Read Psalms 71 side by side with translations · The Final Bible
1 ⲉⲥⲟⲗⲟⲙⲱⲛ ⲡⲛⲟⲩⲧⲉ ϯⲡⲉⲕϩⲁⲡ ⲙⲡⲣⲣⲟ ⲁⲩⲱ ⲧⲉⲕⲇⲓⲕⲁⲓⲟⲥⲩⲛⲏ ⲙⲡϣⲏⲣⲉ ⲙⲡⲣⲣⲟ
2 ⲉⲕⲣⲓⲛⲉ ⲙⲡⲉⲕⲗⲁⲟⲥ ϩⲛⲟⲩⲥⲟⲟⲩⲧⲛ ⲁⲩⲱ ⲛⲉⲕϩⲏⲕⲉ ϩⲛⲟⲩϩⲁⲡ
3 ⲙⲁⲣⲉⲛⲧⲟⲟⲩ ϫⲓ ⲛⲟⲩⲉⲓⲣⲏⲛⲏ ⲙⲡⲉⲕⲗⲁⲟⲥ ⲁⲩⲱ ⲛⲥⲓⲃⲧ ⲛⲟⲩⲇⲓⲕⲁⲓⲟⲥⲩⲛⲏ
4 ϥⲛⲁⲕⲣⲓⲛⲉ ⲛⲛϩⲏⲕⲉ ⲙⲡⲗⲁⲟⲥ ⲛϥⲧⲟⲩϫⲟ ⲛⲛϣⲏⲣⲉ ⲛⲛⲉⲃⲓⲏⲛ ⲛϥⲑⲃⲃⲓⲟ ⲙⲡⲣⲉϥϩⲓⲗⲁ
5 ⲛϥⲙⲟⲩⲛ ⲉⲃⲟⲗ ⲙⲛⲡⲣⲏ ⲁⲩⲱ ϩⲁⲧϩⲏ ⲙⲡⲟⲟϩ ⲛϩⲉⲛϫⲱⲙ ⲛϫⲱⲙ
6 ϥⲛⲏⲩ ⲉⲡⲉⲥⲏⲧ ⲛⲧϩⲉ ⲛⲟⲩϩⲱⲟⲩ ⲉϫⲛⲟⲩⲥⲟⲣⲧ ⲁⲩⲱ ⲛⲧϩⲉ ⲙⲡϩⲱⲟⲩ ⲉⲧϩⲱⲟⲩ ⲉϫⲙⲡⲕⲁϩ
7 ⲛⲧⲉⲧⲇⲓⲕⲁⲓⲟⲥⲩⲛⲏ ϯⲟⲩⲱ ϩⲛⲛⲉϥϩⲟⲟⲩ ⲁⲩⲱ ⲟⲩⲉⲓⲣⲏⲛⲏ ⲉⲥⲟϣ ϣⲁⲛⲧⲟⲩϥⲓ ⲙⲡⲟⲟϩ
8 ⲛϥⲣϫⲟⲉⲓⲥ ϫⲓⲛⲑⲁⲗⲁⲥⲥⲁ ϣⲁⲧϩⲁⲗⲁⲥⲥⲁ ⲁⲩⲱ ϫⲓⲛⲡⲓⲉⲣⲟ ϣⲁⲁⲣⲏϫⲥ ⲛⲧⲟⲓⲕⲟⲩⲙⲉⲛⲏ
9 ⲛⲉϭⲟⲟϣ ⲛⲁⲡⲁϩⲧⲟⲩ ⲙⲡⲉϥⲙⲧⲟ ⲉⲃⲟⲗ ⲁⲩⲱ ⲛⲉϥϫⲓϫⲉⲉⲩⲉ ⲛⲁⲗⲱϫϩ ⲙⲡⲕⲁϩ
10 ⲛⲉⲣⲣⲱⲟⲩ ⲛⲑⲁⲣⲥⲓⲥ ⲙⲛⲛⲛⲏⲥⲟⲥ ⲛⲁⲛⲇⲱⲣⲟⲛ ⲛⲁϥ ⲛⲉⲣⲣⲱⲟⲩ ⲛⲁⲣⲁⲃⲟⲥ ⲙⲛⲥⲁⲃⲁ ⲛⲁⲛⲇⲱⲣⲟⲛ ⲛⲁϥ
11 ⲛⲥⲉⲟⲩⲱϣⲧ ⲛⲁϥ ⲛϭⲓⲛⲉⲣⲣⲱⲟⲩ ⲧⲏⲣⲟⲩ ⲛϩⲉⲑⲛⲟⲥ ⲧⲏⲣⲟⲩ ⲛⲁⲣϩⲙϩⲁⲗ ⲛⲁϥ
12 ϫⲉⲁϥⲛⲉϩⲙⲡϩⲏⲕⲉ ⲉⲃⲟⲗ ϩⲛⲧϭⲓϫ ⲙⲡϫⲱⲱⲣⲉ ⲙⲛⲡⲉⲃⲓⲏⲛ ⲉⲧⲉⲙⲛⲧϥⲃⲟⲏⲑⲟⲥ
13 ϥⲛⲁϯⲥⲟ ⲉⲩϩⲏⲕⲉ ⲙⲛⲟⲩⲉⲃⲓⲏⲛ ⲛϥⲧⲟⲩϫⲟ ⲛⲛⲉⲯⲩⲭⲏ ⲛⲛⲉⲃⲓⲏⲛ
14 ϥⲛⲁⲥⲱⲧⲉ ⲛⲧⲉⲩⲯⲩⲭⲏ ⲉⲃⲟⲗ ϩⲛⲧⲙⲏⲥⲉ ⲙⲛⲡϫⲓⲛϭⲟⲛⲥ ⲡⲉⲩⲣⲁⲛ ⲧⲁⲉⲓⲏⲩ ⲙⲡⲉϥⲙⲧⲟ ⲉⲃⲟⲗ
15 ϥⲛⲁⲱⲛϩ ⲛⲥⲉϯ ⲛⲁϥ ⲙⲡⲛⲟⲩⲃ ⲛⲧⲁⲣⲁⲃⲓⲁ ⲛⲥⲉϣⲗⲏⲗ ⲉⲧⲃⲏⲏⲧϥ ⲛⲟⲩⲟⲉⲓϣ ⲛⲓⲙ ⲥⲉⲛⲁⲥⲙⲟⲩ ⲉⲣⲟϥ ⲙⲡⲉϩⲟⲟⲩ ⲧⲏⲣϥ
16 ϥⲛⲁϣⲱⲡⲉ ⲛⲟⲩⲧⲁϫⲣⲟ ⲙⲡⲕⲁϩ ⲉϩⲣⲁⲓ ⲉϫⲛⲛⲧⲟⲟⲩ ⲡⲉϥⲕⲁⲣⲡⲟⲥ ⲛⲁϫⲓⲥⲉ ⲉⲡⲗⲓⲃⲁⲛⲟⲥ ⲛⲥⲉϯⲟⲩⲱ ⲉⲃⲟⲗ ϩⲛⲧⲡⲟⲗⲓⲥ ⲛⲧϩⲉ ⲙⲡⲉⲭⲟⲣⲧⲟⲥ ⲙⲡⲕⲁϩ
17 ⲡⲉϥⲣⲁⲛ ⲛⲁϣⲱⲡⲉ ⲉϥⲥⲙⲁⲙⲁⲁⲧ ϣⲁⲉⲛⲉϩ ⲡⲉϥⲣⲁⲛ ϣⲟⲟⲡ ϩⲁⲧϩⲏ ⲙⲡⲣⲏ ⲥⲉⲛⲁϫⲓⲥⲙⲟⲩ ϩⲣⲁⲓ ⲛϩⲏⲧϥ ⲛϭⲓⲛⲉⲫⲩⲗⲏ ⲧⲏⲣⲟⲩ ⲙⲡⲕⲁϩ ⲛϩⲉⲑⲛⲟⲥ ⲧⲏⲣⲟⲩ ⲛⲁⲙⲁⲕⲁⲣⲓⲍⲉ ⲙⲙⲟϥ
18 ϥⲥⲙⲁⲙⲁⲁⲧ ⲡϫⲟⲉⲓⲥ ⲡⲛⲟⲩⲧⲉ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲡⲉⲧⲉⲓⲣⲉ ⲛⲛⲓϣⲡⲏⲣⲉ ⲙⲁⲩⲁⲁϥ
19 ⲁⲩⲱ ϥⲥⲙⲁⲙⲁⲁⲧ ⲛϭⲓⲡⲣⲁⲛ ⲙⲡⲉϥⲉⲟⲟⲩ ϣⲁⲉⲛⲉϩ ⲁⲩⲱ ϣⲁⲉⲛⲉϩ ⲛⲉⲛⲉϩ ⲡⲕⲁϩ ⲧⲏⲣϥ ⲛⲁⲙⲟⲩϩ ϩⲙⲡⲉϥⲉⲟⲟⲩ ⲉϥⲉϣⲱⲡⲉ ⲉϥⲉϣⲱⲡⲉ
Psalms 70 · Psalms 72 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)