Read 1 Samuel 13 side by side with translations · The Final Bible
2 ⲁⲩⲱ ⲥⲁⲟⲩⲗ ⲁϥⲥⲱⲧⲡ ⲛⲁϥ ⲙⲙⲁⲁⲃ ⲛϣⲉ ⲛⲣⲱⲙⲉ ⲉⲃⲟⲗ ϩⲛⲛⲣⲱⲙⲉ ⲙⲡⲓⲥⲣⲁⲏⲗ ϫⲟⲩⲱⲧ ⲇⲉ ⲛϣⲉ ⲛⲣⲱⲙⲉ ⲛⲉⲩⲟⲩⲏϩ ⲛⲥⲁⲥⲁⲟⲩⲗ ϩⲙⲙⲁⲭⲙⲁⲥ ⲁⲩⲱ ϩⲙⲡⲧⲟⲟⲩ ⲛⲃⲁⲓⲑⲏⲗ ⲁⲩⲱ ⲙⲏⲧ ⲛϣⲉ ⲛⲣⲱⲙⲉ ⲛⲉⲩϣⲟⲟⲡ ⲙⲛⲓⲱⲛⲁⲑⲁⲛ ϩⲛⲅⲁⲃⲁⲁ ⲛⲃⲉⲛⲓⲁⲙⲓⲛ ⲡⲕⲉϣⲱϫⲡ ⲇⲉ ⲙⲡⲗⲁⲟⲥ ⲁϥϫⲟⲟⲩⲥⲟⲩ ⲉϩⲣⲁⲓ ⲡⲟⲩⲁ ⲡⲟⲩⲁ ⲉⲡⲉϥⲙⲁ ⲛϣⲱⲡⲉ
3 ⲓⲱⲛⲁⲑⲁⲛ ⲇⲉ ⲁϥⲡⲁⲧⲁⲥⲥⲉⲓ ⲛⲁⲥⲓⲃ ⲡⲁⲗⲗⲟⲫⲩⲗⲟⲥ ⲡⲉⲧⲟⲩⲏϩ ϩⲙⲡⲃⲟⲩⲛⲟⲥ ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩⲥⲱⲧⲙ ⲥⲁⲟⲩⲗ ⲇⲉ ⲁϥⲥⲁⲗⲡⲓⲍⲉ ⲛⲟⲩⲥⲁⲗⲡⲓⲅⲝ ⲉⲃⲟⲗ ϩⲙⲡⲕⲁϩ ⲧⲏⲣϥ ⲉϥϫⲱ ⲙⲙⲟⲥ ϫⲉⲛϩⲙϩⲁⲗ ⲁⲩⲁⲑⲉⲧⲉⲓ ⲁⲩϥⲓ ϫⲱⲟⲩ
4 ⲁⲩⲱ ⲡⲓⲥⲣⲁⲏⲗ ⲧⲏⲣϥ ⲁⲩⲥⲱⲧⲙ ϫⲉⲥⲁⲟⲩⲗ ⲁϥⲡⲁⲧⲁⲥⲥⲉⲓ ⲛⲁⲥⲓⲃ ⲡⲁⲗⲗⲟⲫⲩⲗⲟⲥ ⲁϥⲃⲟⲧϥ ⲉⲃⲟⲗ ⲁⲩⲱ ⲁⲩϯϣⲓⲡⲉ ⲛⲛⲁⲗⲗⲟⲫⲩⲗⲟⲥ ⲡⲗⲁⲟⲥ ⲇⲉ ⲁϥⲱϣ ⲉⲃⲟⲗ ⲉⲧⲣⲉⲩⲟⲩⲁϩⲟⲩ ⲛⲥⲁⲥⲁⲟⲩⲗ ϩⲛⲅⲁⲗⲅⲁⲗⲁ
5 ⲛⲁⲗⲗⲟⲫⲩⲗⲟⲥ ⲇⲉ ⲁⲩⲥⲱⲟⲩϩ ⲉϩⲟⲩⲛ ⲉⲩⲡⲟⲗⲉⲙⲟⲥ ⲉⲙⲓϣⲉ ⲙⲛⲡⲓⲥⲣⲁⲏⲗ ⲁⲩⲧⲱⲟⲩⲛ ⲁⲩⲃⲱⲕ ⲉⲣⲱϥ ⲙⲡⲓⲥⲣⲁⲏⲗ ⲛϭⲓϣⲟⲙⲛⲧ ⲛⲧⲃⲁ ⲛϩⲁⲣⲙⲁ ⲁⲩⲱ ⲥⲟⲟⲩ ⲛϣⲟ ⲛϩⲓⲡⲡⲉⲩⲥ ⲁⲩⲱ ⲡⲉⲩⲗⲁⲟⲥ ⲉϥⲟ ⲛⲧϩⲉ ⲙⲡϣⲱ ⲛⲧⲑⲁⲗⲁⲥⲥⲁ ϩⲛⲧⲉϥⲁϣⲏ ⲁⲩⲉⲓ ⲁⲩⲧⲁⲁⲩ ⲉϩⲣⲁⲓ ⲉⲙⲁⲭⲙⲁⲥ ⲙⲡⲉⲙⲧⲟ ⲉⲃⲟⲗ ⲛⲃⲏⲑⲟⲣⲟⲛ ⲙⲡⲉϥⲣⲏⲥ
6 ⲁⲩⲱ ⲛⲣⲱⲙⲉ ⲙⲡⲓⲥⲣⲁⲏⲗ ⲁⲩⲛⲁⲩ ϫⲉⲛⲥⲉⲛⲁⲉϣϭⲙϭⲟⲙ ⲁⲛ ⲉⲁϩⲉⲣⲁⲧⲟⲩ ⲉⲣⲟⲟⲩ ⲡⲗⲁⲟⲥ ⲙⲡⲓⲥⲣⲁⲏⲗ ⲁⲩϩⲟⲡⲟⲩ ϩⲛⲙϩⲁⲁⲩ ⲁⲩⲱ ϩⲛⲛⲉⲃⲏⲃ ⲁⲩⲱ ϩⲛⲛⲉϩⲓⲉⲓⲧ ⲙⲛⲛⲉϣⲏⲓ
7 ⲛⲉⲧⲛⲁⲡⲱⲧ ⲇⲉ ⲁⲩϫⲓⲟⲟⲣ ⲙⲡⲓⲟⲣⲇⲁⲛⲏⲥ ⲁⲩⲃⲱⲕ ⲉϩⲣⲁⲓ ⲉⲡⲕⲁϩ ⲛⲅⲁⲇ ⲙⲛⲅⲁⲗⲁⲁⲇ ⲥⲁⲟⲩⲗ ⲇⲉ ⲉⲧⲓ ⲛⲉϥϩⲛⲅⲁⲗⲅⲁⲗⲁ ⲡⲗⲁⲟⲥ ⲧⲏⲣϥ ⲉⲧⲟⲩⲏϩ ⲛⲥⲱϥ ⲁⲩϣⲧⲟⲣⲧⲣ
8 ⲁⲩⲱ ⲡⲥⲁϣϥ ⲛϩⲟⲟⲩ ⲁⲩⲟⲩⲱ ⲛⲧⲙⲛⲧⲙⲛⲧⲣⲉ ⲛⲧϩⲉ ⲛⲧⲁⲥⲁⲙⲟⲩⲏⲗ ϫⲟⲟⲥ ⲛⲁϥ ⲙⲡⲉⲥⲁⲙⲟⲩⲏⲗ
9 ⲡⲉϫⲉⲥⲁⲟⲩⲗ ϫⲉⲁⲩⲉⲓⲥ ⲛⲧⲁⲧⲁⲗⲟ ⲉϩⲣⲁⲓ ⲛⲛⲉϭⲗⲓⲗ ⲙⲛⲛⲉⲑⲩⲥⲓⲁ ⲛⲉⲓⲣⲏⲛⲓⲕⲟⲛ ⲁⲩⲱ ⲥⲁⲟⲩⲗ ⲁϥⲧⲁⲗⲟ ⲉϩⲣⲁⲓ ⲙⲡϩⲟⲗⲟⲕⲁⲩⲧⲱⲙⲁ
10 ⲛⲧⲉⲣⲉϥⲟⲩⲱ ⲇⲉ ⲉϥⲧⲁⲗⲟ ⲉϩⲣⲁⲓ ⲙⲡϩⲟⲗⲟⲕⲁⲩⲧⲱⲙⲁ ⲥⲁⲙⲟⲩⲏⲗ ⲁϥⲉⲓ ⲁⲩⲱ ⲥⲁⲟⲩⲗ ⲁϥⲉⲓ ⲉⲃⲟⲗ ϩⲏⲧϥ ⲉⲧⲣⲉϥⲥⲙⲟⲩ ⲉⲣⲟϥ
11 ⲡⲉϫⲉⲥⲁⲙⲟⲩⲏⲗ ⲛⲁϥ ϫⲉⲛⲧⲁⲕⲣⲟⲩ ⲡⲉϫⲉⲥⲁⲟⲩⲗ ϫⲉⲉⲃⲟⲗ ϫⲉⲁⲓⲛⲁⲩ ϫⲉⲡⲗⲁⲟⲥ ⲁϥⲃⲱⲕ ⲁϥⲕⲁⲁⲧ ⲁⲩⲱ ⲛⲧⲟⲕ ⲙⲡⲉⲕⲉⲓ ⲛⲁⲓ ⲕⲁⲧⲁⲡⲧⲱϣ ⲛⲛⲉϩⲟⲟⲩ ⲛⲧϩⲉ ⲛⲧⲁⲕⲣⲙⲛⲧⲣⲉ ⲛⲁⲓ ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩⲥⲱⲟⲩϩ ⲉⲙⲁⲭⲙⲁⲥ
12 ⲁⲓϫⲟⲟⲥ ϫⲉⲧⲉⲛⲟⲩ ⲛⲁⲗⲗⲟⲫⲩⲗⲟⲥ ⲛⲁⲉⲓ ⲛⲁⲓ ⲉϩⲣⲁⲓ ⲉⲅⲁⲗⲅⲁⲗⲁ ⲉⲙⲡⲓⲧⲉⲃϩⲡϩⲟ ⲙⲡϫⲟⲉⲓⲥ ⲁⲓⲉⲅⲕⲣⲁⲧⲉⲩⲉ ⲙⲙⲟⲓ ⲁⲓⲧⲁⲗⲟ ⲛⲛⲉϭⲗⲓⲗ ⲉϩⲣⲁⲓ
13 ⲡⲉϫⲉⲥⲁⲙⲟⲩⲏⲗ ⲇⲉ ⲉϩⲟⲩⲛ ϩⲛⲥⲁⲟⲩⲗ ϫⲉⲙⲡⲉⲕϯϩⲏⲩ ⲉⲃⲟⲗ ϫⲉⲙⲡⲉⲕϩⲁⲣⲉϩ ⲉⲧⲁⲉⲛⲧⲟⲗⲏ ⲛⲧⲁⲡϫⲟⲉⲓⲥ ϩⲱⲛ ⲙⲙⲟⲥ ⲉⲧⲟⲟⲧⲕ ⲁⲩⲱ ⲧⲉⲛⲟⲩ ⲛⲧϩⲉ ⲛⲧⲁⲡϫⲟⲉⲓⲥ ⲥⲃⲧⲉⲧⲉⲕⲙⲛⲧⲣⲣⲟ ⲉⲧⲣⲉⲥϣⲱⲡⲉ ⲛⲁⲕ ϣⲁⲃⲟⲗ ⲉϫⲙⲡⲓⲥⲣⲁⲏⲗ
14 ⲧⲉⲛⲟⲩ ϭⲉ ⲧⲉⲕⲙⲛⲧⲣⲣⲟ ⲛⲥⲛⲁⲁϩⲉⲣⲁⲧⲥ ⲁⲛ ⲁⲩⲱ ⲡϫⲟⲉⲓⲥ ⲛⲁⲕⲱⲧⲉ ⲛⲁϥ ⲛⲥⲁⲟⲩⲣⲱⲙⲉ ⲕⲁⲧⲁⲡⲉϥϩⲏⲧ ⲛⲧⲉⲡϫⲟⲉⲓⲥ ϩⲱⲛ ⲉⲧⲟⲟⲧϥ ⲉⲧⲣⲉϥⲣⲁⲣⲭⲱⲛ ⲉϫⲙⲡⲉϥⲗⲁⲟⲥ ⲉⲃⲟⲗ ϫⲉⲙⲡⲉⲕϩⲁⲣⲉϩ ⲉⲛⲉⲛⲧⲟⲗⲏ ⲛⲧⲁⲡϫⲟⲉⲓⲥ ϩⲱⲛ ⲙⲙⲟⲟⲩ ⲉⲧⲟⲟⲧⲕ
15 ⲁⲩⲱ ⲥⲁⲙⲟⲩⲏⲗ ⲁϥⲧⲱⲟⲩⲛ ⲁϥⲙⲟⲟϣⲉ ⲉⲃⲟⲗ ϩⲛⲅⲁⲗⲅⲁⲗⲁ ⲉϩⲣⲁⲓ ⲉⲧⲉϥϩⲓⲏ ⲡϣⲱϫⲡ ⲇⲉ ⲙⲡⲗⲁⲟⲥ ⲁⲩⲉⲓ ⲉϩⲣⲁⲓ ⲉⲩⲟⲩⲏϩ ⲛⲥⲁⲥⲁⲟⲩⲗ ⲉⲧⲣⲉⲩⲁⲡⲁⲛⲧⲁ ⲉⲡⲉⲩⲗⲁⲟⲥ ⲛⲣⲉϥⲡⲟⲗⲩⲙⲉⲓ ⲉⲁⲩⲉⲓ ⲉⲃⲟⲗ ϩⲛⲅⲁⲗⲅⲁⲗⲁ ⲉϩⲣⲁⲓ ⲉⲕⲁⲃⲁⲁ ⲡⲕⲁϩ ⲛⲃⲉⲛⲓⲁⲙⲓⲛ ⲁⲩⲱ ⲥⲁⲟⲩⲗ ⲁϥϭⲉⲙⲡϣⲓⲛⲉ ⲙⲡⲗⲁⲟⲥ ⲛⲧⲁⲩϩⲉ ⲉⲣⲟϥ ⲛⲙⲙⲁϥ ⲉⲩⲛⲁⲣⲥⲟⲟⲩ ⲛϣⲉ ⲛⲣⲱⲙⲉ
16 ⲥⲁⲟⲩⲗ ⲇⲉ ⲙⲛⲓⲱⲛⲁⲑⲁⲛ ⲡⲉϥϣⲏⲣⲉ ⲁⲩⲱ ⲡⲗⲁⲟⲥ ⲛⲧⲁⲩϩⲉ ⲉⲣⲟϥ ⲛⲙⲙⲁⲩ ⲁⲩϩⲙⲟⲟⲥ ϩⲛⲅⲁⲃⲁⲁ ⲡⲕⲁϩ ⲛⲃⲉⲛⲓⲁⲙⲓⲛ ⲁⲩⲣⲓⲙⲉ ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩⲧⲁⲁⲩ ⲉϩⲣⲁⲓ ⲉⲙⲁⲭⲙⲁⲥ
17 ⲛⲣⲉϥⲧⲁⲕⲟ ⲁⲩⲉⲓ ⲉⲃⲟⲗ ϩⲛⲧⲥⲱϣⲉ ⲛⲛⲁⲗⲗⲟⲫⲩⲗⲟⲥ ⲉⲩⲛⲁⲣϣⲟⲙⲛⲧ ⲛⲉⲙⲗⲁϩ ⲡⲟⲩⲁ ⲛⲛⲉⲙⲗⲁϩ ⲉⲣⲉϩⲣⲁϥ ϭⲱϣⲧ ⲉⲧⲉϩⲓⲏ ⲛⲧⲱⲫⲩⲣⲟⲛ ⲉϫⲙⲡⲕⲁϩ ⲛⲥⲱⲅⲁⲣ
18 ⲁⲩⲱ ⲡⲕⲉⲉⲙⲡⲗⲁϩ ⲉⲣⲉϩⲣⲁϥ ϭⲱϣⲧ ⲉⲧⲉϩⲓⲏ ⲛⲃⲟⲑⲟⲣⲟⲛ ⲁⲩⲱ ⲡⲕⲉⲉⲙⲡⲗⲁϩ ⲉⲣⲉϩⲣⲁϥ ϭⲱϣⲧ ⲉⲧⲉϩⲓⲏ ⲛⲅⲁⲃⲁⲁ ⲧⲉⲧⲛⲟⲩϫⲉ ⲉϩⲣⲁⲓ ⲉⲅⲁⲓ ⲛⲧⲉⲥⲁⲙⲓⲛ
19 ⲙⲡⲟⲩϩⲉ ⲇⲉ ⲉϩⲁⲙⲕⲏⲗⲗⲉ ⲙⲡⲉⲛⲓⲡⲉ ϩⲙⲡⲕⲁϩ ⲧⲏⲣϥ ⲙⲡⲓⲥⲣⲁⲏⲗ ⲉⲧⲃⲉⲡⲁⲓ ⲛⲁⲗⲗⲟⲫⲩⲗⲟⲥ ⲁⲩϫⲟⲟⲥ ϫⲉⲛⲥⲉⲛⲁⲧⲁⲙⲓⲉⲥⲏϥⲉ ⲁⲛ ⲛϭⲓⲛϩⲉⲃⲣⲁⲓⲟⲥ ϩⲓⲙⲉⲣⲉϩ
20 ⲁⲩⲱ ⲡⲓⲥⲣⲁⲏⲗ ⲧⲏⲣϥ ⲛⲉⲩⲛⲏⲩ ⲉϩⲣⲁⲓ ⲉⲡⲕⲁϩ ⲛⲛⲁⲗⲗⲟⲫⲩⲗⲟⲥ ⲉⲧⲣⲉⲡⲟⲩⲁ ⲡⲟⲩⲁ ⲱⲧϩ ⲙⲡⲉϥⲟϩⲥ ⲁⲩⲱ ⲡⲟⲩⲁ ⲡⲟⲩⲁ ⲉⲧⲣⲉϥⲱⲧϩ ⲙⲡⲉϥⲕⲉⲗⲉⲃⲓⲛ ⲙⲛⲧⲉϥϩⲉⲗⲕⲟⲩ ⲙⲛⲡⲉϥⲥⲟⲧⲃⲉϥ ⲛⲣϩⲱⲃ
21 ⲡϫⲱⲱⲗⲉ ⲇⲉ ⲏ ⲡⲱϩⲥ ⲛⲉⲁϥⲉⲓ ⲉⲃⲟⲗ ⲉⲟϩⲥϥ ⲛⲉⲩⲥⲕⲉⲩⲏ ⲇⲉ ⲛⲉⲣⲉⲧⲟⲃϩⲉ ⲛⲁⲣϣⲟⲙⲧⲉ ⲛⲥⲁⲧⲉⲉⲣⲉ ⲛϩⲣⲏϣⲉ ⲁⲩⲱ ⲡⲕⲉⲗⲉⲃⲓⲛ ⲙⲛⲡⲟϩⲥ ⲡⲉⲓϣⲓ ⲛⲟⲩⲱⲧ ⲙⲙⲟⲟⲩ ⲡⲉ
22 ⲁⲥϣⲱⲡⲉ ⲇⲉ ϩⲛⲛⲉϩⲟⲟⲩ ⲙⲡⲡⲟⲗⲉⲙⲟⲥ ⲙⲙⲁⲭⲙⲁⲥ ⲙⲡⲟⲩϩⲉ ⲉⲥⲏϥⲉ ϩⲓⲙⲉⲣⲉϩ ⲛⲧⲟⲟⲧϥ ⲙⲡⲗⲁⲟⲥ ⲧⲏⲣϥ ⲉⲧⲙⲟⲟϣⲉ ⲙⲛⲥⲁⲟⲩⲗ ⲁⲩⲱ ⲙⲛⲓⲱⲛⲁⲑⲁⲛ ⲡⲉϥϣⲏⲣⲉ ⲁⲩϭⲓⲛⲉ ⲇⲉ ⲛⲧⲉⲥⲁⲟⲩⲗ ⲙⲛⲓⲱⲛⲁⲑⲁⲛ ⲡⲉϥϣⲏⲣⲉ
23 ⲓⲱⲛⲁⲑⲁⲛ ⲇⲉ ⲁϥⲉⲓ ⲉⲃⲟⲗ ϩⲙⲡⲙⲏⲏϣⲉ ⲛⲛⲁⲗⲗⲟⲫⲩⲗⲟⲥ ϩⲙⲡⲉⲕⲣⲟ ⲙⲙⲁⲭⲙⲁⲥ ⲙⲡⲉϥⲧⲁⲙⲉⲡⲉϥⲉⲓⲱⲧ
1 Samuel 12 · 1 Samuel 14 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)