Read Psalms 70 side by side with translations · The Final Bible
1 ⲉⲡϫⲱⲕ ⲉⲃⲟⲗ ⲡⲉⲯⲁⲗⲙⲟⲥ ⲛⲇⲁⲩⲉⲓⲇ ⲡⲛⲟⲩⲧⲉ ⲡⲛⲟⲩⲧⲉ ⲁⲓⲛⲁϩⲧⲉ ⲉⲣⲟⲕ ⲙⲡⲣⲧⲣⲁϫⲓϣⲓⲡⲉ ϣⲁⲉⲛⲉϩ
2 ⲙⲁⲧⲟⲩϫⲟⲓ ϩⲛⲧⲉⲕⲇⲓⲕⲁⲓⲟⲥⲩⲛⲏ ⲁⲩⲱ ⲛⲅⲛⲁϩⲙⲉⲧ ⲣⲓⲕⲉ ⲙⲡⲉⲕⲙⲁⲁϫⲉ ⲉⲣⲟⲓ ⲛⲅⲧⲟⲩϫⲟⲓ
3 ϣⲱⲡⲉ ⲛⲁⲓ ⲉⲩⲛⲟⲩⲧⲉ ⲛⲛⲁϣⲧⲉ ⲁⲩⲱ ⲉⲩⲙⲁ ⲉϥⲧⲁϫⲣⲏⲩ ⲉⲧⲟⲩϫⲟⲉⲓ ϫⲉⲛⲧⲟⲕ ⲡⲉ ⲡⲁⲧⲁϫⲣⲟ ⲁⲩⲱ ⲡⲁⲙⲁ ⲙⲡⲱⲧ
4 ⲡⲁⲛⲟⲩⲧⲉ ⲙⲁⲧⲟⲩϫⲟⲓ ⲉⲧϭⲓϫ ⲙⲡⲣⲉϥⲣⲛⲟⲃⲉ ⲉⲃⲟⲗ ϩⲛⲧϭⲓϫ ⲙⲡⲡⲁⲣⲁⲛⲟⲙⲟⲥ ⲙⲛⲡⲁⲥⲉⲃⲏⲥ
5 ϫⲉⲛⲧⲟⲕ ⲡϫⲟⲉⲓⲥ ⲡⲉ ⲧⲁϩⲩⲡⲟⲙⲟⲛⲏ ⲡϫⲟⲉⲓⲥ ⲛⲧⲕ ⲧⲁϩⲉⲗⲡⲓⲥ ϫⲓⲛⲧⲁⲙⲛⲧⲕⲟⲩⲓ
6 ⲁⲓⲧⲁϫⲣⲟⲓ ⲉϫⲱⲕ ϫⲓⲛⲉⲓϩⲛⲧϩⲏ ⲛⲧⲟⲕ ⲁⲕⲛⲧ ⲉⲃⲟⲗ ϩⲛϩⲏⲧⲥ ⲛⲧⲁⲙⲁⲁⲩ ⲉⲣⲉⲡⲁⲣⲡⲙⲉⲉⲩⲉ ⲛϩⲏⲧⲕ ⲛⲟⲩⲟⲉⲓϣ ⲛⲓⲙ
7 ⲁⲓϣⲱⲡⲉ ⲛⲧϩⲉ ⲛⲛⲓϩⲛ ⲛⲟⲩⲙⲏⲏϣⲉ ⲛⲧⲟⲕ ⲡⲉ ⲡⲁⲃⲟⲏⲑⲟⲥ ⲁⲩⲱ ⲡⲁⲧⲁϫⲣⲟ ⲛⲧⲕ ⲡⲁⲥⲱⲧⲏⲣ ⲡϫⲟⲉⲓⲥ
8 ⲁⲧⲁⲧⲁⲡⲣⲟ ⲙⲟⲩϩ ⲛⲥⲙⲟⲩ ϫⲉⲕⲁⲥ ϩⲙⲡⲉϩⲟⲟⲩ ⲧⲏⲣϥ ⲉⲓⲉⲥⲙⲟⲩ ⲉⲡⲉⲟⲟⲩ ⲛⲧⲉⲕⲙⲛⲧⲛⲟϭ
9 ⲙⲡⲣⲛⲟϫⲧ ⲉⲃⲟⲗ ⲉⲩⲟⲩⲟⲉⲓϣ ⲙⲙⲛⲧϩⲗⲗⲟ ϩⲙⲡⲧⲣⲉⲧⲁⲯⲩⲭⲏ ⲱϫⲛ ⲙⲡⲣⲕⲁⲁⲧ ⲛⲥⲱⲕ
10 ϫⲉⲁⲛⲁϫⲓϫⲉⲉⲩⲉ ϫⲉⲡⲉⲧϩⲟⲟⲩ ⲉⲣⲟⲓ ⲁⲩⲱ ⲛⲉⲧϩⲁⲣⲉϩ ⲉⲧⲁⲯⲩⲭⲏ ⲁⲩϫⲓϣⲟϫⲛⲉ ⲉⲧⲁⲯⲩⲭⲏ ⲉⲩϫⲱ ⲙⲙⲟⲥ ϩⲓⲟⲩⲥⲟⲡ
11 ϫⲉⲁⲡⲛⲟⲩⲧⲉ ⲕⲁⲁϥ ⲛⲥⲱϥ ⲡⲱⲧ ⲛⲧⲉⲧⲛⲧⲁϩⲟϥ ϫⲉⲙⲛⲡⲉⲧⲛⲁⲛⲁϩⲙⲉϥ
12 ⲡⲁⲛⲟⲩⲧⲉ ⲙⲡⲣⲟⲩⲉ ⲛⲥⲁⲃⲟⲗ ⲙⲙⲟⲓ ⲡⲁⲛⲟⲩⲧⲉ ϯϩⲧⲏⲕ ⲉⲧⲃⲟⲏⲑⲉⲓⲁ
13 ⲙⲁⲣⲟⲩϫⲓϣⲓⲡⲉ ⲛⲥⲉⲱϫⲛ ⲛϭⲓⲛⲉⲧⲇⲓⲁⲃⲁⲗⲗⲉ ⲛⲧⲁⲯⲩⲭⲏ ⲙⲁⲣⲟⲩϭⲟⲟⲗⲟⲩ ⲛⲟⲩϣⲓⲡⲉ ⲙⲛⲟⲩⲱⲱⲗⲥ ⲛϭⲓⲛⲉⲧϣⲓⲛⲉ ⲛⲥⲁϩⲉⲛⲡⲉⲧϩⲟⲟⲩ ⲉⲣⲟⲓ
14 ⲁⲛⲟⲕ ⲇⲉ ⲛⲟⲩⲟⲉⲓϣ ⲛⲓⲙ ϯⲛⲁⲛⲁϩⲧⲉ ⲉⲣⲟⲕ ⲡϫⲟⲉⲓⲥ ⲡⲁⲛⲟⲩⲧⲉ ⲁⲩⲱ ϯⲛⲁⲟⲩⲱϩ ⲉϫⲙⲡⲉⲕⲥⲙⲟⲩ
15 ⲧⲁⲧⲁⲡⲣⲟ ⲛⲁϫⲱ ⲛⲧⲉⲕⲇⲓⲕⲁⲓⲟⲥⲩⲛⲏ ⲙⲛⲡⲉⲕⲟⲩϫⲁⲓ ⲙⲡⲉϩⲟⲟⲩ ⲧⲏⲣϥ ϫⲉⲙⲡⲓⲥⲟⲩⲛϩⲁⲧⲃⲉⲥ
16 ϯⲛⲏⲩ ⲉϩⲟⲩⲛ ϩⲛⲧⲉⲕϭⲟⲙ ⲡϫⲟⲉⲓⲥ ⲡⲛⲟⲩⲧⲉ ϯⲛⲁⲣⲡⲙⲉⲉⲩⲉ ⲛⲧⲉⲕⲇⲓⲕⲁⲓⲟⲥⲩⲛⲏ ⲙⲁⲩⲁⲁⲕ
17 ⲡⲛⲟⲩⲧⲉ ⲁⲕⲧⲥⲁⲃⲟⲓ ϫⲓⲛⲧⲁⲙⲛⲧⲕⲟⲩⲓ ⲁⲩⲱ ϣⲁⲧⲉⲛⲟⲩ ϯⲛⲁϫⲱ ⲛⲛⲉⲕϣⲡⲏⲣⲉ
18 ⲁⲩⲱ ϣⲁⲧⲁⲙⲛⲧϩⲗⲗⲟ ⲙⲛⲧⲁⲙⲛⲧⲛⲟϭ ⲡⲛⲟⲩⲧⲉ ⲙⲡⲣⲕⲁⲁⲧ ⲛⲥⲱⲕ ϣⲁⲛⲧⲓϫⲱ ⲙⲡⲉⲕϭⲃⲟⲓ ⲛⲧⲅⲉⲛⲉⲁ ⲧⲏⲣⲥ ⲉⲧⲛⲏⲩ
19 ⲧⲉⲕϭⲟⲙ ⲙⲛⲧⲉⲕⲇⲓⲕⲁⲓⲟⲥⲩⲛⲏ ⲡⲛⲟⲩⲧⲉ ϣⲁⲛⲉⲧϫⲟⲥⲉ ⲙⲙⲛⲧⲛⲟϭ ⲛⲧⲁⲕⲕⲁⲩ ⲡⲛⲟⲩⲧⲉ ⲛⲓⲙ ⲡⲉⲧⲛⲁϣⲓⲛⲉ ⲙⲙⲟⲕ
20 ⲛⲉⲑⲗⲓⲯⲓⲥ ⲛⲧⲁⲕⲧⲥⲁⲃⲟⲓ ⲉⲣⲟⲟⲩ ⲛϩⲁϩ ⲛⲥⲟⲡ ⲙⲛⲙⲡⲉⲧϩⲟⲟⲩ ⲁⲩⲱ ⲁⲕⲕⲟⲧⲕ ⲁⲕⲧⲁⲛϩⲟⲓ ⲁⲕⲛⲧ ⲉϩⲣⲁⲓ ϩⲛⲛⲛⲟⲩⲛ ⲙⲡⲕⲁϩ
21 ⲁⲕⲧⲁϣⲉⲧⲉⲕⲙⲛⲧⲛⲟϭ ⲉϩⲣⲁⲓ ⲉϫⲱⲓ ⲁⲩⲱ ⲁⲕⲕⲟⲧⲕ ⲁⲕⲡⲁⲣⲁⲕⲁⲗⲉⲓ ⲙⲙⲟⲓ
22 ⲕⲁⲓ ⲅⲁⲣ ⲁⲛⲟⲕ ⲡϫⲟⲉⲓⲥ ⲡⲁⲛⲟⲩⲧⲉ ϯⲛⲁⲟⲩⲱⲛϩ ⲉⲃⲟⲗ ⲛⲧⲉⲕⲙⲉ ϩⲛⲛⲓⲗⲁⲟⲥ ϯⲛⲁⲯⲁⲗⲗⲉⲓ ⲉⲣⲟⲕ ϩⲛⲟⲩⲕⲓⲑⲁⲣⲁ ⲡⲉⲧⲟⲩⲁⲁⲃ ⲙⲡⲓⲥⲣⲁⲏⲗ
23 ⲥⲉⲛⲁⲧⲉⲗⲏⲗ ⲛϭⲓⲛⲁⲥⲡⲟⲧⲟⲩ ⲉⲓϣⲁⲛⲯⲁⲗⲗⲉⲓ ⲉⲣⲟⲕ ⲁⲩⲱ ⲧⲁⲯⲩⲭⲏ ⲉⲛⲧⲁⲕⲥⲟⲧⲥ ⲉⲃⲟⲗ ϩⲛⲧϭⲓϫ ⲛⲛϫⲁϫⲉ
24 ⲉⲧⲓ ⲇⲉ ⲡⲁⲕⲉⲗⲁⲥ ⲛⲁⲙⲉⲗⲉⲧⲁ ⲛⲧⲉⲕⲇⲓⲕⲁⲓⲟⲥⲩⲛⲏ ⲙⲡⲉϩⲟⲟⲩ ⲧⲏⲣϥ ϩⲟⲧⲁⲛ ⲉⲩϣⲁⲛϫⲓϣⲓⲡⲉ ⲛⲥⲉⲟⲩⲱⲗⲥ ⲛϭⲓⲛⲉⲧϣⲓⲛⲉ ⲛⲥⲁϩⲉⲛⲡⲉⲧϩⲟⲟⲩ ⲉⲣⲟⲓ
Psalms 69 · Psalms 71 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)