Read 1 Maccabees 4 side by side with translations · The Final Bible
1 ܘܕܒܪ ܓܘܪܓܝܐ ܥܡܗ ܚܡܫܐ ܐ̈ܠܦܝܢ ܪ̈ܓܠܝܝܢ ܘܐܠܦܐ ܕܓܪ̈ܝܐ ܕܦܪ̈ܫܐ ܘܫܩܠܬ ܡܫܪܝܬܗ ܒܠܠܝܐ
2 ܐܝܟ ܕܢܪܡܘܢ ܥܠ ܡܫܪܝܬܗ ܕܝܗܘܕܐ ܒܠܠܝܐ ܘܢܩܛܠܘܢ ܐܢܘܢ ܡܢ ܫܠܝܐ ܘܐܝܠܝܢ ܕܝܬܒܝܢ ܗܘܘ ܒܝܬ ܡܪܕܐ ܗܢܘܢ ܗܘܘ ܠܗܘܢ ܡܕܒܪ̈ܢܐ
3 ܘܫܡܥ ܝܗܘܕܐ ܘܫܩܠ ܗܘ ܘܚ̈ܝܠܬܢܐ ܕܥܡܗ ܠܡܪܡܝܘ ܥܠ ܚܝܠܗ ܕܡܠܟܐ ܕܒܥܡܐܘܣ
4 ܥܕ ܡܒܕܪ ܗܘܐ ܚܝܠܗ ܡܢ ܡܫܪܝܬܗ
5 ܘܐܬܐ ܓܘܪܓܝܐ ܠܡܫܪܝܬܐ ܕܝܗܘܕܐ ܘܠܐܢܫ ܠܐ ܐܫܟܚ ܘܦܩܕ ܗܘܐ ܠܗܘܢ ܒܛܘܪ̈ܐ ܡܛܠ ܕܐܡܪ ܗܘܐ ܕܥܪܩܘ ܠܗܘܢ ܗܠܝܢ ܡܢܢ
6 ܘܟܕ ܗܘܐ ܨܦܪܐ ܐܬܚܙܝ ܝܗܘܕܐ ܒܦܩܥܬܐ ܒܬܠܬܐ ܐ̈ܠܦܝܢ ܪ̈ܓܠܝܝܢ ܘܠܝܬ ܗܘܐ ܥܠܝܗܘܢ ܐܠܐ ܐܢ ܪ̈ܘܡܚܐ ܘܡ̈ܓܢܐ ܒܠܚܘܕ ܐܝܟ ܕܨܒܝܢ ܗܘܘ
7 ܘܚܙܘ ܡܫܪܝܬܐ ܕܥܡ̈ܡܐ ܡܫܪܝܬܐ ܥܫܝܢܬܐ ܟܕ ܡܚܙܩܐ ܒܙܝܢܐ ܘܚܕܝܪ̈ܝܢ ܠܗ ܦܪ̈ܫܐ ܘܗܢܘܢ ܡܠܦܝܢ ܗܘܘ ܩܪܒܐ
8 ܘܐܡܪ ܝܗܘܕܐ ܠܓܒܪ̈ܐ ܕܥܡܗ ܠܐ ܬܕܚܠܘܢ ܡܢ ܣܘܓܐܗܘܢ ܘܡܢ ܛܘܝܒܗܘܢ ܠܐ ܬܬܪܗܒܘܢ
9 ܐܬܕܟܪܘ ܐܝܟܢܐ ܐܬܦܪܩܘ ܐܒ̈ܗܝܢ ܒܝܡܐ ܕܣܘܦ ܟܕ ܪ̈ܕܦ ܗܘܐ ܠܗܘܢ ܦܪܥܘܢ ܒܚܝܠܐ ܪܒܐ
10 ܘܗܫܐ ܢܓܥܐ ܠܘܬ ܥܡܘܪܐ ܕܫܡܝܐ ܕܠܡܐ ܢܪܚܡ ܥܠܝܢ ܘܢܬܕܟܪ ܡܪܝܐ ܕܝܬܩܐ ܕܐ̈ܒܗܝܢ ܘܢܫܚܩܝܗ ܠܗܕܐ ܡܫܪܝܬܐ ܩܕܡܝܢ ܝܘܡܢܐ
11 ܘܢܕܥܘܢ ܟܠܗܘܢ ܥܡ̈ܡܐ ܕܐܝܬܘܗܝ ܡܢ ܕܦܪܩ ܘܡܦܨܐ ܠܐܝܣܪܝܠ
12 ܘܫܩܠܘ ܦܠܫ̈ܬܝܐ ܥܝ̈ܢܝܗܘܢ ܘܚܙܘ ܐܢܘܢ ܕܐܬܝܢ ܠܐܘܪܥܗܘܢ
13 ܘܢܦܩܘ ܡܢ ܡܫܪ̈ܝܬܗܘܢ ܠܩܪܒܐ ܘܩܪܘ ܒܩܪ̈ܢܬܐ ܕܒܝܬ ܝܗܘܕܐ
14 ܘܝܗܒܘ ܥܠܝܗܘܢ ܘܐܬܬܒܪܘ ܥܡ̈ܡܐ ܘܥܪܩܘ ܠܦܩܥܬܐ
15 ܫܪܟܐ ܕܝܢ ܕܐܫܬܚܪܘ ܢܦܠܘ ܒܚܪܒܐ ܘܪܕܦܘ ܐܢܘܢ ܥܕܡܐ ܠܓܙܪ ܘܥܕܡܐ ܠܦܩܥܬܐ ܕܐܕܘܡ ܘܥܕܡܐ ܠܥܐܙܐ ܘܥܕܡܐ ܠܝܡܢܝܢ ܘܢܦܠܘ ܡܢܗܘܢ ܐܝܟ ܬܠܬܐ ܐ̈ܠܦܝܢ ܓܒܪ̈ܝܢ
16 ܘܗܦܟ ܝܗܘܕܐ ܘܚܝܠܗ ܡܢ ܒܬܪܗܘܢ ܕܪܕܦܝܢ ܗܘܘ ܠܗܘܢ
17 ܘܐܡܪ ܠܥܡܐ ܠܐ ܬܬܪܓܪܓܘܢ ܠܒܙܬܐ ܡܛܠ ܕܥܕܟܝܠ ܩܪܒܐ ܩܝܡ ܩܕܡܝܢ
18 ܘܓܘܪܓܝܐ ܘܚܝܠܗ ܒܛܘܪ̈ܐ ܐܢܘܢ ܘܩܪܝܒܝܢ ܐܢܘܢ ܠܢ ܐܠܐ ܩܘܡܘ ܗܫܐ ܠܘܩܒܠ ܒܥ̈ܠܕܒܒܝܢ ܘܐܩܪܒܘ ܥܡܗܘܢ ܘܡܢ ܒܬܪ ܗܠܝܢ ܬܣܒܘܢ ܒܙܬܐ ܒܦܪܗܣܝܐ
19 ܘܥܕ ܝܗܘܕܐ ܡܡܠܠ ܗܠܝܢ ܐܕܝܩܘ ܡܢ ܛܘܪܐ ܡܢ ܐܝܠܝܢ ܕܐܝܬ ܗܘܘ ܥܡ ܓܘܪܓܝܐ
20 ܘܚܙܘ ܕܐܙܕܟܝ ܠܗ ܘܕܒܝܬ ܝܗܘܕܐ ܡܘܩܕܝܢ ܗܘܘ ܡܫܪ̈ܝܬܗܘܢ ܬܢܢܐ ܓܝܪ ܕܡܬܚܙܐ ܗܘܐ ܗܘ ܡܘܕܥ ܗܘܐ ܡܕܡ ܕܗܘܐ
21 ܘܟܕ ܚܙܘ ܕܝܢ ܗܠܝܢ ܕܚܠܘ ܣܓܝ ܘܬܘܒ ܕܚܙܘ ܠܡܫܪܝܬܗ ܕܝܗܘܕܐ ܒܦܩܥܬܐ ܕܡܛܝܒܐ ܠܩܪܒܐ
22 ܘܥܪܩܘ ܟܠܗܘܢ ܠܐܪܥܐ ܕܦܠܫ̈ܬܝܐ
23 ܘܗܦܟ ܝܗܘܕܐ ܥܠ ܒܙܬܗ ܕܡܫܪܝܬܐ ܘܢܣܒ ܕܗܒܐ ܣܓܝܐܐ ܘܟܣܦܐ ܘܟܐ̈ܦܐ ܛܒ̈ܬܐ ܕܝܗܩܢܬܘܢ ܘܐܪܓܘܢܐ ܕܝܡܐ ܘܥܘܬܪܐ ܪܒܐ
24 ܘܗܦܟܘ ܘܡܫܒܚܝܢ ܗܘܘ ܘܡܘܕܝܢ ܠܡܪܝܐ ܕܒܫܡܝܐ ܕܛܒ ܗܘ ܘܠܥܠܡ ܪ̈ܚܡܘܗܝ
25 ܘܗܘܐ ܦܘܪܩܢܐ ܠܐܝܣܪܐܝܠ ܒܗܘ ܝܘܡܐ
26 ܫܪܟܐ ܕܝܢ ܕܐܫܬܚܪܘ ܡܢ ܦܠܫ̈ܬܝܐ ܐܬܘ ܘܚܘܝܘ ܠܠܘܣܝܐ ܡܕܡ ܕܓܕܫ
27 ܗܘ ܕܝܢ ܟܕ ܫܡܥ ܐܬܪܫܠ ܘܐܬܬܥܝܩ ܣܓܝ ܕܠܐ ܗܘܐ ܐܝܟ ܕܨܒܐ ܗܘܐ ܗܟܘܬ ܗܘܝܗܝ ܠܐܝܣܪܝܠ ܘܠܐ ܗܘܐ ܐܝܟ ܕܦܩܕܗ ܡܠܟܐ ܗܟܘܬ ܥܒܕ
28 ܘܠܒܬܪܗ ܕܫܢܬܐ ܟܢܫ ܠܘܣܝܐ ܓܒܪ̈ܐ ܡܓܒ̈ܝܐ ܫܬܝܢ ܐ̈ܠܦܝܢ ܘܚܡܫܐ ܐ̈ܠܦܝܢ ܦܪ̈ܫܐ ܐܝܟ ܕܝܩܪܒܘܢ ܥܡ ܐܝܣܪܐܝܠ
29 ܘܐܬܘ ܠܐܕܘܡ ܘܫܪܘ ܒܒܝܬ ܫܘܪ̈ܐ ܘܐܪܥ ܐܢܘܢ ܝܗܘܕܐ ܒܥܣܪܐ ܐ̈ܠܦܝܢ ܓܒܪ̈ܝܢ
30 ܘܚܙܐ ܡܫܪܝܬܐ ܕܒܥܠܕܒܒܝܗܘܢ ܡܫܪܝܬܐ ܥܫܝܢܬܐ ܘܨܠܝ ܘܐܡܪ ܒܪܝܟ ܐܢܬ ܗܘ ܦܪܘܩܗ ܕܐܝܣܪܐܝܠ ܗܘ ܕܫܚܩ ܬܘܟܠܢܗ ܕܓܢܒܪܐ ܒܐܝܕܗ ܕܕܘܝܕ ܥܒܕܟ ܘܐܫܠܡܬ ܡܫܪܝܬܐ ܕܦܠܫ̈ܬܝܐ ܒܐܝܕܗ ܕܝܘܢܬܢ ܒܪ ܫܐܘܠ ܘܕܫܩܠ ܡܐ̈ܢܘܗܝ ܘܐܦ ܗܫܐ ܚܒܘܫ ܡܫܪܝܬܐ ܗܕܐ ܒܐܝܕܗ ܕܥܡܟ ܐܝܣܪܝܠ
31 ܘܢܒܗܬܘܢ ܒܚܝܠܗܘܢ ܘܒܦܪ̈ܫܝܗܘܢ
32 ܘܐܪܡܐ ܥܠܝܗܘܢ ܕܚܠܬܐ ܘܫܚܘܩ ܥܘܫܢܐ ܕܚܝܠܗܘܢ ܘܢܬܬܙܝܥܘܢ ܒܬܒܪܗܘܢ
33 ܐܪܡܐ ܐܢܘܢ ܒܪ̈ܘܡܚܐ ܕܚܒ̈ܝܒܝܟ ܘܢܫܒܚܘܢܟ ܟܠܗܘܢ ܝܕ̈ܥܝ ܫܡܟ ܒܬܫܒ̈ܚܬܐ
34 ܘܐܩܪܒܘ ܚܕ ܥܡ ܚܕ ܘܢܦܠܘ ܡܢ ܡܫܪܝܬܗ ܕܠܘܣܝܐ ܐܝܟ ܚܡܫܐ ܐ̈ܠܦܝܢ ܓܒܪ̈ܝܢ ܘܐܬܬܒܪܘ ܩܕܡܝܗܘܢ
35 ܘܟܕ ܚܙܐ ܕܝܢ ܠܘܣܝܐ ܕܐܙܕܟܝܬ ܠܗ ܡܫܪܝܬܗ ܘܐܬܥܫܢܬ ܡܫܪܬܗ ܕܝܗܘܕܐ ܘܕܥܬܝܕܝܢ ܐܢܘܢ ܓܢܒܪܐܝܬ ܕܢܡܘܬܘܢ ܐܘ ܕܢܚܘܢ ܫܩܠ ܡܢ ܬܡܢ ܘܐܙܠ ܠܗ ܠܐܢܛܝܘܟܝܐ ܘܟܢܫ ܠܗ ܚܝܠܐ ܣܓܝܐܐ ܘܥܬܕ ܢܦܫܗ ܘܡܬܚܫܒ ܗܘܐ ܕܬܘܒ ܢܣܩ ܥܠ ܝܗܘܕ
36 ܐܡܪ ܕܝܢ ܝܗܘܕܐ ܘܐܚ̈ܘܗܝ ܗܐ ܐܬܬܒܪܘ ܒܥ̈ܠܕܒܒܝܢ ܢܣܩ ܘܢܕܟܐ ܒܝܬ ܡܩܕܫܐ ܘܢܚܕܬܝܘܗܝ
37 ܘܐܬܟܢܫܬ ܟܠܗ ܡܫܪܝܬܐ ܘܣܠܩܘ ܠܛܘܪܐ ܕܨܗܝܘܢ
38 ܘܚܙܘ ܠܒܝܬ ܡܩܕܫܐ ܕܡܚܪܒ ܘܠܡܕܒܚܐ ܕܚܪܒ ܘܠܬܪ̈ܥܐ ܕܡܘܩܕܝܢ ܘܒܕܪ̈ܐ ܕܝܥܘ ܐ̈ܝܠܢܐ ܐܝܟ ܕܒܥܒܐ ܐܘ ܐܝܟ ܕܒܚܕ ܡܢ ܛܘܪ̈ܐ ܘܟܠܗܘܢ ܬܨܒ̈ܥܬܐ ܕܡܣܚܦܝܢ
39 ܘܨܪܝܘ ܢܚ̈ܬܝܗܘܢ ܘܐܪܩܕܘ ܡܪܩܘܕܬܐ ܪܒܬܐ ܘܐܪܡܝܘ ܥܦܪܐ ܥܠ ܪ̈ܫܝܗܘܢ
40 ܘܢܦܠܘ ܥܠ ܐ̈ܦܝܗܘܢ ܥܠ ܐܪܥܐ ܘܩܪܘ ܒܩܪ̈ܢܬܐ ܐܝܕܝ̈ܥܬܐ ܘܓܥܘ ܠܘܬ ܥܡܘܪܐ ܕܫܡܝܐ
41 ܗܝܕܝܢ ܦܩܕ ܝܗܘܕܐ ܘܐܩܝܡ ܓܒܪ̈ܐ ܕܢܬܟܬܫܘܢ ܘܢܩܪܒܘܢ ܥܡ ܐܝܠܝܢ ܕܝܬܒܝܢ ܒܚ̈ܣܢܐ ܥܕܡܐ ܕܢܕܟܐ ܗܘ ܠܒܝܬ ܡܩܕܫܐ
42 ܘܓܒܐ ܟܗ̈ܢܐ ܕܠܝܬ ܒܗܘܢ ܡܘܡܐ ܘܡܨܛܒܝܢ ܒܢܡܘܣܐ
43 ܘܕܟܝ ܠܒܝܬ ܡܩܕܫܐ ܘܢܣܒ ܟܐ̈ܦܐ ܕܛܡܐܘܬܐ ܘܣܡ ܐܢܝܢ ܒܐܬܪܐ ܛܡܐܐ
44 ܘܐܬܡܠܟܘ ܥܠ ܡܕܒܚܐ ܕܩܘܪܒܢܐ ܗܘ ܕܐܣܬܝܒ ܕܡܢܐ ܢܥܒܕܘܢ ܠܗ
45 ܘܢܦܠܬ ܠܗܘܢ ܡܚܫܒܬܐ ܛܒܬܐ ܕܢܫܪܘܢܝܗܝ ܕܕܠܡܐ ܡܢ ܡܬܘܡ ܢܗܘܐ ܠܗܘܢ ܠܚܣܕܐ ܡܛܠ ܕܣܝܒܘܗܝ ܗܘܘ ܥܡ̈ܡܐ ܘܫܪܐܘܗܝ ܠܡܕܒܚܐ
46 ܘܣܡܘ ܟܐ̈ܦܘܗܝ ܒܐܬܪܐ ܝܕܝܥܐ ܥܠ ܓܢܒ ܚܕܪ̈ܘܗܝ ܕܒܝܬܐ ܥܕܡܐ ܕܢܐܬܐ ܢܒܝܐ ܘܢܐܡܪ ܕܡܢܐ ܢܗܘܐ ܠܗܝܢ
47 ܘܢܣܒܘ ܟܐ̈ܦܐ ܡܫܠܡ̈ܬܐ ܐܝܟ ܕܟܬܝܒ ܒܢܡܘܣܐ ܘܒܢܘ ܠܡܕܒܚܐ ܐܝܟ ܕܡܢ ܩܕܝܡ
48 ܘܒܢܘ ܠܒܝܬ ܡܩܕܫܐ ܘܠܟܠܗ ܓܘܗ ܕܒܝܬܐ ܘܠܕܪ̈ܐ ܩܕܫܘ
49 ܘܥܒܕܘ ܡܐ̈ܢܝ ܩܘܕܫܐ ܚܕ̈ܬܐ ܘܐܥܠܘ ܡܢܪܬܐ ܘܡܕܒܚܐ ܕܒܣ̈ܡܐ ܘܦܬܘܪܐ ܠܗܝܟܠܐ
50 ܘܕܒܚܘ ܥܠ ܡܕܒܚܐ ܘܐܢܗܪܘ ܫܪ̈ܓܐ ܕܥܠ ܡܢܪܬܐ ܘܡܢܗܪܝܢ ܗܘܘ ܒܗܝܟܠܐ
51 ܘܣܡܘ ܥܠ ܦܬܘܪܐ ܠܚܡܐ ܘܬܠܘ ܐ̈ܦܝ ܬܪ̈ܥܐ ܘܫܠܡܘ ܟܘܠܗܘܢ ܥܒ̈ܕܝܗܘܢ
52 ܘܩܕܡܘ ܠܨܦܪܗ ܕܝܘܡܐ ܒܚܡܫܐ ܘܥܣܪܝܢ ܒܝܪܚܐ ܕܬܫܥܐ ܕܐܝܬܘܗܝ ܟܢܘܢ ܩܕܝܡ ܒܫܢܬ ܡܐܐ ܘܐܪܒܥܝܢ ܘܬܡܢܐ ܫ̈ܢܝܢ ܕܡܠܟܘܬܐ
53 ܘܐܣܩܘ ܩܘܪ̈ܒܢܐ ܐܝܟ ܢܡܘܣܐ ܥܠ ܡܕܒܚܐ ܕܝܩ̈ܕܐ ܗܘ ܚܕܬܐ ܕܥܒܕܘ ܗܘܘ
54 ܐܝܟ ܝܘ̈ܡܬܐ ܘܐܝܟ ܙܒ̈ܢܐ ܗܢܘܢ ܕܣܝܒܘܗܝ ܗܘܘ ܥܡ̈ܡܐ ܒܗ ܒܗܘ ܝܘܡܐ ܗܘܐ ܚܘܕܬܗ ܒܡܙܡܘܪ̈ܐ ܘܒܩܝܬܪ̈ܐ ܘܒܟܢܪ̈ܐ
55 ܘܢܦܠܘ ܟܠܗ ܥܡܐ ܥܠ ܐ̈ܦܝܗܘܢ ܘܣܓܕܘ ܘܒܪܟܘ ܠܥܡܘܪܐ ܕܫܡܝܐ ܗܘ ܕܬܩܢ ܘܛܝܒ ܐܘܪܚܗܘܢ
56 ܘܥܒܕܘ ܚܘܕܬܗ ܕܡܕܒܚܐ ܬܡܢܝܐ ܝܘ̈ܡܝܢ ܘܩܪܒܘ ܕܒ̈ܚܐ ܒܒܘܣܡܐ ܘܕܒܚܘ ܕܒ̈ܚܐ ܕܦܘܪܩܢܐ ܘܕܬܫܒܘܚܬܐ
57 ܘܨܒܬܘ ܩܕܡ ܐ̈ܦܝ ܗܝܟܠܐ ܒܟ̈ܠܝܠܐ ܕܕܗܒܐ ܘܒܡ̈ܓܢܐ ܘܚܕܬܘ ܬܪ̈ܥܐ ܘܟܠܗܘܢ ܡܐ̈ܢܝ ܬܨܒܝܬܐ
58 ܘܗܘܐ ܒܘܣܡܐ ܪܒܐ ܘܚܕܘܬܐ ܣܓܝܐܬܐ ܠܥܡܐ ܘܗܦܟ ܚܣܕܐ ܕܥܡ̈ܡܐ
59 ܘܐܩܝܡ ܝܗܘܕܐ ܘܐܚ̈ܘܗܝ ܘܟܠܗ ܟܢܘܫܬܐ ܕܐܝܣܪܐܝܠ ܕܢܗܘܘܢ ܗܘܝܢ ܝܘܡ̈ܬܐ ܕܚܘܕܬܗ ܕܡܕܒܚܐ ܒܙܒܢܗܘܢ ܡܢ ܫܢܐ ܠܫܢܐ ܬܡܢܝܐ ܝܘ̈ܡܝܢ ܡܢ ܚܡܫܐ ܘܥܣܪܝܢ ܒܟܢܘܢ ܩܕܝܡ ܒܚܕܘܬܐ ܘܒܒܘܣܡܐ
60 ܘܒܢܘ ܒܗܘ ܙܒܢܐ ܠܛܘܪܐ ܕܨܗܝܘܢ ܟܕ ܚܕܪ̈ ܒܫܘܪ̈ܐ ܪ̈ܡܐ ܘܒܡ̈ܓܕܠܐ ܚܣ̈ܝܢܐ ܕܠܡܐ ܡܢ ܡܬܘܡ ܢܐܬܘܢ ܥܡ̈ܡܐ ܘܢܕܘܫܘܢܝܗܝ ܐܝܟ ܕܥܒܕܘ ܡܢ ܩܕܝܡ
61 ܘܣܡܘ ܬܡܢ ܚܝܠܐ ܕܗܘܐ ܢܛܪ ܠܗ ܘܐܥܫܢܗ ܠܒܝܬ ܫܘܪ̈ܐ ܕܢܗܘܐ ܐܝܬ ܠܗ ܠܥܡܐ ܚܣ̈ܢܐ ܠܘܩܒܠ ܐܕܘܡ
1 Maccabees 3 · 1 Maccabees 5 · Greek (Septuagint / SBLGNT) · Latin (Vulgate)