Read Sirach 28 side by side with translations · The Final Bible
1 ܘܦܘܪܥܢܐ ܡܢ ܩܕܡ ܐܠܗܐ ܢܫܟܚ ܡܛܠ ܕܟܠ ܚܛܗ̈ܘܗܝ ܡܛܪ ܢܛܝܪܝܢ ܠܗ
2 ܫܒܘܩ ܡܐ ܕܒܠܒܟ ܘܒܬܪܟܢ ܨ̇ܠܐ ܘܟܠ ܚܛܗ̈ܝܟ ܢܫܬܒܩܘܢ ܠܟ
3 ܒܪܢܫܐ ܠܒܪ ܐܢܫܐ ܢ̇ܛܪ ܪܘܓܙܐ ܡܢ ܩܕܡ ܐܠܗܐ ܡܢܐ ܒ̇ܥܐ ܐܣܝܘܬܐ
5 ܗ̇ܘ ܕܒܪܢܫܐ ܗ̣ܘ ܠܐ ܨ̇ܒܐ ܠܡܫܒܩ ܠܗ ܡܢܘ ܫܒ̇ܩ ܠܗ ܚܛܗ̈ܘܗܝ
6 ܐܬܕܟܪ ܠܡܘܬܐ ܘܐܥܒܪ ܒܥܠܕܒܒܘܬܐ ܘܠܫܝܘܠ ܘܠܐܒܕܢܐ ܘܐܬܟܠܝ ܡܢ ܕܠܡܚܛܐ
7 ܐܬܕܟܪ ܦܘܩܕܢܐ ܘܠܐ ܬܣܢܐ ܚܒܪܟ ܩܕܡ ܐܠܗܐ ܘܗܒ ܠܗ ܡܐ ܕܚܣܝܪ ܠܗ
8 ܐܪܚܩ ܡܢ ܗܪ̈ܬܐ ܘܢܬܪܚܩܘܢ ܡܢܟ ܚܛܗ̈ܐ
9 ܒܪܢܫܐ ܓܝܪ ܥܘܠܐ ܕܪܚ̇ܡ ܕܝܢܐ ܒܥܠܕܒܒܘܬܐ ܪܡܐ ܒܝܬ ܐܚ̈ܐ
10 ܟܠ ܕܬܪܡܐ ܒܢܘܪܐ ܢܐܩܕ ܘܟܠ ܕܬܣܓܐ ܒܕܝܢܐ ܡܣܓܐ ܣ̇ܓܐ ܐܝܟ ܬܫܒܘܚܬܐ ܕܐܝ̈ܕܝܐ ܕܐܢܫܐ ܗܟܢܐ ܪܘܓܙܗ ܘܐܝܟ ܣܘܓܐܐ ܕܢܟ̈ܣܘܗܝ ܗܟܢܐ ܪܡ̇ܐ ܪܘܚܗ
11 ܨܪܘܐ ܘܥܝܛܪܢܐ ܡܘܩܕܝܢ ܢܘܪܐ ܘܕܝ̈ܢܐ ܣܓܝܐ̈ܐ ܐܫܕܝܢ ܕܡܐ
12 ܐܢ ܬܦܘܚ ܒܢܘܪܐ ܬܐܩܕ ܘܐܢ ܬܪܘܣ ܥܠܝܗ̇ ܡܝ̈ܐ ܬܕܥܟ ܘܬܪ̈ܬܝܗܝܢ ܡܢܟ ܐ̈ܢܝܢ
13 ܘܐܦ ܠܫܢܐ ܬܠܝܬܝܐ ܠܝܛ ܢܗܘܐ ܕܩ̈ܛܠܐ ܣܓܝܐ̈ܐ ܐܪܡܝ
14 ܠܫܢܐ ܬܠܝܬܝܐ ܣܓܝܐ̈ܐ ܒܫܒܝܐ ܐܦܩ ܘܒܕܪ ܐܢܘܢ ܡܢ ܥܡܐ ܠܥܡܐ ܘܐܦ ܠܐܢܫ̈ܐ ܡܝܩܪ̈ܐ ܕܡܕܝ̈ܢܬܐ ܡܢ ܒܬ̈ܝܗܘܢ ܛܪܕ ܘܒ̈ܬܐ ܕܡܠܟ̈ܐ ܡܚܪܒܘ ܐܚܪܒ
15 ܠܫܢܐ ܬܠܝܬܝܐ ܣܓܝܐ̈ܐ ܐܦܩ ܒܫܒܝܐ ܘܐܪܚܩ ܐܢܘܢ ܡܢ ܢܟܣ̈ܝܗܘܢ
17 ܡܚܘܬܐ ܕܚܘܛܪܐ ܥܒܕܐ ܫܘܚܢܐ ܘܡܚܘܬܐ ܕܠܫܢܐ ܬܒܪܐ ܓܪ̈ܡܐ
18 ܣܓܝܐ̈ܝܢ ܐܢܘܢ ܩܛܝ̈ܠܝ ܚܪܒܐ ܒܪܡ ܠܐ ܐܝܟ ܩܛܝ̈ܠܝ ܠܫܢܐ
19 ܛܘܒܘܗܝ ܠܓܒܪܐ ܕܐܬܦܨܝ ܡܢܗ̇ ܘܒܚܡܬܗ ܠܐ ܐܬܚܠܛ ܛܘܒܘܗܝ ܠܓܒܪܐ ܕܠܐ ܢܓܕ ܒܢܝܪܗ̇ ܘܒܐܣܘ̈ܪܘܗܝ ܠܐ ܐܬܐܣܪ
20 ܡܛܠ ܕܢܝܪܐ ܩܫܝܐ ܢܝܪܗ ܘܐܣܘܪ̈ܘܗܝ ܐܣܘܪ̈ܐ ܐܢܘܢ ܕܦܪܙܠܐ
21 ܡܘܬܐ ܒܝܫܐ ܡܘܬܗ ܘܢܝܚܐ ܐܝܬ ܒܫܝܘܠ ܛܒ ܡܢ ܕܠܘܬܗ
22 ܠܐ ܬܐܩܕ ܒܙܕܝ̈ܩܐ ܘܙܠܝ̈ܩܐ ܕܢܘܪܐ ܠܐ ܢܘܩܕܘܢܟ
23 ܟܠ ܕܫܒܩܝܢ ܕܚܠܬܗ ܕܐܠܗܐ ܒܗ̇ ܢܦܠܘܢ ܘܒܗܘܢ ܬܐܩܕ ܢܘܪܐ ܘܠܐ ܬܕܥܟ ܘܬܫܠܛ ܒܗܘܢ ܐܝܟ ܐܪܝܐ ܘܐܝܟ ܢܡܪܐ ܬܒܣܒܣ ܐܢܘܢ
24 ܠܟܣܦܟ ܘܠܕܗܒܟ ܥ̇ܒܕ ܐܢܬ ܚܬܡܐ
25 ܘܠܡܠܬܟ ܥ̇ܒܕ ܡܬܩܠܐ
26 ܐܙܕܗܪ ܕܠܡܐ ܬܦܠ ܕܠܐ ܬܬܪܡܐ ܩܕܡ ܣܢܐܟ
Sirach 27 · Sirach 29 · Greek (Septuagint / SBLGNT) · Latin (Vulgate) · Coptic (Sahidic)