Read 1 Maccabees 3 side by side with translations · The Final Bible
1 ܘܩܡ ܚܠܦܘܗܝ ܒܪܗ ܝܗܘܕܐ ܡܩܒܝ
2 ܘܡܥܕܪܝܢ ܗܘܘ ܠܗ ܟܘܠܗܘܢ ܐܚܘ̈ܗܝ ܘܟܠܗܘܢ ܐܝܠܝܢ ܕܢܩܝܦܝܢ ܗܘܘ ܠܐܒܘܗܝ ܘܡܩܪܒܝܢ ܗܘܘ ܩܪ̈ܒܘܗܝ ܕܐܝܣܪܐܝܠ ܒܒܘܣܡܐ ܘܒܚܕܘܬܐ
3 ܘܐܘܪܒ ܘܐܣܓܝ ܝܗܘܕܐ ܬܫܒܘܚܬܐ ܠܥܡܗ ܘܠܒܫ ܫܪܝܢܐ ܐܝܟ ܓܢܒܪܐ ܘܐܬܚܙܩ ܒܡ̈ܐܢܝ ܩܪܒܗ ܘܥܒܕ ܩܪ̈ܒܐ ܘܟܣܝ ܡܫܪ̈ܝܬܐ ܒܪܘܡܚܗ
4 ܘܐܬܕܡܝ ܠܐܪܝܐ ܒܥܒ̈ܕܘܗܝ ܘܐܝܟ ܓܘܪܝܐ ܕܐܪܝܐ ܕܢܗܡ ܠܬܒܪܐ
5 ܘܪܕܦ ܠܥܘ̈ܠܐ ܒܒܛܝܠܘܬܐ ܘܠܐܝܠܝܢ ܕܫܚܩܝܢ ܠܥܡܗ ܐܘܩܕ ܒܫܠܗܒܝܬܐ
6 ܘܥܪܩܘ ܘܐܬܪܗܒܘ ܥܘ̈ܠܐ ܡܢ ܕܚܠܬܗ ܘܟܠܗܘܢ ܦ̈ܠܚܝ ܥܘܠܐ ܐܬܬܙܝܥܘ ܘܐܬܝܗܒ ܦܘܪܩܢܐ ܒܐܝ̈ܕܘܗܝ
7 ܘܡܪܡܪ̈ ܘܐܥܝܩ ܠܡ̈ܠܟܐ ܣܓ̈ܝܐܐ ܘܚܕܝ ܘܒܣܡ ܠܐܝܣܪܝܠ ܒܥܒ̈ܕܘܗܝ ܘܥܕܡܐ ܠܥܠܡ ܢܗܘܐ ܕܘܟܪܢܗ ܠܒܘܪܟܬܐ
8 ܘܗܠܟ ܒܡܕܝ̈ܢܬܐ ܕܝܗܘܕܐ ܘܐܘܒܕ ܪ̈ܫܝܥܐ ܡܢܗܝܢ ܘܐܗܦܟ ܪܘܓܙܐ ܡܢ ܐܝܣܪܝܠ
9 ܘܐܫܬܡܗ ܥܕܡܐ ܠܣܘ̈ܦܝܗ ܕܐܪܥܐ ܘܟܢܫ ܡܒܕܪ̈ܐ
10 ܘܟܢܫ ܐܦܠܘܢܝܘܣ ܥܡ̈ܡܐ ܘܡܢ ܫܡܪܝܢ ܚܝܠܐ ܣܓܝܐܐ ܕܢܩܪܒ ܥܡ ܐܝܣܪܝܠ
11 ܘܝܕܥ ܝܗܘܕܐ ܘܢܦܩ ܠܘܩܒܠܗܘܢ ܘܡܚܝܗܝ ܘܐܪܡܝܗ ܘܢܦܠܘ ܡܢܗܘܢ ܩ̈ܛܝܠܐ ܣܓ̈ܝܐܐ ܘܫܪܟܗܘܢ ܥܪܩܘ
12 ܘܢܣܒܘ ܒܙܬܗܘܢ ܐܦ ܣܝܦܗ ܕܐܦܠܘܢܝܘܣ ܢܣܒ ܝܗܘܕܐ ܘܒܗ ܡܩܪܒ ܗܘܐ ܟܠܗܘܢ ܝܘܡ̈ܬܐ
13 ܘܫܡܥ ܗܝܪܘܢ ܪܫܐ ܕܚܝ̈ܠܘܬܐ ܕܣܘܪܝܐ ܕܟܢܫ ܝܗܘܕܐ ܟܢܘܫܬܐ ܕܡܗܝ̈ܡܢܐ ܠܘܬܗ ܕܢܦܩܝܢ ܠܩܪܒܐ
14 ܘܐܡܪ ܕܐܥܒܕ ܠܝ ܫܡܐ ܘܐܫܬܒܚ ܒܡ̈ܠܟܘܬܐ ܘܐܩܪܒ ܥܡ ܝܗܘܕܐ ܘܥܡ ܐܝܠܝܢ ܕܥܡܗ ܗܠܝܢ ܕܡܣܠܝܢ ܡܠܬܗ ܕܡܠܟܐ
15 ܘܐܘܣܦ ܠܡܣܩ ܘܣܠܩܬ ܥܡܗ ܡܫܪܝܬܐ ܪܒܬܐ ܘܥܫܝܢܬܐ ܕܪ̈ܫܝܥܐ ܠܥܘܕܪܢܗ ܠܡܥܒܕ ܦܘܪܥܢܐ ܒܒ̈ܢܝ ܐܝܣܪܝܠ
16 ܘܡܛܝ ܥܕܡܐ ܠܡܣܩܬܐ ܕܒܝܬ ܚܘܪܢ ܘܢܦܩ ܝܗܘܕܐ ܠܐܘܪܥܗ ܒܐܢܫܐ ܙܥܘܪ̈ܐ
17 ܘܟܕ ܕܝܢ ܚܙܘ ܗܠܝܢ ܕܥܡ ܝܗܘܕܐ ܠܡܫܪܝܬܐ ܕܐܬܝܐ ܠܘܩܒܠܗܘܢ ܐܡܪܘ ܠܝܗܘܕܐ ܐܝܟܢܐ ܡܫܟܚܝܢ ܐܢܚܢܢ ܕܟܕ ܙܥܘܪ̈ܐ ܐܢܚܢܢ ܢܩܪܒ ܥܡ ܗܢܐ ܟܠܗ ܚܝܠܐ ܥܫܝܢܐ ܘܚܢܢ ܗܐ ܥܝܝܦܝܢ ܐܢܚܢܢ ܕܠܐ ܠܥܝܣ ܠܢ ܝܘܡܢܐ
18 ܘܐܡܪ ܝܗܘܕܐ ܦܫܝܩܐ ܗܝ ܗܕܐ ܕܢܫܬܠܡܘܢ ܣܓ̈ܝܐܐ ܒܐܝܕܐ ܕܙܥܘܪ̈ܐ ܘܠܝܬ ܟܠܝܬܐ ܩܕܡ ܥܡܘܪܐ ܕܫܡܝܐ ܠܡܦܪܩ ܒܣ̈ܓܝܐܐ ܐܘ ܒܙܥܘܪ̈ܐ
19 ܡܛܠ ܕܠܐ ܗܘܐ ܒܚܝܠܐ ܣܓܝܐܐ ܗܘܝܐ ܙܟܘܬܐ ܕܩܪܒܐ ܐܠܐ ܡܢ ܫܡܝܐ ܗܘ ܡܬܝܗܒ ܚܝܠܐ
20 ܗܢܘܢ ܐܬܝܢ ܥܠܝܢ ܒܣܘܓܐܐ ܕܚܝܠܐ ܕܥܘܠܐ ܘܕܨܥܪܐ ܕܢܪܝܡܘܢ ܘܢܥܛܘܢ ܠܢ ܘܠܢ̈ܫܝܢ ܘܠܒ̈ܢܝܢ ܘܕܢܫܒܘܢܢ
21 ܘܐܢܚܢܢ ܕܝܢ ܡܩܪܒܝܢܢ ܥܠ ܐ̈ܦܝ ܢܦܫ̈ܬܢ ܘܢܡ̈ܘܣܝܢ
22 ܘܡܪܝܐ ܢܫܚܘܩ ܐܢܘܢ ܩܕܡܝܢ ܘܐܢܬܘܢ ܠܐ ܬܕܚܠܘܢ ܡܢܗܘܢ
23 ܘܟܕ ܫܠܝ ܕܝܢ ܝܗܘܕܝܐ ܡܢ ܕܡܡܠܠ ܫܘܪ ܢܦܠ ܒܗܘܢ ܡܢ ܫܠܝܐ ܘܢܦܠ ܗܝܪܘܢ ܘܡܫܪܝܬܗ ܩܕܡܘܗܝ
24 ܘܪܕܦܝܢ ܗܘܘ ܠܗ ܕܒܝܬ ܝܗܘܕܐ ܒܡܚܬܬܐ ܕܒܝܬ ܚܘܪܢ ܥܕܡܐ ܠܦܩܥܬܐ ܘܢܦܠܘ ܡܢܗܘܢ ܐܝܟ ܬܡܢܡܐܐ ܓܒܪ̈ܝܢ ܘܫܪܟܗܘܢ ܥܪܩܘ ܠܐܪܥܐ ܕܦܠܫ̈ܬܝܐ
25 ܘܫܪܝܬ ܕܚܠܬܗ ܕܝܗܘܕܐ ܘܕܐܚ̈ܘܗܝ ܘܙܘܥܬܗܘܢ ܢܦܠܐ ܥܠ ܟܠܗܘܢ ܥܡ̈ܡܐ ܕܚܕܪ̈ܝܗܘܢ
26 ܘܡܛܝ ܫܡܗ ܥܕܡܐ ܠܡܠܟܐ ܘܥܠ ܣܘܥܪ̈ܢܘܗܝ ܕܝܗܘܕܐ ܡܬܢܝܢ ܗܘܘ ܟܠܗܘܢ ܥܡ̈ܡܐ
27 ܘܟܕ ܫܡܥ ܕܝܢ ܐܢܛܝܟܘܣ ܗܠܝܢ ܡ̈ܠܐ ܐܬܚܡܬ ܒܪܘܓܙܐ ܘܫܕܪ ܟܢܫ ܠܟܠܗ ܚܝܠܐ ܕܡܠܟܘܬܗ ܡܫܪܝܬܐ ܪܒܬܐ ܘܥܫܝܢܬܐ
28 ܘܦܬܚ ܒܝܬ ܓܙܘܗܝ ܘܝܗܒ ܡܘܗ̈ܒܬܐ ܠܚ̈ܝܠܘܗܝ ܠܚܕܐ ܫܢܬܐ ܘܦܩܕ ܠܗܘܢ ܕܢܗܘܘܢ ܥܬܝܕܝܢ ܘܡܛܝܒܝܢ ܠܟܠ ܨܒܘ
29 ܘܚܙܐ ܕܐܬܒܨܪ ܠܗ ܟܣܦܐ ܡܢ ܒܝܬ ܓܙ̈ܘܗܝ ܘܫܩ̈ܠܝܗ ܕܐܪܥܐ ܙܥܘܪ̈ܝܢ ܡܛܠ ܦܠܓܘܬܐ ܘܡܚܘܬܐ ܕܥܒܕ ܒܐܪܥܐ ܕܨܒܐ ܕܢܪܝܡ ܢܡܘ̈ܣܐ ܕܐܒܗܝ̈ܗܘܢ ܕܡܢ ܩܕܝܡ
30 ܘܕܚܠ ܕܠܡܐ ܠܐ ܢܫܬܟܚ ܠܗ ܠܡܬܠ ܙܒܢܬܐ ܘܬܪ̈ܬܝܢ ܡܛܠ ܕܡܣܓܐ ܗܘܐ ܓܝܪ ܠܡܬܠ ܒܐܝܕܐ ܪܒܬܐ ܝܬܝܪ ܡܢ ܡ̈ܠܟܐ ܕܡܢ ܩܕܡܘܗܝ
31 ܒܢܦܫܗ ܕܝܢ ܣܓܝ ܡܬܬܥܝܩ ܗܘܐ ܘܐܬܚܫܒ ܐܢܛܝܟܘܣ ܕܢܐܙܠ ܠܦܪܣ ܘܕܢܣܒ ܫܩ̈ܠܝܗ ܕܐܪܥܐ ܘܠܡܟܢܫܘ ܟܣܦܐ ܣܓܝܐܐ
32 ܘܫܒܩ ܠܠܘܣܝܐ ܓܒܪܐ ܡܫܒܚܐ ܘܡܢ ܓܢܣܐ ܗܘܐ ܕܡܠܟܘܬܐ ܥܠ ܥܒ̈ܝܕܬܐ ܕܡܠܟܐ ܡܢ ܢܗܪܐ ܦܪܬ ܘܥܕܡܐ ܠܬܚܘܡܗ̇ ܕܡܨܪܝܢ
33 ܘܠܡܪܒܝܘ ܠܒܪܗ ܐܢܛܝܟܘܣ ܥܕܡܐ ܕܢܗܦܘܟ ܘܢܐܬܐ
34 ܘܐܫܠܡ ܠܗ ܦܝ̈ܠܐ ܘܦܠܓܗ ܕܚܝܠܗ ܘܦܩܕܗ ܥܠ ܟܠܡܕܡ ܕܨܒܐ ܗܘܐ ܘܥܠ ܥܡܘܪ̈ܝܗ ܕܝܗܘܕܐ ܘܕܐܘܪܫܠܡ
35 ܠܡܫܕܪܘ ܥܠܝܗܘܢ ܚܝܠܐ ܠܡܥܛܐ ܘܠܡܓܡܪܘ ܚܝܠܗ ܕܐܝܣܪܐܝܠ ܘܠܡܘܒܕܘ ܫܪܟܗ ܕܐܘܪܫܠܡ ܘܠܡܪܡܘ ܕܘܟܪܢܗܘܢ ܡܢ ܐܬܪܐ
36 ܘܠܡܘܬܒܘ ܒܢ̈ܝ ܢܘܟܪ̈ܝܐ ܒܟܠ ܬܚܘ̈ܡܝܗܘܢ ܘܠܡܘܪܬܘ ܐܪܥܗܘܢ
37 ܘܡܠܟܐ ܕܒܪ ܦܠܓܗ ܕܚܝܠܐ ܗܘ ܕܐܫܬܚܪ ܘܫܩܠ ܡܢ ܐܢܛܝܘܟܝܐ ܡܕܝܢܬܐ ܕܡܠܟܘܬܗ ܒܫܢܬ ܡܐܐ ܘܐܪܒܥܝܢ ܘܫܒܥ ܘܥܒܪ ܠܢܗܪܐ ܦܪܬ ܘܡܗܠܟ ܗܘܐ ܒܐܪ̈ܥܬܐ ܥ̈ܠܝܬܐ
38 ܘܓܒܐ ܠܘܣܝܐ ܠܦܛܘܠܡܐܘܣ ܒܪܗ ܕܕܘܪܡܝܘܣ ܘܠܢܝܩܢܘܪ ܘܠܓܘܪܓܝܐ ܐܢܫܐ ܚܝ̈ܠܬܢܐ ܡܢ ܪ̈ܚܡܘܗܝ ܕܡܠܟܐ
39 ܘܫܕܪ ܥܡܗܘܢ ܐܪܒܥܝܢ ܐ̈ܠܦܝܢ ܪ̈ܓܠܝܐ ܘܫܒܥܐ ܐ̈ܠܦܝܢ ܦܪ̈ܫܐ ܠܡܐܙܠ ܠܐܪܥܐ ܕܝܗܘܕܐ ܠܡܚܒܠܘܬܗ ܐܝܟ ܡܠܬܗ ܕܡܠܟܐ
40 ܘܫܩܠܘ ܕܒܝܬ ܦܛܘܠܡܐܘܣ ܥܡ ܟܠܗ ܚܝܠܗܘܢ ܘܐܬܘ ܘܫܪܘ ܥܠ ܓܢܒ ܥܡܐܘܣ ܒܐܪܥܐ ܕܦܩܥܬܐ
41 ܘܫܡܥܘ ܬܓܪ̈ܝܗ ܕܐܪܥܐ ܫܡܥܗܘܢ ܘܢܣܒܘ ܟܣܦܐ ܘܕܗܒܐ ܣܓܝܐܐ ܘܩܘ̈ܕܐ ܘܣܘ̈ܛܡܐ ܘܐܬܘ ܠܡܫܪܝܬܐ ܠܡܣܒ ܠܒ̈ܢܝ ܐܝܣܪܝܠ ܠܥܒ̈ܕܐ ܘܐܬܬܘܣܦ ܥܠܝܗܘܢ ܚܝܠܐ ܕܣܘܪܝܐ ܘܥܡܐ ܕܦܠܫ̈ܬܝܐ
42 ܘܚܙܐ ܝܗܘܕܐ ܘܐܚ̈ܘܗܝ ܕܣ̈ܓܝ ܒܝܫ̈ܬܐ ܘܚܝܠܐ ܟܪܟ ܠܬܚܘ̈ܡܝܗܘܢ ܘܝܠܦܘ ܐܦ ܡ̈ܠܘܗܝ ܕܡܠܟܐ ܗܠܝܢ ܕܦܩܕ ܡܛܠ ܥܡܐ ܕܢܘܒܕܘܢ ܘܢܥܛܘܢܝܗܝ
43 ܘܐܡܪܘ ܓܒܪ ܠܩܪܝܒܗ ܢܩܝܡ ܣܘܚܦܗ ܕܥܡܢ ܘܢܩܪܒ ܥܠ ܐ̈ܦܝ ܥܡܢ ܘܩܘ̈ܕܫܝܢ
44 ܘܐܬܟܢܫܬ ܟܢܘܫܬܗܘܢ ܕܗܘܬ ܡܛܝܒܐ ܠܩܪܒܐ ܘܠܡܨܠܝܘ ܘܠܡܫܐܠ ܪ̈ܚܡܐ ܘܚܢܢܐ
45 ܐܘܪܫܠܡ ܕܝܢ ܐܝܬܝܗ ܗܘܬ ܚܪܒܬܐ ܕܠܐ ܝܬܒܐ ܘܠܝܬ ܕܥܐܠ ܘܢܦܩ ܒܗ ܡܢ ܝ̈ܠܕܝܗ ܘܒܝܬ ܡܩܕܫܗ ܡܬܕܝܫ ܗܘܐ ܘܒ̈ܢܝ ܢܘܟܪ̈ܝܐ ܝܬܒܝܢ ܗܘܘ ܒܝܬ ܡܪܕܗ ܘܗܘܬ ܒܝܬ ܡܫܪܝܐ ܠܥܡ̈ܡܐ ܘܐܫܬܩܠܬ ܚܕܘܬܐ ܡܢ ܝܥܩܘܒ ܘܓܡܪܘ ܡܢܗ ܩܝ̈ܬܪܐ ܘܟܢܪ̈ܐ
46 ܘܐܬܟܢܫܘ ܘܥܠܘ ܠܡܨܦܝܐ ܠܘܩܒܠ ܐܘܪܫܠܡ ܡܛܠ ܕܒܝܬ ܨܠܘܬܐ ܗܘܬ ܡܢ ܩܕܝܡ ܡܨܦܝܐ ܠܐܝܣܪܝܠ
47 ܘܨܡܘ ܒܗܘ ܝܘܡܐ ܘܐܬܟܣܝܘ ܣܩ̈ܐ ܘܐܪܡܝܘ ܥܦܪܐ ܥܠ ܪ̈ܫܝܗܘܢ ܘܣܕܩܘ ܡܐܢ̈ܝܗܘܢ
48 ܘܦܪܣܘ ܟܪܟܗ ܕܢܡܘܣܐ ܘܩܒܠܝܢ ܗܘܘ ܩܕܡ ܩܕܝܫܐ ܥܠ ܥܡ̈ܡܐ ܕܐܠܨܝܢ ܗܘܘ ܠܗܘܢ ܕܢܬܕܒܪܘܢ ܒܕܡܘܬܗܘܢ
49 ܘܐܝܬܝܘ ܡܐ̈ܢܝ ܟܗܢܘܬܐ ܘܪܫ ܥ̈ܠܠܬܐ ܘܡܥܣܪ̈ܐ ܘܐܩܝܡܘ ܠܢܙܝܪ̈ܐ ܗܢܘܢ ܕܡܠܝܘ ܝܘ̈ܡܬܐ ܕܢܙܝܪܘܬܗܘܢ
50 ܘܓܥܘ ܠܘܬ ܥܡܘܪܐ ܕܫܡܝܐ ܘܐܡܪܘ ܡܢܐ ܢܥܒܕ ܠܗܘܢ ܠܗܠܝܢ ܐܘ ܠܐܝܟܐ ܢܘܒܠ ܐܢܘܢ
51 ܘܗܐ ܒܝܬ ܡܩܕܫܟ ܡܬܕܝܫ ܘܡܣܬܝܒ ܘܟܗ̈ܢܝܟ ܒܐܒܠܐ ܘܒܡܘܟܟܐ ܐܝܬܝܗܘܢ
52 ܘܗܐ ܥܡ̈ܡܐ ܐܬܟܢܫܘ ܥܠܝܢ ܕܢܪܝܡܘܢܢ ܐܢܬ ܝܕܥ ܐܢܬ ܡܕܡ ܕܡܬܚܫܒܝܢ ܥܠܝܢ
53 ܐܝܟܢܐ ܡܫܟܚܝܢ ܐܢܚܢܢ ܕܢܩܘܡ ܠܘܩܒܠܗܘܢ ܐܢ ܗܘ ܕܐܢܬ ܠܐ ܡܥܕܪ ܐܢܬ ܠܢ
54 ܘܩܪܘ ܒܩܪ̈ܢܬܐ ܘܓܥܘ ܒܩܠܐ ܪܡܐ
55 ܘܡܢ ܒܬܪ ܗܠܝܢ ܐܩܝܡ ܝܗܘܕܐ ܡܕܒܪ̈ܢܐ ܠܥܡܐ ܪ̈ܒܝ ܐ̈ܠܦܐ ܘܪ̈ܒܝ ܡܐ̈ܘܬܐ ܘܪ̈ܒܝ ܚܡܫܝܢ
56 ܘܐܡܪ ܠܐܝܠܝܢ ܕܒܢܝܢ ܠܗܘܢ ܒܬ̈ܐ ܘܡܟܝܪ̈ܢ ܠܗܘܢ ܢܫ̈ܐ ܘܢܨܝܒܝܢ ܠܗܘܢ ܟܪ̈ܡܐ ܘܠܕܚܘ̈ܠܬܢܐ ܕܢܗܦܘܟ ܐܢܫ ܠܒܝܬܗ ܐܝܟ ܕܐܡܪ ܢܡܘܣܐ
57 ܘܫܩܠܬ ܡܫܪܝܬܐ ܘܫܪܬ ܡܢ ܬܝܡܢܝܗ ܕܥܡܐܘܣ
58 ܘܐܡܪ ܝܗܘܕܐ ܐܬܚܙܩܘ ܘܗܘܘ ܒܢ̈ܝ ܚܝܠܐ ܘܗܘܘ ܡܛܝܒܝܢ ܠܨܦܪܐ ܠܡܩܪܒܘ ܥܡ ܗܠܝܢ ܥܡ̈ܡܐ ܕܐܬܟܢܫܘ ܥܠܝܢ ܕܢܪܝܡܘܢܢ ܘܠܒܝܬ ܡܩܕܫܢ
59 ܡܛܠ ܕܦܩܚ ܗܘ ܠܢ ܕܢܡܘܬ ܒܩܪܒܐ ܐܘ ܕܢܚܙܐ ܒܒܝܫܬܗ ܕܥܡܢ ܘܕܡܩܕܫܢ
60 ܘܐܝܟ ܕܐܝܬ ܨܒܝܢܐ ܩܕܡ ܥܡܘܪܐ ܕܫܡܝܐ ܗܟܘܬ ܢܥܒܕ
1 Maccabees 2 · 1 Maccabees 4 · Greek (Septuagint / SBLGNT) · Latin (Vulgate)