Read Sirach 8 side by side with translations · The Final Bible
1 ⲙⲡⲣⲙⲓϣⲉ ⲙⲛⲟⲩⲣⲱⲙⲉ ⲛϫⲱⲱⲣⲉ ⲙⲏⲡⲟⲧⲉ ⲛⲅⲉⲓ ⲉⲧⲟⲟⲧϥ
2 ⲙⲡⲣϯⲧⲱⲛ ⲙⲛⲟⲩⲣⲙⲙⲁⲟ ⲙⲏⲡⲟⲧⲉ ⲛϥϣⲓⲛⲟⲩⲃ ⲉϩⲣⲁⲓ ⲟⲩⲃⲏⲕ ⲁⲡⲛⲟⲩⲃ ⲅⲁⲣ ⲧⲁⲕⲉϩⲁϩ ⲁⲩⲱ ⲁϥⲣⲓⲕⲉ ⲙⲡϩⲏⲧ ⲛⲛⲉⲣⲣⲱⲟⲩ
3 ⲙⲡⲣⲙⲓϣⲉ ⲙⲛⲟⲩⲣⲱⲙⲉ ⲛϫⲁⲥⲧⲥⲙⲏ ⲁⲩⲱ ⲙⲡⲣⲧⲁⲗⲉϣⲉ ⲉϩⲣⲁⲓ ⲉϫⲙⲡⲉϥⲕⲱϩⲧ
4 ⲙⲡⲣⲥⲱⲃⲉ ⲙⲛⲟⲩⲁⲧⲥⲃⲱ ϫⲉⲛⲛⲉⲩⲥⲱϣ ⲛⲛⲉⲕⲉⲓⲟⲧⲉ
5 ⲙⲡⲣⲛⲟϭⲛⲉϭ ⲛⲟⲩⲣⲱⲙⲉ ⲉⲁϥⲥⲁϩⲱϥ ⲉⲃⲟⲗ ⲙⲡⲛⲟⲃⲉ ⲁⲣⲓⲡⲙⲉⲉⲩⲉ ϫⲉⲧⲛϩⲛ ϩⲉⲛⲧϭⲁⲓⲟ ⲧⲏⲣⲛ
6 ⲙⲡⲣⲥⲉϣⲟⲩⲣⲱⲙⲉ ϩⲛⲧⲉϥⲙⲛⲧϩⲗⲗⲟ ⲉⲩⲣϩⲗⲗⲟ ⲅⲁⲣ ⲛϩⲏⲧⲛ
7 ⲙⲡⲣⲣⲁϣⲉ ⲉϫⲛⲟⲩⲁ ⲉⲁϥⲙⲟⲩ ⲁⲣⲓⲡⲙⲉⲉⲩⲉ ϫⲉⲧⲛⲛⲁⲙⲟⲩ ⲧⲏⲣⲛ
8 ⲙⲡⲣⲟⲃϣⲕ ⲉⲡϣⲁϫⲉ ⲛⲛⲥⲟⲫⲟⲥ ⲉⲕⲉⲙⲟⲟϣⲉ ⲇⲉ ϩⲛⲛⲉⲩⲡⲁⲣϩⲟⲓⲙⲓⲁ ϫⲉⲉⲕⲛⲁⲥⲁⲃⲟ ⲉⲧⲉⲥⲃⲱ ⲉⲃⲟⲗ ϩⲓⲧⲟⲟⲧⲟⲩ ⲁⲩⲱ ⲧϭⲓⲛϣⲙϣⲉ ⲛⲛⲟϭ
9 ⲙⲡⲣⲕⲱ ⲛⲥⲱⲕ ⲛⲛϣⲁϫⲉ ⲛⲛϩⲗⲗⲟ ⲛⲧⲁⲩⲥⲁⲃⲟ ϩⲱⲟⲩ ⲉⲣⲟⲟⲩ ϩⲓⲧⲛⲛⲉⲩⲉⲓⲟⲧⲉ ϫⲉⲉⲕⲛⲁⲥⲃⲟ ⲉⲧⲙⲛⲧⲣⲙⲛϩⲏⲧ ⲉⲃⲟⲗ ϩⲓⲧⲟⲟⲧⲟⲩ ⲁⲩⲱ ϩⲙⲡⲉⲟⲩⲟⲉⲓϣ ⲛⲧⲭⲣⲉⲓⲁ ⲛ.........
10 ⲙⲡⲣⲧⲙϩⲉⲛϫⲃⲃⲉⲥ ⲙⲡⲣⲉϥⲣⲛⲟⲃⲉ ⲙⲏⲡⲟⲧⲉ ⲛⲅⲣⲱⲕϩ ϩⲙⲡⲕⲱϩⲧ ⲙⲡⲉϥϣⲁϩ
11 ⲙⲡⲣⲧⲱⲛⲕ ϩⲁⲧϩⲏ ⲛⲟⲩⲣⲉϥⲣⲛⲟⲃⲉ ϫⲉⲕⲁⲁⲥ ⲛⲛⲉϥϩⲙⲟⲟⲥ ⲛⲧϩⲉ ⲛⲟⲩϭⲟⲣϭⲥ ϩⲓⲣⲱⲕ
12 ⲙⲡⲣϯ ⲉⲙⲏⲥⲉ ⲙⲡϫⲱⲱⲣⲉ ⲉⲣⲟⲕ ⲕⲁⲛ ⲉⲕϣⲁⲛϯ ϣⲱⲡⲉ ⲛⲧϩⲉ ⲙⲡⲉⲛⲧⲁϥⲥⲟⲣⲙⲟⲩ
13 ⲙⲡⲣϣⲡⲧⲱⲣⲉ ⲡⲁⲣⲁⲧⲉⲕϭⲟⲙ ⲁⲩⲱ ⲉⲕϣⲁⲛϣⲡⲧⲱⲣⲉ ϥⲓⲡⲣⲟⲟⲩϣ ⲛⲧⲁⲁⲩ
14 ⲙⲡⲣϫⲓϩⲁⲡ ⲙⲛⲟⲩⲣⲉϥϯϩⲁⲡ ⲉⲩⲛⲁⲕⲣⲓⲛⲉ ⲅⲁⲣ ⲙⲙⲟϥ ⲕⲁⲧⲁⲡⲉϥⲉⲟⲟⲩ
15 ⲙⲡⲣⲙⲟⲟϣⲉ ϩⲓϩⲓⲏ ⲙⲛⲧⲟⲗⲙⲏⲣⲟⲥ ϫⲉⲕⲁⲥ ⲛⲛⲉϥⲧⲱⲟⲩⲛ ⲉϫⲱⲕ ⲛⲧⲟϥ ⲅⲁⲣ ⲉϥⲙⲟⲟϣⲉ ⲕⲁⲧⲁⲡⲉϥⲟⲩⲱϣ ⲁⲩⲱ ⲕⲛⲁⲧⲁⲕⲟ ⲡⲉ ϩⲛⲧⲉⲕⲙⲛⲧⲁⲧϩⲏⲧ
16 ⲙⲡⲣⲙⲓϣⲉ ⲙⲛⲟⲩⲣⲉϥϭⲱⲛⲧ ⲁⲩⲱ ⲙⲡⲣⲙⲟⲟϣⲉ ⲛⲙⲙⲁϥ ϩⲓⲡϫⲁⲓⲉ ⲟⲩⲗⲁⲁⲩ ⲅⲁⲣ ⲡⲉ ⲡⲉⲕⲥⲛⲟϥ ⲛⲛⲁϩⲣⲁϥ ⲁⲩⲱ ϥⲛⲁⲧⲁⲩⲟⲕ ⲉϩⲣⲁⲓ ⲉⲡⲙⲁ ⲉⲧⲉⲙⲛⲃⲟⲏⲑⲓⲁ
17 ⲙⲡⲣϣⲟϫⲛⲉ ⲙⲛⲟⲩⲥⲟϭ ⲙⲛϣϭⲟⲙ ⲙⲙⲟⲟⲩ ⲉⲁⲙⲁϩⲧⲉ ⲛⲛϣⲁϫⲉ
18 ⲙⲡⲣⲣϩⲱⲃ ⲉϥϩⲏⲡ ⲙⲡⲉⲙⲧⲟ ⲉⲃⲟⲗ ⲛⲟⲩϣⲙⲙⲟ ⲛⲅⲥⲟⲟⲩⲛ ⲅⲁⲣ ⲁⲛ ϫⲉⲉⲕⲛⲁⲣⲟⲩ
19 ⲙⲡⲣⲟⲩⲉⲛϩⲡⲉⲕϩⲏⲧ ⲉⲣⲱⲙⲉ ⲛⲓⲙ ⲁⲩⲱ ⲙⲡⲣⲧⲁⲗⲉϩⲙⲟⲧ ⲉⲣⲟⲕ
Sirach 7 · Sirach 9 · Greek (Septuagint / SBLGNT) · Aramaic (Peshitta) · Latin (Vulgate)