1 Kings 2 — Coptic (Sahidic)

1 ⲁⲩϩⲱⲛ ⲇⲉ ⲉϩⲟⲩⲛ ⲛϭⲓⲛⲉϩⲟⲟⲩ ⲛⲇⲁⲩⲉⲓⲇ ⲉⲧⲣⲉϥⲙⲟⲩ ⲁϥϣⲁϫⲉ ⲙⲛⲥⲟⲗⲟⲙⲱⲛ ⲉϥϫⲱ ⲙⲙⲟⲥ ϫⲉⲡⲁϣⲏⲣⲉ ⲉⲓⲥ ϩⲏⲏⲧⲉ

2 ... ⲛⲅϣⲱⲡⲉ ⲛⲟⲩⲣⲱⲙⲉ ⲛϫⲱⲱⲣⲉ

3 ⲛⲅϩⲁⲣⲉϩ ⲉⲡⲉⲛⲧⲁⲡϫⲟⲉⲓⲥ ⲡⲉⲕⲛⲟⲩⲧⲉ ⲧⲁⲁϥ ⲉⲧⲟⲟⲧⲕ ⲉⲧⲣⲉⲕⲙⲟⲟϣⲉ ϩⲛⲛⲉϥϩⲓⲟⲟⲩⲉ ⲛⲅϩⲁⲣⲉϩ ⲉⲛⲉϥⲉⲛⲧⲟⲗⲏ ⲙⲛⲛⲉϥⲇⲓⲕⲁⲓⲱⲙⲁ ⲙⲛⲛⲉϥϩⲁⲡ ⲛⲁⲓ ⲉⲧⲥⲏϩ ϩⲙⲡⲛⲟⲙⲟⲥ ⲙⲙⲱⲩⲥⲏⲥ ϫⲉⲕⲁⲥ ⲉⲕⲉⲉⲓⲙⲉ ⲉⲛⲉⲧⲕⲛⲁⲁⲁⲩ ϩⲛϩⲱⲃ ⲛⲓⲙ ⲉⲧⲓϩⲱⲛ ⲙⲙⲟⲟⲩ ⲉⲧⲟⲟⲧⲕ

4 ϫⲉⲕⲁⲥ ⲉⲣⲉⲡϫⲟⲉⲓⲥ ⲧⲁϩⲟ ⲉⲣⲁⲧϥ ⲙⲡⲉϥϣⲁϫⲉ ⲉⲛⲧⲁϥⲧⲁⲩⲟ ⲉⲧⲃⲏⲏⲧϥϫⲱ ⲙⲙⲟⲥ ϫⲉⲉⲣϣⲁⲛⲛⲉⲕϣⲏⲣⲉ ϩⲁⲣⲉϩ ⲉⲧⲉⲩϩⲓⲏ ⲉⲧⲣⲉⲩⲙⲟⲟϣⲉ ϩⲓϩⲏ ⲙⲙⲟⲓ ϩⲛⲟⲩⲙⲉ ϩⲙⲡⲉⲩϩⲏⲧ ⲧⲏⲣϥ ⲛϯⲛⲁⲧⲁⲕⲟ ⲁⲛ ⲉⲃⲟⲗ ⲛϩⲏⲧⲕ ⲛⲟⲩⲣⲱⲙⲉ ⲉϫⲙⲡⲉⲑⲣⲟⲛⲟⲥ ⲙⲡⲓⲥⲣⲁⲏⲗ

5 ⲁⲩⲱ ⲛⲧⲟⲕ ⲇⲉ ϩⲱⲱⲕ ⲁⲕⲉⲓⲙⲉ ⲉⲛⲉⲛⲧⲁϥⲁⲁⲩ ⲛⲁⲓ ⲛϭⲓⲓⲱⲁⲃ ⲡϣⲏⲣⲉ ⲛⲥⲁⲣⲟⲩⲓⲁⲥ ⲉⲧⲉⲛⲉ... ⲧⲉϥϯⲡⲉⲉ ϩⲙⲡⲧⲟⲟⲩⲉ ⲉⲧϩⲛⲛⲉϥⲟⲩⲉⲣⲏⲧⲉ

6 ⲉⲕⲉⲉⲓⲣⲉ ϭⲉ ⲛⲁϥ ⲕⲁⲧⲁⲧⲉⲕⲥⲟⲫⲓⲁ ⲁⲩⲱ ⲛⲧⲟⲕ ⲉⲕⲉϫⲓ ⲛⲧⲉϥⲡⲟⲗⲓⲥ ϩⲓⲥⲛⲟϥ ⲉϩⲣⲁⲓ ⲉⲁⲙⲛⲧⲉ

7 ⲛϣⲏⲣⲉ ϩⲱⲱϥ ⲛⲃⲉⲣⲥⲏⲗⲗⲉⲓ ⲡⲅⲁⲗⲁⲇⲓⲧⲏⲥ ⲉⲕⲉⲉⲓⲣⲉ ⲛⲙⲙⲁⲩ ⲛⲟⲩⲛⲁ ⲛⲥⲉϣⲱⲡⲉ ⲉⲩⲟⲩⲱⲙ ⲉⲃⲟⲗ ϩⲛⲧⲉⲕⲧⲣⲁⲡⲉⲍⲁ ϫⲉⲁⲩϭⲱ ⲉⲩⲙⲏⲣ ⲉϩⲟⲩⲛ ⲉⲣⲟⲓ ϩⲓⲛⲁⲓ ⲛⲧⲉⲣⲓⲡⲱⲧ ϩⲁⲡϩⲟ ⲛⲁⲃⲏⲥⲥⲁⲗⲱⲙ ⲡⲉⲕⲥⲟⲛ

8 ⲉⲓⲥ ϩⲏⲏⲧⲉ ⲟⲛ ⲉϥϩⲁϩⲧⲏⲕ ⲛϭⲓⲥⲉⲙⲉⲉⲓ ⲡϣⲏⲣⲉ ⲛⲅⲉⲣⲁ ⲡϣⲏⲣⲉ ⲛⲉⲓⲉⲙⲉⲛⲉⲓ ⲡⲉⲉⲃⲟⲗ ϩⲛⲃⲉⲑⲟⲩⲣⲓⲙ ⲁⲩⲱ ⲛⲧⲟϥ ⲁϥⲥⲁϩⲟⲩ ⲙⲙⲟⲓ ⲛⲟⲩⲥⲁϩⲟⲩ ⲉϥⲛⲁϣⲧ ⲙⲡⲉϩⲟⲟⲩ ⲉⲓⲛⲁⲃⲱⲕ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ ⲁⲩⲱ ⲛⲧⲟϥ ⲁϥⲉⲓ ⲉⲃⲟⲗ ϩⲏⲧ ⲉϫⲙⲡⲓⲟⲣⲇⲁⲛⲏⲥ ⲁⲩⲱ ⲁⲓⲱⲣⲕ ⲛⲁϥ ⲙⲡϫⲟⲉⲓⲥ ⲉⲓϫⲱ ⲙⲙⲟⲥ ϫⲉⲉϣⲱⲡⲉ ⲉⲓⲉⲙⲟⲟⲩⲧⲕ ϩⲛⲟⲩⲥⲏϥⲉ

9 ⲛⲛⲉⲕⲕⲱ ϭⲉ ⲛⲁϥ ⲉⲃⲟⲗ ϩⲓϫⲛⲧⲕ ⲟⲩⲣⲱⲙⲉ ⲛⲧⲟⲕ ⲛⲥⲟⲫⲟⲥ ⲁⲩⲱ ⲉⲕⲉⲉⲓⲙⲉ ⲉⲛⲉⲧⲉⲕⲛⲁⲁⲁⲩ ⲛⲁϥ ⲛⲅϫⲓ ⲛⲧⲉϥⲡⲟⲗⲓⲥ ϩⲛⲟⲩⲥⲛⲟϥ ⲉϩⲣⲁⲓ ⲉⲁⲙⲛⲧⲉ

10 ⲇⲁⲩⲉⲓⲇ ⲇⲉ ⲁϥⲛⲕⲟⲧⲕ ⲙⲛⲛⲉϥⲉⲓⲟⲧⲉ ⲁⲩⲧⲟⲙⲉⲥϥ ϩⲛⲧⲡⲟⲗⲓⲥ ⲛⲇⲁⲩⲉⲓⲇ

11 ⲡⲉϩⲟⲟⲩ ⲛⲧⲁⲇⲁⲩⲉⲓⲇ ⲉⲣⲣⲣⲟ ⲉϫⲙⲡⲓⲥⲣⲁⲏⲗ ϩⲙⲉ ⲛ ⲛⲉ ⲙⲁⲁⲃⲉ ⲛⲣⲟⲙⲡⲉ ⲁϥⲉⲣⲣⲟ ϩⲛⲧϩⲓⲉⲣⲟⲩⲥⲁⲗⲏⲙ

12 ⲥⲟⲗⲟⲙⲱⲛ ⲇⲉ ⲁϥϩⲙⲟⲟⲥ ϩⲓϫⲙⲡⲉⲑⲣⲟⲛⲟⲥ ⲛⲇⲁⲩⲉⲓⲇ ⲡⲉϥⲉⲓⲱⲧ ⲁⲩⲱ ⲧⲉϥⲙⲛⲧⲣⲣⲟ ⲁⲥⲥⲟⲩⲧⲛ ⲉⲙⲁⲧⲉ