Read Psalms 50 side by side with translations · The Final Bible
1 ⲉⲡϫⲱⲕ ⲉⲃⲟⲗ ⲡⲉⲯⲁⲗⲙⲟⲥ ⲛⲇⲁⲩⲉⲓⲇ
2 ϩⲙⲡⲧⲣⲉⲛⲁⲑⲁⲛ ⲡⲉⲡⲣⲟⲫⲏⲧⲏⲥ ⲉⲓ ⲛⲁϥ ⲛⲧⲉⲣⲉϥⲃⲱⲕ ⲉϩⲟⲩⲛ ϣⲁⲃⲏⲣⲥⲁⲃⲉⲉ
3 ⲛⲁⲛⲁⲓ ⲡⲛⲟⲩⲧⲉ ⲕⲁⲧⲁⲡⲉⲕⲛⲟϭ ⲛⲛⲁⲕⲁⲧⲁⲡⲁϣⲁⲓ ⲛⲛⲉⲕⲙⲛⲧϣⲁⲛϩⲧⲏϥ ϥⲱⲧⲉ ⲉⲃⲟⲗ ⲙⲡⲁⲛⲟⲃⲉ
4 ⲉⲓⲁⲁⲧ ⲉⲙⲁⲧⲉ ⲉⲃⲟⲗ ϩⲛⲧⲁⲁⲛⲟⲙⲓⲁ ⲁⲩⲱ ⲛⲅⲧⲃⲃⲟⲓ ⲉⲃⲟⲗ ϩⲙⲡⲁⲛⲟⲃⲉ
5 ϫⲉϯⲥⲟⲟⲩⲛ ⲁⲛⲟⲕ ⲛⲧⲁⲁⲛⲟⲙⲓⲁ ⲁⲩⲱ ⲡⲁⲛⲟⲃⲉ ⲙⲡⲁⲙⲧⲟ ⲉⲃⲟⲗ ⲛⲟⲩⲟⲉⲓϣ ⲛⲓⲙ
6 ⲛⲧⲁⲓⲣⲛⲟⲃⲉ ⲉⲣⲟⲕ ⲙⲁⲩⲁⲁⲕ ⲁⲓⲣⲡⲉⲧϩⲟⲟⲩ ⲙⲡⲉⲕⲙⲧⲟ ⲉⲃⲟⲗ ϫⲉⲕⲁⲥ ⲉⲕⲉⲧⲙⲁⲉⲓⲟ ϩⲛⲛⲉⲕϣⲁϫⲉ ⲛⲅϫⲣⲟ ϩⲙⲡⲧⲣⲉⲕϯϩⲁⲡ ⲉⲣⲟⲓ
7 ⲉⲓⲥ ϩⲏⲏⲧⲉ ⲅⲁⲣ ⲛⲧⲁⲩⲱⲱ ⲙⲙⲟⲓ ϩⲛϩⲉⲛⲁⲛⲟⲙⲓⲁ ⲁⲩⲱ ⲛⲧⲁⲧⲁⲙⲁⲁⲩ ϫⲓⲟⲩⲱ ⲙⲙⲟⲓ ϩⲛϩⲉⲛⲛⲟⲃⲉ
8 ⲉⲓⲥ ϩⲏⲏⲧⲉ ⲅⲁⲣ ⲁⲕⲙⲉⲣⲉⲧⲙⲉ ⲛⲉⲧϩⲏⲡ ⲙⲛⲛⲉⲧⲉⲛⲥⲉⲟⲩⲟⲛϩ ⲉⲃⲟⲗ ⲁⲛ ⲛⲧⲉⲕⲥⲟⲫⲓⲁ ⲁⲕⲟⲩⲟⲛϩⲟⲩ ⲛⲁⲓ ⲉⲃⲟⲗ
9 ⲕⲛⲁϭⲉϣϭⲱϣⲧ ⲛⲟⲩϩⲩⲥⲥⲱⲡⲱⲛ ⲉⲃⲟⲗ ϩⲙⲡⲉⲥⲛⲟϥ ⲙⲡϣⲉ ⲧⲁⲧⲃⲃⲟ ⲕⲛⲁϫⲟⲕⲙⲉⲧ ⲉⲃⲟⲗ ⲛϩⲏⲧϥ ⲁⲩⲱ ϯⲛⲁⲟⲩⲃⲁϣ ⲛϩⲟⲩⲉ ⲉⲩⲭⲓⲱⲛ
10 ⲕⲛⲁⲧⲣⲁⲥⲱⲧⲙ ⲉⲩⲧⲉⲗⲏⲗ ⲙⲛⲟⲩⲟⲩⲛⲟϥ ⲥⲉⲛⲁⲧⲉⲗⲏⲗ ⲛϭⲓⲛⲕⲉⲉⲥ ⲉⲧⲑⲃⲃⲓⲏⲩ
11 ⲕⲧⲉⲡⲉⲕϩⲟ ⲛⲥⲁⲃⲟⲗ ⲛⲛⲁⲛⲟⲃⲉ ⲁⲩⲱ ⲛⲁⲁⲛⲟⲙⲓⲁ ⲧⲏⲣⲟⲩ ϥⲟⲧⲟⲩ ⲉⲃⲟⲗ
12 ⲟⲩϩⲏⲧ ⲉϥⲟⲩⲁⲁⲃ ⲥⲟⲛⲧϥ ⲛϩⲏⲧⲧ ⲡⲛⲟⲩⲧⲉ ⲁⲩⲱ ⲟⲩⲡⲛⲉⲩⲙⲁ ⲉϥⲟⲩⲧⲱⲛ ⲙⲁⲣⲉϥⲣⲃⲣⲣⲉ ⲙⲡⲁⲥⲁⲛϩⲟⲩⲛ
13 ⲙⲡⲣⲛⲟϫⲧ ⲉⲃⲟⲗ ⲙⲡⲉⲕϩⲟ ⲁⲩⲱ ⲡⲉⲕⲡⲛⲉⲩⲙⲁ ⲉⲧⲟⲩⲁⲁⲃ ⲙⲡⲣϥⲓⲧϥ ⲛⲥⲁⲃⲟⲗ ⲙⲙⲟⲓ
14 ⲙⲁ ⲛⲁⲓ ⲙⲡⲧⲉⲗⲏⲗ ⲙⲡⲉⲕⲟⲩϫⲁⲓ ⲁⲩⲱ ⲛⲅⲧⲁϫⲣⲟⲓ ϩⲛⲟⲩⲡⲛⲉⲩⲙⲁ ⲛϩⲏⲅⲉⲙⲟⲛⲓⲕⲟⲛ
15 ϯⲛⲁⲧⲥⲁⲃⲉⲛⲓⲁⲛⲟⲙⲟⲥ ⲉⲛⲉⲕϩⲓⲟⲟⲩⲉ ⲁⲩⲱ ⲛⲁⲥⲉⲃⲏⲥ ⲛⲁⲕⲟⲧⲟⲩ ⲉⲣⲟⲕ
16 ⲙⲁⲧⲟⲩϫⲟⲓ ⲉⲃⲟⲗ ϩⲛϩⲉⲛⲥⲛⲟϥ ⲡⲛⲟⲩⲧⲉ ⲡⲛⲟⲩⲧⲉ ⲙⲡⲁⲟⲩϫⲁⲓ ⲡⲁⲗⲁⲥ ⲛⲁⲧⲉⲗⲏⲗ ⲛⲧⲉⲕⲇⲓⲕⲁⲓⲟⲥⲩⲛⲏ
17 ⲡϫⲟⲉⲓⲥ ⲕⲛⲁⲟⲩⲱⲛ ⲛⲛⲁⲥⲡⲟⲧⲟⲩ ⲛⲧⲉⲧⲁⲧⲁⲡⲣⲟ ϫⲱ ⲙⲡⲉⲕⲥⲙⲟⲩ
18 ϫⲉⲉⲛⲉⲕⲟⲩⲉϣⲑⲩⲥⲓⲁ ⲛⲉⲓⲛⲁϯ ⲡⲉ ⲙⲉⲕⲟⲩⲉϣϭⲗⲓⲗ
19 ⲧⲉⲑⲩⲥⲓⲁ ⲙⲡⲛⲟⲩⲧⲉ ⲡⲉ ⲟⲩⲡⲛⲉⲩⲙⲁ ⲉϥⲟⲩⲟϣϥ ⲟⲩϩⲏⲧ ⲉϥⲟⲩⲟϣϥ ⲁⲩⲱ ⲉϥⲑⲃⲃⲓⲏⲩ ⲙⲡⲛⲟⲩⲧⲉ ⲛⲁⲧⲥⲧⲟϥ ⲉⲃⲟⲗ ⲁⲛ
20 ⲁⲣⲓⲡⲉⲧⲛⲁⲛⲟⲩϥ ⲡϫⲟⲉⲓⲥ ϩⲙⲡⲉⲕⲟⲩⲱϣ ⲛⲥⲓⲱⲛ ⲁⲩⲱ ⲙⲁⲣⲟⲩⲕⲱⲧ ⲛⲛⲥⲟⲃⲧ ⲛⲧϩⲓⲉⲣⲟⲩⲥⲁⲗⲏⲙ
21 ⲧⲟⲧⲉ ⲕⲛⲁⲟⲩⲉϣϩⲉⲛⲑⲩⲥⲓⲁ ⲛⲇⲓⲕⲁⲓⲟⲥⲩⲛⲏ ϩⲉⲛⲧⲁⲗⲟ ⲙⲛϩⲉⲛϭⲗⲓⲗ ⲧⲟⲧⲉ ⲥⲉⲛⲁⲧⲁⲗⲉϩⲉⲛⲙⲁⲥⲉ ⲉϫⲙⲡⲉⲕⲑⲩⲥⲓⲁⲥⲧⲏⲣⲓⲟⲛ
Psalms 49 · Psalms 51 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)