Read 1 Maccabees 2 side by side with translations · The Final Bible
1 ܘܒܗܢܘܢ ܝܘ̈ܡܬܐ ܩܡ ܡܬܝܬܐ ܒܪܗ ܕܝܘܚܢܢ ܒܪ ܫܡܥܘܢ ܟܗܢܐ ܡܢ ܒ̈ܢܝ ܝܘܢܕܒ ܡܢ ܐܘܪܫܠܡ ܘܝܬܒ ܒܡܘܕܥܝܡ
2 ܘܐܝܬ ܗܘܐ ܠܗ ܚܡܫܐ ܒ̈ܢܝܢ ܝܘܚܢܢ ܗܘ ܕܡܬܩܪܐ ܓܕܝ
3 ܘܫܡܥܘܢ ܕܐܬܩܪܝ ܬܪܣܝ
4 ܘܝܗܘܕܐ ܗܘ ܕܐܬܩܪܝ ܡܩܒܝ
5 ܘܐܠܝܥܙܪ ܗܘ ܕܐܬܩܪܝ ܚܘܪܢ ܘܝܘܢܬܢ ܗܘ ܕܐܬܩܪܝ ܚܦܘܣ
6 ܘܚܙܘ ܓܘ̈ܕܦܐ ܕܗܘܝܢ ܒܝܗܘܕܐ ܘܒܐܘܪܫܠܡ
7 ܘܐܡܪ ܘܝ ܠܝ ܠܡܢܐ ܐܬܝܠܕܬ ܕܐܚܙܐ ܒܬܒܪܗ ܕܒܪܬ ܥܡܝ ܘܕܡܕܝܢܬܐ ܩܕܝܫܬܐ ܘܐܝܬܒܘ ܬܡܢ ܢܘܟܪ̈ܝܐ ܡܛܠ ܕܐܬܝܗܒܬ ܒܐܝܕܐ ܕܒܥ̈ܠܕܒܒܐ ܘܒܝܬ ܡܩܕܫܗ ܒܐܝܕܐ ܕܢܘܟܪ̈ܝܐ
8 ܗܘܐ ܗܝܟܠܗ ܒܙܒܢ ܐܝܟ ܓܒܪܐ ܡܫܒܚܐ
9 ܘܗܫܐ ܡܐ̈ܢܐ ܕܬܫܒܘܚܬܗ ܐܙܠܘ ܒܫܒܝܐ ܝܠܘ̈ܕܝܗ ܐܬܩܛܠܘ ܒܦܠܛܘ̈ܬܗ ܘܥܠܝܡ̈ܐ ܒܪܘܡܚܗ ܕܒܥܠܕܒܒܐ
10 ܐܝܢܘ ܥܡܐ ܕܠܐ ܐܝܪܬܘ ܒܡܠܟܘܬܗ ܘܢܣܒ ܡܢ ܒܙܬܗ
11 ܟܠܗ ܨܒܬܗ ܐܬܢܣܒ ܡܢܗ ܘܚܠܦ ܚܐܪܘܬܗ̇ ܗܘܬ ܠܥܒܕܘܬܐ
12 ܘܗܐ ܒܝܬ ܡܩܕܫܢ ܘܨܒܬܢ ܘܬܫܒܘܚܬܢ ܗܘܘ ܠܚܘܪܒܐ ܘܣܝܒܘ ܐܢܘܢ ܥܡܡ̈ܐ
13 ܘܠܡܢܐ ܡܟܝܠ ܐܙܠ ܠܢ ܠܡܚܐ
14 ܘܣܕܩܘ ܡܬܝܬܐ ܘܒܢ̈ܘܗܝ ܢܚ̈ܬܝܗܘܢ ܘܐܬܟܣܝܘ ܣܩ̈ܐ ܘܐܬܐܒܠܘ ܪܘܪܒܐܝܬ
15 ܘܐܬܘ ܦܠܚ̈ܘܗܝ ܕܡܠܟܐ ܗܢܘܢ ܕܐܠܨܝܢ ܗܘܘ ܥܠ ܡܣܛܝܢܘܬܐ ܠܡܘܪܥܝܡ ܡܕܝܢܬܐ ܕܢܕܒܚܘܢ
16 ܘܣ̈ܓܝܐܐ ܡܢ ܐܝܣܪܝܠ ܐܬܘ ܠܘܬܗܘܢ ܐܦ ܡܬܝܬܐ ܘܐܝܠܝܢ ܕܥܡܗ ܐܬܟܢܫܘ
17 ܘܥܢܘ ܦܠܚ̈ܘܗܝ ܕܡܠܟܐ ܘܐܡܪܘ ܠܡܬܝܬܐ ܐܢܬ ܗܘ ܪܫܐ ܘܪܒܐ ܘܡܫܒܚܐ ܒܡܕܝܢܬܐ ܗܕܐ ܕܡܫܪܪ ܐܢܬ ܘܡܩܝܡ ܒܒܢ̈ܝܐ ܘܒܐ̈ܚܐ
18 ܘܗܫܐ ܗܟܝܠ ܩܪܘܒ ܐܢܬ ܩܕܡܝܐ ܘܥܒܕ ܦܘܩܕܢܗ ܕܡܠܟܐ ܐܝܟ ܕܥܒܕܘ ܟܠܗܘܢ ܥܡܡ̈ܐ ܘܓܒܪ̈ܐ ܕܝܗܘܕܐ ܐܝܠܝܢ ܕܐܫܬܚܪܘ ܒܐܘܪܫܠܡ ܘܬܗܘܐ ܐܢܬ ܘܒܢ̈ܝܟ ܡܢ ܪ̈ܚܡܘܗܝ ܕܡܠܟܐ ܘܐܢܬ ܘܒ̈ܢܝܟ ܬܫܬܒܚܘܢ ܒܕܗܒܐ ܘܒܣܐܡܐ ܘܒܫܪܟܐ ܕܡܘܗ̈ܒܬܐ ܐܚܪ̈ܢܝܬܐ
19 ܘܥܢܐ ܡܬܝܬܐ ܒܩܠܐ ܪܡܐ ܘܐܡܪ ܐܢܗܘ ܕܟܠܗܘܢ ܥܡܡ̈ܐ ܕܬܚܝܬ ܫܘܠܛܢܗ ܕܡܠܟܐ ܡܫܬܡܥܝܢ ܠܗ ܕܢܦܪܩܘܢ ܡܢ ܦܘܠܚܢܐ ܕܐܒܗ̈ܝܗܘܢ ܘܢܨܛܒܘܢ ܒܦܘܩ̈ܕܢܘܗܝ
20 ܐܠܐ ܐܢܐ ܘܒ̈ܢܝ ܘܐܚ̈ܝ ܒܕܝܬܩܐ ܕܐܒ̈ܗܝܢ ܪ̈ܕܝܢ ܐܢܚܢܢ
21 ܚܣ ܠܢ ܕܢܫܒܘܩ ܢܡܘܣܗ ܕܡܪܝܐ ܘܦܘܩ̈ܕܢܘܗܝ
22 ܠܐ ܡܫܬܡܥܝܢ ܚܢܢ ܠܡܠܬܗ ܕܡܠܟܐ ܕܢܥܒܪ ܩܝܡܢ ܘܦܘܠܚܢܢ ܐܘ ܕܢܣܛܐ ܡܢܗܘܢ ܠܝܡܝܢܐ ܐܘ ܠܣܡܠܐ
23 ܘܟܕ ܫܠܝ ܡܬܝܬܐ ܡܢ ܕܡܡܠܠ ܗܠܝܢ ܦܬܓܡ̈ܐ ܩܪܒ ܓܒܪܐ ܚܕ ܝܗܘܕܝܐ ܠܥܝܢ ܟܠܗ ܥܡܐ ܠܡܕܒܚܘ ܥܠ ܥܠܬܐ ܕܒܡܘܪܥܝܡ ܐܝܟ ܦܘܩܕܢܗ ܕܡܠܟܐ
24 ܘܚܙܐ ܡܬܝܬܐ ܘܛܢ ܘܪܬ ܟܘ̈ܠܝܬܗ ܘܐܣܩ ܚܡܬܐ ܐܝܟ ܕܝܢܐ ܘܪܗܛ ܘܩܛܠܗ ܥܠ ܥܠܬܐ
25 ܘܐܦ ܠܪܒܐ ܕܡܠܟܐ ܗܘ ܕܐܠܨ ܗܘܐ ܕܢܕܒܚܘܢ ܩܛܠܗ ܒܗܘ ܙܒܢܐ ܘܠܥܠܬܐ ܣܚܦ
26 ܘܛܢ ܡܬܝܬܐ ܒܢܡܘܣܐ ܐܝܟ ܕܥܒܕ ܦܝܢܚܣ ܠܙܡܪܝ ܒܪ ܣܠܘ
27 ܘܩܪܐ ܡܬܝܬܐ ܒܡܕܝܢܬܐ ܒܩܠܐ ܪܡܐ ܘܐܡܪ ܟܠ ܡܢܘ ܕܛܐܢ ܒܢܡܘܣܐ ܘܡܩܝܡ ܕܝܬܩܐ ܢܐܬܐ ܒܬܪܝ
28 ܘܥܪܩ ܗܘ ܘܒܢ̈ܘܗܝ ܠܛܘܪܐ ܘܫܒܩܘ ܡܕܡ ܕܐܝܬ ܗܘܐ ܠܗܘܢ ܒܡܕܝܢܬܐ
29 ܗܝܕܝܢ ܢܚܬܘ ܣܓ̈ܝܐܐ ܕܒ̈ܥܝܢ ܗܘܘ ܙܕܝܩܘܬܐ ܘܕܝܢܐ ܠܐܪܥܐ ܕܡܕܒܪܐ ܕܢܬܒܘܢ ܬܡܢ
30 ܗܢܘܢ ܘܢܫ̈ܝܗܘܢ ܘܒܢ̈ܝܗܘܢ ܘܒܥܝܪܗܘܢ ܡܛܠ ܕܣ̈ܓܝ ܥܠܝܗܘܢ ܒܝܫ̈ܬܐ
31 ܘܐܬܐܡܪ ܠܦܠܚ̈ܘܗܝ ܕܡܠܟܐ ܘܠܚܝ̈ܠܘܬܐ ܕܐܝܬ ܗܘܘ ܒܐܘܪܫܠܡ ܒܡܕܝܢܬܗ ܕܕܘܝܕ ܕܢܚܬܘ ܐܢܫܐ ܐܝܠܝܢ ܕܒܛܠܘ ܦܘܩܕܢܗ ܕܡܠܟܐ ܘܐܝܬܝܗܘܢ ܒܛܫܝ̈ܬܐ ܕܡܕܒܪܐ
32 ܘܪܗܛܘ ܥܠܝܗܘܢ ܣܓ̈ܝܐܐ ܘܐܕܪܟܘ ܐܢܘܢ ܘܥܒܕܘ ܥܡܗܘܢ ܩܪܒܐ ܒܝܘܡܐ ܕܫܒܬܐ
33 ܘܐܡܪܘ ܠܗܘܢ ܣܦܩܐ ܠܟܘܢ ܥܕܡܐ ܠܗܕܐ ܦܘܩܘ ܘܥܒܕܘ ܐܝܟ ܦܘܩܕܢܗ ܕܡܠܟܐ ܘܚܝܘ
34 ܘܐܡܪܘ ܠܐ ܢܦܩܝܢ ܐܢܚܢܢ ܘܐܦܠܐ ܥܒܕܝܢܢ ܡܠܬܗ ܕܡܠܟܐ ܠܡܫܪܐ ܘܠܡܒܛܠܘ ܝܘܡܐ ܕܫܒܬܐ
35 ܘܣܪܗܒܘ ܥܠܝܗܘܢ ܩܪܒܐ
36 ܘܠܐ ܝܗܒܘ ܠܗܘܢ ܦܬܓܡܐ ܐܦܠܐ ܟܐܦܐ ܫܕܘ ܒܗܘܢ ܐܦܠܐ ܣܟܪܘ ܒܐ̈ܦܝܗܘܢ ܒܡܛܫ̈ܝܬܐ
37 ܐܠܐ ܐܡܪܘ ܢܡܘܬ ܟܠܢ ܒܦܫܝܛܘܬܢ ܘܗܐ ܣܗܕܝܢ ܥܠܝܢ ܫܡܝܐ ܘܐܪܥܐ ܕܕܠܐ ܒܕܝܢܐ ܡܘܒܕܝܢ ܐܢܬܘܢ ܠܢ
38 ܘܩܡܘ ܥܠܝܗܘܢ ܒܝܘܡܐ ܕܫܒܬܐ ܘܩܛܠܘ ܐܢܘܢ ܘܠܢܫ̈ܝܗܘܢ ܘܠܒܢ̈ܝܗܘܢ ܘܠܒܥܝܪܗܘܢ ܐܝܟ ܐܠܦ ܢܦܫܢ ܕܒܢܝܢܫܐ
39 ܘܫܡܥ ܡܬܝܬܐ ܘܪ̈ܚܡܘܗܝ ܘܐܬܐܒܠܘ ܥܠܝܗܘܢ ܐܒܠܐ ܪܒܐ
40 ܘܐܡܪܘ ܓܒܪ ܠܩܪܝܒܗ ܐܢ ܗܘ ܕܢܥܒܕ ܟܠܢ ܐܝܟ ܕܥܒܕܘ ܐܚ̈ܝܢ ܘܠܐ ܢܩܪܒ ܥܡ ܥܡ̈ܡܐ ܥܠ ܐ̈ܦܝ ܢܦܫܢ ܘܥܠ ܐ̈ܦܝ ܢܡܘܣܢ ܒܥܓܠ ܡܘܒܕܝܢ ܘܡܪܝܡܝܢ ܠܢ ܡܢ ܐܪܥܐ
41 ܘܐܬܡܠܟܘ ܒܗܘ ܝܘܡܐ ܘܐܡܪܘ ܕܟܠ ܓܒܪܐ ܕܢܐܬܐ ܥܠܝܢ ܠܩܪܒܐ ܒܝܘܡܐ ܕܫܒܬܐ ܢܩܪܒ ܥܡܗ ܘܠܐ ܢܡܘܬ ܟܠܢ ܐܝܟ ܕܡܝܬܘ ܟܠܗܘܢ ܐ̈ܚܝܢ ܒܡܛܫ̈ܝܬܐ
42 ܗܝܕܝܢ ܐܬܟܢܫܘ ܠܘܬ ܗܠܝܢ ܕܒܝܬ ܡܬܝܬܐ ܟܢܘܫܬܐ ܕܐܣܝ̈ܕܝܐ ܡܢ ܐܝܣܪܝܠ ܕܥܫܝܢܝܢ ܒܚܝܠܐ ܟܠ ܡܢܘ ܕܡܨܛܒܐ ܒܢܡܘܣܐ
43 ܘܐܬܬܘܣܦܘ ܥܠܝܗܘܢ ܟܠܗܘܢ ܐܝܠܝܢ ܕܥܪܩܝܢ ܡܢ ܒܝܫ̈ܬܐ ܘܗܘܘ ܠܗܘܢ ܠܫܘܪܪܐ
44 ܘܐܩܝܡܘ ܚܝܠܐ ܘܩܛܠܘ ܠܥܘ̈ܠܐ ܒܪܘܓܙܗܘܢ ܘܠܐܢܫܐ ܥܒܪ̈ܝ ܢܡܘܣܐ ܒܚܡܬܗܘܢ ܘܫܪܟܐ ܥܪܩܘ ܠܒܝܬ ܥܡ̈ܡܐ ܕܢܬܦܨܘܢ
45 ܘܐܬܟܪܟܘ ܡܬܝܬܐ ܘܪ̈ܚܡܘܗܝ ܘܣܚܦܘ ܥ̈ܠܘܬܐ
46 ܘܓܙܪܘ ܛ̈ܠܝܐ ܐܝܠܝܢ ܕܠܐ ܓܙܝܪܝܢ ܗܘܘ ܕܐܫܟܚܘ ܒܬܚܘ̈ܡܐ ܕܐܝܣܪܝܠ ܒܥܘܫܢܐ ܘܒܚܝܠܐ
47 ܘܪܕܦܘ ܠܫܒܗܪ̈ܢܐ ܘܐܬܩܝܡ ܥܒ̈ܕܐ ܒܐܝ̈ܕܝܗܘܢ
48 ܘܢܣܒܘܗܝ ܠܢܡܘܣܐ ܡܢ ܐܝܕܐ ܕܥܡ̈ܡܐ ܘܡܢ ܐܝܕܐ ܕܡ̈ܠܟܝܗܘܢ ܘܠܐ ܝܗܒܘ ܕܬܬܪܝܡ ܩܪܢܗ ܕܥܘܠܐ
49 ܘܩܪܒܘ ܝܘܡ̈ܬܗ ܕܡܬܝܬܐ ܕܢܡܘܬ ܘܐܡܪ ܠܒܢ̈ܘܗܝ ܗܫܐ ܐܫܬܪܪܬ ܫܒܗܪܢܘܬܐ ܘܡܟܣܢܘܬܐ ܘܙܒܢܐ ܕܣܘܚܦܐ ܘܚܡܬܐ ܕܪܘܓܙܐ
50 ܗܫܐ ܒܢ̈ܝ ܛܢܘ ܒܢܡܘܣܐ ܘܗܒܘ ܢܦܫ̈ܬܟܘܢ ܥܠ ܐ̈ܦܝ ܕܝܬܩܐ ܕܐܒ̈ܗܝܢ
51 ܕܥܒܕܘ ܒܕܪ̈ܝܗܘܢ ܘܩܒܠܘ ܬܫܒܘܚܬܐ ܪܒܬܐ ܘܫܡܐ ܕܠܥܠܡ
52 ܐܒܪܗܡ ܠܐ ܗܘܐ ܒܢܣܝܘܢܐ ܐܫܬܟܚ ܡܗܝܡܢ ܘܐܬܚܫܒܬ ܠܗ ܠܙܕܝܩܘܬܐ
53 ܝܘܣܦ ܒܙܒܢܐ ܕܐܘܠܨܢܗ ܢܛܪ ܦܘܩܕܢܐ ܘܗܘܐ ܡܪܐ ܕܡܨܪܝܢ
54 ܦܝܢܚܣ ܐܒܘܢ ܒܛܢܢܐ ܕܛܢ ܢܣܒ ܕܝܬܩܐ ܕܟܗܢܘܬܐ ܕܠܥܠܡ
55 ܘܝܫܘܥ ܒܕܫܡܠܝ ܡܠܬܐ ܗܘܐ ܕܝܢܐ ܥܠ ܐܝܣܪܐܝܠ
56 ܘܟܠܒ ܒܕܐܣܗܕ ܒܟܢܘܫܬܐ ܢܣܒ ܐܪܥܐ ܕܝܘܪܬܢܐ
57 ܕܘܝܕ ܒܡܪܚܡܢܘܬܗ ܝܪܬ ܬܪܘܢܘܣ ܕܡܠܟܘܬܐ ܕܠܥܠܡ ܥܠܡܝܢ
58 ܘܐܠܝܐ ܒܕܛܢ ܛܢܢܗ ܕܢܡܘܣܐ ܐܬܥܠܝ ܠܫܡܝܐ
59 ܘܚܢܢܝܐ ܘܥܙܪܝܐ ܘܡܝܫܐܝܠ ܕܗܝܡܢܘ ܐܬܦܨܝܘ ܡܢ ܫܠܗܒܝܬܐ ܕܢܘܪܐ
60 ܘܕܢܝܐܝܠ ܒܦܫܝܛܘܬܗ ܐܬܦܨܝ ܡܢ ܦܘܡܐ ܕܐܪ̈ܝܘܬܐ
61 ܘܗܟܢܐ ܐܬܚܫܒܘ ܕܒܟܠ ܕܪ ܘܕܪ ܟܠ ܐܝܠܝܢ ܕܣܒܪܘ ܒܗ ܠܐ ܐܫܬܦܠܘ ܘܠܐ ܐܬܟܪܗܘ
62 ܘܡܢ ܡ̈ܠܘܗܝ ܕܓܒܪܐ ܥܘܠܐ ܠܐ ܬܕܚܠܘܢ ܡܛܠ ܕܬܫܒܘܚܬܗ ܠܙܒܠܐ ܘܠܬܘܠܥܐ ܗܘܝܐ
63 ܝܘܡܢܐ ܡܬܪܝܡ ܘܠܡܚܪ ܠܐ ܐܝܬܘܗܝ ܡܛܠ ܕܗܦܟ ܠܗ ܠܥܦܪܗ ܘܡܚܫܒܬܗ ܐܒܕܐ
64 ܘܐܢܬܘܢ ܒܢ̈ܝ ܐܬܚܝܠܘ ܘܐܬܥܫܢܘ ܒܢܡܘܣܐ ܡܛܠ ܕܒܗ ܬܫܬܒܚܘܢ
65 ܘܗܐ ܫܡܥܘܢ ܐܚܘܟܘܢ ܝܕܥܢܐ ܕܓܒܪܐ ܗܘ ܕܡܠܟܐ ܘܕܬܪܥܝܬܐ ܠܗ ܗܘܝܬܘܢ ܡܫܬܡܥܝܢ ܟܠܗܘܢ ܝܘ̈ܡܬܟܘܢ ܘܗܘ ܢܗܘܐ ܠܟܘܢ ܪܫܐ ܘܡܕܒܪܢܐ
66 ܘܝܗܘܕܐ ܡܩܒܝ ܥܫܝܢ ܚܝܠܐ ܡܢ ܛܠܝܘܬܗ ܗܘ ܢܗܘܐ ܠܟܘܢ ܪܫܐ ܘܡܕܒܪܢܐ ܕܩܪ̈ܒܐ ܘܗܘ ܢܩܪܒ ܩܪ̈ܒܐ ܥܡ ܥܡ̈ܡܐ
67 ܘܐܢܬܘܢ ܩܪܒܘ ܠܘܬܟܘܢ ܠܟܠܗܘܢ ܥܒ̈ܘܕܘܗܝ ܕܢܡܘܣܐ ܘܬܒܥܘ ܬܒܥܬܗ ܕܥܡܟܘܢ
68 ܘܦܪܘܥܘ ܦܘܪܥܢܐ ܠܥܡ̈ܡܐ ܘܚܘܪܘ ܒܦܘܩ̈ܕܢܘܗܝ ܕܢܡܘܣܐ
69 ܘܒܪܟ ܐܢܘܢ ܘܐܬܟܢܫ ܠܘܬ ܐܒܗ̈ܘܗܝ
70 ܘܡܝܬ ܡܬܝܬܐ ܒܫܢܬ ܡܐܐ ܘܐܪܒܥܝܢ ܘܬܡܢܐ ܕܡܠܟܘܬܐ ܘܩܒܪܘܗܝ ܒܢ̈ܘܗܝ ܒܩܒܪܐ ܕܐܒܗ̈ܘܗܝ ܒܡܘܪܥܝܡ ܘܐܬܐܒܠ ܥܠܘܗܝ ܟܘܠܗ ܐܝܣܪܐܝܠ ܐܒܠܐ ܪܒܐ
1 Maccabees 1 · 1 Maccabees 3 · Greek (Septuagint / SBLGNT) · Latin (Vulgate)