Read Sirach 29 side by side with translations · The Final Bible
1 ⲡⲉⲧⲉⲓⲣⲉ ⲛⲟⲩⲛⲁ ϥⲛⲁϫⲓⲙⲏⲥⲉ ⲙⲡⲉⲧϩⲓⲧⲟⲩⲱϥ ⲁⲩⲱ ⲡⲉⲧⲥⲟⲟⲩⲧⲛ ⲛⲧⲟⲟⲧϥ ⲉⲃⲟⲗ ⲉϥⲁⲣⲉϩ ⲉⲛⲉⲛⲧⲟⲗⲏ
2 ϯ ⲙⲡⲉⲧϩⲓⲧⲟⲩⲱⲕ ⲙⲡⲉⲟⲩⲟⲉⲓϣ ⲉⲧϥⲣⲭⲣⲉⲓⲁ ⲁⲩⲱ ⲟⲛ ⲛⲅϯ ⲙⲡⲉⲧϩⲓⲧⲟⲩⲱⲕ ⲙⲡⲉϥⲧⲉ
3 ⲙⲁⲧⲁϫⲣⲉⲡϣⲁϫⲉ ⲛⲅⲧⲁⲛϩⲟⲩⲧⲕ ⲛⲙⲙⲁϥ ⲁⲩⲱ ⲕⲛⲁϩⲉ ⲉⲧⲉⲭⲣⲉⲓⲁ ⲛⲟⲩⲟⲉⲓϣ ⲛⲓⲙ
4 ⲉⲣⲉϩⲁϩ ⲙⲉⲉⲩⲉ ϫⲉⲟⲩϩⲏⲩ ⲡⲉ ⲡϫⲓⲙⲏⲥⲉ ⲁⲩⲱ ⲁⲩϯϩⲓⲥⲉ ⲛⲛⲉⲛⲧⲁⲩⲃⲟⲏⲑⲉⲓ ⲛⲁⲩ
5 ϣⲁϥϯⲡⲓ ⲉⲛⲉϥϭⲓϫ ϣⲁⲛⲧϥϫⲓ ⲛϥⲑⲃⲃⲓⲉⲧⲉϥⲥⲙⲏ ϩⲓⲛⲉⲭⲣⲏⲙⲁ ⲙⲡⲉⲧϩⲓⲧⲟⲩⲱϥ ϩⲙⲡⲉⲟⲩⲟⲉⲓϣ ⲛⲧⲁⲁⲩ ϣⲁϥⲧⲁⲗⲉⲛⲉ ⲉϩⲣⲁⲓ ⲛϥϫⲱ ⲛϩⲉⲛϣⲁϫⲉ ⲡⲙⲕⲁϩ ⲛϩⲏⲧ ⲁⲩⲱ ⲛϥϭⲛⲁⲣⲓⲕⲉ ⲉⲡⲉⲟⲩⲟⲉⲓϣ
6 ⲉϥϣⲁⲛϭⲙϭⲟⲙ ⲙⲟⲅⲓⲥ ϣⲁϥϫⲓⲧⲡⲁϣⲉ ⲛϥⲙⲉⲉⲩⲉ ϫⲉⲟⲩϩⲏⲩ ⲡⲉ ⲉϣⲱⲡⲉ ⲙⲙⲟⲛ ϣⲁϥϩⲟⲩⲣⲱⲱϥ ⲛⲛⲉϥⲭⲣⲏⲙⲁ ⲛϥⲕⲁⲁϥ ⲛⲁϥ ⲛϫⲁϫⲉ ⲛϫⲓⲛϫⲏ ϥϯ ⲛⲁϥ ⲛϩⲉⲛⲥⲁϩⲟⲩ ⲙⲛϩⲉⲛϩⲟⲟⲩϣ ⲁⲩⲱ ⲉⲡⲙⲁ ⲛⲟⲩⲉⲟⲟⲩ ϣⲁϥϯ ⲛⲁϥ ⲛⲟⲩⲥⲱϣ
7 ⲁϩⲁϩ ⲕⲧⲟⲟⲩ ⲉⲃⲟⲗ ⲉⲧⲃⲉⲧⲡⲟⲛⲏⲣⲓⲁ ⲁⲛ ⲁⲩⲣϩⲟⲧⲉ ⲉⲧⲣⲉⲩϥⲟϭⲟⲩ ⲛϫⲓⲛϫⲏ
8 ⲡⲗⲏⲛ ⲁⲣⲓϩⲁⲣϣϩⲏⲧ ⲉϫⲙⲡⲉⲧⲑⲃⲃⲓⲏⲩ ⲁⲩⲱ ⲙⲡⲣⲟⲃϣⲕ ⲉⲣⲟϥ ⲉⲩⲙⲛⲧⲛⲁ
9 ϣⲱⲡ ⲉⲣⲟⲕ ⲙⲫⲏⲕⲉ ⲉⲧⲃⲉⲧⲉⲛⲧⲟⲗⲏ ⲁⲩⲱ ⲕⲁⲧⲁⲡⲉϥϭⲣⲱϩ ⲙⲡⲣⲕⲧⲟϥ ⲉⲃⲟⲗ ⲉϥϣⲟⲩⲉⲓⲧ
10 ⲛⲉϫϩⲟⲙⲛⲧ ⲉⲃⲟⲗ ⲉⲧⲃⲉⲥⲟⲛ ϩⲓϣⲃⲏⲣ ⲛⲅⲧⲙⲧⲣⲉⲩⲣϣⲏⲃⲉ ϩⲁⲡⲱⲛⲉ ⲉⲡⲧⲁⲕⲟ
11 ⲕⲁⲡⲉⲕⲁϩⲟ ⲕⲁⲧⲁⲛⲉⲛⲧⲟⲗⲏ ⲙⲡⲉⲧϫⲟⲥⲉ ⲁⲩⲱ ⲥⲉⲛⲁⲣⲛⲟϥⲣⲉ ⲛⲁⲕ ⲉϩⲟⲩⲟ ⲉⲡⲛⲟⲩⲃ
12 ⲥⲉⲩϩⲛⲉⲕⲙⲛⲧⲛⲁ ⲉϩⲟⲩⲛ ⲉⲛⲉⲕⲧⲁⲙⲉⲓⲟⲛ ⲁⲩⲱ ⲥⲉⲛⲁⲧⲟⲩϫⲟⲕ ϩⲛϩⲓⲥⲉ ⲛⲓⲙ
13 ⲉϩⲟⲩⲟ ⲉⲡⲧⲁϫⲣⲟ ⲛⲟⲩϭⲗ ⲙⲛⲧϭⲟⲙ ⲛⲟⲩⲙⲉⲣⲉϩ ⲁⲩⲱ ⲥⲉⲛⲁⲙⲓϣⲉ ⲉϫⲱⲕ ⲙⲡⲉⲙⲧⲟ ⲉⲃⲟⲗ ⲙⲡϫⲁϫⲉ
14 ϣⲁⲣⲉⲟⲩⲣⲱⲙⲉ ⲛⲁⲅⲁⲑⲟⲥ ϣⲡⲧⲱⲣⲉ ⲙⲡⲉⲧϩⲓⲧⲟⲩⲱϥ ϣⲁⲣⲉⲡⲁⲧϣⲓⲡⲉ ⲇⲉ ⲛⲧⲟϥ ⲕⲁⲁϥ ⲛⲥⲱϥ
15 ⲙⲡⲣⲣⲡⲱⲃϣ ⲛⲛⲉⲭⲁⲣⲓⲥ ⲛⲟⲩϣⲡⲧⲱⲣⲉ ⲁϥϯⲧⲉϥⲯⲩⲭⲏ ⲅⲁⲣ ϩⲁⲣⲟⲕ
16 ϣⲁⲣⲉⲡⲣⲉϥⲣⲛⲟⲃⲉ ⲣⲡⲱⲃϣ ⲛⲛⲁⲛⲟⲩ ⲛⲟⲩϣⲡⲧⲱⲣⲉ
17 ⲁⲩⲱ ϣⲁⲣⲉⲡⲁⲧϩⲙⲟⲧ ϩⲙⲡⲉϥϩⲏⲧ ⲕⲱ ⲛⲥⲱϥ ⲙⲡⲉⲧⲁϥⲛⲁϩⲙⲉϥ
18 ⲁϣⲡⲧⲱⲣⲉ ⲧⲁⲕⲉⲟⲩⲙⲏⲏϣⲉ ⲉⲩⲥⲟⲩⲧⲱⲛ ⲁⲩⲱ ⲁϥⲕⲓⲙ ⲉⲣⲟⲟⲩ ⲛⲧϩⲉ ⲛⲟⲩϩⲟⲉⲓⲙ ⲛⲧⲑⲁⲗⲁⲥⲥⲁ ⲁϥⲡⲱⲱⲛⲉ ⲉⲃⲟⲗ ⲛϩⲉⲛⲣⲱⲙⲉ ⲛⲇⲩⲛⲁⲧⲟⲥ ⲁⲩⲱ ⲁⲩⲡⲗⲁⲛⲁ ϩⲛϩⲉⲛϩⲉⲑⲛⲟⲥ ⲉⲛⲛⲟⲩⲟⲩ ⲁⲛ ⲡⲉ
19 ⲡⲣⲉϥⲣⲛⲟⲃⲉ ⲉϥⲉϩⲉ ⲉⲩⲙⲛⲧⲣⲉϥϣⲡⲧⲱⲣⲉ ⲁⲩⲱ ⲡⲉⲧⲡⲏⲧ ⲛⲥⲁϩⲉⲛⲉⲣⲅⲟⲗⲁⲃⲓⲁ ⲙⲁⲣⲉϥϩⲉ ⲉⲩϫⲓϩⲁⲡ
20 ϣⲱⲡ ⲉⲣⲟⲕ ⲙⲡⲉⲧϩⲓⲧⲟⲩⲱⲕ ⲕⲁⲧⲁⲧⲉⲕϭⲟⲙ ⲁⲩⲱ ϯϩⲧⲏⲕ ⲉⲣⲟⲕ ⲙⲏⲡⲟⲧⲉ ⲛⲅϩⲉ
21 ⲧⲁⲣⲭⲏ ⲛⲧϭⲓⲛⲱⲛϩ ⲡⲉ ⲟⲩⲟⲉⲓⲕ ⲙⲛⲟⲩⲙⲟⲟⲩ ⲙⲛⲟⲩϣⲧⲏⲛ ⲙⲛⲟⲩⲏⲓ ⲉϥϩⲱⲃⲥ ⲙⲡϣⲓⲡⲉ
22 ⲛⲁⲛⲟⲩ ⲧϭⲓⲛⲱⲛϩ ⲛⲟⲩϩⲏⲕⲉ ⲉϥⲟⲩⲏϩ ϩⲁⲧⲟⲩⲉϩⲥⲟⲓ ⲙⲡⲉϥⲏⲓ ⲉϩⲟⲩⲉ ϩⲛⲛⲟϭ ⲛϭⲓⲛⲟⲩⲱⲙ ϩⲛⲟⲩⲏⲓ ⲉⲙⲡⲱⲕ ⲁⲛ ⲡⲉ
23 ϣⲱⲡⲉ ⲉⲕⲧⲏⲕ ⲛϩⲏⲧ ⲉϫⲛⲡⲉⲧⲉⲟⲩⲛⲧⲁⲕϥ
24 ⲟⲩϭⲓⲛⲱⲛϩ ⲉⲥϩⲟⲟⲩ ⲡⲉ ⲡⲱⲛⲉ ⲉⲃⲟⲗ ϩⲛⲟⲩⲏⲓ ⲉⲟⲩⲏⲓ ⲁⲩⲱ ⲛⲛⲉϥⲉϣⲟⲩⲱⲛ ⲛⲣⲱϥ ϩⲙⲡⲉϥⲙⲁ ⲛϣⲱⲡⲉ
25 ϣⲁϥϯⲧⲁⲉⲓⲟ ⲁⲩⲱ ⲛϥⲧⲥⲉⲓⲟ ......ϣⲡϩⲙⲟⲧ ⲁⲩⲱ ⲙⲛⲛⲥⲁⲛⲁⲓ ϣⲁϥⲥⲱⲧⲙ ⲉϩⲉⲛϣⲁϫⲉ ⲉⲩⲛⲁϣⲧ
26 ϫⲉⲁⲙⲟⲩ ⲡⲣⲙⲛϣϭⲟⲣ ⲙⲁⲧⲁⲙⲓⲉⲟⲩⲧⲣⲁⲡⲉⲍⲁ ⲁⲩⲱ ⲙⲁⲧⲙⲙⲟⲓ ⲙⲡⲉⲧⲉⲟⲩⲛⲧⲁⲕϥ
27 ⲃⲱⲕ ⲉⲃⲟⲗ ⲡⲣⲙⲛϣϭⲟⲣ ϩⲁⲧϩⲏ ⲙⲡⲁⲓ ⲉⲧⲧⲁⲉⲓⲏⲩ ⲁⲡⲁⲥⲟⲛ ϭⲟⲉⲓⲗⲉ ⲉⲣⲟⲓ ϯⲣⲭⲣⲉⲓⲁ ⲙⲡⲁⲏⲓ
28 ⲛⲁⲓ ϩⲟⲣϣ ⲛⲛⲁϩⲣⲛⲟⲩⲣⲱⲙⲉ ⲛⲥⲁⲃⲉ ⲧⲉⲡⲓⲧⲓⲙⲓⲁ ⲛⲟⲩⲏⲓ ⲙⲛⲡⲛⲟϭⲛⲉϭ ⲛⲟⲩⲇⲁⲛⲓⲥⲧⲏⲥ
Sirach 28 · Sirach 30 · Greek (Septuagint / SBLGNT) · Aramaic (Peshitta) · Latin (Vulgate)