1 Samuel 14 — Coptic (Sahidic)

1 ⲁⲩⲱ ⲓⲱⲛⲁⲑⲁⲛ ⲡϣⲏⲣⲉ ⲛⲥⲁⲟⲩⲗ ⲡⲉϫⲁϥ ⲙⲡⲉϥϩⲙϩⲁⲗ ⲡⲉⲧϥⲓ ⲛⲛⲉϥⲥⲕⲉⲩⲏ ϫⲉⲁⲙⲟⲩ ⲛⲙⲙⲁⲓ ⲛⲧⲉⲛⲃⲱⲕ ⲉϩⲣⲁⲓ ⲉⲙⲉⲥⲁⲃ ⲛⲧⲉⲛⲁⲗⲗⲟⲫⲩⲗⲟⲥ ⲧⲉⲧⲛϩⲓⲡⲉⲕⲣⲟ

2 ⲥⲁⲟⲩⲗ ⲇⲉ ⲛⲉϥϩⲙⲟⲟⲥ ϩⲓϫⲛϩⲧⲏϥ ⲙⲡⲃⲟⲩⲛⲟⲥ ϩⲁⲧⲃⲱ ⲛϩⲉⲣⲙⲁⲛ ⲉⲧϩⲛⲙⲁⲅⲇⲟⲛ ⲁⲩⲱ ⲛⲉⲣⲉⲁⲥⲟⲟⲩ ⲛϣⲉ ⲛⲣⲱⲙⲉ ⲛⲙⲙⲁϥ

3 ⲁⲭⲓⲃ ⲡϣⲏⲣⲉ ⲛⲁⲭⲓⲇⲱⲃ ⲡⲥⲟⲛ ⲛⲓⲱⲭⲁⲃⲏⲗ ⲡϣⲏⲣⲉ ⲙⲫⲓⲛⲉⲉⲥ ⲡϣⲏⲣⲉ ⲛϩⲏⲗⲓ ⲡⲟⲩⲏⲏⲃ ⲙⲡⲛⲟⲩⲧⲉ ⲉⲧϩⲛⲥⲏⲗⲱ ⲛⲉϥϥⲓ ⲙⲡⲉⲫⲟⲩⲇ ⲁⲩⲱ ⲡⲗⲁⲟⲥ ⲛⲉϥⲥⲟⲟⲩⲛ ⲁⲛ

4 ϫⲉⲓⲱⲛⲁⲑⲁⲛ ⲁϥⲃⲱⲕ ⲉⲧⲙⲏⲧⲉ ⲛⲧⲉϩⲓⲏ ⲉⲡⲙⲁ ⲛⲧⲁⲓⲱⲛⲁⲑⲁⲛ ⲟⲩⲉϣⲃⲱⲕ ⲉϩⲣⲁⲓ ⲉⲣⲟϥ ⲉⲡⲙⲏⲏϣⲉ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲛⲉⲣⲉⲟⲩⲕⲟⲟϩ ⲙⲡⲉⲧⲣⲁ ϣⲟⲟⲡ ⲛⲥⲁⲡⲓⲥⲁ ⲁⲩⲱ ⲛⲥⲁⲡⲁⲓ ⲡⲣⲁⲛ ⲇⲉ ⲙⲡⲟⲩⲁ ⲙⲙⲟⲟⲩ ⲡⲉ ⲃⲁⲥⲏⲥ ⲁⲩⲱ ⲡⲣⲁⲛ ⲙⲡⲕⲉⲟⲩⲁ ⲡⲉ ⲥⲉⲛⲉⲃⲉ

5 ⲧⲟⲩⲉⲓ ⲛⲛⲉϩⲓⲏ ⲉⲥϫⲓ ⲉⲡⲉⲙϩⲓⲧ ⲉϩⲣⲁⲓ ⲉⲙⲁⲭⲙⲁⲥ ⲁⲩⲱ ⲧⲕⲉⲟⲩⲉⲓ ⲉⲥϫⲓ ϫⲓⲛⲡⲣⲏⲥ ϣⲁⲉϩⲣⲁⲓ ⲉⲅⲁⲃⲁⲁ

6 ⲡⲉϫⲉⲓⲱⲛⲁⲑⲁⲛ ⲙⲡⲉϥϩⲙϩⲁⲗ ⲡⲉⲧϥⲓ ⲛⲛⲉϥⲥⲕⲉⲩⲏ ϫⲉⲁⲙⲟⲩ ⲛⲧⲉⲛⲃⲱⲕ ⲉϩⲣⲁⲓ ⲉⲙⲉⲥⲁⲫ ⲡⲙⲁ ⲛⲛⲉⲓⲁⲧⲥⲃⲃⲉ ⲁⲩⲱ ⲡⲉⲧⲉⲣⲉⲡϫⲟⲉⲓⲥ ⲛⲁⲁⲁϥ ⲛⲁⲛ ϫⲉⲛⲉϥⲕⲏ ⲁⲛ ⲉϩⲣⲁⲓ ⲙⲡϫⲟⲉⲓⲥ ⲉⲧⲣⲉϥⲛⲟⲩϩⲙ ⲙⲡⲉⲧϩⲏϣ ϩⲛϩⲁϩ ⲏ ϩⲛⲥⲉⲃⲕⲉ

7 ⲡⲉϫⲁϥ ⲛⲁϥ ⲛϭⲓⲡⲉⲧϥⲓ ⲛⲛⲉⲥⲕⲉⲩⲏ ϫⲉⲁⲣⲓⲡⲉⲧⲉⲣⲉⲡⲉⲕϩⲏⲧ ⲟⲩⲁϣϥ ⲧⲏⲣϥ ⲉⲁⲁϥ ⲉⲓⲥ ϩⲏⲏⲧⲉ ⲁⲛⲟⲕ ϯⲟⲩⲏϩ ⲛⲥⲱⲕ ⲉⲣⲉⲡⲁϩⲏⲧ ⲧⲏϭ ⲉⲡⲉⲕϩⲏⲧ

8 ⲡⲉϫⲉⲓⲱⲛⲁⲑⲁⲛ ⲛⲁϥ ϫⲉⲉⲓⲥϩⲏⲏⲧⲉ ⲁⲛⲟⲛ ⲉⲛⲛⲁⲃⲱⲕ ⲉⲣⲁⲧⲟⲩ ⲛⲛⲣⲱⲙⲉ ⲛⲧⲉⲛⲙⲟⲟϣⲉ ⲉⲣⲟⲟⲩ

9 ⲉⲩϣⲁⲛϫⲟⲟⲥ ⲛⲁⲛ ϫⲉⲥⲁϩⲉⲧⲏⲩⲧⲛ ⲉⲡⲓⲥⲁ ϣⲁⲛⲧⲛϣⲁϫⲉ ⲛⲙⲙⲏⲧⲛ ⲉⲛⲛⲉϭⲱ ϩⲁⲣⲓϩⲁⲣⲟⲛ ⲛⲧⲛⲧⲙⲃⲱⲕ ⲉϫⲱⲟⲩ

10 ⲉⲩϣⲁⲛϫⲟⲟⲥ ⲇⲉ ⲛⲁⲛ ⲇⲉ ⲁⲙⲏⲓⲧⲛ ⲛⲁⲛ ⲉϩⲣⲁⲓ ⲛⲛⲉⲃⲱⲕ ⲉϫⲱⲟⲩ ϫⲉⲁⲡϫⲟⲉⲓⲥ ⲧⲁⲁⲩ ⲉϩⲣⲁⲓ ⲉⲧⲟⲟⲧⲛ ⲡⲁⲓ ⲡⲉ ⲡⲙⲁⲉⲓⲛ ⲉⲧⲛⲁϣⲱⲡⲉ ⲛⲁⲛ

11 ⲁⲩⲱ ⲛⲧⲟⲟⲩ ⲙⲡⲉⲥⲛⲁⲩ ⲁⲩⲃⲱⲕ ⲉϩⲣⲁⲓ ⲉⲙⲉⲥⲁⲫ ⲡⲙⲁ ⲛⲛⲁⲗⲗⲟⲫⲩⲗⲟⲥ ⲡⲉϫⲉⲛⲁⲗⲗⲟⲫⲩⲗⲟⲥ ⲛⲛⲉⲩⲉⲣⲏⲩ ϫⲉⲉⲓⲥⲛϩⲉⲃⲣⲉⲟⲥ ⲁⲩⲉⲓ ⲉϩⲣⲁⲓ ϩⲛⲛⲉⲩⲃⲏⲃ ⲛⲧⲁⲩⲗⲟϭⲟⲩ ⲛϩⲏⲧⲟⲩ

12 ⲁⲩⲱ ⲛⲣⲱⲙⲉ ⲙⲙⲉⲥⲁⲫ ⲉⲧⲉⲡⲉⲩⲙⲁ ⲛⲣⲟⲉⲓⲥ ⲡⲉ ⲡⲉϫⲁⲩ ⲛⲓⲱⲛⲁⲑⲁⲛ ⲙⲛⲡⲉⲧϥⲓ ⲛⲛⲉϥⲥⲕⲉⲩⲏ ⲉⲩϫⲱ ⲙⲙⲟⲥ ⲛⲁⲩ ϫⲉⲁⲙⲏⲉⲓⲧⲛ ⲉϩⲣⲁⲓ ϣⲁⲣⲟⲛ ⲁⲩⲱ ⲧⲉⲛⲛⲁⲧⲁⲙⲱⲧⲛ ⲉⲡⲉⲓϣⲁϫⲉ ⲡⲉϫⲉⲓⲱⲛⲁⲑⲁⲛ ⲙⲡⲉⲧϥⲓ ⲛⲛⲉϥⲥⲕⲉⲩⲏ ϫⲉⲟⲩⲁϩⲕ ⲛⲥⲱⲓ ϫⲉⲁⲡϫⲟⲉⲓⲥ ⲧⲁⲁⲩ ⲉϩⲣⲁⲓ ⲉⲧⲟⲟⲧϥ ⲙⲡⲓⲥⲣⲁⲏⲗ

13 ⲁⲩⲱ ⲓⲱⲛⲁⲑⲁⲛ ⲁϥⲃⲱⲕ ⲛⲁⲩ ⲉϩⲣⲁⲓ ⲉⲣⲉⲧⲟⲟⲧϥ ⲙⲛⲣⲁⲧϥ ⲧⲁϫⲣⲏⲩ ⲉⲣⲉⲡⲉⲧϥⲓ ⲛⲛⲉϥⲥⲕⲉⲩⲏ ⲟⲩⲏϩ ⲛⲥⲱϥ ⲛⲁⲗⲗⲟⲫⲩⲗⲟⲥ ⲁⲩⲉⲓⲱⲣⲙ ⲛⲥⲁⲡϩⲟ ⲛⲓⲱⲛⲁⲑⲁⲛ ⲓⲱⲛⲁⲑⲁⲛ ⲇⲉ ⲁϥϩⲓⲟⲩⲉ ⲛⲥⲱⲟⲩ ⲡⲉⲧϥⲓ ⲛⲛⲉⲥⲕⲉⲩⲏ ⲛⲉϥϯ ⲉⲧⲟⲟⲧϥ

14 ⲁⲩⲱ ⲧϣⲟⲣⲡⲉ ⲙⲡⲗⲏⲅⲏ ⲛⲧⲁⲓⲱⲛⲁⲑⲁⲛ ⲡⲁⲧⲁⲥⲥⲉⲓ ⲙⲙⲟⲟⲩ ⲛϩⲏⲧⲥ ⲙⲛⲡⲉⲧϥⲓ ⲛⲛⲉϥⲥⲕⲉⲩⲏ ⲉⲩⲛⲁⲣϫⲟⲩⲱⲧ ⲛⲣⲱⲙⲉ ϩⲛϩⲉⲛⲥⲟⲧⲉ ⲙⲛϩⲉⲛϣⲁⲩ ⲛⲱⲛⲉ ⲙⲛϩⲉⲛϩⲣⲟⲩϫⲉⲃ ⲛⲧⲉⲧⲥⲱϣⲉ

15 ⲁⲩϩⲟⲧⲉ ϣⲱⲡⲉ ϩⲛⲧⲡⲁⲣⲉⲙⲃⲟⲗⲏ ⲁⲩⲱ ϩⲛⲧⲥⲱϣⲉ ⲁⲩⲱ ⲡⲗⲁⲟⲥ ⲧⲏⲣϥ ⲉⲧϩⲛⲙⲉⲥⲁⲫ ⲙⲛⲛⲉϣⲁⲩⲙⲓϣⲉ ⲁⲩϣⲧⲟⲣⲧⲣ ⲛⲧⲟⲟⲩ ϩⲱⲟⲩ ⲛⲉⲩⲟⲩⲱϣ ⲁⲛ ⲉϣⲉⲡⲙⲕⲁϩ ⲡⲕⲁϩ ⲇⲉ ⲁϥⲣϩⲟⲧⲉ ⲛⲁⲩ ⲁⲩⲱ ⲟⲩϩⲟⲧⲉ ⲛⲧⲉⲡϫⲟⲉⲓⲥ ⲁⲥⲉⲓ ⲉϫⲱⲟⲩ

16 ⲁⲩⲱ ⲛⲉⲧⲣⲟⲩⲱ ⲛⲥⲁⲟⲩⲗ ⲁⲩⲛⲁⲩ ϩⲛⲅⲁⲃⲁⲁ ⲛⲧⲉⲃⲉⲛⲓⲁⲙⲓⲛ ⲁⲩⲱ ⲉⲓⲥ ⲧⲡⲁⲣⲉⲙⲃⲟⲗⲏ ⲛⲉⲥϣⲧⲣⲧⲱⲣ ⲛⲥⲁⲡⲓⲥⲁ ⲙⲛⲡⲁⲓ

17 ⲡⲉϫⲉⲥⲁⲟⲩⲗ ⲙⲡⲗⲁⲟⲥ ⲉⲧⲛⲙⲙⲁⲩ ϫⲉⲙⲉϣⲧⲧⲏⲩⲧⲛ ⲛⲧⲉⲧⲛⲛⲁⲩ ϫⲉⲛⲓⲙ ⲉⲃⲟⲗ ⲙⲙⲱⲧⲛ ⲡⲉ ⲛⲧⲁϥⲃⲱⲕ ⲁⲩⲙⲟϣⲧⲟⲩ ⲇⲉ ⲁⲩⲱ ⲉⲓⲥ ϩⲏⲏⲧⲉ ⲙⲡⲟⲩϩⲉ ⲉⲓⲱⲛⲁⲑⲁⲛ ⲙⲛⲡⲉⲧϥⲓ ⲛⲛⲉϥⲥⲕⲉⲩⲏ

18 ⲡⲉϫⲉⲥⲁⲟⲩⲗ ⲛⲁⲭⲓⲃ ϫⲉⲁⲩⲉⲡⲉⲫⲟⲩⲇ ⲉⲡⲉⲓⲙⲁ ϫⲉⲛⲧⲟϥ ⲛⲉϥϥⲓ ⲙⲡⲉⲫⲟⲩⲇ ⲙⲡⲉϩⲟⲟⲩ ⲉⲧⲙⲙⲁⲩ ϩⲓⲧϩⲏ ⲙⲡⲓⲥⲣⲁⲏⲗ

19 ⲉⲣⲉⲥⲁⲟⲩⲗ ⲇⲉ ϣⲁϫⲉ ⲙⲛⲡⲟⲩⲏⲏⲃ ⲟⲩⲛⲟϭ ⲛϩⲣⲟⲟⲩ ⲉⲙⲁⲧⲉ ⲁϥϣⲱⲡⲉ ϩⲛⲧⲡⲁⲣⲉⲙⲃⲟⲗⲏ ⲛⲛⲁⲗⲗⲟⲫⲩⲗⲟⲥ ⲡⲉϫⲉⲥⲁⲟⲩⲗ ⲙⲡⲟⲩⲏⲏⲃ ϫⲉⲥⲁϩⲉⲧⲟⲟⲧⲕ ⲉϩⲟⲩⲛ

20 ⲁⲩⲱ ⲥⲁⲟⲩⲗ ⲁϥⲙⲟⲟϣⲉ ⲉϩⲣⲁⲓ ⲙⲛⲡⲗⲁⲟⲥ ⲧⲏⲣϥ ⲉⲧⲛⲙⲙⲁϥ ⲁⲩⲡⲱϩ ϣⲁⲡⲙⲁ ⲙⲙⲓϣⲉ ⲁⲩⲱ ⲉⲓⲥ ⲧⲥⲏϥⲉ ⲙⲡⲟⲩⲁ ⲡⲟⲩⲁ ⲁⲥⲉⲓ ⲉϫⲛⲛⲉⲩⲉⲣⲏⲩ ⲁⲩⲛⲟϭ ⲛϩⲃⲁ ϣⲱⲡⲉ ⲛϩⲏⲧⲟⲩ

21 ⲁⲩⲱ ⲛⲕⲉϩⲙϩⲁⲗ ⲉⲧⲧⲏϩ ⲛⲥⲁϥ ⲙⲛϣⲟⲙⲛⲧ ⲙⲡϩⲟⲟⲩ ⲛϩⲟⲟⲩ ⲙⲛⲛⲁⲗⲗⲟⲫⲩⲗⲟⲥ ⲛⲉⲛⲧⲁⲩⲉⲓ ⲉϩⲣⲁⲓ ⲛⲙⲙⲁⲩ ⲉⲧⲡⲁⲣⲉⲙⲃⲟⲗⲏ ⲁⲩⲡⲱⲱⲛⲉ ⲉⲧⲣⲉⲩϣⲱⲡⲉ ϩⲱⲟⲩ ⲙⲛⲡⲓⲥⲣⲁⲏⲗ ⲛⲉⲧⲏⲡ ⲉⲥⲁⲟⲩⲗ ⲙⲛⲓⲱⲛⲁⲑⲁⲛ

22 ⲁⲩⲱ ⲡⲓⲥⲣⲁⲏⲗ ⲧⲏⲣϥ ⲛⲉⲩⲗⲏϫ ϩⲙⲡⲧⲟⲟⲩ ⲛⲉⲫⲣⲁⲓⲙ ⲁⲩⲥⲱⲧⲙ ϫⲉⲛⲁⲗⲗⲟⲫⲩⲗⲟⲥ ⲁⲩϭⲱⲧⲡ ⲛⲧⲟⲟⲩ ϩⲱⲟⲩ ⲁⲩⲡⲱⲧ ⲛⲥⲱⲟⲩ ⲉⲡⲡⲟⲗⲉⲙⲟⲥ

23 ⲁⲡϫⲟⲉⲓⲥ ⲧⲟⲩϫⲉⲡⲓⲏⲗ ⲙⲡⲉϩⲟⲟⲩ ⲉⲧⲙⲙⲁⲩ ⲁⲩⲱ ⲡⲡⲟⲗⲉⲙⲟⲥ ⲁϥⲡⲱϩ ϣⲁⲉϩⲣⲁⲓ ⲉⲃⲟⲑⲟⲣⲟⲛ ⲁⲩⲱ ⲡⲙⲏⲏϣⲉ ⲧⲏⲣϥ ⲉⲧⲙⲟⲟϣⲉ ⲙⲛⲥⲁⲟⲩⲗ ⲛⲉⲩⲛⲁⲣⲟⲩⲧⲃⲁ ⲛⲣⲱⲙⲉ ⲁⲩⲱ ⲡⲉⲙⲗⲁϩ ⲛⲉϥⲥⲱⲧⲏⲣ ⲉⲃⲟⲗ ϩⲛⲧⲡⲟⲗⲓⲥ ⲧⲏⲣⲥ ϩⲙⲡⲧⲟⲟⲩ ⲛⲉⲫⲣⲁⲓⲙ

24 ⲥⲁⲟⲩⲗ ⲇⲉ ⲁϥϣⲱⲡⲉ ϩⲛⲟⲩⲛⲟϭ ⲙⲙⲛⲧⲁⲧⲥⲟⲟⲩⲛ ⲙⲡⲉϩⲟⲟⲩ ⲉⲧⲙⲙⲁⲩ ⲁⲩⲱ ⲥⲁⲟⲩⲗ ⲁϥⲣⲁⲛⲁϣ ⲙⲡⲗⲁⲟⲥ ⲉϥϫⲱ ⲙⲙⲟⲥ ϫⲉϥⲥϩⲟⲩⲟⲣⲧ ⲛϭⲓⲡⲉⲧⲛⲁⲟⲩⲉⲙⲟⲉⲓⲕ ϣⲁⲡⲛⲁⲩ ⲛⲣⲟⲩϩⲉ ϫⲉⲉⲓⲉϫⲓⲕⲃⲁ ⲙⲡⲁϫⲁϫⲉ ⲁⲩⲱ ⲡⲗⲁⲟⲥ ⲇⲉ ⲧⲏⲣϥ ⲙⲡⲉϥⲧⲉⲡⲟⲉⲓⲕ

25 ⲡⲕⲁϩ ⲇⲉ ⲧⲏⲣϥ ⲛⲉϥⲁⲣⲓⲥⲧⲁ ⲛⲉⲣⲉⲟⲩⲙⲁ ⲛϣⲏⲛ ⲇⲉ ⲛϯϩⲙⲉϥ ⲛⲉⲃⲓⲱ ϣⲟⲟⲡ ⲙⲉⲡⲙⲧⲟ ⲉⲃⲟⲗ ⲛⲧⲥⲱϣⲉ

26 ⲁⲩⲱ ⲡⲗⲁⲟⲥ ⲁϥⲧⲁⲁϥ ⲉϩⲣⲁⲓ ⲉⲡⲙⲁ ⲛϯϩⲙⲉϥ ⲛⲉⲃⲓⲱ ⲛⲉⲣⲉⲡⲗⲁⲟⲥ ⲇⲉ ⲙⲟⲟϣⲉ ⲉϥϣⲁϫⲉ ⲉⲙⲛⲗⲁⲁⲩ ⲕⲧⲟ ⲛⲧⲉϥϭⲓϫ ⲉϩⲟⲩⲛ ⲉⲧⲉϥⲧⲁⲡⲣⲟ ϫⲉⲡⲗⲁⲟⲥ ⲁϥⲣϩⲟⲧⲉ ⲛϩⲏⲧϥ ⲙⲡⲁⲛⲁϣ ⲙⲡϫⲟⲉⲓⲥ

27 ⲓⲱⲛⲁⲑⲁⲛ ⲇⲉ ⲙⲡⲉϥⲥⲱⲧⲙ ϫⲉⲁⲡⲉϥⲉⲓⲱⲧ ⲧⲁⲣⲕⲉⲡⲗⲁⲟⲥ ⲁⲩⲱ ⲓⲱⲛⲁⲑⲁⲛ ⲁϥⲥⲟⲩⲧⲛϩⲧⲏϥ ⲉⲃⲟⲗ ⲙⲡⲉϥϭⲉⲣⲱⲃ ⲉⲧϩⲛⲧⲉϥϭⲓϫ ⲁϥⲥⲟⲡϥ ϩⲙⲡⲙⲟⲩⲗϩ ⲛⲉⲃⲓⲱ ⲁϥⲕⲧⲟ ⲛⲧⲉϥϭⲓϫ ⲉϩⲟⲩⲛ ⲉⲣⲱϥ ⲁⲛⲉϥⲃⲁⲗ ⲛⲁⲩ ⲁⲩϫⲱⲧⲉ

28 ⲟⲩⲁ ⲇⲉ ⲉⲃⲟⲗ ϩⲙⲡⲗⲁⲟⲥ ⲛⲉϥϫⲱ ⲙⲙⲟⲥ ⲛⲁϥ ϫⲉϩⲛⲟⲩⲁⲛⲁϣ ⲡⲉⲕⲉⲓⲱⲧ ⲁϥⲧⲁⲣⲕⲉⲡⲗⲁⲟⲥ ⲉϥϫⲱ ⲙⲙⲟⲥ ϫⲉϥⲥϩⲟⲩⲟⲣⲧ ⲛϭⲓⲟⲩⲣⲱⲙⲉ ⲉⲧⲛⲁⲟⲩⲉⲙⲟⲉⲓⲕ ⲙⲡϩⲟⲟⲩ ⲡⲗⲁⲟⲥ ⲇⲉ ⲁϥⲥⲱϣⲙ

29 ⲁⲩⲱ ⲓⲱⲛⲁⲑⲁⲛ ⲁϥⲉⲓⲙⲉ ⲡⲉϫⲁϥ ϫⲉⲡⲁⲉⲓⲱⲧ ⲁϥⲑⲉⲙⲕⲉⲡⲕⲁϩ ⲁⲛⲁⲩ ⲉⲧϩⲉ ⲛⲧⲁⲛⲁⲃⲁⲗ ϫⲱⲧⲉ ⲉⲃⲟⲗ ϫⲉⲁⲓⲧⲉⲡⲟⲩϣⲏⲙ ⲉⲃⲟⲗ ϩⲙⲡⲉⲓⲉⲃⲓⲱ

30 ⲉⲓⲉ ⲉⲛⲉⲛⲧⲁⲡⲗⲁⲟⲥ ϭⲉ ⲟⲩⲱⲙ ϩⲛⲟⲩⲱⲙ ⲙⲡϩⲟⲟⲩ ⲉⲃⲟⲗ ϩⲛⲛⲉϣⲱⲗ ⲛⲛⲉⲩϫⲁϫⲉ ⲛⲁⲓ ⲛⲧⲁϥϩⲉ ⲉⲣⲟⲟⲩ ⲧⲉⲛⲟⲩ ⲛⲉⲣⲉⲧⲉⲡⲗⲏⲅⲏ ⲛⲁⲁϣⲁⲓ ⲡⲉ ⲉϫⲛⲛⲁⲗⲗⲟⲫⲩⲗⲟⲥ

31 ⲁⲩⲱ ⲁϥⲡⲁⲧⲁⲥⲥⲉⲓ ⲉⲃⲟⲗ ϩⲛⲛⲁⲗⲗⲟⲫⲩⲗⲟⲥ ⲙⲡⲉϩⲟⲟⲩ ⲉⲧⲙⲙⲁⲩ ϩⲙⲙⲁⲭⲙⲁⲥ ⲡⲗⲁⲟⲥ ⲇⲉ ⲁϥϩⲓⲥⲉ ⲉⲙⲁⲧⲉ

32 ⲁⲩⲱ ⲡⲗⲁⲟⲥ ⲁϥⲧⲁⲁϥ ⲉⲛϣⲱⲗ ⲁⲡⲗⲁⲟⲥ ϫⲓ ⲛϩⲉⲛⲟϩⲉ ⲛⲉⲥⲟⲟⲩ ⲙⲛϩⲉⲛⲁϩⲟⲟⲩ ⲁⲩⲱ ϩⲉⲛⲕⲧⲏⲣ ⲛⲉϩⲉ ⲁⲩϣⲱⲱⲧ ⲙⲙⲟⲟⲩ ϩⲓϫⲙⲡⲕⲁϩ ⲁⲩⲱ ⲡⲗⲁⲟⲥ ⲛⲉϥⲟⲩⲱⲙ ⲙⲛⲡⲉϥⲥⲛⲟϥ

33 ⲁⲩⲧⲁⲙⲉⲥⲁⲟⲩⲗ ⲇⲉ ⲉⲩϫⲱ ⲙⲙⲟⲥ ⲛⲁϥ ϫⲉⲁⲡⲗⲁⲟⲥ ⲣⲛⲟⲃⲉ ⲉⲡϫⲟⲉⲓⲥ ⲁϥⲟⲩⲉⲙⲁϥ ⲙⲛⲡⲉϥⲥⲛⲟϥ ⲁⲩⲱ ⲡⲉϫⲉⲥⲁⲟⲩⲗ ⲛⲁⲩ ϫⲉⲁⲛⲓⲟⲩⲛⲟϭ ⲛⲱⲛⲉ ⲉⲡⲉⲓⲙⲁ ⲉⲃⲟⲗ ϩⲛⲅⲑⲁⲉⲓⲙ

34 ⲡⲉϫⲉⲥⲁⲟⲩⲗ ⲇⲉ ⲛⲁⲩ ϫⲉⲃⲱⲕ ⲉⲃⲟⲗ ϩⲙⲡⲗⲁⲟⲥ ⲛⲧⲉⲧⲛϫⲟⲟⲥ ⲛⲁⲩ ϫⲉⲙⲁⲣⲉⲡⲟⲩⲁ ⲡⲟⲩⲁ ⲙⲙⲱⲧⲛ ⲉⲓⲛⲉ ⲉⲡⲉϥⲙⲁ ⲙⲡⲉϥⲣⲁⲥⲧⲉ ⲁⲩⲱ ⲡⲉϥⲉⲥⲟⲟⲩ ⲛϥϣⲁⲁⲧϥ ϩⲓϫⲙⲡⲉⲓⲱⲛⲉ ϫⲉⲛⲛⲉⲧⲛⲣⲛⲟⲃⲉ ⲉⲡϫⲟⲉⲓⲥ ⲉⲧⲣⲉⲧⲉⲧⲛⲟⲩⲉⲙⲁϥ ⲙⲛⲡⲉϥⲥⲛⲟϥ ⲁⲩⲱ ⲡⲗⲁⲟⲥ ⲧⲏⲣϥ ⲡⲟⲩⲁ ⲡⲟⲩⲁ ⲁϥⲉⲓⲛⲉ ⲙⲡⲉⲧⲛⲧⲟⲟⲧϥ ⲁⲩϣⲱⲱⲧ ⲙⲙⲟⲟⲩ ⲙⲡⲙⲁ ⲉⲧⲙⲙⲁⲩ

35 ⲁⲩⲱ ⲥⲁⲟⲩⲗ ⲁϥⲕⲱⲧ ⲙⲡⲙⲁ ⲉⲧⲙⲙⲁⲩ ⲛⲟⲩⲑⲩⲥⲓⲁⲥⲧⲏⲣⲓⲟⲛ ⲙⲡϫⲟⲉⲓⲥ ⲡⲁⲓ ⲡⲉ ⲡⲉⲑⲩⲥⲓⲁⲥⲧⲏⲣⲓⲟⲛ ⲛⲧⲁⲥⲁⲟⲩⲗ ⲁⲣⲭⲓⲥⲑⲁⲓ ⲛⲕⲟⲧϥ ⲙⲡϫⲟⲉⲓⲥ

36 ⲁⲩⲱ ⲡⲉϫⲉⲥⲁⲟⲩⲗ ⲙⲡⲗⲁⲟⲥ ϫⲉⲙⲁⲣⲉⲛⲃⲱⲕ ⲉϫⲛⲛⲁⲗⲗⲟⲫⲩⲗⲟⲥ ⲛⲧⲉⲩϣⲏ ⲛⲧⲉⲛϩⲁⲣⲡⲁⲍⲉ ⲉⲃⲟⲗ ⲛϩⲏⲧⲟⲩ ϣⲁⲡⲛⲁⲩ ⲛϩⲧⲟⲟⲩⲉ ⲛⲧⲉⲛⲧⲙϣⲉϫⲡⲟⲩⲣⲱⲙⲉ ⲉⲃⲟⲗ ⲛϩⲏⲧⲟⲩ ⲡⲉϫⲁⲩ ⲛⲁϥ ϫⲉⲡⲁⲅⲁⲑⲟⲛ ⲧⲏⲣϥ ⲁⲣⲓϥ ⲛⲁϩⲣⲁⲕ ⲡⲉϫⲉⲡⲟⲩⲏⲏⲃ ϫⲉⲙⲁⲣⲉⲛϯ ⲙⲡⲉⲛⲟⲩⲟⲓ ⲉⲡⲉⲓⲙⲁ ⲉⲣⲁⲧϥ ⲙⲡⲛⲟⲩⲧⲉ ⲛⲧⲛϫⲛⲟⲩϥ

37 ⲁⲩⲱ ⲥⲁⲟⲩⲗ ⲁϥϫⲛⲉⲡⲛⲟⲩⲧⲉ ϫⲉⲉⲛⲉⲧⲁⲃⲱⲕ ⲉⲣⲁⲧⲟⲩ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲛⲉⲕⲛⲁⲧⲁⲁⲩ ⲉϩⲣⲁⲓ ⲉⲛϭⲓϫ ⲙⲡⲓⲥⲣⲁⲏⲗ ⲙⲡⲉⲡϫⲟⲉⲓⲥ ⲇⲉ ⲉⲣⲟⲩⲱ ⲛⲁϥ ⲙⲡⲉϩⲟⲟⲩ ⲉⲧⲙⲙⲁⲩ

38 ⲡⲉϫⲉⲥⲁⲟⲩⲗ ⲛⲁⲩ ϫⲉⲁⲛⲓⲛⲉ ⲉⲡⲉⲓⲙⲁ ⲛⲛⲉⲧⲁⲅⲙⲁ ⲧⲏⲣⲟⲩ ⲙⲡⲓⲥⲣⲁⲏⲗ ⲛⲧⲉⲧⲛⲉⲓⲙⲉ ⲁⲩⲱ ⲛⲧⲉⲧⲛⲛⲁⲩ ϫⲉⲛⲧⲁⲡⲉⲓⲛⲟⲃⲉ ϣⲱⲡⲉ ϩⲛⲛⲓⲙ ⲙⲡϩⲟⲟⲩ

39 ϫⲉⲡϫⲟⲉⲓⲥ ⲟⲛϩ ⲡⲉⲛⲧⲁϥⲧⲟⲩϫⲉⲡⲓⲏⲗ ϫⲉⲉϥϣⲁⲛⲧⲁⲙⲟⲛ ⲉⲧⲃⲉⲓⲱⲛⲁⲑⲁⲛ ⲡⲁϣⲏⲣⲉ ϩⲛⲟⲩⲙⲟⲩ ϥⲛⲁⲙⲟⲩ ⲡⲉ ⲁⲩⲱ ⲙⲡⲉⲗⲁⲁⲩ ϣⲁϫⲉ ϩⲙⲡⲗⲁⲟⲥ ⲧⲏⲣϥ

40 ⲡⲉϫⲉⲥⲁⲟⲩⲗ ⲛⲛⲣⲱⲙⲉ ⲧⲏⲣⲟⲩ ⲙⲡⲓⲥⲣⲁⲏⲗ ϫⲉⲛⲧⲱⲧⲛ ⲧⲉⲧⲛⲛⲁϣⲱⲡⲉ ϩⲛⲟⲩⲙⲛⲧϩⲙϩⲁⲗ ⲁⲛⲟⲕ ϩⲱⲱⲧ ⲟⲛ ⲙⲛⲓⲱⲛⲁⲑⲁⲛ ⲡⲁϣⲏⲣⲉ ⲧⲉⲛⲛⲁϣⲱⲡⲉ ϩⲛⲟⲩⲙⲛⲧϩⲙϩⲁⲗ ⲡⲉϫⲉⲡⲗⲁⲟⲥ ⲛⲥⲁⲟⲩⲗ ϫⲉⲡⲁⲅⲁⲑⲟⲛ ⲉⲧⲛⲁϩⲣⲁⲕ ⲁⲣⲓϥ

41 ⲡⲉϫⲉⲥⲁⲟⲩⲗ ϫⲉⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲉⲧⲃⲉⲟⲩ ⲙⲡⲉⲕϣⲁϫⲉ ⲙⲡϩⲟⲟⲩ ⲙⲛⲡⲉⲕϩⲙϩⲁⲗ ⲉⲛⲉⲣⲉⲡⲛⲟⲃⲉ ⲉⲣⲟⲓ ⲏ ⲓⲱⲛⲁⲑⲁⲛ ⲡⲁϣⲏⲣⲉ ⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ϯⲙⲁⲉⲓⲛ ⲛⲁⲛ ⲁⲩⲱ ⲉⲕϣⲁⲛϫⲟⲟⲥ ϩⲓⲛⲁⲓ ⲧⲁⲓ ⲧⲉ ⲧϩⲉ ⲉⲧⲛⲁϣⲱⲡⲉ ϯⲙⲁⲉⲓⲛ ⲡϫⲟⲉⲓⲥ ⲉⲡⲉⲕⲗⲁⲟⲥ ⲡⲓⲥⲣⲁⲏⲗ ⲁⲩⲱ ⲡⲉⲕⲗⲏⲣⲟⲥ ⲁϥⲉⲓ ⲉϫⲛⲓⲱⲛⲁⲑⲁⲛ ⲙⲛⲥⲁⲟⲩⲗ ⲡⲗⲁⲟⲥ ⲁϥⲉⲓ ⲉⲃⲟⲗ

42 ⲡⲉϫⲉⲥⲁⲟⲩⲗ ϫⲉⲛⲉϫⲕⲗⲏⲣⲟⲥ ϩⲛⲧⲁⲙⲏⲧⲉ ⲁⲩⲱ ϩⲛⲧⲙⲏⲧⲉ ⲛⲓⲱⲛⲁⲑⲁⲛ ⲡⲁϣⲏⲣⲉ ⲁⲩⲱ ⲡⲉⲧⲉⲣⲉⲡϫⲟⲉⲓⲥ ⲛⲁⲉⲓⲛⲉ ⲙⲡⲉⲕⲗⲏⲣⲟⲥ ⲉϫⲱϥ ⲉϥⲉⲙⲟⲩ ⲡⲉϫⲉⲡⲗⲁⲟⲥ ⲉϩⲟⲩⲛ ϩⲛⲥⲁⲟⲩⲗ ϫⲉⲛⲛⲉⲡⲉⲓϣⲁϫⲉ ϣⲱⲡⲉ ⲥⲁⲟⲩⲗ ⲇⲉ ⲁϥⲁⲛⲁⲅⲕⲁⲍⲉ ⲙⲡⲗⲁⲟⲥ ⲁⲩⲛⲉϫⲕⲗⲏⲣⲟⲥ ϩⲛⲧⲉϥⲙⲏⲧⲉ ⲁⲩⲱ ϩⲛⲧⲙⲏⲧⲉ ⲛⲓⲱⲛⲁⲑⲁⲛ ⲡⲉϥϣⲏⲣⲉ ⲁⲡⲉⲕⲗⲏⲣⲟⲥ ⲉⲓ ⲉϫⲛⲓⲱⲛⲁⲑⲁⲛ

43 ⲡⲉϫⲉⲥⲁⲟⲩⲗ ⲛⲓⲱⲛⲁⲑⲁⲛ ϫⲉⲙⲁⲧⲁⲙⲟⲓ ϫⲉⲟⲩ ⲡⲉⲛⲧⲁⲕⲁⲁϥ ⲁⲩⲱ ⲓⲱⲛⲁⲑⲁⲛ ⲁϥⲧⲁⲙⲟϥ ⲉϥϫⲱ ⲙⲙⲟⲥ ϫⲉⲛⲧⲁⲓⲥⲉⲡϩⲧⲏϥ ⲙⲡⲁϭⲉⲣⲱⲃ ⲛⲟⲩⲕⲟⲩⲓ ⲛⲉⲃⲓⲱ ⲁⲓⲧⲟⲡϥ ⲁⲩⲱ ⲉⲓⲥ ϩⲏⲏⲧⲉ ⲁⲛⲟⲕ ⲉⲓⲛⲁⲙⲟⲩ ⲉⲧⲃⲉⲡⲁⲓ

44 ⲡⲉϫⲉⲥⲁⲟⲩⲗ ⲛⲁϥ ϫⲉⲛⲁⲓ ⲛⲉⲧⲉⲣⲉⲡⲛⲟⲩⲧⲉ ⲛⲁⲁⲁⲩ ⲛⲁⲓ ⲁⲩⲱ ⲛⲉⲓⲕⲟⲟⲩⲉ ⲉϥⲉⲟⲩⲁϩⲟⲩ ⲉϫⲱⲓ ϫⲉϩⲛⲟⲩⲙⲟⲩ ⲕⲛⲁⲙⲟⲩ ⲙⲡϩⲟⲟⲩ ⲛϩⲟⲟⲩ

45 ⲁⲩⲱ ⲡⲗⲁⲟⲥ ⲡⲉϫⲁϥ ⲛⲥⲁⲟⲩⲗ ϫⲉⲉⲛⲉⲡϩⲟⲟⲩ ϩⲏ ϥⲛⲁⲙⲟⲩ ⲛϭⲓⲡⲉⲛⲧⲁϥⲉⲓⲣⲉ ⲙⲡⲉⲓⲛⲟϭ ⲛⲟⲩϫⲁⲓ ϩⲙⲡⲓⲥⲣⲁⲏⲗ ⲡϫⲟⲉⲓⲥ ⲟⲛϩ ϫⲉⲉϣⲱⲡⲉ ⲟⲩⲛⲟⲩⲃⲱ ⲛⲟⲩⲱⲧ ⲛⲁϩⲉ ⲉⲃⲟⲗ ϩⲛⲧⲉϥⲁⲡⲉ ⲉϩⲣⲁⲓ ⲉϫⲙⲡⲕⲁϩ ϫⲉⲡⲗⲁⲟⲥ ⲙⲡⲛⲟⲩⲧⲉ ⲁϥⲉⲓⲣⲉ ⲙⲡⲉⲓⲛⲟϭ ⲛⲛⲟⲃⲉ ⲁⲩⲱ ⲡⲗⲁⲟⲥ ⲁϥϣⲗⲏⲗ ⲉϩⲣⲁⲓ ⲉⲡⲛⲟⲩⲧⲉ ⲉϩⲣⲁⲓ ⲉϫⲛⲓⲱⲛⲁⲑⲁⲛ ⲙⲡⲉϩⲟⲟⲩ ⲉⲧⲙⲙⲁⲩ ⲁⲩⲱ ⲙⲡⲉϥⲙⲟⲩ

46 ⲥⲁⲟⲩⲗ ⲇⲉ ⲁϥⲃⲱⲕ ⲉⲣⲁⲧⲟⲩ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩⲟⲗⲟⲩ ⲉϩⲣⲁⲓ ⲉⲛⲉⲩⲙⲁ

47 ⲁⲩⲱ ⲥⲁⲟⲩⲗ ⲁϥⲕⲗⲏⲣⲟⲩ ⲉⲧⲣⲉϥⲣⲣⲣⲟ ⲁϥϣⲱⲡⲉ ⲛⲟⲩⲛⲟϭ ⲛϩⲱⲃ ⲉϫⲙⲡⲓⲥⲣⲁⲏⲗ ⲁⲩⲱ ⲛⲉϥⲡⲟⲗⲉⲙⲉⲓ ⲙⲛⲛⲉϫⲁϫⲉ ⲧⲏⲣⲟⲩ ⲉⲧϩⲙⲡⲉϥⲕⲱⲧⲉ ⲙⲱⲁⲃ ⲙⲛⲛⲉϣⲏⲣⲉ ⲛⲁⲙⲙⲱⲛ ⲁⲩⲱ ⲛϣⲏⲣⲉ ⲛⲉⲇⲱⲙ ⲁⲩⲱ ⲙⲛⲛⲉⲑⲁⲓⲃⲱⲣ ⲙⲛⲡⲣⲣⲟ ⲛⲥⲟⲩⲃⲁ ⲁⲩⲱ ⲙⲛⲛⲁⲗⲗⲟⲫⲩⲗⲟⲥ ⲡⲙⲁ ⲉϣⲁϥⲃⲱⲕ ⲉⲣⲟϥ ϣⲁϥⲟⲩϫⲁⲓ ⲛϩⲏⲧϥ

48 ⲁⲩⲱ ⲁϥⲉⲓⲣⲉ ⲛⲟⲩϭⲟⲙ ⲉⲥⲛⲁϣⲧ ⲁϥⲡⲁⲧⲁⲥⲥⲉⲓ ⲙⲡⲁⲙⲁⲗⲏⲕ ⲁⲩⲱ ⲁϥⲛⲟⲩϩⲙ ⲙⲡⲓⲥⲣⲁⲏⲗ ⲛⲧⲟⲟⲧⲟⲩ ⲛⲛⲉⲧⲑⲗⲓⲃⲉ ⲙⲙⲟⲟⲩ

49 ⲛϣⲏⲣⲉ ⲇⲉ ⲛⲥⲁⲟⲩⲗ ⲛⲁⲓ ⲛⲉ ⲓⲱⲛⲁⲑⲁⲛ ⲙⲛⲓⲉⲥⲟⲩⲗ ⲁⲩⲱ ⲙⲉⲗⲭⲓⲥⲁ ⲁⲩⲱ ⲛⲣⲁⲛ ⲛⲧⲉϥϣⲉⲉⲣⲉ ⲥⲛⲧⲉ ⲡⲣⲁⲛ ⲛⲧϣⲣⲡⲙⲓⲥⲉ ⲡⲉ ⲙⲉⲣⲱϥ ⲡⲣⲁⲛ ⲛⲧⲙⲉϩⲥⲛⲧⲉ ⲡⲉ ⲙⲉⲗⲭⲱⲗ

50 ⲡⲣⲁⲛ ⲇⲉ ⲛⲧⲉϥⲥϩⲓⲙⲉ ⲡⲉ ⲁⲭⲓⲛⲟⲟⲃ ⲧϣⲉⲉⲣⲉ ⲛⲁⲭⲓⲛⲁⲁⲥ ⲁⲩⲱ ⲡⲣⲁⲛ ⲙⲡⲉϥⲁⲣⲭⲓⲥⲧⲣⲁⲧⲏⲅⲟⲥ ⲡⲉ ⲁⲃⲉⲛⲛⲏⲣ ⲡϣⲏⲣⲉ ⲛⲛⲏⲣ ⲡϣⲏⲣⲉ ⲛⲧϩⲙϩⲁⲗ ⲛⲥⲁⲟⲩⲗ

51 ⲁⲩⲱ ϭⲓⲥ ⲡⲉ ⲡⲉⲓⲱⲧ ⲛⲥⲁⲟⲩⲗ ⲁⲩⲱ ⲛⲏⲣ ⲡⲉ ⲡⲉⲓⲱⲧ ⲛⲁⲃⲉⲛⲛⲏⲣ ⲡϣⲏⲣⲉ ⲛⲓⲁⲃⲓⲛ ⲡϣⲏⲣⲉ ⲛⲁⲃⲓⲏⲣ

52 ⲁⲩⲱ ⲡⲡⲟⲗⲉⲙⲟⲥ ⲛⲉϥⲛⲁϣⲧ ⲉϫⲛⲛⲁⲗⲗⲟⲫⲩⲗⲟⲥ ⲛⲛⲉϩⲟⲟⲩ ⲧⲏⲣⲟⲩ ⲛⲥⲁⲟⲩⲗ ⲁⲩⲱ ⲥⲁⲟⲩⲗ ⲛⲧⲉⲣⲉϥⲛⲁⲩ ⲉⲣⲱⲙⲉ ⲛⲓⲙ ⲛⲇⲩⲛⲁⲧⲟⲥ ⲁⲩⲱ ⲣⲱⲙⲉ ⲛⲓⲙ ⲉϥϫⲟⲟⲣ ⲁϥⲥⲟⲟⲩϩⲟⲩ ⲉϩⲟⲩⲛ ⲉⲣⲟⲟⲩ