Psalms 61 — Aramaic (Peshitta)

2 ܫܡܥ ܐܠܗܐ ܨܠܘܬܝ ܘܨܘܬ ܠܒܥܘܬܝ

3 ܡܢ ܣ̈ܘܦܝܗ̇ ܕܐܪܥܐ ܠܟ ܗܘ ܩܪܐ ܐܢܐ ܒܛܘܪܦܗ ܕܠܒܝ ܕܥܠ ܟܐܦܐ ܐܪܝܡܬܢܝ ܘܒܝܐܬܢܝ

4 ܡܛܠ ܕܗܘܝܬ ܠܝ ܒܝܬ ܓܘܣܐ ܘܡܓܕܠܐ ܪܡܐ ܡܢ ܩܕܡ ܒ̈ܥܠܕܒܒܝ

5 ܕܐܥܡܪ ܒܡܫܟܢܟ ܠܥܠܡܝܢ ܘܐܣܬܬܪ ܒܛܠܠܐ ܕܟܢ̈ܦܝܟ

6 ܡܛܠ ܕܐܢܬ ܐܠܗܐ ܫܡܥܬ ܢܕܪ̈ܝ ܘܝܗܒܬ ܝܘܪܬܢܐ ܠܕܚ̈ܠܝ ܫܡܟ

7 ܘܐܘܣܦܬ ܝܘܡ̈ܬܐ ܥܠ ܝܘܡ̈ܬܗ ܕܡܠܟܐ ܘܫ̈ܢܘܗܝ ܠܕܪܕܪܝܢ

8 ܕܢܬܩܝܡ ܠܥܠܡ ܩܕܡ ܐܠܗܐ ܛܝܒܘܬܐ ܘܩܘܫܬܐ ܡܢܘ ܢܛܪܝܗ̇

9 ܗܟܢ ܐܙܡܪ ܠܫܡܟ ܠܥܠܡ ܥܠܡܝܢ ܟܕ ܐܫܠܡ ܢܕܪ̈ܝ ܝܘܡ ܡܢ ܝܘܡ