Sirach 2 — Aramaic (Peshitta)

1 ܒܪܝ ܐܢ ܩܪܒܬ ܠܕܚܠܬܗ ܕܐܠܗܐ ܐܫܠܡܬ ܢܦܫܟ ܠܟܘܠ ܢܣܝ̈ܘܢܝܢ

3 ܐܬܕܒܩ ܒܗ̇ ܘܠܐ ܬܪܦܝܗ̇ ܡܛܠ ܕܬܬܚܟܡ ܒܐܘܪܚܬܟ

4 ܟܘܠ ܕܐܬܐ ܥܠܝܟ ܩܒܠ ܘܒܡܪܥܐ ܘܒܡܣܟܢܘܬܐ ܐܓܪ ܪܘܚܟ

5 ܡܛܠ ܕܒܢܘܪܐ ܡܬܒܩܐ ܕܗܒܐ ܘܒܪܢܫܐ ܒܟܘܪܐ ܕܡܣܟܢܘܬܐ

6 ܗܝܡܢ ܒܐܠܗܐ ܘܗܘ ܢܗܘܐ ܠܟ ܥܕܘܪܐ ܣܒܪ ܒܗ ܘܗܘ ܢܬܪܘܨ ܐܘܪ̈ܚܬܟ

7 ܕܚ̈ܠܘܗܝ ܕܡܪܝܐ ܣܒܪܘ ܠܛܘܒܗ ܘܠܐ ܬܫܬܘܚܪܘܢ ܡܢ ܒܬܪܗ ܕܠܡܐ ܬܦܠܘܢ

8 ܕܚ̈ܠܘܗܝ ܕܡܪܝܐ ܗܝܡܢܘ ܒܗ ܘܗܘ ܠܐ ܡܒܝܬ ܐܓܪܟܘܢ

9 ܕܚ̈ܠܘܗܝ ܕܡܪܝܐ ܣܒܪܘ ܠܛܘܒܗ ܠܚܕܘܬܐ ܕܠܥܠܡ ܘܠܦܘܪܩܢܐ

10 ܐܣܬܟܠܘ ܠܡܕܡ ܕܡܢ ܠܩܘܕܡܝܢ ܗܘܐ ܘܠܕܡܢ ܕܪ̈ܝ ܥܠܡܐ ܐܬܒܝܢܘ ܘܚܙܘ ܡܢܘ ܗܝܡܢ ܒܗ ܘܫܒܩܗ ܐܘ ܡܢܘ ܐܬܬܟܠ ܥܠܘܗܝ ܘܐܪܡܝܗ̇ ܐܘ ܡܢܘ ܩܪܝܗܝ ܘܠܐ ܥܢܝܗܝ

11 ܡܛܠ ܕܚܢܢܐ ܗܘ ܘܪܚܡܬܢܐ ܡܪܝܐ ܘܫܡܥ ܘܦܪܩ ܒܟܠܥܕܢ ܕܥܩܬܐ ܘܫܡܥ ܒܩܠܐ ܕܥܒ̈ܕܝ ܨܒܝܢܗ

12 ܠܒܐ ܡܣܝܐ ܘܐܝ̈ܕܝܐ ܡܪ̈ܦܝܬܐ ܒܪܢܫܐ ܕܦܣܥ ܥܠ ܫܒܝ̈ܠܐ ܣܓܝܐ̈ܐ

13 ܘܝ ܠܗ ܠܠܒܐ ܕܠܐ ܡܗܝܡܢ ܘܐܦ ܗܘ ܠܐ ܢܬܩܝܡ

14 ܘܝ ܠܟܘܢ ܓܢܒܪ̈ܝ ܬܘܟܠܢܐ ܡܢܐ ܬܥܒܕܘܢ ܟܕ ܢܕܘܢ ܡܪܝܐ

15 ܕܚ̈ܠܘܗܝ ܕܡܪܝܐ ܠܐ ܢܣܢܘܢ ܡܐܡܪܗ ܘܐܝܠܝܢ ܕܪܚܡܝܢ ܠܗ ܢܛܪܘܢ ܐܘܪ̈ܚܬܗ

16 ܕܚ̈ܠܘܗܝ ܕܡܪܝܐ ܢܬܪܥܘܢ ܨܒܝܢܗ ܘܪ̈ܚܡܘܗܝ ܢܐܠܦܘܢ ܢܡܘܣܗ

17 ܕܕܚܠ ܠܐܠܗܐ ܢܬܩܢ ܠܒܗ ܘܕܫܒܩ ܠܗ ܡܘܒܕ ܪܘܚܗ

18 ܡܛܠ ܕܐܝܟ ܪܒܘܬܗ̣ ܗܟܢܐ ܪ̈ܚܡܘܗܝ ܘܐܝܟ ܫܡܗ̣ ܗܟܢܐ ܥܒ̈ܕܘܗܝ