Read Psalms 76 side by side with translations · The Final Bible
1 ⲉⲡϫⲱⲕ ⲉⲃⲟⲗ ϩⲁⲓⲇⲓⲑⲟⲩⲛ ⲡⲉⲯⲁⲗⲙⲟⲥ ⲛⲁⲥⲁⲫ
2 ⲁⲓϫⲓϣⲕⲁⲕ ⲉϩⲣⲁⲓ ϩⲛⲧⲁⲥⲙⲏ ⲉⲡϫⲟⲉⲓⲥ ϩⲛⲧⲁⲥⲙⲏ ⲉⲡⲛⲟⲩⲧⲉ ⲁⲩⲱ ⲁϥϯϩⲧⲏϥ ⲉⲣⲟⲓ
3 ⲁⲓϣⲓⲛⲉ ⲛⲥⲁⲡϫⲟⲉⲓⲥ ⲙⲡⲉϩⲟⲟⲩ ⲛⲧⲁⲑⲗⲓⲯⲓⲥ ϩⲛⲛⲁϭⲓϫ ⲛⲧⲉⲩϣⲏ ⲙⲡⲉⲕⲙⲧⲟ ⲉⲃⲟⲗ ⲁⲩⲱ ⲙⲡⲟⲩⲣϩⲁⲗ ⲙⲙⲟⲓ ⲧⲁⲯⲩⲭⲏ ⲙⲡⲥⲟⲩⲉϣⲥⲗⲥⲱⲗⲥ
4 ⲁⲓⲣⲡⲙⲉⲉⲩⲉ ⲙⲡⲛⲟⲩⲧⲉ ⲁⲓⲉⲩⲫⲣⲁⲛⲉ ⲁⲓϫⲓ ϩⲣⲁⲓ ⲁϥⲣϩⲏⲧ ϣⲏⲙ ⲛϭⲓⲡⲁⲡⲛⲉⲩⲙⲁ ⲇⲓⲁⲯⲁⲗⲙⲁ
5 ⲁⲛⲁⲃⲁⲗ ⲣⲉⲑⲏ ⲛⲛⲟⲩⲣϣⲉ ⲁⲓϣⲧⲟⲣⲧⲣ ⲙⲡⲓϣⲁϫⲉ
6 ⲁⲓⲙⲉⲉⲩⲉ ⲉⲛⲉϩⲟⲟⲩ ⲛϣⲟⲣⲡ ⲁⲓⲣⲡⲙⲉⲉⲩⲉ ⲛⲛⲣⲙⲡⲟⲟⲩⲉ ⲛϣⲁ ⲉⲛⲉϩ ⲁⲓⲙⲉⲗⲉⲧⲁ ⲙⲙⲟⲟⲩ
7 ⲁⲓϫⲓ ϩⲣⲁⲓ ⲙⲛⲡⲁϩⲏⲧ ⲛⲧⲉⲩϣⲏ ⲁⲩⲱ ⲁⲓϣⲧⲟⲣⲧⲣ ϩⲙⲡⲁⲡⲛⲉⲩⲙⲁ
8 ⲙⲏ ⲉⲣⲉⲡϫⲟⲉⲓⲥ ⲛⲁⲕⲁⲁⲛ ⲛⲥⲱϥ ϣⲁⲉⲛⲉϩ ⲁⲩⲱ ⲛϥⲧⲙⲧⲱⲧ ϭⲉ ⲛϩⲏⲧ ⲛⲙⲙⲁⲛ
9 ⲏ ⲉϥⲛⲁϭⲱϫⲃ ⲙⲡⲉϥⲛⲁ ϣⲁⲃⲟⲗ ϫⲓⲛⲟⲩϫⲱⲙ ϣⲁⲟⲩϫⲱⲙ ⲏ ⲉⲣⲉⲡⲛⲟⲩⲧⲉ ⲛⲁⲣⲡⲱⲃϣ ⲛϣⲛϩⲧⲏϥ
10 ⲏ ⲉϥⲛⲁⲁⲙⲁϩⲧⲉ ⲛⲛⲉϥⲙⲛⲧϣⲁⲛϩⲧⲏϥ ϩⲛⲧⲉϥⲟⲣⲅⲏ ⲇⲓⲁⲯⲁⲗⲙⲁ
11 ⲁⲩⲱ ⲡⲉϫⲁⲓ ϫⲉⲧⲉⲛⲟⲩ ⲁⲓⲁⲣⲭⲉⲓ ⲡⲁⲓ ⲡⲉ ⲡϣⲓⲃⲉ ⲛⲧⲟⲩⲛⲁⲙ ⲙⲡⲉⲧϫⲟⲥⲉ
12 ⲁⲓⲣⲡⲙⲉⲉⲩⲉ ⲛⲛⲉϩⲃⲏⲩⲉ ⲙⲡϫⲟⲉⲓⲥ ϫⲉϯⲛⲁⲣⲡⲙⲉⲉⲩⲉ ⲛⲛⲉⲕϣⲡⲏⲣⲉ ϫⲓⲛⲛϣⲟⲣⲡ
13 ⲧⲁⲙⲉⲗⲉⲧⲁ ⲛⲛⲉⲕϩⲃⲏⲩⲉ ⲧⲏⲣⲟⲩ ⲧⲁϫⲓ ϩⲣⲁⲓ ϩⲛⲛⲉⲕⲙⲉⲉⲩⲉ
14 ⲉⲣⲉⲧⲉⲕϩⲓⲏ ⲛⲉⲓⲉⲃⲟⲗ ⲡⲛⲟⲩⲧⲉ ϩⲙⲡⲉⲧⲟⲩⲁⲁⲃ ⲛⲓⲙ ⲡⲉ ⲡⲛⲟϭ ⲛⲛⲟⲩⲧⲉ ⲛⲧϩⲉ ⲙⲡⲉⲛⲛⲟⲩⲧⲉ
15 ⲛⲧⲟⲕ ⲡⲉ ⲡⲛⲟⲩⲧⲉ ⲉⲧⲉⲓⲣⲉ ⲛⲛⲓϣⲡⲏⲣⲉ ⲙⲁⲩⲁⲁϥ ⲁⲕⲟⲩⲉⲛϩⲧⲉⲕϭⲟⲙ ⲉⲃⲟⲗ ϩⲛⲛⲓⲗⲁⲟⲥ
16 ⲁⲕⲥⲱⲧⲉ ⲙⲡⲉⲕⲗⲁⲟⲥ ϩⲙⲡⲉⲕϭⲃⲟⲓ ⲛϣⲏⲣⲉ ⲛⲓⲁⲕⲱⲃ ⲙⲛⲓⲱⲥⲏⲫ ⲇⲓⲁⲯⲁⲗⲙⲁ
17 ⲁϩⲉⲛⲙⲟⲟⲩ ⲛⲁⲩ ⲉⲣⲟⲕ ⲡⲛⲟⲩⲧⲉ ⲁϩⲉⲛⲙⲟⲟⲩ ⲛⲁⲩ ⲉⲣⲟⲕ ⲁⲩⲣϩⲟⲧⲉ ⲁⲩϣⲧⲟⲣⲧⲣ ⲛϭⲓⲛⲛⲟⲩⲛ ϩⲙⲡⲁϣⲁⲓ ⲙⲡⲉϩⲣⲟⲟⲩ ⲛⲙⲙⲟⲟⲩ
18 ⲁⲛⲉⲕⲗⲟⲟⲗⲉ ϯ ⲛⲧⲉⲩⲥⲙⲏ ⲕⲁⲓ ⲅⲁⲣ ⲛⲉⲕⲥⲟⲧⲉ ⲛⲁⲙⲟⲟϣⲉ
19 ⲡⲉϩⲣⲟⲟⲩ ⲛⲛⲉⲕϩⲣⲟⲩⲃⲃⲁⲉⲓ ϩⲙⲡⲉⲧⲣⲟⲭⲟⲥ ⲁⲛⲉⲕⲉⲃⲣⲏϭⲉ ⲣⲟⲩⲟⲉⲓⲛ ⲉⲧⲟⲓⲕⲟⲩⲙⲉⲛⲏ ⲁⲡⲕⲁϩ ⲕⲓⲙ ⲁⲩⲱ ⲁϥⲥⲧⲱⲧ
20 ⲉⲣⲉⲧⲉⲕϩⲓⲏ ϩⲛⲧϩⲁⲗⲁⲥⲥⲁ ⲁⲩⲱ ⲛⲉⲕⲙⲁ ⲙⲙⲟⲟϣⲉ ϩⲛϩⲉⲛⲙⲟⲟⲩ ⲉⲛⲁϣⲱⲟⲩ ⲁⲩⲱ ⲛⲥⲉⲛⲁⲥⲟⲩⲛⲛⲉⲕⲧⲁϭⲥⲉ ⲁⲛ
21 ⲁⲕϫⲓⲙⲟⲉⲓⲧ ϩⲏⲧϥ ⲙⲡⲉⲕⲗⲁⲟⲥ ⲛⲧϩⲉ ⲛϩⲉⲛⲉⲥⲟⲟⲩ ϩⲛⲧϭⲓϫ ⲙⲙⲱⲩⲥⲏⲥ ⲙⲛⲁⲁⲣⲱⲛ
Psalms 75 · Psalms 77 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)