Read Tobit 14 side by side with translations · The Final Bible
1 ܘܫܠܝ ܡܢ ܕܠܡܘܕܝܘ ܛܘܒܝܛ
2 ܘܐܝܬܘܗܝ ܗܘܐ ܒܪ ܫ̈ܢܝܐ ܚܡܫܝܢ ܘܬܡܢܐ̣ ܟܕ ܐܘܒܕ ܚܙܝܐ ܘܒܬܪ ܫ̈ܢܝܐ ܬܡܢܐ ܚ̣ܙܐ ܘܥ̇ܒܕ ܗܘܐ ܡܪ̈ܚܡܢܘܬܐ̣ ܘܐܘܣܦ ܠܡܕܚܠ ܠܡܪܝܐ ܐܠܗܐ ܘܡܘܕܐ ܗܘܐ ܠܗ
3 ܪܘܪܒܐܝܬ ܕܝܢ ܣܐܒ̣ ܘܩܪܐ ܠܒܪܐ ܕܝܠܗ̣ ܘܐܡܪ ܠܗ ܒܪܝ̣ ܗܐ ܣܐܒܬ ܘܠܘܬ ܗ̇ܝ ܕܐܚܙܘܩ ܡܢ ܚܝ̈ܐ ܐ̇ܝܬܝ ܣܒ ܠܒܢ̈ܝܐ ܕܝܠܟ̣
4 ܘܙܠ ܠܡܕܝ̣ ܒܪܝ ܡܛܠ ܕܡܦܣ ܐܢܐ ܒܟܠܗܝܢ ܗܢܝܢ ܕܡܠܠ ܝܘܢܢ ܗ̇ܘ ܢܒܝܐ ܡܛܠ ܢܝܢܘܐ ܡܛܠ ܕܡܬܗܦܟܐ ܒܡܕܝ ܕܝܢ ܢܗܘܐ ܐܝܬ ܫܝܢܐ ܡܠܘܢ ܥܕܡܐ ܠܙܒܢܐ ܘܕܐܚ̈ܐ ܕܝܠܢ̣ ܒܐܪ̈ܥܬܐ ܢܬܒܕܪܘܢ ܡܢ ܐܪܥܐ ܛܒܬܐ ܘܐܘܪܫܠܡ ܬܗܘܐ ܚܪܒܬܐ̣ ܘܗܝܟܠܐ ܕܐܠܗܐ ܕܒܗ̇ ܢܐܩܕ̣ ܘܚܪܒܐ ܢܗܘܐ ܥܕܡܐ ܠܙܒܢܐ
5 ܘܬܘܒ ܢܪܚܡ ܥܠܝܗܘܢ ܐܠܗܐ̣ ܘܢܗܦܟ ܐܢܘܢ ܠܐܪܥܐ ܘܢܒܢܘܢܝܗܝ ܠܒܝܬܐ̣ ܠܘ ܐܝܟ ܗ̇ܘ ܩܕܡܝܐ ܥܕܡܐ ܕܢܬܡܠܘܢ ܙܒ̈ܢܐ ܕܥܠܡܐ ܘܒܬܪ ܗܠܝܢ ܢܗܦܟܘܢ ܡܢ ܫ̈ܒܝܐ̣ ܘܢܒܢܘܢ ܠܐܘܪܫܠܡ ܡܝܩܪܐܝܬ ܘܒܝܬܗ ܕܐܠܗܐ ܒܗ̇ ܢܬܒ̣ܢܐ ܠܟܠܗܘܢ ܕܪ̈ܐ ܕܥܠܡܐ ܒܒܢܝܢܐ ܡܫܒܚܐ̣ ܐܝܟܢܐ ܕܡܠܠܘ ܡܛܠܬܗ̇ ܢܒܝ̈ܐ
6 ܘܟܠܗܘܢ ܥܡ̈ܡܐ ܢܬܦ̇ܢܘܢ ܫܪܝܪܐܝܬ ܠܡܕܚܠ ܠܡܪܝܐ ܐܠܗܐ ܢܛܡܪܘܢ ܓܝܪ ܠܦܬܟܪ̈ܐ ܕܝܠܗܘܢ̣
7 ܘܢܒܪܟܘܢ ܟܠܗܘܢ ܥܡ̈ܡܐ ܠܡܪܝܐ ܘܥܡܐ ܢܘܕܐ ܠܐܠܗܐ ܘܢܪܡܪܡ ܡܪܝܐ ܠܥܡܐ ܕܝܠܗ̣ ܘܢܚܕܘܢ ܟܠܗܘܢ ܗ̇ܢܘܢ ܕܡܚܒܝܢ ܠܡܪܝܐ ܐܠܗܐ̇ ܒܫܪܪܐ ܘܒܙܕܝܩܘܬܐ ܟܕ ܥ̇ܒܕܝܢ ܪ̈ܚ̣ܡܐ ܠܐܚ̈ܐ ܕܝܠܗܘܢ
8 ܘܗܫܐ ܒܪܝ̣ ܙܠ ܡܢ ܢܝܢܘܐ̣ ܡܛܠ ܕܡܢ ܟܠ ܦܪܘܣ ܢܗܘܝܢ ܗܠܝܢ ܕܡܠܠ ܗ̇ܘ ܢܒܝܐ
9 ܐܢܬ ܕܝܢ ܛܪ ܠܢܡܘܣܐ ܘܠܦܘܩܕ̈ܢܐ̣ ܘܗ̣ܘܝ ܪܚ̇ܡ ܪ̈ܚ̇ܡܐ̣ ܘܙܕܝܩܐ ܐܝܟܢܐ ܕܫܦܝܪ ܠܟ ܢܗܘܐ
10 ܘܩܒܘܪܝܢܝ ܛܒܐܝܬ̣ ܘܠܐܡܐ ܕܝܠܟ ܥܡܝ ܘܠܐ ܬܘܒ ܬܥܡܪܘܢ ܒܢܝܢܘܐ ܒܪܝ ܚܙܝ ܡܢܐ ܥܒ̣ܕ ܐܕܡ̇ ܠܐܚܝܚܘܪ ܗ̇ܘ ܕܪܒܝܗ̇ ܟܕ ܡܢ ܢܘܗܪܐ ܐܝܬܝܗ ܠܚܫܘܟܐ̇ ܘܟܠܗܝܢ ܗܠܝܢ ܕܦܪܥܗ ܘܠܐܚܝܚܘܪ ܡ̇ܢ ܫܘܙܒ̣ ܠܗ̇ܘ ܕܝܢ ܦܘܪܥܢܐ ܐܬܦ̇ܢܝ̣ ܘܗ̣ܘ ܢܚ̣ܬ ܠܚܫܘܟܐ ܡܢ̣ܫܐ ܥܒ̣ܕ ܡܪܚܡܢܘܬܐ̣ ܘܐܫܬܘܙܒ ܡܢ ܦܚܐ ܕܡܘܬܐ̇ ܗ̇ܘ ܕܩܒ̣ܥ ܗ̣ܘ ܠܗ ܐܕܡ ܕܝܢ ܢܦ̣ܠ ܒܦܚܐ ܘܐܒܕ
11 ܘܗܫܐ ܒܢ̈ܝ̣ ܚܙܘ ܡܢܐ ܡܪܚܡܢܘܬܐ ܥ̇ܒܕܐ̣ ܘܡܢܐ ܙܕܝܩܘܬܐ ܡܦܨܝܐ ܘܟܕ ܗܠܝܢ ܗ̣ܘ ܐܡ̇ܪ ܗ̣ܘܐ̣ ܐܘܦܝܬ ܢܦܫܐ ܕܝܠܗ ܥܠ ܥܪܣܐ ܐܝܬܘܗܝ ܗܘܐ ܕܝܢ ܒܪ ܫ̈ܢܝܐ̇ ܡܐܐ̇ ܘܚܡܫܝܢ ܘܬܡܢܐ ܘܩܒܪܗ ܒܪܗ ܡܫܒܚܐܝܬ
12 ܘܟܕ ܡܝܬܬ ܚܢܢܐ̣ ܩܒܪܗ̇ ܥܡ ܐܒܐ ܕܝܠܗ ܐܙܠ ܕܝܢ ܛܘܒܝܐ ܥܡ ܐܢܬܬܐ ܕܝܠܗ ܘܒܢ̈ܝܐ ܠܐܩܒܐܛܢܐ ܠܘܬ ܪܥܘܐܝܠ ܚܡ̣ܐ ܕܝܠܗ̣
13 ܘܣܐܒ ܡܝܩܪܐܝܬ ܘܩܒ̣ܪ ܠܚܡ̈ܗܐ ܕܝܠܗ ܡܫܒܚܐܝܬ̣ ܘܝܪܬ ܠܐܘܣܝܐ ܕܝܠܗܘܢ̣ ܘܕܛܘܒܝܛ ܐܒܐ ܕܝܠܗ
14 ܘܡܝܬ ܒܪ ܫ̈ܢܝܐ ܡܐܐ ܘܫܒܥ̇ ܒܐܩܒܐܛܢܐ ܕܡܕܝ
15 ܘܫܡܥ ܩܕܡ ܕܢܡܘܬ ܠܐܒܕܢܐ ܕܢܝܢܘܐ̇ ܠܗ̇ܝ ܕܫܒܗ̇ ܗ̣ܘܐ ܢܒܘܟܕܢܨܪ ܘܐܚܫܝܪܫ ܘܚܕܝ ܗܘܐ ܩܕܡ ܕܢܡܘܬ ܥܠ ܢܝܢܘܐ ܫܠܡ ܟܬܒܐ ܕܛܘܒܝܛ ܐܝܟ ܡܫܠܡܢܘܬܐ ܕܫܒܥܝܢ ܐܣ̈ܛܘܟܣܐ ܫܒ̈ܥܡܐܐ
Tobit 13 · Greek (Septuagint / SBLGNT) · Latin (Vulgate) · Coptic (Sahidic)