Read 1 Samuel 12 side by side with translations · The Final Bible
1 ⲡⲉϫⲉⲥⲁⲙⲟⲩⲏⲗ ⲛⲛⲣⲱⲙⲉ ⲧⲏⲣⲟⲩ ⲙⲡⲓⲥⲣⲁⲏⲗ ϫⲉⲉⲓⲥϩⲏⲏⲧⲉ ⲁⲓⲥⲱⲧⲙ ⲉⲡⲉⲧⲛϩⲣⲟⲟⲩ ϩⲛϩⲱⲃ ⲛⲓⲙ ⲛⲧⲁⲧⲉⲧⲛϫⲟⲟⲩ ⲛⲁⲓ ⲁⲓⲕⲱ ⲛⲟⲩⲣⲣⲟ ⲉϫⲛⲧⲏⲩⲧⲛ
2 ⲧⲉⲛⲟⲩ ϭⲉ ⲉⲓⲥ ⲡⲉⲧⲛⲣⲣⲟ ϥⲛⲁⲙⲟⲟϣⲉ ϩⲓϩⲏ ⲙⲙⲱⲧⲛ ⲁⲛⲟⲕ ⲇⲉ ⲁⲓⲣϩⲗⲗⲟ ⲉⲓⲛⲁϩⲙⲟⲟⲥ ⲛⲧⲁⲙⲧⲟⲛ ⲙⲙⲟⲓ ⲁⲩⲱ ⲉⲓⲥ ⲛⲁϣⲏⲣⲉ ϩⲛⲧⲉⲧⲛⲙⲏⲧⲉ ⲁⲛⲟⲕ ϩⲱ ⲉⲓⲥ ϩⲏⲏⲧⲉ ⲁⲓϣⲱⲡⲉ ϩⲛⲧⲉⲧⲛⲙⲏⲧⲉ ϫⲓⲛⲧⲁⲙⲛⲧⲕⲟⲩⲓ ϣⲁⲉϩⲣⲁⲓ ⲉⲡϩⲟⲟⲩ ⲛϩⲟⲟⲩ
3 ⲉⲓⲥ ϩⲏⲏⲧⲉ ⲁⲛⲟⲕ ⲙⲡϩⲟⲟⲩ ϯⲁϩⲉⲣⲁⲧ ⲙⲡⲉⲧⲛⲙⲧⲟ ⲉⲃⲟⲗ ⲁϫⲓⲟⲩϣⲁϫⲉ ⲉⲧⲃⲏⲏⲧϩⲓⲧϩⲏ ⲙⲡϫⲟⲉⲓⲥ ⲁⲩⲱ ϩⲓⲧϩⲏ ⲙⲡⲉϥⲭⲣⲏⲥⲧⲟⲥ ⲁⲓϫⲓⲙⲁⲥⲉ ⲛⲧⲉⲗⲁⲁⲩ ⲙⲙⲱⲧⲛ ⲏ ⲁⲓϫⲓⲟⲩⲉⲓⲱ ⲛⲧⲉⲗⲁⲁⲩ ⲙⲙⲱⲧⲛ ⲏ ⲁⲓϫⲓⲗⲁⲁⲩ ⲙⲙⲱⲧⲛ ⲛϫⲛⲁϩ ⲏ ⲁⲓⲑⲙⲕⲉⲗⲁⲁⲩ ⲏ ⲁⲓϫⲓⲧⲁⲉⲓⲟ ⲛⲧⲉⲗⲁⲁⲩ ⲏ ⲟⲩⲧⲟⲟⲩⲉ ⲁⲓϫⲓⲧϥ ⲛⲧⲉⲗⲁⲁⲩ ⲉϣϫⲉ ⲁϩⲉ ⲁϫⲓⲥ ⲁⲩⲱ ϯⲛⲁⲧⲟⲩⲉⲓⲟϥ ⲛⲏⲧⲛ
4 ⲡⲉϫⲁⲩ ⲧⲏⲣⲟⲩ ⲉϩⲟⲩⲛ ϩⲛⲥⲁⲙⲟⲩⲏⲗ ϫⲉⲙⲡⲉⲕϫⲓⲧⲛ ⲛϭⲟⲛⲥ ⲛⲗⲁⲁⲩ ⲁⲩⲱ ⲙⲡⲉⲕⲙⲟⲕϩⲉⲛ ⲛⲗⲁⲁⲩ ⲁⲩⲱ ⲙⲡⲉⲕⲑⲙⲕⲉⲗⲁⲁⲩ ⲁⲩⲱ ⲙⲡⲉⲕϫⲓⲗⲁⲁⲩ ⲛⲧⲉⲗⲁⲁⲩ ⲛⲣⲱⲙⲉ
5 ⲡⲉϫⲉⲥⲁⲙⲟⲩⲏⲗ ⲉϩⲟⲩⲛ ϩⲙⲡⲗⲁⲟⲥ ϫⲉⲡϫⲟⲉⲓⲥ ϥⲟ ⲛⲙⲛⲧⲣⲉ ϩⲛⲧⲉⲧⲛⲙⲏⲧⲉ ⲙⲡϩⲟⲟⲩ ⲁⲩⲱ ⲡⲉϥⲭⲣⲏⲥⲧⲟⲥ ⲟ ⲙⲙⲛⲧⲣⲉ ϫⲉⲙⲡϩⲟⲟⲩ ⲛϩⲟⲟⲩ ⲙⲡⲉⲧⲛϩⲉ ⲉϩⲱⲃ ⲛϫⲓⲛϭⲟⲛⲥ ϩⲛⲛⲁϭⲓϫ ⲡⲉϫⲁⲩ ⲧⲏⲣⲟⲩ ϫⲉϥⲟ ⲙⲙⲛⲧⲣⲉ
6 ⲡⲉϫⲉⲥⲁⲙⲟⲩⲏⲗ ⲉϩⲟⲩⲛ ϩⲙⲡⲗⲁⲟⲥ ⲉϥϫⲱ ⲙⲙⲟⲥ ϫⲉⲡϫⲟⲉⲓⲥ ⲡⲛⲟⲩⲧⲉ ⲡⲉⲛⲧⲁϥⲧⲁⲙⲓⲉⲙⲱⲩⲥⲏⲥ ⲙⲛⲁⲁⲣⲱⲛ ⲡⲉⲛⲧⲁϥⲉⲓⲛⲉ ⲛⲛⲉⲛⲉⲓⲟⲧⲉ ⲉⲃⲟⲗ ϩⲛⲕⲏⲙⲉ
7 ⲧⲉⲛⲟⲩ ϭⲉ ⲁϩⲉⲣⲁⲧⲧⲏⲩⲧⲛ ⲁⲩⲱ ϯⲛⲁϩⲁⲡ ⲉⲣⲱⲧⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲛⲧⲁⲧⲁⲩⲟ ⲉⲣⲱⲧⲛ ⲛⲧⲇⲓⲕⲁⲓⲟⲥⲩⲛⲏ ⲧⲏⲣⲥ ⲙⲡϫⲟⲉⲓⲥ ⲛⲉϩⲃⲏⲩⲉ ⲛⲧⲁϥⲁⲁⲩ ⲛⲏⲧⲛ ⲙⲛⲛⲉⲧⲛⲉⲓⲟⲧⲉ
8 ⲛⲧϩⲉ ⲛⲧⲁⲓⲁⲕⲱⲃ ⲙⲛⲛⲉϥϣⲏⲣⲉ ⲃⲱⲕ ⲉϩⲟⲩⲛ ⲉⲕⲏⲙⲉ ⲁⲩⲱ ⲁⲕⲏⲙⲉ ⲑⲃⲃⲓⲟⲟⲩ ⲁⲛⲉⲛⲉⲓⲟⲧⲉ ⲱϣ ⲉⲃⲟⲗ ⲉϩⲣⲁⲓ ⲉⲡϫⲟⲉⲓⲥ ⲁⲩⲱ ⲁⲡϫⲟⲉⲓⲥ ϫⲟⲟⲩ ⲙⲙⲱⲩⲥⲏⲥ ⲙⲛⲁⲁⲣⲱⲛ ⲁⲩⲉⲓⲛⲉ ⲛⲛⲉⲛⲉⲓⲟⲧⲉ ⲉⲃⲟⲗ ϩⲛⲕⲏⲙⲉ ⲁⲡϫⲟⲉⲓⲥ ⲧⲣⲉⲩⲟⲩⲱϩ ϩⲙⲡⲉⲓⲙⲁ
9 ⲁⲩⲱ ⲁⲩⲣⲡⲱⲃϣ ⲙⲡϫⲟⲉⲓⲥ ⲡⲉⲩⲛⲟⲩⲧⲉ ⲁⲡϫⲟⲉⲓⲥ ⲧⲁⲁⲩ ⲉϩⲣⲁⲓ ⲉⲧⲟⲟⲧϥ ⲛⲥⲓⲥⲁⲣⲁ ⲡⲁⲣⲭⲓⲥⲧⲣⲁⲧⲏⲅⲟⲥ ⲛⲓⲁⲃⲓⲥ ⲡⲣⲣⲟ ⲛⲁⲥⲱⲣ ⲁⲩⲱ ⲉϩⲣⲁⲓ ⲉⲧⲟⲟⲧⲟⲩ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲉϩⲣⲁⲓ ⲉⲧⲟⲟⲧϥ ⲙⲡⲣⲣⲟ ⲙⲙⲱⲁⲃ ⲁϥⲙⲓϣⲉ ⲛⲙⲙⲁⲩ
10 ⲁⲩⲱ ⲁⲩⲱϣ ⲉⲃⲟⲗ ⲉϩⲣⲁⲓ ⲉⲡϫⲟⲉⲓⲥ ⲉⲩϫⲱ ⲙⲙⲟⲥ ϫⲉⲁⲛⲣⲛⲟⲃⲉ ϫⲉⲁⲛⲕⲱ ⲛⲥⲱⲛ ⲙⲡϫⲟⲉⲓⲥ ⲁⲩⲱ ⲁⲛⲣϩⲙϩⲁⲗ ⲛⲛⲉⲃⲁϩⲁⲗⲓⲙ ⲙⲛⲛⲉⲙⲁ ⲛϣⲏⲛ ⲧⲉⲛⲟⲩ ϭⲉ ⲛⲟⲩϩⲙ ⲙⲙⲟⲛ ⲉⲧⲟⲟⲧⲟⲩ ⲛⲛⲉⲛϫⲁϫⲉ ⲁⲩⲱ ⲧⲉⲛⲛⲁⲣϩⲙϩⲁⲗ ⲛⲁⲕ
11 ⲁⲡϫⲟⲉⲓⲥ ⲇⲉ ϫⲟⲟⲩ ⲛϩⲓⲉⲣⲟⲃⲁⲁⲗ ⲙⲛⲃⲁⲣⲁⲕ ⲙⲛⲓⲉⲫⲑⲁⲉ ⲙⲛⲥⲁⲙⲟⲩⲏⲗ ⲁⲩⲱ ⲁϥⲛⲉϩⲙⲧⲏⲩⲧⲛ ⲛⲧⲟⲟⲧⲟⲩ ⲛⲛⲉⲧⲛϫⲁϫⲉ ⲉⲧⲕⲱⲧⲉ ⲉⲣⲱⲧⲛ ⲁⲩⲱ ⲛⲉⲧⲉⲧⲛϣⲟⲟⲡ ⲡⲉ ⲉⲧⲉⲧⲛⲥⲙⲟⲛⲧ
12 ⲁⲧⲉⲧⲛⲛⲁⲩ ⲇⲉ ϫⲉⲛⲁⲁⲥ ⲡⲣⲣⲟ ⲛⲛⲉϣⲏⲣⲉ ⲛⲁⲙⲙⲱⲛ ⲁϥⲉⲓ ⲉϫⲛⲧⲏⲩⲧⲛ ⲡⲉϫⲏⲧⲛ ϫⲉⲛⲧⲛⲛⲁϭⲱ ⲁⲛ ϩⲓⲛⲁⲓ ⲁⲗⲗⲁ ⲟⲩⲛⲟⲩⲣⲣⲟ ⲛⲁⲣⲣⲣⲟ ⲉϫⲱⲛ ⲉⲡϫⲟⲉⲓⲥ ⲡⲉⲛⲛⲟⲩⲧⲉ ⲡⲉ ⲡⲉⲛⲣⲣⲟ
13 ⲧⲉⲛⲟⲩ ϭⲉ ⲉⲓⲥ ⲡⲣⲣⲟ ⲛⲧⲁⲧⲉⲧⲛⲥⲟⲧⲡϥ ⲛⲏⲧⲛ ⲉⲓⲥ ⲡϫⲟⲉⲓⲥ ⲁϥϯ ⲛⲟⲩⲣⲣⲟ ⲉϫⲛⲧⲏⲩⲧⲛ
14 ⲁⲣⲓϩⲟⲧⲉ ⲛϩⲏⲧϥ ⲙⲡϫⲟⲉⲓⲥ ⲛⲧⲉⲧⲛⲣϩⲙϩⲁⲗ ⲛⲁϥ ⲛⲧⲉⲧⲛⲥⲱⲧⲙ ⲛⲥⲁⲡⲉϥϩⲣⲟⲟⲩ ⲛⲧⲉⲧⲛⲧⲙϯⲧⲱⲛ ⲙⲛⲧⲧⲁⲡⲣⲟ ⲙⲡϫⲟⲉⲓⲥ ⲁⲩⲱ ⲛⲧⲱⲧⲛ ⲙⲛⲡⲉⲧⲛⲣⲣⲟ ⲉⲧⲛⲁⲣⲣⲣⲟ ⲉϫⲛⲧⲏⲩⲧⲛ ⲛⲧⲉⲧⲛϣⲱⲡⲉ ⲉⲧⲉⲧⲛⲟⲩⲏϩ ⲛⲥⲁⲡϫⲟⲉⲓⲥ
15 ⲉⲧⲉⲧⲛϣⲁⲛⲧⲙⲥⲱⲧⲙ ⲇⲉ ⲛⲥⲁⲡⲉϩⲣⲟⲟⲩ ⲙⲡϫⲟⲉⲓⲥ ⲁⲩⲱ ⲛⲧⲉⲧⲛϯⲧⲱⲛ ⲙⲛⲧⲧⲁⲡⲣⲟ ⲙⲡϫⲟⲉⲓⲥ ⲧϭⲓϫ ⲙⲡϫⲟⲉⲓⲥ ⲛⲁϣⲱⲡⲉ ⲉϫⲛⲧⲏⲩⲧⲛ ⲁⲩⲱ ⲉϫⲛⲡⲉⲧⲛⲣⲣⲟ
16 ⲧⲉⲛⲟⲩ ϭⲉ ⲁϩⲉⲣⲁⲧⲧⲏⲩⲧⲛ ⲛⲧⲉⲧⲛⲛⲁⲩ ⲉⲡⲉⲓⲛⲟϭ ⲛϣⲁϫⲉ ⲡⲁⲓ ⲉⲧⲉⲣⲉⲡϫⲟⲉⲓⲥ ⲛⲁⲁⲁϥ ⲙⲡϩⲁⲁⲧⲉ ⲉⲃⲟⲗ ⲛⲛⲉⲧⲛⲃⲁⲗ
17 ⲙⲏ ⲙⲡⲱϩⲥ ⲙⲡⲉⲥⲟⲩⲟ ⲁⲛ ⲡⲉ ⲡϩⲟⲟⲩ ⲉⲓⲥ ϩⲏⲏⲧⲉ ϯⲉⲡⲓⲕⲁⲗⲉⲓ ⲙⲡϫⲟⲉⲓⲥ ⲛϥϯ ⲛⲟⲩϩⲣⲟⲟⲩ ⲙⲛⲟⲩϩⲟⲩⲙⲡⲉ ⲛⲧⲉⲧⲛⲉⲓⲙⲉ ⲁⲩⲱ ⲛⲧⲉⲧⲛⲛⲁⲩ ϫⲉⲧⲉⲧⲛⲕⲁⲕⲓⲁ ⲛⲧⲁⲧⲉⲧⲛⲁⲁⲥ ⲟⲩⲛⲟϭ ⲧⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲉⲁⲧⲉⲧⲛⲁⲓⲧⲉⲓ ⲛⲟⲩⲣⲣⲟ ⲉϫⲛⲧⲏⲩⲧⲛ
18 ⲁⲩⲱ ⲥⲁⲙⲟⲩⲏⲗ ⲁϥⲉⲡⲓⲕⲁⲗⲉⲓ ⲙⲡϫⲟⲉⲓⲥ ⲁⲡϫⲟⲉⲓⲥ ϯ ⲛϩⲉⲛϩⲣⲟⲟⲩ ⲙⲛⲟⲩϩⲟⲩⲙⲡⲉ ⲙⲡⲉϩⲟⲟⲩ ⲉⲧⲙⲙⲁⲩ ⲡⲗⲁⲟⲥ ⲇⲉ ⲧⲏⲣϥ ⲁⲩⲣϩⲟⲧⲉ ⲛϩⲏⲧϥ ⲙⲡϫⲟⲉⲓⲥ ⲉⲙⲁⲧⲉ ⲁⲩⲱ ϩⲁⲧϩⲏ ⲛⲥⲁⲙⲟⲩⲏⲗ
19 ⲡⲉϫⲉⲡⲗⲁⲟⲥ ⲧⲏⲣϥ ⲉϩⲟⲩⲛ ϩⲛⲥⲁⲙⲟⲩⲏⲗ ϫⲉϣⲗⲏⲗ ⲛⲧⲟⲕ ⲉϫⲛⲛⲉⲕϩⲙϩⲁⲗ ⲉϩⲣⲁⲓ ⲉⲡϫⲟⲉⲓⲥ ⲡⲉⲕⲛⲟⲩⲧⲉ ϫⲉⲛⲛⲉⲛⲙⲟⲩ ⲉⲃⲟⲗ ϫⲉⲁⲛⲟⲩⲱϩ ⲉϩⲣⲁⲓ ⲉϫⲛⲛⲉⲛⲛⲟⲃⲉ ⲧⲏⲣⲟⲩ ⲁⲩⲱ ⲉϫⲛⲧⲉⲛⲕⲁⲕⲓⲁ ⲉⲁⲛⲁⲓⲧⲉⲓ ⲛⲟⲩⲣⲣⲟ ⲉϫⲱⲛ
20 ⲡⲉϫⲉⲥⲁⲙⲟⲩⲏⲗ ⲉϩⲟⲩⲛ ϩⲙⲡⲗⲁⲟⲥ ϫⲉⲙⲡⲉⲣⲣϩⲟⲧⲉ ⲛⲧⲱⲧⲛ ϫⲉⲁⲧⲉⲧⲛⲉⲓⲣⲉ ⲛⲧⲉⲓⲕⲁⲕⲓⲁ ⲧⲏⲣⲥ ⲡⲗⲏⲛ ⲙⲡⲣⲡⲱϣⲥ ⲉⲃⲟⲗ ⲉⲥⲁϩⲉⲧⲏⲩⲧⲛ ⲉⲃⲟⲗ ⲙⲡϫⲟⲉⲓⲥ ⲁⲗⲗⲁ ⲁⲣⲓϩⲙϩⲁⲗ ⲙⲡϫⲟⲉⲓⲥ ϩⲙⲡⲉⲧⲛϩⲏⲧ ⲧⲏⲣϥ
21 ⲉⲧⲙⲃⲱⲕ ⲉⲟⲩⲉϩⲧⲏⲩⲧⲛ ⲛⲥⲁⲛⲉⲧⲛⲥⲉϣⲟⲟⲡ ⲁⲛ ⲛⲥⲉⲛⲁⲉϣⲣⲗⲁⲁⲩ ⲁⲛ ⲛϩⲱⲃ ⲁⲩⲱ ⲛⲥⲉⲛⲁⲉϣⲛⲉϩⲙⲧⲏⲩⲧⲛ ⲁⲛ ⲛϩⲉⲛⲛⲟⲩⲧⲉ ⲅⲁⲣ ⲁⲛ ⲛⲉ
22 ϫⲉⲙⲡϫⲟⲉⲓⲥ ⲛⲁⲕⲱ ⲛⲥⲱϥ ⲁⲛ ⲙⲡⲉϥⲗⲁⲟⲥ ⲉⲧⲃⲉⲡⲉϥⲛⲟϭ ⲛⲣⲁⲛ ϫⲉⲛⲧϩⲉ ⲛⲧⲁⲡϫⲟⲉⲓⲥ ⲉⲓⲣⲉ ⲁϥϣⲉⲡⲧⲏⲩⲧⲛ ⲉⲣⲟϥ ⲉⲧⲃⲉⲡⲉϥⲛⲟϭ ⲛⲣⲁⲛ ⲉⲩⲗⲁⲟⲥ ⲛⲁϥ
23 ⲁⲛⲟⲕ ϩⲱ ⲛⲛⲉⲥϣⲱⲡⲉ ⲙⲙⲟⲓ ⲣⲛⲟⲃⲉ ⲉⲡϫⲟⲉⲓⲥ ⲉⲕⲁⲧⲟⲟⲧ ⲉⲃⲟⲗ ⲁϫⲛϣⲗⲏⲗ ⲉϩⲣⲁⲓ ⲉϫⲛⲧⲏⲩⲧⲛ ⲁⲗⲗⲁ ϯⲛⲁⲣϩⲙϩⲁⲗ ⲙⲡϫⲟⲉⲓⲥ ⲛⲧⲁⲧⲥⲁⲃⲱⲧⲛ ⲉⲧⲉϩⲓⲏ ⲉⲧⲛⲁⲛⲟⲩⲥ ⲁⲩⲱ ⲉⲧⲥⲟⲩⲧⲱⲛ
24 ⲡⲗⲏⲛ ⲁⲣⲓϩⲟⲧⲉ ⲛϩⲏⲧϥ ⲙⲡϫⲟⲉⲓⲥ ⲛⲧⲉⲧⲛⲣϩⲙϩⲁⲗ ⲛⲁϥ ϩⲛⲟⲩⲙⲉ ⲁⲩⲱ ϩⲙⲡⲉⲧⲛϩⲏⲧ ⲧⲏⲣϥ ϫⲉⲁⲧⲉⲧⲛⲛⲁⲩ ⲉⲛⲉϣⲡⲏⲣⲉ ⲛⲧⲁϥⲁⲁⲩ ⲛⲙⲙⲏⲧⲛ
25 ⲁⲩⲱ ϩⲛⲟⲩⲕⲁⲕⲓⲁ ⲉⲧⲉⲧⲛϣⲁⲛⲣⲛⲟⲃⲉ ⲛⲧⲱⲧⲛ ⲙⲛⲛⲉⲧⲛⲣⲣⲟ ⲡϫⲟⲉⲓⲥ ⲛⲁⲉⲓⲛⲉ ⲉϫⲛⲧⲏⲩⲧⲛ ⲛⲛⲉⲧⲛϫⲁϫⲉ
1 Samuel 11 · 1 Samuel 13 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)