1 Samuel 15 — Coptic (Sahidic)

1 ⲡⲉϫⲉⲥⲁⲙⲟⲩⲏⲗ ⲇⲉ ⲛⲥⲁⲟⲩⲗ ϫⲉⲡϫⲟⲉⲓⲥ ⲁϥⲧⲛⲛⲟⲟⲩⲧ ⲉⲧⲁϩⲥⲕ ⲛⲣⲣⲟ ⲉϫⲙⲡⲓⲥⲣⲁⲏⲗ ⲧⲉⲛⲟⲩ ϭⲉ ⲥⲱⲧⲙ ⲉⲡⲉϩⲣⲟⲟⲩ ⲙⲡϫⲟⲉⲓⲥ

2 ⲛⲁⲓ ⲛⲉ ⲛⲧⲁⲡϫⲟⲉⲓⲥ ⲥⲁⲃⲃⲁⲱⲑ ϫⲟⲟⲩ ϫⲉⲧⲉⲛⲟⲩ ϯⲛⲁϫⲓⲕⲃⲁ ⲙⲡⲁⲙⲁⲗⲏⲕ ⲛⲛⲉⲛⲧⲁϥⲁⲁⲩ ⲙⲡⲓⲥⲣⲁⲏⲗ ⲛⲧϩⲉ ⲛⲧⲁϥⲉⲓ ⲉⲃⲟⲗ ϩⲏⲧϥ ϩⲛⲧⲉϩⲓⲏ ⲉϥⲛⲏⲩ ⲉⲃⲟⲗ ϩⲛⲕⲏⲙⲉ

3 ⲧⲉⲛⲟⲩ ϭⲉ ⲃⲱⲕ ⲁⲩⲱ ⲕⲛⲁⲡⲁⲧⲁⲥⲥⲉⲓ ⲙⲡⲁⲙⲁⲗⲏⲕ ⲙⲛⲓⲉⲣⲓⲙ ⲙⲛⲛⲉⲧϣⲟⲟⲡ ⲛⲁϥ ⲧⲏⲣⲟⲩ ⲛⲅⲧⲙⲧⲟⲩϫⲉⲗⲁⲁⲩ ⲉⲃⲟⲗ ⲛϩⲏⲧⲟⲩ ⲛⲅⲃⲟⲧϥ ⲉⲃⲟⲗ ⲁⲩⲱ ⲛⲅⲕⲁⲁϥ ⲛⲃⲟⲧⲉ ϩⲛⲟⲩⲃⲟⲧⲉ ⲙⲛⲛⲉⲧϣⲟⲟⲡ ⲛⲁϥ ⲧⲏⲣⲟⲩ ⲛⲅⲧⲙϯⲥⲟ ⲉⲣⲟϥ ⲛⲅϩⲱⲧⲃ ⲛϫⲓⲛ ϩⲟⲟⲩⲧ ϣⲁⲥϩⲓⲙⲉ ⲁⲩⲱ ϫⲓⲛϣⲏⲣⲉ ⲕⲟⲩⲓ ϣⲁⲡⲉⲧϫⲓⲉⲕⲓⲃⲉ ⲁⲩⲱ ⲛϫⲓⲛ ⲟⲩⲙⲁⲥⲉ ϣⲁⲟⲩⲉⲥⲟⲟⲩ ⲁⲩⲱ ⲛϫⲓⲛ ⲟⲩϭⲁⲙⲟⲩⲗ ϣⲁⲟⲩⲉⲓⲱ

4 ⲥⲁⲟⲩⲗ ⲇⲉ ⲁϥⲡⲁⲣⲁⲅⲅⲉⲓⲗⲉ ⲙⲡⲉϥⲗⲁⲟⲥ ⲁⲩⲱ ⲁϥϭⲙⲡⲉⲩϣⲓⲛⲉ ϩⲛⲅⲁⲃⲁⲁ ⲡⲓⲥⲣⲁⲏⲗ ⲁϥⲣϩⲙⲉ ⲛⲧⲃⲁ ⲙⲙⲏⲏϣⲉ ⲁⲩⲱ ⲓⲟⲩⲇⲁⲥ ⲁϥⲣϣⲟⲙⲛⲧ ⲛⲧⲃⲁ ⲙⲙⲏⲏϣⲉ

5 ⲥⲁⲟⲩⲗ ⲇⲉ ⲁϥⲉⲓ ⲉϩⲣⲁⲓ ⲉⲙⲡⲟⲗⲓⲥ ⲙⲡⲁⲙⲁⲗⲏⲕ ⲁϥⲥⲙⲛⲕⲣⲟϥ ϩⲙⲡⲉⲭⲉⲓⲙⲁⲣⲣⲟⲥ

6 ⲁⲩⲱ ⲡⲉϫⲉⲥⲁⲟⲩⲗ ⲙⲡⲕⲓⲛⲛⲁⲓⲟⲥ ϫⲉⲧⲱⲟⲩⲛ ⲛⲅⲉⲓ ⲉⲃⲟⲗ ⲟⲩⲇⲉ ⲡⲁⲙⲁⲗⲏⲕ ϫⲉⲛⲛⲁⲧⲁⲕⲟⲕ ⲛⲧⲉϥϩⲉ ⲁⲩⲱ ⲛⲧⲟⲕ ⲁⲕⲉⲓⲣⲉ ⲛⲟⲩⲛⲁ ⲙⲛⲛⲉϣⲏⲣⲉ ⲙⲡⲓⲥⲣⲁⲏⲗ ⲛⲧⲉⲣⲟⲩⲉⲓ ⲉⲃⲟⲗ ϩⲛⲕⲏⲙⲉ ⲁⲩⲱ ⲡⲅⲓⲛⲛⲁⲓⲟⲥ ⲁϥⲧⲱⲟⲩⲛ ⲁϥⲉⲓ ⲉⲃⲟⲗ ⲟⲩⲧⲉ ⲡⲁⲙⲁⲗⲏⲕ

7 ⲥⲁⲟⲩⲗ ⲇⲉ ⲁϥⲡⲁⲧⲁⲥⲥⲉⲓ ⲙⲡⲁⲙⲁⲗⲏⲕ ϫⲓⲛⲛⲉⲩⲉⲓⲗⲁⲧ ϣⲁⲉϩⲣⲁⲓ ⲉⲥⲟⲩⲣ ⲧⲉⲧⲙⲡϩⲁⲁⲧⲉ ⲉⲃⲟⲗ ⲛⲕⲏⲙⲉ

8 ⲁⲩⲱ ⲁϥϭⲱⲡⲉ ⲛⲁⲅⲁⲅ ⲡⲣⲣⲟ ⲙⲡⲁⲙⲁⲗⲏⲕ ⲉϥⲟⲛϩ ⲁⲩⲱ ⲡⲉϥⲙⲏⲏϣⲉ ⲧⲏⲣϥ ⲁϥϩⲟⲧⲃⲟⲩ ϩⲛⲧⲧⲁⲡⲣⲟ ⲛⲧⲥⲏϥⲉ

9 ⲥⲁⲟⲩⲗ ⲇⲉ ⲙⲛⲡⲉϥⲗⲁⲟⲥ ⲧⲏⲣϥ ⲁϥϩⲁⲣⲉϩ ⲉⲁⲅⲁⲅ ⲉϥⲟⲛϩ ⲁⲩⲱ ⲛⲉⲧⲛⲁⲛⲟⲩⲟⲩ ϩⲛⲛⲉⲥⲟⲟⲩ ⲙⲛⲛⲉϩⲟⲟⲩ ⲙⲛⲛⲉⲩϩⲣⲏⲩⲉ ⲙⲛⲛⲉⲩⲙⲁ ⲛⲉⲗⲟⲟⲗⲉ ⲙⲛⲛⲉⲩⲁⲅⲁⲑⲟⲛ ⲧⲏⲣⲟⲩ ⲙⲡⲉϥⲉⲣϩⲛⲁϥ ⲉⲧⲁⲕⲟⲟⲩ ⲉⲛⲕⲁ ⲇⲉ ⲛⲓⲙ ⲉⲧⲥⲟⲧⲡ ⲁⲛ ⲁⲩⲱ ⲉⲧⲥⲏϣ ⲁϥⲧⲁⲕⲟⲟⲩ

10 ⲁⲩⲱ ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁⲥⲁⲙⲟⲩⲏⲗ ⲉϥϫⲱ ⲙⲙⲟⲥ ⲛⲁϥ

11 ϫⲉⲁⲓⲣϩⲧⲏⲓ ϫⲉⲁⲓⲧⲱϩⲥ ⲛⲥⲁⲟⲩⲗ ⲉⲧⲣⲉϥϣⲱⲡⲉ ⲛⲣⲣⲟ ϫⲉⲁϥⲕⲧⲟϥ ⲁϥⲥⲁϩⲱⲱϥ ⲉⲃⲟⲗ ⲙⲙⲟⲓ ⲙⲡⲉϥϩⲁⲣⲉϩ ⲉⲛⲁϣⲁϫⲉ ⲥⲁⲙⲟⲩⲏⲗ ⲇⲉ ⲁϥⲟⲩⲱⲗⲥ ⲛϩⲏⲧ ⲁⲩⲱ ⲁϥⲱϣ ⲉϩⲣⲁⲓ ⲉⲡϫⲟⲉⲓⲥ ⲛⲧⲉⲩϣⲏ ⲧⲏⲣⲥ

12 ⲁⲩⲱ ⲥⲁⲙⲟⲩⲏⲗ ⲁϥϣⲟⲣⲡϥ ⲁϥⲃⲱⲕ ⲉⲣⲁⲧϥ ⲙⲡⲓⲥⲣⲁⲏⲗ ⲙⲡⲉϥϩⲧⲟⲟⲩⲉ ⲁⲩⲧⲁⲙⲉⲥⲁⲟⲩⲗ ⲇⲉ ⲉⲩϫⲱ ⲙⲙⲟⲥ ϫⲉⲥⲁⲙⲟⲩⲏⲗ ⲁϥⲃⲱⲕ ⲉϩⲣⲁⲓ ⲉⲡⲕⲁⲣⲙⲏⲗⲟⲥ ⲁⲩⲱ ⲉⲓⲥ ⲥⲁⲟⲩⲗ ⲁϥⲥⲙⲛⲧⲟⲟⲧϥ ⲁϥⲕⲧⲉⲡⲉϥϩⲁⲣⲙⲁ ⲁϥⲉⲓ ⲉϩⲣⲁⲓ ⲉⲅⲁⲗⲅⲁⲗⲁ ⲁⲩⲱ ⲥⲁⲙⲟⲩⲏⲗ ⲁϥⲉⲓ ⲉⲣⲁⲧϥ ⲛⲥⲁⲟⲩⲗ ⲁⲩⲱ ⲉⲓⲥ ⲥⲁⲟⲩⲗ ⲛⲉϥⲧⲁⲗⲟ ⲉϩⲣⲁⲓ ⲙⲡⲉϥϭⲗⲓⲗ ⲙⲙⲁϩ ⲙⲡϫⲟⲉⲓⲥ ϩⲛⲛⲉⲥⲱⲧⲡ ⲛⲛⲉϣⲱⲗ ⲛⲁⲓ ⲛⲧⲁϥⲉⲛⲧⲟⲩ ⲉϩⲣⲁⲓ ϩⲙⲡⲁⲙⲁⲗⲏⲕ

13 ⲁⲩⲱ ⲥⲁⲙⲟⲩⲏⲗ ⲁϥⲉⲓ ⲉⲣⲁⲧϥ ⲛⲥⲁⲟⲩⲗ ⲡⲉϫⲉⲥⲁⲟⲩⲗ ⲛⲁϥ ϫⲉⲕⲥⲙⲁⲙⲁⲁⲧ ⲛⲧⲟⲕ ⲛⲧⲟⲟⲧϥ ⲙⲡϫⲟⲉⲓⲥ ⲁⲓⲧⲁϩⲉⲡϣⲁϫⲉ ⲉⲣⲁⲧϥ ⲛⲧⲁⲡϫⲟⲉⲓⲥ ϫⲟⲟϥ

14 ⲡⲉϫⲉⲥⲁⲙⲟⲩⲏⲗ ⲛⲁϥ ϫⲉⲟⲩ ⲡⲉ ⲡⲉϩⲣⲟⲟⲩ ⲙⲡⲓⲟϩⲉ ⲛⲉⲥⲟⲟⲩ ⲉⲧⲧⲁϩⲟ ⲛⲛⲁⲙⲁⲁϫⲉ ⲁⲩⲱ ⲡⲉϩⲣⲟⲟⲩ ⲛⲛⲓⲁϩⲟⲟⲩ ⲉϯⲥⲱⲧⲙ ⲁⲛⲟⲕ ⲉⲣⲟϥ

15 ⲡⲉϫⲉⲥⲁⲟⲩⲗ ⲛⲁϥ ϫⲉⲛⲧⲁⲓⲉⲛⲧⲟⲩ ⲉⲃⲟⲗ ϩⲙⲡⲁⲙⲁⲗⲏⲕ ⲛⲥⲱⲧⲡ ⲛⲛⲟϩⲉ ⲛⲉⲥⲟⲟⲩ ⲙⲛⲛⲉϩⲟⲟⲩ ⲛⲧⲁⲡⲗⲁⲟⲥ ϩⲁⲣⲉϩ ⲉⲣⲟⲟⲩ ⲉⲧⲁⲗⲟⲟⲩ ⲉϩⲣⲁⲓ ⲛϩⲉⲛⲑⲩⲥⲓⲁ ⲙⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲕⲟⲟⲩⲉ ⲇⲉ ⲧⲏⲣⲟⲩ ⲁⲓⲧⲁⲕⲟⲟⲩ

16 ⲡⲉϫⲉⲥⲁⲙⲟⲩⲏⲗ ⲉϩⲟⲩⲛ ϩⲛⲥⲁⲟⲩⲗ ϫⲉϭⲱ ⲛⲧⲁⲧⲁⲙⲟⲕ ⲉⲛⲉϣⲁϫⲉ ⲛⲧⲁⲡϫⲟⲉⲓⲥ ϫⲟⲟⲩ ⲉⲣⲟⲓ ⲛⲧⲉⲩϣⲏ ⲡⲉϫⲁϥ ⲛⲁϥ ϫⲉⲁϫⲓⲥⲟⲩ

17 ⲡⲉϫⲉⲥⲁⲙⲟⲩⲏⲗ ⲛⲥⲁⲟⲩⲗ ϫⲉⲙⲏ ⲛⲉⲕⲥⲟⲃⲉⲕ ⲁⲛ ⲛⲧⲟⲕ ⲙⲡⲉⲙⲧⲟ ⲉⲃⲟⲗ ⲙⲡⲙⲏⲏϣⲉ ⲛⲧⲉⲡϩⲩⲗⲏ ⲙⲡⲓⲥⲣⲁⲏⲗ ⲁⲩⲱ ⲡϫⲟⲉⲓⲥ ⲁϥⲧⲁϩⲥⲕ ⲉⲧⲣⲉⲕϣⲱⲡⲉ ⲛⲣⲣⲟ ⲉϫⲙⲡⲓⲥⲣⲁⲏⲗ

18 ⲁⲩⲱ ⲡϫⲟⲉⲓⲥ ⲁϥϫⲟⲟⲩⲕ ϩⲛⲧⲉϥϩⲓⲏ ⲉⲁϥϫⲟⲟⲥ ⲛⲁⲕ ϫⲉⲃⲱⲕ ⲛⲅⲧⲁⲕⲟ ⲁⲩⲱ ⲛⲅⲃⲱⲧⲉ ⲉⲃⲟⲗ ⲛⲛⲉⲧⲣⲛⲟⲃⲉ ⲉⲣⲟⲓ ⲉⲧⲉⲡⲁⲙⲁⲗⲏⲕ ⲡⲉ ⲛⲅⲡⲟⲗⲉⲙⲉⲓ ⲛⲙⲙⲁⲩ ϣⲁⲛⲧⲉⲕⲟϫⲛⲟⲩ

19 ⲉⲧⲃⲉⲟⲩ ϭⲉ ⲙⲡⲉⲕⲥⲱⲧⲙ ⲛⲥⲁⲡⲉϩⲣⲟⲟⲩ ⲙⲡϫⲟⲉⲓⲥ ⲁⲗⲗⲁ ⲁⲕϯ ⲙⲡⲉⲕⲟⲩⲟⲓ ⲉϫⲛⲛⲉϣⲱⲗ ⲉϥⲓⲧⲟⲩ ⲁⲩⲱ ⲁⲕⲉⲓⲣⲉ ⲙⲡⲡⲟⲛⲏⲣⲟⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ

20 ⲡⲉϫⲉⲥⲁⲟⲩⲗ ⲛⲥⲁⲙⲟⲩⲏⲗ ϫⲉⲉⲃⲟⲗ ϫⲉⲁⲓⲥⲱⲧⲙ ⲛⲥⲁⲡⲉϩⲣⲟⲟⲩ ⲙⲡⲗⲁⲟⲥ ⲁⲩⲱ ⲁⲓⲙⲟⲟϣⲉ ϩⲛⲧⲉϩⲓⲏ ⲛⲧⲁⲡϫⲟⲉⲓⲥ ϫⲟⲟⲩⲧ ⲛϩⲏⲧⲥ ⲁⲓⲉⲓⲛⲉ ⲛⲁⲅⲁⲅ ⲡⲣⲣⲟ ⲙⲡⲁⲙⲁⲗⲏⲕ ⲉϥⲟⲛϩ ⲁⲩⲱ ⲡⲁⲙⲁⲗⲏⲕ ⲁⲓⲃⲟⲧϥ ⲉⲃⲟⲗ

21 ⲡⲗⲁⲟⲥ ⲇⲉ ⲁϥϫⲓ ⲉⲃⲟⲗ ϩⲛⲛⲉϣⲱⲗ ⲛⲛⲟϩⲉ ⲛⲉⲥⲟⲟⲩ ⲙⲛⲛⲉϩⲟⲟⲩ ⲛⲥⲱⲧⲡ ⲛϣⲟⲗⲥ ⲉⲧⲁⲗⲟⲟⲩ ⲉϩⲣⲁⲓ ⲛⲟⲩⲑⲩⲥⲓⲁ ⲙⲡϫⲟⲉⲓⲥ ⲡⲉⲛⲛⲟⲩⲧⲉ ϩⲛⲅⲁⲗⲅⲁⲗⲁ

22 ⲡⲉϫⲉⲥⲁⲙⲟⲩⲏⲗ ⲛⲁϥ ϫⲉⲉⲛⲉⲡⲟⲩⲱϣ ⲙⲡϫⲟⲉⲓⲥ ⲡⲉ ϩⲉⲛϭⲗⲓⲗ ⲛⲧϩⲉ ⲛⲥⲱⲧⲙ ⲛⲥⲁⲡⲉϩⲣⲟⲟⲩ ⲙⲡϫⲟⲉⲓⲥ ⲡⲥⲱⲧⲙ ⲥⲟⲧⲡ ⲉϩⲟⲩⲉ ⲉⲟⲩⲑⲩⲥⲓⲁ ⲉⲛⲁⲛⲟⲩⲥ ⲁⲩⲱ ⲡϫⲓⲥⲙⲏⲛ ϥⲥⲟⲧⲡ ⲉϩⲟⲩⲉ ⲉⲟⲩⲱⲧ ⲛⲟⲉⲓⲗⲉ

23 ϫⲉⲡⲛⲟⲃⲉ ⲟⲩϫⲓⲙⲁⲉⲓⲛ ⲡⲉ ⲁⲩⲱ ⲟⲩⲙⲕⲁϩ ⲛϩⲏⲧ ⲙⲛⲟⲩϩⲓⲥⲉ ⲉϣⲁⲩⲧⲣⲉⲟⲩⲙⲟⲕϩⲥ ϣⲱⲡⲉ ⲉⲃⲟⲗ ϫⲉⲁⲕⲥⲱϣϥ ⲙⲡϣⲁϫⲉ ⲙⲡϫⲟⲉⲓⲥ ⲛⲧⲟⲕ ϩⲱⲱⲕ ⲡϫⲟⲉⲓⲥ ⲛⲁⲥⲟϣϥⲕ ⲉⲧⲙⲧⲣⲉⲕⲣⲣⲣⲟ ⲉϫⲙⲡⲓⲥⲣⲁⲏⲗ

24 ⲡⲉϫⲉⲥⲁⲟⲩⲗ ⲛⲥⲁⲙⲟⲩⲏⲗ ϫⲉⲁⲓⲣⲛⲟⲃⲉ ⲉⲃⲟⲗ ϫⲉⲁⲓⲣⲡⲃⲟⲗ ⲙⲡϣⲁϫⲉ ⲙⲡϫⲟⲉⲓⲥ ⲁⲩⲱ ⲡⲉⲕϣⲁϫⲉ ⲁⲓⲕⲁⲁϥ ⲛⲥⲱⲓ ϫⲉⲁⲓⲣϩⲟⲧⲉ ⲛϩⲏⲧϥ ⲙⲡⲗⲁⲟⲥ ⲁⲩⲱ ⲁⲓⲥⲱⲧⲙ ⲛⲥⲁⲡⲉⲩϩⲣⲟⲟⲩ

25 ⲧⲉⲛⲟⲩ ϭⲉ ϥⲓ ⲙⲙⲁⲩ ⲙⲡⲁⲛⲟⲃⲉ ⲛⲁϩⲣⲁⲓ ⲛⲅⲕⲟⲧⲕ ⲛⲙⲙⲁⲓ ⲛⲧⲁⲟⲩⲱϣⲧ ⲙⲡϫⲟⲉⲓⲥ ⲡⲉⲕⲛⲟⲩⲧⲉ

26 ⲡⲉϫⲉⲥⲁⲙⲟⲩⲏⲗ ⲛⲥⲁⲟⲩⲗ ϫⲉⲛϯⲛⲁⲕⲧⲟⲓ ⲁⲛ ⲛⲙⲙⲁⲕ ⲉⲃⲟⲗ ϫⲉⲁⲕⲥⲉϣϥⲡϣⲁϫⲉ ⲙⲡϫⲟⲉⲓⲥ ⲡϫⲟⲉⲓⲥ ⲛⲁⲥⲟϣϥⲕ ϩⲱⲱⲕ ⲉⲧⲙⲧⲣⲉⲕⲣⲣⲣⲟ ⲉϫⲙⲡⲓⲥⲣⲁⲏⲗ

27 ⲁⲩⲱ ⲥⲁⲙⲟⲩⲏⲗ ⲁϥⲕⲧⲟ ⲙⲡⲉϥϩⲟ ⲉⲃⲟⲗ ⲙⲙⲟϥ ⲉⲧⲣⲉϥⲙⲟⲟϣⲉ ⲥⲁⲟⲩⲗ ⲇⲉ ⲁϥⲁⲙⲁϩⲧⲉ ⲙⲡⲧⲟⲡ ⲛⲧⲉϥϣⲉⲛⲧⲱ ⲁϥⲡⲁϩⲥ

28 ⲡⲉϫⲉⲥⲁⲙⲟⲩⲏⲗ ⲛⲁϥ ϫⲉⲡϫⲟⲉⲓⲥ ⲁϥⲡⲉϣⲧⲉⲕⲙⲛⲧⲣⲣⲟ ϩⲙⲡⲓⲥⲣⲁⲏⲗ ⲙⲡϩⲟⲟⲩ ⲉⲃⲟⲗ ϩⲛⲧⲉⲕϭⲓϫ ⲁϥⲧⲁⲁⲥ ⲙⲡⲉⲧϩⲓⲧⲟⲩⲱⲕ ⲡⲉⲧⲛⲁⲛⲟⲩϥ ⲉⲣⲟⲕ

29 ⲁⲩⲱ ⲡⲓⲥⲣⲁⲏⲗ ⲛⲁⲡⲱϣ ⲛϥⲣⲥⲛⲁⲩ ⲁⲩⲱ ⲡϫⲟⲉⲓⲥ ⲛⲁⲕⲧⲟϥ ⲁⲛ ⲟⲩⲇⲉ ⲛϥⲛⲁϣⲛϩⲧⲏϥ ⲁⲛ ϫⲉⲛⲉϥⲟ ⲁⲛ ⲛⲧϩⲉ ⲛⲟⲩⲣⲱⲙⲉ ⲉⲧⲣⲉϥⲣϩⲧⲏϥ ⲛⲧⲟϥ ⲉϥⲛⲁϭⲱⲛⲧ

30 ⲡⲉϫⲉⲥⲁⲟⲩⲗ ⲛⲥⲁⲙⲟⲩⲏⲗ ϫⲉⲁⲓⲣⲛⲟⲃⲉ ⲡϫⲟⲉⲓⲥ ⲁⲗⲗⲁ ϯⲉⲟⲟⲩ ⲛⲁⲓ ⲛⲧⲟⲟⲩⲛ ⲙⲡⲉⲙⲧⲟ ⲉⲃⲟⲗ ⲛⲛⲉⲡⲣⲉⲥⲃⲩⲧⲉⲣⲟⲥ ⲙⲡⲓⲥⲣⲁⲏⲗ ⲁⲩⲱ ⲙⲡⲉⲙⲧⲟ ⲉⲃⲟⲗ ⲙⲡⲗⲁⲟⲥ ⲛⲅⲕⲟⲧⲕ ⲛⲙⲙⲁⲓ ⲛⲧⲁⲟⲩⲱϣⲧ ⲙⲡϫⲟⲉⲓⲥ ⲡⲉⲕⲛⲟⲩⲧⲉ

31 ⲁⲩⲱ ⲥⲁⲙⲟⲩⲏⲗ ⲁϥⲕⲟⲧϥ ⲙⲛⲥⲁⲟⲩⲗ ⲁϥⲟⲩⲱϣⲧ ⲙⲡϫⲟⲉⲓⲥ

32 ⲁⲩⲱ ⲡⲉϫⲉⲥⲁⲙⲟⲩⲏⲗ ⲛⲁⲩ ϫⲉⲁⲛⲉⲓⲛⲉ ⲛⲁⲅⲁⲅ ⲛⲁⲓ ⲡⲣⲣⲟ ⲙⲡⲁⲙⲁⲗⲏⲕ ⲁⲩⲱ ⲁⲅⲁⲅ ⲁϥϯ ⲙⲡⲉϥⲟⲩⲟⲓ ⲉϩⲟⲩⲛ ⲉⲣⲟϥ ⲉϥⲥⲧⲱⲧ ⲁⲩⲱ ⲡⲉϫⲉⲁⲅⲁⲅ ⲛⲁϥ ϫⲉⲉⲓⲉ ⲡⲉⲓⲙⲟⲩ ⲥⲁϣⲉ ϩⲓⲛⲁⲓ

33 ⲡⲉϫⲉⲥⲁⲙⲟⲩⲏⲗ ⲛⲁϥ ϫⲉⲉⲃⲟⲗ ϫⲉⲁⲧⲉⲕⲥⲏϥⲉ ⲣϩⲁϩ ⲛⲥϩⲓⲙⲉ ⲛⲁⲧϣⲏⲣⲉ ⲧⲁⲓ ⲧⲉ ⲧϩⲉ ⲉⲧⲉⲣⲉⲧⲉⲕⲙⲁⲁⲩ ⲛⲁⲣⲁⲧϣⲏⲣⲉ ⲉⲃⲟⲗ ϩⲛⲛⲉϩⲓⲟⲙⲉ ⲁⲩⲱ ⲥⲁⲙⲟⲩⲏⲗ ⲁϥⲕⲱⲛⲥ ⲛⲁⲅⲁⲅ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ϩⲛⲅⲁⲗⲅⲁⲗⲁ

34 ⲙⲛⲛⲥⲱⲥ ⲥⲁⲙⲟⲩⲏⲗ ⲁϥⲃⲱⲕ ⲉⲁⲣⲙⲁⲑⲁⲉⲓⲙ ⲥⲁⲟⲩⲗ ϩⲱⲱϥ ⲁϥⲃⲱⲕ ⲉϩⲣⲁⲓ ⲉⲡⲉϥⲏⲓ ⲉⲅⲁⲃⲁⲁ

35 ⲁⲩⲱ ⲙⲡⲉⲥⲁⲙⲟⲩⲏⲗ ϭⲉ ⲕⲟⲧϥ ⲉⲛⲁⲩ ⲉⲥⲁⲟⲩⲗ ϣⲁⲡⲉϩⲟⲟⲩ ⲙⲡⲉϥⲙⲟⲩ ⲛⲉⲣⲉⲥⲁⲙⲟⲩⲏⲗ ⲣϩⲏⲃⲉ ⲉϫⲛⲥⲁⲟⲩⲗ ⲁⲩⲱ ⲡϫⲟⲉⲓⲥ ⲁϥⲣϩⲧⲏϥ ϫⲉⲁϥⲣⲥⲁⲟⲩⲗ ⲛⲣⲣⲟ ⲉϫⲙⲡⲓⲥⲣⲁⲏⲗ