Read Psalms 7 side by side with translations · The Final Bible
2 ܡܪܝܐ ܐܠܗܝ ܒܟ ܣܒܪܬ ܦܪܘܩܝܢܝ ܘܡܢ ܟܠ ܪ̈ܕܘܦܝ ܦܨܢܝ
3 ܕܠܡܐ ܐܝܟ ܐܪܝܐ ܠܡܬܒܪ ܠܢܦܫܝ ܘܠܝܬ ܕܦܪܩ ܘܡܦܨܐ
4 ܡܪܝܐ ܐܠܗܝ ܐܢ ܥܒܕܬ ܗܕܐ ܘܐܢ ܐܝܬ ܥܘܠܐ ܒܐ̈ܝܕܝ
5 ܘܐܢ ܦܪܥܬ ܠܡܢ ܕܥܒܕ ܠܝ ܒܝܫܬܐ ܘܐܢ ܐܠܨܬ ܠܒܥܠܕܒܒܝ ܣܪܝܩܐܝܬ
6 ܢܪܕܘܦ ܒܥܠܕܒܒܐ ܠܢܦܫܝ ܘܢܕܪܟܝܗ̇ ܘܢܕܘܫ ܚ̈ܝܝ ܒܐܪܥܐ ܘܫܘܒܚܝ ܒܥܦܪܐ ܢܫܪܐ
7 ܩܘܡ ܡܪܝܐ ܒܪܘܓܙܟ ܘܐܫܬܩܠ ܥܠ ܩܕܠܐ ܕܒ̈ܥܠܕܒܒܝ ܐܬܬܥܝܪ ܥܠܝ ܒܕܝܢܐ ܕܦܩܕܬ
8 ܘܥܕܬܐ ܕܐ̈ܡܘܬܐ ܬܚܕܪܟ ܘܥܠ ܐ̈ܦܝܗ̇ ܠܡܪܘܡܐ ܬܗܦܟ
9 ܡܪܝܐ ܢܕܘܢ ܥܡ̈ܡܐ ܕܘܢܝܢܝ ܡܪܝܐ ܐܝܟ ܙܕܝܩܘܬܝ ܘܐܝܟ ܬܡܝܡܘܬܝ
10 ܬܓܡܪ ܒܝܫܬܐ ܥܠ ܪ̈ܫܝܥܐ ܘܬܬܩܢ ܠܙܕܝܩ̈ܐ ܒܚܪ ܠܒܐ ܘܟܘ̈ܠܝܬܐ ܐܠܗܐ ܙܕܝܩܐ
11 ܡܣܝܥܢܝ ܐܠܗܐ ܕܦܪܩ ܠܬܪ̈ܝܨܝ ܠܒܐ
12 ܐܠܗܐ ܕܝܢܐ ܕܩܘܫܬܐ ܠܐ ܪܓܙ ܟܠܝܘܡ
13 ܐܠܐ ܗܦܟ ܣܝܦܗ ܠܛܫ ܘܩܫܬܗ ܡܬܚ ܐܬܩܢ
14 ܘܡܬܩܢ ܠܗ ܡܐ̈ܢܐ ܕܪܘܓܙܐ ܓܐܪ̈ܘܗܝ ܥܒܕ ܠܕܝܩܕܝܢ
15 ܡܛܠ ܕܚܒܠ ܥܘܠܐ ܘܒܛܢ ܫܘܩܪܐ ܘܝܠܕ ܥܘܠܐ
16 ܒܐܪܐ ܚܦܪ ܘܚܛܗ̇ ܘܢܦܠ ܒܓܘܡܨܐ ܕܥܒܕ
17 ܢܗܦܘܟ ܥܘܠܗ ܒܪܝܫܗ ܘܥܠ ܒܥܬܗ ܥܘܠܗ ܢܚܘܬ
18 ܐܘܕܐ ܠܡܪܝܐ ܐܝܟ ܙܕܝܩܘܬܝ ܘܐܙܡܪ ܠܫܡܗ ܕܡܪܝܐ ܡܪܝܡܐ
Psalms 6 · Psalms 8 · Hebrew (Masoretic) · Greek (Septuagint / SBLGNT) · Latin (Vulgate) · Coptic (Sahidic)