Tobit 14 — Coptic (Sahidic)

1 ⲁⲩⲱ ⲁϥⲟⲩⲱ ⲉϥⲉⲝⲟⲙⲟⲗⲟⲅⲉⲓ ⲛϭⲓⲇⲱⲃⲓⲧ

2 ⲛⲉϥϩⲛⲧⲁⲓⲟⲩϣⲙⲏⲛⲉ ⲛⲣⲟⲙⲡⲉ ⲛⲧⲉⲣⲉϥⲗⲟ ⲉϥⲛⲁⲩ ⲉⲃⲟⲗ ⲁⲩⲱ ⲙⲛⲛⲥⲁϣⲙⲟⲩⲛⲉ ⲛⲣⲟⲙⲡⲉ ⲁϥⲛⲁⲩ ⲉⲃⲟⲗ ⲁⲩⲱ ⲛⲉϥⲣⲙⲛⲧⲛⲁ ⲉϥⲟⲩⲱϩ ⲉⲧⲟⲟⲧϥ ⲉⲣⲣϩⲟⲧⲉ ϩⲏⲧϥ ⲙⲡⲛⲟⲩⲧⲉ ⲁⲩⲱ ⲉϥⲉⲝⲟⲙⲟⲗⲟⲅⲉⲓ ⲛⲁϥ

3 ⲁϥⲣϩⲗⲗⲟ ⲉⲙⲁⲧⲉ ⲁⲩⲱ ⲁϥⲙⲟⲩⲧⲉ ⲉⲡⲉϥϣⲏⲣⲉ ⲙⲛⲡⲉϥⲥⲟⲟⲩ ⲛϣⲏⲣⲉ ⲡⲉϫⲁϥ ⲛⲁϥ ϫⲉⲡⲁϣⲏⲣⲉ ϫⲓ ⲛⲛⲉⲕϣⲏⲣⲉ ⲉⲓⲥ ϩⲏⲏⲧⲉ ⲅⲁⲣ ⲁⲓⲣϩⲗⲗⲟ ⲁⲩⲱ ⲁⲓϩⲱⲛ ⲉⲥⲱⲕ ⲉⲃⲟⲗ

4 ⲛⲅⲃⲱⲕ ⲡⲁϣⲏⲣⲉ ⲉⲧⲙⲏⲇⲓⲁ ϫⲉⲁⲓⲡⲉⲓⲑⲉ ⲉϫⲛⲛⲉⲛⲧⲁⲅⲓⲟⲛ ⲡⲉⲡⲣⲟⲫⲏⲧⲏⲥ ⲓⲱⲛⲁⲥ ϫⲟⲟⲩ ⲉⲧⲃⲉⲛⲓⲛⲉⲩⲏ ϫⲉⲥⲉⲛⲁⲧⲁⲕⲟⲥ ⲟⲩⲛ ⲟⲩⲉⲓⲣⲏⲛⲏ ⲇⲉ ⲛⲁϣⲱⲡⲉ ⲛϩⲟⲩⲟ ϩⲛⲧⲙⲏⲇⲓⲁ ϣⲁⲟⲩⲟⲩⲟⲉⲓϣ ⲉⲃⲟⲗ ϫⲉⲛⲉⲛⲥⲛⲏⲩ ⲥⲉⲛⲁϫⲟⲟⲣⲟⲩ ⲉⲃⲟⲗ ϩⲙⲡⲕⲁϩ ⲉⲧⲛⲁⲛⲟⲩϥ ⲁⲩⲱ ⲧϩⲓⲉⲣⲟⲩⲥⲁⲗⲏⲙ ⲛⲁϣⲱϥ ⲁⲩⲱ ⲡⲏⲓ ⲙⲡⲛⲟⲩⲧⲉ ⲥⲉⲛⲁⲣⲟⲕϩϥ ϩⲣⲁⲓ ⲛϩⲏⲧⲥ ⲛⲥⲣϫⲁⲓⲉ ϣⲁⲟⲩⲟⲩⲟⲉⲓϣ

5 ⲁⲩⲱ ⲟⲛ ⲡⲛⲟⲩⲧⲉ ⲣⲁⲛⲁ ⲛⲁⲥ ⲛϥⲕⲟⲧⲟⲩ ⲉϩⲟⲩⲛ ⲉⲣⲟⲥ ⲛϥⲕⲟⲧⲟⲩ ⲉϩⲟⲩⲛ ⲉⲣⲟⲥ ⲛϥⲕⲱⲧ ⲙⲡⲏⲓ ⲛⲧϩⲉ ⲟⲛ ⲛϣⲟⲣⲡ ϣⲁⲛⲧⲉⲡⲟⲩⲟⲉⲓϣ ⲙⲡⲁⲓⲱⲛ ϫⲱⲕ ⲉⲃⲟⲗ ⲁⲩⲱ ⲟⲛ ⲙⲛⲛⲥⲁⲛⲁⲓ ⲥⲉⲛⲁⲕⲟⲧⲟⲩ ⲉⲃⲟⲗ ϩⲛⲛⲉⲭⲙⲁⲗⲱⲥⲓⲁ ⲛⲥⲉⲕⲱⲧ ⲛⲧϩⲓⲉⲣⲟⲩⲥⲁⲗⲏⲙ ϩⲛⲟⲩⲉⲟⲟⲩ ⲁⲩⲱ ⲡⲏⲓ ⲙⲡⲛⲟⲩⲧⲉ ⲥⲉⲛⲁⲕⲟⲧϥ ϩⲣⲁⲓ ⲛϩⲏⲧⲥ ⲉⲛⲅⲉⲛⲉⲁ ⲧⲏⲣⲟⲩ ⲙⲡⲁⲓⲱⲛ ⲛⲟⲩⲕⲱⲧ ⲉϥⲧⲙⲁⲉⲓⲏⲩ ⲕⲁⲧⲁⲧϩⲉ ⲛⲧⲁⲩϣⲁϫⲉ ⲛϩⲏⲧⲥ ⲛϭⲓⲛⲉⲡⲣⲟⲫⲏⲧⲏⲥ

6 ⲁⲩⲱ ⲛϩⲉⲑⲛⲟⲥ ⲧⲏⲣⲟⲩ ⲥⲉⲛⲁⲕⲟⲧⲟⲩ ϩⲛⲟⲩⲙⲉ ⲉⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲡⲛⲟⲩⲧⲉ ⲥⲉⲛⲁⲧⲱⲙⲥ ⲇⲉ ⲛⲛⲉⲩⲉⲓⲇⲱⲗⲟⲛ

7 ⲛⲥⲉⲥⲙⲟⲩ ⲉⲡϫⲟⲉⲓⲥ ⲛϭⲓⲛϩⲉⲑⲛⲟⲥ ⲧⲏⲣⲟⲩ ⲁⲩⲱ ⲡⲉϥⲗⲁⲟⲥ ϥⲛⲁⲉⲝⲟⲙⲟⲗⲟⲅⲉⲓ ⲙⲡⲛⲟⲩⲧⲉ ⲁⲩⲱ ⲡⲉϥⲗⲁⲟⲥ ⲛⲁⲥⲙⲟⲩ ⲉⲡϫⲟⲉⲓⲥ ⲡϫⲟⲉⲓⲥ ⲇⲉ ⲛⲁϫⲓⲥⲉ ⲙⲡⲉϥⲗⲁⲟⲥ ⲛⲥⲉⲣⲁϣⲉ ⲛϭⲓⲟⲩⲟⲛ ⲛⲓⲙ ⲛⲧⲁⲩⲙⲉⲣⲉⲡϫⲟⲉⲓⲥ ⲡⲛⲟⲩⲧⲉ ϩⲛⲟⲩⲙⲉ ⲙⲛⲟⲩⲇⲓⲕⲁⲓⲟⲥⲩⲛⲏ ⲉⲩⲉⲓⲣⲉ ⲙⲡⲛⲉⲩⲙⲁ ⲙⲛⲛⲉⲩⲥⲛⲏⲩ

8 ⲧⲉⲛⲟⲩ ϭⲉ ⲡⲁϣⲏⲣⲉ ⲡⲱⲧ ⲉⲃⲟⲗ ⲛⲛⲓⲛⲉⲩⲏ ϫⲉⲡⲁⲛⲧⲱⲥ ⲥⲉⲛⲁϫⲡⲓ ϣⲱⲡⲉ ⲛϭⲓⲛⲉⲛⲧⲁⲛⲉⲡⲣⲟⲫⲏⲧⲏⲥ ϫⲟⲟⲩ ⲧⲏⲣⲟⲩ

9 ⲛⲧⲟⲕ ⲇⲉ ⲡⲁϣⲏⲣⲉ ϩⲁⲣⲉϩ ⲉⲡⲛⲟⲙⲟⲥ ⲙⲡⲛⲟⲩⲧⲉ ⲙⲛⲛⲉϥⲟⲩⲉϩⲥⲁϩⲛⲉ ⲛⲅϣⲱⲡⲉ ⲛⲛⲁⲏⲧ ⲁⲩⲱ ⲛⲇⲓⲕⲁⲓⲟⲥ ϫⲉⲕⲁⲥ ⲉⲣⲉⲡⲡⲉⲧⲛⲁⲛⲟⲩϥ ϣⲱⲡⲉ ⲙⲙⲟⲕ

10 ⲛⲅⲧⲟⲙⲥⲧ ⲕⲁⲗⲱⲥ ⲁⲩⲱ ⲧⲉⲕⲙⲁⲁⲩ ⲛⲅⲧⲟⲙⲥⲥ ⲛⲙⲙⲁⲓ ⲛⲧⲉⲧⲛⲧⲙⲟⲩⲱϩ ⲉⲧⲟⲟⲧⲧⲏⲩⲧⲛ ⲉϭⲱ ϩⲛⲛⲓⲛⲉⲩⲏ ⲡⲁϣⲏⲣⲉ ⲁⲛⲁⲩ ϫⲉⲛⲧⲁⲁⲇⲁⲣ ⲣⲟⲩ ⲛⲁⲭⲓⲁⲭⲁⲣⲟⲥ ⲡⲉⲛⲧⲁϥⲥⲁⲛⲟⲩϣϥ ⲛⲧϩⲉ ⲛⲧⲁϥⲛⲧϥ ⲉⲃⲟⲗ ϩⲙⲡⲟⲩⲟⲉⲓⲛ ⲉϩⲟⲩⲛ ⲉⲡⲕⲁⲕⲉ ⲁⲩⲱ ⲡⲛⲟⲩⲧⲉ ⲁϥⲧⲟⲩϫⲟ ⲛⲁⲭⲓⲁⲭⲁⲣⲟⲥ ⲡⲏ ⲇⲉ ⲁϥⲧⲱⲱⲃⲉ ⲛⲁϥ ⲛⲟⲩⲧⲱⲱⲃⲉ ⲁⲩⲱ ⲛⲧⲟϥ ⲡⲉⲛⲧⲁϥⲃⲱⲕ ⲉⲡⲉⲥⲏⲧ ⲉⲡⲕⲁⲕⲉ ⲙⲁⲛⲁⲥⲥⲏ ⲁϥⲉⲓⲣⲉ ⲛⲟⲩⲙⲛⲧⲛⲁ ⲁϥⲟⲩϫⲁⲓ ⲉⲧϭⲟⲣϭⲥ ⲙⲡⲙⲟⲩ ⲧⲁⲓ ⲛⲧⲁⲁⲇⲁ ⲥⲙⲛⲧⲥ ⲛⲁϥ ⲁⲇⲁⲥ ⲇⲉ ⲛⲧⲟϥ ⲁϥⲥⲱϩⲡ ⲉϩⲣⲁⲓ ⲉⲧϭⲟⲣϭⲥ ⲁⲩⲱ ⲁϥⲙⲟⲩ

11 ⲧⲉⲛⲟⲩ ϭⲉ ⲛⲁϣⲏⲣⲉ ϯϩⲧⲏⲧⲛ ϫⲉϣⲁⲣⲉⲧⲙⲛⲧⲛⲁ ⲣⲟⲩ ⲁⲩⲱ ⲧⲇⲓⲕⲁⲓⲟⲥⲩⲛⲏ ϫⲉϣⲁⲥⲛⲉϩⲙⲛⲓⲙ ⲛⲉⲓϣⲁϫⲉ ⲇⲉ ⲉϥϫⲱ ⲙⲙⲟⲟⲩ ⲁϥϯ ⲙⲡⲉⲡⲛⲉⲩⲙⲁ ϩⲓϫⲙⲡⲉϥⲙⲁⲛⲛⲕⲟⲧⲕ ⲛⲉϥϩⲛϣⲉ ⲧⲁⲓⲟⲩϣⲙⲏⲛⲉ ⲛⲣⲟⲙⲡⲉ ⲁⲩⲱ ⲁⲩⲧⲟⲙⲥϥ ϩⲛⲟⲩⲧⲙⲁⲓⲟ

12 ⲛⲧⲉⲣⲉⲥⲙⲟⲩ ⲇⲉ ϩⲱⲱⲥ ⲛϭⲓⲁⲛⲛⲁ ⲁϥⲧⲟⲙⲥⲥ ϩⲁϩⲧⲙ ⲡⲉϥⲉⲓⲱⲧ ⲁϥⲃⲱⲕ ⲇⲉ ⲛϭⲓⲧⲱⲃⲓⲁⲥ ⲙⲛⲧⲉϥⲥϩⲓⲙⲉ ⲙⲛⲛⲉϥϣⲏⲣⲉ ⲉϩⲣⲁⲓ ⲉⲉⲕⲃⲁⲧⲁⲛⲟⲥ ⲉⲣⲁⲧϥ ⲛϩⲣⲁⲅⲟⲩⲏⲗ ⲡⲉϥϣⲟⲙ

13 ⲁϥⲁⲗⲉ ⲉϩⲣⲁⲓ ϩⲛⲛⲉϥϩⲟⲟⲩ ϩⲛⲟⲩⲙⲛⲧϩⲗⲗⲟ ⲉⲛⲁⲛⲟⲩⲥ ⲛⲉϥϣⲙⲟⲩⲓ ⲇⲉ ⲁⲩⲧⲟⲙⲥⲟⲩ ϩⲛⲟⲩⲧⲓⲙⲏ ⲁⲩⲱ ⲁϥⲕⲗⲏⲣⲟⲛⲟⲙⲉⲓ ⲛⲧⲉⲩⲟⲩⲥⲓⲁ ⲙⲛⲧⲁⲧⲱⲃⲓⲇ ⲡⲉϥⲉⲓⲱⲧ

14 ⲁⲩⲱ ⲁϥⲙⲟⲩ ϩⲱⲱϥ ⲛϭⲓⲧⲱⲃⲓⲁⲥ ⲉϥϩⲛϣⲉ ⲥⲁϣϥⲉ ⲛⲣⲟⲙⲡⲉ ϩⲛⲉⲕⲃⲁⲧⲁⲛⲟⲥ ⲛⲧⲉⲧⲙⲏⲇⲓⲁ

15 ⲁϥⲥⲱⲧⲙ ⲇⲉ ⲙⲡⲁⲧϥⲙⲟⲩ ⲉⲡⲧⲁⲕⲟ ⲛⲛⲓⲛⲉⲩⲏ ⲧⲁⲓ ⲛⲧⲁϥⲁⲓⲭⲙⲁⲗⲱⲧⲓⲍⲉ ⲙⲙⲟⲥ ⲛϭⲓⲛⲁⲃⲟⲩⲭⲟⲇⲟⲛⲟⲥⲟⲣ ⲙⲛⲁⲥⲩⲏⲣⲟⲥ ⲁⲩⲃⲱⲕ ⲉⲣⲱⲥ ⲛⲛⲓⲛⲉⲩⲏ