Read Psalms 65 side by side with translations · The Final Bible
1 ⲉⲡϫⲱⲕ ⲉⲃⲟⲗ ⲡⲉⲯⲁⲗⲙⲟⲥ ⲛⲧⲱⲇⲏ ⲛⲧⲁⲛⲁⲥⲧⲁⲥⲓⲥ ⲡⲕⲁϩ ⲧⲏⲣϥ ϯⲗⲟⲩⲗⲁⲓ ⲙⲡⲛⲟⲩⲧⲉ
2 ⲯⲁⲗⲗⲉⲓ ⲉⲡⲉϥⲣⲁⲛ ϯⲉⲟⲟⲩ ⲙⲡⲉϥⲥⲙⲟⲩ
3 ⲁϫⲓⲥ ⲙⲡⲛⲟⲩⲧⲉ ϫⲉϩⲉⲛϩⲟⲧⲉ ⲛⲉ ⲛⲉⲕϩⲃⲏⲩⲉ ϩⲙⲡⲁϣⲁⲓ ⲛⲧⲉⲕϭⲟⲙ ⲥⲉⲛⲁϫⲓϭⲟⲗ ⲉⲣⲟⲕ ⲛϭⲓⲛⲉⲕϫⲁϫⲉ
4 ⲡⲕⲁϩ ⲧⲏⲣϥ ⲙⲁⲣⲟⲩⲟⲩⲱϣⲧ ⲛⲁⲕ ⲛⲥⲉⲯⲁⲗⲗⲉⲓ ⲉⲣⲟⲕ ⲙⲁⲣⲟⲩⲯⲁⲗⲗⲉⲓ ⲉⲡⲉⲕⲣⲁⲛ ⲡⲉⲧϫⲟⲥⲉ ⲇⲓⲁⲯⲁⲗⲙⲁ
5 ⲁⲙⲏⲓⲧⲛ ⲛⲁϣⲏⲣⲉ ⲛⲧⲉⲧⲛⲛⲁⲩ ⲉⲛⲉϩⲃⲏⲩⲉ ⲙⲡⲛⲟⲩⲧⲉ ⲉϥϯϩⲟⲧⲉ ϩⲛⲛⲉϥϣⲟϫⲛⲉ ⲉϩⲟⲩⲉ ⲛϣⲏⲣⲉ ⲛⲛⲣⲱⲙⲉ
6 ⲡⲉⲧⲕⲧⲟ ⲛⲧⲑⲁⲗⲁⲥⲥⲁ ⲉⲡⲡⲉⲧϣⲟⲩⲱⲟⲩ ⲥⲉⲛⲁⲙⲟⲟϣⲉ ⲛⲣⲁⲧⲟⲩ ϩⲙⲡⲉⲓⲣⲣⲟ ϩⲙⲡⲙⲁ ⲉⲧⲙⲙⲁⲩ ⲧⲛⲛⲁⲉⲩⲫⲣⲁⲛⲉ ⲉϩⲣⲁⲓ ⲉϫⲱϥ
7 ⲡⲉⲧⲟ ⲛϫⲟⲉⲓⲥ ⲉⲡⲁⲓⲱⲛ ϩⲛⲧⲉϥϭⲟⲙ ⲉⲣⲉⲛⲉϥⲃⲁⲗ ϭⲱϣⲧ ⲉϫⲛⲛϩⲉⲑⲛⲟⲥ ⲛⲉⲧϯⲛⲟⲩϭⲥ ⲙⲡⲣⲧⲣⲉⲩϫⲓⲥⲉ ⲙⲙⲟⲟⲩ ϩⲣⲁⲓ ⲛϩⲏⲧⲟⲩ ⲇⲓⲁⲯⲁⲗⲙⲁ
8 ⲛϩⲉⲑⲛⲟⲥ ⲥⲙⲟⲩ ⲉⲡⲉⲛⲛⲟⲩⲧⲉ ⲛⲧⲉⲧⲛⲧⲣⲉⲩⲥⲱⲧⲙ ⲉⲡⲉϩⲣⲟⲟⲩ ⲙⲡⲉϥⲥⲙⲟⲩ
9 ⲡⲉⲛⲧⲁϥⲕⲱ ⲛⲧⲁⲯⲩⲭⲏ ⲉⲩⲱⲛϩ ⲙⲡϥⲕⲁⲛⲟⲩⲉⲣⲏⲧⲉ ⲉⲕⲓⲙ
10 ϫⲉⲁⲕⲇⲟⲕⲓⲙⲁⲍⲉ ⲙⲙⲟⲛ ⲡⲛⲟⲩⲧⲉ ⲁⲕⲡⲓⲥⲉ ⲙⲙⲟⲛ ⲛⲧϩⲉ ⲉϣⲁⲩⲡⲓⲥⲉ ⲙⲡϩⲁⲧ
11 ⲁⲕϫⲓⲧⲛ ⲉϩⲟⲩⲛ ⲉⲡⲡⲁϣ ⲁⲕⲕⲱ ⲛϩⲉⲛⲑⲗⲓⲯⲓⲥ ⲙⲡⲉⲛⲙⲧⲟ ⲉⲃⲟⲗ
12 ⲁⲕⲧⲁⲗⲟ ⲛϩⲉⲛⲣⲱⲙⲉ ⲉϫⲛⲛⲉⲛⲁⲡⲏⲩⲉ ⲁⲛⲉⲓ ⲉⲃⲟⲗ ϩⲓⲧⲛⲟⲩⲕⲱϩⲧ ⲙⲛⲟⲩⲙⲟⲟⲩ ⲁⲕⲛⲧ ⲉⲃⲟⲗ ⲉⲩⲙⲁ ⲛⲙⲧⲟⲛ
13 ϯⲛⲁⲃⲱⲕ ⲉϩⲟⲩⲛ ⲉⲡⲉⲕⲏⲓ ϩⲛϩⲉⲛϭⲗⲓⲗ
14 ϯⲛⲁϯ ⲛⲁⲕ ⲛⲛⲁⲉⲣⲏⲧ ⲉⲛⲧⲁⲛⲁⲥⲡⲟⲧⲟⲩ ⲡⲟⲣϫⲟⲩ ⲉⲁⲧⲁⲧⲁⲡⲣⲟ ϫⲟⲟⲩ ϩⲙⲡⲁⲑⲃⲃⲓⲟ
15 ϯⲛⲁⲧⲁⲗⲟ ⲛⲁⲕ ⲉϩⲣⲁⲓ ⲛϩⲉⲛϭⲗⲓⲗ ⲉⲩⲕⲓⲱⲟⲩ ϯⲛⲁⲧⲁⲗⲟ ⲛⲁⲕ ⲉϩⲣⲁⲓ ⲛϩⲉⲛⲙⲁⲥⲉ ⲙⲛϩⲉⲛϭⲓⲉ ⲙⲛⲟⲩϣⲟⲩϩⲏⲛⲉ ⲛⲟⲉⲓⲗⲉ ⲇⲓⲁⲯⲁⲗⲙⲁ
16 ⲟⲩⲟⲛ ⲛⲓⲙ ⲉⲧⲣϩⲟⲧⲉ ϩⲏⲧϥ ⲙⲡⲛⲟⲩⲧⲉ ⲁⲙⲏⲓⲧⲛ ⲥⲱⲧⲙ ⲧⲁϫⲱ ⲛⲏⲧⲛ ⲛⲛⲉⲛⲧⲁⲡϫⲟⲉⲓⲥ ⲡⲁⲛⲟⲩⲧⲉ ⲁⲁⲩ ⲛⲧⲁⲯⲩⲭⲏ
17 ⲁⲓⲱϣ ⲉϩⲣⲁⲓ ⲉⲣⲟϥ ϩⲛⲧⲁⲧⲁⲡⲣⲟ ⲁⲩⲱ ⲁⲓϫⲓⲥⲉ ⲛⲧⲁⲥⲙⲏ ϩⲙⲡⲁⲗⲁⲥ
18 ⲉϣϫⲉ ⲁⲓⲛⲁⲩ ⲉϫⲓⲛϭⲟⲛⲥ ϩⲙⲡⲁϩⲏⲧ ⲙⲡⲣⲧⲣⲉⲡϫⲟⲉⲓⲥ ⲥⲱⲧⲙ ⲉⲣⲟⲓ
19 ⲉⲧⲃⲉⲡⲁⲓ ⲁⲡⲛⲟⲩⲧⲉ ⲥⲱⲧⲙ ⲉⲣⲟⲓ ⲁϥϯϩⲧⲏϥ ⲉⲡⲉϩⲣⲟⲟⲩ ⲙⲡⲁⲥⲟⲡⲥ
20 ϥⲥⲙⲁⲙⲁⲁⲧ ⲛϭⲓⲡⲛⲟⲩⲧⲉ ⲡⲉⲧⲉⲙⲡϥⲥⲁϩⲉⲡⲁϣⲗⲏⲗ ⲉⲃⲟⲗ ⲙⲙⲟϥ ⲁⲩⲱ ⲡⲉϥⲛⲁ ⲉⲃⲟⲗ ⲙⲙⲟⲓ
Psalms 64 · Psalms 66 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)