⲟⲩⲛⲧⲥ ϣⲏⲣⲉ ⲙⲙⲁⲩ ⲁⲛⲛⲁ ⲇⲉ ⲛⲧⲟⲥ ⲛⲉⲙⲛⲧⲥ ϣⲏⲣⲉ ⲙⲙⲁⲩ
3 ⲡⲣⲱⲙⲉ ⲇⲉ ⲉⲗⲕⲁⲛⲁ ⲉⲛⲉϣⲁϥⲉⲓ ⲉϩⲣⲁⲓ ϩⲛⲧⲉϥⲡⲟⲗⲓⲥ ⲁⲣⲙⲁⲑⲁⲉⲓⲙ ⲕⲁⲧⲁϩⲟⲟⲩ ϩⲟⲟⲩ ⲉⲟⲩⲱϣⲧ ⲁⲩⲱ ⲉⲧⲁⲗⲉⲑⲩⲥⲓⲁ ⲉϩⲣⲁⲓ ⲙⲙⲁϩ ⲙⲡϫⲟⲉⲓⲥ ⲡⲛⲟⲩⲧⲉ ⲥⲁⲃⲃⲁⲱⲑ ϩⲛⲥⲏⲗⲱ ⲁⲩⲱ ϩⲏⲗⲓ ⲡⲟⲩⲏⲏⲃ ⲛⲉϥϩⲙⲡⲙⲁ ⲉⲧⲙⲙⲁⲩ ⲙⲛⲡⲉϥϣⲏⲣⲉ ⲥⲛⲁⲩ ⲟⲫⲛⲏ ⲙⲛⲫⲓⲛⲉⲉⲥ ⲉⲩⲟ ⲛⲟⲩⲏⲏⲃ ⲙⲡϫⲟⲉⲓⲥ
4 ⲡⲧⲱϣ ⲇⲉ ⲙⲡⲉϩⲟⲟⲩ ⲛⲧⲉⲣⲉϥϣⲱⲡⲉ ⲉⲗⲕⲁⲛⲁ ⲁϥϣⲱⲱⲧ ⲛⲧⲉϥⲑⲩⲥⲓⲁ ⲁϥϯ ⲛϩⲉⲛⲙⲉⲣⲓⲥ ⲙⲫⲉⲛⲁⲛⲛⲁ ⲧⲉϥⲥϩⲓⲙⲉ ⲙⲛⲛⲉϥϣⲏⲣⲉ ⲧⲏⲣⲟⲩ ⲙⲛⲛⲉϥϣⲉⲉⲣⲉ
5 ⲁⲛⲛⲁ ⲇⲉ ϩⲱⲱⲥ ⲁϥϯ ⲛⲁⲥ ⲛⲟⲩⲙⲉⲣⲓⲥ ⲛⲟⲩⲱⲧ ⲕⲁⲧⲁⲡⲉⲥϩⲟ ϫⲉⲛⲉⲙⲛⲧⲥϣⲏⲣⲉ ⲙⲙⲁⲩ ⲉⲗⲕⲁⲛⲁ ⲇⲉ ⲛⲉϥⲙⲉ ⲛⲁⲛⲛⲁ ⲉϩⲟⲩⲉ ⲉⲫⲉⲛⲁⲛⲛⲁ ⲁⲩⲱ ⲡϫⲟⲉⲓⲥ ⲁϥϣⲱⲧⲙ ⲉⲣⲉⲙⲡⲧⲱϣ ⲛⲧⲉⲥⲙⲏⲧⲣⲁ
6 ⲉⲃⲟⲗ ϫⲉⲛⲧⲟϥ ⲡϫⲟⲉⲓⲥ ⲙⲡⲉϥϯϣⲏⲣⲉ ⲛⲁⲥ ⲕⲁⲧⲁⲡⲧⲱϣ ⲛⲧⲉⲥⲑⲗⲓⲯⲓⲥ ⲁⲩⲱ ⲕⲁⲧⲁⲡⲉⲥⲟⲩⲱⲗⲥ ⲛϩⲏⲧ ⲉⲧⲛⲙⲙⲁⲥ ϩⲛⲧⲉⲥⲑⲗⲓⲯⲓⲥ ⲁⲩⲱ ⲛⲉⲥⲑⲗⲓⲃⲉ ⲉⲥⲟⲩⲟⲗⲥ ⲛϩⲏⲧ ⲉⲧⲃⲉⲡⲁⲓ ⲉⲃⲟⲗ ϫⲉⲁⲡϫⲟⲉⲓⲥ ϣⲱⲧⲙ ⲉⲣⲉⲙⲡⲕⲱⲧⲉ ⲛⲧⲉⲥⲙⲏⲧⲣⲁ ⲉⲧⲉⲙϯϣⲏⲣⲉ ⲛⲁⲥ
7 ⲧⲁⲓ ⲅⲁⲣ ⲧⲉ ⲧϩⲉ ⲉⲛⲉⲥⲉⲓⲣⲉ ⲙⲙⲟⲥ ⲧⲉⲣⲟⲙⲡⲉ ϩⲙⲡⲧⲣⲉⲥⲃⲱⲕ ⲉϩⲣⲁⲓ ⲉⲡⲏⲓ ⲙⲡϫⲟⲉⲓⲥ ⲁⲩⲱ ⲛⲉⲥⲙⲟⲕϩ ⲛϩⲏⲧ ⲉⲥⲣⲓⲙⲉ ⲉⲙⲉⲥϩⲙⲟⲟⲥ ⲉϩⲣⲁⲓ ⲉⲟⲩⲱⲙ
8 ⲉⲗⲕⲁⲛⲁ ⲇⲉ ⲡⲉⲥϩⲁⲓ ⲡⲉϫⲁϥ ⲛⲁⲥ ϫⲉⲁⲛⲛⲁ ⲛⲧⲟⲥ ⲇⲉ ⲡⲉϫⲁⲥ ⲛⲁϥ ⲉⲓⲥ ϩⲏⲏⲧⲉ ⲁⲛⲟⲕ ⲡϫⲟⲉⲓⲥ ϯⲥⲱⲧⲙ ⲉⲣⲟⲕ ⲡⲉϫⲁϥ ⲛⲁⲥ ϫⲉⲁϩⲣⲟ ϩⲓⲛⲁⲓ ⲧⲉⲣⲓⲙⲉ ⲁⲩⲱ ⲁϩⲣⲟ ⲛⲧⲉⲟⲩⲱⲙ ⲁⲛ ⲉⲣⲉⲡⲟⲩϩⲏⲧ ⲙⲟⲕϩ ⲙⲙⲟⲙⲏ ⲛⲁⲛⲟⲩⲓ ⲁⲛ ⲛⲉ ⲁⲛⲟⲕ ⲉϩⲟⲩⲉ ⲉⲙⲏⲧ ⲛϣⲏⲣⲉ
9 ⲁⲩⲱ ⲁⲥⲧⲱⲛⲥ ⲙⲛⲛⲥⲁⲛⲥⲁⲟⲩⲱⲙ ϩⲛⲥⲏⲗⲱ ⲁⲥⲁϩⲉⲣⲁⲧⲥ ϩⲓⲧϩⲏ ⲙⲡϫⲟⲉⲓⲥ ϩⲏⲗⲓ ⲇⲉ ⲡⲟⲩⲏⲏⲃ ⲛⲉϥϩⲙⲟⲟⲥ ϩⲓϫⲛⲧⲉⲡⲛⲏ ⲛⲛⲉⲡⲩⲗⲏ ⲙⲡⲉⲣⲡⲉ ⲙⲡϫⲟⲉⲓⲥ
10 ⲁⲩⲱ ⲛⲧⲟⲥ ⲛⲉⲥⲟⲩⲟⲗⲥ ⲛϩⲏⲧ ⲉⲙⲁⲧⲉ ⲉⲁⲥϣⲗⲏⲗ ⲉϩⲣⲁⲓ ⲉⲡϫⲟⲉⲓⲥ ⲉⲥϫⲱ ⲙⲙⲟⲥ ⲉⲥⲣⲓⲙⲉ
11 ⲁⲩⲱ ⲉⲥⲉⲣⲏⲧ ⲛⲟⲩⲉⲣⲏⲧ ⲙⲡϫⲟⲉⲓⲥ ⲉⲥϫⲱ ⲙⲙⲟⲥ ϫⲉⲁⲇⲱⲛⲁⲓ ⲡϫⲟⲉⲓⲥ ⲉⲗⲱⲉⲓ ⲥⲁⲃⲃⲁⲱⲑ ϩⲛⲟⲩϭⲱϣⲧ ⲉⲕϣⲁⲛϭⲱϣⲧ ⲉϫⲙⲡⲉⲑⲃⲃⲓⲟ ⲛⲧⲉⲕϩⲙϩⲁⲗ ⲛⲅⲉⲣⲡⲁⲙⲉⲉⲩⲉ ⲛⲅϯ ⲛⲧⲉⲕϩⲙϩⲁⲗ ⲛⲟⲩⲥⲡⲉⲣⲙⲁ ⲛⲣⲱⲙⲉ ϯⲛⲁⲧⲁⲁϥ ⲛⲁⲕ ⲡⲉ ⲛⲧⲁⲉⲓⲟ ⲙⲡⲉⲕⲙⲧⲟ ⲉⲃⲟⲗ ϣⲁⲡⲉϩⲟⲟⲩ ⲙⲡⲉϥⲙⲟⲩ ⲁⲩⲱ ⲟⲩⲏⲣⲡ ⲙⲛⲟⲩⲥⲓⲕⲉⲣⲁ ⲛⲛⲉϥⲥⲟⲟⲩ ⲁⲩⲱ ⲛⲛⲉⲧⲟⲕ ⲃⲱⲕ ⲉϫⲛⲧⲉϥⲁⲡⲉ
12 ⲁⲥϣⲱⲡⲉ ⲇⲉ ⲛⲧⲉⲣⲉⲥⲱⲥⲕ ⲉⲥϣⲗⲏⲗ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ϩⲏⲗⲓ ⲡⲟⲩⲏⲏⲃ ⲁϥϯⲧⲟⲟⲧϥ ⲉⲣⲉⲛⲣⲱⲥ
13 ⲛⲧⲟⲥ ⲇⲉ ⲛⲉⲥϣⲁϫⲉ ϩⲙⲡⲉⲥϩⲏⲧ ⲁⲩⲱ ⲛⲉⲣⲉⲛⲉⲥⲥⲡⲟⲧⲟⲩ ⲕⲓⲙ ⲛⲥⲉⲥⲱⲧⲙ ⲁⲛ ⲉϩⲣⲟⲟⲩ ⲛⲧⲁⲥ ϩⲏⲗⲓ ⲇⲉ ⲁϥⲙⲉⲉⲩⲉ ⲉⲣⲟⲥ ϫⲉⲉⲥⲧⲁϩⲉ
14 ⲁⲩⲱ ⲡϣⲏⲣⲉ ⲛϩⲏⲗⲓ ⲡⲉϫⲁϥ ⲛⲁⲥ ϫⲉϣⲁⲛⲧⲉⲟⲩ ϣⲱⲡⲉ ⲉⲣⲛⲁϣⲱⲡⲉ ⲉⲣⲧⲁϩⲉ ⲛⲉϩⲡⲟⲩⲏⲣⲡ ⲉⲃⲟⲗ ⲙⲙⲟⲛⲧⲉⲗⲟ ⲙⲙⲁⲩ ϩⲁⲡϩⲟ ⲙⲡϫⲟⲉⲓⲥ
15 ⲁⲩⲱ ⲁⲁⲛⲛⲁ ⲟⲩⲱϣⲃ ⲡⲉϫⲁⲥ ϫⲉⲛϯⲧⲁϩⲉ ⲁⲛ ⲡϫⲟⲉⲓⲥ ⲁⲛⲟⲕ ⲧⲉ ⲧⲉⲥϩⲓⲙⲉ ⲉⲧⲟⲩⲟⲗⲥ ⲛϩⲏⲧ ⲛⲧϩⲉ ⲙⲡϩⲟⲟⲩ ⲛϩⲟⲟⲩ ⲁⲩⲱ ⲙⲡⲓⲥⲉⲏⲣⲡ ⲟⲩⲇⲉ ⲥⲓⲕⲉⲣⲁ ⲉⲓⲡⲱϩⲧ ⲛⲧⲁⲯⲩⲭⲏ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ
16 ⲙⲡⲉⲣⲕⲁⲧⲉⲕϩⲙϩⲁⲗ ⲛⲧⲟⲟⲧⲕ ⲛⲧϩⲉ ⲛⲟⲩϣⲉⲉⲣⲉ ⲉⲥⲛⲏϫ ⲉⲃⲟⲗ ϫⲉⲉⲃⲟⲗ ϩⲙⲡⲁϣⲁⲓ ⲛⲛⲁϣⲁϫⲉ ⲁⲓⲱⲥⲕ ϣⲁⲧⲉⲛⲟⲩ
17 ⲁⲩⲱ ϩⲏⲗⲓ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲁⲥ ϫⲉⲃⲱⲕ ϩⲛⲟⲩⲉⲓⲣⲏⲛⲏ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲉϥⲉϯ ⲛⲉ ⲙⲡⲟⲩⲁⲓⲧⲏⲙⲁ ⲧⲏⲣϥ ⲡⲉⲛⲧⲁⲣⲁⲓⲧⲉⲓ ⲙⲙⲟϥ ⲛⲧⲟⲟⲧϥ
18 ⲡⲉϫⲁⲥ ⲛⲁϥ ϫⲉⲁⲧⲉⲕϩⲙϩⲁⲗ ϭⲉⲛⲭⲁⲣⲓⲥ ⲙⲡⲉⲙⲧⲟ ⲉⲃⲟⲗ ⲛⲛⲉⲕⲃⲁⲗ ⲁⲩⲱ ⲧⲉⲥϩⲓⲙⲉ ⲁⲥⲃⲱⲕ ⲉϩⲣⲁⲓ ⲉⲧⲉⲥϩⲓⲏ ⲁⲥⲃⲱⲕ ⲉϩⲟⲩⲛ ⲉⲡⲉⲥⲙⲁ ⲛϭⲟⲉⲓⲗⲉ ⲁⲥϩⲙⲟⲟⲥ ⲁⲥⲟⲩⲱⲙ ⲙⲛⲡⲉⲥϩⲁⲓ ⲁⲩⲱ ⲁⲥⲥⲱ ⲁⲡⲉⲥϩⲟ ⲗⲟ ⲉϥⲟⲕⲙ
19 ⲁⲩⲧⲱⲟⲩⲛ ⲇⲉ ⲉϩⲧⲟⲟⲩⲉ ⲁⲩⲡⲁϩⲧⲟⲩ ⲁⲩⲟⲩⲱϣⲧ ⲙⲡϫⲟⲉⲓⲥ ⲁⲩⲙⲟⲟϣⲉ ⲉⲧⲉⲩϩⲓⲏ ⲁⲩⲱ ⲉⲗⲕⲁⲛⲁ ⲁϥⲉⲓ ⲉϩⲣⲁⲓ ⲉⲡⲉϥⲏⲓ ⲁⲣⲙⲁⲑⲁⲉⲓⲙ ⲁϥⲥⲟⲩⲛⲁⲛⲛⲁ ⲧⲉϥⲥϩⲓⲙⲉ ⲁⲩⲱ ⲡϫⲟⲉⲓⲥ ⲁϥⲣⲡⲉⲥⲙⲉⲉⲩⲉ
20 ⲁⲥⲱ ⲁⲥϣⲱⲡⲉ ⲇⲉ ⲙⲡⲉⲟⲩⲟⲉⲓϣ ⲛⲛⲉϩⲟⲟⲩ ⲁⲥϫⲡⲉⲟⲩϣⲏⲣⲉ ⲁⲥⲙⲟⲩⲧⲉ ⲉⲡⲉϥⲣⲁⲛ ϫⲉⲥⲁⲙⲟⲩⲏⲗ ⲉⲥϫⲱ ⲙⲙⲟⲥ ϫⲉⲛⲧⲁⲓⲁⲓⲧⲉⲓ ⲙⲙⲟϥ ⲛⲧⲟⲟⲧϥ ⲙⲡϫⲟⲉⲓⲥ ⲥⲁⲃⲁⲱⲑ
21 ⲁⲩⲱ ⲡⲣⲱⲙⲉ ⲉⲗⲅⲁⲛⲁ ⲁϥⲃⲱⲕ ⲉϩⲣⲁⲓ ⲙⲛⲡⲉϥⲏⲓ ⲧⲏⲣϥ ⲉⲥⲏⲗⲱ ⲉⲧⲣⲉϥϣⲱⲱⲧ ⲛⲧⲉⲑⲩⲥⲓⲁ ⲛⲛⲉϩⲟⲟⲩ ⲁⲩⲱ ⲉⲧⲣⲉϥϯ ⲛⲛⲉϥⲣⲉⲙⲏⲧ ⲙⲛⲛⲉⲣⲉⲙⲏⲧ ⲧⲏⲣⲟⲩ ⲙⲡⲉϥⲕⲁϩ
22 ⲁⲛⲛⲁ ⲇⲉ ⲙⲡⲉⲥⲃⲱⲕ ⲉϩⲣⲁⲓ ⲛⲙⲙⲁϥ ϫⲉⲁⲥϫⲟⲟⲥ ⲙⲡⲉⲥϩⲁⲓ ϫⲉϯⲛⲁϭⲱ ϣⲁⲛⲧⲉⲡϣⲏⲣⲉ ⲕⲟⲩⲓ ϫⲁⲧⲉ ⲛⲧⲁⲟⲙϫϥ ϫⲉⲉϥⲉⲟⲩⲱⲛϩ ⲉⲃⲟⲗ ϩⲓⲧϩⲏ ⲙⲡϫⲟⲉⲓⲥ ⲛϥϭⲱ ⲙⲡⲙⲁ ⲉⲧⲙⲙⲁⲩ ⲛϣⲁ ⲉⲛⲉϩ
23 ⲡⲉϫⲉⲉⲗⲅⲁⲛⲁ ⲡⲉⲥϩⲁⲓ ⲛⲁⲥ ϫⲉⲁⲣⲓⲡⲁⲅⲁⲑⲟⲛ ⲛⲁϩⲣⲛ ⲛⲟⲩⲃⲁⲗ ϩⲙⲟⲟⲥ ⲛⲉ ϣⲁⲛⲧⲉⲱⲙϫ ⲙⲡϣⲏⲣⲉ ⲕⲟⲩⲓ ⲁⲗⲗⲁ ⲡϫⲟⲉⲓⲥ ⲉϥⲉⲧⲁϩⲟ ⲉⲣⲁⲧϥ ⲙⲡⲉⲛⲧⲁϥⲉⲓ ⲉⲃⲟⲗ ϩⲛⲧⲟⲩⲧⲁⲡⲣⲟ ⲧⲉⲥϩⲓⲙⲉ ⲇⲉ ⲁⲥϩⲙⲟⲟⲥ ⲁⲥⲧⲥⲛⲕⲟ ⲙⲡⲉⲥϣⲏⲣⲉ ϣⲁⲛⲧⲉⲥⲱⲙϫ ⲙⲙⲟϥ
24 ⲁⲩⲱ ⲁⲥⲉⲓ ⲉϩⲣⲁⲓ ⲛⲙⲙⲁϥ ⲉⲥⲏⲗⲱ ⲙⲛⲟⲩⲙⲁⲥⲉ ⲉϥϩⲛϣⲟⲙⲧⲉ ⲛⲣⲟⲙⲡⲉ ⲁⲩⲱ ⲙⲛϩⲛⲟⲉⲓⲕ ⲙⲛⲟⲩϣⲓ ⲛⲥⲁⲙⲓⲧ ⲁⲩⲱ ⲟⲩϣⲓ ⲛⲏⲣⲡ ⲁⲥⲃⲱⲕ ⲉϩⲟⲩⲛ ⲉⲥⲏⲗⲱ ⲉⲡⲏⲓ ⲙⲡϫⲟⲉⲓⲥ ⲉⲣⲉⲡϣⲏⲣⲉ ⲕⲟⲩⲓ ⲛⲙⲙⲁⲩ
25 ⲁⲩⲧⲁϩⲟϥ ⲉⲣⲁⲧϥ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲡⲉϥⲉⲓⲱⲧ ⲁϥϣⲱⲱⲧ ⲛⲧⲉⲑⲩⲥⲓⲁ ⲉϣⲁϥⲁⲁⲥ ⲙⲙⲁϩ ⲡϫⲟⲉⲓⲥ ⲕⲁⲧⲁⲡⲧⲱϣ ⲛⲛϩⲟⲟⲩ ⲁⲩⲱ ⲁϥⲉⲓⲛⲉ ⲙⲡϣⲏⲣⲉ ⲕⲟⲩⲓ ⲁϥϣⲱⲱⲧ ⲙⲡⲙⲁⲥⲉ ⲁⲛⲛⲁ ⲇⲉ ⲧⲙⲁⲁⲩ ⲙⲡϣⲏⲣⲉ ⲕⲟⲩⲓ ⲁⲥϯ ⲙⲡⲉⲥⲟⲩⲟⲓ ⲉϩⲏⲗⲓ
26 ⲡⲉϫⲁⲥ ⲛⲁϥ ϫⲉⲧⲉⲕⲯⲩⲭⲏ ⲟⲛϩ ϯϩⲧⲏⲕ ⲉⲣⲟⲓ ⲡϫⲟⲉⲓⲥ ⲁⲛⲟⲕ ⲧⲉ ⲧⲉⲓⲥϩⲓⲙⲉ ⲧⲉⲛⲧⲁⲥⲁϩⲉⲣⲁⲧⲥ ⲙⲡⲉⲕⲙⲧⲟ ⲉⲃⲟⲗ ϩⲙⲡⲁⲓ ⲉⲧⲣⲁϣⲗⲏⲗ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ
27 ⲉⲧⲃⲉⲡⲉⲓϣⲏⲣⲉ ⲕⲟⲩⲓ ⲁⲓϣⲗⲏⲗ ϭⲉ ⲉϩⲣⲁⲓ ⲉⲣⲟϥ ⲁⲩⲱ ⲛⲧⲟϥ ⲡϫⲟⲉⲓⲥ ⲁϥϯ ⲛⲁⲓ ⲙⲡⲁⲓⲧⲏⲙⲁ ⲛⲧⲁⲓⲁⲓⲧⲉⲓ ⲙⲙⲟϥ ⲛⲧⲟⲟⲧϥ
28 ⲁⲛⲟⲕ ϭⲉ ϩⲱ ϯⲛⲁⲧⲁⲁϥ ⲛⲧⲁⲉⲓⲟ ⲙⲡϫⲟⲉⲓⲥ ⲛⲛⲉϩⲟⲟⲩ ⲧⲏⲣⲟⲩ ⲙⲡⲉϥⲱⲛϩ ⲉⲧⲣⲉϥϣⲱⲡⲉ ϩⲁⲣⲁⲧϥ ⲙⲡϫⲟⲉⲓⲥ
1 Samuel 2 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)