Read 1 Samuel 11 side by side with translations · The Final Bible
1 ⲁⲥϣⲱⲡⲉ ⲇⲉ ⲙⲛⲛⲥⲁⲟⲩⲉⲃⲟⲧ ⲁϥⲉⲓ ⲉϩⲣⲁⲓ ⲛϭⲓⲛⲁⲁⲥ ⲡⲁⲙⲙⲁⲛⲓⲧⲏⲥ ⲁϥⲃⲱⲕ ⲉϩⲣⲁⲓ ⲉⲣⲛ ⲓⲁⲃⲓⲥ ⲛⲧⲉⲅⲁⲗⲁⲁⲇ ⲛⲣⲱⲙⲉ ⲇⲉ ⲧⲏⲣⲟⲩ ⲛⲓⲁⲃⲓⲥ ⲡⲉϫⲁⲩ ⲛⲛⲁⲁⲥ ⲡⲁⲙⲙⲁⲛⲓⲧⲏⲥ ϫⲉⲥⲙⲓⲛⲉ ⲛⲙⲙⲁⲛ ⲛⲟⲩⲇⲓⲁⲑⲏⲕⲏ ⲛⲧⲉⲛⲣϩⲙϩⲁⲗ ⲛⲁⲕ
2 ⲡⲉϫⲉⲛⲁⲁⲥ ⲡⲁⲙⲁⲛⲓⲧⲏⲥ ⲛⲁⲩ ϫⲉϯⲛⲁⲥⲙⲓⲛⲉ ⲛⲙⲙⲏⲧⲛ ⲛⲧⲇⲓⲁⲑⲏⲕⲏ ϩⲙⲡⲧⲣⲉⲡⲟⲩⲁ ⲡⲟⲩⲁ ⲙⲙⲱⲧⲛ ⲡⲱⲣⲕ ⲙⲡⲉϥⲃⲁⲗ ⲛⲟⲩⲛⲁⲙ ϫⲉⲕⲁⲥ ⲉⲓⲉⲕⲱ ⲛⲟⲩⲛⲟϭⲛⲉϭ ⲉϫⲙⲡⲓⲥⲣⲁⲏⲗ
3 ⲡⲉϫⲉⲛⲣⲱⲙⲉ ⲛⲓⲁⲃⲓⲥ ⲛⲁϥ ϫⲉⲕⲁⲁⲛ ⲛⲥⲁϣϥ ⲛϩⲟⲟⲩ ⲁⲩⲱ ⲧⲉⲛⲛⲁϫⲟⲟⲩ ⲉⲃⲟⲗ ⲛϩⲉⲛⲃⲁⲓϣⲓⲛⲉ ⲉⲛⲧⲟϣ ⲧⲏⲣⲟⲩ ⲙⲡⲓⲥⲣⲁⲏⲗ ⲁⲩⲱ ⲉⲩⲧⲙⲛⲁϩⲙⲉⲛ ⲧⲛⲛⲏⲩ ⲉⲃⲟⲗ ⲛⲏⲧⲛ
4 ⲁⲩⲱ ⲛⲃⲁⲓϣⲓⲛⲉ ⲛⲓⲁⲃⲓⲥ ⲁⲩⲉⲓ ⲉⲃⲟⲗ ⲉⲅⲁⲃⲁⲁ ⲉⲣⲁⲧϥ ⲛⲥⲁⲟⲩⲗ ⲁⲩⲧⲁⲟⲩⲟ ⲛⲛⲉϣⲁϫⲉ ⲉϩⲣⲁⲓ ⲉⲙⲙⲁⲁϫⲉ ⲙⲡⲗⲁⲟⲥ ⲁⲩⲱ ⲡⲗⲁⲟⲥ ⲧⲏⲣϥ ⲁⲩϥⲓϩⲣⲁⲩ ⲉⲃⲟⲗ ⲁⲩⲣⲓⲙⲉ
5 ⲥⲁⲟⲩⲗ ⲇⲉ ⲙⲛⲛⲥⲁⲡⲛⲁⲩ ⲛϩⲧⲟⲟⲩⲉ ⲁϥⲉⲓ ⲉⲃⲟⲗ ϩⲛⲧⲥⲱϣⲉ ⲡⲉϫⲉⲥⲁⲟⲩⲗ ϫⲉⲉⲧⲃⲉⲟⲩ ⲡⲗⲁⲟⲥ ⲣⲓⲙⲉ ⲁⲩⲧⲁⲟⲩⲟ ⲉⲣⲟϥ ⲛⲛⲉϣⲁϫⲉ ⲧⲏⲣⲟⲩ ⲛⲛϣⲏⲣⲉ ⲛⲓⲁⲃⲓⲥ
6 ⲁⲩⲱ ⲡⲉⲡⲛⲉⲩⲙⲁ ⲙⲡϫⲟⲉⲓⲥ ⲁϥⲃⲱϭⲉ ⲉϫⲛⲥⲁⲟⲩⲗ ⲛⲧⲉⲣⲉϥⲥⲱⲧⲙ ⲉⲛⲉⲓϣⲁϫⲉ ⲧⲉϥⲟⲣⲅⲏ ⲁⲥⲙⲟⲩϩ ⲉⲙⲁⲧⲉ
7 ⲁⲩⲱ ⲁϥϫⲓ ⲛⲉϩⲉ ⲥⲛⲧⲉ ⲁϥⲁⲁⲩ ⲛϣⲁⲩ ϣⲁⲩⲁⲩϫⲟⲟⲩⲥⲟⲩ ⲉⲃⲟⲗ ⲉⲛⲧⲟϣ ⲧⲏⲣⲟⲩ ⲙⲡⲓⲥⲣⲁⲏⲗ ⲛⲧⲟⲟⲧⲟⲩ ⲛⲛⲉⲃⲁⲓϣⲓⲛⲉ ⲉϥϫⲱ ⲙⲙⲟⲥ ϫⲉⲡⲧⲉⲧⲛϥⲛⲁⲉⲓ ⲁⲛ ⲉⲃⲟⲗ ⲉⲟⲩⲁϩϥ ⲛⲥⲁⲥⲁⲟⲩⲗ ⲁⲩⲱ ⲛⲥⲁⲥⲁⲙⲟⲩⲏⲗ ⲉⲩⲉⲉⲓⲣⲉ ⲛⲧⲉⲓϩⲉ ϩⲱⲱϥ ⲛⲛⲉϥⲉⲟⲟⲩ ⲁⲩⲱ ⲧϩⲟⲧⲉ ⲙⲡϫⲟⲉⲓⲥ ⲁⲥⲉⲓ ⲉϩⲣⲁⲓ ⲉϫⲙⲡⲗⲁⲟⲥ ⲙⲡⲓⲥⲣⲁⲏⲗ ⲁⲩⲱ ⲁⲩⲱϣ ⲉⲃⲟⲗ ϩⲓⲟⲩⲥⲟⲡ ⲧⲏⲣⲟⲩ ⲛⲧϩⲉ ⲛⲟⲩⲣⲱⲙⲉ ⲛⲟⲩⲱⲧ
8 ⲁⲩⲱ ⲁⲃⲓⲙⲉⲥⲉⲕ ⲁϥϭⲙⲡⲉⲩϣⲓⲛⲉ ϩⲛⲃⲁⲙⲁ ⲛⲣⲱⲙⲉ ⲇⲉ ⲧⲏⲣⲟⲩ ⲙⲡⲓⲥⲣⲁⲏⲗ ⲉⲩⲛⲁⲣⲥⲉ ⲛⲧⲃⲁ ⲙⲙⲏⲏϣⲉ ⲁⲩⲱ ⲛⲣⲱⲙⲉ ⲛⲓⲟⲩⲇⲁ ⲉⲩⲛⲁⲣⲥⲁϣϥ ⲛⲧⲃⲁ ⲙⲙⲏⲏϣⲉ
9 ⲡⲉϫⲁϥ ⲛⲛⲉⲃⲁⲓϣⲓⲛⲉ ⲛⲧⲁⲩⲉⲓ ϫⲉⲛⲁⲓ ⲛⲉⲧⲉⲧⲛⲁϫⲟⲟⲩ ⲛⲛⲣⲱⲙⲉ ⲛⲓⲁⲃⲓⲥ ϫⲉⲣⲁⲥⲧⲉ ⲡⲟⲩϫⲁⲓ ⲛⲁϣⲱⲡⲉ ⲛⲏⲧⲛ ϩⲙⲡⲧⲣⲉⲡⲣⲏ ϯ ⲛⲧⲉϥϩⲙⲙⲉ ⲁⲩⲱ ⲛⲃⲁⲓϣⲓⲛⲉ ⲁⲩⲉⲓ ⲉϩⲣⲁⲓ ⲉⲧⲉⲩⲡⲟⲗⲓⲥ ⲁⲩⲧⲁⲩⲉⲛϣⲁϫⲉ ⲉⲛⲉⲣⲱⲙⲉ ⲛⲓⲁⲃⲓⲥ ⲁⲩⲟⲩⲛⲟϥ
10 ⲛⲣⲱⲙⲉ ⲇⲉ ⲛⲓⲁⲃⲓⲥ ⲡⲉϫⲁⲩ ⲛⲛⲁⲁⲥ ⲡⲁⲙⲁⲛⲓⲧⲏⲥ ϫⲉⲣⲁⲥⲧⲉ ⲧⲛⲛⲏⲩ ⲉⲃⲟⲗ ⲛⲏⲧⲛ ⲛⲧⲛⲉⲓⲣⲉ ⲙⲡⲉⲧⲉⲣⲁⲛⲏⲧⲛ ⲙⲡⲉⲧⲛⲙⲧⲟ ⲉⲃⲟⲗ
11 ⲁⲥϣⲱⲡⲉ ⲇⲉ ⲙⲛⲛⲥⲁⲡⲉϥⲣⲁⲥⲧⲉ ⲥⲁⲟⲩⲗ ⲁϥⲕⲱ ⲙⲡⲗⲁⲟⲥ ⲛϣⲟⲙⲛⲧ ⲛⲧⲁⲅⲙⲁ ⲁⲩⲱ ⲁϥⲙⲟⲟϣⲉ ⲉϩⲟⲩⲛ ⲉⲧⲡⲁⲣⲉⲙⲃⲟⲗⲏ ⲛϣⲱⲣⲡ ⲙⲡⲛⲁⲩ ⲛϩⲧⲟⲟⲩⲉ ⲁⲩϩⲓⲟⲩⲉ ⲛⲥⲁⲛϣⲏⲣⲉ ⲛⲁⲙⲙⲱⲛ ϣⲁⲛⲧⲉⲡⲣⲏ ϯ ⲛⲧⲉϥϩⲙⲙⲉ ⲁⲩⲱ ⲛⲉⲛⲧⲁⲩⲥⲉⲉⲡⲉ ⲛϩⲏⲧⲟⲩ ⲁⲩϫⲱⲱⲣⲉ ⲉⲃⲟⲗ ⲙⲡⲉⲥⲛⲁⲩ ⲗⲁⲁⲩ ⲛϩⲏⲧⲟⲩ ϭⲱ ϩⲓⲛⲉⲩⲉⲣⲏⲩ
12 ⲡⲉϫⲉⲡⲗⲁⲟⲥ ⲛⲥⲁⲙⲟⲩⲏⲗ ϫⲉⲛⲓⲙ ⲡⲉⲛⲧⲁϥϫⲟⲟⲥ ϫⲉⲛⲥⲁⲟⲩⲗ ⲛⲁⲣⲣⲣⲟ ⲁⲛ ⲉϩⲣⲁⲓ ⲉϫⲱⲛ ⲡⲁⲣⲁⲇⲓⲇⲟⲩ ⲛⲛⲣⲱⲙⲉ ⲉⲧⲟⲟⲧⲛ ⲛⲧⲛⲙⲟⲟⲩⲧⲟⲩ
13 ⲡⲉϫⲉⲥⲁⲟⲩⲗ ϫⲉⲙⲛⲗⲁⲁⲩ ⲛⲁⲙⲟⲩ ⲙⲡϩⲟⲟⲩ ⲛϩⲟⲟⲩ ϫⲉⲡϩⲟⲟⲩ ⲡⲉ ⲛⲧⲁⲡϫⲟⲉⲓⲥ ⲉⲓⲣⲉ ⲙⲡⲓⲟⲩϫⲁⲓ ϩⲙⲡⲓⲥⲣⲁⲏⲗ
14 ⲥⲁⲙⲟⲩⲏⲗ ⲇⲉ ⲡⲉϫⲁϥ ⲙⲡⲗⲁⲟⲥ ϫⲉⲙⲁⲣⲟⲛ ⲉϩⲣⲁⲓ ⲉⲅⲁⲗⲅⲁⲗⲁ ⲛⲧⲁⲧⲁϩⲟ ⲉⲣⲁⲧⲥ ⲛⲧⲙⲛⲧⲣⲣⲟ ϩⲙⲡⲙⲁ ⲉⲧⲙⲙⲁⲩ
15 ⲡⲗⲁⲟⲥ ⲇⲉ ⲧⲏⲣϥ ⲁϥⲃⲱⲕ ⲉϩⲣⲁⲓ ⲉⲅⲁⲗⲅⲁⲗⲁ ⲁⲩⲱ ⲥⲁⲙⲟⲩⲏⲗ ⲁϥⲧⲱϩⲥ ⲙⲡⲙⲁ ⲉⲧⲙⲙⲁⲩ ⲛⲥⲁⲟⲩⲗ ⲉⲧⲣⲉϥⲣⲣⲣⲟ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ϩⲛⲅⲁⲗⲅⲁⲗⲁ ⲁⲩⲱ ⲁϥϣⲱⲱⲧ ϩⲙⲡⲙⲁ ⲉⲧⲙⲙⲁⲩ ⲛϩⲉⲛⲑⲩⲥⲓⲁ ⲛⲉⲓⲣⲏⲛⲓⲕⲟⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲥⲁⲙⲟⲩⲏⲗ ⲙⲛⲡⲓⲥⲣⲁⲏⲗ ⲧⲏⲣϥ ⲁⲩⲉⲩⲫⲣⲁⲛⲉ ⲉⲙⲁⲧⲉ
1 Samuel 10 · 1 Samuel 12 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)